onsdag 8. mars 2017

ሓዲኦም ናብ ባቢሎን ሓዲኦም ናብ ገዳም እንዳኸዱ ጎፍንጎፍ ተራኪቦም ዝገበርዎ ሓጺር ዝርርብ፣፣

ሕቶ፥-ናበይ ደኣልካ ትኸይድ ዘለኻ ክቡር መንእሰይ፧
መልሲ፥-ናብቲ ፊትና ዘላ ዓባይ ከተማ ምስሓጥያታ ክቃደስ እንዳበልኩ ኢየ ዝሸባሸብ ዘለኹ።እዚ ምሳይ ዘሎ ሓጥያት ውሒዱኒስ፡ምዕራባዊ ስነ ሓሳብ ክምገብ ሓጥያት ከዋህልል ኢየ ናብታ ዓባይ ከተማ ዝኸይድ ዘለኹ።
ሕቶ፦ንስኹምከ ሽማግለ ናበይ ኢኹም፧
መልሲ፣- ኣነስ ኣብታ ትኸዳ ዘለኻ ከተማ ንነዊሕ ዘመናት ዘዋህለልክዎ በበይኑ ዓይነት ሓጣውእ፡ምስካሙ ስኢነስ፡እግዚኣብሄር እንተማሓረኒ ኢለ ናብ ገዳም ኣንዳኸድኩ ኢየ፡
ሕቶ፦ እግዚኣብሄርሞ ኣብቲ ከተማ የለን ድዩ፧
መልሲ፦ ኣሎባ።ኣሎ የግድኻ።ግን ኣይከኣልክዎን፡ኣብኡ ኮይነውን ይነብዕን ይጽልን ኢየ ነይረ።ስለሓጥያተይሲ ኣብታ ዓባይ ባቢሎን ኮይነ ብምብካይ ምጽጋብ ሲኢነዮሞ፡ናብ ብሕትውና ኮይነ ሰብ ከይረኣየኒ ኣነን እግዚኣብሄርን ጥራይ ዘለናሉ ኮይነ ስለቲ ዘፍረኽዎ ናይ ሓጥያት ፍርያት ክበኪ ወሲነ።ኣብቲ ከተማ ክበኪ እንከለኹ ሰባት ኣብ ቤተ እግዚኣብሄር ስለዝርእዩኒ፡መመጺኦም የድኑቑኒሞ፡እቲ ስለሓጥያተይ ዝበለኽዎ፡ከም ንፋስ ቆውዒ(ማንጢለን) በኒኑ ከምዝኸይድ ይገብሮሞ፡ጸጋይ ይግፈፍ እናተፈለጠኒ ድማ ብስነ ኮንቱ ውዳሴ ይስነፍ።
ሕቶ፦እዋእ፡እሞ ኣነ ናብዛ ከተማ ይኸይድ ኣሎኹሞ፡እንታይ ተማኽረኒ፧
መልሲ፦ ንስሓ እቶ፡መዓልታዊ ክትወድቕ እንከለኻ መዓልታዊ ድማ ንኣባት ነብስኻ ስለሓጥያትካ ክትጸባጸብ ፈትን።ከምቲ መዓልታዊ እቶትካ ኣብ ወረቐት እንዳጸሓፍካ ትጽሕፎ፡ሓጥያትካውን ናይ መዓልታዊ ህያብ ሰይጣን ኢዩሞ፡ዕለታዊ ዘዝገበርካዮ ሰይጣናዊ ዘበለ ጸጺሒፍካ ኣብ ካህንካ ተናስሓሉ።ሕጂ ወደሓንካ።ድንግል ማርያም ምስኻ ትኹን።

ክልተ ሰባት ናብ ናይ ሓጥያትን፡ናብ ናይ ጽድቅን ከተማ እንክኸዱ ጎፍንጎድ ተባሂሎም ዝዕለልዋ ሓጻር ዝርርብ።
ወስብሀት ለእግዚኣብሄር

