ዘይደሓን ትንዕ ትንዕ።

ትንዕ ትንዕ
ናብ ክልተ ኣፍ ደገ እትው ውጽእ
ኣብቲ ሓጥያታዊ ማርሻፔዲ
ሸናዕ እንክብላ ጢዕምወን'ዩ ግዲ
የግዲ
ኣበይ ክጥዕመን ዘን መሓውር

ኣብትን ኣብትን ክብላ
ኮይንወን ኣስካላ
ኣየዛ ዓለም ኣስካላ
ናብ ሲኦልን መንግስተ ሰማይን እትሳገረላ
ናብ ዳዕርን ዳንዴርን እትሓኽረላ
ኣቤትዛ ቤተ ክርስትያን ወለላ
ዳዕሮ እንክትመስል ኩሎም ዝዕቆቡላ
ቀታሊ ዝናዘዘላ
ዕዋላ ዝእረመላ
ስጋ ኣምላኽ ዝፍርተተላ
ደሙ ዝቕደሓላ

ኣንትን የእጋረይ
ናበይ ኢኽን ትንዕ ትንዕ
ናብ ዳንዴርዶ ወይስ ካላእ
ሳልስቲ'ዩ ወሬኽን ካብ ንሰምዕ
ኣንታዛ ሓጥያት ዳንዴር
ገፊሑ መንገዳ፣
ነዘን የእጋረይ ኮይንወን ሰጣሖ
ሰጣሖ ጎልጎል ሰጣሖ
ብደገ ኣጉለ ብውሽጡ ፍልሖ
ይኸይዳሞ ንውሽጠን ፈርፈዖ

እቶም ዓቀይቶት ኣጋንቲ
ዘይፍለጡ ፍጹም መታለልቲ
ጨካናትምበር ዘይሓለይቲ
የእጋር ተታሊለን
እጋንንቲ ኣታሊሎመን
ፍልሖ ክንሶም
ንህቢ መሲሎመን
መርዚ ክንሱ ኣጉለ መሲልወን

ኣየናይ ኣጉለ
ኣፍዕሲምበር
ኣፍካ ዘሸትት ካብ መንግስተ ሰማይ ዘሸፍት
መርዛማት ኣፍዑት
መጺኦም ይሕንገጡኻ
እናባጨዉ
ጋሻ ተቐበል፣
እንካዕ ድሓን መጻኻ ይብሉኻ
ሓዊ ንኽትነድድ ቦታ ይኸፍቱልካ።

ኣንታ ክንደይ ይጥዕም'ዚ ውሳነ
ጠግ ኣቢልካ ትኸዶ ናብ ሓዲኡ ድነ
ኣብየንኮ ከይውስና ዘን የእጋር
ናብቲ ሕምቶ
ዘለዎ ሸቶ
ንምኻድ ይናፍቓ
ሕልነአን ይነግረን
ስለ ቅድስና ብውሽጠን ይሕለቓ፡

ናብ ሲኦል ከይወድቃ
ናብቲ ጭፈራ
ቢራ ክግልላ
ስኽር ክሓድራ
ምስቶም ተላሀይቲ ስዕስዕ ክሓድራ
ነዚ ክፍለየኦ ኣብይወን ውሳነ
ኣየ ዝሳነ
ጡዕም ነይሩ ግን መን ይዳነ፡

ኣንትን መሓውር
ኣጆኽንባ!
ናበይ ኢኽን ብክልተ ትውጥጣኒ
ወይ ናብቲ ኪዳ
ብሓዊ ንደዳ
ወይ ናብዚ ምጻ
ብምሕረቱ ተኣበዳ
ግን ሕሰባሉ
ጽባሕ ንግሆ ንስኽን ኢኽን
ኩሉ ክትሕተታሉ

ናብትን ናብዝን ክትብላ
ጽሓይ ከይትዓርብ
ዕድሜኽን ከይርብርብ
ሰግጥ ሰገጥ ኣይህብን ድሓን
ነግ ፈረግከወደይ ብኸመይ ለመድክን፡
ሃየ ሰሓባ
ናብ ሓዲኡ ንኺድ
ወይ ከነብርቓ ወይ ከነዕርባ

ሓሻካ የእጋረርይ
ኣበይ ኢለንኦ
ኪንዮ ምሕረት ኣምላኽ
ኣበይ ሪእየንኦ
ክንዮ ቁጥዑስ
መዓስ ገሚተንኦ
ዘይ ስቕ ኢልካዩ ጉዕዘአን ሃታ ሃታ
ኣብቲኣ ክኣትዋ ምስቲኣ ክማጎታ
ኣየዛ ሓጥያት ምጉት
ሓቂ ተመሲላ
ከመይ ሓንኮለተን
ሓላይት ተመሲላ ከመይ
ማረኸተን
ከይውስና ሓሊኻተን
ከይፈልጣኣ ተሰዊራተን
ይዋእ ግርህነት ናይ መሓውር ጣጣ
እንዳፈለጣ ይውጠጣ
እንዳኾርኮሐን ይኹየጣ
ኣቢት ሓጥያት ዘይድሓን መኾፈሊ
ተጻወተለንዚ መታለሊ
ሓጥያት'መታለሊ፡

ወስና የእጋረይ ወስና
ኣብቲ ይሕሸክን
ኣብትስ ነይምነየልክን
ካብቲ ጽርግያ እሾኹ ዘይርአ
ካብቲ ዓጸቦ ሃርገፍገፍ ዝተመልአ
ካብቲ ቶኾርባ ዳንዴሩ ዝሓብአ
ኣይትደልየኦን ዳንዴራዊ'ዩ ሓጥያቱ ዝጠጅአ
ጥጡሕ ውሽጡ ግን ባዶ
ሃማሚ'ዩ ንምርጋጹ ጋዶ
እወ ጋዶ ሓጥያት ጋዶ
ኣሲሕት መሲሉዶ
ኣይ ዓፍራ እንደኣሉ
ካልኣ ይርገጾ፡

ኣብ ውሽጡ ኣሎዉ
ንየእጋር ዘታለሉ
ኣብ ታሕቲ ዝተዓኽለሉ
ኣብ ትሕቲ ዓፍራ
ንጉምተይ ዘቃምቱ
ስሕተተን ርእዮም ኣብ ሲኦል ዝዕልሉ

ኣየዞም ኣጋንቲ
ሓራግጽ ክንሶም ዓሳባ መሰሉ
ኣስናኖም ሓቢኦም ኣብ ምንዝርና ተዓኽለሉ
ሰናይ ተመሲሎም
ኣብ ጛይላ ተዓኽለሉ
ጽልኢ ክንሶም ፍቕሪ ተመሰሉ
ትሕትና ተመሲሎም ኣብ ዝና ተሰቐሉ
ኣበይ ኢልዎም መሓውር ንሳቶም ግን ቀጸሉ
ቶንኮሎም ቀጸሉ
ሰብ ንኸይፈልጦም ፍጹም ተኸወሉ
ነዘን የእጋረ እናሻዕ ኣታለሉ፡
ተታሊለን
ዘይሰናይ ሃገሮም ሰናይ መሲልወን
ዘይሐራይ ደሞዞም ወርትግ ኣታለለን
እንዳፈለጣ ንኸይውስና ጥቦቦም ሓንኮለን

እሾኹ ዝርአ ጽርግያ
ጸቢብ ኣይምሰልክን ንዕነ ረኣያ
ኣሻኽ ነይኮነ ጥዑይ'ዩ መንገዱ
ሓጥያትካ ዝነቅስ
ምሕረት ዝልማዱ
ቤት ኣምላኽ ይሕሸክን ቤት ፈጣሪኽን
ንሱ ዝሓልየልክን
ሓላይኽን'ዩ እወ ሓላይኽን፣

ንስኽንደኣ ኣበይ ኢልክነኦ
ሓጥያታዊ እሾኽክን ዝነቅስ
ብዘይገመትክነኦ
መሪጽክን'ዩ ምረጸኦ
እነሀለ ቤቱ ብግፍትኑ
ልብኽን ክፈተኦ
ኪደኦ ደኣምበር ኣይትእበየኦ
ኣንትን መሓውረይ ሐራይ በለኦ
በጃኽን ሐራይ በለኦ።

እነሀለዉ
ደቂቀ ኤልያስ
ቅዱሳን ኣበው
ሰበኽቲ ወንጌል ጸሎቶም ዘርሕዉ
ብድግል ማርያም ዝተሰለሙ
ብቅዱስ ልማኖኣ ንኣምላኽ ዘረሩው
ልቡ ከፊቱ ምሕረቱ ዘዝሩው
ንዕነ ናብኡ
ኣብታ ቅድስቲ
ኣብኡ ኢዮም ዘሎዉ፣

ኣሎዉ እምበር ኣይመስልክን ጥራሑ
ቤተ ክርስርያን ኣይምሰልክን ጥራሑ
ገስግሳ ኪዳናይ ናብ ጥፍሑ
እኖሀለ ጸሎቶም እምብዛ በዚሑ
ካብቲ ሓጥያትክንሲ ምሕረቱ'ዩ ሰፊሑ።
ወስብሀት ለእግዚኣብሄር

