ሰላም፣ ንምዕቃባ ይኸብድ!

በስመ ኣብ ወወልድ ወመንፈስ ቅዱስ አሐዱ ኣምላክ ኣሜን!

ኣምላኽና እግዚኣብሔር ኢዩ፣ሰላምና ፈጣሪ ኢዩ፣መንገድና መንገዲ ፈጣሪ ኢዩ፣ጉዕዞና ካብ ምድሪ ናብ ሰማያት ደኣምበር፣ካብ ዓዲ ናብ ዓዲ ኣይኮነን፣ነዊሕ ጉዕዞ ይጽበየናምበር፣ ገና ጉዕዞና ኣይወዳእናን።ብርግጽ እንናፍቖ ዝነበርና ሰላም ኣሎ፣እንጽበዮ ዝነበርና ጡዑም ኣየር ኣሎ፣ብጸሎት ዝነባዕናሉ ራህዋ ኣሎ፣እናሻዕ ዝተማጎትናላ፣ክንውንናሞ ኣብ ጎጆኣ ክንውጣሕ፣ብእንግዶኣ ክንሳሲይ፣ተበታቲኑ ዝነበረ ቤተሰብ ክተሓቓቖፍ፣ተረሓሒቆም ዝነበሩ ማሕበራት፣ትካላት፣ሃይማኖታት፣ፖሎቲከኛታት፣ምሁራን፣ ሓረስቶት፣ጛሶት፣ተረኽቲ ክተሓቓቖፉሞ፣ዝነበሮም ዓጸቦ ናይ ሰላም ብምትሕቑቓፍ ክዕንገሉ፣ዝነበሮም ጽምኢ ራህዋ ብውህደት ክረውይሉ፣እንተስ ብሕብረትን ብማሕበራትን ወይ ብጉጅለታትን፣ወይ እንተስ ምስ ውሽጢ ገዛእ ርእሲ ወይ ምስ ግሊ፣ከቢድ ምጉት ዘካየድናሉ ስለዝኾነ፣ከም ውጺኢቱ እነሆ ኣብ ቅድሜና ተኾይጡ።እታ ክንዮ ማዕዶ እንጽበያ ዝነበርና ሰላም ቅርቢ ኮይናትልና እነሃ፣ክንድዚ ዝኣክል ርሒቓ ዝነበረት ብውልቂ ይኹን ብሕብረት ዝተመነናያ ሰላም እነሃ ቀሪባ።ክንዮዚውን ኣሎ።ሰማያዊ ሰላም፣ኣምላኻዊ ሰላም፣ሕምስምስ ኣልቦ ወትሩ ብደስታ ዝተኸለለ ዓለምውን ኣሎ።ፈጣሪ እንታይ ይሰኣኖ፣ክንዮ ኣእምሮና ዝምጦ ሰላም ክህብ፣ክንዮ ሕልና ዝኾነት መንግስቲ ከውርስ እንታይ ይሰኣኖ!

እሞ እንታይ ንግበር፣-ዮና1፣11

ዓወታት ንምምስራቶም ዘይኮነስ ንምዕቃቦም ይኸብዱ።ከምቲ ህውከታት ንምጉንጻፍ ተበጃውነት ዝሓቱ፣ሰላም ንምዕቃባውን ተበጀውቲ ትደሊ ኢያ።ደጊም ቶባእ ስንፍና ኢሎም ርእሶም ዝገትኡ፣ነፍሶም ዝፈርዱ፣ንዓይ ናብቲ ባሕሪ ደርብዩኒሞ ሰላም ክሰፍን ኢዩ ዝብሉ፣በዳሊ ንስኻትኩም ዘይኮንኩስ ኣነ ኢየ ኢሎም ብትብዓት ገዛእ ርእሶም ዘድንኑ ተበጀውቲ ትደሊ ኢያ ሰላም።ኣብዛ ዓለም ብጅግንነቶም ዝፍለጡ ብዙሓት ክጥቀሱ ይከኣሉ ኢዮም።በንጻሩውን ብጭካነኦም ዝውቀሱ ኣዝዮም ውሩያት ውን ዓለምና ትውንን ኢያ።ክሳብ ሕጂ ተወዳደርቲ ዘይረኽቡ ግን እቶም ገዛእ ርእሶም ዝወቕሱ ኢዮም።እቶም ገዛእ ርእሶም ዝፈርዱ፣በቲ ምቕሉል ተበጃውነቶም ነታ ተራር ልቢ ናይ ወድሰብ ብጣዕሳ ከምትምርከኽ ክገብሩ ዝኽእሉ፣ውሽጣዊ ናይ ሰላም ድርዒ ዝዓጠቑ፣ክሳብ ሕጂ ተወዳደርቲ ዘይረኸቡ ኢዮም።ኣብ ዓለምና፣ናይ ኩዕሶ፣ናይ ጉያ፣ናይ ሞያ ወዘተ ዓመት መጸ ዋንጫ መን ወሰደ ውድድር ይካየድ ኢዩ።ናይ ገዛእ ርእስኻ ምውቃስ ዝምልከት ውድድር ግን ዓለምና ከተሳትፍ ኣይከኣላን ኢዩ።ምኽንያቱ እዞም ገዛእ ርእሶም ዝወቕሱ ሰባት፣ዋላ ነቶም ኣዋዳደርቲ ከይተረፈ ስለዝስዕርዎም፣ክወዳደሮም ዝኽእል ጥራይ ዘይኮነስ፣እንኮላይ ከወዳድሮም ዝከኣሎ ዓለም ኣብዛ ባይታዚኣ ዘይምዃኑ'ዩ።ናይዚ ጽሑፈይ ኣፈ ሙዙ፣ነዚ ኣብ ወጻኢ ኮይኑ፣''እገለ ከምዚ ኢዩ፣እገሊት ከምዚ ኢያ፣''እናተባሃሃለ ንሓድሕዱ ክወቓቐስ ዝሓገየ ኤርትራዊ ብሓፈሻ ድማ ሕብረተ ሰብ ዓለም፣ርእሱ ከድንን፣'ኣነ ኢየ በዳሊ፣ይቕረ ግበረለይ'፣ተባሃሂሎም ገዛእ ርእሶም ስለሰላም ክብጀውን ንምባል ኢዩ ተጻሒፉ።ሰላም ተበጀውቲ እምበር፣ኣበጀውቲ ኣይትደልን ኢያ፣ሰላም ደነንቲ ደኣ እምበር ኣንቃዕረርቲ ኣይብርህዋን ኢዮም፣ሰላም ልሳኖም ዝኸንሸቡ እዱባት እምበር፣ሴፍን ጉራዴን ሒዞም ብጭካነ ንሓድሕዶም ዝከናሸቡ ኣይሰማምዕዋን ኢዮም።

ኣብ ሓንቲ ንባሕሪ ተርሴስ ክትስንጥቕ እትህንጠ ዝነበረት መርከብ ዝተሳፈሩ ተጎዓዝቲ፣ሰንኪ ናይ ሓደ ነብይ ዘይምእዛዝን፣ሰንኪ ናይቶም ዋናታት እታ መርከብ ኣምልኾ ጣዖትን፣ፈጣሪኦም ቁንጣሩ ተግሳጽ ፈነዎሎም።በዚ ድማ ባሕሪ ኣፍ ኣውጺኡ ''ሃየ ተናዘዙ፣መን ኢዩ በዳሊ፣መን ዓማጺ፣መን ኢዩኸ ስለሰላም ክብል ርእሱ ዘበጁ'' ዝብል እንክመስል፣ብማዕበላቱ ገይሩ ክጥሕሮም ደለየ።ነዛ ግሳጼ እዚኣ ቀልጢፉ ዘላለያን፣መፍትሒ ዝረኸበላን እቲ ኣይእዘዝን ዝበለ ነብይ ነበረ፣ነብይ ዮናስ።ዓንተቦኡ ''ኣይእዘዝን ኣይለኣኽን'' ኢሉ ዝነበረ፣ሕጂ ግና ባዕሉ ክብጆ መረጸ።ሰላም ንምውሓስ ምብጃው ይሓትት ምኻኑ ኣዳዕዲዑ ይፈልጥ ኢዩ።ነብይ ዮናስ ጽላሎት ክኾውን በቐዐ፡ ክርስቶስ ድማ ፈጻሚኡ።ነብይ ዮናስ ዘውሓሳ ሰላም ቁንጣሮ፣ንባሕሪ ተርሴስ ንምስጋር ጥራይ ነበረት፣ክርስቶስ ግን ረቂቕ ድልድል ሰሪቱ፣ሰማያዊ ዜግነት ሂቡ፣ናብ ሰማያት ዘአቱ ፓስፖርት መጢዩልና ከደ።እዛ ሰማያዊት ቪዛ እዚኣ እንክትበላሾ ዝዕረየሉ ባይታ ኣጣጢሕልና ስለዝኾነ ሰማያዊት ሰላም ኣብ ኢድና ኢያ።እምበርከ ክርስቶስ ሰላም ንምውሓስ ገዛእ ርእሱ ክውፊ ስለዝመረጸ ኢዩ።

እምበኣር፣ብነኣሽቱ ነገራት ዝተቃሓሓራ፣ማሕበራት፣ኣብያተ ክርስትያናት፣ፖሎቲከኛታት፣ሕብረተ ሰባት ወዘተ ወዘተ፣ ሰላም ተበጀውቲ ስለዘድለይዋ፡ ድምጻ ዓው ኣቢላ ትእውጅ ኣላ።''በደልካ ተናሳሓሉ'' ዝብሉ ዘይኮነስ፣''በደለኛ ኣነ ኢየ'' ኢሎም ገዛእ ርእሶም ዝወቕሱ ኣውሓስቲ ሰላም ትደሊ ኣላ ሰላም።ፍልልያት ክህልዉ ግድነት ኢዩ፣ንኽልቲኣትኩም ተታረኽቲ ኣብዛ ዓለም ናይ ንስሓ ዕድመ ዝውስኸልኩም ዘሎ ፈጣሪኹም ኢዩ።ስለዚ ንስኻትኩም ደኣልኩም ዘይተፋቐርኩም እምበር፣ፈጣሪኹምሲ ንኽልቲኣትኩም የፍቅረኩም ኢዩ። ነዛ ሕንጫልን ሕንጢትን ዝኾነት ሰላም ደልዲላ መታን ክትረግጽ፣ተሰማሚዖም ዘዕብይዋ፣ዘጎብዝዋ ስሙራት ስድራ ትደሊ ኣላ።ደጊም ልሳንና ናይ ይቕሬታኣ ትርሺ እትትኩሰሉ እምበር፣ናይ ጽልኢ ቃላታ እትውርውሮሉ እዋን ኣይኮነን።ናይ ቶኽሲ ቃላት ኣብቂዖም ዓውደ ክርክር ብዓውደ ልዝብ፣ምዝንጣል ብምክብባር፣ምትሕምማይ ብምትእርራም፣ምትኹታኽ ብምትሕቑቓፍ፣ቂምታ ብይቕሬታ ዝትክእሉ እዋን ድሮ ኣኺሉ'ዩ። ተፈጥሮና እነመስግነሉ ግዜ ካብ ሕጂ ንንላዕሊ ዕድል የለን።

ሰላመይ እህበኩም ኣሎኹ፣ዮሓ 14፣27

ንምኻኑ ንሕና እዞም ንሰላም እንሽትታ ዘለና ሕብረተሰብ፣ ህዝበ ክርስትያን ድማ ብፍላይ፣ምንጫ ካብ ላዕሊ ምዃኑስ ከመይ ዘንጊዕናዮ፧ ኣብዛ ዓለም እንምጠዎ ሰላም፣ካብ ሰማያት ተጨሊፉ ዝመጸ ቁንጣሮ ምዃኑስ ከመይ ተሰዊሩና፣ነቲ ካብ እግዚኣብሔር ዝፍኖ ዘሎ ሰላም ዘይኮነስ፣ንባዕሉ ንእግዚኣብሔር ክንሃርፎዶ ኣይኮነን ዝቕድም ነይሩ፧ክርስትያን ማለት ምድራውያን ሰማያውያን ኢዮም።ኣብ ምድሪ እንከለዉ ሕልነኦም ኣብ ሰማያት ዘሎ ነገራት እናሰላስሉ ዝነብሩ፣ንናይ ምድሪ ሰላም ምስቲ ሰማያዊ ሰላም ከየዳረጉ፣''ነታ ኣብ ሑቕፎኻ ዘላ ሰላም፣ነታ ንዓና ኢልካ ዘዳለኻያ መንግስቲ ንምውራስ ከመይ ክንውንና ንኽእል፧ከመይ ዓይነት ሰባት ኢዮም ዝኣትውዋ፧ኣብ ቤት መቕደስካ ዝነብር መን ኢዩ፧ኣብ መሕደሪኻ ዝሓድሩኸ እነመን ኢዮም፧'' ኢሎም ስለ'ዛ ዘላ ቁንጣሮ ሰላም ዘይኮኑስ፣ሰለ'ታ እትመጽእ ሰማያዊት ሰላም እንዳለመኑ ዝነብሩ፣በዚ ኣብዚ ዓለም ዘሎ ጸበባ ዘይሽገሩ እኳ ደኣ ብሓጎስ ዝቕበልዎ፣በዚ ናይዛ ዓለም ሰላም ድማ ከይተዓሻሸዉ፣ስለቲ ቀንዱ ክዓዩ ዝነብሩ ኢዮም ክርስትያን።ከመይ ኴንና ደኣ ተጸበይቲ ሰማያዊት ዓለም ክንስና፣ምድራዊት ዓለም ክሳብ ክንድዚ ከምእንቀሓሓር ገይራትና፧ ከመይከ ኣብ ምድሪ ዝቕመጡ ሰማያውያን ክንስና፣ምድራዊ ነገራት ክሳብ ክንድዚ ከምእንጨኻኸን ገይሩና፧ዓለምኮ ከምታ ጥራሕና ዝመጻናያ፣ክንከይድ እንከለናውን ንብረታ ክንወስደላ ኣይትደልን ኢያ።ዝና፣ሃብቲ፣ፍልጠት፣ክብሪ ቁንጅና ኩሉ ኣብዛ ዓለም ኴንና ዘጥረናዮ ስለዝኾነ፣ክትምንጥለና ስምና ከይተረፈ ተቐይሩ ሬሳ ዝብል ሳጓ ኣጠሚቓ ክትውሕጠና ምኻናስ ከመይ ዘንጊዕናዮ፧ በሉ ንሱ ፈጣሪ ሰላሙ ንምምጣው ኣእዳዉ ዝርጉሓት ኢየን።ነዛ ሰላም'ዚኣ ጅማሬ እፎይታኣ ካብ ውሽጥና ኢዩ ዝጅምር።ሰላማዊ ሰብ ንምኻን፣መጀመርያ ምስ ገዛእ ርእስኻ ተዓረቕ።ሽዑኡ እቲ ንናይ ገዛእ ርእስኻ ሰላም ንምውሓስ ክትብል ዝኸፈልካዮ ዋጋ፣ንቤትካ፣ማሕበርካ፣ሃገርካ፣ሕብረተሰብካ ምሉእ ሰላም ንኽሰፍን ዝከኣሎ ዋጋ ካብ ምኽፋል ኣይክትደሓርሕርን ኢኻ።ትጸልኦም ሰባት ተሃልዮምኻ ንሳቶም መጺኦም ይቕሬታ ክሓቱኻ ኣይትጸበ።ዝተቐያየምካዮም እንተልዮምውን ምእንቲ ሰላም ክትብል ተበጃዊ ኩን'ምበር፣ተበጃዊ ኣይትድለ።

እግዚአብሔር ኣምላኽና፣ኣብ ውሽጥና፣ኣብ ከባቢና፣ሃገርና፣ህዝብና ኩሉ ዓለምና ሰላሙ ከስፍነልና ቅዱስ ፍቓዱ ይኹን።
ወስብሐት ለእግዚኣብሔር!