ኮፍ ኢሎም ዝሰቐልዎ፣ ደው ኢሎም ምውራድ ሰአንዎ፣፣ መሳጢ ምኽሪ ብድ. Daniel Kibret

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ኮፍ ኢሎም ዝሰቐልዎ
፨፨፨፨፨፨፨፨፨፨፨፨፨
ናይ ኢራቕ ኩርዳውያን ከምዚ ኢሎም ይትርኹ።
"ሓንቲ ጋል ንጉስ ነበረት።ሓደ ተፍቅሮ ወዲውን ነበረ እሞኸድኣ፡ምስቲ ናይ ቤተ መንግስቲ ሓላዊ ዋርድያ ትመኻኸርሞ፡ነዚ ኣፍቃሪኣ ናብ ክፍላ ተእትዎ ነበረት።ናይ ቤተ መንግስቲ ሓላዊ ዝተወሰነ ገንዘብን ጨርቀመርቅን ትህቦ ስለዝነበረት ብደስታ ምስጢር ይሕሉ ነበረ።ሓደ መዓልቲ ግን ዘይተሓሰበ ነገር ተኸሰተ።እታ ልዕልቲ ጋል ንጉስን ኣፍቃሪኣን ቱፋሕ ቆሪጾም ብምምጻእ እንዳተጻወቱ ይበልዑ ነበሩ።ክልቲኦም ኣፎም ከከፊቶም ናይቲ ቱፋሕ ምታር ሓደ ነቲ ሓደ ናብ ኣፍ ንኣፎም እንዳወርወሩ ምእታው ነበረ ጸወትኦም።
እንዳተሰሓሓቑ ናይ ቱፋሕ ቁራጽ ናብ ኣፎም ክውርውሩ ፡እታ ልዕልቲ ጋል ንጉስ ዝወርወረታ ናይ ቱፋሕ ቁራጽ፡ሃንደበት ናይ ኣፍቃሪኣ ጎሮሮ ውሽጢ ኣትያ ተቐርቀረት።ማይ እንተሃበቶ፡ክሳዱ ዋላ እንተሃረመቶ ክትወርደሉ ኣይከኣለትን።ኡይይይ ኢላ ከይትውጭጭ፡እዚ ወዲ መን ኢዩ? ከመይ ኢሉኸ መጸ? ዝብሉ ሕቶታት ክትምልሶም ዘይትኽእል ኢዮም።በዚ ህሞት እቲ ወዲ ትንፋስ ሓጺርዎ ብኡብኡ ሞተ።
ናይቲ ዋርድያ ናይ ምውጻእ ሰዓት ክኣክል እንከሎ፡እቲ ዋርድያ መጸ።ከምቲ ቀደሙ ግን ነቲ ወዲ ሓቢኡ ከምውጽኦ ኣይተኸኣለን።ሕጂ ዝጸንሖ ሬሳ ኢዩ።" በጃኻ ትኽእሎ ኩሉ ጌርካ ነዚ ሬሳ ኣውጻለይ።ኩሉ ትደልዮ ነገር ኩሉ ክገብረልካ ኢየ።" በለቶ።ናይ ዋርድያ ሰራሕተኛ" ምንም ሽግር የለን፡ዘድልየኒ ግን ገንዘብ ኣይኮነን።"በላ።ንሳ "ምንም ሽግር የለን፡ጥራይ ቀልጢፍካ ኣውጻለይ።" ኢላ ለመነቶ፡ናይ ዋርድያ ሰራሕተኛ ነቲ ሬሳ ጉሓፍ ዝጉሑፍ ተመሲሉ ኣውጽኦ።ንሳ ድማ ኡፎይ በለት።
ናይ ዋርድያ ሰራሕተኛ ተመሊሱ መጸሞ፡ቃል ብዝኣተዉሉ መሰረት ዝደልዮ ነገር ንኽትገብረሉ ሓተታ።" እንታይ፧?" በለቶ እታ ልዕልቲ ጋል ንጉስ።" ምሳኺ ምድቃስ ኢየ ዝደሊ" በላ።ጸሓይ ከምዝበዝሓ ውልዕ ኢላ ተናደደት።" ከመይ ዝበሉኻ ደፋር ኢካ፡ምስ ልዕልቲ ጋል ንጉስ ክትድቅስ ትሓስብ፣! ሕጂ ካብዚ ጥፋእ!" በለቶ።እሺ ኢሉ ወጸሞ፡ናይ ኣፍቃሪኣ ኣስከሬን ሒዙላ መጸ።እዚ ምስ ገበረ ኽርጥ በላ።እታ ዘላታ ኣማራጺ ናይቲ ወዲ ድሌቱ ከተማልኣሉ ጥራሕ ኮነ። ተሸነፈት።ብሓደ ግዜ ሰለስተ ነገራት ከሰረት።ኣፍቃሪኣ፡ክብራን ንናይ መጻኢ ተስፋኣን፡ኣፍቃሪኣ ብምማቱ፡ክብራ ኣብ ትሕቲ ባኣገልጋሊኣ ብምውዳቑ፡ንናይ መጻኢ ተስፋኣን ድንግልናኣን ብምኽሳራ።
በዚ ጥራይ ኣየብቅዓላን፡እቲ ናይ ዋርድያ ሰራሕተኛ እንዳመጸ" ከጋልጸኪ ኢየ"ይብላ።በታ መዓልቲ ሬሳ ሒዙ ዝመጻላ መጀነኒ የርእያ።ንሳ ድማ ትፈርሕ።ብፍርሃት ዝኣክል ዘይትደልዮ ሰብ ኣብ ትሕቲ እግሩ ወደቐት።ምስኡውን ትድቅስ ነበረት።እዚ ግን ክውድኣላ ኣይተኻእለን።በርነት ኮይኑ ኣሰልቸዋ።"ሽግራት ንምግላጽ እንተዘይክኢልካ ሽግራት እንዳነገሱኻ ክኸዱ ኢዮም" ይብሉ ኩርዳውያን።ሽግር እንተኣታሊልካዮም መሊሶም ይሑዙኻ።እንተጋሊጽካዮም ግን ገዲፎምኻ ይኸዱ ዝብል ኣበሃህላ ኣለዎም።
እታ ልዕልቲ ሕጂው፡ ሽግሩ ክትፈትሕ ዘይኮነትሲ ምህዳም መሪጻ።ሓደ ለይቲ እቲ ናይ ሓለዋ ዋርድያ ሰራሕተኛ ተሓቢኡ ከምልማዱ ናብኣ ክመጽእ ከሎ፡ነቧኣ ተዳልዎ ዝነበረት ናይ ልዑል ወይኒ ኣዳልያ ክትጽበዮ ጸነሐት።ብደስታ እንዳደጋገመ ሰተየ።ምስኣ ምስ ደቀሰ ድማ ብሓደ ቦክሰር ከም ዝተሃርመ ኮይኑ ተዘሪሩ ተረፈ።ንሳ ድማ እንዳጎተተት ወሲዳ በቲ ኣፍደገ ኣጋረደቶ።ክወግሕ ክደሊ ከሎ ሓለውቲ ረኣዪዎ።ጽግዕ ኢሎም እንተሸተትዎ ኣፉ ናይ ወይኒ መስተ ሸተተ።እቲ ወይኒ መስተ ናይ ልዑል ንጉስ ምኻኑ ብጨንኡ ይምስክር ኢዩ።"ናይ ልዑል ወይኒ ሰሪቑ ሰትዩ!" ኢሎም ኣብ ማእከል ኣደባባይ ሰቂሎም ቀተልዎውን።ነገሩ በዚ ዘብቅዐ መሰለ።ነገር ግን ናይ ዕብዳን መዓልቲ ኣይመስን ኢዩ፡ኩርዳውያን ከምዚ ይብሉ።"እቲ ትሰርሖ ኣፍ ደገ ኩሉ ግዜ ትኸደሉ ምኻንካ ኣረጋግጽ፡ንሓንቲ ግዜ ጥራይ መውጺኢ ኢልካ ነቲ ኣፍደገ እንተሰሪሕካዮ፡ካብቲ ኣፈፈት ንድሓር ዘሎ ናበይ ከምትኸይድ ጋን ክኾነካ ኢዩ።ነቲ ኣፌፈትን፡ነቲ መንገድን ሕሰበሉ።ነቲ መንገድን፡ትበጽሖ መዕረፍን ምስቲ ደው ኢልካሉ ዘለኻ፡ጸኒሕካሉ ዘለኻ ይኹን መኽረሚኻ ሕሰበሉ።" ይብሉ ኩርዳውያን።