ኣየ ሓጥያት

ናይ መጀመርያ ጥበብ ፍርሃት እግዚኣብሄር'፡
ናይ መጀመርያ ዕሽነት ድማ ምኽሓድ ንእግዚኣብሄር፡
ናይ መጀመርያ ልደት ካብ እግዚኣብሄር ብጸጋ ምውላድ ኢዩ፡
ናይ መጀመርያ ሞት ብንስሓ ዘይምምላስ፡
ናይ መጀመርያ ታተ ናብ እግዚኣብሄር ምግስጋስ ኢዩ፡
ናይ መጀመርያ ስንክልና ድማ ካብ ቤት እግዚኣብሄር ምሽፋት ኢዩ፡
ናይ መጀመርያ ኣፍካ ቃንቃኻ ምጽራይ ቃል እግዚኣብሄር ንምዝራብ እንክትላማመድ ክኸውን ከሎ፡
ናይ መጀመርያ ኮርታዕነት ድማ ቃል እግዚኣብሄር እንክዝረብ ክህከየካ እንከሎ ኢዩ፡
ናይ መጀመርያ ንጽህና ምስ ኣባት ነፍስኻ እትገብራ ርክብ ኢያ፡
ናይ መጀመርያ ርኽሰት ድማ ናብ ሓንቲ ኣመንዝራ ከይድካ ዝፈጸምካዮ ርኽሰት ኣብ ብርኪ ካህን ዘይምንዛዝ ኢዩ፡
ናይ መጀመርያ መዓልቲ ሓጎስ ናይ መንግስቲ ሰማያት እትወርሳ ዕለት ክትከውን እንከላ፡
ናይ መጀመርያን መወዳእታ ዘይብላን ሓዘን ድማ መንግስቲ ገ
ሃንመ እሳት ክትወርስላ ዕለት ኢያ።

ኣየ ሓጥያት

ሕልና ዝጠጃኦ
ከናፍር ዝፈርፍዖ
መልሓስ ዘኾምስዖ
ንየእጋር ይእዝዞ
ንየእዳው ተወሳውሶ
ደሞዞም
ወይ ናይ መንግስተ ሰማይ ርስቲ
ወይ ድማ ምስ ክፉኣት ኣጋንንቲ
ንኹሎም ዝዕዘብ
መመንገድኦም ዘንብብ
እግዚኣብሄር'ዩ ናይ ኩላቶም ብሶላ
ኣብ ሕልና ተኾይጡ
ቅኑዕ ፍርዱ ዘሳላስለላ
 
 እወ እዛ ሕልና
ፈጣሪኣ እንክእዝዛ
ምስ ሰይጣን ተማሓዝያ
ኣየ ሰይጣን ዘይደሓን መሓዛ
ሓቂ ንኸይዝረብ
ንሕልና ኣዘዛ
ንሳውንኮ ትኽእል ኢያ፡
እምቢ ክትብሎ ክተምበርክኾ
ክትረግጾ ካብ ልባ ፈጺማ ክትሓኮ
ስልጣን ነይርዋ እዛ ሕልና
ኣበይ ኢላቶሞ፡
እቲ ኣብ መስቀል ዝተሰቕለላ
ብቅዱስ መስዋእቱ ዘምበርከኸላ
ኣምበርኪኹ ሂብዋስ
ንሳ ግን ተምበርኪኻትሉ
ኣሲሩ ሂብዋስ
ባዕላ ተኣሲራትሉ
ምሕረት ኣዚዝላ
ንሳ ግን ኣባጭያትሉ
ኣየ እግዚኣብሄር
ሕልና እንክትኣቢ
ንሱ ዘይድርቢ
ሕልና እንክትሕንግድ
ንሱ ዘይገድድ
ሕልና ሰይጣናውነት መሪጻ
ንሱ ግን እናሻዕ ይመጻ
ፍትውተይ ተመለሲ
እንዳበላ ኣብ ኣፍ ደጌኣ ይኹክሓ።
ጸግ ኣበለቶ
ንሱ ግን ወርትግ ጸውዓ
ኣበይ እሞ ኢላቶ
ናይ ሲኦል ምረት
ኣበይ ጢዒማቶ
ሓጥያት ዓለም
ኮይንዋ ሕምቶ
ምንዝርና ርኽሰት
ኮይንምዋ ሾቶ
ኣቤት ሸቶ
ኣበይ ኢላቶ
እምበር ንሱስ ጽእ ዝጨኑ
ካላኣ ይሸትቶ
ነዚ ፈሊጡ ፈጣሪኣ
እናሻዕ ይጽውዓ
ካብቲ ሕማቕ ሽታ
ሓጺቡ ክኹልዓ
ካብቲ ሕማቕ ኩሕሊ
ብንስሓ ክቐብኣ
ንዒ ይብላ እግዚኣብሄር
መመሊሱ ይጽውዓ።
ተመለሲ ሕልና ተመለሲ
ምለስዮም ንኹሎም ተኣዘዝትኺ
ነተን የእጋር ኣዝዝየን
ነተን የእዳው ኣድብየን
ነተን የዒንቲ ጽቡቕ ኣርእይየን
ነተን የእዛን ሰናይ ኣስምዕየን
ምርሕየን እወ ምርሕየን
ናብቲ ዝጽውዓኪ ዘሎ ንዕናይ ሒዝክየን
ማዕጾኾ ክፈቲ ተቐበሊ ድምጹ
ቅዱሳን ይዓልሉ
ኣጋንቲ ይናወጹ
ንሱ ይሕሸኪ
መሪጹልኪ ኢዩ ስፍራ
ትሮፍ ድሕሪ ደጊም
ይኣክል ዕንደራ
ዕጣነ ቅዳሴ ይሕሸኪ
እንታይ ኢልክዮ ሽጋራ
ቁርባኑ ቁረቢ
ኣይሕሸክን ቢራ
ጫት ባንጎ
ዋላውን ጋይላ
ኣጽዋርኪ ኣይኹኑ
እግዚኣብሄር ይሕሸኪ
ተወለፊ ብኪዳኑ
የድሕነና ብሓጥያት ካብ ምውላፍ
ይሓልወና ናብ ሲኦል ካብ ምግሓፍ
የድሕነና ምስ ኣጋንንቲ ካብ ምስላፍ
ውዱቓት ኣጋንንቲ ሒዞምና ከይወድቁ
ቅዱሳን መላእክት ስሌና ይንቅሑ
ድንግል ማርያም
ናይ ያሬድ ዜማ
ሓፍቲ ቅዱሳን ንሳ ኣዴና
ብጸሎታ ትሃሉ ምሳና
ኣሜን ድንግል ትቑም ስሌና
ወስብሀት ለእግዚኣብሄር

ኣዘንትዉልናሞ ከነዘንትወልኩም!

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ኣዘንትዉልናሞ ከነዘንትወልኩም!

ብዛዕባ ጽባቐ ወርሒ ብሳትላይት ኬይድኩም ዝፈለጥኩሞ ንገሩናሞ፡ንሕና ከኣ ብዛዕባ ፈጣሪኣ ክንነግረኩም! ብዛዕባ ናይ ጸሓይ ሓያልነት ንገሩናሞ፡ንሓና ድማ ብዛዕባ ኣማናዊ ጽሓየ ጽድቅ ፈጣሪ ጽሓይ ክንነግረኩም፡ብዛዕባ ስፍሓት ኣድማስ(UNVERSE) ዝበጻሕኩሞ ምዕባለ ንግሆ ንግሆ ብዜና መልክዕ ጌይርኩም ንገሩናሞ፡ንሕና ድማ ብዛዕቢቲ ልዕሊ ኣእምሮ ዝኾነ ስሉስ ቅዱስ ናይ ኣድማስ ፈጣሪ ክንነግረኩም።

ኣንቱም ተማራመርቲዶ ክንብለኩም ወይሲ ጽዓዱ!

ኣይ ምኹና ሎሚ ግዳ ኩሉ እንድዪ ኣፍ ኣውጺኡ ተማራማሪ ኮይኑ፡ ክነግረካ ዝብል እምበር ንገረኒ ዝብል ተሳኢኑ፡እመነኒ ዝብል እምበር ብዛዕባ ኣምላኽ ኣእምነኒ ዝብል ተሳኢኒ።ስምዑ ግዳ፡- እዚ ኩሉ ብዛዕባ እቲ ብዝተፈላለየ ሳትላይታት ብዝረኸብኩሞ ሓበሬታ፡ንምንጋር ትቀላጠፉ ኣሎኹም እሞ፡ብዛዕባቲ ነቲ ዝረኸብኪሞ ሓቤሬታታት ዝፈጠረ ልዑል ህልውና ፍጣሪ ክንነግረኪም ከኣ ጽን ኢልኩም ስሙዑና።
ህልውና ንፋስ እንዳኣመንኩምሲ፡ከመይ ኢልኩም ህልውና ፈጣሪ ናይ ንፋስ ምርዳእ ኣበየኩም?

