ምዕራፋት ህይወት

በስመ ሥላሴ

ምዕራፋት ህይወት፣

 (ያዕቆብን ኤሳውን እንክጽነሱ ኣትሒዞም ክርክር ተጀሚሩ።)

 

ሰላም

•  ሓዳርካ ሰላም እንተሰፊንዎ ድኽነትካ ብበረኸት ይመልእሞ ስኡን ክንስኻ ሃብታም ትኾውን፣ሓዳርካ ሰላም ተዘይሃልይዎ ግን እቲ ዘለካ ሃብቲውን ከይተረፈ ምሳኻ እንዳሃለወ ተነጢቑ'ዩ ዝውሰድ።ስለዚ ቅድሚ ክትህብትም ምሕላንካ፣ኣብ ቤትካ ሰላም ክሰፍን ተቓለስ።ንሰላም ድለያ ሰዓባውን።

ወጊድ ንጭንቀት

• ከበድድቲ ነገራት ክትንገር እንከለኻ ቀልጢፍካ ኣይትሰንብድ፣ምኽንያቱ እቲ ነጋሪ በቶም ፈኮስቲ ኢሉ ዝገመቶም ነገራት ይጅምረልካ ስለዝህሉ።ነገራት በብምዓርፎም ይበላለጹ ኢዮም። ኸምቲ ንጽቡቕ ዝበልጾ ጽቡቕ ዘሎ፣ንሕማቕ ዝበልጽ ሕማቕ ከኣ ኣሎ።ስለዚ ንእትሰምዖም ብድሆታት ቀልጢፍካ ኣካቢድካ ኣይትረኣዮም፣ እምበርከስ ካብኡ ዝኸብድ ተቐሪብልካ ክህሉው ይኽእል'ዩ።ንስኻ ኣብዛ ብኣወንታውን ኣሉታውን ነገራት ተኸቢባ ዘላ ዓለም ትነብር ክሳብ ዘለኻ ንነገራት ቀልጢፍካ ናይ ምቕባል ተለማመድ።

ጅማሬ ፍቕሪ

• ተፋቒሮም ነይሮም ዝባተኹ ኣሎዉ፣እንከይተፋቐሩ ሓቢሮም ዝነብሩ ድማ ኣሎዉ።ሓወይ ኣፍቃሪ ክትከውን'ኳ እንተዘይከኣልካ፣ ውሕዱ ግን ነቶም እተፍቅሮም ሰባት ንኸይትጸልኦም ካብ ሕጂ ወስን።ምኽንያቱ ንስኻውን ካብቶም ሓንቲ ግዜ ኣብ ጎጆ ፍቕሪ ናይ ፈጣሪ ምስ ኣተዉ ክሳብ ሕጂ ዘይተጸልኡ ፍጡራን ሓደ ኢኻ።ፈጣሪኻ የፍቅረካ ክሳብ ዝሃለወ፣ንስኻውን ፍቕሪ ተላማመድ።

ሓጎስን ተስፋ ምቕራጽን ድምዳሜ ህይወት ኣይኮኑን።

•  ኣብ ዓድና፣ (ኤርትራ) ደበስ ዝበሃል ጉዳይ ኣሎ፣ነቲ ዝሓዘነ ሰብ ናይ ጽንዓት ይሃብካ ደበስ ማለት'ዩ። ሓወይ ተወሲዱካ ዝነበረ ሓጎስ ውን ይድበስ ኢዩ።ስለዚ ከሲርካዮም ዝነበርካ ሓጎሳት ከምዘይምለሱ ርግጸኛ ኮይንካ ተስፋ ቆሪጽካሉ ዘለኻ ምኽንያት ደኣ እንታይ ኢዩ።

ልሳንን ጫማን ተቓረንቲ ገጻት ኢዮም፣ልሳን ተታልል ጫማ ይፍድሕ።

• ጫማ ዕለታዊ ስርሑ ኣብ ሓመድ ምርጋጽ ብምዃኒ፡ ረሳሕን ሸታትን ኢዩ።መብዛሕትኡ ሰብ ድማ ሽታ ናይ ጫማ ይጸልእ ኢዩ።እቲ ዝገርም ግን ጫማ ኣበይ ውዒልካ ናበይን ኣበይን ኬድካ ተሪኹ ክንበብ ዝኽእል ዓቢ መጽሓፍ ምኻኑ ኢዩ።ስለዚ ንስኻ እኳ ኣብቲ ኣይወዓልኩን፣ናብቲ ኣይከድኩን ኢልካ ትደራደር እንተሃለኻ፣ኣብ ገጻት ናይ ጫማኻ ግን ብዛዕባ መንነትካ ክንበቡ ዝኽእሉ ስውራት ቃላት ከምዘለዉ ዘክር።

ንብዓት ናይ ልቢ ቃላት ኢዩ።

• ንብዓት ነቶም ብቓላት ናይ ልሳንካ ንምግላጾም ዝጸገሙኻ ዝተደበቑ ናይ ልቢ ቃላት፡ ጮንጊዑ ብመሳኹቲ ናይ የዒንቲ ኣቢሉ ክድርግሕ ዝኽእል፡ ካብ ልቢ ዝትኮስ ሓይሊ እካኳ እንተኾነ፣ንነገራት ከቃልል ይኽእል ኢዩ ማለት ግን ኣይኮነን።እትነብዖ ዘለኻ ንብዓት ሓቀኝነት ተዘየብሉ ካብ ጥቕሙ ጉድኣቱ ክዛይድ ኢዩ።ሓቀኛ ንብዓት ንዝዓወራ የዒንቲ የብርህ ኢዩ፣ለበ-ስምዒታዊ ንብዓት ግን፣መበገሲኡ ኣንነት ስለዝኾነ ነተን ዘለዋኻ የዒንቲ ከዐውር ተዘይኮይኑ ዝምልኣልካ ነገር የለን።ስለዚ ኣብ ታሪኽ ሕይወትካ እጃም ዘየብሉ ንብዓት ካብ ትነብዕ፣ከይነባዕካ ክትነብር ይሕሸካ።እምበኣር ፍረ ዘየብሉ ንብዓት ክሳራ ስለዝኾነ፣ብዝተኻኣለካ መጠን ንነገራት ብልሳንካ ክትገልጾም ጽዓር፣ልሳን ንነገራት ናይ ምቅላል ዓቢ ጽዓት ኣሎዋ፣ነታ ዝሓዘነት ልብኻ ብሓቀኛ ንብዓትካ ገይርካ'ኳ ከተራሳርሳ ተዘይከኣልካ፣ልኡማት ቃላት ግን ንኸተፈልፍል ኣላማምዳ።

ስንፍና ተቓራኒ ዓወት ኢዩ።

• ናይ ወዲ ሰብ ዓቢ ጸላኢኡ ስንፍና ኢዩ፣ዓቢ ደላዪ ጽብቕካ ድማ ትግሃትካ'ዩ። ብስንፍና ዝተሰነፍካ ሰብ እንተኾይንካ፣ኣብ ውሽጥኻ ዘይረአ ዓቢ ጸላኢ ቦቒሉ ኣሎ ማለት ኢዩ።ኣብተን ክትተግሃለን ዝጀመርካለን ዕለታት ግን ሓድሽ ሸውሃት ናይ ህይወት ከተጥሪ ትኽእል ኣሎኻ ማለት ኢዩ።

ሎቱ-ስብሐት!

ጣዕሳ'ቲ ጨካን።

በስመኣብ ወወልድ ወመንፈስ ቅዱስ ኣሀዱ ኣምላክ።
ጣዕሳ'ቲ ጨካን፣-

እቲ ጨካን ሰብ ብንብዓት ዝጠዓሰሉ ግዜ ክበጽሕ እንከሎ ከምዚ ይብል፣

<<ለካ ደው ኢለ ኣሎኹ እንዳበልኩስ ተቐቢረ'የ ዘለኹ

ለካ ንብዙሓት ዘንብዓኽዎምሲ፣ሕጂ ክነብዕ ስለዘለኒ ኢዩ፣

ለካ ሽግር'ቶም ሽጉራት ከይሰምዕ ኣእዛነይ ኣጽሚመ ዝነበርኩስ፣

ሕጂ ኣብ ትሕቲ ሽግር ክንብርከኽ ስለዝነበረኒ ኢዩ፣

ብሕማሞም ከይቅንዞ፣ንፋሶም ከይጸልወኒ ብንዕቀታዊት ዓይኒ ይርእዮም ነይረ።

ለካ ኣነ ኢየ ዝነዓቕ ነይረ፣ለካ ተነዓቕነተይ ሕጂ ክገሃድ ስለዘለዎ ኢዩ ክሳብ ሕጂ ዝዕገሱኒ ነይሮም።

ሕጂሞ እንታይ ይዓብስ፣

ዘይሕፈስ ንብዓት፣ዘይድበስ ሓዘን፣ደንጋጺ ኣልቦ ሹቕረራ  መን ክቕበለለይ፧

ዘይድንገጾ ሰቆቃይ መን ኢዩ ዝርደኣለይ፣በደለይ ክሳብ ክንድዚ ዝኽብደቱ ምንባሩ ይርደኣኒ ኣይነበረን፣ሕጅ ግን ተረዲኡኒሞ መን'ዩ ዝዕረቐኒ።

በፍጹም ይቕሬታ ዝግበኣኒ ዘይምኻነይ ይፈልጥ ኢየ፣መን ደኣ ኢዩ ዝሰትረኒ፧እንድዒ!

ኣዳዕዲዐ ዝተረዳእክዋ ሓንቲ ነገር ጥራይ ኣላ፣ንሳ ከኣ ምንባር ከምዘይግበኣኒ።

በቃ ክኸይድ፣ክቕበር፣ደጊም ዝሰትረኒ ኣካል የለን፣ኣንቲ መቓብረይ፣ምሉእ ስልጣን ናይ ሰታርነት ንዓኺ ሂበኪ ኣሎኹ። እኔኹ እዚ ኹሉ ጉድ ፈጺመ ከብቅዕ ክስተር ናባኺ እመጽእ ኣሎኹ።በቃ ስተርኒ!!

ኢሉ ክሕነቕ ይውስን፣፣ወሲኑ ነታ ብገዛእ ጉልበቱ ናብዛዓለም ዘየምጽኣ ሰብነቱ፣ሕጂ ግን ብገዛእ ኢዱ ከጥፍኣ ነግ ፈረግ ይብል።ገመድ ይሰቅል፣መሾንቆቓ።ዝሓኽረሉ መበረኺ እትኾኖ ኩርሲ ይቕርብ በታ መሾንቆቓ ክሽንቆቕሞ፣ነታ ኩርሲ ክድንክላ፣፣ኣብ ከባቢኡ ሰብ ከይህልዉ፣ካብ ሙማት ዝጻብኡ ኣካል ከይመጹእ ከባቢኡ ይቆጻጸር።ይድይብ።ናብቲ ኩርሲ ሓኺሩ፣ብየእዳዉ ነታ ገመድ ይድህስሳ።ናብታ መሾንቆቓ ቆው ኢሉ ይጥምት።ልቡ ብሓሳብ ይውጠጥ።ትዝታ ልቡ ንድሕሪትናብታ ዝተወልደላ ዕለት ተወንጭፋ ትዕዘር። ነታ ዝወጻላ ማህጸን ይዝክርሞ፣እተን ነታ ገመድ ናይ መደሓንቲ በቲኸን ካብ ማህጸን ኣዲኡ ፈልየን ዘሕረሳ መሕረስቲ ይዝክረን።ልቡ ብፈረግረግታ ትወሓጥ። ኣብ ልቡ ዘይስማዕ ሕሹኽታዊ ድምጺ ግን ከኣ ንመላእ ሰብነቱ ዝቆጻጸር መቓልሓዊ ናይ ዓውታ ድምጺ ይሰምዕ።ልቡን ሕልንኡን ሓቢረን ይቃየቖኦ።ተዋጢሩ፣ልቡ ወጢራቶ፣ኣሰኒፋቶ።ምስ ሕልንኡ ተሻሪኸን ናብ ዘይወጾ ባሕሪ ሓሳብ ሸሚመንኦ።ልቡ ካብ ሕልና ብዝወሰደቶ ጦብላሕታዊ ድምጺ ከተረስርሶ ትጅምር።