ናይቲ ሓለዋ ዋርድያ ኣብ ማእከል ኣዳባባይ እንክስቀል፡ናይቲ ወይኒ ጣዕሚ ኣብ ኣፉ ተሪፉ ስለነበረ፡እንዳደጋገመ ከናፍሩ ይልሕስ ነበረ።ካብዚ ተበጊሱ እቲ ዝሰተዮ ወይኒ ኣዝዩ ጥዑም ኢዩ፡ተባሂሉ ኣብታ ዓዲ ተወረየ።እዚ ወረ ዝሰመዐ ካልእ ልዑል ወድንጉስ፡ነዚ ወይኒ ዝሰርሐቶ ጋል ልዑላን ጋል ንጉስ ደለያ።ናብ ስድራእ ናብ ቤት ንጉስ ድማ ሽማግለታት ለኣኸ።
እዚ ዜና ነቦኣ ናይ ብስራት፡ንዓኣ ግን ናይ ውርደት ዜና ነበረ።ድንግልናኣ ከሲራ ኢያ፡ብኩርዳውያን ድማ ድንግል ዘይኮነት ጋል ኣሽንካይዶ ወድ ልዑል ንጉስሲ ተራ ሰባት እካ ኣየእትዉዋን ኢዮም።ክሳብ ሕጂ ነቲ ሽግር ካብ ምግላጽ እንዳሃደመት ነይራ፡ነገር ግን ሓደ ሽግር ብኻልእ ሽግር እንዳሕለፈት መጸት።ሕጂ ናይ መጋለጫ ሰዓት ኣኸለ።ሽግራት ብመፍትሒ ምፍታሕን፡ሽግራት ብኻልእ ሽግር ምሕላፍን ይፈላለ ኢዩ።ሽግር ብሽግር እንተሕሊፍካዮ፡ግዜ እንዳገዝኣኻ ኢኻ።ሽግር ብመፍትሒ እንተሕሊፍክስዮ ድማ ልቢ እንዳገዝእካ ኢኻ፡ይብሉ ኩርዳውያን።
ናይታ ልዕልቲ ኣቦ መርዓ ምቕባሉ ምስ ሰመዐት፡ከም ልማዳ ሓደ ብልሓት ቀየሰት።ሓደ ተኣማኒ ኣገልጋሊ ጸወዐትሞ፡ሓደ ሕማኾ ወርቂ ሂባ ከምዚ ክትብል ኣዘዘቶ።" ኣብ ምሉእ ዒራቕ ኮሊልካ ዙር፡ብመልክዕን ብቁመትን፡ብጠባይን፡ንዓይ ትመስል ጋል ደሊኻ ኣምጻለይ።" ወዮ ወዲ ንኽሓትት ካብ ቦታ ናብ ቦታ ዞረ።ኣብ መጨረሽታ ሓንቲ ጋል ረኸበ።እታ ልዕልቲ ምስ ረኣየታ ቅምጥ ኢላ ንዓኣ ትመስል ኮይና ጸንሓታ።ከምዚ ድማ በለታ እታ ልዕልቲ።"ሕጂ ንስኺ ልዕልቲ ክትኮኒ ኢኺ፡ወዲ ልዑል ውን ክትምርዓዊ ኢኺ።ሕጽኖትኪ ግዜ ውን ምስኡ ሓቢርኪ ከተሕልፍዮ ኢኺ፡ኣነውን ንዓኽን ነቲ ልዑል ወድንጉስን ንግዚኡ እንዳተኣዘዝኩ ከገልግለኪ ኢየ።ልክዕ ሕጽኖትኪ ኣብ ዝሓልፈትላ ግዜ ግን ክትቅይርኒ ኢኺ።ንስኺ ናብ ኣገልጋሊትነት፡ኣነ ድማ ናብ ቤዓልቲ ቤትነት ክምለስ ኢየ።ነዚ ኹሉ ውዕለታኺ ከኣ ክህበኪ፡ንመርዓይ ዝመጸ ህያብ ኩሉ ትወስድዮ።" በለታ።እታ ኣገልጋሊ ብደስታ ተፈኽነነት።
ናይ መርዓ መዓልቲ ኣኸለ፡እታ ገረድ ናይ መርዓት ልንሲ ለበሰት።እታ ጋል ንጉስ ድማ ናይ ገረድ ልብሲ ለበሰት።ማንም ክፈላልየን ዝኽእል የለን።ሉዑል ወድ ልዑላን መጸ።መርዓቱ ሒዙ ከደ።እታ ኣገልጋሊት ተኸቲላ ምስኦም ከደት።ኣብቲ ናይ ውድሉዓል ቤት ድማ ቀነየት።ናይቲ ወድልዑላን ድግስ ምስ ተወደአ፡እታ መርዓት ምስ መርዓዊኣ ናብ ቤት ሕጽነት  ኣተወት፡እታ ኣገልጋሊት ግን ኣብ ደገ ተረፈት።ኣተሓሳሰባ፡እዚ ዕድልዚ ናታ ነበረ።ነገር ግን ሕጅ ኣይኮነን።ሕጂ ኣብ ውሽጢ ክትህሉ ዝግበኣ ዝነበረ ንሳ ኢያ፡ግን ንምሕላፍ ኢላ ብዝፈጠረቶ ሽግር ግዳም ተረፈት።ኣብዚ ደረጃ ከይበጽሐት እንከላ፡ነገራት ኣስተኻኺላ ብክብሪ ክትወጽእ ትኽእለሉ ዝነበረቶም ዕድላት ትዝክሮም ተስተንትኖም።ዕድላት ኩሎም ኣምሊጦማ ኢዮም።ሽግራት ብኻልእ ሽግር ብምትካእ ዕድላት ኣምኪና ኢያ።ስለዚ ክብራ ንኻልእ ኣሕሊፋ ሃበት።እቲ ህዝቢ፡እታ ኣብቲ ሕጽኖት ዘላ ንሳ መሲላቶም፡ግን ኣይኮነትን።ዝተመረጸት ንሳ ናብ ክብሪ ዝኣተወት ግን ካልእ፡ዝተመርዓወቶ ንሳ፡ዘእተወቶ ግን ካልእ ኢያ።
ናይ ሕጽኖት መዓልታት ሓለፉ፡እታ ጋል ግን ናብ ገረድነት ክትምለሰላ ኣይከኣለትን።ሓደ ግዜ ኣብ መሕጸቢ ክፍሊ፡እታ እመቤትን እታ ኣገልጋሊትን ጎፍ ንጎፍ ተራኸባ፡ቁሊሕ ኢላ ድማ" ሕጂ ይኣኽለኪ፡ተመለሲ ።ንውዕለትኪ ዘዳለኽዎ ህያብ ድማ ውሰዲ፡!" በለታ።እታ እመቤቱ ግን"የዋህ ኢኺ።ክርእዮ ዘይክእል ዝነበርኩ ኣርኢኺኒ፡ክረኽቦ ዘይክእል ዝነበርኩ ሂብክኒ፡ክበጽሖ ዘይክእል ቦታ ኣብጺሕክኒ።እቲ ኣነ እሺ ክብለኪ እንከለኹ፡ነዚ ኹሉ ኣይፈልጥን ነይረ።እዚ ዓራት ክንድዚ ዝማውቕ ምኻኑ ኣይቀመስክዎን ነይረ።ክብሩ ክንድዚ ዘሑጉስ ምኻኑ ኣይፈልጥን ነይረ።ምቾትነቱ ክንድዚ ልብኻ ዝሰልብ ምኻኑ ኣይፈልጥን ነይረ። እምበኣር ሕጂ ንዓኺ ካብ ኣገልጋሊትነት ናብ እመቤትነት ምምጻእ ቀሊል'ዩ ዝኾነኪ፡ንዓይ ግን ካብ እመቤትነት ናብ ገረድነት ምውራድ ከቢድ ኢዩ።ነዚ ዝመስል ነገር ድሕሪ ምቕማሰይ ፡'ክትሓድገለይ ኢያ'ኢልኪ ምሕሳብኪ ዕሽነትኪ ብዙሕ ኢዩ።ዓራት ብከምዚ ብቀሊል ዝግደፍ ኣይኮነን፡ሃብቱ ኩሉ ናተይ ምኻኑ እንዳረኣኹኸ፡ናትኪ ህያብ ዝምባህቖኒሲ ይመስለኪዶ!?" በለታ።
"እነሆ" ይብሉ ኩርዳውያን፡ " እነሆ በዚ ዝተበገሰት እታ ኣገልጋሊት እመቤት፡እታ እመቤት ጋል ንጉስ ድማ ኣገልጋሊት ኮይነን ነበራ።ኮፍ ኢላ ዝሰቐለቶ፡ደው ኢላ እካ ንውራዱ ጸገማ።"
ወስብሀት ለእግዚኣብሄር።
ጽሓፊ ድ፣ዳኒኤል ክብረት
ትርጉም፣ተኽለማርያም ጉዕላይ