ሓደ ዓይነስዉር ሰብ ብርሃን ከምዘሎ ይኣምን ኢዩ፡ሓንቲ መዓልቲ ግን ብርሃን ርእዩ ኣይፈልጥን፡ነዚ ዓይነስዉዚ ሓደ ግዜ ብሕልናይ ኮይነ ሓቲተዮ?" ነዞም ፈጣሪ የለን ዝብሉ እንታይ ኢልካ መረዳእካዮም "በልክዎ፥ ንሱ ውን ብሕልና መለሰለይ።ኣነውን ብሕልና ኮይነ መልሱ ሰማዕኩ።"ፈጣሪ የለን ክብሉ እንከለዉሲ፡ኣነ ዓይነስዉር ኮይነ ዘለኹሉ ዘመን ኩሎም ነገራት ህልውነኦም ክኽሕድ እንተዝብሎም፡ዝሕዝዎን ዝጭብጥዎን ምጠፈኦም።ምኽንያቱ ንሳቶም ዘምልኽዎ ኣብ ዝርአን ዝጭበጥን እምበር ኣብ ረቒቕ ልዕሊ ኣእምሮ ዝኾነ ኣምላኽ ከምልኹ ብቕዓቶም ውን ላሕሊሑ ኢዪ።ስለዚ ኣነ ዓይነስዉር ኮይነ፡ ፍጥረት ዝበሃል የለን፡ብዜካ ኣነ ንነብሰይ ምሳይ ስለዘላ እምበር ካልእ ፍጥረት የለን፡እንተዝብሎም፡"ካልእሲ ይትረፍ ብዛዕባ ህልውናና ክትኣምን ኣሎካ" ኢሎም ናይ ገዛእ ርእሶም ህልውና ተቐርቆርቲ ምኾኑ" ኢሉ እዚ ዓይነስዉር መለሰለይ።

ዘመንና ተማህሮ ዝውሕድሉ፡ዕልቕልቕ ናይ መምሃራን ግን ልዕሊ መጠን ኣብ ዓለም ዝዝርገሓሉ ግዜ ኢዩ።ዝገርም ግን መብዛሕትኦም እቶም መምሃራን ብዛዕባ ርእሶም እምበር ብዛዕባ ፈጣሪኦም ኣይምህሩን።
እግዚኣብሄር ሆይ ኣነ ደካማ ባርያኻ፡ስምካ ክጽውዕ ዘይበቅዕ ሓጥእ ኢየሞ፡ብዝገበርክዎ በደል፡ዝፈልጦን ዘይፈልጦን ንስኻ ንኹሉ ትፈልጦ ኢኻሞ፡ብዝሓለፈ መሓረኒ፡ብዝመጽእ ብወላዲትካ ደጊፈኒ፡ንኹሎም ፍጥረትካ ብፍላይ ነቶም ዝተበጀኻና ደቅኻ ምሕረትካ ኣፍሥሰልና።ክብርን ምስጋናን ዕቤትን ግርማን ውዳሴን ኣምልኾን ብሓደ ኣምላኽ ብዝኾነ ንኣብምን ንወልድን ንመንፈስ ቅዱስን ሎምን ኩሉሳዕን ኣሜን።
በረኸታ ረዲኤታ ናይ ወላዲተ ኣምላኽ ኣይፈለየና ኣሜን።
ብዛዕባ ህልውና እግዚኣብሄር ዝወሃብ ትምህርቲ

ሼመታ ሓሲሩስ ዓጸቦ ግን ኣስፋሕፊሑ!

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን
ሼመታ ሓሲሩስ ዓጸቦ ግን ኣስፋሕፊሑ!
ከብዲ ክትጠሚ እንከላ ኣብ ቅድሚኣ ዝረኣያ ብልዖት ኢዩ፡ክትበልዕ እንተኾይና ግን ሸውሃት ክኽፈት ኣሎዎ።ቅድሚ ሸውሃት ምኽፋቱ ድማ ውሓለ ሰራሒ መግቢ፡ጥበብ ዝተመለኦ ኢድ የድሊ፡መቸም ኣብ ዓድና ምስ በልዓኻ ምስ ጸገብካ እንታይ ኢዩ ዝብሃል"ጡዑም ጡዑም!" እቲ ኣእንጋዲ በዓል ውራይ ብፍላይ ብዓል ሓዳር እንተኾይኑሞ፡ክልቲኦም ብሓደ እንተጸኒሒም፡ብሓደ ድምጺ"ጡዕም ይሃብካ!" ኢሎም ይምልሱ።እዚ መልሲዚውን ነቲ ተመጊቡ ዝጸገበ ተመጋቢ ካልኣይ መግቢ ኮይኑ ኣብርሲ እቲ ዝበልዖ ካልእ ብልዖት ይኾኖ።ነዚ ዝቕበል ስምዒት ውን ሸውሃት የድሊ፡ኩሉ ብሸውሃት ኢዩ ዝኾውን፡ሸውሃት እንተትዓጽዩ፡ተንዲኖ መጽኡ ክፍንቅሎ ኣይከኣልን።

ኣብዚ ዘለናዮ ዘመን ኣብ ዓለም ዓቢ ዓጸቦ ኣትዩ ኣሎ፡እቲ ዘገርም መግቢ ስለዝኸበረ፡መግዚኢ ገንዘብ ስለዝተሳእነ ኣይኮነን፡እቲ መግቢ ሕሱር ኢዩ፡እረ ምንም ትኸፍሎ ዋጋስ ምስቲ ትምገቦ መግብን፡ምስቲ ጣዕምኡን ኣወዳዲርካ፡ትኽፍሎ ዋጋ ዳርጋ የለን ኢዩ ዝብሀል።ቅዱስ ዳዊት" ጼኣ ወባህበሄ ኣዕጽምትየ፡እምገጸ ኣበድየ፡(መዝ37፥5)ትርጉም ካብ ሓጥያተይ ዝተላዕለ ኣዕጽምተይ ይሞግል ኣሎ ይብል።ምግሊ ሓደ ካብቶም ንሸውሃት ዝዓጽዉ፡ዓበይቲ መዓጹ ኢዩ።ምግሊ እተሪኢኻ፡ምሉእ ሕልናኻ ረሸሽ ኢዩ ዝብለካ፡ይዋእ ኣብዚ ዘመን ዘለና ደቂ ኣዳም፡እቲ ኣብ ውሽጥና ዘሎ ምግሊ ነቲ ካብ እግዚኣብሄር ከም ካብ ጭሔሎ ዝፈሥስ ምሕረቱ ንኸይንምገብ ንመንፈሳዊ ሸውሃትና ዓጽይዎ ይርከብ።እኽሊ ክሓስር ይኽእል ኢዩ፡ስርናይ ክሓስር ይኽእል'ዩ፡ስገም ክሓስር ይኽእል ኢዩ፡ገንዘብውን ክሓስር ይኽእል ኢዩ፡እረ ሎምስ ብዙሕ ጻዕሪ ከይገበርካ ብድቅስካ ገንዘብካ እንዳተዋህብካ ዝንበሮ ዘሎ ናብራ ስለዝኾነ ኣብነት መረዳእታ ዘድልይክ ኣይኮነን፡ኣዚ ብቐሊሉ ዝርብ ክኾውን ይኽእል ኢዩ።እቲ ዝሓሰረ፡እረ ብቀሊሉ ዝርከብ፡ብጣምነቱን፡ፈዋስነቱ ምንም መወዳድርቲ ዘይብሉ ግን ምሕረት እግዚኣብሄር ኢዩ።

እግዚኣብሄር ፡ነፍሲ ወድ ሰብ መታን ክትምገብ ኢሉ፡ምሕረቱ የፍስስ፡ነፍሲ ወድሰብ ግን እቲ ኣብ ውሽጣ ዘሎ ሓጥያታዊ ምግሊ ንሸውሃታ ስለዝኽልክሎ፡ነቲ መግቦተ ምሕረተ እግዚኣብሄር ንኸይትምገብ ምኽንታት ይኾና።ብዘይ ውረድ ደይብ፡ምሕረቱ ምሉእ እንዳሃለወ፡ሓጥያታዊ ምጉልና ግን ነዚ ምሕረትዚ ንኸይንምገብ ሸውሃትና ዓጽይዎ።ምሕረቱ ምሉእ ብምሉእ ይፈስስ ኢዩ፡ዝምገብዎ ግን ውሕዳት ኢዩ።ናይዞም ምሕረት እግዚኣብሄር ዝምገቡ ሰባት"ጥዑም ጥዑም" ዝብል ድምጺ ካብ ገጾም ይንበብ።ኣፎም እካ እንተዘይተዛረበ፡ኣካይደኦም፡መንፈሳውነቶም ግን መጋልሕ ድምጺ ገይሩ ይጭርሕ።"ጥዑም ይሃብህካ" ዝብል ድምጺ ድማ ካብቲ ናይ ባህሪ ወሃቢ ምሕረት እግዚኣብሄር ዘይኮነስ፡ካብቶም ክኣስሩን ክፈትሑን ካብ ሞሎኮታዊ ባህሪኡ ስልጣናዊ ጸጋ ዝመቐሎም ካህናት ይስማዕ፡ንሳቶም ቅዳሴ ኣቐዲሶም ነቲ ኣማናዊ ምሕረት ዝኾነ ብልዒ ነፍሲ፡ንስጋን ንነፍስን ከኣ ዝፍውስ ቅዱስ ስጋ ወደሙ ይህቡና።እዘን ነዚ ዝሰርሓ ዘለዋ ናይ ካህናት የእዳው፡ኣፎም እካ "ጥዑም ይሃብኩም" ክብል እንተዘይተሰምዓ፡የእዳዎም ግን ከሳልማና እንከለዋ፡ነቲ መሎኮት ተንኪፈን ስለዝጸንሓ ናይ እንካዕ ደስ በለኩም፡ስግኡን ደሙን ተመጊብኩም እንካዕ ብመግቦቱ ዓገብኩም" ዝብል ብስራት ሒዘን ካብ ውሻጠ ቅድስተ ቅዱሳን፡መንጦላዕተ ብርሃን ወጽየን ናብ ኩሉና ክዘራ ብየዒንትና ንርእየን።

ኦ ህዝቢ እግዚኣብሄር ምሕረት ኣምላኽ ብገንዘብ እንተትግዛእ መን ምገዝኣ፡ምሕረት ኣምላኽ ተሰዲድካ እንተትርከብ መን ምረኸባ? ምሕረት ኣምላኽ ተማሂርካ ተማራሚርካ እንተትብጻሕ መን ምበጽሓ፧እግዚኣብሄር ግን ነቲ ካብ ኩሉሉሉ ዝኸበረ ነገር፡ካብ ኩሉ ዝሓሰረ ገይሩ ብቐሊሉ ከም ዝርከብ ገ ገበሮ።ምላልባሽ ሓደ ሰብ ንስሓ ስለዝኣተወ፡ጾም ጸሎት፡ስግዳን፡ምጽዋት ወዘተ ነዚኦም ስለዝገበረ፡"ኣነሞ ከፊለ እንድየ፡እቲ ዝኸፈልክዎ ዋጋኮ ማዕሪኡ ክንድቲ ዝምሕረኒ ኢየ ከፊለዮ" ዝብል ኣይስኣንን።