ስለሰማእታት ኤርትራን ስእላዊ ገለጻ ናይ ሎሚ ደቆምን!

በስመ ሥላሴ

ዝኸበርካ ኣንባቢ፣እዚ ጽሑፍ፣ ንነፍሲ-ወከፍ ልቢ ኤርትራዊ፣ ስምምዓዊ ፍቕሪ ዝጽውዕ መቓልሕ እምበር፣ ዝኾነ ይኹን ፖሎቲካዊ ወይ ወገናዊ ጽግዕተኝነት ተገይሩ ዝተጻሕፋ ከምዘይኮነ ኣቐዲመ ክነግር ይፈቱ።

ሰናይ ንባብ...

ጽሓይ ካልኦት ንኸብርቑ፣ጽሓዮም ብፍታዎም ኣዕሪቦም፣ከባቢኦም ብነበልባል እሳት ተኸቢቡ፣ሰማይ ናፓልን ብኢደ ሰብ ዝተሰርሐ እሳተ ጎሞራን ዘኒቡ፣ሓዳርን ናብራን ይጽናሓላና ብምባል፣ ኣብ ትማሊ ኮይኖም፣ ንሎሚ ኣወንዚፎም  ስለሎሚ ሓሊፎም።ኤርትራ እትበሃል ምድሪ ካብ ታሪኽ ዓለም ክትሕክኽ ብወግዒ ተኣውጁ ንዝነበረ ኢፍትሓዊ ኣዋጅ፣ብተበጃውነቶም ህልውነኣ ቀጻልነት ከምዝህልዎ ገይሮም።በብዘመናት ዝተበገሱ ሓይለ ዓለማት ናይዛ ምድሪ፣ነቲ ብሃይማኖቱን፣ቅዱው ስነ ምግባሩን ዝፍለጥ ዝነበረ ብኹሉንትኑሁ ሕፉር ህዝቢ ኤርትራ፣ኣፉ ተለዂኹ፣ኣስቃጢ ኮይኑ ንክተርፍ፣ባህሉን ሃይማኖቱን ተበሪዙ፣ክቡራን ልምድታቱ ብባዕዳውያን ብፍታዉ ንኽውረር ኣሕሊፉ ክህብ፣ኩላቶም ገዛእቱ በብእብረ መመጺኦም ኣግባዕቢዖምሉ ምንባሮም ናይ ቀረባ መዛግብቲ ታሪኽ ዝትርኾ ሓቂ ኢዩ።

ንዘመናት ተቐቢሩ ዝነበረ ታሪኽዛ ምድሪ፡ ታሪኽ ኤርትራ፣ሎሚ ተፋሒሩ ናብ ዓለም መታን ክዝርጋሕ፡ ንሳቶም እዞም ሳማእታታ ናብዛ መሬት ክቕበሩ በረኻ ወጹ።ኣብዛ ምድሪ ነጊሱ ዝነበረ ልበ-ስሱዓዊ ስምዒት ተፋሒቑ፣ እዚ ናይ ሎሚ ትውልዲ 'ንስኻ ንበር ኣነ ግን ኣብ ክንዳኻ ክሓልፍ'የ' ዝብል ካሪክለም መታን ክለማመድ፣ታሪኾም እናሻዕ ዓመት መጸ ይትረኽ ኣሎ።መዓልቲ ስውኣት ኤርትራ 20 ሰነ። ሽምዓ ዋና ቀማሚት ናይቲ ታሪኽ ኮይና ስለዝተረቖሐት ድማ፡ ዓመት መጸ "ከምዛ ሽምዓ ስለ ህልውና ህዝቢ ኤርትራ ሰብነቶም ኣብምኪኾም፣ብርሃን ኣንጸባርቖም" እናተባህለ ይዝንቶ ኣሎ።ኣብዚ መዓልቲዚ ልዕሊ ካዕበት እንግረመሉ ነገር ኣሎ፣፣ እዚ ኸኣ ዕላምኦም ኢዩ። እዞም ስውኣትና ኢልና ብልብና ሃገራዊ ክብሪ እንህቦም ኣቦታትናን ኣያታትናን፣ ኣብ ግዜ ፖሎቲካዊ ቃልሶም፣ኣብ መንጎኦም ብዙሕ ፍልልያት ነይርዎም እናሃለወ'ዩ።ሃይማኖት፣ግላዊ ኣረኣእያ፣ ስነ-ኣእምሮኣዊ ኣተሓሳስባ፣ ቤተሰባዊ ክብሪ፣ ዓሌት ቋንቋ፣ እንዳ፣ ሃብቲ፣ ዝና ወዘተ።ነዞም ፍልልያት እዚኣቶም ጸይሮም፡ እረ ኣብ ገለ ገሊኡ ዓመታትሲ፣ናብ ከቢድ ውግእ ሕድሕድ ክሳብ ዘብጽሕ ፖሎቲካዊ ጎንጺ ገጢጥምዎም እኳ እንተነበረ፣ ነቶም ረዘንቲ ፍልልያት ንድሕሪት ኣወንዚፎም፣  እቲ ከሰማምዖም ዝኽእል ናይ ሓባር ነጥቢ ጥራይ ቅድመ ኲነት ብምሕሳብ፣ስለጉዙፍ ሓባራዊ ዕላማ ክብሉ ብመስዋእቲ ሓሊፎም።

ኣብ ሎሚ ዘሎ ህዝቢ ኤርትራ ግን፡ ኣብ ሓድሕዱ ዕቡጥ ቅሬታ ዘለዎም መሲሉ ይረአ እነሀ። ኣብ ውሽጢ ይኹን ኣብ ደገ ዝቕመጥ ህዝቢ፡ ኣብ ክንዲ ብዛዕባ እቶም ሓደ ክገብርዎ ዝኽእሉ ጉዳያት ዓቲቦም ዝዝትዩ፣ ቅድመ ዝኣገረ፣ብዛዕባ ፍልልያቶም ክላዘቡ ክብሉ፣ ከይተላዘቡ ጽዓይ ትዓርቦም ኣላ።ሰብ ምስ ሰብ ክረዳዳእ እንተኾይኑ፣ ቅድም ብዛዕባ'ቶም ሓደ ክገብርዎ ዝኽእሉ ነገራት ብዕምቆት ክላዘብ ኣሎዎ።እምርከስ ኣብ ነፍስ-ወከፍ ፍልልያት፣ ዕቡጥ ጓህሪ ተቐሚሩ'ሎ። ምይይጥ ብዛዕባ ፍልልያት ጅምር እንክብል ድማ፣ እዚ ዕቡጥ ጓህሪዚ ተተኲሱ ይወጽእ'ሎ። ሽዑ ፍቕሪ ከምጽእ ዘይኮነስ፣ ነታ ዝነበረት ቁንጣሮ ፍቕሪ እኳ በኣጋ ኣንፊጹ፡ ትርኑዕ ጽልኢ ኣብ መንጎ ህዝብታት ከምዝትከል'ዩ ዝገብር። ይተከል ድማ ኣሎ፡ እነሆ ካብ ዝትከልውን ዓመታት ፈሊሙ'ሎ!

እምበኣር ኣብ ውሽጥን ወጻእን እንነብር ህዝቢ ኤርትራ፣ ፍቕሪ ንኹሉ ሕብረተ-ሰብ ከተሰማምዕ እትኽእል እኽልቲ ቋንቋ እያ። እሞ ውሽጣዊ ይኹን ደጋዊ እምነትና ከይተተናኸፍና፡ ኣብ ዘራጽሙና ነገራት ድማ ከየድሃብና፡ ስለቲ ብመገድና ክውለድ ዝኽእል ትውልዲ ክንሓስብን ባይታ ክንፈጥርን መታን ክንክእል፡  በብክእለትና ስለፍቕሪ ንምከር።

ስለፍቕሪ ልዝብ ንምግባር ድማ፣ምዕራፍ ሓደ በቶም ዘሰማምዑና ነገራት ምጅማር'ዩ ዘድሊ። ንምሳሌ፡ ካብ ሓንቲ ማህጸን ዝወጹ ክልተ መንእሰያት፡ ክልቲኣቶም ዘይሰማምዕሉ ብዙሓት ነገራት ክህልዉ ባህርያዊ ኢዩ። ክንዮ'ዚ ውን፡ ክልተ ኣሕዋት ንኣከባብያውን ውሽጣውን ኣተሓሳስባኦም ዝምልከት፣ 100% ተሰማሚዖም ካብ ዝነብሩ፣ ፍልልያት ክህልዎም ይምረጽ።ንኣብነት ቻይናን ኣሜሪካን ፍልልያት ተዘይህልወን ውድድር ኣይምገበራን፣ ሩስያን ጀርመንን 100% ስምምዕ ተዝህልወን ናብዚ በጺሐንኦ ዘለዋ ምዕባለ ኣይምበጽሓን። ፍልልያት ንብልሒ እምበር፣ንጎንጺ ኣይኮኑን ዝጠቕሙ።ሓሙሽቴአን ኣጻብዕተይ በበይኑ ቁመት ድኣ ይሃልወን እምበር፣ ፍልልያተን ጸይረን ይምግባኒ ኣለዋ። በቲ ዝህባኒ መግቦት ድማ ንዓይ ጥራይ ዘይኮነስ፣ ንናይ ገዛእ-ርእሰን ህላወ'ውን ዓቢት ተራ ኴንወን ኣሎ። 

እምበኣር ነዞም ፍልልያት እዚኣቶም ብፍቕሪ ክትጥቀመሎም እንተሃቂንካ፣ ፍልልያት ንዕቤት ዘእንፍቱ መራሕቲ ቀስቲ ይኾኑ። ክልተ ኣሕዋት ክልተ በበይኑ ሓሳባት እንተሃልይዎም፣ በቶም ዘሰማምዑ ነገራት ግን ስለትሳማማዕ ልዝብካ ክባተኽ ግቡእ ኣይኮነን። ዘይተሰማምዕ ሓንቲ ነጥቢ ስለዝተረኽበት ጥራይ፣ ነቲ ገዚፍ መሰማምዒ ድልድል ክተፍርሶ ክትብል ኣብ ሓድሕድካ ከቢድ ክሳራ ኢዩ ዝፍጠር። እወ ዕድሜኻ፡ ፍልጠትካ፡ ሕውነትካ፡ ፍቕርኻ፡ ሃገርካ ትኸስር። ድማ ዘይምስምማዕ ኣባና ኣብ ብዙሓት ዝተጀመረ ኣይኮነን። ኣሽንካይዶ ንሕና ብቑጽሪ ሚልዮናት ደቂ ሰባትሲ፣ እቶም ሒደት ኣዳምን ሄዋንን'ኳ፡ ሓደ ኮይኖም ክሰማምዑ ኣይተኻእሎምን። ነዛ ብኮ መዝሚዙ ድማ ሰይጣን፣ ጨሪሶም ተበቲኖምሉ ዝነብሩ መገዲ ንምንዳይ ኣይተጸገመን። ሰንኪዚ ከኣ ዝነበሮም ክብሪ ክንፈጎም ክኢሉ።

ካልእ ኣብነት፣ ኣሽንካይዶ ንሕና ከም ኣብ ምድሪ እንነብር ሰባትሲ፣ኣብ ውሽጢ ማህጸን ዝነበሩ፡ ያዕቆብን ኤሳውን'ውን  ክሰማምዑ ኣይከኣሉን። ንሕናስ ኣብዛ ዓለም ክሳብ ቴስዓ ዓመት ንምምባር ፍልልያት ከነምጽእ ግድነት'ዩ። ያዕቆብን ኤሳውን ግን፡ ካብ ማህጸን ክሳብ ዝወጹ፡ ንትሽዓተ ኣዋርሕ ጥራይ ተዋሂብዎም ከብቅዕ፣ ብምድፍፋእ'ዮም ግዜኦም ኣሕሊፎሞ። ኣማሲኡ ድማ እቲ ኣብ ፍልልያት ጥራይ ኣተኲሮ ምግባር፡ ድሕሪ ልደቶም ስለዝቐጸልዎ፣ ክሳብ ዓመታት ተረሓሒቕዕም ብሕኒን እንዳተጠማመቱ ኣሕሊፎሞ። መወዳእቶኦም ደኣ ፍቕሪ ኣሰኒፋቶም'ምበር።እወ  ፍቕሪ ኣብቲ ስግር ሩባ፡ ተሓናኒቕቖም ክቃተሉ ዘይኮነሲ፣ ሕንቕንቕ እናሎም ተሓቛቚፎም ከም ዝሰዓዓሙ ገይራቶም።

