ተግሳጽ

ተግሳጽ ናይ ኣገልገልቲ እግዚኣብሄርን፡ኣገልገልቲ ኣጋንንቲን ዝፍለዩላ፡ሓቀኛ ኣመንትን ኣምስሉያውያንን ዝምመዩላ፡ደቂ እምላኽ ኣብ ወላዲኦም እንክጸንዑ፡ንፍትወተ ስጋ ዝግዝኡ ግን ካብ ኣምልኾኡ ዝርሕቑላ ናይ ሃይማኒታውያን መንፊት ኢያ።መንፊት ንየማንን ንጸጋምን ኣላኽዕ ኣላኽዕ ምስ ኣበልካዮ፡ እቲ ጠጥዑዩ በይኑ ይእክውብ፡ እቲ ጎጉርዱ ድማ በይቡ ይፍለ።

ክርስትያን ተግሳጽ ክቕበል ኣሎዎ። ሓውኹም መደንግጽ ኢየ፡ኣገልገልቲ እግዚኣብሄር ብዙሕ ግዜ ክግስጹ ክሰምዕ እንከለኹ ሕልናይ ይርብሸኒ፡" ኣፍ ጻድቕሲ ትገኣጸኒ ደኣ፡ንሱ ንዓይ ከምቲ ኣብ ጭሔሎ ዝወርድ ዘይቲ ርእሲ ኢዩ፥" ተባሂሉ ከምዝተጻሕፈ ተግሳጾም ባህ ክብለኒ ነይርዎ።ግን ዓቕሚ ይውሕደኒ፡ጣዕ ጠራዕ ጠራዕራዞ ኢልካ ሃጽ በል ይመጻኒ።ኣብ መንጎኡ ግን እግዚኣብሄር ንድሕነት ደቂ ሰብ ኢሉ ዝኸፈሎ ናይ ድሕነት ዋጋ ምስዚ ናተይ ተግሳጽ ከረኣእዮ ይፍትን ሞ ክንድምንታይ ከምዝዓሸኹ ይበርሃለይ።

መግፋዕትና ክንድቲ ክርስቶስ ዝተገፍዖ ኣይበጽሕን፡ውርደትና ክንድቲ ኣምላኽና ዝተዋረዶ ኣይመዓራረን፡ናይቲ ኣብ ልዕሌና ዘውረድዎ ንዕቀት፡ምስቲ ክርስቲስ ብሄረዶስ ዝተናዕቆ ፍጹም ኣይነጻጸርን።እሞ እንታይ ደኣ ንበል? ክንድዚ ተግሳጽ፡ክንድዚ ንዕቀት፡ክንድዚ ውርደት ከጋጥመና እንከሎ ተመስገን ንበል።እዚ እግዚኣብሄር ካብ መከርኡ ተኻፈልቲ ንኽንከውን ዘዳለዎ ናይ እግዚኣብሄ ሞባእ ኢዩ።በዚ መከራ ገይሩ ክዛረበና ዝደለዮ ነገር ስለዘሎ ብውህበቱ ደስ ኢሉና ነመስግኖ።

ስለኹሉ ውህበቱ ስሙ ይመስገን፡ኣሜን።

ኣቐዲሙ ንዝፈለጥካና እግዚኣብሄር ንዘለዓለም ተመስገን ።

ኣቐዲሙ ንዝፈለጥካና እግዚኣብሄር ንዘለዓለም ተመስገን ።
ኦ እግዚኣብሄር ክጽነስ እንከለኹ ድቂ ምስ ኮንኩ፣ኣብቲ ቅድሚ ምጽናሰይ ዝነበረ ግዜ ኣብ ሕልና ኣቦይን ኣደይን ነበርካ።ሽዑኡ ምስኦም ኮይንካ ንኽምርዓዉ ኣተባብዓኻዮም።ኣነ ግን ሽዑኡ ናብዛ ማህጸን ኣደይ ክኣቱ ምኻነይ ይፈልጥ ኣይነበርኩን።
ድቂ ኮይነ ምስ ተጸንውስኩ፡እቶም ክልተ ዓይነት (ተባዕታይን ኣንስታይን) ፈሳሲ ዘርኢ ወለደይ፡ናብ ዓጽሚ ለበስ ኮይነ ንኽስራሕ ድንቂ ተኣምር እረ ካብ ኣእምሮ ንላዕሊ እካ እንተኾነ፡ኣብ ማህጸን ኣደይ ኮይንካ ዝሰራሕካኒ ግን ንስኻ ኢኻ።ነቶም ክልተ ዘርኢ ኣርጋእካዮም እሞ ዓጽሞ ለበስ ኮይነ ቀስ ብቐስ ኣነ ተሰራሕኩ።ነገር ግን ቅድሚ ኣብ ማህጸን ምእታወይ ንስኻ ክትሰርሓኒ ምኻንካ ይፈልጥ ኣይነበርኩን።

ትሸዓተ ወርሒ መሊአ ካብ ማህጸን ኣደይ ምስ ወጻኹውን፡ናብዚ ሕጂ ዘለኽዎ ደረጃ ዓቕሚ ኣዳም ክበጽሕ ምኻነይ ኣይፈልጥን ነይረ።ኣብ መንጎ ህጻንነተይን፡ኣብ መንጎ ንእስነተይን ንዝነበረ ውረድ ደይን ናይ ሓጥያት ቃልሲ ክሳብ ክንድዚ ክብድለካ ምኻነይ ኣቐዲመ ይፈልጥ ኣይነበርኩ።ንስኻ ግን ቅድሚ ምውላደይ፡እረ ኣቦይን ኣደይን ቅድሚ ምምርዓዎም፡ንዓይ ትፈልጠኒ ነይርካ።ምስተመርዓዉ፡ምስ ወለዱኒ፡ምስየዕበዩኒ፡ኣነ ናብ ጋይላን ዳንኬራን ክኸይድ ከለኹ፡ክሽፍት ኣጽዋር ሓጣውእ ዓጢቐ ኣንጻር ቅድስና ክልዓል እንከለኹ ቅዱስ እግዚኣብሄር ንስኻስ ትፈልጥ ነይርካ ኢኻ።
ከመይ ዝበለ ርህራሄ ኢዩ ርህራሄኻ፡ከመይ ዝበለ ለውሃት ኢዩ ለውሃትካ!!

ከመይ ዝበለ ርህራሄ ኢዩ ርህራሄኻ፡ከመይ ዝበለ ለውሃት ኢዩ ለውሃትካ!!

ሓንቲ መዓልቲ ነዛ ስልጣንካ ንዓይ እንተትህበኒሲ፡እሞ ድማ እዞም ኩሎም ንጽባሕ ዝብዱልኒ ሰባት ኣቐዲመ ክብድሉ ምኻኖም እንተዝፈልጥ፡ዘውርደሎም ጭካነ መለክዒ ኣይምሃለዎን።ለዋህ እግዚኣብሄር ንስኻ ግን ትማሊ ንዝነበረ መንነተይ ከይተጸየፍካ ንናይ ጽባሕ ትንሳኤይ ተመልከትካ።ምንም እካ እንተኣጉሃኹኻ፡ንስካ ግን ክሳብ መጨረስታ ተዓጊስካኒ ኢኻሞ ተመስገን።
ሕጅውን ኦ ሉዕል እግዚኣብሄር፡ጽባሕ እንታይ ከምዝኸውን ኣይፈልጥን ኢየ፡ክብድለካ ድየ ከሕጉሰካ፡ቀታሊ ነፍሲ ድየ ክኾውን ብቃልካ ሰባኺ፡ወናም ብዓል ጛይላ ድየ ክኸውን ብፍቕርኻ ዝምብርከኽ፡ኣይፈልጥን ኢየ።ንስኻ ግን ንኹሉ መንነተይ ትፈልጦ ኢኻሞ ሕጅውን ተመስገን።ንጽቡቐይ እምበር ንጥፍኣተይ ከምዘይትዓጥቕ ንስኻ ትፍለጥ ኢኻሞ ተመስገን።

ከመስግነካ እንከለኹ፡ካብ ልሳነይ ወይ ካብ ልበይ ዝመንጨወ ኣይኮነን ናትካ ገንዘብካ ኢዩ።ምስጋኻ ኣብቲ ንስኻ ዘለኻሉ ስፍራ መሊኡ ኣሎ።ኣብ ልበይ ኣሎኻ፡ኣብ ልሳነይውን ኣሎኻ፡ኣብ ነፍሲወከፍ ከይዲ ሂዎተውን ኣሎኻሞ እንተኣመስገንኩኻሲ ኣነ ዝፈጠርክዎ ምስጋና ኣይኮነን።ናትካ ናይባህሪኻ ኢዩ።እንተዘየመስጊነካ ዝጎድለካ ኢየለን፡እንተኣመስጊነካ ድማ ዝምልኣልካ የለን፡ነገር ግን ምስ ኣመስገንኩኻ ባራኺ ኣምላኽ ኢኻ፡እንተኣግረምሪመ ግን እቶም መግረምቲ ዝኾኑ ምስጋናኻ ዝቃወሙ ኣጋንንቲ ንልበይን ልሳነይ ከይከብዎ መታን ንዓኻ ከመስግን ሓይሊ ሃበኒ።

ኣሜን፡ኣሜን ኣሜን።
ንኣብን ንወልድን ንመንፈስ ቅዱስን ሓደ ኣምላኽ ምስጋና ይኹን ፡
ንወላዲቱ ኣደ ኣምላኽ ድንግል ማርያም ምስጋና ይኹን፡
ንክቡር መስቀሉ ምስጋና ይኹን፡
ኣሜን ኣሜን ኣሜን።