ኣይኮነን! ፍጹም ኣይኮነን፡እግዚኣብሄር ንዝምሕረና ምሕረት ዋላ ሓደ ዝዋዳደሮን ዝመዓራረዮን የብሉን፡ነፍስና ንስሓ ክትኣቱ እንከላ፡ነቲ ካብ እግዚኣብሄር ዝምጦ ምሕረት ማዕረ ዋጋ ንኽትከፍል ኢላ ዘይኮነትሲ፡እቲ መሓሪ ባዕሉ ብጸግኡ "ንምሕረተይ ዝዋዳደር ነገር እካ ኣይሃሉ እምበር፡ተጣዒስኩም እንተመጻኹም ግን ምስቲ ጣዕሳኹም ኣረኣእየ፡ምሉእ ብምሉእ ምሕረተይ ክህበኩም ኢየ" ብምባል፡ንሕና ጣዕሳና ብንገልጸሉ ግዜ ንሱ ምሕረቱ ይኽዑ፡ንሕና ልብና ንህቦ ንሱ ምሕረቱ ንልብና ይመልኦ፡ንሕና ንመንገድና እንካ ምርሓዮ ንብሎ፡ንሱ ድማ ብምሕረቱ ነታ መንገዲ ቀጥ ዝበለት ሓንቲ ይገብራ።ለካ ኣብ መንጎ ምሕረት እግዚኣብሄርን ኣብ መንጎናን ሸመታ ይፍጸም'ዩ፡እረ ዓቢ ዕዳጋ ኢዩ፡ብዓል ዱንካን እግዚኣብሄር'ዩ፡ሸማቶ ድማ ወድ ኣዳም፡እዛ ድንካን እዚኣ ትሕዝቶኣ ኣይውዳእን ኢዩ፡ግን ብጥርሑ ከኣ ይርከብ፡እቲ ዘድሊ ናብዛ ድንካን መጺኻ ሃበኒ ምባል ጥራይ ኢዩ።ንሰብ መዓልታዊ ሃበኒ የሸልችዎ ኢዩ፡ንእግዚኣብሄር እናሻዕ የሐጉሶ።

ናብ ሰብ ዝውንኖ ድንካን ኣቲና፡ይትረፍዶ እቲ ዝኸበረ ነገርሲ፡ዋላ እታ ዝሓሰረት ነገር ንበላ ብዘይ ዋጋ ኣይህበናን ኢዩ።እግዚኣብሄር ግን ልብና ምሉእ ብምሉ ተጣዒሱ፡'ሂዎተይ ብዘይዛ ድንካን እዚኣ ክዕረ ኣይክእልን ኢየሞ ናብዛ ቤት እዚኣ ክኸይድ' ኢልና፡ነቲ ወናኒ ምሕረት ፡ምሕረት ሃበኒ እንተኢልናዮ፡ ሓጥእ ነይርካ ክትምሓር፡ውሽጥኻ ብሓጥያት መጊሉ ክንሱ ብምሕረት ክጸሪ፡መንገድኻ ዘምቢሉ ዝነበረ ክዕረ እቲ ዝኸበረን ዝዓበየን ዋጋ ዝሓትት ክንሱ፡እግዚኣብሄር ነዛ ምሕረት እዚኣ ብፍቓዱ ብናጻ ይህበና።ወየ ወየ ወየ መልቀስ ዘድልዮ ወየ!!! እንታይ ዝበለ ዕሽነት ኢዩ ወሪሩና!!!ልብና ሸውሃታ ተዓጽዩ፡ሓወይ ምሕረት እግዚኣብሄር ትደሊዶ፧ንስኺኸ ሓፍተይ ክትምሓሪ ትደልዪዶ፧ ጣዕሳ ጥራይ ይሃልውካ እምበር ምሕረት ኣምላኽ እንሃ፡ፍቕሪ ኣምላኽ ጥራይ ይሃልውኪ እምበር ንሱስ ስሌኺ ክብል ክሳብ ሞት ዘፍቀረኪ መድሂን ዓለም ጣዕሳኺ ክጽበ የእዳዉ ዘርጊሑ እንሆ።

እግዚኣብሄር ሆይ፡ምሕረትካ ንኸይምገብ ሸውሃተይ ዝዓጸዉ ብዙሓት ሓጣውእ ኣሎዉ፡ኣብ ውሽጠይ ምግሊ እንዳሰርሑ ንኸይጥዓስንሞ ንስኻ ንከይትምሕረኒ፡ ከም ብተንዲኖ ዝተሰርሐ መንደቕ ኮይኖም ጋሪዶምኒ ኣሎ።ኦ እግዚኣብሄር ናባኻ ክምለስ ሓይሊ ሃበኒ፡እዛ ዓለም ብሰብ ኣዕለቕሊቓ ኢያ፡ነቦና ኖህ ኪዱ ንዓለም ምልእዋ ኢልካ ዝኣዘዝካና፡ምድሪ ብፍጥረካ መልአት፡ምሕረትካ ቀረባ እንዳሃለወ ግን ሸውሃትና ተዓጽዩ፡ብሰንኪ ሓጥያትናን ዕሽነትናን ናባኻ ምምላስ ሓንጊድና፡ኣምላኽና ሆይ ነዚ ኩሉ ፍጥረትካ ምሕረት ካባኻ ክሽምት ሓይሊ ሃቦ።እመ ኣምላክ ቅድስት ድንግል ማርያም ሆይ ናብዛ ምሕረት እዚኣ ክንምለስ ኪዳንኪ ይሓልወና፡ኣሜንንንን
ስብሀት ለስሉስ ቅዱስ እንዘ ሰለስቱ ኣካላት ወይትሀዱ በመለኮት፡ወስብሀት ለቅድስት በ2ኤ ማርያም ወስብሀት ለመስቀኩ ክቡር ኣሜን።

እዛ ናይ ሎሚ ልቢ ከመይ ትመስል $$

ብስም ኣቦን ወዱን መንፈስ ቅዱስን ሓደ ኣምላኽ ኣሜን።
እዛ ናይ ሎሚ ልቢ ከመይ ትመስል $$

ኣብዚ ዘመን ዘሎ ልቢ ክተንብቦ እንተፈቲንካ፡ብዙሕ ዝተባራጀወ ሕብረ ቐለም ኮይኑ ኢዩ ዝረኣየካ።ሕብሩ ከም ዝተሓዋወሰ ስእሊ'ዩ።ስእሊ ምካኑውን ክትፈልጦ ኣጸጋሚ ኢዩ።ሓደ ሰኣሊ ክስእል እንከሎ፡ብዝተፈላለየ ሕብረቐለም እካ ዘቀናብር እንተኾነ፡ ዝተዋሃሃደ ገይሩ ኢዩ ዝዓይዮ።ስቕ ኢሉ ድብልቕ ድብልቕ እንተኣቢልዎ ግን ንተዓዛቢኡ ጋዶ፡ንሰኣሊኡ ባዶ።

ናይዚ ኣብዚ ዘመንዚ ዘሎ ልቢ ግን ዝተዘባረቐ ኮይኑዩ ይጸንሓካ።ኣብ ክንዲ እንታይ ኢልካ፧ ኣነ ክብለካ ስምዓኒ፡፡ኣብ ክንዲ ኣይተረዳኣንንሞ ኣረደኣኒ please፡ ዝብል no ንዓ ከረድኣካ፡ከምዚ ኢዩ እቲ ሓቂ፡፡ኣብ ክንዲ ይሰምዓካ ኣሎኹሞ ቀጽል፡ሓንሳብ ስምዓኒ፡፡ኣብ ክንዲ እዚስ ዓቢ ኢዩሞ፡ዋላ ፍልጠተይ ዝያድኡ ይኹን ዓቕሊ ገይረ ክሰምዖ ኣሎኒ፡ዝብል መን ፍለጥ ኢሉካ፡ኣነዶ ንስኻ ፈላጥ።ኣብ ክንዲ ትሕት ኢልካ ምዝራብ፡ልብኻ ገቲርካ ሓቅነተይ ተዘይወጺኣስ ኣይ ኣነን ኢየ ዝብል ምጉት።
ብዓል ሓዳር ኮይንካ ፍቕርተይ ክሰምዓኪ ኢየሞ ዝስምዓኪ ናይ ልብኺ ስምዒት ዘበለ ኩሉ ግለጽለይ ጽን ኢለ ይሰምዕ ኣሎኹ ምብላ፡ተዘይ ሰምዒክኒ ፍጹም ጽልኣተይ ክገድድ ኢዩ፡፡ኣነ እንተሰሚዐኪ ስብኣይነተይ ይሰዓር ኣሎ።ኣብ ክንዲ እንታይ ኣሎ ዝጎደለባ ግለጽለይ ምባል፡no ዝጎደለ ኣነ ኢየ ክነግረኪ ዘለኒ፡፡ኣብ ክንዲ ግለጽኒስከ እንታይ ኢዩ ጉድለተይ ምባል፡ንዒ ስምዒኒ ዘዝረኣኹልኪ ኣበር ጋሕጊሐ ክነግረኪ ንስኺ ጥራይ ስምዒኒ።
ናይ ዘመንና ልቢ ክተንብቦ እንከለኻ፡ንዓ ንበበኒ እምበር፡ንዓ ከምብበካ ኣይኮነን።ንዓ ፍለጠኒ እምበር ንዓ ክፈልጠካ ኣይኮነን።ንዓ ረኣየኒ እምበር ንዓ ክርእየካ ኣይኮነን።ንዓ ስምዓኒ እምበር እሺ ክሰምዓካ ኣይኮነን።ተዓዘብ ጅግንነተይ እምበር፡ከመይ ደኣሉ ታሪኽካ ክዕዘቦሞ ተርኸለይባ ኣይኮነን።