- ንሽግራትካ ዝርዳእ፣ዕዳ ሓጢኣትካ ዝስከም፣በደላትካ ሓጺቡ ዘጽሪ፣ንኹሉንትና ድኻማትካ ብምሕረት ዓይኑ ዝርኢ፣ክንዮ መቓብር ሓሊፉ ዝሰትረካ ፈጣሪ። ናብ እግዚኣብሔር ክቕርብ ከምዝግበኦ፣ፈጣሪኡ ዳግማይ ሓድሽ ናይ ሕይወት ዕድል፣ናይ ዓወት መድረኽ ክኸፍተሉ ምኻኑ፣ሓድሽ ታሪኽ ክጅምር፣  -እገለ ጨካን ፣ዝበሃለሉ ዝነበረ ዛንታ ተቐይሩ፣ብርህሩነት ክትካእ፣ጸላእነቱ ብፈቃርነት ክድበስ፣ኩላቶም'ቶም ክርሕቕዎ ዘለዎም፣ኣብ ጎጆኡ ተሸጊጦም  ባህጊ ናይ ሕቕፉኡ ክህልዎም እንከሎ እንክርኢ፣ልቡ ትነግሮሞ፣ኩሉ ነገር ገዲፉ ድምጺ ፈጣሪኡ ክሰምዕ ይውስን።ሽዑኡ ሓድሽ ሓሳብ ብሓድሽ ውሳነ ይፍልም።ብመጀመርያ ካብታ ኩርሲ ከይወረደ እንከሎ፣ ነታ ገመድ በቲኹ የውርዳ፣ ብሓዊ ከኣ የቃጽላ፣ከምዚ እንዳበለ ድማ ብሕልንኡ ምስ ፈጣሪኡ ክዛረብ ይጅምር።

   - ኦ ጎይታ እቲ ጠፊኡ ዝነበረ በጊዕ ኣነ ኢየ፣እቲ ሃብቱ በቲኑ፣ባርነት ናይ እንዳሓሰማ መሪርዎ ዝመጸ ዓሻ ጎበዝ፣ -ወዲኻ ክኸውን ኣይበቅዕን ኢየ፣ ዝበለካ ሓጢኣተኛ መንእሰይ ኣነ ኢየ፣እቲ ንዘመናት ብሽፍትነት ዝፍለጥ ዝነበረ ወራሲ ርስትኻ ክኸውን ዘይበቅዕ ዕሉል ሽፍታ ኣነ ኢየ።እቲ ናብ ዝዓበየ ክብሪ፣እረ ካብ ገፋፊ ዓሳ ናብ ገፋፊ ሰብ ናብ ምኻን ለዊጥካዮስ ክንዮዚውን፣መራሒ ቤትካ ክኾውን ዝሸምካኒ ክንሰይ፣ - ነዚ ሰብዚ ኣይፈልጦን ኢየ። ኢለ ቅድሚ ደርሆ ቅድሚ ነቆ ቅድሚ ወጋሕታ፣ሰለስተ ግዜ ዝኸሓድኩኻ ኣነ ኢየ። -ኦ ጎይታይ፣ ንጸሎት ይኹን ንምስጋና ዘይበቅዕ፣እካ ድኣ ንፍርድን ብቁጥዓ ክብየነለይ ዝግበኣንን ሰብ ምኻነይ ትፈልጥ ኢኻ።ምሕረት ግን ኣሎካ።ሃብታም ምሕረት።ምሕረትካ ነዞም ኣብዛ ምድሪ ዘለና፣ክሳብ እንምለሰካ፣ክሳብ ብሞት ካብዛ ዓለም እንፍለ፣የእዳውካ ዝርጉሓት ምኻነን ይፈልጥ ኢየ።እምበኣር ስለበደለይ ዘይኮነስ ስለምሕረትካ ክትብል ኣብ እትመጽእ መንግስትኻ ዘክረኒ።እንዳበለት ልቡ ክትነብዕ ትጅምር።ለካ ልቢ'ውን ትነብዕ ኢያ።ፈጣሪ ድማ፣ናይ ከናፍሩ ቅንባሬ ዘይኮነስ፣ናይ ልቡ ዓውታዊ ድምጺ ሰሚዑ  ብድንጋጸን ብምሒር ርህራሄን ይምልሰሉ፣፣

 -ብሓቂ ብሓቂ ይብለካ ኣሎኹ፣ወደይ ሞይትካ ነይርካ ተንሲእካ፣ንዓኻ ክደሊ ክሳብ ክንድዚ ካብ ሰማያት ወሪደ ምምጸአይ፣ ፍቕርኻ ከምዝሰሓበኒ ተረዲእካ ኢዩሞ፣ሕጂ ሕጂ ምሳይ ኣብ ገነት ክትህሉ ኢኻ።ኣባጊዐይ ክትሕሉ፣ዕያውተይ ከተብልዕ ኢኻ፣ እዚ ድማ ብጣዕሳኻ ዝጠዓሱ ብዙሓት ክህልዉ ስለዝኹኑ ኢዩ። እምበኣረከስ ወደይ፣ናይ ዘለኣለም ሕይወትነት ክትወርስ፣ሞት ድማ ኣይክትንክፈካን ኢዩ።እቲ መቓብር ብሞተይ ተደፊኑ ኢዩ።ገመድ ሲኦል ተበቲኹ ኢዩ። ከምታ ዘቃጸልካያ ገመድ ድማ፣ድያብሎስ ብመስቀለይ ኣቃጺለዮ ኢየ።ደጊም ንሱ ትሕቲ እግርኻ ንክንብርከኽ ኣሕሊፈ ካብ ዝህበካ ዘመናት ሓሊፉ ኢዩ።ዝብለካ ነገር ግን ኣሎኒ።ኪድ ርእስኻ ንካህን ኣመርምር፣ኩሉ ዝግበኣካ ድማ ንኽትገብር እቲ ካህን ክነግረካ ኢዩ።ከይትጠሚ ስጋይ ከይትጸምእ ድማ ደመይ ክቕርበልካ ኢዩ።ኣጆኻ ደጊም ብዝሓለፈ በደልካ ኣይጸባጸብን ኢየ፣ኣነ ንዓለም ስዒረያ ኢየሞ፣ንስኻውን ብቃለይ ስዓራ።ደጊም ገመድ ምስቃል ገዲፍካ፣መስቀልካ ተሰከም፣ኣብ ክሳድካ እሰሮ፣ኩሉ ናይ ዓለም ነገር ብመስቀለይ ንዑቕ ኢዩ። ደጊም ንስኻ ናተይ እምበር ናይ ዓለም ኣይኮንካን።እዚ ድማ ንዓይ ምስትስዕብ ኢዩ።ንስኻ ጥራይ ምሳይ ሃሉ እምበር፣ኣነ ደኣ ብዓንተዉኡሲ ዘይምሳኻ ዝነበርኩ።እንዳበለ የጸናንዖ ፈጣሪኡ።

ድምጺ እግዚኣብሔር ምስማዕ ብድያቆን ሃብቶ ኪሮስ፣- 
https://www.youtube.com/watch?v=QlNANxVqnXE
ንዝያዳ መንፈሳዊ መኽሰብ ነዛ ስብከት ኮፒ ኢሉ ብጽንታ ክሰምዓ ይጅምር።

ለካ ፈጣሪ ንግግሩስ ምስ ልብና ኢዩ።ሰብ ንልቡ ከድምጽ እንተጀሚሩ ሓቀኛ ሕሹኽታ ኢዩ ዝሰምዕ።ናይ ሕልና ሕሹኽታ፣ምስ ፈጣሪ እተራኽብ ረቃቕ መስመር ናይ ልቢ። ኣየ ልቢ ወዲ ሰብ፣ኣብ ውሽጢ ሰብነት ተሸጊጣ ክንሳስ፣ምስቲ ረቂቕ ግን ከኣ ንኹሉ ኣድማስ ኣብ ዕማኾ ኢዱ ጨቢጡ ዝነብር ፈጣሪ ንምዝርራብ ትበቅዕ።መቸም እቲ ዓሻ ዝልብመሉ፣እቲ ተንኮለኛ ብግርህና ዝምለኣሉ፣እቲ ጸላኢ ብፍቕሪ ዝስነፈሉ፣እታ ደረቐኛ ልቢ ብመንፈሳውነት እትልምልመሉ፣እቲ ከሓዲ ብእምነት ዝተመለአል ልቢ ዘጥርየሉ፣እቲ ቀታሊ ናብ ፈዋሲ ዝቕይረሉ ዘመን ርሑቕ ኣይኮነን።በንጻሩ ግን ኣቱም ርህሩሃት ብሰንኪ'ቲ ዝተጨከነልኩም ከይትጭክኑ፣፣ኣቱም ጽሉኣት ብሰንኪ'ቲ ተጸላእነትኩም ልብኹም ብጽልኢ ከይምላእ፣ኣንቱም እሱራት ሰንኪ'ቲ ቃንዛ ናይ ሞቕሕኩም፣ ምስ ተፈታሕኩም ንኻልኦት ከይትኣስሩ፣ኣቱም ንስለ ዕለታዊ ዕንጋሌኹም ክትብሉ እትልምኑ ዘለኹም ለመንቲ ድማ፣ ምስ ረኸብኩም ንጥሙያት ከይትንዕቁ ሕጂ ምጥንቃቕ ተለማመዱ።እግዚኣብሔር ኣቐዲሙ ኣጠንቂቑ ኢዩ።

 -ብዙሓት ቀዳሞት ዳሕረዎት፣እቶም ዳሕረዎት ድማ ቀዳሞት ክኾኑ ኢዮም በለ።ናይ ኩሉ ሰብ ድሕነት ክደሊ ክብል ድማ ንኹሉ ሰብ ከም ንሕዝቅያስ፣ናይ ንስሓ ዕድመ እንዳወሰኸ ይነብር ኣሎ።ስለኹሉ ውዕለቱ እግዚኣብሔር ፈጣሪና ይኽበር ይመስገን።

ወስብሐት ለእጊዛብሔር።

በረኸተ ኣብ በረኸተ ወልድ በረኸተ መንፈስ ቅዱስ ምስ ኩሉና ይኹን።

ፍላስፋ ሶቕራጦስን ተዋህዶ ሃይማኖትን

በስመ ሥላሴ

ናይ ኣህዛብ እምነት ብፍላስፋታት ተነቒፋ፣እታ ቅንዕቲ ሓይማኖት ግን ንኹላቶም ረቲዓ፣ክሳብ ዘለኣለም ጸኒዓ፣-

The philosophies fought against the wrong believers and attacked them throgh their words. However, the only one and right phase wins them all. The truthful phase sntands straight, and never ever reforms at all.

ሶቕራጦስ  እቲ ሓታቲ ፍላስፋ (Sokrates the questioner) ፣-

ፍላስፋ ሶቕራጦስ ነቲ"ኣማልኽቲ ብዙሓት ኢዮም!" ዝብል ናይ ኣህዛብ እምነት፣ ብኸምዚ ዓይነት ሓቲቱ ብዝረኸቦ መልሲ ይነቕፎ፣- 

ንሱ፡ ብ(469-399 ዓመተ ዓለም) ቅድሚ ልደተ ክርስቶስ ኣብ ኣቴንስ ግሪኽ ዝነበረ  ሓደ ካብ ፍሉጣት ፍላስፋታት ዓለምና ኢዩ።

ሕቶ ሶቕራጦስ፣- "ስለዚ ኣማልኽቲ ኩሉ ይፈልጡ ኢዮም ኢልካ ኢኻ ትኣምን ማለት ኢዩ፧" ኢሉ ንሓደ ወኪል ኮይኑ ዝመጾ ናይቶም ኣህዛብ መራሒ እምነት ይሓቶ።

መልሲ፣- "እወ፣ምኽንያቱ ንሳቶም ኣማልኽቲ ብምኻኖም ኩሉ ይፈልጡ ኢዮም።"

ሕቶ ሶቕራጦስ፣- "እሞ ኣብ መንጎ ኣማልኽቲ ዘየሰማምዕ ነገር ኣሎዶ የለን ትብል፧"

መልሲ፣- "እወ ግድን እምበር ክህሉ ኢዩ፣መዓልታዊ ኢዮምኮ ዝከራኸሩ።"

ሕቶ ሶቕራጦስ፣-"ስለዚ ኣማልኽቲ እዚ ቅኑዕ ኢዩ፣እዚባ ጌጋ ኢሎም ስለ ቅኑዕን ዘይቅኑዕ ክከራኸሩ ኢዮም ዝነብሩ ማለትካ ኢኻ፧"

መልሲ፣- "እወ፣ንሓድሕድካ ዘይምስምማዕ ክርከብኮ ግድነት ኢዩ።"

ሕቶ ሶቕራጦስ፣- "እምበኣረከስ፣ገለ ገለ ኣማልኽቲ ዝኽእልዎ ነገር፣እቶም ካልኦት ኣማልኽቲ ግን ዘይክእልዎ ኣሎ ማለት ኢዩ፧"