ሕጽር ዝበለ መንፈሳዊ መልስታት ነቲ ጠንቂ መዐንቀፊ ዝኮነ ሓሳብ ዘይድሓን ሒዞም ወትሩ ዝሓቱና፣

ሕቶ 1. ክንጅምር፡-1ቆሮ 3፣16 ቤት መቅደስ ኢና እንዳበለስ ህንጻ ንምንታይ አድለየ？

ሃዋርያ ቅዱስ ጳውሎስ ብሕጽር ዝበለ ቤት መቕደስ ኣምላኽ ኢኹም ኢዩ ዝበለ ድኣምበር፡ቤት መቕደስ ኣየድልን ኢዩ ኣይበለን፡፡(1ቖሮ3፥16) ፡ስለዚ ንሱ ዝበለ ንስኹም ቅድስና ዝተቐበልኩም ከምቲ ቤት መቕደስ ቅዱስን ካብ ናይ ኩሉ ህንጻታት ናይዛ ዓለም ፍሉይን ዝኾነ፡ንስኹም ውን ፍሉያትን ቅዱሳንን ምኻንኩምዶ ኣይትፈልጡን ኢኹም፡፡ኢዩ ዝብል ዘሎ፡ ንምንታይ እግዚኣብሄር ካብ መርገመስጋን ካብ መርገመ ነፍስ ሓራ ዘውጻና ስለዝኾነ( ዮው 19፥30) ኩሉ ተፈጸመ ይብል፡፡ቅዱስ ሃዋርያ ጳውሎስ ቅድስና ዝተቐበልኩም ክንስኹምሲ ንምታይ ርኽሰት ትገብሩ? ንምንታይ ምስ ሓጥኣን ትጽምበሩ? ነዛ ቤትመቕደስ ገይሩ ጎይታ እግዚኣብሄር ዘዳለዋ ሰብነትኩም፡ብሓጥያት እንተድኣ ኣበላሽኹማ እሞ ድማ ብንስሓ እንተዘይተመሊስኩም ግን መወዳእታኹም ክፈርስ ኢዩ(1ቆሮ3፥17) ይብል፡ድኣምበር ህንጻ ቤትመቕደስ ኣየድልን ኢዩ፡ህንጻ ቤትመቕደስ ከይትሃንጹ ኣይበለን፡፡በንጻሩ ካድኣ እቲ ሃዋርያት ዝግልገልሉ ቅዱስ ቤት መቕደስ ኣምላኽ ካብ ኩሉ ዝተፈልየ ምኻኑ ቅዱስ ጳውሎ ጽሒፉ ኣሎ (2ቆሮ2፥16 መቕደስ ኣምላኽከ ምስ ጣዖታት እንታይ ስምምዕ ኣሎዎ?) ይብል፡፡እወ ሓቁ ኢዩ ጣዖታት ንመግስቲ እግዚኣብሄር ዝቃዎሙ ኢዮም፡ቤትመቕደስ ድማ ንመንግስቲ እግዚኣብሄር እትግዛእን ንእግዚኣብሄር እትእዘዝን ኢያ፡ጣዖታት ብዝሙትን ብርኽሰትን ዝተዓለሱ ኢዮም፡ቤትመቕድስ ግን ብቅድስናን ንጽሕናን ከምፍቃድ ኣምላኽ እትንብር ኢያ፡ጣዖታት ሰብ ዝሰርሖም፡ብፍቃድ ደቂሰብ ዝመጹ ኢዮም፡ቤትመቕደስ ሰብ ዝሃነጻካ እንተኾነት ነገር ግን ብፍቃድ እግዚኣብሄር ዝተሰረተት ምስታ ሰማያዊት ቤትመቕደስ እትመሳሰል ንእግዚኣብሄር እተኽብር ኢያ፡፡ስለዚ ቤት መቕድስን ቤት ጣዖታትን ፈጺሙ ዘይራኸብ ከምምኻኑ መጠን፡ "ንስኻትኩም ድማ ቤት መቕድስ ኣምላኽ ምኻንኩምን መንፈስ ቅዱሱ ቀዲሱ መሕደሪኡ ክትኮኑ ዝሓረየኩምን፡-- ካብዛ ዓለም እዚኣ ኣይኮንኩምን እሞ፡ናይዛ ዓለምዚኣ ግብሪ ኣይትግበሩ፡ቤትመቕደስ ካብ ኩሉ ፉሉይ ከም ምኻኑ፡ፍሉያት ኩኑ፡ቤትመቕደስ ንጹሕ ከምምኻኑ ንጹሓን ኩኑ፡፡

ኢዩ ዝብለና ዘሎ ቅዱስ ጳውሎስ ሃዋርያ፡፡

ቤት መቕደስ ኣምላኽ ምኻንኩምን፡መንፈስ ኣምላኽ ኣባኹም ሓዲሩ ምህላዉንዶ ኣይትፈልጡን ኢኹም? ንዝብል ንሕና እዞሞ ናይ ሎሚ ዎሎዶ፡ቤት መቕደስ ኣይደልን ዝብል ካበይ ኣምጽእናዮ፡ቤት መቕድስ ኢኹም ዝብል ከመይ ኣየድልን ንምባል ቀየርናዮ?
======

ቤት መቕደስ ኢኹም ንዝብል፡ቤትመቕደስ ኣየድልን ብምባል እንተድኣ ተርጊምናዮ ዝመጽእ ሳዕቤን፡-እንታይ ይኾውን? ገምቱስከ፡፡

ኣብነት ንምርኣይ ዝመጹ ሳዕቤናት እዚኦም ኢዮም፡፡
1.ማቴ 5፥14 ንስኻትኩም ንዓለም ብርሃኑ ኢኹም፡ንዝበለ ውን ብርሃን ኣየድልን ኢዩ፡ ንስጋና ዝኾውን ብርሃነጽሓይ ወይውን ንኩሉንትናና ዘብርሃልና ምንጪ ብርሃን ኢዮሱስ ክርስቶስ ኣየድልን ኢዩ፡፡ምኽንያቱ ንዓለም ብርሃና ኢኹም ስለዝበለና፡ንዓለም ከብርሃላ ዝኽእል ካልእ ኣየድልን ኢዩ ንሕና ኢና ብርሃን ናብ ምብላ ክንኣቱ ኢና፡፡ለቱ ስብሃት !!!

2.ማቴ5፥13 ንስኹም ንምድሪ ጨው ኢኹም ንዝብል፡ዓለም ጨው ዝዕድል ኣየድልያን መቐረት ዓለም ንሕና ኢና፡ዓለም መቐረት ክህልዋ እንተኾይኑ ካብ ካልእ ንዝኾነ ምርኣይ ወይ ምምዕዳው ኣየድልያን ኢዩ፡ዋላ ንክርስቶስ ከተምልኾ ኣየድልያን ኢዩ፡ምኽንያቱ ጨዋ ኢኹም ስለዝበለ፡ናይ ዓለም ጨው ንሕና እምበር ፡ደጊም እግዚኣብሄር ኣይኮነን ናብ ምባል ናብ ናይ ሰይጣን ትምህርቲ ይወስደና፡፡

3.መዝ 22፥6 ኣነ ሓሰኻ እምበር ሰብ ኣይኮንኩን፡-ንዝብለ ቅዱስ ዳዊት ካብ ፍጥረት ሓሰኻ ኢዩ፡ስለዚ ሰብ ኣይኮነን ፡፡ቅዱስ ዳዊት ካብ ፍጥረታት ሓሰኻ ኢልና እንተድኣ ተርጊምናዮ ድማ፡ጎይታናን መድሓኒና ኢዮሱስ ክርስቶስ "ኢዮሱስ ወዲ ዳዊት" ኢሉ ዝጭድር ዝነበረ ባርጤሞዎስ ( ማር10፥47) ወዲ ዳዊት ስለዚ በለ፡- ኢዮሱስ ካብ ስጋ ሓሰኻ እምበር ካብ ስጋ ሰብ ኣይኮነን ዝተዋሃሃደ፡ምኽንያቱ ቅዱስ ዳዊ ኣነ ሓሰኻምበር ሰብ ኣይኮንኩን ስለዝበለ፡ክርስቶስ ውን ወዲ ዳዊት ስለዝተባህለ፡ኣምላኽና ዝተዋሃሃዶሲ ካብ ፍጥረት ሓሰኻ ብዝተወስደ ስጋ ኢዪ ናብ ዝብል ኣዚዩ ንመንግስቲ እግዚኣብሄርን ክብሪ ቅዱሳንን ዝጻረር ትምህርቲ ኣጋንንቲ ክወስደና ኢዩ፡፡
=====

ስለዚ ቤት መቕደስ ኣምላኽ ኢኹም ስለዚበለ ንሕና ከም ቤት ምቕደስ ክንነብር ክንጽዕር ድኣ ይግባእ እምበር ኣየድልን ናብ ዝብል ጉጉይ ምንፍቅናዊ ትምህርቲ ክንስዕብ ኣይግባእን፡፡እግዚኣብሄር ካብ ጉጉይ መንገዲ ይሓልወና፡ነቶም ዝጠፍኡ ድማ ይምለሰልና ዝቐጸለ ሕቶ 2፡-

መጋረጃ ቤት መቕደስ ኣብ ክልተ ተተርተረ (ማር15፥38) ስለዝበለ ቤት መቕደስ ንምንታይ ኣድለየ? ንዝብል፡-
=======
መጀመርያ ተተርተረ ምባል፡ፈረሰ ምባል ሓደ ኣይኮነን መጋረጃ ክትርተር ይኽእል ኢዪ፡ክፈርስ ግን ኣይክእልን ፡ ብጨርቂ ዝስራሕ ንሕና ንፈልጥ ይትርተር ይበሃል ድኣምበር ይፈርስ ኣይበሃልን ኢዩ፡፡ስለዚ መጋረጃ ቤት መቕደስ ካብ ላዕሊ ክሳዕ ታሕቲ ኣብ ክልተ ተተርተረ፡ዝብል ዘሎ ኣቐዲሙ እቲ ቤትመቕደስ ኣብ ክልተ ዝተመቕለ መጋረጃ ዘይምምባሩን፡ብዜይካ ካህን ንበይኑ ድማ ካልእ ተኻፋሊ ሕብስቲ ክኾውን ዝኽእል ዘይምምባሩን ኢዩ ዘርእየና፡፡ካብቶም ናይ መወዳእታ ናይ ቡሉይ ኪዳን ካህን ዝኾነ ምስ ሓዲሽ ኪዳን ድማ ምትእስሳር ዘሎዉ ካህን ዘካርያስ ውን ኣብ ውሽጢ ቤት መቕደስ ኮይኑ ዕጣን ክዓጥን ከሎ እቶም ህዝቢ ብወጻኢ ኮይኖም ኢዮ፡ ዝጽበይዎ ነይሮም ድኣምበር ኣብ ውሽጢ ምስኡ እናተቓባበሉ ኣይነበሩ፡፡ (ሉቃ1፥9-10)፡እዚ ኸኣ ኣብ ዓመት ሓንቲ ግዜ ጥራይ ብዕጫ በጺሕዎ ኣትዩ ዘገልግሎ ዝነበረ ኢዩ፡ምኽንያቱ እታ ናይ ብሉይ ቤት መቕደስ፡ሓደ ካህን ኣብ ዓመት ሓንቲ ግዜ ጥራይ ከገልግል ከምዝግብኦ ኢዩ ዝእዝዝ (ዘጽ30፥10) ንመልከት፡፡
ሎሚ ግን፡- ድያቆን ተንስኡ ለጸሎ ክብል እንከሎ እዝግኦ ተሳህለነ፡ብምባል ህዝቢ ይቅበሎ፡ ካህና ኣብ ቅድስተቅዱሳን ኮይኖም ሰላም፡ለኩሉኩሙ፡ክብሉና እንከለዎ ምስለ መንፈስከ ብምባል እቶም ከምኡ ክርስትያን ዝኾኑ ህዝቢ ይምልሱ፡ ስለዚ ቅዳሴ ቅድም ኣብ ብሉይ ዝነበረ ሓደ ካህን ኣብ ውሽጢ ቤት ምቕደስ ተዓጽዩ ይቕድስ፡እቲሎም ህዝቢ ብወጻኢ ይኾኑ፡፡ንሱ ግን ተዓጽዩ ንበይኑ፡እቲ መጋረጃ ድማ ኩሉንትንኡ ዝተዓጸወ ኮይኑ ይቕድስ ነይሩ፡ሕጅ ግን ጎይታናን መድሓኒናን ኢዮሱስ ክርስቶስ ህዝብን ካህናትን እናተቓባበልኩም ቅዳሴኹም ስርዑ መስዋእትኹም ኣነ ኢየ እሞ፡በይኖም ካህናት ንመስዋእቲ ከቅርቡኒ ኣይግባእን፡ኩሉኹም ቆይምኩም ኣሀዱ !!! ምስተባህለ ኩሉኹም ቁሙ ስለዝበለና፡- ኩሉና ተሳተፍቲ ክንኾውን ብማለት ኢዩ፡፡ሽዑኡ ነቲ ሕብስተ መስዋእቲ ካህናት ጥራይ ዝበልዕዎ ዝነበሩ ሕጅ ግን ስጋይ ዘይበልዐ፡ደመይ ዘይሰተየ ናይ ዘልኣለም ሂዎት የብሉን (ዮሓ6) ስለዝበለ ካህን ጥራይ ዘይኮነ ኩሉ ኣማኒ ተኻፋሊ ናይ ምኻን መሰል ተዋህበ፡፡
======