ስለዚ ካብቶም ገዘፍቲ ኣሰማማዕቲ ነገራት ዝበሃሉ ናይ ሓባር ቋንቋታትና፡ ቊጽሪ ሓደ ፍቕሪ'ያ። ፍቕሪ ንዂላቶም ፍልልያት ከምትጸውር እትገብር ገዛፍ እምባ ኢያ። ብጽልኢ ቂሒሩ ዝነበረ ልቢ፣ ፍቕሪ ከተራጋግኦ እኹል ዓቕሚ ኣሎዋ።ፍቕሪ ሃይማኖት ወይ እምነት፣ ሕብሪ-ቆርበት፡ ሃብቲ፣ ዝና፣ፖሎቲካ፣ ገዛውቲ፣ ዓሌት፣ ቋንቋ፣ ባህሊ ወዘተ ኣይትፈልን ኢያ። ሰብ ንዘበለ ኲሉ ብዘይኣፋላላይ ከተፍቅሮ ከምዘለካ፡ ተፎጥሮኣዊ ግዴታ ሒዛ እትርከብ ኣርማ'ያ ፍቕሪ።ስለዚ ንስኻ ከም ሰብ ንሰብ ተፍቅር እንተኾይንካ፣ ነቲ ካብ ኣተሓሳስባኻ ዝተፈልየ ኮይኑ ዝተረኽበ ሰብ፣ ሓሳባትካ ንምግላጽ እትጥቀመሉ ቅማሜ ፍቕሪ ዝመለኦ፣ንዕቀት ዘወገደ እንተዘይኮይኑ፣ ዋላ ንስኻ ቅኑዕ ሃሉ፣ቅንዕናኻ ንዑኡ ዋጋ ኣልቦ ኴኑ ኢዩ ክረኣዮ።ንሱ ጥራይ ከይኣክል ድማ፣ኣባኻ ገዚፍ ጽልኢ ንኸሐድር ባይታ ትፈጥረሉ ምህላውካ'ዩ። እምበኣር ሓወይ፣ዋላ ንሱ ንሰናያትካ ዝጸልእ ሰብ ይኹን፣ንስኻ ግን ድሌታትካ ንምግላጽ ፍቕራያን ቃላት፣ፍቕራዊት ልቢ፣ብፍቕሪ ዝተቐብኡ ከናፍር ኣጥሪ። ዘመኑ ንዓለምና ፍቕሪ ፍቕሪ ከምትሽትት ይግበራ ስለዘሎ፡ ( ዜና ዕርቂ ክልቲኤን ኮርያን፡ ኤርትራን ኢትዮጵያን ማለት'ዩ)  በዚ ሽታዚ ክትማረኽ እምበር፣ካብ ፍቕሪ እትሃድመሉ ምኽንያት ንምርካብ ሃሰው ክትብል ኣይትንበር።

ብኻልእ ገጻት ድማ ዝኸፈአ ጽልእኻ ንምንጋር  ኣሽሙር ዝብሃል ጣቋ ኣሎ።ብደጊኡ ፍቕሪ ለበሰ ዝመስል፣ ኣብ ውሽጡ ግን ድጉል ጽልኢ።ኣሽሙር ንኣሽሓት ደቂዛ ምድሪ፣ ንሞት ተፈሪድሎም ከምዝጠፍኡ ዝገበረ፣ ረቂቕ ኲናት ኢዩ።ፍቕሪ ኣሎኒ እናበልካ፡ በንጻሩ ኣሽሙራት ትነዝሕ እንተኾይንካ፣ፍቕራዊት ልብኻ ካባኻ ጎጥጒጥካ ብምውጻእ፣ ብጽልኢ እንዳተካእኻያ ኢኻ።እቲ ምሳኻ ብዛዕባ ፍልልያትኩም ዝማጎት  ዘሎ ሰብ፣ ቅድሚ ምስኡ ክትላዘብ ምጅማርካ፣ከማኻ ሰብ ምኻኑ ፍለጥ። ምስ ሰብ ትላዘብ ተሃሊኻ፡ ሰብኣዊ ፍቕሪ ክትልግሰሉ ሕገ ተፈጥሮ ይግድደካ ኢዩ። ሓሳብካ ቅድሚ ክትገልጽ ምጅማርካ፡ ነቲ ሰብ ብዘይ ነግ ፈረግ ከተፍቅሮ ሓልን። ሽዑኡ እቶም ንሱ ዘውጽኦም ቃላት ዋላ ጎዳእቲ ይኹኑ፣ ኣማሲኡ ንዑኡ እምበር ንዓኻ ኣይክጎድኡኻን ኢዮም።ንዑኡ ተጎዲኦሞ ድማ ውዒሉ ሓዲሩ ክጠዓሰሎም ምዃኑ ኣይትዘንግዕ።

እግዚአብሔር ኣምላኽና፡ ንህዝብናን ሃገርናን ዓለምናን ዘሰማምዕ መንፈሳዊ ፍቕሪ፡ ንነፍሲ-ወከፍና ክምጥወልና ቅዱስ ፍቓዱ ይኹን።እቶም ወትሩ ኣብ ሕልናና ዘለዉ ሰማእታት ኤርትራ ድማ፣እግዚአብሔር ኣምላኽ ነፍሶም የዕርፍ። ደቆምን ቤተ-ሰቦምን ድማ ጽንዓቱ በረኸቱን ይልኣኽ።

ወስብሀት ለእግዚአብሔር!

ልመና ድያብሎስን ፍርዲ እግዚኣብሔርን

በስመ ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ልመና ድያብሎስን ፍርዲ እግዚኣብሔርን

ድያብሎስ ዝለመኖ ልመና፣

3ይ መቃብያን 1፣16-24 ኣነውን ብትእዛዘይ ንዝኸዱ ሰባት ኩላቶም ናብ ጥፍኣት ክወስዶም ኢየ፣ ነቶም ዘስሓትክዎም ሰባት ምሳይ ኮይኖም ናብ እሳት መታን ክኣትዉ፣ ነቲ ዝፈጠረኒ ካብ እግዚኣብሔር ቃል ኪዳን ኣሎኒ።17.ኣነ እቲ ቁጥዑኡ ኣብ ልዕለይ ኣብ ዘብዝሓለይ እዋን፣ንመልኣኽቱውን ኣሲሮም ናብቲ ገሃንምን ናብ ሲኦል ዝኾነ ጥልቅን መታን ክወስዱነ ኣብ ዝኣዘዘሉ ግዜ፣ንጎይታይ ለመንክዎ።ንፈጣሪየይ ከምዚ ኢሉ ኣብ ብቑጥዓ ዝኣዘዘሉ ግዜ፣<< ተቖጢዕካኒ ኢኻ፣ብመቕሰፍቲውን ገሲጽካኒ ኢኻ፣ብመዓትካ ቀሲፍካኒ ኢኻሞ፣ኦ ጎይታይ ኣብ ቅድሜኻ ሓንቲ ነገር ጥራይ ንኽዛረብ ፍቐደለይ፣>> ኢለ ለመንኩ።18. ጎይታይ ድማ፣ተዛረበ፣<< ክሰምዓካ ኢየ፣>> ኢሉ መለሰለይ፣ በታ እዋን እቲኣ፣ከምዚ እንዳበልኩም ክልምን ጀመርኩ፣<< ካብ ክብረይ ምስ ተዋረድኩ፣ነቶም ኣነ ዘስሕቶም ሰባት፣ናብቲ ኣነ መከራ ዝቕበለሉ ስፍራ ኣብኡ ምሳይ ይኹኑ።19. ነገር ግን እምቢ እንተኢሎምኒ፣ብኣይ ድማ ዘይሰሓቱ፣ትእዛዝካ ንምግባር፣ፍቓድካ ንምፍጻም፣ቃልካ ዝሕልዉ ትእዛዘይ ግን ዘይሰምዑ፣ ኣነ ኣንክምህሮም እምቢ ኣብ ዝበልሉ ግዜ፣ከስሕቶም ኢለ ኣብ ዝፍትነሉ በኣይ ዘይሰሓቱ፣ንሳቶም ንመንግስትኻ ይኹኑ፣እቲ ክትፈትወኒ እንከለኻ ሂብካኒ ዝነበርካ ዘውዲውን ይውሰድዎ።20.ምሳይ ዘይተሰደዱን ሰይጣናት ዘይተባህሉን፣ነቲ ናተይ ስልጣናትን ናተይ ዘውድን ሃቦም።ናብታ ብሰንከይን ብሰንኪ ሰራዊተይን ቦዶ ዝኾነት ወንበረይ ሂብካ ድማ ኣብ የማንካ ኣቐምጦም።21.ከምፍቓድካውን ንዓኻ የመስግኑ፣ከምቲ ኣነን ሰራዊተይን ዝነበርናዮ ከኣ ይኹኑ፣ንዓይ ጸሊእካ ካብ ሓመድን ካብ መሬትን ንዝተፈጠሩ ስለዝፈተኻ፣ናተይ ስልጣን ተሳዒሩ ኢዩ ናታቶም ስልጣን ግን ልዕል ልዕል ኢሉ ኢዩሞ፣ከምቲ ዝፈተኻዮም ገይሮም የመስግኑኻ።>> 22. ጎይታይ ድማ ከምዚ ኢሉ መለሰለይ፣<< እናረኣዩን እናሰምዑን፣ንፍቓደይ ጸሊኦም ንስኻ ኣስሒትካዮም ኢኻሞ፣ከምቲ ዝበልካዮን ከም ቃልካን ይኹኑ።23.ትእዛዛተይን ናይ መጽሓፍተይ ቃልን ሓዲጎም ናባኻ ካብ መጹ ቅጽዓቶም ኣየጉህን ኢዩ።ከምቲ ንስኻ ዘስሓትካዮም ከኣ ምሳኻ ኣብ ገሃንም ይቀመጡ።24. ክሳብ ዘልዓለምውን ንዓኻን ብኣኻ ንዝሰሓቱን፣ካብ ቅጽዓተ ገሃንም መውጽኢ የብልክምን።ንዘልዓለም ድኣ ኣብ ውሽጢ እሳት ትሳቐዩምበር።>>

ነብይ እዝራ ስለተፈጥሮን ፍርድን ሓቲቱ ምላሽ ረኸበ፣

2ይእዝ 43.ኣነ ኸኣ፣<< ነቶም ዝቐደሙን፣ሕጂ ዘለዉን ነቶም ብሕጂ ዝውለዱን፣ንኹሎም ብሓደ ዘመን ክትፈጥሮምዶ ኣይምኸኣልካን ኔርካ፧ ሹዑ ኩሎም ብሓደ ዘመን ምነበሩ ነይሮም፣በዚ መገዲዚ ድማ ብሓደ ግዜ ምፈረድካዮም ኔርካ፣>> ኢለ መለስክሉ።44.ንሱ ከኣ፣<< እቲ ፍጡር ካብ ፈጣሪኡ ንላዕሊ ኣይንቀሳቐስን ኢዩ።ብዘይካዚ ድማ ኩሉ ብሓደ ግዜ ተፈጢሩ እንተዝኸውን እዛ ዓለም ንኹሉ ብሓደ ግዜ ክትጾሮም ኣይምኸኣለትን ነይራ፣>> በለኒ።45.ኣነ ኸኣ፣<< ጎይታይ!እንታይ ደኣ ነቲ ኩሉ በብዘመኑ ዝነበረ ፍጥረት ብሓደ ግዜ ከምእተተንስኦ ሕጂ ዝተዛረብካኒ፧ሽዑ ክትጾሮ እትኽእል እንተኾይናኸ ስለምንታይ ሎሚ ክትጾሮ ዘይትኽእል፧>> ኢለ ሓተትክዎ።46.ንሱ ኸኣ፣<<እዝስ ነታ ዓሰርተ ዝወለደት ሰበይቲ፣በብሓደ ዘይኮነስ፣ስለምንታይ ንኹሎም ብሓንሳእ ዘይወለድክዮም፧ኢልካ ከም ምሕታት ኢዩ ክኸውን፣>> ኢሉ መለሰለይ።47. ኣነ ኸኣ፣<< ንሱሞ ከቶ ዘይከኣል ኢዩ፣ንሳ ብሓደ መዓልቲ ክትወልዶም ኣይከኣላን ኢዩ፣>> በልክዎ።48.ንሱ ኸኣ፣<< እምበኣር ነዛ ዓለምውን ልክዕ ከምኡ ከም ማህጸን በብግዜ ኣብ ዝተወሰነ ምዱብ ግዜ ሰባት ከተፍሪ ኢየ ገይረያ።49.ከምቲ ሓንቲ ሕጻንን ኣረጊት ሰበይትን ሕጻን ኪወልዳ ዘይኽእላ፣ከምኡ ድማ እቲ ዝፈጠርክዎ ዓለም ስርዓት ኣሎዎ፣>> በለኒ።50. ሽዑ ኣነ << ነቲ ነገር ንስኻ ካብ ኣምጻእኻዮ፣እዛ ብዛዕባኣ እትዛረበላ ዘለኻ ዓለም ገና ንእሽቶ ድያ ወይስ ኣረጊት፧>> ኢለ ሓተትክዎ።51.ንሱ ኸኣ፣" ነቲ መልሲ ካብታ ብዙሓት ደቂ ዝወለደት ሰበይቲ ክትረኽቦ ትኽእል ኢኻ። <ንምንታይ እቶም ዝነኣሱ ደቅኺ ከምቶም ዓበይቲ ደቅኺ ነዋሕትን ዓበይትን ዘይኮኑ፧> ኢልካ ሕተታ።52. ካብቶም ንሳ ናብ እርጋን ምስ ተገምገመትን ምስ ደኸመትን ዝወለደቶም፣እቶም ጎርዞን ጥዕይትን ከላ ዝወለደቶም ኣዝዮም ጥዑያትን ጹንዓትን ምኻኖም ክትነግረካ ኢያ።

2ይእዝ7፣70-74 እቲ መልኣኽ ድማ " ልዑል ኣምላኽ ነዚ ዓለምዚ ክፈጥሮ ከሎ፣ከምኡውን ንኣዳምን ንዘርኡን ክፈጥር ከሎ፣ብመጀመርታ ንኹሉ ነገር ኣብ ፍርዲ ከምዝቐርብ ገይሩ ፈጠሮ።71.ስለዚ ድማ ካብ ቃልካ ክትመሃር ይግበኣካ። <ናይ ምሕሳብ ኣእምሮና ምሳና ኢዩ ዝፍጠር> ኢልካ ነይርካ።72.እቲ ሓቂ ድማ ንሱ ኢዩ።ናይዚ ዓለምዚ ሰባት ብሓሳቦም ስለዝምርሑ ይሓጥኡ።ትእዛዛት እግዚኣብሔር ተቐበሉ ግና ኣይሓለዉዎን፣ንሕጊ ሙሴ ተቐበልዎ፣ግና ኣይተኣዘዝዎን።በዚ ምኽንያትዚ ድማ ክሳቐዩ ተገብኦም።73.ኣብ መዓልቲ ፍርዲ ደኣ እንታይ መመኽነይታ ከቕርቡ ይኽእሉ፧ኣብታ መወዳእታ መዓልቲኸ እንታይ ኢሎም ክምልሱ ኢዮም፧74. ልዑል ኣምላኽ ነቶም ኣብ ምድሪ ዝነበሩ ሕዝቢ ንነዊሕ ዘመን ተዓጊስዎም ኢዩ።ግናኸ እቲ ትዕግስቱ ምእንተኣቶም ዘይኮነስ ምእንቲ ምልኣት ዘመን ክፍጸም ኢዩ ዝተዓገሶም፣" እናበለ መለሰለይ።
ኦ ዘትመጽእ ኣመ ዳግመ ዕለት በእንቴነ፣ስምዐነ ኣምላክነ ወመድሐኒነ፣ኦ ክርስቶስ፣ ኦ ተስፋሆም ለኩሎሙ ኣጽናፈ ምድር በእንቲኣነ፣ስምዐነ ኣምላክነ ወመድሐኒነ።ኦ ክርስቶስ(3)