ኣብ ዝተፈላለየ መራኸቢ ብዙሓን ብፍላይ ድማ ኣብ facebook ክትዕዘብ እንከለኻ፡ብዙሓት ካባና ካባይ ጀሚርካ፡እንታይ ከምዝስምዖም፡ብመልክዕ ጽሑፍ ጸጺሕፍካ post ምግባር፡ሓዘን እንተኾይኑ"ሓዚነ ኣሎኹሞ ንዑ ረኣዩኒ ኢልካ ናይ ሓዘን ምልክት post ምግባር፡እንተተሓጊስካ፡ከም ዓቢ ጅግንነት ስለዝሕሰብ "እንሆ ትማሊ ስዕስዕ ሓዲረ መረጋገጺ ኣብዚ እነሀለኩም፣" ኢልካ ምዝርጋሕ፡፡ወዮ ንሱ ሓጎስ ተሓሲቡምበር ጽላለ ኢዩ።

ምሸት ወይ ንግሆ ብደጋዊ ትርኢትካ ምስ ካልእ ኣንጻር ጾታኻ ንዘለካ ክቱር ሕቡእ ናይ ሕልና ዝሙት ንምትንታን፡እቲ ሰብ ገለ እንተተረደኣለይ ንምባል፡ ብዙሕ ዶክረሽን ብዝተሓወሶ ስእልኻ post ምግባር።ወይ ውን ምስሓንቲ ኣንጻር ጾታኻ፡ብስጋዊ ፍትወት ዝፈጸምካዮ ርኹስ ዝሙት፡'ዓርከይ ኢያ፡ዓርከይ ኢዩ፡ኣፍቃሪተይ ኢያ፡ኣፍቃሪየይ ኢዩ፣' ብዝብል ምስምስ፡ንዑ ረኣዩኒ ከምዚ ክንገብር ሓዲርና፡ኣብ ከምዚ በጺሕና፡ንዝብል ውሽጣዊ ስእልኻ ንምትራኽ፡ተሓቓቒፍካ እንከለኻ ብዘርኢ ስእሊ post ምግባር።ኣዝዩ ዘሕፍር ዘመን ተበጺሑ ኣሎ።ኣንቲ ልቢ ትጋገዪ ከምዘለኺኮ፡እንተ ኣምቢብኪ ኢኺ ትእረሚ እምበር፡ሰባት እንተምቢቦምኺ ደኣ ድምጺ ፈጣሪኺ ብኸመይ ክትረኽብዮ፧ ድምጺ ኣምላኽኮ ህ ፥- ! ኢልካ ኣምቢብካዩ እምበር ተነቢብካ ኣይኮነን።ሰሚዕካ ኢዩ እምበር፡ኣስምዒኻ ኣይኮነን።ተማሂርካ ኢዩምበር፡ምሂርካ ኣይኮነን።ቅድሚ ንሰብ ምምሃርካ ኢካ ትምሃር እምበር፡ንሰባት ድሕሪ ምምሃርካ ኣይሎነካን ትመሃር።

በንጻሩ ምላልባሽ ሓንቲ ናይ ቅድስና ስነምግባር እንተፈጺምካ ድማ፡ረኣዩኒ ኣነኮ ኣብዚ ደረጃዚ ዝበጻሕኩ ሰብ ኢየ፡ኢልካ ማዕረ ክንደይ ዑዉት ስራሕ ሰሪሕካ ንኽትሕበን post ምግባር።ኣዝዩ ብዙሕ ብዙሕ ብዙሕ።ዝገበርካዮ መንፈሳዊ ጅግንነትኮ፡ ብኢድ ኣምላኽካ ኣገናዕ ንኽትብሃል እምበር፡ሰባት ንኸንጨብጭቡልካ ኣይኮነን ክኸውን፡ነይርዎ።

ሰብ ኣምባቢ እንተኾይኑ ኢዩ ዝዓቢ፡ተነባባቢ ግን ኣብ ሂዎቱ ዘምጽኦ ለውጢ የብሉን።ህጻን ብባህሪኡ ንነገራት ብዓይኒ ተመሃራይ ኮይኑ ኢዩ ዝርእዮም።ናይ ለብዘመን ልቢ ግን እነሀለኹ ኣብዚ ንዑ ንበቡኒ ትብል ኮይና ነገራ።
እሞ መን ደኣሉ ክመሃር።እግዚኣብሄር ንሰብ ክፈጥሮ እንከሎ፡ኩሉ ዝፈልጥ ገይሩ ኣይፈጠሮን።ኣሽንካይዶ ሰብሲ ቅዱሳን መላእክት እንካን ኣዝዮም ፈላጣት ልዕሎ ኣእምሮና እረ ልዕሊ ሕልናና ፍልጠት ዝውንኒ እካ እንተኾኑ፡ክንዲ ናይ እግዚኣብሄር ዝኣክል ፍልጠት ግን ኣይውንኑ ኢዮም።ፍጹም ፈላጥ፡እግዚኣብሄር ኢዩ።ሰብውን ይፈልጥ እካ እንተኾነ ውሱን ፍልጠት ኢዩ ዝውንን።እሞ ነዛ ውሱን ፍልጠት ዘለዋ ልብና፡'ንዑ ስምዑኒ ኣነ ከፍልጠኩም' ዝብል ጭርሖ እንተኣሕንጊጥናያ፡መዓስ ደኣላ ንሳኸ ክትምሃር፧መዓስ ኢያ ፍቓድ ፈጣሪኣ ክትፈልጥ፧ሰብ ብዙሕ ፍልጠት ክውንን ይኽእልዩ።ዓባይ ፍልጠት ግን ብምሕረት ኣምላኽ ኢያ።እታ ቀዳመይቲ ክፈልጣ ዝግበኦ ፈጣሪኡ መን ምኻኑን፡ፍቓድ ፈጣሪኡን ኢያ።ፈጣሪኡ እንተፈሊጡ፡ብድሕሪኡ ዝመጽእ ናይ ፈጣሪኡ ትእዛዛት፡ንሱ ዝጸልኦን ንሱ ዝሕጎሰሉ ክምህሮ ኢዩ።
እሞ ኣንታ ናይ ለብዘመን ልቢ፡ብኣነ ክነግረካ ዝብል ስምዒት እንተተወጢርካ ደኣ፡ብኸመይ ኢኻ ፈጣሪኻ ክትፈልጥ፧ብኸመይከ ጽቡቕን ሕማቕን ዝኾነ ናይ ኣምላኽካ ፍቓድካ ክትምሃር፧

ኣንታ ልቢ ጽን በል እምበር፡ኣይትጨድር።ህ:-| ? በል እምበር ስምዓኒዶ ኣይትበል።ኣረድኣኒባ ምባል ይሕሸካ መታን ክትርዳእ፡ኩሉ ግዜ ኣረዳኢ ምኻን ግን ትርደኦ ነገር ክውሕደካ ኢዩ።ግለጸኒ ኣነ ከመይ ኢየ፡ጉድለተይባ ንገረኒ፡በል እምበር፡ንነፍሲ ወከፍ በሰራት ክትለቅም ኣይትወዓል።ኣብ ዓይንኻ ዘሎ ጉንዲ ከየውጻኻስ፡ከመይ ኣቢልካ ኣብቲ ሓውካ ዘሎ ገፈል ክትርኢ በቓዕካ።

ኣንቱም ኣገልገልቲ ኣምላኽ ግን ኣብዛ ቅድስቲ ኣበር ዘየብላ ድንግል ዝኾነ ቤት እግዚኣብሄር፡ ምንፍቕና ከይትኣቱ፡ብደቂቕ ተኸታተሉ እምበር ሸለል ኣይትበሉ።እታ ንእሽቶ ስሕተት ትምህርቲ ኢያ ኢልኩም ዝገመትኩማ፡ሰይጣን ዝኣለማ ስለዝኾነት፡ምላልባሽ ጽባሕ ኣርዮስ ኮይና ክትመጽእ ትኽእል ኢያ።እታ ሕጂ ድሓን ብስጋኮ ሓወይ ኢዩ ኢልኩም ዝነፈግኩማ፡ጽባሕ ግን ልዮን ኮይና ጭሕምኹም ክትላጽየኩም ትኽእል ኢያ። እታ ሕጂ ድሓን ኣበይ ከይበጽሕ ኢልኩም ዝነዓቕኩማ፡ጽባሕ መንደረጋሕ ኮይና ክትመጽእ ትኽእል ኢያ።