ስለዚ እዚ መጋረጃ ቤት መቕደስ ካብ ላዕሊ ክሳብ ታሕቲ ኣብ ክልተ ተተርተረ ዝብል ዘሎ ነዚ ከመልክት ስለዝደለየ ድኣምበር፡ቤት መቕድስ ምህናጽ ኣይድልን ኢዩ ንምባል ኣይኮነን፡፡ንምኻኑ ጎይታናን መድሓኒናን ኢዮሱስ ክርስቶስ ቤት መቕደስ ኣየድልን ኢዩ ዝብል ትምህርቲ ኣበየናይ ቦታ ከምኡ ኢሉ? በንጻሩካድኣ፡ቤተይ ንኹሎም ኣህዛብ ቤት ጸሎት ተባሂላ ክስመ ኢያ ንስኻትኩም ግና በዓቲ ጋሓሉት ገበርኩሞ (ሉቃ16፥46) ብምባል ነቶም ንቤት መቕደስ ዘርከሱን ንቤት ጸሎት ቤት ሸቐጥ ዝገበሩዎን ክሶጎምን ኣእህዛብ ማለት ዘይኣመንቲ፡ብሰለስትነትን ሓድነትን ስላሴ ኣሚኖም ብስጋውነት እግዚኣብሄር ውን ብምእማን ንዕዖኦም ቤት ጸሎት ተባሂላ ክትስመ ድኣምበር ኖርማል ገዛ ከምዘይኮነ ኣጸቢቑ ገሲጽዎም፡፡እዚ ኣቕዲሙ ብነብያቱ ገይሩ እዛ ሕጂ ዘላ ቤት መቕደስ ንኹሎም ኣህዛብ ቤት ጸሎት ከምትኾውን ኢያ ኢሉ ዝተናገሮ ኢዪ (ኢሳ56፥7) ተመልከት፡፡

ስለዚ ኣብቲ እዋን ብሉይ ቤት መቕደስ ኣምላኽ ንኣህዛብ ትምልከቶም ከምዘይነበረት ኩሉና ዘይንዝግዖ ሓቂ ኢዩ፡ንኹሎም ኣህዛብ ቤት ጸሎት ተባሂላ ትስመ ዘላ ግን ሒጂእቲ መጋረጃ ቤት መቕደስ ካብ ላዕሊ ክሳብ ታሕቲ ኣብ ክልተ ምስተተርተረ፡ኢዮሱስ ክርስቶስ ቅዱስ ስግኡን ክቡር ደሙን ዝፍርተተሉ መስዋእቲ ኮይኑ ካብታ ድሕነት ዝተፈጸመላ ግዜ ምኻኑ ንኽነግር ደኣ እምበር ፈሪሱ ኢዩ ስለዚ ኣየድልን ኢዩ፡ናብ ዝብል ናይ ክሕደት ትምህርቲ ኣጋንንቲ ክንስዕብ ኣይግባእን፡፡ መታሓሳሰቢ፡ተተርተረ ዝብል ፈሪሱ ኢዪ ደጊም ኣየድልን ኢዩ ናብ ዝብል እንተድኣተርጊምናዮ ዝመጽእ ዝዓበየ ኽሕደት ተመልከት፡-

1.ሰብነት ወድሰብ ብስጋ ምስ ሞተ ስግኡ ብምልኡ ይፈርስ ኢዩ፡፡ ስለዚ (ኢሳ26፥19 ምውታት ህዝብና ህያዋን ክኾኑ፡ሬሳታቶም ከኣ ክትንስኡ ኢዮም፡) ንዝብል ተስፋ ሰማያትና ዝኾነ ትንሳኤናውን ፡ስጋና ሕጂስለዝፈረሰ ብስጋ ስለዝሞትና ደጊም ትንሳኤ ዘጉባኤ ዝብሃል የለን ናብ ዝብል ሰይጣናዊ ትምህርቲ ይወስደና፡ለቱ ስብሃት፡፡

2.ሃዋርያት መብዛሕትኦምን ቅዱሳን ኣቦውን ክሳብ ሞት እሙን ኩንሞ፡ኣነ ውን ኣኽሊል ዓወት ክህበካ ኢየ፡ (ራእ2፥10) ንዝብል እሙን ቃል ብምሓዝ ንዝሕለፍዎ ሰማእትነት ስለዝሞቱ ፈሪሶም ኢዮም፡ምኽንያቱ ገሊኦም ስግኦም ተቆራሪጹ፡ገሊኦም ብዝኸፍአ ኣማውታ ከም ቅዱስ ጳውሎስ ክሳዶም ተሰይፎም፡ከም ቅዱስጅዮርጅስ ዝኣመሰሉ ውን የዕጽምቶም ከይተረፈ ተጣሒኑ ኣብ በሪኽ ቦታ ኮይኖም ኣዝርዮሞ፡ኢዮም፡ነዚ ብድፍረት ሰብነቶም ፈሪሱ እንድዩ ህያዋን ኢዮም ዝብል ትምህርቲ ካበይ መጸ? ጅዮርጅስ ሊቀሰማእት ሰብነቱ ጢሒኖም ኣዝርዮሞ ክንሶምሲ ዝፈረሰ ከመይ ኢሉ ክትንስእ ይኽእል? ናብዝብል ኢክርስትያንያዊ ስነሓሳብ ከምንሓስብ ይገብረና፡፡እግዚኣብሄር ክፉእ ነገራት የርሕቀልና፡፡

3.ኣብ መወዳእታውን፡ መጋረጃ ቤትመቕደስ ኣብ ክልተ ተተርተረ ንዝብል፡ደጊም ኣየድልን ኢዩ እንተኢልና፡ ሰብነት ጎይታናን መድሓኒናን ኢዮሱስ ክርስቶስ ውን ቤት መቕደስ ኢያ፡፡ (ዮሓ2፥19-22 ነዚ ቤት መቕደስ እዚ ኣፍርስዎ ኣነ ድማ ብሰለስተ መዓልቲ ከልዕሎ ኢየ፡፡) ኢሉ ብዛዕባ እቲ እንጻ ዘይኮነስ ብዛዕባ ሰብነቱ ይዛረብ ምንባሩ፡ሃዋርያት እውን ብዛዕባ ሰብነቱ ይዛረብ ከም ዝነበረ ድሕሪ ትንሳኤኡ ብዝተረድኦም (ዮሓ2፥22) ስለዚ ንሱ ብሞቱ ስለዝፈረሰ፡- ኣይተንሰአን ናብ ዝብል ክሕደት ይወስደና፡ምኽንያቱ ንሱ ቤት መቕደስ ኢዩ፡፡ነቶም ሰባት ድማ ነዚ ቤት መቕደስዚ ኣፍርሲዎሞ ኣነድማ ኣብ ሰለስተ መዓልቲ ከልዕሎ ኢየ ማለቱ፡ንዓይ ቅተሉኒሞ ድሕሪ ሰለስተ መዓልቲ ክትንስእ ኢየ ማለቱ ኢዩ፡፡ስለዚ መጋረጃ ቤት መቕደስ ኣብ ክልተ ተተርተረ ንዝብል ደጊም ኣየድልን ኢዩ እንተኢልና፡ጎይታናን መድሓኒናን ኢዮሱስ ክርስቶስ ውንኮ ስለድሕነትና ክብል፡ብኹርማጅ ተገሪፉ፡ብእሾኽ ተቲዕም ኣብ ርእሱ ተደፍኢሉ፡13 ሕማማተ መስቀል ተቐቢሉ ኢዩ፡፡ስለዚ ኣየድልን ኢዩ ማለት ድዩ፡መከራ ስለዝተቀበለ ኣየድልን ኢዩ ናብ ምባል ኢዮ ዝወስድ እዚ ክሕደታዊ ትምህርቲ፡ካልእውን ብዙሕ ክንብል ንኽእል ኢናሞ፡ኣብ ጌጋ መንገዲ ንዘለዉ ብስጋ የሕዋትና ናብዛ ቅድስትን ሃዋርያዊትን ዝኾነ ቤተክርስትያን ክመልሶም፡ንዓና ንደቁ ድማ ካብ ክሕደታዊ ትምህርቲ ኣጋንንቲ ካብ ምስማዕን ካብ ምዕንቃፍን ክሕልዎና ሰናይ ፍቓድ እግዚኣብሄር ይኹነልና ኣሜን፡፡

