በስመ ሥላሴ!
ብፈረንጂ 17.05.2016 ተጽሕፈ
ኣብ ሓደ ቦታ'ዩ። ባርቤሪ ኣዳልዩ ንብዙሕ ግዜ ናይ ጸግሪ ምስትኽኻል ልምዲ ዝነበሮን፡ሰሰሪሑ ምግበ እቶቱ ዘእቱን ብዛዕባ ዝነበረ ዛንታ ሓደ ቀምቃሚ ከካፍለኩም። ፍሉይ ሜላ ናይ መስሕብ ዓማዊሉ ዘገርም'ዩ። ክቕምቅም ከሎ ብዙሕ ዝተፈላለየ ሕሜታ እንዳ ኣምጸ'ዩ ንነፍሲ-ወከፍ ተቐምቃማይ ከምዝዘናጋዕን፡ካብ ትኽስተ-ምስልቻው ከምዝገላገሉን ዝገብሮም ነይሩ። 'ሕሜታዶ ካብ ትኽስ የድሕን ኢዩ፡ሕሜታዶኸ ዓማዊል ከምዝውሕዙ ይገብር'ዩ፧' ዝብል ምጉት ይመጻኩም ይኾውን ኢዩ። ኣነውን ከማኹም እዚ ክትዕዚ ምስ ነብሰይ ብዙሕ ግዜ ወሪደ ደይበሉ ኢየ።
ክገርመኩም ግን ብዙሓት ቀምቃሞን ቈናኖን፡ ዓማዊል ብኸምኡ ዝመጹ ዝመስሎም ኣይሰኣኑን ይኾኑ። 'እዋይ ዕላሉ ክጥዕም' ተባሂሎም ብዓይኒ ብዙሓት መታን ክበሃጉ፡ 'ዓማዊል ቶስ ቶስ ከብል ዝኽእል ሕሜታ ምስትነግር ጥራይ'ዩ' ዝብል እምነት ዘለዎም ኣብዛ ዓለምና ኣበይ ከሰኣኑ! ብዙሓት ቆናኖውን ከምኡ። 'ኢድ ይባረኽ፡ ክንደይ ትቑንን ጓለይ፡' ተባሂለን መታን ክነኣዳሞ፡ እቶተተን ክኽዕብት በበይኑ ዓይነት ሕሜታ እንዳምጻኣ ናይ ምሕማይ ተመኩሮ ዘለወን ኣይሰኣናን ይኾና። ብኻልእ ገጽውን ካባይ ጀሚርካ ብዙሓት ኣይሰኣኑን፡- 'ጡዑም ዕላሉ' ተብሂሉ መታን ክንገረሎም ንሕሜታ ዘይስልክዩ። 'ኣነ ጥራይ ክዛረብ ኩሉ ሰብ ግርምም ኢልዎ ክሰምዓኒሲ ክሓሚ ኣሎኒ ኢሉ፡ድግዲጊት ተዓጢቑ ንምሕማይ ዝተዋፈረ ሰብ ዓለምና የዕለቕሊቕዋ ኣሎ። 'ቲ ቀድምሲ ሕሜታ መብዛሕትኡ ግዜ ንደቀንስትዮ ኢዩ ዝወሃብ ነይሩ ክበሃል ይሰምዕ'የ፡፡ ኣብ ቤተ ክርስትያን ወይ ቀብሪ ከይተረፈ ብልሳነን ምሕማይ ዕድል እንተተሳኢኑወን፡ እንዳረምጠጣ ውሽጣዊ ድሌታተን ሕሜታ ምኻኑ ዘግህዳ ኣንስቲ ጥራይ ከምዝነበራ ይዝንቶ ኢዩ። ሎም-ሎም ግን ወዮ ምሕማይ ኣንፈቱ ዝቐየረ ይመስል።