ስለዚ ንፍቓድ ኣምላኽ ዝጠዊ ሰብ፡ዋላ ንእሽቶ ትኹን ሸለልታ ኣይግበኦን ኢዩ።ነገር ግን ንልቡ ብዘየጥፍእ፡ተስፋ ብዘየቑርጽ፡ካብ ቤት ኣምላኽ ከጥፍኦ ብዘይክእል ብፍጹም ትሕትና ፍቓድ ኣምላኽካ ኣረዳኣዮ።እዚውን ፍቓደኝነት ካብ ልቡ ክርከብ ኣሎዎ።ክርስቶስ ብዙሓት ህዝቢ ብዛዕባ ምስጢረ ቁርባን ስለዝመሃረ፡ብዙሓት ሰዓብቲ ንድሕሪት ተመለሱ።ሃዋርያትውን "እዚስ መን ክሰምዖ ይኽእል እጹብ ኢዩ"፡ኢሎም ንምእማኑ ኣሸገሮምሞ፡' no ግድን ክትኣምዎ ኣሎኩም፡ተዘይኮነ ብሴፍ ክውደኣኩም ኢዩ፣' ኣይበለን። እንታይ ደኣ፡ትምህርቱስ ትሕትናን ብናጻ ፍቓድን ዝተቓመመ ነበረ።' "ንስኻትኩምከ ክትከዱዶ ትደልዩ ኢኹም!' ኣዝዩ ደስ ዝብል ናይ ፍቕሪ ቃል ኢዩ።ፍቓድ ኣምላኽ ኣይቅየርን ኢዩ፡ብሓይሊ ዓሚጹ ግን ተቐበሉኒ ኣይብልን ኢዩ።"ተቐበልዎ ኣይትቀበልዎ እቲ ሓቂ እነግረኩም ኣሎኹ፥ ክትቅበሎ እትደሊ ነፍሲ ክትድሕን ኢያ፡ኣይኮውንን ኢዩ፡በዚ ምኻድ ይሕሸኒ ዝበለት ልቢ ግን ብግድነታዊ ሰንሰለት ኣይትእሰርን ኢያሞ፡ንስኻትኩምከ ክትከዱ ትደልዩ ዲኹም፧"በለ።

ኦ ሱዩማነ እግዚኣብሄር ኣብ ቤቱ ዘለኹም ህዝቡ፡ኣብ ቤቱ ንዘላ እሾኽ ነቒስና ንምውጻእ ትግሃትነት ይሓተና ኣሎ።ኦ ሕዝቢ ኣምላኽ "ኣነ!"ዝብል ስምዒት ዘይኮነስ፡"እግዚኣብሄር!"ዝብል ድምጺ ልቢ ነጥሪ።ረኣየኒ ዝብል መግልሒ ድምጺ ዘይኮነስ፡እነሀለ ንኺድ ንረኣዮ ንእግዚኣብሄር ዝብል መቓልሕ ትሕትና ኣብ ልብና ይፈለጥ።
ስብሀት ለእግዚኣብሄር ወለወላዲቱ ድንግል ወለመስቀሉ ክቡር ኣሜን።

ኣማርቐኒዶ ወይሲ ኣራግመኒ ኢኻ ዝበልካ!

በስመ ሥላሴ

ዘለናዮ ዘመን፡" ንዑ ንርገም ዝብሉ እምበር፡ንዑ ንመርቕ" ዝብል ፈጺሙ ተሳኢንሉ ዘሎ ዘመን ኢዩ።ወድሰብ ሓንቲ ልሳን ተዋሂባቶ ከተብቅዕ፡ነዛ ካብ ኩሉ ፍጥረት እትፈልዮ ልሳን(ነባብነት)፡ክረግመላ ይውዕል ኣሎ።ወይ ጉድ፡-ከመይ ደኣሉ ዝሕሰቦ፧ ሓደ ሰብ እንቃዓ እንቃዓ እንዳስተንፈሰ፡" ንዑባ ኣራግሙኒ፡ክረግም ደልየ ኣሎኹሞ ኣራግመኒ፧" ዝብለኩም ሰብ ረኪብኩም ትፈልጡዶ፧ኦይ እንድዒ ንዓኹም እምበር ንዓይሲ፡መሊኦም፡እረ ኣነውን ኣብቲ ቁጽሪ እትዉ ዝኾንኩሉ ኣጋጣሚታት ቆጺርካ ኣይውዳእን።

"ክሓሚ ደልየሞ፡ኣታሕምየኒ፡ክጸርፍ ደልየሞ ኣጻርፈኒ፡ክቃወም ደልየሞ፡ኣቃውመኒ፡ክቐትል ደልየሞ ኣቃትለኒ፡ክኽሕድ ደልየሞ ኣካሕደኒ፡ ክጠራጠር ደልየሞ ኣጠራጥሩኒ፡ክዕንድር ደልየሞ ኣታዓናዱሩኒ፡ክርስትናዊ ሉጋመይ ክበትኽ ይደሊ ኣሎኹሞ ኣባትኸኒ፡ክጭክን ይደሊ ኣሎኹሞ ኣጫኽኑኒ ክስዕስዕ ደልየሞ ኣሳዕስዓኒ፡ክደርፍ ደልየሞ ኣዳርፈኒ።" ብዝብሉ ሰባት ዓለምና እንዳተጎልበበት ትመጽእ ኣላ።እዚ ኩሉ ዝበልናዮ ብቃንቃ መንጽሓፍ ቅዱስ፡ወይውን ብሓሳብ እግዚኣብሄር "መርገም" ይበሃል።

ወገናተይ ነዚ ኣጽዋርዚ ሒዝኩም ዝኸድኩሞም ሰባት ከይተረደኣኩም ኣራግሙኒ እንዳበልኩሞም ኢኹም።ከምዚ ዝብሉ ሰባት ክመጽኹም፡ከለዉ'ውን 'ንዑባ ንርገም' እንዳበልኹም ኢዮም።ይዋእ ዓለም፡ክርስቶስ ክነግሰላ ዝግበኦ፡መርገም ነጊሱላ።

ኣብ ፖሎቲካዊ ዓዘቕቲ ተዋሕጡ ዘሎ ወለዶ፡እቲ ሓደ ወገን ነቲ ካልኣይ ወገን ስለዘይሳማምዖ፡ክቃወሞ ኢዩ ዝነብር።ክቃወሞ እንከሎድማ፡"ኤህ የጥፍእካ፡ተመንቆስ፡ክጠፍእ ኣሎዎ፡እንዳእገለ ክጸንቱ ኣሎዎም፡ምምባር ኣይግበኦምን ኢዩ፡ዝብሉ መሳርሒ ኣጽዋር ሒዞም ኢዮም ዝቃወሙ።እቶም ሓደ ወገን ድማ ልክዕ ብኸምዚ መልክዕ ተጠጅኦም ስብከቶም ይድርጉሑ።ኣብዚ ሕጂ እዋን ብፍላይ ኤርትራዊ መንእሰይ፡ካብ ኣምልኾ እግዚኣብሄር እንዳረሓቐ ዝኸደሉ ዘሎ ዘመን፡ኣብ ክንዲ ቀናእ ብሃይማኖቱ፡ ፖሎቲካ ዝብህግ በብዕለቱ፡ኣብ ክንዲ ስመያዊ መንነቱ ዝቋምት፡ምድራዊት ሰብነት ዘህርፎ ወለዶ ተወሊድና ኣለና።ኣብዚ ሕጂ እዋን ኣብ ነፍሲ ወከፍ ከይዲ ሂዎት ናይ ወድ ሰብ ልሳኑ መርገም ንምውጻእ ድሕር ዘይትብል ኮይና ክሳብ ጥርዚ ናይ ምንዕዓቕ በጺሕሉ ዘሎ ዘመን'ዩ፡።

ንኣብነት ሓደ ሰብ፦ 

'ንሓደ ወገን ክዝልፎ'የሞ ኣዛልፈኒ፡ኤህ ይሞንቁስካ ኢለ ክረግም ደልየ ኣሎኣኩሞ፡ኤህ ኣባህለኒ፡'  እናበለ ተሃንዲዱ ይመጻኩም ንበል።ኣጋጣሚ ኮይኑ ንስኹም ድማ ናይዚ ሰብዚ ተቓወምቲ ማለት ነቲ ንሱ ዝድግፎ ዘሎ ዓይነት ፓርቲ ተቓወምቲ ትኾኑ፡ኣራግመኒ፡ ኤህ ኣባህለኒ ክብለኩም፡ስለዝመጸ፡ዋላኳ ነቲ ንሱ ዝረገሞ ኣይትርገምዎ ምበር፡ነዚ ሰብዚ ብሕልናኹም፡ጥፍኣቱ እንተተመኒኹም፡ብናይ ልብኹም ልሳን እንዳረገምኩሞ ኢኹም።መርገምኮ ጸሎት ኢዩ፡ግን ፍንፉን ጸሎት።እግዚአብሔር በዚ ዝጸለኻዮ ፍንፉን ጸሎት ንጥፍኣትካ ክገብሮ ይኽእል ኢዪ።

ኣንቱም ወገናተይ፡ኣምላኽናሲ ተራገሙዶ ወይስ መርቑ ኢዪ ኢሉና፡ጽረፉዶ ወይስ ወድሱ፡ብዙሓት ፓርትታት ኮይንኩም ኣብዚ ዓለም በበይንኹም ንበሩ ድዩ ኢሉስ፡ወይሲ ሓደ ኩኑ፧ ንዝጸረፈካ ጽረፍዶ፡ንዝጸረፈካ ስሌኡ ጸሊ፧ ክዳንካ ንዝመንጠለካ ንስኻ ድማ መንጥሎዶ ወይሲ፡እታ ሓንቲ ክዳንካውን( እጀ ጠባብካካ ደኣ) ሕደገሉ፡ምዕጉርትኻ ንዝጸፍዓካ ጽፍዓዮዶስ ወይሲ እታ ሓንቲ ምዕጉርትኻውን ድገመኒ በሎ ኢዩ ኢሉና፧ እንታይ ኢና ንኾውን፡ዘለና፧ (ማቴ5፣39---44)