ሓደሽቲ ጓሶት

በስመ ሥላሴ

 

 

ኣብዚ ምዕቡል ማሕበረሰባዊ ናይ ቴክኖሎጂ ዘመን፡ብዙሕ ሰብ ንሓድሕዱ ክጻረፍ ትዕዘብ ኢኻ።እቲ ዝስንዘር ዘሎ ጸርፊ በብዓይነቱን ንንዓይነቱ ዝውክልን እኳ ይኹን እምበር፡ንልቢ ተጸራፍን፡ንኣንባቢ ናይቲ ጸርፍን ኣበሳጭዩ ዘንድድ ምዃኑ ብመጽናዕቲ ተበጺሑ ኣሎ።እዚ ዝውርወር ጸርፊ፡ነቲ ተጸራፊ ዕላማ ዝገበረ ኣይመስልን፡"ይጸርፍ ኣሎኹሞ፡ንጸርፈይ ረኣይዎ፡ክሳብ ክንደይ ኢየ ኣብ ምምሃዝ ጸርፊ በሊሕ ተመልከቱኒ፡ነቲ ተጸራፊኸ ልክዕልክዑ ረኺበዮዶ ወይስ ይውሕዶ፡ሕርሕራይ ገይረ እንተረኺበዮ ኣጣቕዑለይ፡እንተኣውሒደሉ ኸኣ መልኡሉ።"  ዝብል ውሽጣዊ ርእየት ኣሎዎ።

ሓንቲ ሰበይቲ'ያ፡ ኣብ ህይወታ ከይተጻረፈት እንተውዒላ ቀጨውጨው ይብላ ስለዝነበረ፡ ሓደ እዋን ዕለቱ ምሉእ ንጸርፋ ዝእንገድ ሰብ ከይረኸበት ስለዝወዓለት፡ነታ ጓላ " ነጸላይ ሃብኒ ዛጓለይ፡ናብቲ ስግርና ክኸይድ ኢየ፡ኣብኡ ገለ ጸርፈይ ዘዝንበሉ ሰብ ተረኸብኩ።" በለታ።ሃንደበት ሓላፊ መንገዲ ነዚ ክትብል ስለዝሰሞዓ ግን፡"ኣንቲ ሰበይቲ ክትጸርፊ ክትብልስ ስግር ማዕዶ ክትሰግሪ።" ኢሉ ንሓሳባ ክቃወሞ ስለዝበለ፡"ወይ ኣነ! በሊ ተደፊረ፡ግደፍዮ ግደፍዮዛ ጓለይ፡እቲ ዝደልዮ ረኺበ ኣሎኹ።" ኢላ ጸርፋ ቀጸለት ዝብል ብሂል ኣሎ።

ዝጻረፍ ሰብ" ስለምንታይ ትጸርፍ" ኢልኩም እንተሓቲትክሞም፡ንባዕሉ ጸርፊ ነውሪ ምዃኑ ኢዩ ዝእመን።ግን ክንዮ ማዕዶ ሰጊርካ ምጽራፍ ኣይጸልእን።ኣብ ኣሜሪካ ኮይንካ፡ንኣብ ኤርትራ ዘሎ ሰብ፡ኣብ ኢትዮጵያ ኮይንካ ንኣብ ኤውሮጳ ዘሉ ሰብ፡ኣብ ኣውስትራልያ ኮይንካ ንኣብ ካናዳ ዘሎ ሰብ...። ድማ ጸርፍኻ ኩሉ ክርእዮ ኣሎዎ።ዓይነት ኣጸራርፍን፡መጸራረፊ ቦታን'ውን ተመራጺ ኢዩ። ቅድሚ ዓይነታት ጸርፊ ምሕራይካ፡ ንመጽረፊ ዝኾውን ቦታ ከተመቻችእ ግድነት ኢዩ። ናይ ጸርፊ ሽንግርዋ ዝተጀመረ ይመስል። ንኣብነት Facebook፡ ዓቢ ጫካ ናይ ጸርፊ ኢዩ።ኣብዚ ድላይካ ዓይነት ጸርፊ ንድላይካ ዓይነት ሰብ ጸሪፍካ፡ መን ኢኻ ዝብለካ ኣካል የለን፡ንጸርፍታትካ ሳንሱር ዝገብር ግላዊ ይኹን መንግስታዊ ማሕበር የለን።(Youtube). ናይ ጸርፊ መኻርም (ደንበ።) ኣብዚውን ክልተ ጥቕሚ ኣሎካ፡ሓደ ምስልኻ ስለዝረአ፡ብዙሓት ኣንጨብጨብቲ ናይ ምጥራይ ዕድላት ኣሎዉኻ።ካልኣይ ድማ፡እቲ ተጸራፊ ዝያዳ ምስሊ ጸራፊኡ ረርእዩ ዝቑዝመሉ ባይታ ስለዝፈጠርካ ንልቡ ኣጸቢቕካ ዝጎዳእካዮ ኮይኑ ይስምዓካ። ኣዝዩ ተገርምን የጒህን'ዩ።

ዓይነታት ጸርፊኸ፧ ብዙሓት ኢዮም።

1. ከይሞተ ሞይቱ ኢልካ ብምእዋጅ።ጸራፊ ምስቲ ተጸራፊ ብውሽጢ መስመር፡ ሰፊሕ ክርክር የካይዱሞ፡ተማጊቱ ከሰንፍ ስለዘይከኣለ፡መፍትሒኡ ሞይቱ ኢልካ ንዓለም ምእዋጅ ከም ዓቢ ዓወት ይቖጽሮ።ረኣይቲ መርድእ ድማ እነገሊኦም ይስንብዱ፡እነገሊኦም ድማ ይሕጎሱ።ናይ ጸራፊ ዕላማ ግን፡ከመይ ኢሉ እቲ ተጸራፊ ብውሽጡ ይሰዓር ኢዩ።

2. ብዕልግናዊ ጸርፊ።እዚ ማዕቢለ ኣሎኹ፡ዘስምዕ ዓይነት ጸርፊዩ።እቲ ጸራፊ ምስቲ ተጸራፊ ኣብ ናይ ግሎም ጉዳይ፡ምርድዳእ ይስእኑሞ፡"ተዓዘቡኒ፡ንእገለ በዚ ዘመናዊ ጸርፊዚ ይበልጾ ኢየ።" ዘስምዕ ምራቕ ናይ ጸርፊ ይተፍእ።እቶም ኣንበብቲ ናይቲ ጸርፊ እነገሊኣቶም ይጉህዩ፡ክንድዚ ዝኣክል ብዕልግና ኣብ ልሳንዚ ወለዶ ሰንኪ ምስራጹ።ዓለም ብጥበብን ብልሕን ክትመልእ እንዳተጸበዩ፡ኣብ ልሳን ናይዚ ወለዶ ጸረፍያውያን ይፈርዩ ስለዘሎዉ የልቅሱ።እነገሊኣቶም ድማ፡ሓጎሶም ክገልጹ ክብሉ፡ነቲ ናይ ብዕልግና ጸርፊ ይውስኽሉ።እዚ ምውሳኽ ጸርፊዚ፡ብውሽታዊ፡ብcomment ዝብሃል መሳርያ፡ወይ ድማ ብኸምኡ ካልእ ዓይነት post ተተኪኡ፡" እነሆ ናተይ ጸርፊ ዝበለጸ።" ዘስምዕ እንክመስል ይስንዘር። ጸራፍያን ሰብ ሞያ ሓደሽቲ ጸርፍታት፡ መሃዝያንን መሃንድሳትን ድማ ሓደሽቲ ናይ መጻረፊ ኣዳራሽ ከዳልዉ ኣብ መንገዲ ክመሓላለፉ ንርኢ ኣሎና።

3. ጸሌዮአዮ ኣሎኹሞ ኣጻልኡኒ።እዚ ዓይነት ጸርፊዚ፡ብብዙሕ ዓይነት ሸነኻት ኢዩ ዝካየድ።ብኣሽሙር፡ብቐጥታ፡  ተዘዋዋሪ፡ ብከንቱ-ውዳሴ ክኸውን ይኽእል ኢዩ።ጸራፊ ሓለፍኩ ክብል ብዙሕ ዓይነታት ሜላ ይጥቀም።ተጸራፊ፡ንኡሽቶ ጥበብ ዝጎደለቶ እንተኾይኑ፡" ንዓሻ ኣምተሉ ክንደይ ከይግምቶ" ስለዝኾኖ ንመን ተባሂሉ ከየስተውዓለ ይሓልፎ።ጥበበኛ እንተኾይኑ ግን፡ነቲ ጸራፊ ከምዝሰዓሮ ንነብሱ የእምና።

ብዛዕባ ጸራፊ ሰብ ክፍለጥ ዘለዎ ሓፈሻዊ ሓዊ፡ ስለዝተዓወተ ኣይኮነን ዝጸርፍ።ዕውት ሰብ ብልሕታት ዓወቱ ንዓለም ከስተምህር፡መርትዖታቱ የቕርብ እምበር፡ ናብ ጸርፊ ኣይጎዪን ኢዩ።ኣብ ዘምንና ሰብ ንጸርፊ ቅልጡፍ፡ንልዝብ ዝሕቱል ዝኾነሉ ስለምንታይ ኢዩ ኢልካ እንተሓሲብካ።ኣንባቢ ሰብ እንዳወሓደ ይመጽእ ስለዘሎ ኢዩ።ሰብ ብድንቁርና እንተተዋሒጡ ክምጉት ኣይክእልን ኢዩ።ጥበበኛ ሰብ ጥበቡ ከርኢ ክብል ዘይተፈተሹ ናይ ጥበብ መጽሓፍቲ፡ዘይተሓተቱ ናይ ኣእምሮ መምሃራን፡ዘይተበርበረ ናይ መዝገብ ዩኒቨርስቲ ክፍትሽ ኢዩ ዝውዕል እምበር፡ሆ!  ኢሉ ንጸርፊ ልሳኑ ኣይውርውርን ኢዩ።ኣብ ሕብረተ-ሰብና፡" ፍረ ዘለዎ ገረብን፡ፍረ ዘለዎ ሰብን ንታሕቲ ይደኑ፡" ዝብል ኣበሃህላ ኣሎ።ፍርያም ኣእምሮ፡ ፍረ ዘለዎ ልዝብ የመንጩ፡፡ፍረ ዝተሓረሞ ኣእምሮ ድማ፡ንኣእምሮ ዘቑስል ቃላት ይጭንጒዕ።ብዙሓት ተጻረፍቲ፡ዕዉታትን ምዕቡላትን ኮይኑ ስለዝተሰመዖም ኢዮም ምጽራፍ ዝመርጹ።ናይ ዓወት ምልክት ግን ሞጒትካ ክትረትዕ ምኽኣል እምበር፡ ጸርፍታት ብምስንዛር ኣይኮነን።ንኹላቶም ሓሳባትካ ተቐባልነት ዘይክህልዎም ይኽእል ኢዩ።እቲ ሽግር ካብ ክልቲኡ ሓዲኡ'ዩ። ወይ ናትካ ወይ ናይቲ ብጻይካ ግንዛበ ስለዝጎደለ ምኻኑ ፍሉጥ ኢዩ።ስለዚ " ነዛ ህላውነት ግንዛቤ ብኸመይ ይመላእ'ሞ፡ስምምዕ ይኽሰት፧" ዝብል ጥበብ ከተፍልቕ እንተዘይክኢልካ፡ገና ኣብ ድንቁርና ከምዘለኻ እመን።

ኣብ ተመኩሮይ ወትሩ ዘሰላስሎ ነገር ኣሎ፡፡ እዚ ጓሳ ናይ ጥሪት እንከለኹ'ዩ፡፡ እታ ዝጓስያ ዝነበርኩ ጤል ዓስ ኢለያ እንተኣብያትኒ፡ ናብ ምትህርራም'ተ ዝጓየ ነይረ። እዚ ከኣ ንሳ፡ ኣእምሮኣ ተጠቒማ ስለምንታይ ከምዝኣበየት መርትዖ ሒዛ ከተቕርብ ዓቕሚ ከምዘየብላ ስለዝፈልጥ'የ፡፡ ስለዚ ክሃርማ ወይ እምኒ ክድርብየላ ኢዩ ዘለኒ።ምኽንያቱ " ስለምንታይ ኢኺ ኣቢኺ" ኢልካ ምስ ጤል ምጉት ክትገብር ማለት ስለዘይከኣል።እምበኣር ሓደ ጓሳ ጥሪት፡ ንእንስስኡ ብበትሪ፡  ሎሚ "ኣነ  ጓሳ ኣእምሮ፡ ምሁር ሰብ ኢየ!" በሃሊ ድማ፡ ብጸርፊ ክመሳሰሉ ይረኣዩ ኣሎዉ።እቲ ጓሳ ጥሪት ምስታ ጤል ናይ መረዳድኢ ኣእምሮ ኣብ መንጎኦም ስለዘየለ፡ ሓንትን ክያንትን ብበትሪ ወይ ብእምኒ ጔርካ ምስ ጤሉ ምርድዳእ እንኮ ከም ኣመራጺ ይወስዶ። ካብ ናይ ሎሚ ምሁረ-ኣእሮ ዝምንጩ ልሳን ድማ፡ ብዙሕ ናይ ምርድዳእ ኣመራጺታት እናሃለወ፡ ነቲ ከምኡ ኣእምሮ ለበስ ሰብ፡ ሰብ ምዃኑ እንዳተፈለጠ ከም ጤል ተሓሲቡ ብጸርፊ ዓስ ክበሃሃሉ ንርኢ ኣሎና። ዝሓስብን፡ዝልወጥን ሰብ ክንሱ ክመሃር ክፈልጥ፡ ክዓቢ፡ካብ ብልሒ ናብ ብልሒ ክምጠጥ ዝኽእል፡ ኣእምሮ ዝወነነ ናይ ሰብ ተፈጥሮ ምዃኑ ዝተፈልጠ ክንሱ፡ ብጸርፊ ክሰሃሃሉ ንርኢ ኣሎና። ናይ ሎሚ ጓሳ ምስ ሰብ ይላዘብ ምህላዉ ዘንጊዑ፡ ከም ምስ እንሲሳ ብናይ ጸርፊ በትሪ ክተሓናነቕ ክትርኢ ዓገብ ዘብል'ዩ።