ናሁ ይመጽኡ ብዙሐን ብስምየ፣ብዙሓን ብስመይ ክመጹ ኢዮም

ብስም ኣብ ወወልድ ወመንፈ ቅዱስ ኣሀዱ ኣምላክ ኣሜን።
ክርስትያን እንተድኣ ኮይንካ፡ኣህዛብ "ናበይ ገጽካ ኢኻ ትኸይድ፧" ኢሎም ክሓቱኻ ኢዮም።"ናብ ቀራንዮ" ኢልካ መልሰሎም።"ቀራንዮ ደኣ፡ኣምላኽኩም ዝተሰቕለላዶ ኣይኮነትን፧ኣቦኻ ዝቐተለትልካስ ከመይ ኣቢልካ ኣፍቀርካያ፧" ኢሎም ከስዕቡልካ ኢዮም።ንስኻ ድማ ቅድሚ ብዛዕባ ኣምላኻ ነቶም ሰባት ምንጋርካ፡ንኣምላኽካ ስለቶም ሰባት ብጸሎት ንገሮ፡ልቦነኦም ክኽፈትን ሓቂ ክፈልጡን፡ ኣምላኻ ብመሎኮታዊ ምሐርቱ ክሕግዞም ብጸሎት ለምኖሞ፡ንዕዖም ድማ ሕተኦም መልሰሎም።
"ኣቦይ ኣይመውትን ኢዩ።ንስኻትኩም ዝመውት ኣቦ ኢኹም ትውንኑ፡ነዚ ንስኹም ትውንንዎ ኣቦ ኣነውን ብገዛእ ፍቓደይ ይውንኖ ነይረ ኢየ።እንተኾነ ንሱ ሰፈሩ ኣብ ሃገረ ምውታን፡ኣብ ሲኦል ስለዝኾነ፡ንዑኡ ምኽታል ማለት ናብ ሰፈሩ ምእታው ማለት ኢዩ።ስለዚ ብገዛእ ፍቓደይ፡ናብዛ ሰፈር እዚኣ ንኽኣቱ ነዚ ናይ ሞት ኣቦ ባርያ ክኾኖ ቃለ ማሕላ ገይረሉ ነበርኩ።ስለዚ እቲ ዘይመውት ኣምላኸይን ኣምላከ ኩሉ ፍጥረትን፡ነታ ትመውት ባህሪ ወድሰብ ተዋሃሂዱ፡ካብ ጉድጋድ ሞት ሓራ መታን ከውጻኒ ኢዩ ዝሞተ፡እታ ንሱ ዝተሰቕለላ ንዑኡ ዝቐተለት ዘይኮነትሲ ንዓይ ካብ ሞቑሕ ዝፈተሐትኒ ንዑኡ ድማ ክሳብ ክንድዚ ከምዘፍቅረኒ ንምግላጽ ዝተጠቕመላ ናይ ዝፋኑ ብርዒ ኢያ ።በዛ ብርዒዚኣ ንወድሰብ ፍቕሩ ገለጸሉ፡ኣብዛ ዓባይ ዝፋኑ ገይሩዋ ዝወዓለ ናይ ክርስትያን ኣርማ፡ ገንሸል ኮይኑ ሓንሳብን ንሓዋሩን ስለኹሉ ሰብ ዝተበጀወላ'ያ፡እምበር ንሱስ ሰፈሩ ኣብ ሃገረ ምዉታን ስለዝኾነ ኣይኮነን።
ቀጺሎም ክሓቱኻ ኢዮም።"እሞ እቲ ኣብ መስቀል ተኣሲሩ ዘልቅስ ዝነበረ ደኣ መን ኢዩ፧"
" ንሱዶ፡ንሱደኣ ኣነ ብገዛእ ፍቓደይ ብመልቀስን ጫውጫውታን ዝሳቐዮ ዝነበርኩ ስቅያተይ መኸተምታ መታን ክህልዎ፡ቃንዛ ዘይስምዖ ክንሱ ብቓንዛይ ዝተቐንዘወ፡ካብ ቃንዛይ ድማ ሓራ ዘውጻኒ ክርስቶስ ኢዩ።ንሱ ዝተቐንዘወ፡ነቲ ምንጪ ቃንዛ ኮይኑ ንሰባት ናብ ሲኦል ዝመርሕ ዝነበረ ሰይጣን መታን ክኣስር ኢዩ።ዓይነ ሕልናኻ ብስጋ ዝተኣሰረ ክርስቶስ ሪኢኻዮ ሓቀይ ፡መስቀል ግን ንክርስቶስ ሹጉጥ ኮይና ዝቐተለት መሳርያ ዘይኮነትሲ፡ንሰይጣንን ሰራዊቱን መሓንኮላ ኮይና ዝቐፈደቶ ናይ ክርስትና ኣርማ ኢያ።"
ሕቶ ኣሎኒ ኢሉ ሕጅውን ክመጻካ ኢዩ፥-
"እሞ ሓራ እንተወጺእኻ ደኣ፡ዳግማይ ናብ መስቀል፡ናብ መከራ ዘኽይድ እንታይ ኣሎካ፧"
ኣጆኻ ብመንፈቅዱስ ተመሊእካ መልሰሉ።
"ናብ ቀራንዮ ዘኺደኒ ዘሎ ምኽንያት ኣብኡ፡ከምቲ ሰይጣን ዝተኣሰሮ ተሓኒቐ ንኽተርፍ ዘይኮነስ፡ከምቲ ክርስቶስ ዝሓለፎ ሕላፍ ንኽሓልፍ ኢየ።ቀደም ዘመን፡መንግስተ ሰማያት፡ብዶሞዝ ክትእቶ ከባድ ነይራ፡ሕጂ ግን ክርስቶስ ነቲ ሽዑኡ ዝነበረ ክብደት ኣብ መስቀል ተሰቒሉ ኣፍኺስዎስ፡ብዓስብን ብገድልን ቅድስና ክትእቶ ከምትከኣል ገይርዋ።ክርስቶስ ስሌኻ ክብል መከራ ዝተቐበለ ምኻኑ ትኣምን ተኾይንካ፡ነቲ ንሱ ዝሓለፎ ኣሰር ክትረግጽ፡ነቲ ንሱ ዝተሰከሞ ኣርማ ክትስከም፡ነቲ ንሱ ዝተኸደኖ ቀይሕ ካባ ክትክደን፡ነቲ ንሱ ዝሰተዮ ናይ ጽዋእ ሓሞት ክትጥዕም ግድነትካ ኢዩ።ምኽንያቱ መንግስተ ሰማያት ናይ ሃካያት ስፍራ ዘይኮነትሲ፡ናይ ጽዒሩ መንፈሳዊ ጻዕሪ ዝመሃረን፡ተጋዲሎም 'ኣገናዕ ኣንቱም ናይ ኣቦይ ብሩኻት' ዝበሃሉላ መዕረፊት ቅዱሳን ኢያ።" ሽዑኡ ንስኻ ድማ ሕቶቶ፦
"ክሓተካዶ፧"
ሕተት ሕተት"
" ናብ ናይ ዕረፍቲ ስፍራስ ክትኣቱ ተስፋ ኣሎካዶ፡"
እንታይ ተስፍኡ፡ብርግጽ እምበር።" ኢሉ ክምልስ ኢዩ።ሽዑኡ ንስኻ ዕትብ ኢልካ መልሰሉ።" እሞ ክተዐርፍ ትደሊ ተኾይንካደኣ፡ኣየናይ ግብሪ ጽድቂ ምሠሰራሕካ ኢኻ ክተዕርፍ።ዘዕርፍ ሰብኮ፡ምስ ደኸመ፡ምስተቓለሰ ኢዩ፡ኣበይ ሰሪሕካ ኢካኸ ከዕርፍ ኢየ፡ዝበልካ፧ መስቀል ናይ ስራሕ ስፍራ ኢዩ፡ብዙሕ ዓይነት ስራሕ እካ እንተሃለወ፡ንናይ መስቀል ስራሕ ዝደፍርዋን ዝበቕዑዋን ግን ኣዝዮም ውሑዳት ምኻኖም፡መጽሓፍ ይዛረብ ኢዩ።' (ጹውዓት ብዙሓት፡ሑሩያት ግን ውሑዳት፡ ከምዝብል) ናብ'ቲ ዕረፍቲ'ቲ ክእትወኒ ኢዩ፡ክፈርድ ኢዩ ኢልካ ትጽበዮኸ መን'ኢዩ፧
"ንሱ ደኣ ዒሳ፡ዮሱስ፡ክርስቶስ ይብሃል።" ሕጂውን ብትሕትና ጉድለቱ ንገሮሞ ንሓቀኛ ክርስቶስ ክፈልጦ ኢዩ።" ክርስቶስ ክፈርደኒ ኢዩ ኢልካ ትጽበ እንተኾይንካሲ፡
1) ነየናይ ስራሕካ ኢዩ ክፈርደልካ፧
2) ዒሳ ፈራዲ እንተኾይኑኸ፡ፍጡር ክኾውን ከመይ ኢሉ ይከኣል።ፍጡር ክፍረድ ደኣምበር ኣብ ቅድሚ ፈጣሪ ስልጣን ሃሊይዎ ከመይ ኢሉ ኣብ ልዕሊ ፍጥረት ክፈርድ ይከኣሎ።ንስኻ ትውንኖ ንብረትዶ፡ካልእ ሰብ መጺኡ ከምድላዩ ከቃጽሎን፡ ክምሕሮን ይኽእል ኢዩ።ክርስቶስ ክቃጸል ንዝግበኦም ሓጣኣቶም ርእዩ ናብ ሲኦል ክስንድዎም ኢዩ፡ክመሓሩ ንዝግበኦም ድማ፡ናብ ናይ ዕረፍቲ ቦታ ክወስዶም ኢዩ ፡ኢልካ ካብ ኣመንካስ፡ልዕሊኡ ፈጣሪ ኣሎ ኢልካ ክትሓስብ ከመይ ልብኻ ዓወረ፧
3) ሕጂኸ ነዚ ስልጣንዚ ዝውንን ኢዩ ኢልካ ካብ ኣመንካስ፡ይጽልየለይ ኣሎ፡ነቢይ ኮይኑ ምስቶም ቅዱሳን ጸሎት ይገብር ኣሎ ክትብል ከመይ ኢሉ ሕልናኻ ተቐበሎ፧ ክፈርድን ክኾንን ስልጣን ኣሎዎ እንዳበልካስ፡ተገምጢልካ ሕጂ ይጽልየለይ ኣሎ፡እንክትብል እሞ መንደኣሉ ጸሎትካ ዝቕበል።እምነትካ ተዛቢዑ ኣሎ።ወይ እቲ ዝፈርድ ካልእ ኣምላኽ ኢዩ ክርስቶስ ኣይኮነን በል ወይ ድማ ክርስቶስ ፈራድን ኮናንን፡ተቐባሊ ጸሎትን፡ንጸሎት ቅዱሳን ተቐቢሉ መልሲ ካብ ስልጣኑ ዝምጡን ኢዩ ኢልካ እመን።እምበር ክርስቶስውን "ናሁ ይመጽኡ ብዙሐን ብስምየ፣ብዙሓን ብስመይ ክመጹ ኢዮም ኢሉ ስለዝመሃረ፡ሓቀኛ ክርስቶስ ረኺብና ኣብታ ንሱ ዘርኣየና ቀጣንን ብዙሕ መከራ፡ ዘለዋን መንገዲ ቀጥ ኢልና ኣሎና።ካብኣ ውን ምንቕ ኣይክንብልን ኢና።ብሓጥያት ተወደቕና ውን ንሱ ከተንስኣና ንንስሓ ክጽውዓና ኢዩሞ፡ድንግል ኣዲኡ ኣብ መስቀል ዝሃበና እመ ኣምላክ ክትድግፈና ኢያ።" ኢልካ መልሰሉ።ነዚ ሰሚዑ ናብታ ሓንትን ቅንዕትን ሃይማኖት እንተመጸ ባዕሉ መሪሕካ ናብ መስቀል ክኸይድ ኢዩ፡እንተዘይተመለሰ ፡ኣምሪርካ ስሌኡ ብኸ፡ካብ ሰይጣን መቒሑ ክፈትሖ ድማ፡ ንኣምላኽካ ስሌኡ ለምኖ። ልቡ እንተተሪሩ፡ኣማሲኡ ትረት ልቢ ፡ሓጻርን ኣምስሉ ዘለዋን ይሁዳዊት ንስሓ ተጣዒሱ ናብ ማሕነቕቲ ክወርድ ክሰዶ ኢያ።ይሁዳዊ ንስሓ ናብ ገመድ ኢዩ ዝመርሕ፡ጴጥሮሳዊ ንስሓ ግን ናብ መስቀል፡እረ ቁልቁል ኣፍካ ተሰቒልካ ምስ ክርስቶስ ክመዓራረ ኣይበቅዕን'የ ናብ ምባል 'ዩ ዝመርሕ።
ወስብሀት ለእግዚኣብሄር ወለወላዲቱ ድንግል፡ወለመስቀሉ ክቡር ኣሜን።

ሃብታም ተሃቅፈ በውስተ ህቅፋ ለነዳይ።

ሃብታም ተሃቅፈ በውስተ ህቅፋ ለነዳይ።
እቲ ሃብታም ብሕቕፊድኻ ተሓቕፈ።
ሃብታምነቱ ብኣእምሮ ደቂ ሰብ ዘይብጻሕ፡ኣብ እንዳ ድኻታት እረ ኣብ መሕደሪ እንስሳ ሓደረ።ብመግቦቱ ንዝረአን ዘይርአን ከከምዘድልዮም ዝምግብ እግዚኣብሄር፡ካብ ውሱናት ኣጥባው ጠበወ።ኣብዚ ኣሎ ኣብቲ የለን ዘይብሃሎ፡ብህልውና ምሉእ በኩሉሄ ዝኾነ ረቂቕ ኣምላኽ፡ሓጺር ቁመት ጸቢብ ደረት ካብዘለዋ ካብ ዳግማዊት ሄዋን ብድንግልና ተወሊዱ ተሓቕፈ።ኣንቱም እትጽዑሩን ጾር ዝኸበደኩምን ናባይ ንዑ ኣነ ከዕርፈኩም ኢሉ ዝጭርሕ እግዚኣብሄር፡ምስታ ብስቕታነት እትፍለጥ ድንግልን ዮውሴፍ ኣረጋውን፡ሶሌሜን ኣብ ኣድጊ ተወጢሑ፡ፈራሕ ክመስል ሃደመ ተሰደደ።
እቶም ከድሕኖም ኢሉ ኣብ ዓዶም ዝመጾም፡ንሳቶም ግን ኣምላኽነት ብምምናይ ምድራዊት ንግስነቶም ከይምንጥሎም ብምፍራሕ ኣሳደድዎ።ነቲ ፈጥርነት ተመንዩ ካብ ፈጣሪ ርሒቑ ዝነበረ ኣዳም ዳግማይ ናብ ናይ ቀደም በትኡ ክመልሶ፡ብምሕረቱ ናይ ኣዳም ስጋ ለቢሱ ኣብ ዓዶም እንተተገልጸስ፡እሩቅ ብእሲ ፍጡር መሲልዎም ካብ ዓዶም ኣሳጎጉዎ።
ድንግል ንወዳ ሒዛ ስለምንታይ ተሰድደት፧
+1+ኣጋር ነቲ ብጸጋ ኣቦ ብዙሀን ተባሂሉ ዝተሰመየ ኣብርሃም፡ኣብ ሕልፊኚኡ ብምምጻእ ኣህዛባዊት ባርያ ክንሳ፡በኣብርሃም ምኽንያት ብቅድስናእካ እንተዘይኮነ ብስጋ ጥራይ 'ወደ ኣብርሃም' ተባሂሉ ኽጽዋዕ ዘለዎ ውላድ ወለደት።እስማዔል ስጋዊት ልደት ካብ ኣብርሃም መታን ክማቐል ኣዴኡ ካብታ ግብጻዊት ዓዲ ሓጥያት፡ ናብ ናይ ኣብርሃም ዓዲ ተሰደደት።ኣጋር ናብ ዓዲ ቅድስና ተሰዲዳ ካብ ኣብርሃም ውላድ ወሊዳ ደኣምበር፡ወራሲ ዝኾነ ውላድ ግን ኣይኮነን።ዘይግዘር፡ዘይእዘዝ፡ዘረባ ኣዴኡ ኣጋር እምበር ዘረባ ኣቡኡ ኣብርሃም ዘይሰምዕ ውላድ ወለደት።ኣብርሃም ፍጡር ክንሱ ነዚ ዓቢ ክብሪዚ ፡ብምቃዕ ኣህዛባውያን ክባረኹ ኣጋር መሪሓቶም መጹ።
ካብ ህዝብን ኣህዛብን ዝተረኸበት ድንግል ግን ከኣ ኣብ ሕቖ ኣዳም ኮይና ከም ዕንቂ ተብርህ ዝነበረት ድንግል ግን፡ ነቲ ንኹሉ ዝባርኽ ኣምላኽ ሒዛ ናብታ መርገምን ሓጥያትን ዝተመልኣ ግብጺ ክትባርኻ ናብ ዓዲ ኣጋር ኣምርሐት።ናይ ኣብርሃም ክብሪ ብናይ፡ ኢዮሱስ ትሕትና ተደበሰ።ኣብርሃም ክንድቲ ዝኸበሮን ቃልኪዳን ዝተዋህቦን፡ኣጋር ኣብ ሕቕፉ እካ እንተደቀሰት፡እንደገና ደኸመ ደኣምበር ንኣጋርን ንግብጽን ክባርኽ ኣይከኣለን።ኢዮሱስ ክርስቶስ ግን ክንድቲ ኣምላኻዊ በረኸቱ ኩሎም ግብጻውያን ክባረኹ ከም ኣጋር ናብ ጋል ኣብርሃም፡ናብ ድንግል ማርያም ክመጹ ዝግብኦም፡ጋል ኣብርሃም ጋል ኢሳቕ፡ጋል ያዕቆብ ዝኾነት እስራኤላዊት ቅድስት ድንግል፡ነቲ ንኹሉ ዝባርኽ ኣምላኽ ሕዚ ተምሳል ኣጋር ኮይና፡ናብ ዓዲ ኣጋር ከደት።ኣጋር ባርያን ሓጢኣት ዝተመለአት ኢያ።ቅድስት ድንግል ግን ኣዳማዊ ይኹን ውልቃዊ ሓጥያት ዘይሓለፋ ንጽህቲ ኢያ።ግብጺ ብኣጋር ጋሎም ሃገሮም ክትባረኽ ዘይከኣለት፡ዳግማዊት ኣጋር ኮይና ድንግል ማርያም ነቲ ዋና በረኸት ሒዛ ናብ ግብጺ ከደት። ኣጋር ሃገራ ከተባርኽ ኢላ ናብ ቤት ኣብርሃም ዝመጸቶ፡ብሰንኪ ድኻማን ዕሽነታን፡ንግብጺ ካልኣይ ውርደት ኣምጸትላ።ድንግል ማርያም ግን ንናይ ኣጋር ዕሽነት ክትክሕስ፡ነቲ ንኣብርሃም ዝባረኸ ፈጣሪ ናይ ኣብርሃም ሒዛ ናብ ግብጺ ከደት።( ዘፍ21፥9-21)
+2+ ደብረ ሲሓት፡ተባሂላ እትጽዋዕ ኦሪታዊት ኣምልኾ እትውንን ኤርትራ፡ነቶም ድሒሮም ዝውለዱ ደቃ ኣብ ብሉይ ጥራይ ክጽበዩ ስለዝኽእሉ፡' እቲ ብሉያዊ ኣምልኾ እናፈጸምኩም፡ብተውፊት ጸኒዕኩም ተምልኽዎን ትጽበይዎን ዝነበርኩም ኣምላኽኩም፡ግዜኡን ሰዓቱ ኣኺሉ እነሆ።' ኢላ ከተሪኦም ናብ ኤርትራ ከደት።ኣብ ኤርትራ ኣምልኾ እግዚኣብሄር ሓዱሽ ዝተጀመረ፡ብምዕራባውያን ሃገራት ወንጌት ዝተበሰረት ሃገር ዘይኮነትሲ፡ ገና ከም እስራኤል ኮይና ድሕነት ኣዳም ትጽበ ዝነበረት ናይ ሕገልቦና ዓዲ ኢያ።ኤርትራ ደኣ ንምዕራባውያን ብዛዕባ ኣምልኾተ እግዚኣብሄር ትነግሮም እምበር፡ምዕራባውያን ንኤርትራ ወንጌል ክምህርዋ ኣይክእሉን ኢዮም።እታ መወለዳ ካብ እስራኤል ዝኾነት፡ብስጋውነታ ግን እንተላይ ነቶም ኣብ ኤርትራ ዝነበሩ ሰባት እትመስል፡ግን ኣዳማዊ ይኹን ተግባራዊ ሓጥያት ዘይሓለፋ ቅድስት ድንግል፡ኤርትራ ናይ ብሉይ ኪዳን ጥራይ ኮይና መታን ከይትተርፍ፡ነቶም ወንጌለ ሓዱሽ ኪዳን ክሰብኩ ክመጽዋ ዘለዎም እንበዓል ኣባ ሰላማ ከሳተ ብርሃን፡ኣቡነ ኣረጋዊ፡ኣባ ጉባ፡ትስዓቱ ቅዱሳ፡እንበዓል ኣቡነ ገብረ መንፈስ ቅዱስ፡መራሒት ኮይና ወንጌል ኮይና ወንጌል ሓዚላ ናብ ኤርትራ ብምምጻእ ፡ምድሪ ኤርትራ ብየእጋር ድንግል ማርያምን ወዳን ተባረኸ።
+3+ እዞም ሕጂ ስጋውነትን ናይዛ ዓለም ድኻምን በርቲዕዎም ንሓድህዶም ዝናኸሱ ዘለዉ ደቃ፡ስደት በርቲዕና ኢሎም መታን ከየማርሩ፡ንሳን እቲ ንዝተሰዱ ዝእክብ ወዳን ኮይኖም መምሃራን ናይ ስደት ክኾኑ ናብ ኤርትራ መጹ።ናይ ሎሚ ዘመን ስደተኛታት ህዝቢ ኣምላኽ መከራ እካ እንተሃለዎም፡መከራነቱ ግን ምስ ናይ ኢዮሱስ ክርስቶስ ዝወዳደር ስለዘየለ፡ክርስቶስ 'ኣምላኽን ፈጣርን ክንሰይ ነዛ ስጋጋ ክለብስ ምኽንያት ድሕነት ኣዳም ዝኾነት ሓብቶም ሕዘ ነዚ ኩሉ መከራ እንተተሰደድኩስ ብስደተይ ግዲ ይጸናንዑ ይኾኑ' ብምባል፡" ብጿኣን እለ ይሰደዱ በእንተ ጽድቅ፡እስመ ሎሙ ይእቲ መንግስተ ሰማያት፡ትርጉሙ= ምእንቲ ጽድቂ ኢሎም ዝስደዱ መንግስተ ሰማያት ናቶም ኢያሞ ብጿኣን ኢዮም።(ማቴ510)" ዝብል ስብከት ክድሚ ምእዋጁ፡ንኤርትራውያን መምህር ስደት ኮይኑ ክምህሮም ናብ ዓዶም መጺኡ ተሰደደ።እቶም ስጋዊ ጥቕማጥቕሚ ውሒጥዎም ዝስደዱ፡ሃገሮም ኣይኮነን ንባዕሎም ውን ክባረኹ ኣይክኣሉን፡ድንግል ማርያም ግን እቲ ዝባርኽ ኣምላኽ ምስኣ እንዳሃለወ፡ኣብ ስደታ ነቶም ተቐማጦ ኤርትራ ባረኸቶም።"ኣብዚ ቦታዚ ንወደይ ዝእዘዙ፡ንዓይ ዘኽብሩ፡ብስመይ ቤት መቕደስ ዝሃንጹ፡ብስመይ ደቆም ስም ዘሰይሙ፡ብስመይ በዓላት ዝገብሩ፡ሕሉፍ ሓሊፎም ክሳብ ሰማያት ብምብጻሕ መንግስቱ ዝወርሱ ደቂ ክህልዉኒ ኢዮም" ኢላ ዘይድምሰስ ሕላገት ኣብ ኤርትራ ገዲፋ ከደት።ኣብ ኤርትራ ዘሎ ኣሰር ናትና ኣሰር ጥራይ ኣይኮነን፡ኣብ ኤርትራ ዘሎ ሕላገት ምድራዊ ሕላገት ጥራይ ኣይኮነን፡ሰማያዊ ንጉስ፡ብርቀቱ፡ ብባህሪኡን ክንድዚ ይኸውን ዘይብሃሎ ኣምላኽ፡ዝረገጻ ሃገር ኢያ።ኪዱሞ ኣሰሩ ክጸንሓኪም ኢዩ።ኣሰሩ ጥራይ ኣይኮነን እንተላይ ኣሰራ፡'ኪዳነ ምህረት'፡ዝብል ኣሰር ብኪዳና ተኣምር እንዳገበረት ክትጸንሓኩም ኢያ።
+4+ ንጉስ ሰሎሞን ብጥበብነቱ ኣዝዩ ግሩም ስለዝነበረ፡ኩሎም ጠቢባን፡ንጥበብነቶም ዝዳረግ ስለዝተረኸበ፡" እስከ ክንውጥሮ ኢና፡"! ብምባል ዘለዎም ጥበብን ፍልጠትን ሒዞም ናብ እስራኤል ይመጹ ነበሩ።እንተኾነ ጥበቦም ኣብ ቅድሚ ንጉስ ሰሎሞን ዋጋ ኣይነበሮን።ሓንቲ ካብዚኦም ዝኾነት ንግስቲ ሳባ ናይ ኢትዮጲያ፡ብጥበባን፡ብድንግልናኣን እትፍለጥ ኣዝያ ልዕልቲ ስለዝነበረት፡"ንጥበብነትኪ ዝዳረግ፡ንንግስነትኪ ዝዕብልል ንጉስ ተረኺቡ ኣሎ"ስለዝበልዋ፡ተገሪማ ናብ እስራኤል ከደት።ብሃብቲ መታን ከይበልጻ፡ኣሎ ዝብሃል ሃብቲ፡ብፍልጠት መታን ከይበልጻ ኣሎ ዝብሃል ሕንቅልሕንቅሊተይን ግድላትን፡ብዝና መታን ከይበልጻ ድማ ኣሎዉ ዝበሃሎ ሰራዊት ኣኸቲላ፡እዚኹሉ ሳህራን ኣጻምእን፡ሰንጢቓ ናብቲ ብጥበብ ኣምላኽ ውሩይ ዝኾነ ንጉስ ሰሎሞን ከደት።ግን ተገሪማን ተደኒቓን ተረፈት ደኣምበር፡ንሰሎሞን ክትዕብልሎ ኣይከኣለትን። ንኣምላኹ ጥበብ ዝዓደሎ፡ኣብ ዓዳ ብሕገልቦና ተምልኾ ዝነበረ እግዚኣብሄር ድማ ኣመስገነት።(1ነገ10፣6-9)
ዳግማዊ ሰሎሞን ክርስቶስ ግን ጥበብነቱ ምስ ሰሎሞን ዝመዛዘን ዘይኮነስ፡ንሰሎሞን ጥበብ ዝዓደለ ጥበበ ባህሪ ክንሱ፡ ጥበብ ክዕድል ነታ ዳግማዊት ንግስቲ ሳባ ዝኾነት ድንግል ማርያም ሒዙ ናብ ኢትዮጲያ ከደ።ንግስቲ ሳባ ናብ ሰለሞን ዝኸደትሉ ምኽንያት ጥበበኛ ሰብ ተረኺቡ ስለዝሰመዐት ኢያ።እንተኾነ ንንጉስ ሰሎሞን ክትስዕሮ ዘይኮነትሲ፡በንጻሩ እካድኣ ብጥበቡ ማሪኹዋ፡ድሩ እካ ወዲ ከምትቡከር ገበረ።ጥበባ ክትዕድሎን ክትምጥወሉን ዝሓሰበቶ፡ጥበብን ውላድን ተዓዲላ ናብ ዓዳ ከደት።(ማቴ12፥42)
ዳግማዊት ንግስቲ ሳባ ዝኾነት ድንግልን ንጽህትን ማርያም ግን፡ብስቕታን ብትሕትናን እትፍለጥ ክንሳ፡ነቲ ካብ ሰማያዊ ባህሪ ንዘልኣለም እናተወልደ ዝነብር ክርስቶስ፡ሓዚላ ንኢትዮጲያ ክትባርኽ ከደት።ንግስቲ ሰባ ካብ እስራኤል ንቀዳማዊ ምሊሊክ ከም ገጸ በረኸት ሒዛ ናብ ዓዳ ተመልሰት፡እዚ ጥራይ ኣኻሊ ስለዘይኮነ ግን ድግንል ማርያም ነቲ ካብ ቀዳማዊ ምሊሊክን ካብ ኣቡኡ ሰሎሙንን ዝዓቢ ክርስቶስ ሒዛ ንንግስቲ ሳባን ንኹሎም ዓልየታን ክትባርኽ ናብ ኢትዮጲያ ከደት።ኢትዮጲያ ቀዳማዊ ምሊሊክ ዝተቐበልና ኢና ኢሎም፡በዚ ካብ ሰብ ዝተወልደ ሰብ እናተመክሑ ጥራይ መታን ከይነብሩ፡ድንግል ማርያም ነቲ ንኢትዮጲያን ንኢትዮጵያውናንን ዝፈጠረ ኣምላኽ ሒዛ፡ብኡኡ መታን ክምክሑ፡ንክርስቶስ ሒዛትሎም ከደት።
ስብሀት ለእግዚኣብሄር ወለወላዲቱ ድንግል ወለመስቀሉ ክቡር ኣሜን።