እስከ ደጊመ ክሓተኩም ዝፈትወኩም ወገናተይ።ኣምላኽና መን ኢዩ ኣቦ መርገም ዝኾነ ሰይጣንዶ ብባህሪኡ ምሩቕ ቅዱስ ዝኾነ እግዚአብሔር፧ ኣቦ ሓሶት ዝኾነ ሰይጣንዶ፡ብባህሪኡ ሓቂ ዝኾነ ክርስቶስ፡ቀታሊ ነፍሲ ዝኾነ ድያብሎስዶ፡ብባህሪኡ ሂዎት ዝኾነ ኣምላኽና ኢዮሱስ ክርስቶስ፧ (ዮው8)
ዝተጸዋዕናሉ ዕላማ ኣብዛ ዓለም ንጸልኦም ሰባት መታን ከነጥሪ ኣይኮነን።ንዝጸልኡና ሰባት ከነፍቅር እምበር።ንዝፈትወካ ተፈተኻ ሼቐጥ ኢዩ፡ምኽንያቱ ስለዝፈተወካ ኢኻ ዝፈተኻ፡ንዝጸልኣካ ምፍቃር ግን መንፈሳዊ ጉልበት ዝሓትት ጭዋነት ኢዩ።ንዝመረቐካ ምምራቕ ትያትር ኢዩ፡ንዝረገመካ ምምራቕ ግን ናይ ክርስትያን ባህሪ ኢዩ፡እስከ ካብ ሃዋርያት እንዳተራገመ ዝነብር ዝነበረ መን ኣሎ፧

ፍርዲ ክጅምር እንከሎ፡"ስለምንታይ ካልእ ኣሚንካ" ብዝብል ዘይኮነስ፡ስለምንታይ ኣማኒ እንከለኻ ከምዚ ገይርካ ብዝብል ኢዩ ዝጅምር።ክቡር ሃዋርያ ጴጥሮስ ፍርዲ በቶም ኣብ ቤቱ ዘለና ኢዩ ዝጅምር በለ።" እስመ በጽሓ ግዜሁ፡ለፍዳ ዘያቀድም እምነ ቤቱ፡ ለእግዚኣብሄር።ወእመሰ ኮነ እምሀቤነ ኣቅድመቱ ምንተ፡እንከ ይከውን ድህሪቶሙ፧ለእለ ይክሕድዎ ለወንጌሉ፡ለእግዚኣብሄር።
(1ይ ጴጥ4፥17)"

ትርጉም፦

"ፍርዲ በቶም ኣብ ቤቱ ዘለና ዝጅምር ካብ ኮነስ፡እቶም ኣብ እምነት ዘየለዉ ደኣ ከመይ ክኾኑ ኢዮም፡!"ኢሉ ኢዩ ብኣስተንትኖም፡ስለዞም፡ናይ ሎሚ ኣብ ቤቱ ዘለና ግን ከኣ ፖሎቲካ ዓጢጥና፡ብዛዕባ ግብሪ ጽድቂ ንድሕሪ ኣወንዚፍናዮ ዘለና ደቁ ዘዘኻኽረና ዘሎ።ሎሚ ዳርጋ ዝበዘሕ ሰብ ኣብ ከምዚ ዓይነት ሓሸዉየ ዝእተወ እምበር፡ጽባሕ ንግሆ ፍርዲ ከምዘሎ ፈሊጡ፡ክፉእ ካብ ኣፉን፡ካብ ልቡን ንኸየውጽእ ዝወሰነ ሰብ ኣዝዩ ዉሑድ'ዩ።እዚ ተኾይኑ ከኣ ንእግዚአብሔር እሺ ክሳብ ዘይበልናዮ ናብ ዝረግም፡መንፈስ ኣሕሊፉ ይህበና።ብፍታውና ጸግ ኣቢልናዮ ካብ ከድና ብፍታዉ ይሓድገና። እትምርቅ ቤተ ክርስትያን ኣኣብ ዘለናዮ እንዳሰደደልና ተዘይተመሊስና፡ ሊቃውንቲ ወንጌል ፈትፊቶም ዝምግቡ እንዳሃለዉ፡ምድራውያን ሰበኽቲ ፖሎቲካ ካብ መረጽና፡እወ ካብ ኣበና ደኣ ንሱ ድማ ከም ምርጫኹም ግበሩ፡ኢሉ ኣሕሊፉ ንዝረግም ኣፍን፡ልብን ይህበና። (ሮሜ1፣26) 

እምበኣር ምርጋምሲ ብልሳንካ ጥራይ ኣይኮነን፡ብልብኻውን ይርገም ኢዩ።ምሕማይ ከንፈርካ እናረምጠጥካ ጥራይ ኣይኮነን፡እንተላይ ልቢውን ትሓሚ ኢያ።እረ ኩሉ ሰናይ ኮነ ጽቡቕ ምንጩ ካብ ልቢ ኢዩ ዝፍልፍል።እግዚአብሔር ድማ፡ብደጌኻ እንታይ መሲልካ ዘይኮነስ ርክቡ ምስ ልቢ ኢዩ።

ቅድሚ ንዑኡዶ ንኻልእ ምምራጽና፡ቅድሚ ረገምቲ ምዃንና፡ወይውን ድሕሪ ረገምቲ ምኻንና፡ኩሉ-ምሉ ዝሕሸና ንሱ ኢዩ ዝፈልጥ።ድሕሪ ምውዳቕና ግን መታን ክንትስእ ኢሉ፡ ዝሕሸና ዳግመግምት መታን ክንገብረሉ ኢሉ ብውሕሉል ወንጌሉ ጌሩ ይምህረና።ኣንቱም ሰባት ቅጽዓት እግዚአብሔር ትምህርቲ ኢዩሞ ኣይነምርሮ፡ወይ ውን ብኻልእ ኣይነቕንኣዮ።ኩሉ ንዓና ኢሉ ዝህበና ዝጠቕመና እምበር ንዓና ዝጎድእ ካብ እግዚአብሔር ከቶ ከምዘይፍኖ ኩሉ ክፈልጦ ዘለዎ ሓቂ ኢዩ።ተዘይምህረናኸ እንታይ ምገበርና፡ግብረሶዶም ኣብ ኣእምሮና፡"ኖርማል'ዩ) ንኸይንብል ደጊፍና ዘሎኮ ስለዘይገደፈና ኢዩ።እምበር ፈጺሙ ተዝሓድገናስ፡ካብዚ ዘለናዮ ፈጺምና ምበኣስና።እወ ብርግጽ ተዘይተመሊስና፡ህልውናና ዝበኣሰ ዝኾነሉ ራሕቂ፡ንዮ ርሑቕ ኣይኮነን። ሰብ ጥብሕ ጥብሕ ኣቢልካ ናይ ምምብላዕ ዝጅመረሉ ግዜ ርሑቕ ዝኾውን ኣይመስልን።ኣካይዳና ከነዕሪ፡ናብ እግዚአብሔር ንመለስ።
ፈጣሪ ናብቲ ንሱ ዝደለዮ ሕይወት ክርስትና ክነቓልብ ልቦናና ክንከፍት ሓይሉ ይልኣኸልና።

ሎቱ-ስብሐት!

በቲ post ዝገበርካዮ መን ምኻንኻ ተኸሻሕካ፣

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን፡
በቲ post ዝገበርካዮ መን ምኻንኻ ፈለጥኩ፡
ኣብዚ ዘለናዮ ዘመነ ቴክኖሎጂ፡ሰብ ንሓንቲ መልእኽቲ ንምብጻሕ ቀደም ዘመን ብእግሩ፡ብምኻድ ዘበጻጽሕ ዝነበረ፡ሕጂ ብሓንቲ ሰከንድ ዝጸሓፍካዮ ደብዳበ ብዘመናዊ መሳርሒ እንክበጽሕ፡ናይቲ ዝጽሓፍካዮ ወይ ዝለኣኽካዮ መልእኽቲ ድማ እቲ ተቐባሊ ደብዳበ፡ዘለዎ ርሕቀት ብኣሽሓት ሚሊዮናት ኪሎሜተር ርሒቑ ዋላ እንተሃለወ፡ናይዛ ደብዳቤኻ ተማቓሊ ንምኻን ግን ክሳብ ኣብ ኢዱ ዝርከባ ዳርባ እምኒ እካ ኣይከድን።ኣብ ኮፍ መበሊኡ ተኾይጡ እናሃለወ፡እታ ሞባይል ደ

ብዳበ መጺካ ኣሎ፡ንኽትብል ምልክት ትገብረሉ።

ኣብ ዓድና ሓዘን እንተጋጢሙ፡ነዚ ሓዘንዚ ተማቐልቲ ኩኑ ንምባል ደብዳበ ኣይኮነን ዝጽሓፍ ነይሩ።እካድኣ ንፉዓት መእወይቲ፡ንዓዲ ምልእቲ ክንቕንቅ ዝኽእል ድምጺ ዝውንኑ እግሮም ውን ነዊሕ ጉዕዞ ከይደን ዘይርብርባ የእጋር ዘለወኦም ሰባት ተሓሪዮም ኢዮም ካብ ዓዲ ናብ ዓዲ እናኸዱ ዘእውዮ ነይሮም።ኣብዚ ሕጂ እዋን ግን ተለዊጡ፡ማስሜድያ ንብስራት ይኹን ንመርድእ ናይ ክልቲኡ ተውለ ኮይኑ ይዓዪ ኣሎ።