እቲ ብእምኒ ጔሩ "ዓስ!" ዝብል ዘሎ ጓሳ ምላልባሽ እኮ ተጋግዩ፡ እታ ጤል ግን ቅንዕቲ ክትነብር ትኽእል ኢያ።መረዳድኢ፡ ኣእምሮን ቋንቋን ኣብ መንጎኦም ስለዘየብሎም ግን፡ ጓሳ ንጤሉ ተኣብያ ክሃርማ ጥራይ ኢዩ ዘለዎ። እምበርከ፥ እታ ጤል "ከምዚ ስለዝኾነኮ ኢዩ'ኮ" ኢሎም ንሓድሕዶም ከረዳድእሉ ዝኽእል ባይታ የለን። ምስ ጤል ብጭራሽ ርድድእ ኣይከኣልን'ዩ። ናይ ሎሚ ጸራፍያን'ውን ከምኡ፡ ኣጣል ዝሕልዉ ፡ኣብ በረኻታት facebook ዝውዕሉ ዘለዉ ጓሶት መሲሎም ይረኣዩና እነሀዉ።ዓስ ይብሉኻሞ፡ ንሓሳቦም ምቕባል እንተኣቢኻ ግን፡ከረድኡኻ ወይ ብሱል ምጉት ሒዞም ክቐርቡኻ ዓቕሚ የብሎምን።ስለዚ በታ በዓልቲ ሞያ ልሳኖም ገይሮም፡ ብጸርፊ ዓስ ይብሉኻ። ለካ ብጸርፊ'ውንባ 'ዓስ!' ይበሃል'ዩ! መቸስ፡ ምስ ሰብ እንክተረዳዳእ ናይ ኣእምሮ ጒልበት ክትጥቀም፡ ምስ እንስሳ እንክትማጎት ድማ ዶንጎላ ክህልወካ ባህርያዊ ኢዩ።ናይ ዘመንና ጸረፍቲ ግና ኮር ተገልበጥ ትኸውን ኣላ።

ለካ ኣብ ዓለምና ሓደሽቲ ጓሶት ይፍጠሩ ኣሎዉ።ናይ Facebook ጓሶት።ክጸርፉ እምበር ከማጎቱ ዘይክእሉ። ብጸርፊ ክዋረዱን ከዋርዱን እምበር፡ ነቲ ግገኛ ክእርሙ ዘይክእሉ። "ከመይ ኢለ ክሕግዞ"ዘይኮነስ ከመይ ኢለ ጅግንነተይ የርእዮ በሃልቲ፡፡ ጥበብ ኣልባ ጓሶት ይፈርዩልና ኣሎዉ። ሕጂ'ውን ክፍለጥ ዘለዎ፡ ሓደ ጸራፊ በዓል ሞያ፡ ክንድዚ ዝኣክል ናይ ጸርፊ ልምምድ ይግበር ኣይግበር ብዘየገድስ፡ ንኣእምሮኡን ኣእምሮ ሰማዕትን፡ ስለዝጸረፈን ዘጽረፈን ጥራይ፡ ቅንጣብ ናይ ምዕባለ ኣስተዋጽኦ ኣየምጽኣሉን ኢዩ።ኣብዚ ናይ ኣካዳምያዊ ቤት ትምህርቲ ኪደት ኣቓልቦ ዝግበኦ ጉዳይ ኣሎ፡፡ ንኣሽቱ ተማሃሮ፡ ዕሸላት፡ ዓለም ብዙሕ ተስፋ ምዕባለ እትገብረሎም ህጻናትን መንእሰያትን፡ ናይዚ ጸርፍታት'ዚ ተቛደስቲ እንዳኾኑ ይመጹ ኣሎዉ።ሓደ ተማሃራይ ናይ ዩኒቨርስቲ ጥበብ ከፍሪ እንዳተጸበኻ፡ መመንጨዊ ጸርፊ እንዳኾነ ይመጽእኣሎ።ተማሃሮና ስለዝተማሃሩ፡ ብብሱል ኣእምሮኦም ንዓለምና ከስተምህሩ እንዳተመነኻ፡ ከረድኡን ክረዳድኡን ይኽእሉ የለዉን፡፡ ጸርፊ ግን እንኮ መፍቲሕኦም ኴና ንርእያ ኣለና።ንናይ ሽግራት መፍትሒ ዝኾኑ ቃላት ኣይምህዙን፡፡ ሓደሽቲ ዘመናውያን ናይ ብዕልግና ጸርፊ ግን ንምምሃዝ ብሕልሚ ከይተረፈ ይምነዩ። ናይ ጸራፊት ልሳን ዘገርም ነገር፡ ክእለታ ካብቲ ብድንቁርና ዝተኸበበ ኣእምሮ ዝምንጩ ምዃኑ'ዩ።

ስለዚ Facebookናን Yutoubeናን ሓደሽቲ ጓሶት የፍርየልና ኣሎሞ፡ ነፍሲ ወከፍ ወናኒ ጥበብ፡ ንምጥፋእ ማሃይምነት ናይ ምጽዓር ሓላፍነት ይሰከም። እቲ ስራሕ፡ ማሃይምነት ካብ ኣእምሮ ንምልጋስ፡ብመጀመርያ ገዛእርስኻ ብጥበብ ዝተኸበበ ብሱል ኣእምሮ ክትውንን ብምግባር'ዩ ዝቕድም። ንኣብነት ነቲ ኣብ ስነ-መጎት፡ ምርዳእን ምርድዳእን  ዝኣበየካ ሰብ፡ካብ ክትጸርፎ ዋላ ይጋገ ይሃሉ፡ ፍሽኽ በሎ። ፍሽኽታኻ ምላልባሽ ብተንኮል ወይ ብኣሽሙር ክትርግሞ ይኽእል ይኸውን።ንስኻ ግን ካብ  ኣእምሮኻ ዝመንጨወ ጥዑም ፈገግታ ምሃብ ወትሩ ተለማመድ እምበር፡ ዘይብሱል ልሳን ከተጥሪ ክትብል፡ ኣብ ልሳንካ ሕማቕ መርዚ ኣይትኽዖ። እወ፡ ልሳንካስ ብጨው ደኣ ኣቃምማ'ምበር፡ብመርዚ ምምራዝሲ፡  ንስኻውን 'ታይ ግድኻ ክትምረዝ ኢኻ።

ኣእምሮ ዘመንጨዎም ሕቶታትን መልስታቶምን 5ይን ናይ መወዳእታን ክፋል፣-

በስመኣብ ወወልድ ወመንፈስ ቅዱስ ኣሀዱ ኣምላክ ኣሜን።

13. ሕቶ፣-ርትዒ ቀቲልካ ንእምነት ካብ ምንጋስ፡

ሶቅራጦስ ምስ እየሱስ

ኮንፍሽዮስ ምስ ሃዋርያ ጳውሎስ፡

ሓታትን ተሓታትን

ንምንታይ ዘይፈጠርካዮም፧

መልሲ፣-ርትዒ ቀቲልካ፣ እረ ዓገብ ዝባን ርትዒ፣ ርትዒ ኣይመተን፣ሞይቱ መሲሉካ እምበር ተንሲኡ ኢዩ።ንሱ ዝሞተ ሰሪ መዋትነትካ ኢዩ።መዋትነካ ንህያውነቱ ሰንኪ ምሒር ፍቕሩ ናብ መቓብር ከምዝወርድ ገይርዎ።ግን ኣጆኻ ኣይሞተን፣እቲ ዋና ርትዒ ኣይሞተን፣ስለዘይሞተ ኢዩ ከኣ እምነት ይንገስ ኢሉ ዝእውጅ ዘሎ።እን ሶቕራጦስ ብቕንዕነኦም እን ኮንፍሽዮስ ብዝናውነቶም ንርትዒ ክንዲ ፍጻመ ዝኣክል ኣይመስልዋን ክመስልዋውን ኣይክእሉን ኢዮም።ፐርከስ ፍጡራን ብምኻኖም ጥራይ ምልኣታዊ ርትዒ ክህልዎም ኣይክእልን ኢዩ።ኢየሱስ ክርስቶስ ግን ሓቃዊ ርትዒ ኢዩ፣እቲ ርትዒ ስለርትዒ ኢሉ ኣብ ኢድ ዘይርቱዓት ወደቐ፣ብርትዒ ተራትዐ፣ሞት ክራትዖ ኣይተኻእሎን፣ብርትዓውነቱ ንርትዑ በቶም ርቱዓት ሰዓብቱ ናብ መላእ ዓለም ርትዒ ከንግስ ናይ እምነት ርትዒ ሰበኸ።ዘመንካ ምሉእ ደሊኻ ነዚ ዝመስል ርትዒ ኣይክትረክብን ኢኻሞ ተኸኣልካ፣ብርትዓውነቱ እመን።ተዘይከኣልካ ግን ነዛ ፍጥርቲ ዘይኮነት፣ፈጣሪ ዝሰረታ ርትዒ ኣህጺጽካ፣ፍጡራን ንዝሰረትዋ ርትዒ ከተንግስ ናብ ቤት ርትዒ ኣይትምጻእ።ኣብ ኣፋፍኖ ርትዒ ተደኪልካ፣ግንዛቤኻ ንኽክዕብት ተደሊኻ፣ክትመሃር ናብ ቤት ርትዒ ምጻእ፣ፈንቂለ ዘየፍረስክዋ ኢልካ ግን ኢድካ ኣይተዋጣውጥ ስለርትዒ ኢለ ክልምነካ።

ሓደ ካብ ውሽጣዊ ምጉትካ ካብ ዘንበብክዎ እንተሃልዩ ግን፣ኣብዛ ዓለም ንዝነበሩ ዝነበሩን ዘለዉን መደርቲ ርትዒ፣ዕግበት ከምዘይረኸብካሎም ኢዩ።እወ ብሕጂውን ኣይክትረክብን ኢኻ።ፍጡርዶ ፈጣርያዊ ፍትሒ ከርትዕ ይኽእል ኢዩ፧ከመይ ናይ ፍጡር ኣእምሮ ፍጽምቲ ፍትሒ ከንግስ ኢዩ ተባሂሉ ትጽቢት ይግበር፧ኣብዛ ዓለም እንኮ ጥርዓንካ እትኽዕወላ፣መልስታትካ እትሓፍሰላ፣ቁስልኻ እትዝንነላ፣ንዝተበተኑ ሓሳባትካ እትጥርንፈላ፣ውሽጣዊ ጛሂኻ እትድርጉሓላ፣እንኮ ሓንቲ መንፈሳዊት ኤንባሲ ኣላ።ፈጣሪ ንናይ ኩላቶም ደቂ ሰባት ጥርዓን ሰሚዑ ዘዝግብኦም ሞሳ ዝምጥወላ ሓንቲ መንፈሳዊት ኤምባሲ ኣላቶ።ቤተክርስትያን ኢያ፣ሓንቲ ሕክምና እረ ዓባይ ሆስቢታ ኣላቶ፣ኩላቶም ሕሙማን መንፈሳዎ ቃምዛታቶምም ዝፍወሱላ፣ቤተክርስትያን ኢያ፣ሓንቲ ጫካ እረ ካብ ከባቢ ኣማዞንን ካብ ማእከላይ ቅናት ምድርን ዕጽፊ ጻዕቂ ጫካ ዝወነነት ኣበር ዘይኣተዋ ሕዛእቲ ኣላቶ፣ ኣብ ትሕቲ ኢድ ረቒቕ ሓለዉኡ ዝተደኮነ መንፈሳዊት ሕዛእቲ።ደቁ ካብ ፍላጻታት ጸላኢ ንግዚኡ ዝሕብኡላ ቤተክርስትያን ኢያ።ፐርከስ ፈጣሪ ነቶም ኣዝዩ ዘፍቅሮም ደቂ ሰባት ኣብዛ ምድሪ ንዘልኣለም ንክነብሩ ኣይኮኑን ድልየቱ።እምበኣር ተዘይተምበርከኽካ ኢሎም ዘጛይዩኻ ጸረ ሰናያትካ ተሃልዮም ጎይኻ ናብዛ ሕዝእቲ ስፍራ መጺኻ ተዓቆም።ንመን ክረኽቦ ብኸመይ፣ዝብል ስክፍታ ኣይሃሉኻ።ዙርያኻ ብኣገልገልቱ ተወቂቡ ኢዩ ዘሎ።እንተሓሚምካ ብዙሓት መንፈሳውያን ነርስ ኣሎዉ፣ምስቲ ሰማያዊ ዶክተር ዝኾነ ፈጣሪኻ ዘራኽቡ፣ጥርዓን ተልዩካ፣ቆንስላውያን ኤንባሲታት ናይ ፈጣሪ፣ክትሕባእ ካብ ዓለም ሃድምካ ኣብቲ ሕዛእቲ ናይ ፈጣሪ ክትሽጎጥ እንተደሊኻ ድማ የግድኻ፣መንፈሳውያን መራሕትን ሓለውትን ናይዛ ጫካ ኣሎውኻ።ነቲ ግሩም ጫካ፣ኣብ ክንዲ ብጽባቔኡ ተደኒቕካ ጡዑም ሽታ ናርዶሱ ክትዕንገል ኣክንዲ ትህንደድ ግን "ተዘየንደድክዎ፣" ነቲ ምኡዝ መንፈሳዊ ሕክምና "ተዘይኣፍረስክዎ"፣ነታ እናሻዕ መንፈሳዊ ጥርዓን ናይ ፍጡራን ናብ ፈጣሪ፣ ብመንገዲ ጸሎት ዝካየደላ ኤምባሲ ድማ ፣"ብፍጡራዊ ኪደት ተዘይተማሕደረት" ኢልካ ኣብ ዘይመንጠቢትካ ኢድካ ኣይትምለስ። ኢድካ ከይትሓርር።ቅድሜኻ ብዙሓት እዞም ብታሪኽ ዝጠቐስካዮምን መዓልታዊ እትመሃሮምን፣ንዕንወታ ጽዒቶም ኢዮም ግን ፈሪሶም ከምዝተረፉ ባዕልኻ እነኻ ምስክር።