መልሲ፣- "ግድን እምበር፣ክላቶም ደኣ ከመይ ኢሎም ሓደ ዓይነት ዓቕሚ ክህልዎም ኢልካ ክሕሰብ፧"

መደምደምታ ሶቕራጦስ፣- "ስለዚ ኣማልኽቲ ኩሉ ይፈልጡ ኢዮም ዝብል ትምህርትኹም ፈሪሱ።ምኽንያቱ ኩሉ 'ተዝፈልጡ፣ዘከራኽር ነገር ኣይመሃለዎምን። ኣነ ሓንቲ ነገር ጥራይ ኢየ ዝፈልጥ፣ንሳ ከኣ ዘይፈልጥ ምኻነይ ስለዝፈለጥኩ ኢየ።"
ምንጪ ብኖርወጅያን፥ "Den store filosofi boka side 48"፡ ዝተወስደ ኢዩ።)

ኣስተምህሮ ኦርቶዶክሳዊት ተዋህዶ ቤተክርስትያን፣-

ሥላሴ፣- ትርጉሙ፣ሠለሰ ካብ ዝብል ግእዛዊ ግሲ  ዝወጸ (Geezian Verb) ኮይኑ ብዛዕባ ሓድነትን ስለስትነትን ናይ እግዚኣብሔር ዝነግር መንፈሳዊ ትምህርተ ቤተክርስትያን ኢዩ።እዚ ከኣ ሰለስተ እንከለዉ፣ሓደ፣ሓደ እንከለዉ ከኣ ሠለስተ ማለት ኢዩ። ኣብ ህልውነኦም ስለስተ ጥራይ ዝኾንሉ ወይውን ሓደ ጥራይ ዝኾንሉ ዘመን የለን።ካብ ዘለኣለም ክሳብ ዘለኣለም ብሰለስትነትን ብሓድነትን ይነብሩ ኢሉ ዘስተምህር መንፈሳዊ ትምህርተ-ሥላሴ።

ሥላሴ ክንደይ ኢዮም፧ ሰለስተ ይኾኑ ሓደ ይኾኑ።

ብምንታይ ሠለስተ ይኾኑ፣ ብስም ብግብሪ ብኣካል፣

ብምንታይከ ሓደ ይኾኑ፣- ብስልጣን፣ብመለኮት፣ብፍቓድ፣ብፈጣርነት፣ብህልውና፣ብባሕርይ፣

ስሞም እንታይ ኢዩ፣- አብን ወልድን መንፈስ ቅዱስን፣

ኣካሎምከ እንታይ ዘማልአ ኢዩ፣- ንአብ ፍጹም ገጽ፣ፍጹም መልክዕ፣ፍጹም ኣካል ኣሎዎ።ንወልድ ፍጹም ገጽ፣ፍጹም መልክዕ ፍጹም ኣካል ኣሎዎ።ንመንፈስ ቅዱስ ድማ ፍጹም ገጽ ፍጹም መልክዕ ፍጹም ኣካል ኣሎዎ።ኣካሎም ንሓድነቶም ኣይብትኖን፣ሓድነቶም ድማ ንሰለስትነቶም ኣይጭፍልቖን።ሰለስተ ኣካላት ብሓደ መለኮት ተዋሃሂዶም ይነብሩ።"ይሴለሱ በኣካላት፣ወይትዋህዱ በመለኮት" ከምዝብል ሃይማኖት ኣበው።

ናይ ኣካላዊ ግብሮም እንታይ ኢዩ፣- አብ ወላድን ኣስራጽን ኮይኑ ንወልድ ይወልድ፣ንመንፈስ ቅዱስ ከኣ የስርጽ፣፣ወልድ ተወላዲ ኴኑ፡ ካብ ኣብ ይውለድ፣መንፈስ ቅዱስ ድማ ሰራጺ ኢዩ። ካብ ኣቦውን ይሰርጽ።መንፈስ ቅዱስ ካብ ወልድ ኣይሰርጽን፣ወልድ ድማ ካብ መንፈስ ቅዱስ ኣይውለድን።እዚ  እንተኾይኑ ግን፡ ኣካላዊ ስሞምን ካላዊ ግብሮምን ክተሓዋወስ ኢዩ።ስለዚ ኣቦን ወልድን መንፈስ ቅዱስን፣ኣካላዊ ስሞምን ኣካላዊ ግብሮምን ብሰለስትነቱ፣ሓድነታዊ ስሞምን ሓድነታዊ ግብሮምን ከኣ ብሓድነቱ ካብ ዘለኣለም ክሳብ ዘለኣለም ጸኒዑ ይነብር።

ናይ ሓድነታዊ ግብሮምከ እንታይ ኢዩ፧

ብሓድነትኮይኖም ዝፍጽምዎ ግብሪ ኣሎ፣፣እዚ ከኣ ፈጣርነት፣መሓርነት፣ፈቃርነት፣ርህራሄ፣ፈራድነት፣ርትዓውነት፣ጥበብነት፣ከሀልነት ኢዩ። እዚ ማለት፣ኣቦ ኩሉ ይኽእል፣ወልድ ኩሉ ይኽእል፣መንፈስ ቅዱስ ኩሉ ይኽእል፣ግን ብኸኣልነት ሓደ ኢዮም። መለኮቶም ሓደ ስለዝኾነ።ኣቦ ኣብ ኩሉ ይርከብ፣ወልድ ኣብ ኩሉ ይርከብ መንፈስ ቅዱስ ከኣ ኣብ ኩሉ ይርከብ፣ግን ብህልውና ሓደ ኢዮም።ኣቦ ኩሉ ይውንን፣ወልድ ኩሉ ይውንን መንፈስ ቅዱስ ድማ ኩሉ ይውንን፣ግን ስልጣኖም ሓደ ኢዩ።እቲ ሓደ ካብቲ ሓደ እዚ ሃበኒ ተበሃሂሎም ኣይለማመኑን፣ሃብቲ ኣብ፣ሃብቲ ወልድ፣ሃብቲ መንፈስ ቅዱስ ሓደ ስለዝኾነ።ማለት ኩሉ ፍጥረት ትሕቲኦም ትሕቲ ዙፋኖም ብምኻኑ፣ዙፋኖም ድማ ዘይትምቀል ሓንቲ ኢያ።ብዛዕባ ዕድመ ህልውነኦም ድማ፣ኣቦ ካብ ዘለኣለም ክሳብ ዘለኣለም ይነብር፣ወልድ ካብ ዘለኣለም ክሳብ ዘለኣለም ይነብር፣መንፈስ ቅዱስ ከኣ ካብ ዘለኣለም ክሳብ ዘለኣለም ይነብር።ግን ከኣ ብህልውና ሓደ ኢዮም።ኣብቲ ኣብን መንፈስ ቅዱስን ዘለዉዎ፣ወልድ ኣሎ፣ኣብቲ ወልድን መንፈስ ቅዱስን ዘለዉዎ ኣቦ ኣብኡ ኣሎ፣ኣብቲ ኣብን ወልድን ዘለዉዎ ከኣ መንፈስ ቅዱስ ኣሎ። ብህልውና ኣይቀዳደሙን ኢዮም።ኣብ ኣፍቃሪ፣ወልድ ኣፍቃሪ መንፈስ ቅዱስ ድማ ኣፍቃሪ፡ ግን ሥላሴ ብፍቕሪ ሓደ ኢዮም።ኣብ ኣምላኽ፣ንኹሉ ይመልኽ።ወልድ ኣምላኽ፣ንኹሉ ይመልኽ። መንፈስ ቅዱስ ድማ ኣምላኽ፣ንኹሉ ይመልኽ። ሰለስተ ኣማልኽቲ ዘይኮነ ግን ሓደ ኣምላኽ ንብል።ከምቲ ጸሓይ፣ብርሃን፣ሙቐት፣ክበብ ዝወነነት ክንሳ ሓንቲ ጽሓይ እንብላ ማለት'ዩ።

ኣካሎም ከመይ ኢዩ፧ ረቂቕ፣ሰፊሕ፣ኣብ ኩሉ ምሉእ፣እሳታዊ፣ፈጣርያዊ ኣካል ኣሎዎም።እዚ ማለት፣ኣቦ ረቂቕ፣ወልድ ረቂቕ፣መንፈስ ቅዱስ ድማ ረቂቕ።ግን ብርቀት ኣይበላለጹን።

ካብ ቅድስት ሥላሴ ሓደ ኣካል ወልድ፡ ብዛዕባ ሰብ ኮይኑ፣ስለድሕነት ደቂ ሰብ ክብል መከራ ተቐቢሉ፡ ድሕነት ዝፈጸመሉ ዜና ዝነግር መንፈሳዊ ኣስተምህሮ ካብቲ ብዙሕ ብኸፊሉ እዚ'ዩ።

ኢየሱስ እንታይ ማለት ኢዩ፣- ፈውሲ፣መድሓኒት። እዚ ማለት እቲ ካብ ኣቦ ይውለድ ዝበልናዮ ወልደ እግዚኣብሔር፣ናይ ባህሪ ኣምላኽ ኮይኑ ካብ ሥላስያዊ ሓድነቱን ሰለስትነቱን ከይተፈልየ፣ካብ ቅድስት ቅዱሳን ድንግል ማርያም፣ካብ ስጋኣ ስጋ፣ካብ ነፍሳ ነፍሲ ብምውሳድ ፍጹም ሰብ ፍጹም ኣምላኽ ኮይኑ ብስጋ ተራእየ።ፍጹም ሰብ፣ፍጹም ኣምላኽ ብተዋህዶ ተገልጸ፣፣እዚ ፍጽምናዚ ብኽልተ ሸነኽ ይረአ።በቲ ሓደ ወገን ካብ ጥንቲ ምስ ኣቡኡ ብጥንታዊ ማዕርነት እንከሎ፣ ብቅድሙ ፍጹም ኣምላኽ'ዩ ነይሩ። ካብ ሥላሴ ስለዘይንእስ ድማ ኣምላኻዊ ስልጣን ዝውንን ናይ ቅድሙ ኢዩ። በቲ ካልኣይ ወገን ድማ፣ካብ ድንግል ማርያም ዝተወስደ ስጋ ሰብ፣ ፍጹም ስጋ ነይሩ። ምኽንያቱ እታ ነዚ ስጋዚ ንኽለብስ ዝገበረት ማሕጸን ጉድለት፣ሕፍቲ፣ኣበር፣ኣዳማዊ ይኹን ግላዊ ሓጥያት ወይ ብጥንቲ ዝወረሰቶ ኣበር ዘየብላ ፍጽምቲ ሰብ ስለዝነበረት ኢዩ ፍጹም ስጋ ለቢሱ።በዚ ድማ ካብ ጽንሰቱ ክሳብ ዘለኣለም ፣ስግኡ ንመለኮቱ ከየድከሞ፣መለኮታዊ እሳትነቱ ድማ ንስግኡ ከየሕቐቆ፣ብተዋህዶ ተገልጸ።ብመለኮት ረቂቕ፣ብስጋ ግን ግዙፍ ክንሱ፣ኣብ ደስ ዝበሎ ይረቅቕሞ ብሕቱም ድንግልና ይውለድ፣ብሕቱም መቓብር ይወጽእ፣ብሕቱም ማዕጹ ድማ ይኣቱ፣ኣብ ደስ ዝበሎ ከኣ ይገዝፍሞ፣ ይተሓዝ፣ይግረፍ፣ጡፍ ይበሃለሉ፣ይእሰር፣ይስቀል። ብስጋ ክሳቐ እንከሎ፣መለኮት ቃንዛ ኣይተሰምዖን፣ምውታን ከተንስእ፣ሕሙማን ክፍውስ እንከሎ ድማ፣መለኮቱ ንስጋኡ ሃብተ ወሲድካለይ ኢሉ ኣይከሶን።ጥፍጣፍ ዘይነበሮ መለኮት፣ብስጋ ጡፍ በለ። ስልጣን ዘይነበሮ ስጋ ድማ፣ንዕዉር ፈወሰ።ኣብ ሲኦል ከይዱ ድሕነት ኣበሰረ።ስልጣን ዘይነበራ ነፍሲ ወዲሰብ፣ምስ መለኮት ተዋሃሂዳ ኣብ መንግስቲ ሲኦል ደፊራ ኣምላኻዊ ድሕነት ፈጸመት። እቲ ንኹሉ ዝሓዘ መለኮት ድማ፣ብድምጺ ናይ ነፍሲ ደቂ ሰብ ብተወተዋህዶ፣ ብውሱን ኣካለ ነፍስ ናይ ወዲ ሰብ ኣብ መንግስቲ ሲኦል ኣምላኻዊ ድምጹ ደርጎሐ።እዚ ከኣ ብስግኡ ሞተ፣ብመለኮት ድማ ህያው ኮነ።እዚ ኩሉ ዝኾነ፣ንየዒንትና ክምችኦ፣ንሕልናና ድማ ከሰማምዕ ኢሉ ደኣ ነዚ ኩሉ ገበረ እምበር ንሱስ ኣይለዋወጥን፣ኣይተሓዋወስን፣ ኣይፈላለን፣፣ ኢየሱስ ክርስቶስ ካብ ክልተ ኣክላት ሓደ ኣካል፣ካብ ክልተ ባሕርያት ድማ ሓደ ባህርይ፣ብምውሳድ ብተዋህዶ ሓደ ባህርይ ሓደ ኣካል ኮነ።ሓንሳብን ንሓዋሩን መለኮትን ስጋን ስለዝተዋሃሃዱ ድማ፣ኣብ ሥላስያዊ ዙፋኑ ማዕረ ኣምልኾ፣ማዕረ ስልጣን፣ማዕረ መንግስቲ፣ማዕረ ፈራድነት፣ማዕረ መሓርነት ይውንን።ወልድ ዋላ ደኣ ብስጋ ይገለጽ እምበር፣ካብ ሥላሴ ኣይንእስ፣ካብ ሥላሴ ኣይዓቢ።ኣብን ወልድን መንፈስ ቅዱስን ካብ ዘለኣለም ክሳብ ዘለኣለም ሓደ ኣምላኽ ኢልና ንኣምን።