ለካ ሕሜታስ ብምዝራብ ጥራይ ዘይኮነ ብምርምጣጥ'ውን ይሕመ ኢዩባ፡፡ ከናፍር ብምርምጣጥ ጥራይ ዘይኮነ ድማ ብሕልና ከኣ ይሕመ ኢዩ፡፡ ሰብ ኣፉ ከይተዛረበ ብልቢ ክሓሚ ይኽእል ኢዩ።እዚ ኲሉ ግን ኣብ ቅድሚ እግዚአብሔር ቅቡል ዘይምዃኑ፡ መጽሓፍ ቅዱስ ጥራይ ዘይኮነስ ሕልና ሰብውን ዝምስክሮ ሓቂ'ዩ። ሕሜታ "ኣብተን ዳሕረዎት ዘመናት ብብዝሒ ክረኣዩ ኢዮም፡" ተብሂሉ ብትንቢት ካብ ዝተነግረሎም ሓጣውእ ሓደ' ዩ፡፡ ክንሓሚ ከምዘይብልና ጥራይ ዘይኮነ ድማ፡ ዋላ ምስ ዝሓምዩ ሰባትኳ ኮፍ ኢልና ክንሰምዖም ግቡእ ዘይምዃኑ ቅዱስ ጳውሎስ ኮለገና ይነግር።(1ጢሞ3፥1-5 ተመልከት) ደቂ ሰባት ግን፡ ካባይ ጀሚርካ እንዳሰማዕና ኣይሰማዕናን።
ክቡራት ኣንባቦ፡ 'እንታይ'ዩ ክብለና ደልዩ' ትብሉ ትህልዉ ኢኹም፡፡ብፍላይ ቀምቃሞን ቆናኖን፡፡ ኣንፈት ጽሑፈይ እንተላይ ንዓይ ዘካተተ ምዃኑ ኣቐዲመ ክፍለጠለይ ይደሊ።
እዚ ብዛዕብኡ ኣቐዲመ ክትርኸልኩም ዝጀመርኩ ቀምቃማይ፡ ዳርጋ መብዛሕትኦም ዓማዊሉ በቲ ንሱ ዝህቦም ዝነበረ በበይኑ ዓይነታት ሕሜታታት ተሳሒቦም ኢዮም ዝመጹ ነይሮም። እምበር ናይ ምቕምቃም ጥበቡ ስለዝሰሓቦም ኣይኮነን። እምበኣር ሕሜታ ናበይ ከምዘውድቕ ንመልከት፥-
ቀምቃማይ ከምልማዱ፡ ንሓደ ተቐምቃማይ 'ጽብቕቲ ሕሜታ'ያ' ኢሉ ኣዳልዩዋ ዝወዓለ፡ ዳርጋ'ውን ሓንቲ ሕሜታ ምሉእ መዓልቲ ተውዕሎ ብምምባራ፡ " ከላእ፡ ኣነሲ ካብ ሎሚ ጀሚረ ኣምላኽ ኣሎ ኢለ ኣይኣምንን ኢየ!" ኢሉ ዕላል ጀመረሉ። ጽባሕ ከኣ ካልእ ሓዱሽ ዕላል'ዩ ከምጽእ። ድሕሪኡ ድማ ካልእ... እንዳበለ'ዩ ዓማዊሉ ዘእንግድ ነይሩ። ተቐምቃማይ ሃንደበት ስለዝኾኖ ሰምበደ፡፡ "እዋእ! እንታይ ትብል ወደይ፡እሂ ደኣ ከምኡ ኢልካ" በሎ ብኣግርሞት። " ረኣዮ እንዶ፡ኣምላኽ ተዝህሉስ፡ሰባት ንሰባት እሞ ድማ ንመሳኪን ከምዚ ገይሮም፡ከጋፍዕዎም፡ክቐትልዎም፡ክሓርድዎም! እረ ስቕ በል በጃኻ፡፡" መረረኡን ኣብ ኣምላኽ ዘለዎ ቅሬታን ደርጒሓሉ። ከም ኣነጋግርኡ፡ "ሓጢኣት እንዳተገብረ ስለምንታይ ኣምላኽ ስቕ ኢሉ ረኣየ" ንምባል'ዩ።
"እዚ ስጋ ኢልና ካብ ደዃኲን ዓዓዲግና ንበልዖ ዘለናውንኮ" ቀጸለ ቀምቃሚ፡፡ "ህ!"በለ ተቐምቃሚ ብትዂረት።
"መን ይፈልጥ ስጋ ሰብ ተኾነ፡፡ ናይ ሰብ ክፋእ ጥርዚ በጺሑ ንርኢ'ለና። ሰብ ነንሕድሕዱ ክተሓራረድ፡ ኣብ ሓዊ ንሰብ ዝኣክል ፍጡር ክጠብሶ፡ ከመይ ዝበለ ግፍዒ እንክፍጸም፡ ኣምላኽ እንተልዩሲ ስቕ ኢሉ ክርኢ ኢልካ ትሓስብ፧ እሞ በዚ ሎሚ ዘመን ደኣ፡ 'ንስጋ ሰብ፡ ስጋ በጊዕ'ዩ' ኢልካ ንምሻጥ መን ይኽልክሎ ንሰብ! ኣነ ብኡነት እዞም፡ ኩሎም ሸቃጦ ሰብ ደዃኲን፡ ዘለዎም ሃብቲ፡ ውጽኢቱ ካብቲ ክፋእ ተንኮሎም ዘዋሃለልዎ'ዩ፡' ናብ ዝብል ድምዳሜ በጺሐ'የ፡፡ንሰብ ኲሊቱ ኣውጺኻ ምሻጥን ምዕዳግን ዘይተጸገመስ፡ ስጋ ሰብ ጥሒንካ፡ ኣብ መዐሸጊ ዓሺግካ፡ 'ጥሑን ስጋ በጊዕ'ዩ' ዝብል ጽሑፍ ለጢፍካ ምሻጥ እንታይ ከይእግሞ ኢልካዮ ንሰብ። ኣምላኽ ተዝህሉስ በል ነዚ እንዳረኣየ ከመይ'ሉ ስቕ ኢሉ ይርኢ ኣምላኽ።"
ቀምቃማይ ነዛ ዘረባ ምሉእ መዓልቲ መምስዝመጹ ዓማዊል ክጥቀመላ ስለዝወዓለ፡ ሓደ ሰብኳ ዝቃወሞ ኣይረኸበን ነይሩ፡፡በንጻሩ ደኣ "እዋእ! ሓቅኻ፡ ወረ እንዳእገለሲ ከምዚ ከምቲ'ዮም ዝገብሩ" ብምባል ነቲ ሕሜታኡ 'መማቕርቲ' ኢሎም ዝሓሰብዎ እምበሺ ግን ኣብ ርእሲ'ቲ ዝነበረ ዕረነቱ መሊሱ መምረሪ ይውስኽሉ ።
እዚ ናይ ሕጂ ተቐምቃማይ ግን ኣጋጣሚ ናይ ሃይማኖት ሰብ ኮይኑ ስለዝጸነሐ፡ ብውሽጡ ብዙሓት ሓሳባት እንዳዋህለለ ኣዕጋቢ መልሲ ንምርካብ ምስ ፈጣሪኡ ይዘራረብ ነይሩ እምበር፡ ምስቲ ሓማዪ ብእዝኑን ብልሳኑን ኣይሓመየን።
ብእዝንኻ'ውንባ ይሕመ'ዩ።
ብፍላይ እታ "ደፊሩ ኣምላኽ የለን" ንምባል ምኽንያት ዝተጠቀመላ ሓሳብ ጥርቅውቲ መልሲ ከምጽኣሉ ነይርዎ። እዚኣ ንፈጣሪኡ ዝሓመየላ ዓባይን መዋድርቲ ዘይብላን ሕሜታ ሳዕቤና ከባድ ምዃና ከረድኦ ብዙሕ ሓሰበ።
ወይ ጉድ! ኣምላኽ ዕጉስ ኴኑ'ምበር፡ ሰብሲባ ንፈጣሪ'ውን ክሓምዮ ኣይጽግሞን'ዩ!
ቀምቃማይ ይሓሚ፡ ተቐምቃሚ ከኣ ጸጥ ኢሉ ሓሳባቱ ምስ እግዚአብሔሩ የሰላስል።
ኣብ መወዳእታ ተቐምቃሚ ተቐምቂሙ ምስ ወደአ፡ በቲ ጎደና ብዙሓት ዝግፍ-ግፍ ዝበሉ ሰባት ክሓልፉ ረኣየ፡፡ ሽዑ ርእሱ ምስቲ መስትያት እንዳኣነጻጸረ፡ ኣነሲ ኣብዛ ዓለም ቀምቃሞ ዝበሃሉ ብጭራስ የለዉን ኢለ'የ ዝኣምን!" በለ።
"What! "
ወዮ ቀምቃማይ ኣብ ክንዲ ዘኾለስኩስ ኢደይ ተነኸስኩ ስለዝኾኖ፡
"እዚ ኲሉ ጹቡቕ ገይረ ኰሓሒለካስ ቀምቃሞ የለዉን ኢልካ ዘረባ'ሎ! ኣነኸ ናበይ ከይደካ፧" መለሰ ቀምቃማይ።
" ክላእ ቀምቃሞ ተዝህልዉ ደኣ ኣይትርእዮምን ድኻ ኣብ ጐደና ጸግሮም ዘንውሑ፡ዘጊፎም ዝቕምቅሞም ዝሰኣኑ ሰባት ነዛ ከተማ መሊኦማ፡፡ ቀምቃሞ ተዝህልዎስ'ታይ ኴኖም ዘይቅምቅምዎም!" ወዮ ቀምቃማይ ውሽጣዊ ቊጥዓ እንዳተሰመዖ፡-