14. ሕቶ፣- ኣብ ሓደ ወለዶ፡ ኣብ ሓደ ዘመን።

ደስ ድዩ ዝብለካ፧

ማዕጾኻ ክኹሕኳሕ

ንሰብ ከተቐብል

ኣብ ኢዱ ንዘሎ መፍትሕ

ንምዃኑ ኸ መኣስ ኢኻ ከተዕርፍ፧

መልሲ፣-እወ ደስ ይብሎ ኢዩ።ፍጡራቱ መዓልታዊ ነታ ረቃቕ ማዕጾኡ ክኩሕዋ ክንደይ ደስ ይብሎ መስለካ!እዞም ብኢዱ ዝፈጠሮም ዘመናት፣ ዘመኖም ምስ ኣብቅዐ፣ነቶም ዘመናት ዘይክግድቦም ኢሉ ዝፈጠሮም ደቂ ሰባት፣ኣብቲ ንሱ ዝመደቦ ዘመን ክጽውዖም ኢዩ፣ንሳቶም ድማ ክኹሕኩሕዎ ኢዮም።እዛ ምልኣት ዘመን ዚኣ መዓስ ኢያ ክትኣክል ቁልፊ ኣብ ኢዱ ምህላዉ ምምስካርካ ጽቡቕ ምስክር ተዓዚበልካ ኣሎኹ።ስለዚ ብገዛእ ኣእዳውና ዝቆለፍናዮም መፋትሕ፣ብፉጡራዊ ጉልበትና ክፍትሑ ስለዘይከኣሉ፣ነታ መፍትሕ ዝሓዘድ ኢድ ፈጣሪ ምምዕዳው ከድሊ ኢዩ።ምላልባሽ ንነገራትና ባዕልና ብገዛእ መፍትሕና ዝቖለፍናዮም ክመስለና ይኽእል ኢዩ።ቆላፍን ፈታሕን ግን ንሱ ኢዩ።ክንፍታሕን ክንቁለፍን ድማ ፍቓደኝነት ኣባና ኢዩ ዝምርኮስ።"ክፍታሕ ደልየ፣ክሽገጥ ይሕሸኒ" ዝበለ ኣእምሮ ናይ ፍጡር፣ኢድ ፈጣሪ ዝርግሕቲ ኢያ።ግን ምርጫ ፍጡራን ዘብቅዓሉ ዘመን ከኣ ኣሎ።እቲ "ኣብዚ ይሕሸኒ" ኢልካ ዝምረጸሉ ዘመን ሕጂ ኢዩ፣ድሕሪ ጉድጋደ መቓብርሲ ናይ ምምራጽ ዕድል ይዕጾ ምበር ንኽትመርጽ ባይታ ኣይክፈትን።"ኣንታ ፈጣሪ፣መዓስ ኢኻ ከተዐርፍ" ዝብል ስንፍናዊ ሕቶ ነቢበልካ ነይረ፣ክነግረካ ፈጣሪ ኣይደክምን ኢዩ።ዘይደክም ድማ ኣየዕርፍን ከመይ ኢሉኸ ክደክምን ከዕርፍን።በንጻሩ ፍጡር ግን ኩሉ ግዜ ምስ ደኸመ ኢዩ። ሕቶኻ ንባዕሉ ንኣእምሮኻ ከምዘድከሞ ግሩም ምስክርነት ኢዩ።ድኻም፣ዕረፍቲ፣ድቃስ ምትንሳእ ዝብሉ ባህርያት ድምዳሜ መታን ክረኽቡ ፈጣሪኻ ስለፍቕርኻ ክብል ብተዋህዶ ለቢስዎም ኢዩ።

ክርስቶስ "ሓሚሙ፣ደኺሙ፣ደቂሱ፣ጸሚኡ፣ጠምዩ፣ለሚኑ፣ተሰቒሉ፣ደምዩ፣ሞይቱ፣ተቐቢሩ" ዝብል ክርስትያናዊ ምስክርነት ብወረ ሰሚዕካዮ ትኸውን ኢኻ።እዞም ዝበልናዮም ድኻማት ብእርይ ቁጽር፣ንፍጡር ዝውክሉ ባህርያት ኢዮም።ስለዚ ካባኻ ከልግሱ ተኾይኖም ፈጣሪ ክለብሶም ነይርዎ።በቲ ሓደ ወገን ድማ ሓሚሙ ክበሃለሉ እንከሎ፣ረቀቕቲ ኣቕሳል ይዝነኑ ነይሮም፣ጸሚኡ ጠምዩ ዝብል ዛንታ ክትሰምዕ እንከለኻ፣ካብ መንፈሳዊ መግቦቱ ንምጦ ነይርና፣ሓሚሙ ሞይቱ፣ተቐቢሩ ዝብል ዘሕዝን ዜና እንክትሰምዕ፣ሕማምና፣ሞትና ቀብርና ድምዳሜ ይገብረሉ ምንባሩ ኢዩ።እዚ ምግባሩ ፈጣሪ የመስግኖ እምበር ከመይ ከንቅፎ ተኻኢሉ! ደጊም ታሪኽ ድኻም ተዓጽዩ ኢዩ።ፈጣሪ እንደገና ብሕጂ ክደኽመልካ፣ክሓመልካ፣ክልምነልካ፣ክሳቐየልካ፣ክሞተልካ ትጽበ ተሊኻ በየማነይቱ ዘኾልስ ዝነበረ ሰብ፣"ብክልቲኤን የእዳውካ ገይርካ ኣኾልሰኒ" ኢሉ ክርክር ዝገብር ሰብ ትመስል ኣሎኻ። ብርግጽ ፈጣሪ ብኽልተ ኣእዳዉ ጥራይ ዘይኮነስ፣ኩሉ ነፍሱ ስለዕንጋሌኻ መግቢ ኮይኑ መጺኡ ሓንሳብን ንሓዋሩን ጥሜንትካ ሙግርምራምካን ዓጺዎ ኢዩ።ክቡር ሓታቲ ሓወይ፣ተኾነ ብውህበቱ ደስ ይበልካ፣ካብ ደስታና ድማ ንዓ ተቓደስ። ተዘይኮነ ግን ኣብ ቤት ደስታ መጺኻ ኣይትረብሽ።

ኣድማስ ፍጥርቲ ክሳብ ዝኾነት፣ናይ ፈጣሪ ኢያሞ ኣብ ልዕሊ ስርዓተ ኣድማስ ብፍጡራዊ ኣእምሮኻ ተጠቒምካ ጽገና ናይ ኣድማስ ክትገብር ኣይትሓልን። ዓቕሚ ክሳብ ዘይሃለወካስ ትም ደኣ ከኣል።ከመይ ኢሉኸ ፈጣርያዊ ዓቕሚ ክህልወካ፣ንስኻ ኣካል ናይ ኣድማስ ፍጡርምበር፣ክንዮ ኣድማስ ክትጋልብ እትኽእል ናይ ፈጣሪ ፈረስ ኣይኮንካን።ንዓኻ፣ፈጣሪ ኣብ ክበብ ናይ ኣድማሱ ንኽትነብር ፈቒድልካ ኣሎ፣ክንዚ ዝኣክል ዓቢ ዕድል ቀሪብልካ ኣሎ፣፣ኣብዚ ኮይነ ከም ኣብ ማህጸን ኣዲኡ ዘሎ ህጻን "ንናይ ዓለም ናብራ ከመይ ይመስል ግለጽ" ተባሂሉ እንክሕተት ኩሉሙሉ ንምግላጹ ዝእግሞ፣ኣብዚ ኮይነ ንምግላጻ ዓቕሚ እትሓጽረኒ እጽብቲ ስፍራ ኣዳሊልካ ኣሎ።ተኸኣልካ ተጸባዪኣ ኮይንካ ንዓ ምሳና ብተስፋ ተሓወስ፣ተዘይኮነ ግን ኣድማስ እትፈርሰሉ ዘመን ርሑቕ ስለዘይኮነ፣ክሳብ ሰዓቱ ዝኣክል ፍጡራዊ ትዕግስቲ ግበር። ጽባሕ ንተሃወጽቲ ርሕቕቲ ትመስል፣ንበዓል ተስፋ ግን ካብ ጽባሕ ዝቐርብ ማይክሮ ሰከንድ ፈጺምካ ኣይርከብን ኢዩ።

እግዚኣብሔር ንዝሓትት ሕልና በቲ መላሲ ባህሪኡ ክምልሰሉ ቅዱስ ፍቓዱ ይኹን።

ወስብሀት ለእግዚኣብሔር ወለወላዲቱ ድንግል ወለመስቀሉ ክቡር ኣሜን።

ኣእምሮ ዘመንጨዎም ሕቶታትን መልስታቶምን ኣብዚ ይፍጸም።

እዚ ጽሑፍዚ ኣብ ገጻት ፌስቡክ ተሓንጢጡ ዝተሰንዘረ፣
ንልቢ ገርህታት ኣብ ህልውና እግዚኣብሔር ዘላቶም እምነት ከደናግር ይኽእል ኢዩ ኢለ ስለዝገመትኩ፣
<<ብመልክዕ ቃንቃ ናይቲ ሓታቲ ዝተመለሰ ቁንጫል መንፈሳዊ መልሲ ኢዩ፣>>
ኢለ ዝቐረብክዎ ኢዩ።ሕቶ ክቕበል ፍቓደኛ ኢየ ግን ኣብ ፕሪቫት።

ናይ ኮቦርታ ፈተነ፡

በስመ አብ ወወልድ ወመንፈስ ቅዱስ አሀዱ አምላክ አሜን

ሰብ ብፈተነን ብዓወት ተነዲቑ ዝተሃምጸ ምኡዝ ህንጻ ኢዩ።ህንጻ ክጽብቕ ተኾይኑ፡ክሳብ ዝህነጽ ዘሎ ጎነጽ ደራሲ ሓንጢጡ፡ካድረ መዲሩ ኣይውድኦን።ሰብ ሰብ ተባሂሉ ህልውንኡ ዘኸረጋግጽ ፈተነን ዓወትን ዝጨበጠ ናይ እግዚኣብሄር ምስሊ ኢዩ።ኣሽንኳይዶ ሰብሲ እግዚኣብሄርውን ተፈቲኑን ተዓዊቱን ኢዩ።ናይ እግዚኣብሄር ፈተንኡን ዓወቱን ኣብ መስቀል ነበረ።ስለዚ ሰብ እንተተፈተነ ወይ እንተተዓወተ ናይ ኣምላኹ ኢዩ ወሲዱ።እዚ ድማ ፈተንኡን ዓወቱን ኩሉ ግዜ ኣብ መስቀል ተኾይኖም ኢዩ ንኣምላኹ ዝመስል።

ካብዞም ፈተነታት ናይ ወድሰብ ኢልና ንጽውዖም ሓደ ኣብ ኮቦርታ ዝፍጸም ፈተነ ኢዩ፡ዓወቱ ድማ ካብ ናይ ኮቦርታ ፈተነ ሲዒርካ እተምልጦ ናይ መንፈሳዊ ጽምብል ኢዩ።እዛ ናይ ኮቦርታ ፈተነ ሓጻር ትመስል ግን ነዋሕን መራርን፡ብዙሓት ዓይነት ሓጣውእን ጽድቅን ክተፍርየላ እትኽእል ዓባይ መድረኽ ኢያ።ለካ ናይ መስቀል ምረት ኣብዚ ተሰዊራ ስለዓወት ደቂሰባት ትቕልስ'ያ።

ገለ ገለ ፈተነታት ናይ ኮቦርታ ክንጠቅስ፡

¶¶¶ ናይ ተዘክሮታት ፈተነ፡-

ቅድሚ ነዊሕ ዓመታት እተሕልፎ ዝነበርካ ስንፍና ይኹን ጅግንነት፡ኣብታ ሰዓት እቲኣ ከም ቃሕ ሰብ ኣብ ኣእምሮኻ ይሰኣሉሞ፡ንኹሎም ዘዘኪርካ በዚ ዘለኻዮ ከምተማርር፡እረ ሓደ ሓደ ግዜ ብኮቦርታ ተሓኒቕካ ሕደር ዝመጸልካ ግዜ ኣሎ።ኣብዚ መድረኽዚ፡ሕልና ጸጸኒሑ ኢዩ ሕሹኽ ዝብለካ፡ይዝከረካዶ ምስ በዓል ክስቶ ክትሰቲ እንከለኻ፡ክትስዕስዕ፡ዘመነ ንእስነትካ ትዝክሮዶ፡ኩሉ ሰብ ብመልክዕካ ረሪኡ ሰብ ክድነቐልካ፡ንዓኺኸ ይዝከረኪዶ፡ምስ ክስቶ ክትዘሪ እንከለኺ፡እንዳበለ ሕልናኻ ካባኻ ተመንቂሱ ስጋኻ በይኑ ምስ ኮቦርታ ከምዝተርፍ ይገብር።

√√√ ብሰንኪዚ ዝመጽእ ጠንቂ፡-

ስለምንታይ ንድሕሪት ተመሊስካ ትዝክር ኣሎኻ፡ከተማርር ፡ስለዝደለኻዶ ወይሲ በዚ ሕጂ ዘለካ ዝያዳ ከምዝዓገብካ ንእግዚኣብሄር ፍቕርኻ ዝያዳ ክትገልጸሉ ስለዝደለኻ ኢኻ፧
ወገነይ፡ስለምንታይ ንድሕሪት ተመሊስኪ፧ናይ ትማሊ ሂዎትኪ ዝያዳ ካብ ናይ ሎሚ ስለዘዕገበኪሞ፡ንእግዚኣብሄር ዝያዳ ካብ ናይ ሎሚ ከተመስግኖ ስለዝደለኺዶ፡ወይሲ ኣብ እግዚኣብሄር ዘለኪ ቅሬታ ክትገልጺ ስለዝደለኺ ኢኺ፧

√√√ መፍትሒኡ፡-

ሰይጣን በዛ ኩነትዚኣ ተጠቒሙ፡ምሉእ መዓልቲ ኣብ ምስጋናን ኣብ መዓልታዊ ንጥፈታትን ንዝወዓለት ነፍሲ፡ምሉእ መዓልቲ ከየሸነፋ ስለዝወዓለ፡ሕጂ ዕድል ስለዝረክብ በዛ መንገዲዚኣ ተጠቒሙ ክወስዳ ይሕልን።

ኣብ ኮቦርታ እንከላስ ሒዝዋ ናብ ቃልዕ ይኸድ፡ተሸፊና ኣላ ግን ከኣ ብዘይክንፊ በሪራ ዓዲ ዓዲ ከምትበጽሕ ይገብራ፡ድሕሪ ዝተወሰና ደቓይቕ ክትድቅስ ኢያ፡ግን ምስቶም ዝነቕሑ ኮይና ሓጥያትን ጽድቅን ተሰላስል፡ደኺማ ኢያ ዘላ ግን ምስቶም ብርቱዓት ትንፍር።ኣብዚ ጽድቅን ሓጥያትን፡ውድቅትን ትንሳኤን ዝተደባለቐለን፡ደቓይቅ፡ነፍሲ እንታይ ትግበር፧ ንናይ ትማሊ ተዘክሮ፡ጽቡቕ ተኾይኑ ደጋጊምካ ምዝካር የድሊ ኢዩ።ምኽንያቱ ካልእ ከየስተማቐርካዮ ዝሓለፈካ ጽቡቕ ክነብር ስለዝኽእል፡ሕጂ ዕድል ረኺብካ እንከለኻ፡ከምዚ እንዳበልካ ንፈጣሪኻ ኣመስግን።