ክርስቶስ ካብ ዙፋን ሥላሴ እንከይተፈልየ፡ ንየዕይንትናን ሕልናናን ብዝምችእ ግልጸት ኣብ ቀራንዮ ወዓለ።

ብኸመይ ፈዊስና፣- ካብ ሥላሴ ሓደ ኣካል ወልድ፣ስጋ ናይ ሰብ ብፍጹም ተዋህዶ ተሰግዩ፣ኣምላኽነቱ ከይሓደገ፣ሰብኣውነቱ ከይለወጠ፣ሰብ ኮይኑ፣እቲ ንድሕነት ዘድሊ ነገር ብዘይካ ሓጢኣት ንበይና፣ካልእ ኩሉ ብተግባር ፈጹሙ ኣድሓነና።ክሓምም እንከሎ፣ሕሙማት ይፍውስ፣ክወድቕ እንከሎ፣ንዝወደቑ የተንስእ፣ክድቅስ እንከሎ፣ንዝሞቱ የበራብር፣ንግብጺ ክስደድ እንከሎ፣ነቶም ናብ ሲኦል ዝተሰዱ ማሪኹ ይመልስ፣ክጠሚ እንከሎ፣ንዝጠመዩ ይዕንግል፣ክጸምእ እንከሎ ንዝጸምኡ የርዊ፣ክህረም እንከሎ፣ንዝቖሰሉ ይዝንን፣ክሽገር እንከሎ፣ንዝተሸገሩ ናጽነት ይእውጅ ነይሩ።

ነዚ ኲሉ ስለምንታይ ፈጸሞ፧ እዚ ድማ ትንቢት ንምፍጻም፣ሰብኣውነትና ከምዝተወሃሃዶ ንኸረጋግጸልና፣ንጥበበ ሰይጣይን ከንቱ ክገብር፣ፈራድነቱን መሓርነቱን ከሰማምዕ፣ኣርኣያ ክኾነና ኢሉ ደኣምበር ዓቕሚ ስለዝወሓዶ ኣይኮነን፣ዝጠሚ፣ዝጸምእ፣ዝልምን፣ዝወድቕ፣ዝትንስእ፣ዝስደድ፣ዝሓምም፣ዝደክም ዝነበረ።ኣብ መወዳእታ ድማ ብፍቓድ ሥላሴ፡ ሓንቲ ግዜ ጥራይ ኣብ መስቀል ክሳብ ሞት ብምእዛዝ፣ንሞትና ቀበሮ።ኣብ መስቀል ንድያብሎስ ኣስሮ፣ንሕና ከኣ ተፈታሕና። ክርስቶስ ሞትና ክቐምስ ንሕና ድማ ናይ ትንሳኤ ዕድል ክንረክብ ፍቓዱ ኮነ። ፍቓዱ ማለት ፍቓድን አብን ወልድን መንፈስ ቅዱስን ማለት'ዩ። እዚ ኩሉ ዝተባህለ ንድሕነት ደቂ ሰብ ዝምልከት፣ሓንሳብን ንሓዋሩን ዘይድገም ኮይኑ ኣብዛ ማእከላዊት ምድረ ኣብ ጎልጎልታ ኣብ ቀራንዮ ፈጸሞ።

መተሓሳሰቢ፣

https://www.youtube.com/watch?v=zH3K84KuHFQ

( ነዛ መዝሙር ኮፒ ገይርካ ስምዓያ)

እዚ ኲሉ ውዕለት፡ ብናይ መን ኣፍልጦ'ዩ፧፣- ነዚ ክገብር እንከሎ፣ብዘይ ፍላጥ ናይ ኣቦን መንፈስ ቅዱስን ኣይኮነን።እንታይ ደኣ ፍቓድ ኣቦን፣ፍቓድ መንፈስ ቅዱስን ዝሰመሮ፣ስላሴ ዝፈረምሉ፣ፍታዎም ኴኑ ኣምላኻዊ ክታም ዘምበርሉ ኢዩ።ኣብ ነፍሲ ወከፍ ስጉምትታቱ፣ ሥላሴ ሓደ ፍቓድ ስለዘሎዎም፣ንኹልንትናዊ ሰናያትና ተባሂሉ ዝተኸፍለ ዋጋ፡ ፍቓዶም ሓደ ነይሩ። ድሕነት ደቂ ሰባት ብፍቓድ ሥላሴ ተኸናወነ፣፣እዚ ማለት፣ኣቦ ነቲ ሓደ በይኑ ካብ ሕቕፉ ዘይፍለ  ናይ ባህሪ ወዱ፣ክሳብ ክንድዚ ስጋ ሰብ ለቢስሱ፡ እረ ክሳብ ሞት ንምቕማስ፣ ክእዘዝ ፍታዉ ብምኻኑ ኣፍቀረና። ወልድ ክሳብ ገዛእ ርእሱ ከይነሓፈን ከይተጸየፈናን፡ ክንድዚ ስጋ  ሰብ ለቢሱ ንሞት ክቐምስ ፍቓዱ ኮይኑ ስለዝፈጸሞ ኣፍቀረና። መንፈስ ቅዱስ ድማ ነቲ ዝተፈጸመ ናይ ድሕነት ስራሕ ካብ ጅማሬኡ ክሳብ ፍጻሜኡ ብፍቓዱ ሓተሞ። እዛ ኣብ መስቀል ዝተፈጸመት ኣምላኻዊት ፍቕሪ፣ ብማሕተም ሥላሴ ዝተፈረመት ኣምላኻዊት ናይ ድሕነት ፍቓድ ሓንቲ ኢያ። ደጊም ንክርስቶስ ከምቲ ዝነበሮ ብስጋዊ ባህሪ ኣይንፈልጦን ኢና።ምንም እኳ ንዑኡ ብኽምዚ ደኻሚ፣ሓማሚ ስጋ ፈሊጥናዮ እንተነበርና፣ሕጂ ብኸምኡ ኣይንፈልጦን ኢና።እቲ ዝሓምም፣ዝሳቐ፣ዝደክም፣ዝጠሚ፣ዝስደድ፣ዝልምን ዝነበረ ወልድ ከምኡ ኢሉ ከምቲ ዝነበሮ ኣይኮነን ዘሎ።ከምቲ ከምዝሰኣነን ዝተጸገመን ኮይኑ ዝልምኖ ዝነበረ ኣይኮነን ሕጂ ዝልምን ዘሎ፣ከምቲ ከምዝደኸመ ኮይኑ ዝድቅሶ ዘዕርፎ ዝነበረ ኣይኮነን ሕጂ ዝድቅስ ዘሎ። ድኻምን ስእነት ሕጂ ኣይንታዩን ኢዩ ንዕኡ። እንታይ ደኣ ኣብቲ ዘይቅረብ እሳታዊ ዙፋን ምስ ኣቦን መንፈስ ቅዱስን ንዘለኣለም ኣለም ይምለኽን ይምስገንን ኣሎ።መላእኽቲ የምልኽዎ፣ይሰግድሉ።ንሳቶም እቶም ቅዱሳን መልኣኽቲ ካብ ቅድሚ ምጽናሱን ኣብ ማህጸን ምስተጸንሰን ጀሚሮም ክሳብ ድሕነት ደቂ ሰባት ፈጺሙ ኣብ ዙፋኑ ዝቕመጥ ካብ ኣምልኾ ሥላሴ ኣቃሪጾም ኣይፈልጡን።ብኻልእ ሸነኽ ከኣ ነቲ ዝተመደበ ግዜ፣ማለት ንሓጢኣንን ጻድቃንን ፍርዲ ዘወሃበሉ፣ክሳብ ዝኣክል የእዳዉ ንፍርዲ ቀሪብወን ኣሎ።እተን ኣብ መስቀል ዝተሸንከራ ኣጻብዕቱ፣ሕጂ ምእንታና ናብ ካልእ ይልምና ዘይኮናስ፣ በንጻሩ ካብቲ ኣምላኻዊ መግቦተን ደኣ ይምግባና'የን ዘለዋ፡ ብከሃልነተን ድማ ይመርሓና።ኣብ መወዳእታ'ውን ነታ እትመጽእ ናይ መወዳእታ ዕለት፡ ፍርዲ ክህባ ተቐሪበን ኣሎዋ።እዚ ከኣ ነቶም ኣብ ትሕቲ ብርኪ ካህናት በሓቀኝነት ተናሲሖም፣ኣማናዊ ስግኡን ደሙን ዝምገቡ ዘለዉ ሰዓብቱ፣ ዘለኣለማዊ ሕይወት፣ነቶም ኣንጻር ፍቓዱ ዝኸዱ ድማ ብዘለኣለማዊ ሞት ክፍረዶም ምኻኑ ብኣምላኻዊ ስልጣኑ ዝብይኖ እዩ ክኸውን።ኩሉ ብግሁድን ብስዉርን ዝተገብረ ኣብ ቅድሚ ሥላሴ ቅሉዕ ስለዝኾነ ፍርዱ ሓቀኛ ኢዩ። ደጊም ጎይታናን ኣምላኽናን መድሓኒናን ኢየሱስ ክርስቶስ ፈራዲ እምበር፣ኣማላዲ፣ጸላዪ፣ደኻሚ፣ሓማሚ፣መዋቲ ኣይኮነን።ቅድሚ ሕጂ ብኸምኡ ተገሊጹ ደኣ ንረኣዮ እምበር ሕጂ ብኸማኡ እይንፈልጦን ኢና።ብሕጂ ክመጽእ እንከሎውን ብኣዝዩ ዘፍርሕን ዘሰንብድን ግርማ፡ ብነበልባላዊ እሳት ተኸቢቡ፣ቅዱሳን እንዳዓጀብዎ ኢዩ ንኣምላኻዊ ፍርዱ  ክግለጽ፡ ከምቲ ክውለድ መብልዕ ማል ዝመጾ ኣይኮነን ክኸውን።

  

ቅድስት ሥላሴን ኣእላፋት ቅዱሳንን

ቅዱሳንከ ኣማልኽቲ ድዮም፧

ቅዱሳን፣- ንባዕሉ እቲ ቅድስና ዝብል ቅጽላዊ ስም፣( Adjectival noun) ናይ ባህርይኦም ስም ኣይኮነን።እንታይ ደኣ ፈጣሪኦም ብጸጋ ካብቲ ምልኣታዊ ሃብቱ ዝተዓደልዎ ጸጋ ኢዩ። ንባዕሉ ኣብ መንጎ ቅዱሳን፣ናይ ምብልላጽ ዕብየተ ደረጃ ኣሎ።እዚ ከኣ፣ልዕሊ ኩላቶም ቅድስት ድንግል ማርያም ክትከውን እንከላ፣ቀጺሉ ቅዱሳን መላእክት፣ቅዱሳን ነብያት፣ቅዱሳን ሃዋርያት፣ቅዱሳን ኣንስት፣ቅዱሳን ሰማእታት፣ቅዱሳን ሊቃውንት፣ቅዱሳን ጻድቃናት፣ቅዱሳን ነገስታት፣ ቅዱሳን ህጻናት፣ቅዱሳን መካናት፣ቅዱሳን ኣሳእል፣ቅዱሳን መጻሕፍቲ፣ቅዱሳን ዕለታት ንዋየ ቅዱሳን እንዳበልና በብደረጅኡ ንሰርዖ።እዚ ባዕሉ እግዚኣብሔር ካብቲ ምልኣታዊ ውህበታቱ ሰሊሙ ሸላሊሙ ንዓና ንክንጥቀመሉ ዝመጠወልና ሀብተ በረኸቱ ኢዩ።ተጠቀምቱ ድማ ንሕና ደኣምበር፣ፈጣሪሲ ካብዞም ዝበልናዮም ቅዱሳን ዋላ ሓንቲ ዝጥቀመሉ ነገር የለን።ምኽንያቱ እግዚኣብሔር ኩሉ ስለዝኽእል፣ንኹሉ ስለዝውንን። 