"ንስኻኸ እንታይ ገበርካ መጺእካ፧" ሓለቃ ኣጋንንቲ ነቲ ዝለኣኮ ሰይጣን ዝሓተቶ ሕቶ

ብስም ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ፈታዊኹምን ጸላኢኹምን ወትሩ ኣይታኸሱን'ዮምሞ፡ንስኻትኩምከ፧
ሓደ ግዜ ሓደ ኣረመናዊ( ንክርስትና ዘይኣምን ሰብ)፡ኣብ ጣዖት የምልኽ ስለዝነበረ ወትሩ ናብ ቤት ጣዖት እናተመላለሰ ንሰይጣን ይግዛእ ኣብ ዝነበረሉ ግዜ፡ከም ልማዱ ናብ ቤት ጣዖት ከደሞ፡'ቁሩብ ክድቅስ' ብምባል ኣብቲ ቤት ጣዖት ደቀሰ።ኣብ ሕልሙ ድማ፡ሰይጣን ብኣምሳል ንጉስ ኮይኑ ኣብ ዙፋን ተቐሚጡ ረኣየ።
እቲ ሰይጣን ኮፍ ኢሉ፡ነቶም ኣገልገልቱ ዘዝገበርዎ ክጸባጸቦምን ሞሳ ክህቦምን ጀመረ።ሕልሚ ይቕጽል፡-
ሓደ ሰይጣን ናብ ቅድሚቲ ሓለቓ ኣጋንንቲ እንዳሰገደ ይመጽእሞ፡እቲ ኣብ ዙፋን ዝተቐመጠ ሰይጣን ሕቱኡ ጀመረ።" እሂ፡እንታይ እንታይ ኣፍሪኻ መጺኻ፣" መልሲ።
'ኣነ ንኽልተ ሰባት ኣባኢሰ ኣጻሊኤዮም መጺኤ።'
"ክንደይ ግዜ ወሲድልካ ነዚ ክትገብር?"
'ዳርጋ ሓንቲ ሰሙን ወሲዱለይ።'
"ንፉዕ፡ቀጽሎ ሕጂ ክልተ ሰብ ኣጻሊእኻ ኣሎኻ፡ካልእ ግዜ ድማ ብዙሓት ግበሮም።" ኢሉ ኣፋነዎ።
ካልእ ውን መጸ፡
"እሂ ንስኻኸ እንታይ ሰሪሕካ መጺኻ?"
' ወድን ጋልን ብድንግና እንዳነበሩ እንከለዉ፡ሓርከይ ኢያ፡ዓርከይ ኢዩ፡ብዝብል ምስምስ ብሓደ ደቂሶም ዝሙት ከምዝፍጽሙ ገይረዮም።ብድሕሪኡ እታ ጋል ዋላእካ ክልተ ውላድ ብዘይ ሕጊ ከምዝወልዱ እንተገነርኩ፡መርዓ ንግበር ክትብል ስለዘሸገረትኒ፡መርዓኦም ኣብ ክንዲ ብንስሓን ቁርባንን ዝኾውን፡ብጋልይላን ብዳንኬራን ገይረዮ ,ምስቲ መርዓ ድማ ጥምቀት ሓደ ውላዶም birthday 2ይ ዓመት ድማ ናይቲ ቀዳማይ ውላዶም ከምዘብዕሉን ገይረዮ፡፡ቀጺለ ንሓድሕዶም ብምጽላእ እቲኣ ካልእ ሰባኣይ ከምተእቱ፡ንሱ ድማ ካልእ ጋል ከምዘእቱ ገይረ ፈላልየዮም።' ኢሉ ጸብጻቡ ኣቕረበ።እቲ ኣብ ዙፋን ዝተቐመጠ ሓላቓ ኣጋንንቲ ድማ፡-" ነፊዕካ፡ነዚ ኩሉ ክትገብር ክንደይ ወሲድልካ?" ክብል ሓተቶ።
'ሓሙሽተ ዓመት፡' በለ።ቀጽሎ ብዙሓት ኣሎዉ ብዝሙት ክወድቁ ዝግብኦም፡በዚ ዘመንዚ ብድንግልና ዝነብር ሰብ እካ ክንደየናይ ከይህሉ፡ ኣብዚ ምሳይ ዘሎ ጸብጻብ ከምዝሕብሮ፡ዳርጋ ዝበዝሕ ወድሰብ፡ስጋዊት ድንግልና ኣጥፊእዋ ኢዩ፡እዚድማ ከምዚ ዝበልካዮ፡ዓርከይ፡ኣፍቃሪተይ፡መሓዛይ፡ካልኤተይ፡ዝብሉ ናይ ቅብጡሮት ቃላት ብንዛሕ ኩሎም ከምዝራኸሱ ገይርናዮም ኢና።እዚኦም እንተዘይተናሲሖም፡ጭቡጥ ዝኾነ መኽሰሲ ኣሎና።ስለዝበደሉ ድማ ናትና ናይ ሲኦል ኢዮም።" ኢሉ መለሰ።
ዘረበኦም ከይወድኡ እንከለዉ ድማ ሓደ ጋኒን ጸብጻቡ ሒዙ ሕውስ በሎም። ናብቲ ኣብ ዙፋን ሓለቓ ኣጋንንቲ ከኣ ጽሑፉ ሒዙ ቀረበ።
"ንስኻኸ እንታይ ገበርካ፧" ሕቶ ቀደመ።
'ኣነ ንሓደ ኣብ ገዳም ምሉእ ዘመኑ ዘሕለፎ መኖኮስ፡ምንኩስንኡ ገዲፉ ከተማ ከምዝኸይድን፡ኣብ ዝሙት ወዲቑ ውላድ ከምዝወልድን፡ብድሕሪኡ ድማ፡መነኮስ ነይረ እንዳበለ ንብዙሓት ደናግል ደቀንስትዮ እናጠበረ ምስአን ከምዝዝሙን ገይረዮ።ብድሕሪኡ መታን ከይጥዓስ ኢለ፡ጌጋ ትምህርቲ ከምዝምህርን፡ብዙሓት ድማ ብትምህርቱ ከምዝሰሓቡን ገይረ።ኣብ መወዳእታ ድማ ንብዙሓት መናፍቓን ኣቦ ኮይኑ፡ናይ ምንፍቕና ትምህርቲ ከምዝነዝሕ ገይረዮ።ሕጂ ድማ ንስሓ ከይኣተወ እንከሎ ተሓኒቑ ንኽመውት እንዳደፋፈእክዎ ኢየ።' ኢሉ ጸብጻቡ ኣቕረበ።
" ከመይ ዝበለ ዓቢ ዓወት ሕዚካ መጻኻ! ኣብዚ ኣሎ ወግዒ፡ደሥሥስ ዝብል ስራሕ።እስከበል ነዚ ክትገብር ክንደይ ግዜ ወሲዱልካ?"
' ነዚ ክገብር ልዕሊ 20 ዓመታት ወሲዱለይ።ሕጂ ውን ገና ከይተናስሐ እንከሎ ክቕድሞ እንዳጸዓርኩ ኢየ።' በለሞ፡"በል በል በል ኪድ፡ ንሱ ክሳብ ዘይሞተ ዋላ ይናሳሕ 'ተናሲሑ ኢዩ፡ስዒሩኒ ኢዩ፡'ኢልካ ከይትሓድጎ።ንሕና ኣጋንንቲ ስራሕና ኣብ ልዕሊ ደቂ ሰባት ክሳብ ዘይሞተ ክንስልኪ የብልናን ኢሉ፡ምኽሩ ለገሰሉ።
እቲ ነዚ ሕልሚዚ ዝርኢ ዝነበረ ኣረመናዊ ሰብ ካብ ድቃሱ ተበራበረሞ፡ኣዝዩ ገረሞ።ብሕልሚስ ኣጋንንቲ ፊት ንፊት ክዘራረቡ ስለዝረኣየ ኣዝዩ ፈረሐ።እዚ ሕልሚዚ ንስኻ/ ወይ ንስኺ እንተትርእይዮ፡እንታይ ምገበርኪ/ካ፧
ወገናተይ፡ወዮ ንሕና ደኣልና ንስለ ቅድስና ደቂስና እምበር፡ኣጋንንትስ ንስለውድቀትና ሓንቲ ሰከንድ ኣይድቅሱን ኢዮም።ንሕና ደኣልና ንስለ ቅድስና ሼለል በሃልቲ እምበር፡ኣጋንንትን ንስለርኽሰትና ኩሉ ግዜ ንቑሓት ኢዮም።ንሕና ክሳብ ዘይወደቕና፡በቲ ከውድቐና ኢሎም ዝፍትንዎ ዝተፈላለየ ሓጣውእ ኩሉ ግዜ እንዳፈተኑና ይነብሩ።ንዓና ምስ ኣውደቑና ድማ፡ንሕና ምኽንያት ኣውደቕቲ መታን ክንከውን ንኻልኦት ንኸነውድቕ ይደፋፍኡና።
በንጻሩ ድማ እግዚኣብሄር ቅድሚ ምውዳቕና ክንጥንቀቕ፡ድሕሪ ምውዳቕና ድማ መታን ክንትንስእ ኩሉ ግዜ ኣብ ሕልናና እናተገልጸ ናይ ንስሓ ድምጺ ኣብ ልብና ይኹሕኩሓና።
ኣስተውዕል ወገነይ፡እግዚኣብሄርን ሰይጣንን ኣገዲዶም ኣይኮኑን ኣብ መስመሮም ዘእትዉና፡ፍቓድና ተጠቒሞም ኢዮም።ሰይጣን ብፍቓድና ተጠቒሙ የውድቐና፡እግዚኣብሄር ድማ ብፍቓድና ተጠቂሙ የድሕነና።
ነዚ ጥበብ ናይ ሰይጣን ንኽነውድቕ እግዚኣብሄር መንፈሳዊ ዕጥቂ ለጊሰልና ኢዩ።ብርግጽ በዞም መንፈሳዊ ኣጽዋር እዚኦም ሰይጣን ይስንውፍ ኢዩ።(ጾም፡ጾሎት፡ስግዳን፡ንስሓ፡ቁርባን፡ምጽዋት፡ዕሽር፡ 10ቱ ትእዛዛት፡6ቱ ቃለተ ወንጌል,,,,,) ነዚኦም ብዘይምስልካይ ክንፍጽሞም እንተኺኢልና ሓይሊ ኣጋንንቲ ይልሕልሕ፡ሓይሊ እግዚኣብሄር ድማ ኣብ ልዕሌና ይጎልሕ።ፈተነ ይበዝሕ፡ቅድንስና ድማ ኣብ ሂዎትና ብርእዮ ክግለጽ።
ብሓቂ፡ንእግዚኣብሄር ክብሪ ምስጋና፡ንሰይጣን ድማ ስዕረትን ውድቀትን ንዘላኣለም ዓለም ኣሜን።በረኸታ ረዲኤታ ናይ ወላዲተ ኣምላክ ኣይፈለየና ኣሜን።
(ምንጪ ሊቀ ሊቃውን ኣያለዉ ኣለማየህው)