ሕቶ 3፡-. ኣበየ ቦትኡ ህንጻ ቤት መቕደስ ንምንታይ ኣድለየ? ይብል፡፡እዚ ድማ ጎይታናን መድሓኒናን ኢዮሱስ ክርስቶስ ብዝኣዘዞ ድኣምበር፡ኦርቶዶክስያውያን ካብ ባዕሎም ዘበገስዎ ኣይኮነን፡፡ከምቲ ኣቐዲምና ዝብለናዮ፡" ቤተይ ቤት ጸሎት ተባሂላ ንኹሎም ኣህዛ ክትስመ ኢያ፡'ዝብሎ ቅዱስ ኢስይያስ መሰረት፡ብምግባር፡እግዚኣብሄር ድሕነት ንኹሉ ሕዝብን ኣህዛብን ድኣምበር፡ንህዝቢ ጥራይ ኣይመጸን፡ስለዚ መጀመርያ ነቶም ህዝቡ ዝነበሩ ድሕነት ሰበኸሎም ነታ መንፈሳዊ በረኸት ንኽሓፍሱላ ኣቐዲሙ ክሃንጽዋ ዝኣአዞም ቤትመቕደስ ድማ ብኸመይ ዝበለ ኣተሓሕዛን፡ነየናይ መስዋእቲ ክስውኡ ከምዝግብኦምን ኣጸቢቑ ገሊጽሎም ኢዩ፡፡ ስለዚ ነቶም ዝተቐበልዎ " ካብ ሰማይ ዝወረደ እንጌራ ኣነ ኢየ "ብምባል መስዋእቲ ንዑኡ ድኣምበር ካልእ እንስሳታት ንኸይስውኡ ኣጠንቒቕዎምን ምሂርዎምን፡፡ (ዮሓ 6፥51) ነቶም ዘይተቐበልዎ ድማ ግብሮም ስለዝርኣየ ንምንታይ ኣብ ቤተይ ትሽቅጡን ዕዳጋ ትገብርዎን ኣሎኹም፡እዚኮ ኣቐዲመ 'ዓይነይን ልበይን ንሓዋሩ ኣብኣ ከንብር ኢየ፡ኣብኣ ንዝጽለ ጸሎት ኩሉ ክሰምዖን፡ብቅዱስ ስጋይን ክቡር ደመይን ካብ ባርነት ሓጥኣት ከውጽኦን ኢየ፡' (1ነገ9፥3) ዝበልኩኹም ኢያ፡ንምንታይ ድኣ ንስኻትኩም ቤት ሸቐጥ ገበርኩሞ፡እዚኣ እንተላይ ኣህዛብ ተስፋ ዝገብሩሉ ቅዱስ ቤት ኢያኮ፡ " (ዮሓ2፥16) ብምባል ነቶም ህዝቡ ዝነበሩ ገሰጾምን ገንሖምን፡፡

ስለዚ ኣንታ " ቤት መቕደስ ምህናጽ ንምንታይ ኣድለየ እትብል" ወሎዶ ካብ ዝተገሰጹ ሰባት ከይኮንካ ኣይትተርፍን፡፡ "ካባኻሲ ንሳቶም እካ ይሕሹ ንሶምሲ ቤት ሸቐጥ ገበርዎ፡ንስኻ ግን ጨሪሱ ኣየድልን ኢዩ፡ኢልካ ንቤተይ ትቃዎምሲ ንስኻ መንኮይንካ ኢካ " ኢሉ ክርስቶስ ይምልሰልካ ኣሎ፡፡

ብሓቂ ቤት መቕደስ ዘድለየሉ ምኽንያት፡- ስጋዊ መፈወሲ ተባሂሉካ ብዓለማውያን ኣበየ ቦታት ቤት ሕክምና ዝህነጽ ዘሎ፡ሕክምና ምኻድ ኣየድልየንን ኢዩ፡ዶክቶር ኣብ ገዛይ መጺኡ ይፈውሰኒ ንምባል ንምድፋር እናተሳእነሲ፡ነታ መንፈሳውን ኣምላኻውን ፈውሲ ዝምስርሓላን ዝፍወሰላን ቤት መቕደስ ደኣ ከመይ ኢሎም ክደፍሩን፡ኣብ ገዛይ መጺኡ ይፈውሰኒ፡ብምባል ክደፍሩ ከኣሉ፡፡ኣቤት ድፍረት???

በሉ ኣንቶም፡ የሕዋትና ንሳሲ መንፈሳዊ ሕክምና ዝካየደላ፡ብሓጥያት ዝሓመሙ ብቅዱስ ንስሓ ተሓጺቦም ብቅዱስ ስግኡ፡ ክቡር ደሙን ዝፍወሱላ ብምኻና፡ኣበየቦታ ቤት መቕደስ ምህናጽ ኣድለየ ከድሊውን ኢዩ፡፡

" ኪዱ ብስም ኣብን ወልድን መንፈስ ቅዱስን እናኣጥመቕኩም ፡ዝኣዘዝኩዎ ክፍጽሙ እናመሃርኩም ደቂመዛሙርተይ ግበርዎም "(ማቴ28፥19-20) ዝብል፡ቤት መቕደስ ክሃንጹ ከምዝግብኦምውን የስምዕ ኢዩ፡፡ምኽንያቱ እቶም ዝተጠምቁ ኣቐዲሞም ኣህዛብ ዝነበሩ፡እንተድኣ ተጠሚቖም ኣበይ ኮይኖም ኢዮም፡ቅዱስ ስግኡን ክቡር ደሙን ክቕበሉ፡ኣበይኮይኖምከ 7 ምስጢራተ ቤተክርስትያን ክፍጽሙ ፡" ዝኣዘኩዎ ክሕልዎ መሃርዎም " ዝብል ትእዛዝ ተዋሂቦም፡፡ስለዚ እዚውን ነቲ ዝተጠምቀ ቤት መቕደሱ ሰሪሑ ትእዛዝ እግዚኣብሄር ንኽሕልዉ ኣዘዘና ድእምበር ቤት መቕደስ ከይትሃንጹ፡ ነቲ ዝተሃንጸውን ፈንጥሕዎ ኣይበለን፡፡እግዚኣብሄር ነዚ ክንገብር ብጸግኡ ይደግፈና፡፡

ሕቶ4ን 5ን፡ክልቴአን ከምዚ ይብላ፡፡ቤትመቕደስ ብስም ቅዱሳን ምህናጽ ንምንታይ ኣድለየ? ናብ ቤትመቕደስ ምኻድከ ንምንታይ ኣድለየ? ይብላ፡፡
ሕቶ ቁጽሪ 5
ኣብዚ ዝብለናዮ ተመሊሳ ኢያ፡፡
ብስም ቅዱሳን ምህናጽ ንምንታይ ኣድለየ ዝብል ድማ፡?

እሺ ኣንታ ቤት መቕደስ ኣየድልን ኢዩ፡ኢልካ ዝኸሓድካ ትምህርቲ ሰይጣን ዝሰዓብካ ሰብ ሕጂውን ብስም ቅዱሳን ምሕናጽ ንምንታይ ኣድለየ ትብል ኣሎኻ፡፡ብስም ኢዮሱስ ክርስቶስ ክህነጽ ከምዝግብኦ ግን ሕቶኻ ነቲ ኣብ ውሽጢ ሕልናኻ ዘሎ ድጉል እምነት ፈርፊዑ የውጽኦ ኣሎ፡፡እሞ ኣነውን ክሓተካ ኢየ፡ብስም ኢዮሱስ ክርስቶስ ዝተሰመየ ቤት መቕደስከ ክህነጽ ከምዝግብኦ 

ኸ ትኣምነሉ ድኻ፡ብስም ስላሴ ዝተሰየመ፡ብስመ እግዚኣብሄር ዝተጸወዐ፡ወዘተ ነዚ ህንጻ ቤትመቕደስዚከ ትኣምነሉ ኢካ ማለቲዩ? ሓቂ ንገር ሕልናኻ ከምኡ ብሕሹኽታ ይነግር ኣሎ፡፡
=====
እምበኣር ቤትመቕደስ ብስም ቅዱሳን ተሰይሙ ንክህነጽ ዝኣዘዘውን እግዚኣብሄር ኢዩ፡ (ዘጽ26፥17-22 ' ታቦት ጽላት ቀሪጽካ ስራሕሞ፡ወርቂ ቀጥቂጥካ ኣብ መኽደኑ ክልተ ክሩቤል ንሓድሕዶም ዝጠማመቱ ገይርካ ስርሓዮም፡ኣነ ድማ ኣብ መንግኦም ኮይነ ክግለጸልካ ኢየ'፡፡) ይብል፡ስለዚ እዛ ታቦት ቅዱስ ሙሴ ክሰርሓ ዝተኣዘዘ ኪሩቤል ዝበሃሉ መልኣክቲ ብቅርጺ ዝተመስረሐት ኢያ፡ስለዚ እግዚኣብሄር ንዓይ ኣብኡ ስኣለኒ ኣይበሎን፡እንታይ ድኣ ክሩቤኤል ብምስሊ ገይርካ ንሓድሕዶም ፍትንፊት ዝጠማመቱ ገይርካ ስራሕ በሎእምበር፡፡እዚ ድማ ኣብቲ ቦታ ዝምለኽ ዘሎ እቶም ክሩቤኤል ዘይኮነስ እግዚኣብሄር ኢዩ ዝግለጽን ዝምለኽን ዘሎ፡፡ስለዚ ቤትመቕደስ ብስም ቅዱሳን ምህናጽና ኣብኡ ዝምለኹ ዘሎዉ እቶም ቅዱሳን ዘይኮኑሲ እግዚኣብሄር ኢዪ ዝምለኽ ዘሎ፡፡ ምላልባሽ ብስሞም እንድዩሞ ንዝብል ጥርጥር ንዘሎዎ ጌጋ ትምህቲ በጨቕ እንተበለካ፡-

ስሞም እቶም ቅዱሳብ ንባዕሉ ስም እግዚኣብሄር ዝተጻሕፎ ሰማያዊ ስም ድኣምበር ካብ ባሕርኦም ስም ፈጢሩም ዘምጽእዎ ኣይኮነን፡፡ኩሉ ስምና ስም እግዚኣብሄር ዘለዎ ኢዩ፡ብዜይካ ሓጥኣን ዝጥቀምሉ ኣስማት፡፡ቅዱሳን ስሞም ቅዱስ ኢዩ፡እዚ ቅድስናዚ ካብ እግዚኣብሄር ዝተቐበልዎ ኢዩ፡ስለዚ፡-

1. ብስሞም ቤትመቕደስ ምህናጹ ንእግዚኣብሄር ዝቃወም ኣይኮነን በንጻሩካድኣ ስም እግዚኣብሄር ዘኽብር ድኣምበር፡፡እግዚኣብሄር ውን ንቅዱስ ሙሴ "ስመይ ኣብኡ ተጻሒፉ ኢዩሞ፡ኣብ ቅድሚኡ ገለክፉእ ከይትገበር ተጠንቀቅ'' ብምባል ነቲ ስምእግዚኣብሄር ዝሓዘለ መልኣኽ ከኽብሮ ከምዘለዎ ኣዘዞ፡፡ስለዚእንዳ ሚካኤል፡እንዳገብርኤል፡እንዳሩፋኤል፡ወዘተ ምባልና ስም እግዚኣብሄር ዝተጻሕፎ ቤት ማለትና ኢና፡፡" ኤል" ዝብል ስም እግዚኣብሄር ኢዩሞ፡ ፡(ማር15፥34 ኤሉሄ ኤሉሄ)፡፡