ኣምላኸይ፡ቅድሚ 10 ዓመትሲ ካብ ምንዝርና ናብ ቃል ኪዳን፡ካብ ሓዳር ኣልቦ፡ምስ በዓልቲ ቤተይ፡ወይ ካብ ስጋዊ ሰብ ናብ መንፈሳውነት ዘሰጋገርካኒ ግዜ ኢዩ ነይሩ።ካብ ሳዕሳዓይ ናብ ወራባይ፡ካብ ደራፋይ ናብ ዘማራይ፡ካብ ተላኻፋይ ናብ ቃሕ ኢሉ ዘይጥት፡ካብ ጨጋርን ዘመናውነት ዝዓብለሎን ሰብ ናብ መንፈሳውነቱ በጨቕ ኢሉ ከም ቅዱስ ሙሴ ገጹ ብመንፈሳዊ ብርሃን ዝደጉሕ ግዜ ኢዩ ነይሩ። ሽዑኡስ ከምቲ ዝነበርክዎ እንተዝቕጽል ጥፍኣተይ ማዕረ ክንደይ ከቢድ ምንባሩ ሕጂ ጎሊሑ ተረኣየኒ ኣሎሞ ስለዝገበርለይ ኩሉ ተመስገን።ቅድሙ ዝነበረ ካካይ ሂዎተይ እካ ከይተጸየፍካ ዝሓቐፍካኒ ደኣ፡ናይ ሕጂ ድኻመይ ማዕረ ክንደይ ሸለል ዘይትብለኒ፡ናይዚ መርኣያ ድማ ብንስሓ መታን ክጸሪ እተገብሮ ዘለኻ ትዕግስትኻ መመሊሰ ንኸመስግነካ ሕልናይ ይድርኸኒ ኣሎ።" እንዳበልካ፡ንውድቀትካ ብናይ እግዚኣብሄር ቀላጽም ከምዝተንሳእካ ንሕልናኻ ብትረት ኣእምኖ።

¶¶¶ ስጋዊ ፍትወት፦

ሕዛ ዓይነት ሕማምዚኣ ዋላ ነቶም ሰብ ቃል ኪዳን ተላቢዓቶም ኢያ።በዛ ለኽፊዚኣ ዘይልከፍ ሰብ ይከሰስ።ሰበይቱ ምስኡ እንዳሃለወት፡ቀትሪ ቆራጽ መራጽ ገይረን ከረኣየኦ ዝወዓላ ይዝክርሞ፡ብፍትወት ምስአን ይነድድ።

ኣብ ኮቦርታ ምስኡ ዘለ ብዓልቲ ቃልኪዳኑ፡ንሱ ግን ብሕልንኡ ኣብ መገሻ ኣሎ።ነታ በዓልቲ ቃል ኪዳኑ "ቁሩብ ተጸበይኒሞ፡ንእሽቶ ዑደት ገይረ ክመጽእ ኢየ" እንተዝብላኳ ምሓሸ።ንሳ ካብ ፍትወተ ስጋ መታን ክሕልወኒ፡ደጋፊ ክኾነኒ ኢላ ዝሓዘቶ ኣማኒኣ፡ሕጂ ግን ብሕልንኡ ኣብ ኮቦርታ ተጠቕሊሉ ክንሱ፡ከይዱ ጠሊምዋ።ለካ ኣብ ኮቦርታ ኮይንካውን ጥልመት ኣሎ ኢዩ።በንጻሩ ድማ ንሳ፡ኣብ ዕላላቶም ከስግልን ጸጸኒሑ፡"እ እ፡እ፡እ፡" ክብላ ምስ ጀመረን፡ንሳውን ምስኡ ኣብ ኮቦርታ እንዳሃለወት ገዲፋቶ ትገይሽ።ክልቴኦም ኣብ ኮቦርታ ግን ከኣ ኣብ መገሻ።ወይ ናይ ኮቦርታ ፈተነ !!!

" እንታይ ኮይኑ ኣስጊሉ፧ምስታ ቀትሪ ኣብ መንገዲ ሰላም ዝብላ ዝነበረዶ ደኣ ርክብ ጀሚሩ ኮይኑ፡በቐዳማይ'ውንኮ ሓንቲ ደዊላትሉ ነይራ ኢያ፡ኣነባ ኢየ ዓሻምበር፡ንሱስ ቀደም ሸይጥኒ ኢዩ።ሕጅስ ኣነ ምስኡ ኣብ ኮቦርታ ስለዘለኹምበር፡ፍጹም ኣይምዘከረንን" ኢላ ነቲ ንዑኡ ዝኸፈለቶ ናይ ቃልኪዳን መንፈሳዊ መስዋእቲ ከም ዋጋ ኣልቦ ትቖጽሮ።ወይ ጉድ ንባዕላ ሕጂ ምስኡ ዘየላስ ምስኡ ኣሎኹ ከኣ በለት።እዛ ኮቦርታ በይና ገዲፎማ ተዓዚሮምሲ ኣብ ኮቦርታ ኣሎና ከኣ ይብሉ።

ኣብ ኮቦርታ ብሕልና፡ ስጋዊ ፍትወት ዝተሓሓዝ ቀንዲ ከኣ ምስ ሰብ ሓዳር፡ዝሙት ኢዩ።መጽሓፍ ቅዱስ፡"ኣብ ልዕሊ ጓህሪ ዝኸደ ሰብከ ኣእጋሩዶ ኣይሓርርን ኢዩ፧ምስ ሰበይቲ ብጻዩ ዝዝሙ ሰብ ከኣ ከምኡ ኢዩ፡ከምዚ ዝገብር ሰብ ከይተቐጽዐ ከቶ ኣይተርፍን ኢዩ።(ምሳ6፣28-29)" ይብል።ስለዚ እዞም ክልተ ሰብ ሓዳር፡እተማሙቖም ኮቦርታ ገዲፎም እተንድዶም ጉህሪ ከናድዩ ብሓሳቦም ተዓዘሩ።

ንንጽል ሰብ፣ሰብ ቃል ኪዳን ዘይኮኑ ከኣ፡-

ቀትሪ ክርእይዎ ዝወዓሉ፡ንኣብነት እታ ወይዘሮ፡ኣወዳት ከመስግንዋ ዝወዓሉ ምስጋናታት በብሓደ ትጽብጽበን።ናይ መነን ትጽብቕ፡ናይ መኖም ዕግበት ትህባ ኣብ ኮቦርታ ኮይና ብሕልናኣ ምስ ኩላቶም ኣብ ኮመንት ጸጺሕፎም መታን ክንእድዋ፡ናይ ፍትወተ ስጋ እንግዶት መታን ክኾና ኢላ ኣብ facebook ዝለጠፈታ ፎቶ፡ደጋጊማ ነቲ ኮምንትታት ትገናጽሎ።ነቶም ሰባት ድማ በብስሞም ነቲ ዘደንጹ ፍትወታ ተዐንግሎም።እቲ ዝገርም፡ምስ ሓደ ጥራይ ከይኣክል ንኹላቶም ዘለዋ ክቱር ፍትወት ንኸተርኢ፡"እዋይ ምስ ክስቶስ፡ኣቤት ክስቶስ፡"እንዳበለት ኣብዘን ዝተወሰና ደቓይቕ፡ብሓሳባ ምስ ኩላቶም ብሕልናዊ ዝሙት ትእለኽ።

ሓይሊ ስለትስእን እምበር፡ንኹላቶም ጸጸዊዓ ምስ ፍትወታ ከተአንግዶም ኣይትጸልእን።ሽዕኡ ምስቲ ኮቦርታ እንዳተጠቕለለት ፈጺማ ካብኡ ብሓሳብ ትንጠቕ።ንኹላቶም በብስሞም፡በብመልክዖም ዘዝግብኦም፡ክስቶ ከምዚ ደሊኻሞ እንካ፡ክስቶ እዚኣ ትሕሸካሞ እንካ እንዳበለት ቀርብለይ ከይበልዋ ባዕላ ንፍትወታ ተእንግዶም።መጽሓፍ ቅዱስ፡"ምድሪ መስዩ፡ ሽዑኡ እታ ኣመንዝራ ሰበይቲ ክትቅበሎ ወጸት፡ክዳን ኣመንዝራ ተኸዲና ነበረት፡ተንኮል ድማ ትኣልም ነበረት፡ኣብ ገዝኣ ድማ ኮፍ ኣይትብልን ነበረት።ሓንሳእ ኣብ ኣደባባይ፡ሓንሳእ ኣብ ዕዳጋ፡ ሓንሳእ ኣብ ቀራና መንገዲ ኣድብያ ትጸንሕ ነበረት።ነቲ መንእሰይ ከኣ ሓኒቓ ሰዓመቶ። (ምሳ7፣10-12)" ኢሉ ናይዛ ኣብ ኮቦርታ ተሸፊና ብሕልና እትሃድን ዘላ ናይ ከቦር ሃዳኒት ቅዱስ ሰሎሞን ቁልጭ ኣቢሉ ይነግረና።

√√√ ጠንቂ ናይዚ፡-

ቀትሪ ብሕልና ክትዝምዎም፡ዝወዓልካ ከይኣኽሉ፡ሕጂ ብምድጋምካ "ናብ ምሉእ ለይቲ ይሰጋገረለይ፡ሕልናዊ ዝሙት ኣይመነኹዎን፡እተን ብግዜ ቀትሪ ዓይነይ እንዳረኣኹ ክምነየን ዝወዓልኩ ሕጅውን ቢስ ቢስ ቢስ፡ዋላ ብድቃሰ ክረኣያኒ ኣሎወን፡" ንምባል እትጽልዮ ጸሎት ድዩ ወይሲ፡ሓቀኛ ጸላኢ ዝሙት ስለዝኾንካ ኢኻ፧ ጸላኢ ዝሙት ተትኾውንሞ፡ምስ፡ዘዝዘከርካያ ጓል ሄዋን፡ንዝሙት ስለዝተመነኻ ብንብዓት ምተሓጸብካ።ወዮ ደኣ ኣይተረዳኣካንምበር ትምነያ ሄዋን እንዳቀተልካያ ኢኻኮ፡መጽሓፍ "ሓደ ዝዘመወ ሰብ፡ እታ ኣካሉ ምስቲ ዝምንዝር ዘሎ ሓደ ኮነ" ይብል።ስለዚ ምስኻ ክትቃጸል ተደሊኻ፡ንዓኣውን እሳት እንዳተመነኻላ ኢኻ።ብርግጽ በዚ ዝገበርካዮ ሕሳት ተንጠልጢሉልካ ኣሎ።እዚ ንስኻውን ኣይትዝንግዖን ኢኻ፡ኣብዛ ሓጻር ደቓይቕ ኣብ ኮቦርታ ኮይካ ነዚ ከተሰላስል፡እንታይ ዘዕውት ነገር ስለዘሎ ኢዩ፧ናይ ዝሙት ድምር ዓወቱ ሲኦላዊ ዋጋ ኢዩ። ዓስብኻሞ ትግምቶ ዲኻ፧

√√√ መፍትሒኡ፡-

ወገነይ ብዓል ቃል ኪዳን ዲኻ፡ልዕሊ ማንም ኣምላኽኻ ነዛ ምሳኻ ኣብ ኮቦርታ ኣምጺልካ ዘሎ ኣምላኽ፡ካብ ዝሙትን ፍትወትን ንኽትሕሎ፡ደጋፊትን ናይ ዘርእኻ ቀጻልነትን ንኽትረክብ እግዚኣብሄር ማዕረ ክንደይ ከምዝሓለየ ኣስተብህል።እዚ ናብ መስቀል ክወስደካ ኢዩ።ኣምላኽኻ ምስ ቤተ ክርስትያን ኣብ መስቀል ኮይኑ ብደሙ ቃል ኪዳን ኣሰረ።እዛ ሕጂ ምሳኻ ኣብ ኮቦርታኻ ዘላ፡እግዚኣብሄር ዝሃበካ እኳ እንተኾነት፡ባዕልኻ ከምዝመረጽካያ ግን ኣይትረስዕ።ክርስቶስ ንቤተክርስያን መረጻምበር።ቤተክርስትያን ንክርስቶስ ኣይመረጸቶን፡ንሱ ምስ መረጻ ግን ንሳዉን ፍቓዱ ክትፍጽም ፍጹም ማሕላ ፈጸመት።ክልቲኦም ዝተጠቐምሉ ማሕላ ኣብ መስቀል ነበረ።ንሳኻውን ወገነይ፡ክትመርጻ እንከለኻ፡"ብዘይካኺ ካልእ ኣይክጥምትን ኢየ፡ድሕሪ ሕጂ ከፊእኪ ጸቢቕኪ ክሳብ መቓብር ናተይ ኢኺ" ኢልካ ዝመርጽካያ ክንሳ፡ሕጂ ብሕልና ምጋሽካ፡  ክሳብ ኮቦርታ ኮይና ድዩ ነይሩ ማሕላኻ፧ ክርስቶስ ማሕልኡ ክሳብ መቓብር ጥራይ ኣይነበረን፡ክሳብ ዘልኣለም እምበር።

ንስኺ ሓፍተይ፡በይንኺ ዲኺ ኮይንኪ፡ወዮ በይንኺ መሲልኪምበር፡በይንኺ ኣይኮንክንን።እግዚኣብሄር ከ ናበይ ከይድኪ፧እንታይ ኢልክዮምከ ነቶም ዘመስገኑኺ ኣጓብዝ ትጥምቲ፡ምጥማት ምጥማቱስ ቆጺርካ ዘይውድኡ ቅዱሳን ኣብ ዙርያኺ ከቢቦምኺ ኣሎዉ።እግዚኣብሄር ከምታ ኣዴኡ ኣብ ጨርቂ ዝጠቕለለቶ፡ምሳኺ ካብ ፈተና መታን ከውጻኪ ኣብ ኮቦርታኺ ተጠቕቅሊሉ ኣሎ።ኣየስተውዓልክን እምበር፡ንሱ ኣብ መብልዒ ማል ዝተጠቕለሎኮ፡ኣብ ኮቦርታ ኮይንካ ንዝስራሕ ናብ ሲኦል፡ዝመርሕ ሓጥያት ጎንዲቡ ምሕረት መታን ክገብር ኢዩ።

ማንም ምልኩዐኛ ወዲ ክትዝክሪ እንከለኺ፡"ኦ ጎይታይ ከማኻ ዝበለ በዓል፡ግርማስ ፍጹም የለን በሊ፡መዳሪ ተዛራቢ ሰብ ንልብኺ ዝሰለበ ኣብ ሕልናኺ እንተመጽዩ፡ጎይታ ኣብ ነዊሕ እምባ ኮይኑ ዝሰበኣኮ ስብከተ ኣንቀጸ ብጿኣን ዘክሪ፡ጨሓም ጉልቡት ነዊሕ ዝቑሞቱ ተኾይኑ ንናዝራዊ ግሩም ዝመልክዑ ክርስቶስ ዘክሪ።ሽዑኡ ካብዚ ዘለኽዮ ፈተነ ኣምሊጥኪ መታን ክትዕወቲ፡ኦ ኣምላኽ ዝሕሸኒ ንስኻ ትፈልጥ ኢኻሞ፡ነቲ ዝሕሸኒ ስደደለይ ኢልኪ ለምኒ። ሰይጣን በዛ ልማኖዚኣ ተጠቒሙ ኢዩ፡ናብ ሓጥያት ዝሸመኪ፡ንስኺ ንጽቡቕ ዝሓሰብክዮ፡ሰይጣን ግን ምስ ብዙሓት ኣብ ዓራት ኮይንኪ ከምትዘሪ ይገብረኪ ኣሎ።ኣስተውዕሊምበር ኣይትተሃመሊ።