ሶቕራጦስሲ ለካ ቅኑዕ መላሲ ስለዝሰኣነ'ዩ እምበር፡ ነቶም "ኣማልኽቲ" እናበሉ ንባህሪ ፈጣሪ ዘባዝሑ ኣካላትሲ፡ በዳሂት ሕቶ'ዩ ቀሪብሎም ነይሩ።

እግዚኣብሔር ንምኽሪ ኣህዛብ ከንቱ ይገብሮ።ንሓሳባት ሕዝብታት የጥፍኦ።ምኽሪ እግዚኣብሔር ግና ንዘለኣለም ይነብር፣ሓሳባቱውን ንውሉድ ወለዶ ይነብር።መዝሙር 33፣10-11 ሓሳባት እግዚኣብሔር ሒዛ እትነብር ቤተክርስትያን ኣይትሕደስን። ክሳብ ዘለኣለም ዝጸንዕ ሓሳባት ደኣምእምበር ዝለዋወጥ ዝሕደስ ሓሳባት የብላን። ኣብ መንጎ ሓሳባት ናይ ፍላስፋታት ግና ነፍሲ-ወከፎም ታሕዲስ፣ (Reformation) ነይሩን ኣሎን ክቕጽልን'ውን ኢዩ።ቤት እግዚኣብሔር ግን መራሒኣ መንፈሱ ስለዝኾነ ሰጊኣ እትልውጦ ወይ እተሐድሶ ሓሳባት የብላን፣ንሱ ይመርሓ ንሱ ድማ ይውንና።ኣብዛ ቤትዚኣ ክሳብ ዘለኣለም የጽንዓና።

https://www.youtube.com/watch?v=9qqEmiZ3_NQ 

https://www.youtube.com/watch?v=iITjv3u8eEg

(ንዝያዳ ሓበሬታ ኮፒ ገይርካ ተገዲስካ ነዘን ክልተ ቪድዮ ብድምጺ ስምዓየን።)

በረኸተ ኣብ በረኸተ ወልድ በረኸተ መንፈስ ቅዱስ ምስ ኩሉና ይኹን፣ኣሜን።
ወስብሐት ለእግዚኣብሔር።

ለውጢ ሕብረተ-ሰብና ብመንፈሳውያን መርዓታትና

በስመ ኣብ ወወልድ ወመንፈስ ቅዱስ ኣሀዱ ኣምላኽ፡

ብዛዕባ መርዓ ዝምልከት ሰፊሕ ኣርእስቲ ወሲድካ ምይይጥን ትምህርትን ዘድልዮ ጉዳይ እካ እንተኾነ፡ንሱ ንግዚኡ ገዲፈ ግን ኣብ መንፈሳውያን መርዓታትና ንዘለኒ ግንዛቤ ክገልጽ።
ኣብዚ ሕጂ እዋን መንእሰያት ናይ ቤተክርስትያን ብፍላይ ከኣ እዞም ኣብ ወጻኢ እንርከብ፡እቲ % ደኣ ይውሕድ ይኸውን እምበር፡ልዕሊቲ ባዕሎም ንሓድሕዶም ተራኺቦም፡ንዒ ንመርዖ፡ንዓ ንመርዖ ተባሃሂሎም ዝቀራረብዎ፡ኣብ ቤተክርስትያን መጺኦም'ውን ሕጊ እግዚኣብሔር ንምፍጻም ድሉዋት ኮይኖም ምሉእ መርዓ ዘሕልፉ ውሑዳት ኣይኮኑን።በዚ መንጽርዚ ድማ፡ኣብ መንጎ'ቶም መንፈሳውያን ተመርዓውትን ቤተሰቦምን ሰፊሕ ቁሩቅስ ይካየድ ኢዩ።እዚ ማለት፡እቶም ሓደ ወገን፡ነቲ መርዓ ብጛይላ ተዘይገይርናዮ፡ባንዲ ተዘይኣምጻና፡ተዘይሳዕሳዕና፡ኢሎም ኣሻፈረይ ክብሉ እንከለዉ፡እቶም ደቂ ቤተልርስትያን ድማ፡ስለዝተማሃርዎ፡ድሌታቶም ምሉኡነት ስለዝደልዩ፡ኣይንደልን፡መዝሙር ኢና ንገበር ክብሉ ከቢድ ክርክር ኢዩ ዝካየድ።

ከም ሓቂ፡ዋላ ብቆጦባዊ መለክዒ እንተርኢናዮ፡ብመዝሙር ዝሓልፍ መርዓን፡ብጛይላ ዝፍጸምን ብዙሕ ፍልልያት ኣሎዎ።እቶም ሰብ ውራይ'ውን እንተኾነ፡በቲ ሕብረተሰብ ከይንጸሉ፡ከይክዕቡኒ ንናይ ድጄይ ዝኸውን ገንዘብ ከየውጽእ ስለዝበቐቐ ኢዩኮ፡ተባሂሎም ከይሕመዩ ስለዝሰግኡ ደኣ እምበር፡ንቆጦባ ዝምልከት ኣየናይ ከምዝሓይሽ ኣዳዕዲዖም ይፈልጡ ኢዮም።ብኻልእ መዳይ'ውን፡መዛምራን ውሑዳት ኢዮም፡መርዓይ ዘውዓውዕ ነገር ስለዘየብሉ፡ተዓዳሚ ክታኸስ ኢዩ፡ዝብል ስግኣት ስለዝህልዎም ድማ በቲ ሓደ ሸነኽ፡ዘይትጽበዮም ዝነበርካ መንፈሳውያን የሕዋት፡መርዓኦም ብጛይላ ክገብሩ ትርኢ ኢኻ።ዝገርመኒ እታ ደርፊኮ ብድጄይ ኢያ ትካይድ።ድጄይ ከኣ መብዛሕትኡ ካብ ዩትዩብ ወይ ሪከርድ ዝተገብረ ኢዩ ነቲ ህዝቢ ዘሳዕስዖ።እሞ ኣንታ ሓወይ፡ደርፊ ሓጢኣት ምኻኑ ትፈልጥ ኢኻ፡ተዓዳሚ ከይታኽ ክትብል ካብ ድጄይ ተምጽእ ግን፡መዝሙር ኣብ ዩትዩብ የለን ድዩ፧ እሞ ፍጡራት ተዓደምቲ ከይታኸሱ ክትብልዶሞ፡ምስ ፈጣሪኻ ምቅይያም ይሓይሽ ኢልካዮ፧እታ ሓጢእት እተፍሪ ድጂይ ብጽድቂ እተፍሪ ድጂይ ተቐየርካያኸ እንታይ ትኸውን፧ ዶስ ዩትዩብ ናይ ጛይላ ጥራይ ኢዩ ኢልካ ስለዝደምደምካዮ ኢዩ፧እዚእታት ንብዙሓት መንፈሳውያን ተመርዓውቲ ስለዝግኦም፡ድጄይ ይመርጹ።ብዝኾነ ቁርጽ ኣቢሎም ንመንፈሳዊ መርዓ ዝውስኑ ኣሎዉ።እዞም መንፈሳውያን ወሰንቲ እዚኣቶም ንቤተ ክርስትያንን ንሕብረተሰብናን ዓበይቲ ሰባኽያን ኢዮም። እዚኣቶም፡"ቆሪብካ፡ወዲ ቤተክርስትያን ኮይንካ፡ናይ ዓለም ነገር ፈንፊንካ ከተብቅዕ፡ተሓጺብካ ናብ ጭቃ፡እሞ ድማ ናብ ጛይላን ዳንኬራን ኣምላኾም ከምዘግህዩ ስለዝፈልጡ ኢዮም ኣብ መርዐኦም መዝሙር ዝመርጹ።

መቸስ ብሰንኪ ጛይላ ካብ እግዚኣብሔር ዝመጽእ ቅሬታ ንምፍላጥ ካብ ሕጂ እዝን እትን ምባል፡ሊቃውንቲ ባዕሎም ክነግሩና ይሓይሽ።ብሕጽር ዝበለ ግን፡ጛይላን ደርፍን፡ሓጢኣት ምኻኑ፡እግዚኣብሔር ከምዘይሕጎሶሉ፡ኩላቶም ቅዱሳን መጽሓፍትን፡ቅዱሳን ኣበውን ይምህሩና ኢዮም።ምላልባሽ ስለዝሳዕሳዕካ ንስኻ ትሕጎስ ትኾውን፡እግዚኣብሔር ግን ኣይሕጎስን ኢዩ።እሞ ብዛዕባ ንፈጣሪ ዘሕጉሶን ዘግህዮን ነገር ግዳሽ ዘየብልካ፡በንጻሩ ግን ዘሕጉሰካ ነገር ጥራይ ዘገድሰካ እንተኾይኑ ደኣ፡ ካብቶም ዘይኣምኑን ክሓድያንን  ብምንታይ ኢኻ ትፍለ።ንሳቶም ዘይኣምኑን፡ከም ድላዮም ዝኸዱንኮ ኣምላኽ የለን ስለዝብሉ ኢዮም።ንስኻ ግን ህልውና ፈጣሪ እንዳኣመንካስ፡ንሱ ዝጸልኦ ነገር ንምግባር  መን የተባብዓካ ስለዘሎ'ዩ፧ ስለዚ ብሓቀኝነት ከሕጉሰካ ዝግብኦ፡እቲ ፈጣሪኻ ዝሕጎሰሉ ነገር ኢዩ ክኸውን ዘለዎ።ፍጹም ክትጉህየሉ ዝግባእ ድማ፡እቲ ፈጣሪኻ ዝጸልኦ ነገር እንተፈጺምካ ኢዩ።እዚ ኸኣ እምነትካ ስለዝግድደካ ኢዩ።

ካብ ትዕዝብተይ፡እዞም መርዓና ብመዝሙር እንገብሮ ዘለና ሰባት፡ብተዘዋዋሪ ይኹን ብቐጥታ፡ኣብ ቤተክርስትያንን ኣብቲ ሕብረተሰብናን ዓቢ ኣስተዋጽኦ ትገብሩ ምህላውኩም ዝዝንጋዕ ኣይኮነን።እዚ ድማ፡ህዝቢ ናይ ደርፊ ወልፊ ኣብ ውሽጡ እንዳሃወጾ ክንሱ፡"ቶባእ!" ኢልካ ከልኪልካዮም ክትውዕል እንከለኻ፡በንጻሩ ድማ ምሳኻ ልሳኖም ንመዝሙር ኣእዳዎም ንሸብሸቦ ክለማመድ እንክትዕድሞ፡ናይ ደርፍን ጛይላን መንፈስ ካብ ክልል ሕብረተሰብ ነፊጹ ንኽከይድ ጸቕጢ እንዳገበርካ ኢኻ።ስለዚ ኣይርደኣናን ይኸውን ደኣ'እምበር፡ነፍሲ-ወከፍ መርዓ ብመዝሙር ክትሓልፍ እንከላ፡ልቢ ናይ ነፍሲወከፍ ተዓዳሚ፡ብፍላይ ከኣ ብዓለማዊ መንገዲ ተዋሒጡ ንዝነብር ሰብ፡ኣብ ህርመት ልቡ፡ሓድሽ ጦብላሕታ ናይ መንፈሳዊ ጥቕሚ ንኽስቆሮ እትዕድም ቅኒት ኢያ።እዚ ድማ ዋላ ኣብ ቆጦባዊ መዳይ ከይተረፈ መዝሙር ዓቢ እጃም ምህላዉ ርድኢቱ ከስፍሕ ይሕግዞ ኢዩ።ድሓር ከኣ ወሎዶ ክልወጥ እንተኾይኑኮ ፡ቀስ ብቐስ ኢዩ'ምበር ብሓንቲ ግዜ ኣይኮነን፡፡ መንፈሳውያን መርዓታትና'ምበኣር፡ ይውሓድ ይብዛሕ ብዘየገድስ፡ኣብ መንፈሳዊ ለውጢ ናይ ሕብረተ ሰብና እጃመን የበርክታ ምህላወን ኢዩ።