2.እግዚኣብሄር እዉን ብስም ቅዱሳን ዝኾነ ዓይነት በረኸት ክንገብር ከምዝግባእ ንኽምህር (ማቴ10፥42 ካብዞም ንኣሽቱ ንሓደካ ብስም ወደመዝሙር ዝሑል ብርጭቆ ማይ ጥራይ ዘስቲ፡ዓስቡ ኣይስእንን ኢዩ፡) ስለዚበለ፡- "ኣሰይ!!! ጎይታና መድሓኒና ንስኻ ብርጭቆ ማይ ብስም ወድመመዝሙር ኢልካና፡ንሕና ድማ ካብ ብርጭቆ ማይሲ ሕንጻ ንክትሃንጽ ዘሎ ወጻኢታት ኣዚዩ ብዙሕ ኢዩሞ፡እሙን ቃልካ በረኸትካ ትህበና ኣሎኻ ብሕጂውን መታን በረኸትካ ክትህበና'...ብምባል ቅድስቲ ቤተክርስያን ብስም ቅዱሳን ቤት መቕደስ ትሃንጽ፡፡ኣየናይከ ይቐልል፡ብርጭቆ ማይ ብስም ወደመዝሙርዶ ወይስ ዓቢ ህንጻ ብስም ወደመዝሙር??? መልሱለይ፡እወ ንዓኹም ኢየ ኣየናይ ይዓቢ፡? ኣንቱም ብስም ቅዱሳን ንዝግበር ቤት መቕደስ እትቃዎሙ ክሓድያን መልሱ፡፡ንሱ ጎይታ ሰራዊት እግዚኣብሄር ግን ብርጭቆ ማይ ጥራይ ፡ኢሉ ኢዩሞ፡ኣየናይ ይቐልል ኣየናይከ ይኸብድ? ሕልናኹም ይመልሶ፡፡
==================

ኣለዓዒሉ ንዘጀመረና ኣጀሚሩውን ንዘፈጸመና ናይ እግዚኣብሄር መንፈስቅዱስ ስሙንዘልኣለም ይመስገን፡፡

ይትባረክ እግዚኣብሄር ኣምላክ ኣበዊነ ኪያነ ዘፈጠረ ከመናምልኮ፡፡በረኸትናይ ኩሎም ቅዱሳን ይኽፈለና እግዚኣብሄር ኣብጸሎትኩም ዘክሩኒ፡

ንሓሰኻ መቀሮ፡ንሰብ ግን ሰርሰሮ!!

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን
ንሓሰኻ መቀሮ፡ንሰብ ግን ሰርሰሮ!!
ወገነይ ሰብ ምኽናካ እሞ ንሓንቲ ካልኢት ሕሰብ፡ልዕሊ ኩሎም ፍጥረት ብዜይካ መላእክቲ ዝዓብየካ ምንም ከምዘየለ ክርደኣካ ኢዩ።ፈጣሪኻ ካብ ሓመድ ኣልዒሉ እካ እንተፈጠረካ፡ብምስሉ ገይሩ ስለዝፈጠረካ፡ካብ ግርማነቱ፡ተፈራሕነት፡ካብ ቅድስንኡ ቅድስና፡ካብ ዕቤቱ ልዕልና ተማቓሊ ንኽትከውን ፈቒድልካ ኢዩሞ ክርድኣካ ኢዩ።

ሓደ ግዜ ጠምይኒ ስለዝነበረ፡መግቢ ክሰራርሕ ግዜ ምሳሕ ሓሊፉ ግዜ ድራር ገጹ ተገማገመ፡ምሳሐይ ሰሪሐ ምስ ወዳእኩ፡እግዚኣብሄር ዘዳለዉ ክቡር ጋሻውን መጺኡኒ ነበረሞ፡" ጥዕምቲ ፉል ከብልዓካ ኢየ፡! ብምባል ሰራሪሐ ኣዳለኹ።ሓዉኹም ኣብ ምኽሻን ንፉዕ ኣይኮንኩን፡ግን ክቡር ባህሊ ሕዙ ዝዓበየ ጋሻይ ዋላ ውሕልነት ዘይእንታያ ኢደይ እንዳረኣያ ሸፈነለይ።ጥዕምቲ፡ጥዕምቲ፡ይበል።ኣቤት ንዓኻ ትረክብ ጋል ሄዋንሲ ክንደይ ፈጢርላ እንዳበለ ኣተባብዓኒ።ኣነ ግን ነቲ ዝህበኒ ዝነበረ ኣጸናናዒ ቃል ዘይናተይ ስለዝኮነ ነታ ድካመይ እንዳቖንጠኹ፡ስቕ ኢለ ዳራርና ኣዳለኹ።

ወዮ ማእዲ ምስተቐረበ ጉዕ በርበረ ተረሰዐሞ፡"ከመይ ኢካ! ጉዕ ኣብኡ ኣንከሎ ተተቐረበ" በልክዎ።ጸገም የለን ቀርዲድካ ጥራይ ኣምጻዮ በለኒ።ካራ ኣዳልየ ነታ ዓባይ ጉዕ በርበረ ኣብ ክልተ መተርኩዋሞ፡ናይታ ጉዕ መሪርነት ንኣፍንጫይ ኮለ ገና ሰርሲሩ ኣናወጾ።ነዚ ከየስተብሃልኩ፡መኣዲ ንኸርክብ ነታ ጉዕ ተብተብ ክብል ውሽጣ ክፍት እንተበልክዋ፡ኣብ ኮቦርታ ማሚቑ ከምዝደቀሰ ተባዕታይ ድሙ ክመስል ገዚፍ ሓሰኻ ኮፍ ኢሉ ረኣኹ።መጀመርያ ሕልሚ መሰለኒ።ነገሩ ግን ሓቂ ኮነ።ናይዛ ጉዕ መሪርነት፡ነዓይ ኣፍንጫይ ሰርሰረትኒ፡ንዑኡ ነዚ ደቂቕ ፍጥረት ግን ምቾት ዝጥዕም ምቁር ሂዎት ከምዝኾነቶ ተመልከትኩ።ለካ መረርቲ ኮይኖም ዝስምዑና ነገራት፡ብእግዚኣብሄር ግን ክቕየሩ ከምዝኽእሉ ተዓዘብኩ።

ኣየ ሰብ ኢለ!! ንድኻመነተይ፡ብምውቃስ ንፍጥረት ኣምላኽ ኣድነቕኩ።ሓሰኻ ደምበ ናብ ዝለምለመሉ ከምዝበሃል፡ሕጂ ግን ንሓሰኻ፡ዋላ እቲ መሪር ከምዝልምልመሉ ተዓዘብኩ።ከመይ ኢሉ ደኣሉ ሰብ ኣብ ኩሉ ክነብር ዝኽእል እናኾነ ክንሱ፡ብቦታ ዘማርር፡በቲ ሓይሊ ዝሕቦ ኣምላኽ ኩሉ ክኽእል እናተፈቕደሉ፡ብኹሉ ኩነታት ዝመሮ፡ሓዳር፡ይኹን በይንነት፡ጥዕና ይኹን ስንክልና፡ሃብቲ ይኹን ድኽነት ኩሉ ንሰብ ከምርሮ ዘይኮነስ ከመቅሮ ነይርዎ።

ኣየ ሰብ፡ሰብ ግን ነቲ እግዚኣብሄር ዝሃቦ ህያብ መሪርኒ በለ፡ንሓሰኻ ዘይመረተት ዓለም ንሰብ ግን መረረቶ።ንሓሰኻ ዘይሰርሰረት ናብራ፡ንሰብ ግን ሰርሰረቶ።ንሓሰኻ ዘይቀተለት ዓለም ንሰብ ገን ብሓጥያት ቀተለቶ።ክገርመኩም ነዚ ሓሰካ ኣብ መሪር ጉዕ ተመችእዎ ምጽንሑ፡ሰብ ኣብቲ ኣነዝበለ መሪር ኩነት፡ብሓይሊ ኣምላኽ ክቕመጥ ከምዝኽእል ተማሃርኩ።ንሰብ ክነብረላ ኣዝያ እተጸግሞ ሓንቲ ቦታ ጥራይ ኣላ፡ንሳ ሲኦል፡ምዕባያ ሓፍታ ድማ ገሃንመ እሳት ኢየን።ኣብዜአን ንኽነብር ኣዝየን ኣጸጋሚ ኢዩ።ከይፈተወ ኢዩ ኣባአን ክኸይድ፡እዚ ድማ ግብሩ ምስተዘርገሐ፡ንዑኡ ዘውህብ ደሞዝ እንተገይሩ፡ክፊልት ዝወሃቦ ኢዩ፡ተዘይኮነ ንሰብ ኢሉ ዝተዳለወ ዕረፍቲ ኢዩ ነይሩ።ብሰንኪ ድኻሙ ግን ናብዚ ዝኸፈአ ቦታ ብፍታዊ ክኸይድ ኢዩ።

ንሰብ ኣዝዩ ክጽመማ ዝግበኦ ድማ ሓንቲ ቦታ ኣላ ንሳ ድማ ክሳብ ኣብዛ ምድሪ ዘሎ፡ህይወቱ እተንከባኽቦ ምድሪ።ንሰብ ሓንሳብን፡ንሓዋሩን ሙሉእ ምቾትነት እትህቦ ድማ ሓንቲ ቦታ ኣላ።ገነት፡ምዕባያ ሓፍታ ድማ መንግስተ ሰማያት።ናብዛ ዓባይዚኣ ክሳብ ንኣቱ ግን ከም ሓሰኸ፡ ዓለም ከም ጉዕ ክትጥዕመና ኣሎዋ።ንሳ ዘይኮነት ትጽመመና፡ንሕና ኢና ክንጽመማ ዝግበኣና።ሓሰኻ ደኣ ተጸመመ እምበር፡ጉዕ ኣይተጸመመቶን።ዝገርመኒ እዚ ሓሰኻ ድሕሪ ነዊሕ እዋን ነታ ጉዕ በሊዑ ጥራሕ ኢዳ ከትርፋ ከምዝኽእል ኣመንኩ።ሰብውን ኣብዛ ብሓጥያት ከም ጉዕ በርበረ እትመርር ዓለም፡ዋላ ደኣ ይቀመጥ እምበር፡ከምቲ ኣብ ጉዕ ዝኸተመኡ ሓሰኻ እንተተጸሚሙ፡ሓጥያታ ሲዒሩ ንሱ ምልምል ወዲ መንግስተ ሰማያት ኮይኑ ክቐርብ ይኽእል ኢዪ።ምኽንያቱ ምድሪ ከም ጉዕ እካ እንተመረረት፡ንሕሰም ምረታ ንዝጻወር ሰብ ግን ከም ቅዱስ ሃዋርያ ጳውሎስ ዘይሓልፍ ኣኽሊል ተነቢርሉ ኣሎ።