mandag 6. mars 2017

እዞም ኣቦ መለሱላ፡ሓቕኺ ኣሎኺ ንስኺ ኢኺ ክትሰግድለይ ዝግባእ፡ግን ካባይ ንስኺ ትብርትዒ፡፡

በስም ኣብ ወወልድ ወመንፈስ ቅዱስ
ሓደ ግዜ ሓደ ቅዱስ ኣቦ ብዙሓን ቆልዑ ድቁና ይምህር ነበረ።እቶም ተማሃሮ፡ንዝተዋህቦም መንፈሳዊ ትምህርቲ ብዝግባእ የጽንዕዎ ስለ ዝነበሩ፡እዞም ኣቦ ንዝቕጽል ሓገዝ ክኮኖም ንምባል ካልእ ብዙሕ መንፈሳዊ ትምህርትን ተግሳጽን የስንቖም ነበረ።እቲ ዘገርም ግን እዚኹሉ ምሂሩ ከብቅዕ ኣብቲ ናይ ድቁና ዝሽየምሉ ዕድመ ምስ በጽሑ፡ብዙሙት ተሳዒሮም ይወድቁ ነበሩ።እዞም ኣቦ ብዙሓት ምሂሮም ኣብ ፍረ ዝበጽሑ ግን ክልተ ሰለስተ ጥራይ ነበሩ፡፡ኩሎም እቶም ብዝሙት ዝተሰነፉ ድማ ዋላ ንቤተክርስትያን ምምጻእ ኣቃረጽዎ።

ድሕሪ ነዊሕ እዋን እዞም ቅዱስ ኣቦ፡ነገሩ ክምርምሩ ጀመሩ እሞ፡ለካ ኣብቲ ከተማ ሓንቲ ኣመንዝራ ተውድቖም ከምዝነበረት በጽሕዎ።ናይዛ ኣመንዝራ ጥበብ ዘገርም ኢዩ።ዳስ ተኺላ"እዚ እንዳኣመንዝራ ኢዩ" ዝብል ዝጸሓፈትሉ ቦታ ኣይኮነትን ፈልያ ኣስሒታቶም።ናይ ቤት ክርስትያን ሰብ መሲላ፡ቀትሪ ብፍላይ ሰምበት ቅድስቲ መሲላ፡ካብቶም ተማሃሮ ብዙሕ ክትማሃሮ ትደልዮ ነገር መሲላ ትቐርቦምሞ፡ምሸት ገዝኣ ወሲዳ ግን ተኽላ ተቐይራ ትነጥቆም።
ናይዛ ኣመንዝራ ጥበብ ተመልኪቶም፡ኣዝዮም ተገረሙ።ስለዚ ኣብ ቤት እግዚኣብሄር ወትሩ ትመጽእ ስለዝነበረት፡ሰምበት ድሕሪ ቅዳሴ ኢዶም ክትሳለም ኢላ ምስ ቀረበት በንጻሩ ንሶም ተምበርኺኾም ሰገዱላ። ወዮ ጋል ደንጽዩዋ ኣባ እንታይ ትገብሩ ኣሎኹም?ኣነ እምበር ንስኹምዶ ክትሰግዶለይ ይግባእ?በለቶም።
እዞም ኣቦ መለሱላ፡ሓቕኺ ኣሎኺ ንስኺ ኢኺ ክትሰግድለይ ዝግባእ፡ግን ካባይ ንስኺ ትብርትዒ፡፡ኢሎም ብብኽያት ክሳብ ውሽጦም ዝስምዖም በኸዩ።ብከንደይ መንፈሳዊ ተጋድሎ ዝመሃርኩዎም መንእሰያት፡ንስኺ ግን ብዘይ ምንም ትምህርቲ ከምዚ ገይርኪ ናትኪ ስለዝገበርክዮም ከመይ ዘይሰግደልኪ፡ኣነ ንነዊሕ እዋን ብመንፈሳዊ ተግሳጽ ኮስኪሰ ናተይ ክገብሮም ዘይከኣልኩ መንእሰያት፡ንስኺ ግን በዚ ጥበብኪ ገይርኪ ናትኪ ገይርኪ ኣብ ባይታ ወዲቖም ከምዝምብርከኩልኪ ስለዝገበርክዮም ከመይ ዝበለ ጅግንነት ኣሎኪ።ስለዚ ስግዳን ኣኽብሮት ኣድንቆሲ ንዓኺ ኢዩ ዝግባእ፡
ምስ በልዋ፡ወዮ ጋል ኣብራኻ ጠሊምዋ ኣብ ብርኮም ወደቐት።ኣቦየ ኣነ እየ ሓጥያተኛ፡ጅግና ዘይኮንኩስ ምንም ነገር ዘይብለይ ባዶ ኢየ ኢላ። ንኽንኽ ኢላ በኸየት።ብናይዞም ኣቦ ትምህርቲ ንስሓ ኣተወት።ልባ ክሳብ ክንደይ ካብ እግዚኣብሄር ሸፊታ ምህላዋውን ፈጺሙ ተረድኣሞ፡ነዞም፡ኣቦ ንእግዚኣብሄር ክሳብ ክንደይ ከምዝበደለቶ ተመልኪታ ክጽልዩላ ካብ ብኽያት ከየቃረጸት ለመነቶም።
ኣብዚ ዘለናዮ ዘመንውን ብዙሓት ደቀንስትዮን ደቂ ተባዕትዮ፡ኣብ ቤት እግዚኣብሄር ኣብ ቅድስናዊ ጉዕዞ ክርስትና፡ጀጋኑ ናይ ምንዝርና ኮይንና ዘውደቕናዮም፡ወይ ዘውደቕናየን ክንደይ ይኾና።ዋላ ብኣካልካ እንተዘየውደቕናየን/እዘየውደቕናዮም ብምንዮትናን፡ብውሽጣዊ ፍንፉን ጸሎትናን ከነውድቖም ኢልና ዝሓሰብና ክንደይ ይኹኑ።እግዚኣብሄር ኣምላኽ በዚ ጾምዚ፡ሰንከልከል ንዝበለ ሕልና ቀጥ ንክብል፡ንዝወደቐት ነፍሲ ከተንስእ፡መጻወድያ ንምኻን ዝተግሁ መናፍስቲ ድማ ዝኣስርን ዝግስጽን ክገብረልና ሰናይ ፍቃዱ ይኹን።
ስብሀት ለእግዚኣብሄር ኪያነ ከመ ናምልኮ፡ስብሀት ለ ቅድስት ድንግል በክልኤማርያም ከመ ይእቲ ወላዲተ ኣምላክ፡ወስብሀት ለቅዱስ መስቀሉ ከመ ውእቱ ሓይለ ትእምርትነ።ኣሜን

lørdag 4. mars 2017

ንሓንቲ ብምድራዊት ሃገር ጥራይ እትምካሕ ሓፍትና ዝተዋህበ ምዕዶ ሓዘል ተግሳጽ።

በስምኣብ ወወልድ ወመንፈስ ቅዱስ ኣሀዱ ኣምላክ ኣሜን።
"እግዚኣብሔር ዝፈጠረኪ ሓፍተይ፡መንነትኪ ትፈልጥዮዶ ትኾኒ፧!!
ሰብ መንነቱ ስለዝርስዕ ኣብ ዝተፈላለየ ስጋዊ ነገርን ምድራዊ ሓሳባትን ተዋሒጡ ይነብር።መንነትኪ ከምቲ ጽሕፍክዮ ዘለኺ ጓል'ዛ ምድሪ ኣይኮንክን፡ጓል ኣቦኽን ኣዴኽን ውን ኣይኮንክን።ክጸርፍ ስለዝደለኩ ኣይኮንኩን፡ጸርፊ ሃይማኖተይ ተዋህዶ ስለዘይፈቅድ ኣይጻረፍን ኢየ፡እዛ ዘለኽያ ዓዲ ዓቢኽላ እምበር ንዘልኣለም ኣይትነርላን ኢኺ። ዓድኺ፡ሞይትኪ ክትቅበርላ ኢኺ'በር ንዘልኣለም መምበሪኺ ኣይኮነትን።

ሓደ ግዜ ብመንገዲ እንዳኸድኩ ምዉት ሰብ ሒዞም ዝኸዱ ሰባት ተዓዘብኩ፡፡ ኣርባዕተ ደልዳላታት ኣጓብዝ ንሬሳ ብኽብሪ ተሰኪሞሞ ንኣብ መቓብር የምርሑ። እቲ ሬሳ ኣብ ኣዝዩ ዝተወቀበ ሳጹን ኣትዩ፡ ብዝተፋላለየ ክቡር ዕምባባታት ተመላኺዑ ብኣዝዮም ሓያላት ኣርባዕተ ኣጋብዝ ደልደላታት መንእሰያት ተጸይሩ ክኸይድ ርኣኽዎ።ብዙሓት ህዝቢ ድማ ሓዘኖም ክገልጹ ተኣኪቦ በብዝተፋላለየ መስርዕ ተሰሪዖም ናብ ቀብሪ ይኸዱ ነበሩ።ዉሉደ ክህነት ድማ በቲ ቃና ዝውለዎ ጥዑም ዜማኦም እናዘየሙ ቀቅድሚኡ ይከዱ ነበሩ።መቸም እዚ ሬሳ ኣዚዩ ከቢሩ ኢዩ፡ክብረቱ ግን ኣይፈልጥ ነበረ፡፡ ሰባት ኩሎም ደንጊጸምሉ ኢዮም፡ናይዞም ሰባት ርህራሄ ግን ኣይርድኦን'ዩ ንሱ፡ ሬሳ ስለዝኾነ።