በዚ ኣጋጣሚ እቶም መርዓኹም ብመዝሙር እትገብርዎ ዘለኹም፡ብስም ቤተልርስትያን ከየመስገንክኹም ክሓልፍ ኣይደልን።ብርግጽ ካብ ቤተሰብኩምን መቕረብኩምን ብዙሕ ጸቕጥን ግጭትን ከምዘጋጥመኩም ርዱእ ነገር ኢዩ።ግን ቀዳምነት ናይ መን ድምጺ ምስማዕ ይሓይሽ፡ናይ እግዚኣብሔርዶ፡ወይሲ ናይ ቤተሰብ፡ድምጺ ናይቲ ካብ መለኮታዎ ክሂለቱ ዝፈጠረናዶ፡ወይሲ ናይታ ወሊዳ ኣጥብያ ዘዕበየትና ኣደ፧ ናይ መኖም ክብሪኸ ይበልጽ፡ናይ ወለድናዶ፡ወይሲ ናይ ፈጣሪና፧ እዚ ሕልና ናይ ኩሉ ሰብ ዝምልሶ ሓቂ ኢዩ።መጽሓፍ ቅዱስ ድማ፡"እቲ ንቤተሰቡ፡ንስድርኡ፡ንወለዱ፡ንሰበይቱ፡ንደቁ፡ንሃገሩ ወዘተ ካባይ ኣብሊጹ ዝርኢ ንዓይ ኣይበቅዕን ኢዩ።" ኢዩ ዝበለና።ንነገራት ከነፍቅሮምን ክንእዘዞምን እካ ሰናይ እንተኾነ፡ኩላቶም ግን ትሕቲ እግዚኣብሔር ኢዮም።ስለዚ ንኹላቶም መቕረብና ነፍቅሮም ግን ልዕሊ እግዚኣብሔር ክኸውን ኣይግበኦን።ትእዛዝ ወለድና ንቀበል ግን ልዕሊ ትእዛ ፈጣሪና ገይርና ኣይኮንና ክንቅበሎ።ወለድናስ እግዚኣብሔር ብሓደራ ንኸዕብዩና ዝኣዘዞም ደኣምበር፡ንፈጣሪ ዝእዙዙ ኣይኮኑን።
እግዚኣብሔር ዘመንና ወሎዶናን ዝልውጥ ሓይለ መንፈሱ ይልኣኸልና።
ወስብሐት ለእግዚኣብሔር።

መላእኽቲ፣- 1ይ ክፋል

በስመኣብ ወወልድ ወመንፈስ ቅዱስ ኣሀዱ ኣምላክ ኣሜን።

ትርጉማዊ ስሞም፣-

ሀ) ምስ ተፈጦኣውነቶም ዝተተሓሓዘ ብምኻኑ፣-

መልኣኽ ቃል ንንጽል ዝውክል ኢዩ፣መልኣኽቲ ድማ ድርብ።ግእዛዊ ስሞም መልአክ፣መላእክት ይብሎም።መልኣኽቲ ዝበሃሉ፣ብስጋዊ ዓይኒ ዘይረኣዩ፣ብስጋዊ ጭባጤ ዘይድህሰሱ፣ብዝሖም ሓንሳብ ምስ ተፈጥሩ ንዘልኣለም ዘይጭመሮ፣ብዝሒ ቁጽሮም ክንድዚ ኢዩ ኢልካ ብኣእምሮ ደቂ ሰባት ዘይእመሩ፣ሰብነቶም እቲ ሓደ መልኣኽ ብማእከልቲ እቲ ካልእ ከም <ብርሃን ብቬትሮ>  ሰንጢቖም ንኽሓልፉ ዘይጽግሞም ረቀቕቲ ፍጥረት ኣምላኽ ኢዮም።እዞም ተፈጥሮ እዚኣቶም መልኣኽቲ ይበሃሉ።

ተወክሶተ መጽሓፍ ቅዱስ፣-

ዘህ 22፣21-23 በልዓም ዝተባህለ ናይ ኣህዛብ ነብይ፣ ንግልጸተ መልኣኽ ክርኢ ዘይምኽኣሉ በንጻሩ ግን እቲ መልኣኽ ነታ ኣድጊ ክግለጸላ ፍቓደኛ ምንባሩ ይነግር።እዚ ርቀተ መልኣኽቲ ንተነጽሮ ሕልና፣ ፍቓደኝነቶም ከምዝሓትት ዘብርህ ኢዩ።<<መዝ 68፣17 ሰረገላታት ኣምላኽ ኣሽሓት ግዜ ኣሽሓት ኢዮም፣>> ይብል።ብዝሒ ቁጽሮም ብኣእምሮ ደቂ ሰባት ክፍቀዱ ዘይክእሉ ምኻኖም ንኸነጽር ኢሉ ኢዩ።ብኻልእ መዳይውን ሰረገላ ንኪናት፣ንግጥም፣ንተራድኦ እትውጥሓ ከም ምኻኑ መጠን፣እግዚኣብሔር ንረዲኤት ቅልጡፍ ኢዩ፣ብመን ብሰረገላታቱ፣ምስ እግዚኣብሔር ገጢሙ ዝስዕሮ የለን፣ብመን ገይሩ ደኣ ይስዕር ብሰረገላታቱ ገይሩ የሸንፍ፣ ክቡራዊ ስሙ ካብ ሕልና ዝሃስስ ኣይኮነን፣ብኸመይ ድኣ ይግለጽ እንተኢልና ድማ ኣብዞም ክቡራት ሰረገላኡ ዝኾኑ መላኽቲ ኮይኑ ይግለጽ።

<< ቀሌ6፣27.ብዙሓት ዝተፈላለዩ ነገራት ፈጠርና ትሽዓተ ነገደ መላእክት ፈጠርና ናታቶም መልክዕ ይፈላለ በብነገዶም ኩላቶም መልክዖም ይፈላለ ኢዩ።ካብ መንጎ መላእክት ብዙሓት የዒንቲ ዘለዎ ኣሎ።ቅድሚኡ ገጹ ብዙሕ ዝኾነ ኣሎ ኩልንትኡ ዝነድድ እሳት ኮይኑ ዝተፈጥረ ከኣ ኣሎ።28.መንፈስ ጥራይ ኮይኑውን ኣብ መንጎኦም ኣሎ።መንፈስን እሳትን ብምኻን ዝተፈጠሩ ኣሎዉ ነገር ግን ኩላቶም ይዝምሩ ኢዮም ብዘይዕረፍትን ብዘይምቁራጽን የመስግኑ ኢዮም ካብ ናይ ሓደ መልኣኽ መዕረጊ ናብ ካልእ ናይ መልኣኽ ሕላዌ ክትምልከቶ እንከለኻ ክንዲ ርሕቀት ናይ ሰማይን ናይ ምድርን ይኸውን።29.ናይዞም መላእኽቲ ቁጽሪ እልፊ ኣእላፋት ካብዚውን ናይ ዕጽፊ ዕጽፊ ኢዩ እዚኣቶም ንዓና እንዳመስገኑ ይነብሩ ዕረፍቲ የብሎምን።ሱራፌልን ኪሩቤልን በብፍነኦም የመስግኑና ዕረፍቲውን የብሎምን>> ይብል ቀሌሜንጦስ። 

ስለዚ ተፈጥሮኦም መላእኽቲ ንኽበሃሉ ይእምት።ነዚ ተፎጥሮዚ ክውንን ዝኽእል ባህርይ፣ማለት ረቀቕቲ፣ድኻም፣ድቃስ፣ምስቻው ዘይሰማምዖም፣ፈጣናት፣ኣሽሓት ግዜ ኣሽሓት፣ፈጣሪኦም ተዘይኮይኑ መን እንታይ ይመስል ማንም ክግምቶም ዘይክእል፣ብዝተፈላለየ መልክዕ ንደቂ ሰባት ንኽግለጹ ፍቓደኝነት ካብ ፈጣሪኦምን ካብኦምን ኮይኑ ክግለጹ ተዘይኮይኑ ድማ እዚ ይመስሉ ኢልካ ብቃንቃ ኣእምሮን ደቂ ሰባት ዘይንገሩ ኢዮም። መልኣኽቲ ኣብ ታሪኽ ደቂ ሰባት ብዝተፈላለየ መልክዕ፣ከም ሽማግለ፣መንእሰይ፣ሓለቓ ሰራዊት፣ ወይ ህጻን ኮይኖም ዝተገልጽሉ ዘመን ከምዘሎ ቅዱሳን መጽሓፍቲ ይትርኹ ኢዮም።እቶም ንደቂ ሰባት ዝተገልጹ መላኽቲ ግን፣ምስቲ ብዝሒ ቁጽሮም ኣነጻጺርካ ክረአ እንከሎ፣ንዓና ዝተገልጹልና ድሮ ኣስማቶም እንፈልጦም ኣዝዮም ውሑዳት ኢዮም።ብድምሩ ግን 100 ነገድ ኮይኖም ከምዝተፈጥሩ፣ዳሕራዩ ግን ሓደ ነገድ ብምኽንያት ምንፍቕና ካብ መንጎኦም ከምዝተፈለየ ታሪኽ ተፈጥሮኦም ይነግር።

 ለ) ስሞም ምስ ግብሮም ወይ ሞየኦም ዝተተሓሓዘ ብምኻኑ፣-

ወስብሀት ለእግዚኣብሔር ወለወላዲቱ ድንግል ወለመስቀሉ ክቡር ኣሜን።

2ይ ክፋል ይቕጽል፠፠፠

ሰላም፣ ንምዕቃባ ይኸብድ!

በስመ ኣብ ወወልድ ወመንፈስ ቅዱስ አሐዱ ኣምላክ ኣሜን!

ኣምላኽና እግዚኣብሔር ኢዩ፣ሰላምና ፈጣሪ ኢዩ፣መንገድና መንገዲ ፈጣሪ ኢዩ፣ጉዕዞና ካብ ምድሪ ናብ ሰማያት ደኣምበር፣ካብ ዓዲ ናብ ዓዲ ኣይኮነን፣ነዊሕ ጉዕዞ ይጽበየናምበር፣ ገና ጉዕዞና ኣይወዳእናን።ብርግጽ እንናፍቖ ዝነበርና ሰላም ኣሎ፣እንጽበዮ ዝነበርና ጡዑም ኣየር ኣሎ፣ብጸሎት ዝነባዕናሉ ራህዋ ኣሎ፣እናሻዕ ዝተማጎትናላ፣ክንውንናሞ ኣብ ጎጆኣ ክንውጣሕ፣ብእንግዶኣ ክንሳሲይ፣ተበታቲኑ ዝነበረ ቤተሰብ ክተሓቓቖፍ፣ተረሓሒቆም ዝነበሩ ማሕበራት፣ትካላት፣ሃይማኖታት፣ፖሎቲከኛታት፣ምሁራን፣ ሓረስቶት፣ጛሶት፣ተረኽቲ ክተሓቓቖፉሞ፣ዝነበሮም ዓጸቦ ናይ ሰላም ብምትሕቑቓፍ ክዕንገሉ፣ዝነበሮም ጽምኢ ራህዋ ብውህደት ክረውይሉ፣እንተስ ብሕብረትን ብማሕበራትን ወይ ብጉጅለታትን፣ወይ እንተስ ምስ ውሽጢ ገዛእ ርእሲ ወይ ምስ ግሊ፣ከቢድ ምጉት ዘካየድናሉ ስለዝኾነ፣ከም ውጺኢቱ እነሆ ኣብ ቅድሜና ተኾይጡ።እታ ክንዮ ማዕዶ እንጽበያ ዝነበርና ሰላም ቅርቢ ኮይናትልና እነሃ፣ክንድዚ ዝኣክል ርሒቓ ዝነበረት ብውልቂ ይኹን ብሕብረት ዝተመነናያ ሰላም እነሃ ቀሪባ።ክንዮዚውን ኣሎ።ሰማያዊ ሰላም፣ኣምላኻዊ ሰላም፣ሕምስምስ ኣልቦ ወትሩ ብደስታ ዝተኸለለ ዓለምውን ኣሎ።ፈጣሪ እንታይ ይሰኣኖ፣ክንዮ ኣእምሮና ዝምጦ ሰላም ክህብ፣ክንዮ ሕልና ዝኾነት መንግስቲ ከውርስ እንታይ ይሰኣኖ!