¶¶¶ መደምደምታ-

ልብና ንምስጋና የንቅድ።ሕልና ወድሰብ ካብ ምስጋና እንተተነፊጉ፡ክወድቕ ግድን ኢዩ።ዓወት ብምስጋና ኢዩ ዝጅምር፡ብምስጋና ከኣ ይጭረስ።ውድቀት ድማ ብምምራር፡ኣብዛ ሓጻር ደቓይቕ፡ኩሉ ታሪኽ ሂዎትካ እንዳገንጸልካ ንእግዚኣብሄር ተመስጊንካዮ፡ማዕረ ክንደይ ዝኣኽሉ ቅድስናታት ከምዘጠራቐምካ ተመልከት።ቅዱሳን መላእኽቲ 24 ሰዓታት ኣብ ምስጋና ይተግሁ።ንስኻ/ ንስኺውን ኣብዛ ንእሽቶ ናይ ኮቦርታ ወቕቲ ኣብ ምስጋና እንተተጸሚድካ፡ምስ ቅዱሳን እንዳሓበርካ ኢካ።ንስኻ ከይፈለጥካ ምስጋናኻ ግን ናብ መምበረ ጻባኦት ይዓርግሞ መልሲ ሒዙ ድማ ኣብ ደቓይቕ ደበኽ ይብለካ።ለካ በረኸትሲ ኣብ ኮቦርታውን ኣሎ ኢዩ።

ኣብ ኮቦርታ ኮይና፡ንነፍሲ ወከፍ ታሪኽኻ ብዓይኒ ዘይዕጋበት፡ኣብ እግዚኣብሄር ድማ ብፍላይ ብዓይኒ ቅሬታ ትጥምቶም ተኾይንካ ግን፡ከይተረዳኣካ ምስ ፈጣሪኻ እንዳተዳረግካ ኢኻ።መን ኮይንካ ኢኻሞ ንፈጣሪኻ ትከራኸር፧ ዋላ ኣለኒ ኢልካ እትምሓክሉ ግብሪ ጽድቂ ይሃልኻ፡ንሱስ ብዘይ ረዲኤት እግዚኣብሄርዶ ፈጺምካዮ ኢኻ፧ ኣይፋልካን።በዛ ንእሽቶ ናይ ኮቦርታ ሓጥያት ኣብ መንበረ ሲኦል ብዙሓት ኣጋንንቲ ዕልልተኦም ደርጊሖም ኣሎዉ።ወዮ ንስኻ ኣይፈለጥካን እምበር በዛ ኣብ ኣምላኽኻ ዝፈጸምካያ ንእሽቶ ቅሬታ ማሕበረ ኣጋንንቲ ብሕበረት ናይ ታሕጓ ጨብጨባ ኣስሚዖም ኢዮም።ስለዚ ናብ ቅድሚ እግዚኣብሄር ከይዶም፡"እቲ ንስኻ ኣብ መስቀል ተሰቒልካ ዝዓደግካዮስ፡ሕጂ ናትና ኮይኑ፡እቲ ዝተበጃኻዮስ፡ባዕሉ ተማሪኽልና፡እንቋዕ ሓጎሰካ፡" ዝብል ባጫ የስምዑ'ለዉ።ዕጉስ እግዚኣብሄር ግን ትንሳኤኻ ክጽበ ይጽመመካ።እሞ ወገነይ ድቃስ ናይ ሞት ምሳሌ ኢዩ።ቅዱሳን ኣበው ፡ንእሽቶ ሞት ኢሎም ይሰምይዎ ንድቃስ።እሞ እዛ ሰዓት እዚኣ ምላልባሽ እግዚኣብሄር ናይ መወዳእታ ትዕግስቱ ክትከውን ስለትኽእል፡ንጽባሕ ወጊሓ ንንስሓ መታን ክትዳሎ ንኣምላኻ ዕድመን ንስሓን ለምኖ።ነዛ ግዜዚኣ ሓጻር ኢያ ኢልካ ከይነዓቕካ፡ ከም ፍያታዊ ዘየማን ተጠቐመላ። 

"ተዘከረኒ እግዚኦ በውስተ መንግስትከ።"

ዕለት 27 may 2017 ተጻሓፉ
ወስብሀት ለእግዚኣብሄር

ኣእምሮ ዘመንጨዎም ሕቶታትን መልስታቶምን 4ይ ክፋል፣-

በስመ ኣብ ወወልድ ወመንፈስ ቅዱስ ኣሀዱ ኣምላክ ኣሜን።

10.ሕቶ፣-ኣበየናይ ጐዱፍ ደርቢኻኒ፧

ኣበየናይ ከውሒ፧

መልሲ፣- ዘለኻዮ ጎድፍ ኣይኮነን፣ጎዱፍ ግን ክኸውን ኢዩ።ዓለም ጎዱፍ ኣይኮነትን፣ገነት ድማ ኣይኮነትን።ብዙሓት ኣብዛ ምድሪ ስለዝጠዓሞም ኣብ ገነት ዘለዉ ዝመስሎም ኣሎዉ።በንጻሩ ገሊኦም ስለዝመረሮም ከኣ ኣብ ሲኦል ከምዘለዉ ገይሮም ዝሓስብዎ መሊኦም ኢዮም።ዓለም ግን ዓለም እምበር፣ሲኦል ወይ ገነት ኣይኮነት።ሰብነት ወድሰብ ኣብዛ ዓለም ንዘለዎ ሃልወት ምስ ኣብቅዐ ግን ጎዱፍ ኮይና ክትውሕጦ ኢያ። ኣብ መቓብር።ከልቅስሉ ግን ክቐብርዎ ዮም።ብከውሒ ድማ ክድብደብ ኢዩ።ንመሬት ዝፈጠረ ፈጣሪኻ ኢዩ፣ንከውሒ ዝፈጠረውን ፈጣሪኻ ኢዩ።እሞ ንከውሕን ሓመድን ክፈጥር ዘይኣገሞ ክንዮ መቓብር ልዕሊ ናይዛ ዓለማዊት ክብሪ ኣኽቢሩ ከንብረካ እንታይ ይእግሞ፧ ዶስ "ዓለም ፈጣሪ የብላን፣ባዕላ ኢያ ተፈጢራ፣ካብ ሓደ ኢለመንት ዝመበገሲኡ ጀሚራ ድሕሪኡ እንዳዓበየ እንዳዓበየ ምስ ከደ ድማ ናብዚ ዘላቶ ቅርጺ ክትሕዝ ክኢላ" ዝብል ውዱቕ ፍጡራዊ ኣእምሮ ዘመንጨዎ ቅማሬ ሓሳብ ክትስዕብ ስለዝደለኻ ኢኻ፧ ብዙሓት ምሁራት ኢና በሃልቲዶ ለኪሞምኻ።ተኾነ ደድሕር ፍጡር ምኻድ የዕብር እምበር ኣየህጥርን፣ተዘይኮነ ግን ንስኻ ከም ምርጫኽ ግበር፣ነቶም ደድሕር ፈጣሪ ዝመረጹ ግን ኣይተጎናድቦም ሕደግ።ሰሪዚውን ኣብ ናይ ጽባሕ ደሞዝካ ክትክፈሎ ኢኻ።ኢድ ጸናሒት ሸናሒት ኢልካ እትምስሎ ናትካዶ ኣይኮነን፧

11. ሕቶ፣- ውጽእ ኢለ ካብ ውልቃዊ ሕቶ

ኢድ ሂብካዮ ከተብቅዕ

ንምታይ ግን ንሰብ ብኣእምሮ ትሕዞ፧

ንቕድኻ እናተኸተሉ

ትዕዘቦምዶ እዞም ዘሽካዕልሉ፧

መልሲ፣- "ኣእምሮይ ክንዲቲ ንስኻ ትፈልጦ ክፈልጥ ነይርዎ እንዳበልካ ኢኻ።ኩሉ ሰንኪ ዘይምፍላጠይ፣ፍልጠተይ ቆንጢሩ፣ስለጽባሕ ሰንኪ ክፈልጥ ዘይምኽኣለይ ብቀትካ ይረኣየኒ ኣሎ።" ዲኻ ትብል ዘለኻ፧ጨለ ዘረባ ኢዩ ዝመስል፣ግን ምስቲ ላዕላይ ጹሑፋትካ ዝጻላእ ኢዩ።ኣእምሮ ደቂ ሰባት ንናይ ፈጣሪ ኣእምሮ ስለዘይበጽሕዎ ድዩ ቅሬታኻ፧የለን የለን።ንጽሓይ እካ ክንደይ ዝኣክል ሓይሊ ኪሎ ዋት ትውንን ክትመዝኖ ዓቅምኻ ዝልክዖ ኣይኮነን።እዚ ዘይምፍላጥካ ድማ ንጽቡቕካ ኢዩ ሓሲብልካ ፈጣሪኻ።ፐርከስ ንፈጣሪኻ ጥቕልል ኣቢልካ ከምዛ፣5+5 እተፈሊጥካዮ ከም ፍጡርውን ዘይክተኽብሮ ምኻንካ ስለዝፈለጠ ኢዩ፣እዚ ማለት ድማ ስለዘየኽበርካዮ ክብረቱ ከይቅነሶ ሰጊኡ ዘይኮነስ፣ገዛእ ሰብነትካ "ኣነ ኢየ ኣምላኽ፣" ናብ ዘብል ዕብደት ንኸይትበጽሕ ኢዩ።ስለዚ ንኣእምሮኻ ብብዙሓት ሕቶታት ዝተኸበበ ከምዝኸውን ገይሩ ሰሪሕዎ።እዞም ነንመዓልቱ ዝኽሰቱ መልስታት ናይ ኣእምሮኻ ሕቶታት ድማ፣ዕረፍትኻ እምበር ጎርቢ ዘይምኻኖም ፈጣሪኻ ይፈልጥ ኢዩ።

12. ሕቶ፣-ኣእምሮ ካብ ምግሳስ

መልሲ፣- ፈጣሪ ናይ ኣእምሮ በዓል ቤት ክኸውን ይደሊ፣እዚ ድማ ንጥቕሚ ኣእምሮምበር ፈጣሪ ካብ ውህበታቱ በቒቑ፣ቁንጣሮ ካብ ኣእምሮ ዝጽበዮ ስለዘሎ ኣይኮነን።ስለዚ ናይ ኣእምሮ ፈጣሪ ኣብ ውሽጢ ኣእምሮ ሰፊሩ ንኣምሮ ክመርሕ ይደሊ።ፈጣሪ ምስ ኣእምሮ ኪዳን ይተኣታቶ።ግን ብሕጋዊ ቃል ኪዳን እምበር ብዓመጽ ወይ ብስርቂ ኣይኮነን።ፈጣሪ ዘይተኾየጣ ኣእምሮ ሰይጣን ክካረያ ግድነት ኢዩ።ምኽንያቱ ኣእምሮ ካብ ተገዛእትነት ሓራ ዝወጻትሉ ዘመን የለን።ኣእምሮኻ ትሕቲ ፈጣሪ ብምኻኑስ፣ፈጣሪኻ ከም ሓደ ጎበዝ ንሓንቲ ጎርዞ ዓሚጹ ዝተጋሰሳ ገይርካ ሓሲብካዮ።ወገነይ፣ፈጺምካ ስሒትካ ኣሎኻ፣" ከምኡ ዝገብር፣ከምኡ ይነግር።" ዝዓይነቱ ኣብ ልብኻ ዘሎ ሕቡእ ስእሊ ብርዕኻ ትትረኸልና ኣላ።ንኽንደይ ዓሚጽካ፣ንኽንደይ ኣበሳቢስካ፣ንኽንደይ በዲልካ፣ንኽንደይ ብዘይፍታዎም ትሕቲ ኣእምሮኻ ኣምበርኪኻ ብርዕኻ ኣፍ ኣውጺኣ ትነግረና ኣላ።ምላልባሽ ንስኻ ንኻልኦት ዓብላልነትካ ተጠቒምካ ከምኡ እትገብር፣ኣእምሮኣዊ ጉልበትካ ተጠቒምካ፣ካብቶም ተዓመጽቲ ሕልፊ ተጠቃሚ መታን ክትኮውን ኢኻ።ልክዕ ኢዩ ፈጣሪኻ፣ልዕሌኻ ኢዩ፣ልዕሌኻ ድማ ይኽእል።እዚ ምኻኑ ግን ካባኻ ዝረብሖ ቅንጣብ ዘይምህላዉ እመን።ንሱ ከምኡ ዝኾነ ባህሪኡ ኩሉ ከኣሊ ስለዝኾነምበር፣ኣብ ልዕሌኻ ዓብላሊ ኮይኑ ዝንኡ ከርኢ ስለዝደለየ ኣይኮነን።ፍጡር ኣብ ልዕሊ ካልኦት ክዕብልል ዝህቅን፣ተጠቃሚ ክኸውን ስለዝደሊ ኢዩ።ንስኻውን ገና ካብ ማህጸን ኣዴኻ ወጺኻ ኣብዛ ዓለም ንዝተወሰነ ዓመታት ተቐመጥካሞ፣ ክእለትካ ግዱብ ምኻኑ ምስ ተረዳእካ፣"ፈጣሪየይ ዓሚጽኒ" ኢልካ ከተግረምርም ትስማዕ ኣሎኻ። ወይ ግሩምሩም!

ወስብሀት ለእግዚኣብሔር።

5ይ ክፋል ይቕጽል---

እዚ ጽሑፍዚ ኣብ ገጻት ፌስቡክ ተሓንጢጡ ዝተሰንዘረ፣
ንልቢ ገርህታት ኣብ ህልውና እግዚኣብሔር ዘላቶም እምነት ከደናግር ይኽእል ኢዩ ኢለ ስለዝገመትኩ፣
<<ብመልክዕ ቃንቃ ናይቲ ሓታቲ ዝተመለሰ ቁንጫል መንፈሳዊ መልሲ ኢዩ፣>> ኢለ ዝቐረብክዎ ኢዩ።
ሕቶ ክቕበል ፍቓደኛ ኢየ ግን ኣብ ፕሪቫት።