ቅዱሳን መንፈሳዊ መልእኽቶም ንምጽሓፍ ዝሓልፍዎ ዝነበሩ መንፈሳዊ ተጋድሎ፡በዛ ዝጽሕፈላ ዘለኹ ቅንጣብ ሞባይ ገይረ ክገልጾ ኣይክኣልኩን።ግን ቀለም በጽቢጾም ከም ብርዒ፡ቆርቦት ኣልፊዖም ከም ወረቐት፡ንቅዱሳን መጽሓፍቲ ምሉእ ይጽሕፉ ነይሮም እንተኢለኩም ዘይክትኣምኑኒ ትኽእሉ ኢኹም።ግን ናብ ገዳሞም ኪዱሞ ኣሰሮም ክሳብ ሕጂ ከይሃሰሰ ክትረኽብዎ ኢኹም።ሎም ሓደ ሰብ መንፈሳውነቱ ንኽገልጽ፡ዝጥቀመሉ ዓይነት ኣጸሓሕፋን፡ኣሳድዳ ደብዳበን ግን ኣዝዩ ዝተፈለየ ኢዩ።ቁርን ሃሩርን ከይህረም ሳሎን ከም በዓቲ፡ብቀለምን ቆርበትን ከይላዲ ከይልኪ ድማ፡ጽሒፍካላ ወረቐታ ዘይዳእ ኮምፒዩተር ሒዙ ይጽሕፍ እሞ፡ንዓባ ተላኣኸኒ፡ኣብጽሓለይ ዘየብላ send ምስ በላ ብሓቲ ረምታ posted ትብሎ።

ኦ እግዚኣብሄር ኣዝዩ ዝፈትወኩም ወገናት፡በዚ ሎሚ ንገብሮ post መንነትና ይኽሻሕ ኢዩ። ብዙሕ ግዜ ኣብ facebook ሰብ add ይብሉኒሞ፡መን ክብል ኢለ ክሓቶም እንከለኹ፡በቲ ዝሰደድካዮ ስለዝተሳሕብኩ ኢየ add ዝበልኩኻምበር ኣይፈልጠካን ኢየ፡ዝበሉኒ ብዙሓት ኣጋጢሞምኒ ኣሎዉ፡ገሊኦም ድማ በቲ ዝረኣይዎ ተቖጢዖም "ድሕሪዛ ሕጂሞ ከምኣ ግበር ኢኻ፡block ክገብረካ ኢየ እናተባሃሃሉ ንሓድሕዶም ብናይ ምፍርራሕ እምኒ ክሰናደዉ፡ነዘን የእማን እዚኤን ኣብ commet በጨቕ ኢለን ይረኣያ ኢየን።ኣብ ገለ ኣጋጣሚታትውን፡ገጾም ብሓዘን ከሰል መሲሉ እንክረአ ናይ መልቀስ ግምጃ ለቢሶም፡የልቅስ ኣሎኹሞ ኣላቑሱኒ ንኽብሉ ጸሊም ካባ ገይሮም profile ጥፍዕ የብልዎሞ፡እቲ ኣብ ርሑቕ ዓዲ ሰፊሩ ዘሎ ወገን፡ነዚ ርእዩ መልቀስነቱ ንኽገልጽ R,P ኢሉ ይጽሕፍ።ኣልቂሱ ድዩ ኣየልቀሰን፡አይ አይ ኢሉ ድዩ ኣይበለን ግን እግዚኣብሄር ዋንኡ።ኣብ ካልእ ዓውዲ ድማ ኣብ ኣእሙራዊ ስነኪናት ተመኩሮ ዝወሰዱ ዝመስሉ፡ኣብዚ ክስቶ ዝብሃል ዓዲ ከምዚ ኮይኑ፡ሃገረ ክስቶ ከምዚ ገይራ፡መንግስቲ እገለ ከምዚ ገይሩ ዝብል ወረ ንግሆ ንግሆ መመጽኡ ይረኣየናሞ፡ልብና ነዚ ርእያ ውላዳ ከምዝጠፈአ ሰበይቲ ከብድና ብፍርሒ ይሕቆን።

ኣብዚ ስነ ሞገተ ዘለዎ ዓውደ መራኸቢ ብዙሓን፡ኣብ facebook፡ኣብ viber፡ኣብ wasap፡ኣብ imo,ወዘተ እንሰዶም ደብዳቤታት እንታዎት ምኻንና ንመን ከምንመስል፡ዝነግሩ ንምስልና ቁልጭ ኣቢሎም ንምሉእ ዓለም ዝነግሩ መስቲያት ምኻኑ ብሩህ ኢዩ። ስእሊ post ምስተባህለ "እዋእ ወዲ ኣገለሲ ክንድምንታይ ኢዩንታ ኮይኑ፡ክላእ እዛ ጋልዚኣ ከኣ ምስ ክንደይ ኣወዳት ኢያ ወደይ ክትስኣል፡ኣቤት ጥራሕ ዝባና፡ሓለፍና ክብላስ ሞጎጎ ይዓጥና ኮይኑ፡እዚኣስ ሕጂ ሕጂ መጺኣስ ድሮ ናይ ዓዳ ሓመድ እካ ዘይነገፈትሲ ኣብዚ መጺኣ ጥራሓ ክትሰኣል፡እነሆለ እቲ ኣብ ዓዳ ዝነበረ ጭውነታ ኣፍ ኣውጺኡ ጭዋ ጋል ጭዋታት ምኻና እንዳመስከረስ፡ነዚ ክትቃወም እንክትብል ብባርነት ሓጥያት ዝተኣሰርኩ፡ንሓጥያት ዝተሸጥኩ ኢየ ኢላ ሕፍረታ ቀሊዓ ብስእሊ ከተርእየና፡" እንዳበልካ እተማርረሉ፡ምስሊ እታ ሰብ መን ምኻና በቲ post ዝገበረቶ ስለዝገምገምካ ኢዩ።ብኻልእ መዳይውን ኣይ "እዚኸኣ እዝኑ ተሰቒሩ፡ስሪኡ ማዓኮሩ እንዳተራኣየ፡ሽጋራ ኣብ ኢዱ ጨቢጡስ ንመን ክመስል ስለዝደለየ ኢዩ፡ኣብ ዓዱ ደኣ ከምኣ ዘይገብር ዝነበረ፡ወይዚ መዋረዲ ስድሩኡን ሃገሩን እባ ኣዋሪዱ፡ኣዋሪዱና!" ኢላ ልብና ቅሬታኣ እትገልጸሉ ኣጋጣሚታት ኣሎ። ስለምንታይ ኢዩ እንተ ኢልና፡እቲ post ዝተባህለ ምስሊ ልቢ ናይቲ ሰብ ዓው ኢሉ ስለዝዶርጉሓልና ኢዩ።

ወገናተይ፡መቸም ጽቡቓት፡ዉርዙያት፡ለባማት ተባሂልኩም ብኣምላኽ መታን ክትነኣዱ እምበር፡ብሰባት መታን ክትውደሱ ኢልኩም ከምዘይትገብሩ ግምት ኣሎኒ።የግዳስ እቲ post እንገብሮ ኣብ ምሉእ ዓለም ተዘርጊሑ ብዛዕባና ዘውሪ ዓቢ ድምጺ ምኻኑ ክንፈልጥ ኣሎና።post ዝገበርናዮ ሕማቕ እንተኾይኑ ቀዳሞት ተነቀፍቲ ንሕና ኢና፡post ዝገበርና ሰናይ ተኾይኑውን ቀዳሞት ተነኣድቲ ንሕና ኢና።ነዚ ቅሬታ ተሰሚዑ ነቐፌትኡ ዝዱርጉሕ ድማ ቀዳማ ምይ መን ኢዩ፧ ኢልና እንተሓሲብና፡ሰብ ኣይኮነን።ብዝገበርናዮ ሰናይ post ኣገናዕ፡ከመይ ዝበለ ደስ ዝብለካ ሰብ ኢዩ ወደይ፥ኢሉ ዝንእደናውን ሰብ ኣይኮነን።ሰብ post ምስ ገበርናዮ፡እሞድማ ምስ ኣምበቦ ወይ ምስረኣዪ ኢዩ፡ዝንእድን ዝነቅፍን እምበር post ከይገበርናዮ ክፈልጦ ኣይክእልን።ገና post ከይበልናዮ ኣብ ልብና ጽሒፍናዮ ዝጸናሕና፡ገና ናብ ዓለም ከይተዘርግሐ እንከሎ፡እረ ገና ኣብ facebook login ከይበልና እንከለና እንታይ post ክንገብር ምኻንና ኣምቢቦ ዝፈልጥ ግን እግዚኣብሄር ኢዩ።ስለዚ በቲ ገና ክንገብሮ ዝሓሰብና ክፉእን ንሰባት ቅሬታ ዘስምዕን፡ገና በገንኡ እግዚኣብሄር ይሓዝን።በቲ ክንሰዶ ዝሓሰብና ሰናይ ነገርውን ገና ከይሰደድናዮ እንከለና ኣገናዕ እንዳበለ ይሕጎሰልና።

ክብሪ ምስጋና ንዑኡ ይኹን።እሞ ወገናት ምስልና ርእዩ እግዚኣብሄር በቲ ክንገብሮ ዝሓሰብና ከይነቕፈና ዘንቅፍን ንሕልና ዘነውርን ደብዳበ post ኣይንግበር።በቲ ዝገበርናዮ ርእዮም ሰባት ኣብ comment ናይ ምርጋም እምኒ ከይስንድውልናውን እንገብሮ ኩሉ ንጠንቐቕሉ።

ስብሀት ለእግዚኣብሄር ሰብሀት ለማርያም ኣመ ኣምላክ፡ስብሀት ለቅዱስ መስቀሉ ኣሜን።