እሞ እንታይ ንግበር፣-ዮና1፣11

ዓወታት ንምምስራቶም ዘይኮነስ ንምዕቃቦም ይኸብዱ።ከምቲ ህውከታት ንምጉንጻፍ ተበጃውነት ዝሓቱ፣ሰላም ንምዕቃባውን ተበጀውቲ ትደሊ ኢያ።ደጊም ቶባእ ስንፍና ኢሎም ርእሶም ዝገትኡ፣ነፍሶም ዝፈርዱ፣ንዓይ ናብቲ ባሕሪ ደርብዩኒሞ ሰላም ክሰፍን ኢዩ ዝብሉ፣በዳሊ ንስኻትኩም ዘይኮንኩስ ኣነ ኢየ ኢሎም ብትብዓት ገዛእ ርእሶም ዘድንኑ ተበጀውቲ ትደሊ ኢያ ሰላም።ኣብዛ ዓለም ብጅግንነቶም ዝፍለጡ ብዙሓት ክጥቀሱ ይከኣሉ ኢዮም።በንጻሩውን ብጭካነኦም ዝውቀሱ ኣዝዮም ውሩያት ውን ዓለምና ትውንን ኢያ።ክሳብ ሕጂ ተወዳደርቲ ዘይረኽቡ ግን እቶም ገዛእ ርእሶም ዝወቕሱ ኢዮም።እቶም ገዛእ ርእሶም ዝፈርዱ፣በቲ ምቕሉል ተበጃውነቶም ነታ ተራር ልቢ ናይ ወድሰብ ብጣዕሳ ከምትምርከኽ ክገብሩ ዝኽእሉ፣ውሽጣዊ ናይ ሰላም ድርዒ ዝዓጠቑ፣ክሳብ ሕጂ ተወዳደርቲ ዘይረኸቡ ኢዮም።ኣብ ዓለምና፣ናይ ኩዕሶ፣ናይ ጉያ፣ናይ ሞያ ወዘተ ዓመት መጸ ዋንጫ መን ወሰደ ውድድር ይካየድ ኢዩ።ናይ ገዛእ ርእስኻ ምውቃስ ዝምልከት ውድድር ግን ዓለምና ከተሳትፍ ኣይከኣላን ኢዩ።ምኽንያቱ እዞም ገዛእ ርእሶም ዝወቕሱ ሰባት፣ዋላ ነቶም ኣዋዳደርቲ ከይተረፈ ስለዝስዕርዎም፣ክወዳደሮም ዝኽእል ጥራይ ዘይኮነስ፣እንኮላይ ከወዳድሮም ዝከኣሎ ዓለም ኣብዛ ባይታዚኣ ዘይምዃኑ'ዩ።ናይዚ ጽሑፈይ ኣፈ ሙዙ፣ነዚ ኣብ ወጻኢ ኮይኑ፣''እገለ ከምዚ ኢዩ፣እገሊት ከምዚ ኢያ፣''እናተባሃሃለ ንሓድሕዱ ክወቓቐስ ዝሓገየ ኤርትራዊ ብሓፈሻ ድማ ሕብረተ ሰብ ዓለም፣ርእሱ ከድንን፣'ኣነ ኢየ በዳሊ፣ይቕረ ግበረለይ'፣ተባሃሂሎም ገዛእ ርእሶም ስለሰላም ክብጀውን ንምባል ኢዩ ተጻሒፉ።ሰላም ተበጀውቲ እምበር፣ኣበጀውቲ ኣይትደልን ኢያ፣ሰላም ደነንቲ ደኣ እምበር ኣንቃዕረርቲ ኣይብርህዋን ኢዮም፣ሰላም ልሳኖም ዝኸንሸቡ እዱባት እምበር፣ሴፍን ጉራዴን ሒዞም ብጭካነ ንሓድሕዶም ዝከናሸቡ ኣይሰማምዕዋን ኢዮም።

ኣብ ሓንቲ ንባሕሪ ተርሴስ ክትስንጥቕ እትህንጠ ዝነበረት መርከብ ዝተሳፈሩ ተጎዓዝቲ፣ሰንኪ ናይ ሓደ ነብይ ዘይምእዛዝን፣ሰንኪ ናይቶም ዋናታት እታ መርከብ ኣምልኾ ጣዖትን፣ፈጣሪኦም ቁንጣሩ ተግሳጽ ፈነዎሎም።በዚ ድማ ባሕሪ ኣፍ ኣውጺኡ ''ሃየ ተናዘዙ፣መን ኢዩ በዳሊ፣መን ዓማጺ፣መን ኢዩኸ ስለሰላም ክብል ርእሱ ዘበጁ'' ዝብል እንክመስል፣ብማዕበላቱ ገይሩ ክጥሕሮም ደለየ።ነዛ ግሳጼ እዚኣ ቀልጢፉ ዘላለያን፣መፍትሒ ዝረኸበላን እቲ ኣይእዘዝን ዝበለ ነብይ ነበረ፣ነብይ ዮናስ።ዓንተቦኡ ''ኣይእዘዝን ኣይለኣኽን'' ኢሉ ዝነበረ፣ሕጂ ግና ባዕሉ ክብጆ መረጸ።ሰላም ንምውሓስ ምብጃው ይሓትት ምኻኑ ኣዳዕዲዑ ይፈልጥ ኢዩ።ነብይ ዮናስ ጽላሎት ክኾውን በቐዐ፡ ክርስቶስ ድማ ፈጻሚኡ።ነብይ ዮናስ ዘውሓሳ ሰላም ቁንጣሮ፣ንባሕሪ ተርሴስ ንምስጋር ጥራይ ነበረት፣ክርስቶስ ግን ረቂቕ ድልድል ሰሪቱ፣ሰማያዊ ዜግነት ሂቡ፣ናብ ሰማያት ዘአቱ ፓስፖርት መጢዩልና ከደ።እዛ ሰማያዊት ቪዛ እዚኣ እንክትበላሾ ዝዕረየሉ ባይታ ኣጣጢሕልና ስለዝኾነ ሰማያዊት ሰላም ኣብ ኢድና ኢያ።እምበርከ ክርስቶስ ሰላም ንምውሓስ ገዛእ ርእሱ ክውፊ ስለዝመረጸ ኢዩ።

እምበኣር፣ብነኣሽቱ ነገራት ዝተቃሓሓራ፣ማሕበራት፣ኣብያተ ክርስትያናት፣ፖሎቲከኛታት፣ሕብረተ ሰባት ወዘተ ወዘተ፣ ሰላም ተበጀውቲ ስለዘድለይዋ፡ ድምጻ ዓው ኣቢላ ትእውጅ ኣላ።''በደልካ ተናሳሓሉ'' ዝብሉ ዘይኮነስ፣''በደለኛ ኣነ ኢየ'' ኢሎም ገዛእ ርእሶም ዝወቕሱ ኣውሓስቲ ሰላም ትደሊ ኣላ ሰላም።ፍልልያት ክህልዉ ግድነት ኢዩ፣ንኽልቲኣትኩም ተታረኽቲ ኣብዛ ዓለም ናይ ንስሓ ዕድመ ዝውስኸልኩም ዘሎ ፈጣሪኹም ኢዩ።ስለዚ ንስኻትኩም ደኣልኩም ዘይተፋቐርኩም እምበር፣ፈጣሪኹምሲ ንኽልቲኣትኩም የፍቅረኩም ኢዩ። ነዛ ሕንጫልን ሕንጢትን ዝኾነት ሰላም ደልዲላ መታን ክትረግጽ፣ተሰማሚዖም ዘዕብይዋ፣ዘጎብዝዋ ስሙራት ስድራ ትደሊ ኣላ።ደጊም ልሳንና ናይ ይቕሬታኣ ትርሺ እትትኩሰሉ እምበር፣ናይ ጽልኢ ቃላታ እትውርውሮሉ እዋን ኣይኮነን።ናይ ቶኽሲ ቃላት ኣብቂዖም ዓውደ ክርክር ብዓውደ ልዝብ፣ምዝንጣል ብምክብባር፣ምትሕምማይ ብምትእርራም፣ምትኹታኽ ብምትሕቑቓፍ፣ቂምታ ብይቕሬታ ዝትክእሉ እዋን ድሮ ኣኺሉ'ዩ። ተፈጥሮና እነመስግነሉ ግዜ ካብ ሕጂ ንንላዕሊ ዕድል የለን።

ሰላመይ እህበኩም ኣሎኹ፣ዮሓ 14፣27

ንምኻኑ ንሕና እዞም ንሰላም እንሽትታ ዘለና ሕብረተሰብ፣ ህዝበ ክርስትያን ድማ ብፍላይ፣ምንጫ ካብ ላዕሊ ምዃኑስ ከመይ ዘንጊዕናዮ፧ ኣብዛ ዓለም እንምጠዎ ሰላም፣ካብ ሰማያት ተጨሊፉ ዝመጸ ቁንጣሮ ምዃኑስ ከመይ ተሰዊሩና፣ነቲ ካብ እግዚኣብሔር ዝፍኖ ዘሎ ሰላም ዘይኮነስ፣ንባዕሉ ንእግዚኣብሔር ክንሃርፎዶ ኣይኮነን ዝቕድም ነይሩ፧ክርስትያን ማለት ምድራውያን ሰማያውያን ኢዮም።ኣብ ምድሪ እንከለዉ ሕልነኦም ኣብ ሰማያት ዘሎ ነገራት እናሰላስሉ ዝነብሩ፣ንናይ ምድሪ ሰላም ምስቲ ሰማያዊ ሰላም ከየዳረጉ፣''ነታ ኣብ ሑቕፎኻ ዘላ ሰላም፣ነታ ንዓና ኢልካ ዘዳለኻያ መንግስቲ ንምውራስ ከመይ ክንውንና ንኽእል፧ከመይ ዓይነት ሰባት ኢዮም ዝኣትውዋ፧ኣብ ቤት መቕደስካ ዝነብር መን ኢዩ፧ኣብ መሕደሪኻ ዝሓድሩኸ እነመን ኢዮም፧'' ኢሎም ስለ'ዛ ዘላ ቁንጣሮ ሰላም ዘይኮኑስ፣ሰለ'ታ እትመጽእ ሰማያዊት ሰላም እንዳለመኑ ዝነብሩ፣በዚ ኣብዚ ዓለም ዘሎ ጸበባ ዘይሽገሩ እኳ ደኣ ብሓጎስ ዝቕበልዎ፣በዚ ናይዛ ዓለም ሰላም ድማ ከይተዓሻሸዉ፣ስለቲ ቀንዱ ክዓዩ ዝነብሩ ኢዮም ክርስትያን።ከመይ ኴንና ደኣ ተጸበይቲ ሰማያዊት ዓለም ክንስና፣ምድራዊት ዓለም ክሳብ ክንድዚ ከምእንቀሓሓር ገይራትና፧ ከመይከ ኣብ ምድሪ ዝቕመጡ ሰማያውያን ክንስና፣ምድራዊ ነገራት ክሳብ ክንድዚ ከምእንጨኻኸን ገይሩና፧ዓለምኮ ከምታ ጥራሕና ዝመጻናያ፣ክንከይድ እንከለናውን ንብረታ ክንወስደላ ኣይትደልን ኢያ።ዝና፣ሃብቲ፣ፍልጠት፣ክብሪ ቁንጅና ኩሉ ኣብዛ ዓለም ኴንና ዘጥረናዮ ስለዝኾነ፣ክትምንጥለና ስምና ከይተረፈ ተቐይሩ ሬሳ ዝብል ሳጓ ኣጠሚቓ ክትውሕጠና ምኻናስ ከመይ ዘንጊዕናዮ፧ በሉ ንሱ ፈጣሪ ሰላሙ ንምምጣው ኣእዳዉ ዝርጉሓት ኢየን።ነዛ ሰላም'ዚኣ ጅማሬ እፎይታኣ ካብ ውሽጥና ኢዩ ዝጅምር።ሰላማዊ ሰብ ንምኻን፣መጀመርያ ምስ ገዛእ ርእስኻ ተዓረቕ።ሽዑኡ እቲ ንናይ ገዛእ ርእስኻ ሰላም ንምውሓስ ክትብል ዝኸፈልካዮ ዋጋ፣ንቤትካ፣ማሕበርካ፣ሃገርካ፣ሕብረተሰብካ ምሉእ ሰላም ንኽሰፍን ዝከኣሎ ዋጋ ካብ ምኽፋል ኣይክትደሓርሕርን ኢኻ።ትጸልኦም ሰባት ተሃልዮምኻ ንሳቶም መጺኦም ይቕሬታ ክሓቱኻ ኣይትጸበ።ዝተቐያየምካዮም እንተልዮምውን ምእንቲ ሰላም ክትብል ተበጃዊ ኩን'ምበር፣ተበጃዊ ኣይትድለ።

እግዚአብሔር ኣምላኽና፣ኣብ ውሽጥና፣ኣብ ከባቢና፣ሃገርና፣ህዝብና ኩሉ ዓለምና ሰላሙ ከስፍነልና ቅዱስ ፍቓዱ ይኹን።
ወስብሐት ለእግዚኣብሔር!