ወይ ዓለም፡ነቲ ደቂቕ ፍጥረት ሓሰኻ ምድፋር ሰኣነቶ፡ነቲ ሰለስተ ዓመት ዝኣክል እግሪ እግሪ ጎይታ እንዳኸደ ወንጌል ዝጸገበ ይሁዳ ግን ደፈረቶ።ሓሰኻ ብጥበቡ ንዓለም ምችእቲ ከምትኸውን ገይሩ ሰዓራ፡ይሁዳ ግን ብዕሽነቱ ኣብ ዓለም ተጣዒስካ ምምባር ምረት ኮይና ተሰመዓቶሞ ተሓንቀ።ንሓሰኻ መቀረቶ፡ንሰብ ግን መረረቶ።ሓሰኻ ለበመ፡ሰብ ግን ሰርሲሩኒ ኢሉ ንድሕሪት ሃደመ።
ወስብሃት ለእግዚኣብሄር ወለወላዲቱ ድንግል ወለመስቀሉ ክቡር ኣሜን።

ንሱ ብፍቕሪ ከርክበና ንሕና ግን ብግብርና ርሓቕናዮ።

ኣብዛ ምድሪ ብንገብሮ መዝሙር ውዳሴ፡ኣብ ሰማያት ቅዱሳን መላእክቲ ብግብርና ተሓጊሶም ክዘሉ ምሳና ክዕልሉ እንከለዉ እንተዝረኣዩና፡ጽድቅና ምዝማርና ክንደይ ኮን ምወሰኽናሉ፡ክንደይ ምነሃርናዮ።
በንጻሩ ኣብ ጛይላ ኬድና ክንስዕስዕን ክጭፍርን እንከለናከ፡ኣጋንንቲ ኣብ ሲኦል ኮይኖም ስለቲ ዘታለሉና ክሕጭጩን ክባጨውን እንከለዉ እንተዝራኣዩና ክንደይኮን ካብ ጛይላ ምሃደምና!

ለካ እዚ ኩሉ መዝሙር ንምዝማር ንዝሕትል ዘለና፡ቅዱሳን መላእክት ምሳና ክዕልሉ እንከለዉ ንኸይንርኢ ሕልናና ስለዝዓጸናዮ ኢዩ።

ለካ ናብ ጛይላ ኬድና ክንስዕስዕን ክንጽለልን ንውዕሎ ንሓድሮ ዘለናስ፡ኣጋንንቲ ኣብ ሲኦል ኮይኖም ስለቲ ዝቐሸሹና ሓጎሶም ይገልጹ ከምዘለዉ ንኸይንርኢ ሕልናና ስለዝዓጸናዮ ኢዩ።
ወገነይ፡ዘለኻዮ ኩነት መን ይሕጎሰሉ ኣሎ፡ሓሲብካሉ ትፈልጥዶ፧ኣጋንንቲዶ ቅዱሳን፧እግዚኣብሄርዶ ድያብሎስ፧ስለ ናይ መን ሓጎስ ትጽዕት ኣሎኻ፧ ምላልባሽ ንስኻ ትሕጎሰሉ ዘለኻ ይመስለካ ይኾውን።ቀንዲ ተሓጛሲ ግን እቲ ዝለኣኸካን ከምኡ ንኽትገብር ኣብ ሕልናኻ ሕሹኽ ዝበለካን ኢዩ።
ዕላማኻ ንስለ ሓጎስ ፈጣሪኻ ተዝኾውን ሂዎት ምረኸብካ።
ኣየ ነብሰይ ትጽዕርሉ ዘለኺ ጉያ ስለ ክብርኺ ስለዝኾነኮ ኢኺ ምሉእ ሓጎስ ሲኢንኪ ዘለኺ።ንስኺ ድኣ ፍጥረት እንዲኺ።ፍጥረትዶ ምሉእ ሓጎስ ክህብ ይኽእል'ዩ፧!እዚ ሰይጣን ዝመሃረኪ ምኽሪ ሰይጣን ኢዩ። ስለክብርኺ ምምባር ንዮ በልዮ።ንስኽስ ስለ ክብሪ ፈጣሪኺ ስለ ሓጎስ ፈጣሪኺ ደኣ ተጋደሊ።ሽዑኡ ኢኺ ሓጎስ ትረኽቢ።

ሓደ ግዜ ንሓንቲ ኣደ ተመልከትክዋሞ፡ሕጻን ወዳ ቀልቀል ክጽይቓ፡ልዛይ ክልዝየላ፡ንፋጡ ነቲ ጽሩይ ጻዕዳ ክዳና ከባላሽዎ ረኣኹ።እታ ኣደ በዚ ተቖጢዓ ኣብልዕሊቲ ህጻን ጽልኢ ክትገብር ትጽበዮ ክንሱ፡ምስኡ ዘለዋ ጥቡቕ ፍቕሪ እናሻዕ ካብ ውሽጣ ይንህር ነበር።በቲ ካልእ ጫፍ ድማ ሰብኣያ ብንእሽቶ ተቖጢዑ መጺኡ "ኣንቲ ከምዚ!"ኢሉ ጸረፋሞ ምስቲ ብዓል ቤታ ዝነበራ ምሉእ ፍቕሪ በኒኑ ተረፈ።ስለዚ ገረመኒ።"ሓቐኛ ፍቕሪ ኣየናይ ኢዩ!" ኢለ ንነብሰይ ሓተትክዋ።ሕልናይ ድማ መለሰለይ።"እግዚኣብሄር ንወድሰብ ልክዕ ከምዛ ኣደ ንህጻና ፡ፍቕሩ ኣባና ኣብ ጸጽባሕ ነሃረ።ካብቲ ኣብ መስቀል ዝዓደገና ንላዕሊ፡ሕጂ ዝዕገሰና ዘሎ ይበዝሕ።ሽዑኡስ ተሰቒሉ ተኸትኪቱ ኢዩ ዓዲግና።ሕጂ ግን ካብ ባርነት ዓዲግና ከብቅዕ፡ኣይንደልን ባርነት ይሕሸና ክንብሎ ኣይፈንፈነናን።ከምቲ እታ ኣደ ንህጻና ክሳብ ዝጉብዘላ ሽንቱ እንዳጸረገት ፍቕራ ትምጥዎ፡እግዚኣብሄር ድማ ክሳብ ብመንፈሳውነት ንድልድል፡ክሳብ ምጽኣት ሓጥያትና እንዳጾረ ብትዕግስቲ ይጽበየና ኣሎ፡ተመስገን።እዚኹሉ ንምሉእ ዓለም ብደሙ ዝሓጸባ፡ዓለም ግን ምስ ሓጥያት ይሕሸኒ በለት።ወገነይ ተመልከት!ክጽየፈና ዝግብኦ በንጻሩ ኣባና ዘለዎ ፍቕሪ ዓዘዘ።ንሕና ግን ብንእሽቶ ሻሞጥ ብሰንኪ ግብርና እንተ ቐጺዑና ክንመልስ ዝግብኣና በንጻሩ ኣማሪርና ካብ ፍቕሩ ሃጽ በልና።ንሱ ብፍቕሪ ከርክበና ንሕና ግን ብግብርና ርሓቕናዮ።

ሕጽር ዝበለ መንፈሳዊ መልሲ ንሕቶኹም፡

1) ብዜይካይ ካልእ ኣምላኽ ኣይተምልኹ እንዳበለስ፡ንምንታይ ንማርያም፡ንመልኣኽቲ፡ንቅዱሳን ንሰግድ፧(ዘጽ20፥3)

መልሲ¶¶¶ 

ኣምላኽ እንታይ ማለት ኢዩ?ምምላኽ ማለትከ፧
ኣምላኽ ማለት ካብ መለከ፡ገዝአ ዝብል ግእዛዊ ግሲ ዝወጸ ኮይኑ፡መላኺ፡ገዛኢ ማለት ኢዪ።ዘጽ20፣3 ተጻሒፉ ዘሎ፡ብዜይካይ ካልእ ኣምላኽ ኣይተምልኽ ኢሉ።ኣስተውዕል፡"ብዜይካይ" ትብል ዘላ ቃል ነስተብህለላ።ኣብ ክንዳይ ተኪእካ፡እዚ ኣምላኽ ኢዩ፡"እዚ ኣምላኽነቱ፡ገዛእነቱ፡ሓያልነቱ ክንዲ እግዞኣብሄር ይኸውን ኢዩ፡! ኢልካ ንዓይ ንእግዚኣብሄር ንድሕሪት ገዲፍካ፡ኣብ ልዕለይ ካልእ መላኺ ኣይትግበር።ምኽንያቱ ብዘይካይ ካልእ ክመልከካ ዝኽእል ሓይሊ ዘለዎ የለን።" ኢዩ ዝብል ዘሎ።ልክዕ ኢዩ፡ኣብ ቤተ ክርስትያን ምስ እግዚኣብሄር ኣመዓራሪና እንርእዮ ፍጡር የለን፡ብሕጂውን ኣይክህሉን ኢዩ።

እዚ ዝበለ እግዚኣብሄር፡ወድሰብ ንፍጡር ከምልክ ስለዝጀመረ፡እስራኤላውያን፡ከይተረፈ እዚኩሉ ተኣምር እንዳገበረ ኣብ ዓዲ ስደት ክንድዚ ዝኣክል ክብሪ እንዳርኣዮም ከብቅዕ፡ከምቶም ግብጻውያን ኣብ ጣዖት መታን ከየምልኹ፡ነቶም ዘምልኹ ዝነበሩ ድማ፡ተኣልዮም ናብ እግዚኣብሄር መታን ክምለሱ ኢዩ ከምኡ ዝበለ።ጣዖት ንኸየምልኹ ዝተዋህበ ቃል ኢዩ።

ተመልከት፡-ሰብ ናብ ጣዖት ከምልኽ እንከሎ፡"እዚ ፈጣሪ ኢዩ፡ዕብየቱ፡ክብረቱ፡ሓያልነቱ፡መላኽነቱ ክንዲ እግዚኣብሄር ጥራይ ዘይኮነስ፡ንእግዚኣብሄር ይሓልፎ ኢዩ፡"እንዳበሉ ኢዮም ዘምልኹ ነይሮም።(ዘጽ7፣10-11 ሙሴ ንንጉስ ፎርዖን ህዝበይ ሃበኒ ንኣምላኹ ከምልኽ ሕደጎ ምስ በሎ፡ተኣምር ኣርእየኒ በለ፡ሙሴ ነታ በትሪ ናብ ተመን ምስ ቀየራ ድማ፡ነቶም ጠንቆልቲ ጸዊዑ፡ሃየ ነቲ ነምልኾ ኣምላኽና ለምንዎ፡ናይ ሙሴ ኣምላኽ ካብ ኣምላኽና ክሕይል የብሉን፡ከነሕፍሮ ኣሎና።ብጥንቁልናኹም ከምቲ ናይ ሙሴ ግበሩ" ኢሉ ኣዘዘ ይብለና።ኣብዚ ንርድኦ፡ንፈርዖን "እቲ ተምልኾ ጣዖትዶ ይዓቢ፡ዋላስ እግዚኣብሄር፡መኖም ይሕይል"ኢልና እንተሓቲትናዮ፡ብዘይውልውል፡ጣዖተይ ይሕይል ኢሉ ይምልሰልና።ነዚ ንኽቃወም ኢዩ እግዚኣብሄር ብዘይካይ ዝበለና።