ክቕበር እንከሎውን ኣብ ኣዝዩ ዝተማላኸዐ ጉድጓድ የእትውዎ፡፡ ብሓመድ ምስ ደብደብዎ ድማ ብሰሜንቶ ገይሮም ገዛ ይሰርሕሉ፡እዚ ኲሉ ክብሪ ንሱ ኣይርድኦን ኢዩ። እዚ ጥራይ ከይኣክል፡ ዓመት ዓመት መመጺኦም ይበጽሕዎ፡በጻሕተይ ኢሉ ግን ኣይግደሰሎምን።ጥሮታ መሬት ከፊሎም መምበሪ ሂቦሞ ክንሶም ንሱ ግን ስግኡ መሽሚሻ ስለዝተረፈት ነዚ ኩሉ ክብሪ ኣይርድኦን ኢዩ። እቲ ንሱ ዘለዋ ከባቢ፡ ናይ ሬሳታት ዓባይ ከተማ ኮይና ትምስራሕ ነንሕድሕዶም ግን ኣይበጻጽሑን።ሽሞም ኣብቲ ላዕለዋይ መስቀል ተጻሒፉ ኣሎ፡ብስሞም ጸዊዕካዮም ግን ኣይሰምዑን።ነብሶም ድኣላ ንሰማያት ከይዳ ወይ ናብ ዕረፍቲ ወይ ናብ ስቅያት እምበር ንሳቶምምሲ ክሳብ ዳግማይ ምጽኣት ስሞም ኣይእንታዮምን'ዩ፡፡ ክርስቶስ ክመጽእ እንከሎ ግን በዛ ስም እዚኣ ኢዩ ክጽውዖም።ሽዑኡ ፈትዮም ኣይፈትዮም ብግዲ ክሰምዑ ኢዮም።

ንስኺውን ሓፍተይ እዛ ትነብርላ ዘለኺ ዓዲ ክሳብ መቓብር ኢያ ዓድኺ፡ካብኡ ንንዮ ዘሎ ሂዎት ኣይክትወሓሰክን ኢያ።ናይዚ ሬሳ ክብሪ ምስተመልከትኩ፡ "ነብሱስ ከመይ ትህሉ፧" ኢለ ሓሰብኩ። "ረቂቓን መላእኽቲዶ ተሰኪሞም ናብ ዕረፍቲ ቦታ ወሲዲማ ይኾኑ ወይሲ፡ናብ ስቅያት ናብ ሲኦል፧ እዛ ነብሲዚኣስ ነዚ ቀብሪ ሪኣ እንታይ ትብል ትህሉ፧እቲ ሕሉፍ ታሪኻ መቸም ሰብ ስለዘይፈልጠላ ንስጋኣ ኣኽቢርዎ ኢዩ፡ንሳ ግን ከቢራዶ ወይስ ተዋሪዳ፡ዓሊላዶ ወይሲ ኣልቂሳ፡ተጸናኒዓዶ፡ወይሲ እንደገና ሓዚና" ኢለ ምስ ሕልናይ ተማጎድኩ። መደምደምታ ዝበጻሕክሉ እንተነይሩ እንታይ ከምዘጋጠማ ኣይፈልጥን ኢየ፡ "ብርግጽ ግን ዳግማይ ሓዘን ወይ ዳግማይ ደበስ፡ዳግማይ ዕረፍቲ ወይ ዳግማይ ስቅያት ክትረክብ ምኻና ርጉጽ ኢዩ" ኢለ ደምደምኩ።እዚ ድማ ብቃል እግዚኣብሔር ኣረጋገጽክዎ።

እግዚኣብሄር ዘፍቅረኪ ሓፍተይ እዛ ሕጂ ትምክሕላ ዘለኺ ምድራዊት መንነት ጽባሕ ንግሆ ኣይክትዋሓሰክን ኢያ።ኣቦኽን ኣዴኽን ወሊዶምኪ ምበር ኣይፈጠሩኽን፡የዕብዮምኺ እምበር ንዘልኣለም ዋሕስኪ ክኾኑ ኣይክእሉን።ኣብ ሞትኪውን ከልቅሱልኪ ይኽእሉ እምበር፡ኣብ ሰማያት ከይዶም ብዛዕባ ነፍስኺ ኣይክከራኸሩን፡ኩሉ ክፍረድ ኢዩ፡ፍርዱ ሲኦል ወይ ድማ ዕረፍቲ ኢዩ።ክሳብ ፍርዲ ድማ ግዝያዊ ስቅያት ወይ ግዝያዊ ዕረፍቲ ኣሎ።እቶም ግዝያዊ ስቅያት ዝተዋህቦም ካብኡ ኣዝዩ ዝዓበየ ስቅያት ይጽበዩ ኣሎዉ፡እቶም ኣብ ዕረፍቲ ዘለዉ ድማ ካብኡ ኣዝዩ ዝዓበየ ዕረፍቲ ይጽበዩ ኣለዉ።ነገሩ ግብሮም ኩሉ ግልጺ ኮይኑ ስለዝመጾም ብዝተዋህቦም ፍርዲ ኣይከግረምርሙን ኢዮም።

 

ሓፍተይ ኣብ ግዜ ፍርዲ እንታይ መርትዖ ሕዝኪ ኣሎኺ፧ ምእካብ መርትዖ ሕጂ ኢዩ፡ መርትዖና ንስሓ ኢዩ።ኣነን ንስኽን ኩሉ ወድሰብ መርትዖ ምስ ፈጣሪ ሒጂ ኢዩ ክእክብ ዘሎዎ።ንሱ ከኣ ንስሓ ኢዩ።ንስሓ ጣዕሳ ማለት ኢዩ።ዝበደለ ኢዩ ከኣ ዝናሳሕ፡ መቸን "ኣነ ፍጹምቭበደል ኣይፈጸምኩን ንጹህ ኢየ" ክንብል ኣይከኣልን።ምሳና ዘሎ ሓጥያት ኩሉ እግዚኣብሔር ይፈልጦ ኢዩ። ስለዚ ቅድም ኣብነፍሲ ካህን ሕዚሞ፡  ኪዲ ኩለን ሓጥያትኪ ተናዘዚ፡፡ እግዚኣብሔር ድማ ትፈልጥዮን ዘይትፈልዮን ሓጥያትኪ ኩሉ ጸሪጉ ክሓድገልኪ ኢዩ።መሓሪ ስለዝኾነ ዋላ እቲ ዝኸፈአ ሓጥያት ንፈጽም ክምሕረና ኢዩ።ሕጂ እንተዘይ ተመሊስና ግን ጽባሕ ንግሆ ድሕሪ ሞት ንስሓ የለን።ናይ ሽዑ ብኽያት ዋጋ የብሉን፡ናይ ሽዑኡ ንብዓት ሓባሲ የብሉን። ናይ ሽዑ ምሕርቃም ኣስናን ደንጋጺ የብሉን።
እዞም ሕጂ ኣብ facebook niec pic እንዳበሉ ዝንኡድኺ ዘሎዉ ንባዕሎም ጽባሕ ንግሆ ንነብሶም ክፍረዱ እንከለዉ ናይ ማንም ጠበቓ ክኾኑ ኣይክእሉን ኢዮም።እዞም ሕጂ ኣብ facebook ዝጻረፉኺ ዘለዎውን ጽባሕ ንግሆ ኣብ ሲኦል ከይዶም ኣይክጸርፉኽን ኣይክንእዱኽን ኢዮም።ፍርዱ ዝተዋህበ ሰብ ጽባሕ ንግሆ ብዛዕባ ዝተዋህቦ ፍርዲ ጥራይ ኢዩ ክሓስብ።ኣብ ዕረፍቲ እንተኣትዮም ስሌኺ ጸልዮም ለሚኖም ከውጽኡኺ ዘሎ ተኽእሎ ኣዝዩ ጸቢብ ኢዩ፡፡ ምኽንያቱ ሕጂ እንዳጸረፉ ጽባሕ ኣብ መንግስተሰማያት ክኣትዉ ዘሎ ተኽእሎ ከቡድ ኢዩ። ጸረፍቲ ሰባት ንመንግስተ ሰማያት ኣይኣትዉዋን ኢዮም።ንስኺ ንባዕልኺ ምላልባሽ ብቃልኪ ዘይትጸርፊ ትኺኒ፡፡ ብልብኺ እንተጸረፍኪ ግን እግዚኣብሔር ልብኺ ይምርምራ ኢዩሞ፡ሲኦላዊ ዋጋ ከይትወሃቢ ንስሓ እተዊ።
ደቂ ዓድኺ መተዓቢትኺ ሕጂ የንጨብጭቡልኪ ይህልዉ ኢዮም፡፡ ጽባሕ ኣብ ቀብርኺ ድማ ከልቅሱልኪ ይኾኑ፡ኣብ ሰማያት ግን ኣብ ቅድሚ መድሓኔ ኣለም ቆይሞም ክዋሕሱኺ ኣይክእሉን ኢዮም።ስለዚ ብዛዕባ ነፍስኺ ምሕሳብ ጽባሕ ኣይኮነን፡ብዛዕባ ሰማያዊት መንነትኪ ምሕሳብ ድሕሪ መቃብር ኣይኮነን ሕጂ ኢያ። መዓልቲ ምድሓን ሕጂ ኢያ።መዓልቲ ንስሓ ሕጂ ኢያ።መዓልቲ ጣዕሳ ሒጂ ኢያ።ምድራዊ መንነት ዋሕስና ኣይኮነን፡ንሕና ደቂ ሰባት መንነትና ኣብዛ ምድሪ ኣይኮነን ኣብ ሰማያት ኢዩ።ናይ ብሓቂ ወለድና ስድራና ኣይኮኑን እቲ ዝፈጠረና እግዚኣብሄር ኢዩ ኣማናዊ ወላዲና።ንሕና ውሉደ እግዚኣብሄር ኢና።ንስኺ ጓል እግዚኣብሔር ኢኺ ተናስሒ እምበር በዛ ምድራዊ መንነትኪ ምንም እንተተመካሕኪ ኣይጠቅምን ኢዩ። 
ወደሓንኪ!!
እ
ግዚኣብሔር ብምሕረቱ እመ ኣምላክ ብቃል ኪዳና ትደግፍኪ ትደግፈና ሓፍተይ።
እዚ ኩሉ ዝበልክዎ ከም ጌጋ እንተተረድእክዮ፡ከግህየኪ ግቡእ ሰለዘኮትነ ብልቢ ይቕረ ግበርለይ።
ወስብሀት ለእግዚኣብሄር።

ኣነ ግዳ ውሉድካ ንክናኣናዊት'ኳ ዝመሓርካ...

 በስመ ሥላሴ ኣብራም'ዩ ግብረይ ኣብ ካራን ምንባረይ ሃብታም'ዩ ሰፈረይ ብዘመናዊ ስራይ ኣብኡ'የ ዝወድቕ ይሃጥር ብስጋይ ሓሽከት ሓጣውእ ይበራረዩለይ ገንዘብ ሶዶም ክኸስብ ገንዘብካ ይስእኖ እናሻዕ ይንኖ...