"እሞ ስለዘይሞጹኒ እምበር ኣነኮ ኣብ መዓልቲ 100 ሰባት ክቕምቅም ዝኽእል ቀምቃሚ ኢየ።" ኢሉ ክእለቱ ብፍናን ዳሕደሐ።
" ዓንተዎ ኣምላኽ የለን ዝበልካኒ'ውን፡ ኣብዛ ዓለም፡ ሰብ ናብ እምላኽ ምምጻእ ስለዝገደፎ'ዩምበር ኣምላኽ ዘየሎ ኴኑ ኣይኮነን። ኲሉ ሰብ ናብ እግዚአብሔር ተዝምለስ ሓጥያት ተዝሓድግ፡ንእግዚአብሔር ብእምነትን ብግብርን ተዝስዕብ፡ በረኸቱ ምፈሰሰ፡እዚ ኩሉ መቕጻቲ ከኣ ኣይምመጻናን ነይሩ።
"እመ ኩሉ ፍጥረት ይዐቅብ እግዚአብሔር፡ ለኲሉ ዘኢያስተርአየ እመ ሰናየ ወእመ እኩየ።" ትርጉሙ፡
"ኣምላኽ ብኹሉ ተግባራትና፡ሰናይ ኮነ እኩይ፡ተሓቢእና ብዝገበርናዮውን ከይተረፈ ክፈርደና ኢዩ።" መክ12፥14)" ኢሉ ደምደመ ተቐምቃሚ።
ወዮ ቀምቃማይ ብጽሞናን ተመስጦን ድሕሪ ምስማዕ፡ ንብዙሕ እዋን ምስ ሕልንኡ ምጉት እንዳፈጠረ ብዝረኣዮምን ብዝሰምዖምን ናይ ደቂ ሰባት ሓጣውእ ኣማኻንዩ፡ ህልውና እግዚአብሔር ክኽሕድ ስለዝጸነሐ፡ ፈጣሪኡ ክሳብ ክንድዚ ዝዕገስ ኣምላኽ ምዃኑ እኹል መረዳእታ ቀሰመ። መገዱ ንምስትኽኻል ድማ ኣንፈቱ ናብ ፈጣሪ ክጽጋዕ ወሰነ።
'ኣምላኽ የለን' ኢሉ ዘውሪ ዝነበረ ሰብ ታሪኹ ክቕይር መረጸ፡፡ብንስሓ ተሓጺቡ፡ ስጋ-ወደሙ ተቐቢሉ፡ ምስ ፈጣሪ ተጣበቐ።
ለካ ክርስትናስ ከምዚ'ዩ! "ብዙሓት ቀዳሞት ዳሕረዎት፡ብዙሓት ዳሕረዎት ድማ ቀዳሞት ክኾኑ ኢዮም!" ድዩ ዝተባህለ።
"ወገነይ ምላልባሽ 'ኣነ ኣብዚ ነይረ እንድየ' ኢልካ ትምክሓሉ መንፈሳዊ ግብሪ ይነብረካ ይኾውን። ንስኺ'ውን ፍቕርተይ፡ 'ክንድዚ ዓመታት ሰሪሐ እንድየ' ኢልኪ እትሕበንሉ ግብሪ ጽድቂ ይነብረኪ ይኾውን'ዩ፡፡ እንተኾነ ሕጂ'ውን ድሕሬና ዝመጹ ኣህዛብ ባዕልና ዝመሃርናዮም፥ ካባና ቅድስና ዝተማህሩ ክቕድሙና ዝኽእልሉ መድረኻት ብዙሕ ስለዝኾነ፡ ንባዕልና ንሕና ካብ ኲሉ ክፉእ ነገር ንርሓቕ። ድማ መጀመርያ ምስ እግዚአብሔር ክንነብርሞ ንጽዓር፡ ምስ ሰባት ከመይ ኢልካ ይንበር ንሱ እግዚአብሔር ክምህረና ኢዩ!"
ይብል ነበረ ሓደ ሰባኺ።
ፈጣሪ ጥበቡን ምስትውዓሉን ይዓድለና።
ይትባረክ እግዚኣብሄር ኣምላክ ኣበዊነ፡ኪያነ ዘፈጠረ ከመናብልኮ።