ስለዚ እግዚኣብሄር ብዝኾነ ይኹን መለክዒ ንዓይ ዝቕድም የለን፡ኣነ ዘይነበርክሉ ዘመን የለን።ፍጥረታት ግን ፈጣሪኦም ኣነ ስለዝኾንኩ ኩሎም ድሐረይ ኢዮም።ስለዚ ክትሰግዱለይ እንከለኹም፡ንኣብ፡ቀዳምነት፡ንወልድ መበል ካልኣይ፡ንመንፈስ ቅዱስ ድማ ሳልሳይ ኢልኩም ከይከፋፈልኩም፡ንሰለስተ ኣካላት ሓደ ስልጣን፡ሓንቲ መላኽነት፡ሓንቲ ፈራድነት ስለዘላትና፡ንስላሴ ሓደ ኣምልኾ ሃቡ፡ካልእ ኩሉ ድሕረይ ኢዩ።ኢሉ እዚ ጥቕሲ ይምህረና።

ሕቶ? ? ?
እሞ እዚ እንዳበለ ደኣ ንምንታይ ናብ ቅዱሳን ንሰግድ፧ ንምንታይ ነመስግኖም፧

ኣስተውዕል ወገነይ።እግዚኣብሄር ብዜይካይ ካልእ ኣምላኽ ኣይተምልኽ ኢዩ፡ዝበለ እምበር፡ንካልእ ኣነ ዘኽበርክዎም ኣይተኽብሮም፡ኣነ ዘመስገንክዎም ኣይተመስግኖም ኣይበለን።ነቶም ኣነ ዘኽበርክዎም ልዕለይ ኣይትገሮም ኢሉ ኢዩ፡ትሕተይ ሰሪዕካ ግን ማዕረቲ ኣነ ዝህቦም ክብሪ፡ክብሪ ሃቦም ግን ኢሉና ኢዪ።እዚ ቃሉ ኢዪ።

ንኣብነት፦ ሀ)ማቴ 5 ዘሎ ኣንቀጸ ብጿኣንሲ፡እቲ" ብጿኣን ብጿኣን! " እንዳበለ ዘመስግን ዝነበረ መን ኢዩ፧እግዚኣብሄር ኢዩ ብርግጽ።እቲ ከምኡ ኢሉ ዝሰብኽ ዝነበረ ክርስቶስ ኢዮሱስ ኢዩ።እዛ ብጿኣን እትብል ቃል ምስጋና ኢያምበር ምርጋም ኣይኮነትን።ስለዚ ስለጽድቂ ዝጸሙኡ፡ስለጽድቂ ዝስደዱ ብጿኣን ኢዮም ክብል ከሎ፡ስለቲ ዝገብርዎ ሰናይ ነገር የመስግንልም ድኣ ኣሎምበር ይረግሞም ኣይኮነን ዘሎ።ሕጂ ስለዘመስገኖም ኣምሊኽዎም ማለት ድዩ፧እሞ ንእግዚኣብሄር ተጋጊኻዶ ንበሎ፧ነቶም ነዚ ዝገበሩ ቅዱሳን ንሱ ብጿኣን ኢሉ ዘመስገኖም፡ንሕና ድማ ብጿኣን ኢልና እንተመስገንናዮም ኣምሊኽናዮም ማለት ድዩ፧እንተድኣ ከምኡ ምግባርና ኣምሊኻናዮም የብለና ኮይኑ፡ክርስቶስውን ተጋግዩ፡ኣምሊኵዎም ማለት ኢዩ፧ኣይፋሉን ደኣ።ንሱስ ኣኽቢርዎም እምበር።ንሕና ድማ ከም ቃሉ ነኽብሮም ኣሎና።

ኣብነት2)ኢዮሱስ ክርስቶስ ንሃዋርያቱ ትሕትና ንኽምህር ኢሉ፡ብዕለተ ሓሙስ ተደቢሩ የእጋሮም ሓጺብዎም ኢዩ።ኣብዚ ተምበርኪኹ ኢዩ ዝሃጺቦም።
(ዮው13፣5 ንመልከት)።እሞ ክርስቶስ ክሳብ ክንድዚ ስለዘኽበሮምሲ፡ኣምሊኽዎም ማለት ድዩ፧ ኣንታ "ብዘይካይ ካልእ ኣምላክ ኣይተምልኽ ኢሉ እንድዩ፧ ኢልካ እትከራኸር ዘለኻ ሕልና መልሰለይ፧ ክርስቶስ ነዚ ትእዛዝ እዚ ዝኣዘዘ ንሱ ኢዩ።እሞ ባዕሉ ኣዚዙ ባዕሉ ይስዕሮ ኢልካ ትሓስብዶ፧ እስከ ምስ ነብፍስኻ ተዛራረብ።
ብርግጽ እምበኣር፡ክርስቶስ ንሃዋርያት ልዕሊኡ ኣማልኽቲ ስለዝኾኑ፡ንሱ ድማ ትሕቲኦም ስለዝኾነ ኣይኮነን ተምበርኪኹ ሓጺብዎ።ኣነን ንስኻን ነቶም ንዑኡ ዘኽብሩ ከምዚ ገይርና መታን ከነኽብሮም ንኽምህረና ደኣምበር።ንሱ ክርስቶስ ልዕሊኡ መላኺ ከምዘየለ ይፈጥ ኢዩ፡ግን ብጸጋ ዘኽበሮም፡ካብ ክብሩ ክብሪ፡ካብ ምስጋንኡ ምስጋና፡ካብ ጸግኡ ጸጋ ዝመጠወሎም ብዙሓት ቅዱሳን ኣሎዉ።ንስኻውን ኣንታ ንናይ ቅዱሳን ክብሪ እትቃወም ዘለኻ፡ክርስቶስ መጽዩ እግርኻ ክሓጽበካ እንተዝብለካስ፡ኣነ ኣምላኽ ኣይኮንኩ፡ኣይትጋገ ንስኻ ኢካ ኣምላኽ ኢልካ ምመለስካሉ ማለት ሲዩ።ንሱ ጥራይ ኣምላኽ ናይ ባህርይ ኣምላኽ ምኻኑ ድኣ ንስኻ ዲኻ ትነግሮ።ጴጥሮስ ሃዋርያኮ፡ኣይትሓጽበንን፡ኢካ፡ንስኻ ኢኻ ኣምላኽ ዝዓይነቱ ተዛሪብዎ ኢዪ።ክርስቶስ ግን ኣረሞ።እግሪኻ ተምበርኪከ ተዘይሓጺበካ ምሳይ ግደ የብልካን በሎ።ንቅዱሳን ከምዚ ዘኽበርክኹዎም ተዘይ ኣኽቢርካ ምሳይ ተራ የብልካን በሎ።ንስኻ ውን ሓወይ ንቅዱሳን ትሕቲ እግዚኣብሄር ከከም ዝተዋህቦም ጸጋ፡ከክብሮም ተዘይኣኽቢርካዮም ካብ ክርስቶስ ክብሪ ኣይክትረክብን ኢኻ።

ኣብነት3) ማቴ25፣34-- ኣንቱም ናይ ኣቦይ ብሩኻን፡-እዛ ጻዊዒትዚኣ ክርስቶስ ኢዩ ከምኡ ኢሉ ነቶም ከም፡ቃሉ ዝነበሩ ኣብ ዘመነ ፍርዲ ክጽውዖም።ሽዑኡ እቶም ሓጥኣን፡ኣንቱም ርጉማን ተባሂሎም ክዝለፉ ኢዮም እትኦም ቅዱሳን ግን ኣንቱም ብሩኻን ተባሂሎም ክምስገኑ ኢዮም።እቶም ዝዝልፎምን፡ዘመስግንክምን ድማ እቲ ፈራዲ ኣምላከ ኣማልክት ክርስቶስ ኢዪ።እሞ ርጉማን ኢሉ ክዝልፍሲ ኣምላኻዊ ዓቕሚ ስለዘለዎ ኢዩ ንበል፡ብሩካን፡ ክብል ከሎ ግን ንምንታይ የመስግኖም፧ ፈጣሪዶ ንፍጡር የመስግን ኢዩ።ፍጡር ድዩ ንፈጣሪ ዘመስግኖ ወይሲ ፈጣሪ፧ከምቲ ንስኻ"ብዘይካይ ካልእ ኣምላኽ ኣይተምልኽ ኢሉ እንድዩ" ኢልካ እትትርግሞ ዘለኻ ኣተራጉማ፡እሞ ክርስቶስውን ነቶም ቅዱሳን ብሩኻን ኢሉ ስለዘመስገኖም፡ኣምሊኽዎም ማለት ኢዩ፧ ንሓደ ነገር እንተኣመስጊንካዮ፡እንተወዲስካዮ ብቐጥታ ኣምላኻዊ ስልጣን ሂብካዮ ማለት ድዩ።ኣይኮነን።ብፍጹም ኣይኮነን።

ክርስቶስ ዘመስግኖም ዘሎ ስለዝተጋገየ ዘይኮነስ፡ከምዘኽበሮም ንኽገልጸሎም ኢዩ።ንሱ ክሳብ ክንድዚ እንዳወደሰ ባሪክዎም፡ንሕና ድማ ንሱ ዘመስገኖም ማዕረቲ ዝሃቦም ክብሪ፡ክብሪ ክንህቦም ግቡእና ኢዪ።

ስለዚ ብዙሕ ክበሃል ይከኣል ኢዩ፡ነገር ግን ንጠቢብ ሓንቲ ቃል ትኣኽሎ።ቤተ ክርስትያን ግን ልዕሊ እግዚኣብሄር ኣሎ ኢላ እተምልኾ ፍጢር የለን፡ኣይክህሉንውን ኢዩ ከኣ።ንቅድስት ድንግል ማርያም፡ንቅዱሳን እትህቦም ክብሪ ትሕቲ እግዚኣብሄር ከምቲ ንሱ ዘኽበሮም ደኣምበር፡ልዕሊኡ ፡ንፍጡር ልዕሊ ኣምላኽ ኣይትሰርዖምን ኢያ።

ወስብሀት ለእግዚኣብሄር ወለወላዲቱ ድንግል ወለመንስቀሉ ክቡር ኣሜን።

ክውለድ እንከሎ፡እተን መሕረስቲ ኩለን ዓለላ፡ክቕበር እንከሎ ግን እቶም ቀባሮ ኩሎም ወጨጩ።

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ሓደ ግዜ ካብ ማህጸን ኣዲኡ ክወጽእ እንከሎ ዝውጭጭ ህጻን ሰማዕኩ።እዚ ህጻን ምውጫጩ ንዓይ ገረመኒሞ፡ንሱ ክምልሰለይ ስለዘይክእል ንሕልናይ ሓተትክዎ፥"እንታይ ኮይኑ ኢዩ እዚ ህጻን ዝወጨጨ፧" ዝምልሰለይ ሰብ ኣይነበረን።ንነዊሕ እዋን ዓቒረዮ ስለዝጸናሕኩ ግን ነቲ ናይ ትማሊ ህጻን ናይ ሎሚ ግን መንእሰይ ዝኾነ ሰብ፡'ብህጻንነትካ እንከለኻስ፡ካብ ማህጸን ኣዲኻ ውጽእ እንክትብል " እንኛርርርርር!" ኢልካ በኺኻ ኢኻሞ ስለምንታይ ይመስለካ ኢለ ሓተትክዎ።

እዚ መንእሰይ ነዊሕ እዋን ኣብዛ ምድሪ ተጋዒዙ፡ምስ ብዙሓት ተላሊዩ፡ምስ ብዙሓት ተራሳሲዑ፡ንብዙሓት ኣሕጊሱ፡ንቡዙሓት ኣግህዩ፡ብዙሕ ግዜ ጽድቂ ገይሩ፡ብዙሕ ግዜ ድማ ሓጥያት ፈጺሙ።ብዙሕ ተማሂሩ፡ንቡዙሓት ሚሂሩ፡ብዙሕ ደኺሙ፡ብዙሕውን ጠንኪሩ፡ኮታ ዉረድ ደይብ ናይዛ ዓለም ዝተረደአ ሰብ ኮይኑ ኢዩ ጸኒሑ።ንኹለን ትጥቕልለን ርግጸኛ ኮይኑ ዝፈለጣ እንተላ ድማ ሓንቲ ነገር ኢያ፡ከምታ ካብ ማህጸን ኣዲኡ ተፈልዩ፡ንሕምብርቱ እተላግብ መለጋግቦ ገመድ መስል፡ብላማ ቀንጢበን እተን መሕረስቲ ካብታ ኣዝዩ ዘፍቅራ ማህጸን ኣዴኡ ዝፈለይኦ፡ከምኡ ድማ ካብዛ ዓለም ካብቲ ኩሉ ዘፍቅሮ ሃብቱን ንብረቱን፡ጉልበቱን ትምህርቱ፡ከይፈተወ እቶም ናብ ዳግማዊት ማህጸን እትመስል መቓብር ዝቐብሩ ቀባሮ ክደፍንዎ ምኻኖም ፈለጠ።ክውለድ እንከሎ፡እተን መሕረስቲ ኩለን ዓለላ፡ክቕበር እንከሎ ግን እቶም ቀባሮ ኩሎም ወጨጩ።

ስለዚ ሓተትክዎ! ብህጻንነትካስ ስለምንታይ በኸኻ፧ንሱ መለሰለይ።
1)ህጻን "ኣብዛ ዓለም ንዝርከብ ውረድ ደይብን፡ኣቐዲሙ ግዲ ተረዲኡኒ ነይሩስ፡ነቲ ጥዑም ብልዖት፡ከይሰራሕካን ከይረሃጽካን ዝንበሮ ናብራ ማህጸን ክፍለዮ እንከለኹ ተደፋነቕኩሞ፡ካብዛ ንእሽቶይ ገነት ተፈልየስ እንታይ ጡዑም ክረክብ ኢየ'ብምባል በኸኹ።
2)ኣብ ማህጸን እንከለኹ ሓጥያት ኣይርኢ፡ጽድቂ ኣይሰምዕ፡ማህጸን ንዓይ ኩሉ ግዜ ትሰትረኒ ነይራ፡ካብኣ ክፍለ እንከለኹ ግን እዚ ኩሊ ዝገበርክዎን ዝገብሮ ዘለኩን ብሕጂ ዝገብሮን ካብ ማህጸን ምፍላይ ዘምጽኦ ጣጣ ኢዩ።
3)ብዙሕ ሃብትን ፍልጠትን ክድልብ ምኻነይ እካ እተን መሕረስቲ ተረዲእወን ነይሩ እንተዓለላ፡ኣነ ግን ድሮ ገዲፈዮ ክኸይድ ምኻነይ ተረዳኣኒሞ ንዕዑ በኸኽሉ!
ስለዚ ካብዛ ዓለም ክፍለ እንከለኹ ዳግማይ ምውጫጭ ኣየድልየንን ኢዩ።ኩሉ ሙሉ ንብኽያት ዘድሊ ዘበለ ወዲኤ መልቀሰይ ኣጻፊፈ ኢየ።ሽዑኡ ንስኻትኩም ኢኹም ከተልቅሱለይ።ኣነ ግን ንብዓተይ ብዓንተውኡ ስለዝጨረስኩ ስቕ ኢየ ክብል" ኢሉ መለሰለይ።

ወይ ጉድ!!!!

ናይዚ ህጻን ካብ ማህጸን ወጺኻ ውጨጫ፡ምስ ናይዚ ሎሚ ካብ ቤተ ክርስትያን ዝወጽእ ዘሎ መንእሰይ ይመሳሰል።እቲ ህጻን ካብታ ማህጸን ውጽእ እንክብል ኣውያት ጀመረ፡እዚ ናይ ሎሚ መንእሰይ ድማ ካብ ቤት ኣምላኽ ውጽእ እንክብል ናይ ጽባሕ ውድቀቱ ግዲ ተረድእዎ ይሁዳዊ ንብዓት ክነብዕ ጀመረ።ይሁዳዊ ንብዓት ግን ገመድ እምበር፡ስርየት ኣየውህብን።

ኣንታ ካብ ቤተ ክርስትያን ንኽትፍለ ህርድግ ትብል ዘለኻ መንእሰይ፡ኣዴኻ ቤተ ክርስትያን ክትወጽእ ኣይደለየትካን ኢያ።ንስኻ ትወጻሉ ሰዓት ኣሎ፡ ሕጂ ኣይኮነን፡ሽዑኡ መርዓዊ መጺኡ ኢዩ ክጸባጸባ፡ንሳ ንዓኻ ብሓደራ ካብ ማይ ዮርዳኖስ ብዝተረኽበ ጥምቀት ተረኪባትካ ኢያ፡ብሓደራ ድማ ናብ ዋናእ ኣብ ምጽኣት ከተረክበካ ትደሊ ኣላ።ሕጂ ግን ኣጋንንቲ ካብታ ምስ ኣዴኻ ቤተ ክርስትያን ዘሎ ናይ ሕምብርትኻ መለጋግቦ ክበትኩ ወትሩ ይጽዕሩ ኣሎዉ።ንስኻስ ተኸኣልካ ስቕ ኢልካ ንበር ኣመስገን፡ስግኡን ደሙን ብንስሓ እንዳተቐበልካ ንበር እምበር፡ነቲ ክፉእ ሰይጣን ንኽቕንጥባ "ኣብዚ ህረመኒ፡ኣብዚኣ ጨንድሓያ" እንዳበልካ ቁስልኻ ኣይተርእዮ።

ኣንታ ኣብዘይ መዓልትኻ ካብ ቤተ ክርስትያን ተፈሊኻ ሉጋም ከምዘይብላ ፈረስ ትነብር ዘለኻ ወገነይ፡መዓልቲ መርዓዊ ከይኣኸለ ስለዝወጻኻ ተመለስ፡ዳግማይ ናብ ናይ ህጻን ሳጹን እቶ፡መዓልትኻ ክሳብ ዝኣክል፡እቶም ካብ ክርስቶስ ምሉእ ናይ ሓኪምነትን፡ዶክተርነት ስልጣን፡ዝተዋህቡ ቅዱሳን ካህናተ እግዚኣብሄር ምክትታል ጥዕናኻ ልገብሩ ኢዮም።

ኣንቲ ኦሮማይ ኦሮማይ እንዳበልኪ፡ተልቅሲ ዘለኺ ወይዘሪት፡ቅዱሳን መላእኽቲ ግን ትንሳኤኺ ንኽርእዩ ወትሩ ነቒሖም፡ይጽበዩኪ ኣሎዉ።ካብ ማህጸን ምውጻእ ከቢድ እካ እንተኾነ፡ኣብዘይ መዓልትኻ ምውጻእ ግን ቁላዕ ኮይንካ ኢካ ትተርፍ።ስለዚ እግዚኣብሄር ዘፍቅረኪ ሓፍተይ፡እግዚኣብሄር ቁላዕ ኮይንኪ ካብ ቤቱ ዝወጻኽዮ ኣጉሂዎ ኢዩሞ፡ተመለሲ ምሉእ ፈውሲ ክህበኪ ኢዩ።እግዝኣብሄር ንዝጠፍአት ነፍሲ ክረክብ፡ንዝተዘርፈት ክመልስ፡ንዝሞተተት ከይተረፈ ከሕዊ ዝኽእል ኤልሻዳ ኣምላኽ ኢዩ።

እዚ ህጻን ሓንቲ ነገር ይኽእል፡ምስ ኣምላኽ ምምባር።ነተን መሕረስቲ ግን ዳግማይ ናብ ማህጸን ኣደይ ምለሳኒ ተዝብለን እካ ኣይከኣልን ኢዩ።ሰብ ካብ ማህጸን ምስ ወጸ ብሰንኪ ጽልኣት ዓለም ዳግማይ ናብ ማህጸን ክምለስ ኣይከኣልን፡ እግዚኣብሄር ግን ካልእ ውቅብቲ ማህጸን ኣዳልዩልና ጸነሐ።
እዛ ማህጸን እዚኣ፡ከም መንግስተ ሰማያት እንክትመስል ፈተነካ ተለዋ ብሓለዋ ግን ዝተኸበት፡እታ ኣደ ናይቲ ህጻን እካ ትሃልኽ ተኾነት፡ዘይሸመትካዮ፡ዘይከፈልካሉ ስጉኡን ደሙን ግን ትምጥወካ፡ከም ያዕቆብ ንኤሳው ኣብ ማህጸን ኮይንካ እካ እንተባሕጨርካያን፡ንሓውኻ ከም ኤሳውን ያዕቆብን ንሓድሕድካ እንተተጋነጽካን፡ንሳ ግን ንኽትናሳሕ ጣዕሳኻ ወትሩ ትጽበ ቤት ኢያ።እሞ ካብዛ ቤት እዚኣስ ካብ ምውጻእ ኣብኣ ምምባር እቲ እንኮ ኣማራጺ ኢዩ።
እግዚኣብሄር ኣብ ቤቱ የምብረና፡ወስብሀት ለእግዚኣብሄር ኣሜን።