ስለሰማእታት ኤርትራን ስእላዊ ገለጻ ናይ ሎሚ ደቆምን!

በስመ ሥላሴ

ዝኸበርካ ኣንባቢ፣እዚ ጽሑፍ፣ ንነፍሲ-ወከፍ ልቢ ኤርትራዊ፣ ስምምዓዊ ፍቕሪ ዝጽውዕ መቓልሕ እምበር፣ ዝኾነ ይኹን ፖሎቲካዊ ወይ ወገናዊ ጽግዕተኝነት ተገይሩ ዝተጻሕፋ ከምዘይኮነ ኣቐዲመ ክነግር ይፈቱ።

ሰናይ ንባብ...

ጽሓይ ካልኦት ንኸብርቑ፣ጽሓዮም ብፍታዎም ኣዕሪቦም፣ከባቢኦም ብነበልባል እሳት ተኸቢቡ፣ሰማይ ናፓልን ብኢደ ሰብ ዝተሰርሐ እሳተ ጎሞራን ዘኒቡ፣ሓዳርን ናብራን ይጽናሓላና ብምባል፣ ኣብ ትማሊ ኮይኖም፣ ንሎሚ ኣወንዚፎም  ስለሎሚ ሓሊፎም።ኤርትራ እትበሃል ምድሪ ካብ ታሪኽ ዓለም ክትሕክኽ ብወግዒ ተኣውጁ ንዝነበረ ኢፍትሓዊ ኣዋጅ፣ብተበጃውነቶም ህልውነኣ ቀጻልነት ከምዝህልዎ ገይሮም።በብዘመናት ዝተበገሱ ሓይለ ዓለማት ናይዛ ምድሪ፣ነቲ ብሃይማኖቱን፣ቅዱው ስነ ምግባሩን ዝፍለጥ ዝነበረ ብኹሉንትኑሁ ሕፉር ህዝቢ ኤርትራ፣ኣፉ ተለዂኹ፣ኣስቃጢ ኮይኑ ንክተርፍ፣ባህሉን ሃይማኖቱን ተበሪዙ፣ክቡራን ልምድታቱ ብባዕዳውያን ብፍታዉ ንኽውረር ኣሕሊፉ ክህብ፣ኩላቶም ገዛእቱ በብእብረ መመጺኦም ኣግባዕቢዖምሉ ምንባሮም ናይ ቀረባ መዛግብቲ ታሪኽ ዝትርኾ ሓቂ ኢዩ።

ንዘመናት ተቐቢሩ ዝነበረ ታሪኽዛ ምድሪ፡ ታሪኽ ኤርትራ፣ሎሚ ተፋሒሩ ናብ ዓለም መታን ክዝርጋሕ፡ ንሳቶም እዞም ሳማእታታ ናብዛ መሬት ክቕበሩ በረኻ ወጹ።ኣብዛ ምድሪ ነጊሱ ዝነበረ ልበ-ስሱዓዊ ስምዒት ተፋሒቑ፣ እዚ ናይ ሎሚ ትውልዲ 'ንስኻ ንበር ኣነ ግን ኣብ ክንዳኻ ክሓልፍ'የ' ዝብል ካሪክለም መታን ክለማመድ፣ታሪኾም እናሻዕ ዓመት መጸ ይትረኽ ኣሎ።መዓልቲ ስውኣት ኤርትራ 20 ሰነ። ሽምዓ ዋና ቀማሚት ናይቲ ታሪኽ ኮይና ስለዝተረቖሐት ድማ፡ ዓመት መጸ "ከምዛ ሽምዓ ስለ ህልውና ህዝቢ ኤርትራ ሰብነቶም ኣብምኪኾም፣ብርሃን ኣንጸባርቖም" እናተባህለ ይዝንቶ ኣሎ።ኣብዚ መዓልቲዚ ልዕሊ ካዕበት እንግረመሉ ነገር ኣሎ፣፣ እዚ ኸኣ ዕላምኦም ኢዩ። እዞም ስውኣትና ኢልና ብልብና ሃገራዊ ክብሪ እንህቦም ኣቦታትናን ኣያታትናን፣ ኣብ ግዜ ፖሎቲካዊ ቃልሶም፣ኣብ መንጎኦም ብዙሕ ፍልልያት ነይርዎም እናሃለወ'ዩ።ሃይማኖት፣ግላዊ ኣረኣእያ፣ ስነ-ኣእምሮኣዊ ኣተሓሳስባ፣ ቤተሰባዊ ክብሪ፣ ዓሌት ቋንቋ፣ እንዳ፣ ሃብቲ፣ ዝና ወዘተ።ነዞም ፍልልያት እዚኣቶም ጸይሮም፡ እረ ኣብ ገለ ገሊኡ ዓመታትሲ፣ናብ ከቢድ ውግእ ሕድሕድ ክሳብ ዘብጽሕ ፖሎቲካዊ ጎንጺ ገጢጥምዎም እኳ እንተነበረ፣ ነቶም ረዘንቲ ፍልልያት ንድሕሪት ኣወንዚፎም፣  እቲ ከሰማምዖም ዝኽእል ናይ ሓባር ነጥቢ ጥራይ ቅድመ ኲነት ብምሕሳብ፣ስለጉዙፍ ሓባራዊ ዕላማ ክብሉ ብመስዋእቲ ሓሊፎም።

ኣብ ሎሚ ዘሎ ህዝቢ ኤርትራ ግን፡ ኣብ ሓድሕዱ ዕቡጥ ቅሬታ ዘለዎም መሲሉ ይረአ እነሀ። ኣብ ውሽጢ ይኹን ኣብ ደገ ዝቕመጥ ህዝቢ፡ ኣብ ክንዲ ብዛዕባ እቶም ሓደ ክገብርዎ ዝኽእሉ ጉዳያት ዓቲቦም ዝዝትዩ፣ ቅድመ ዝኣገረ፣ብዛዕባ ፍልልያቶም ክላዘቡ ክብሉ፣ ከይተላዘቡ ጽዓይ ትዓርቦም ኣላ።ሰብ ምስ ሰብ ክረዳዳእ እንተኾይኑ፣ ቅድም ብዛዕባ'ቶም ሓደ ክገብርዎ ዝኽእሉ ነገራት ብዕምቆት ክላዘብ ኣሎዎ።እምርከስ ኣብ ነፍስ-ወከፍ ፍልልያት፣ ዕቡጥ ጓህሪ ተቐሚሩ'ሎ። ምይይጥ ብዛዕባ ፍልልያት ጅምር እንክብል ድማ፣ እዚ ዕቡጥ ጓህሪዚ ተተኲሱ ይወጽእ'ሎ። ሽዑ ፍቕሪ ከምጽእ ዘይኮነስ፣ ነታ ዝነበረት ቁንጣሮ ፍቕሪ እኳ በኣጋ ኣንፊጹ፡ ትርኑዕ ጽልኢ ኣብ መንጎ ህዝብታት ከምዝትከል'ዩ ዝገብር። ይተከል ድማ ኣሎ፡ እነሆ ካብ ዝትከልውን ዓመታት ፈሊሙ'ሎ!

እምበኣር ኣብ ውሽጥን ወጻእን እንነብር ህዝቢ ኤርትራ፣ ፍቕሪ ንኹሉ ሕብረተ-ሰብ ከተሰማምዕ እትኽእል እኽልቲ ቋንቋ እያ። እሞ ውሽጣዊ ይኹን ደጋዊ እምነትና ከይተተናኸፍና፡ ኣብ ዘራጽሙና ነገራት ድማ ከየድሃብና፡ ስለቲ ብመገድና ክውለድ ዝኽእል ትውልዲ ክንሓስብን ባይታ ክንፈጥርን መታን ክንክእል፡  በብክእለትና ስለፍቕሪ ንምከር።

ስለፍቕሪ ልዝብ ንምግባር ድማ፣ምዕራፍ ሓደ በቶም ዘሰማምዑና ነገራት ምጅማር'ዩ ዘድሊ። ንምሳሌ፡ ካብ ሓንቲ ማህጸን ዝወጹ ክልተ መንእሰያት፡ ክልቲኣቶም ዘይሰማምዕሉ ብዙሓት ነገራት ክህልዉ ባህርያዊ ኢዩ። ክንዮ'ዚ ውን፡ ክልተ ኣሕዋት ንኣከባብያውን ውሽጣውን ኣተሓሳስባኦም ዝምልከት፣ 100% ተሰማሚዖም ካብ ዝነብሩ፣ ፍልልያት ክህልዎም ይምረጽ።ንኣብነት ቻይናን ኣሜሪካን ፍልልያት ተዘይህልወን ውድድር ኣይምገበራን፣ ሩስያን ጀርመንን 100% ስምምዕ ተዝህልወን ናብዚ በጺሐንኦ ዘለዋ ምዕባለ ኣይምበጽሓን። ፍልልያት ንብልሒ እምበር፣ንጎንጺ ኣይኮኑን ዝጠቕሙ።ሓሙሽቴአን ኣጻብዕተይ በበይኑ ቁመት ድኣ ይሃልወን እምበር፣ ፍልልያተን ጸይረን ይምግባኒ ኣለዋ። በቲ ዝህባኒ መግቦት ድማ ንዓይ ጥራይ ዘይኮነስ፣ ንናይ ገዛእ-ርእሰን ህላወ'ውን ዓቢት ተራ ኴንወን ኣሎ። 

እምበኣር ነዞም ፍልልያት እዚኣቶም ብፍቕሪ ክትጥቀመሎም እንተሃቂንካ፣ ፍልልያት ንዕቤት ዘእንፍቱ መራሕቲ ቀስቲ ይኾኑ። ክልተ ኣሕዋት ክልተ በበይኑ ሓሳባት እንተሃልይዎም፣ በቶም ዘሰማምዑ ነገራት ግን ስለትሳማማዕ ልዝብካ ክባተኽ ግቡእ ኣይኮነን። ዘይተሰማምዕ ሓንቲ ነጥቢ ስለዝተረኽበት ጥራይ፣ ነቲ ገዚፍ መሰማምዒ ድልድል ክተፍርሶ ክትብል ኣብ ሓድሕድካ ከቢድ ክሳራ ኢዩ ዝፍጠር። እወ ዕድሜኻ፡ ፍልጠትካ፡ ሕውነትካ፡ ፍቕርኻ፡ ሃገርካ ትኸስር። ድማ ዘይምስምማዕ ኣባና ኣብ ብዙሓት ዝተጀመረ ኣይኮነን። ኣሽንካይዶ ንሕና ብቑጽሪ ሚልዮናት ደቂ ሰባትሲ፣ እቶም ሒደት ኣዳምን ሄዋንን'ኳ፡ ሓደ ኮይኖም ክሰማምዑ ኣይተኻእሎምን። ነዛ ብኮ መዝሚዙ ድማ ሰይጣን፣ ጨሪሶም ተበቲኖምሉ ዝነብሩ መገዲ ንምንዳይ ኣይተጸገመን። ሰንኪዚ ከኣ ዝነበሮም ክብሪ ክንፈጎም ክኢሉ።

ካልእ ኣብነት፣ ኣሽንካይዶ ንሕና ከም ኣብ ምድሪ እንነብር ሰባትሲ፣ኣብ ውሽጢ ማህጸን ዝነበሩ፡ ያዕቆብን ኤሳውን'ውን  ክሰማምዑ ኣይከኣሉን። ንሕናስ ኣብዛ ዓለም ክሳብ ቴስዓ ዓመት ንምምባር ፍልልያት ከነምጽእ ግድነት'ዩ። ያዕቆብን ኤሳውን ግን፡ ካብ ማህጸን ክሳብ ዝወጹ፡ ንትሽዓተ ኣዋርሕ ጥራይ ተዋሂብዎም ከብቅዕ፣ ብምድፍፋእ'ዮም ግዜኦም ኣሕሊፎሞ። ኣማሲኡ ድማ እቲ ኣብ ፍልልያት ጥራይ ኣተኲሮ ምግባር፡ ድሕሪ ልደቶም ስለዝቐጸልዎ፣ ክሳብ ዓመታት ተረሓሒቕዕም ብሕኒን እንዳተጠማመቱ ኣሕሊፎሞ። መወዳእቶኦም ደኣ ፍቕሪ ኣሰኒፋቶም'ምበር።እወ  ፍቕሪ ኣብቲ ስግር ሩባ፡ ተሓናኒቕቖም ክቃተሉ ዘይኮነሲ፣ ሕንቕንቕ እናሎም ተሓቛቚፎም ከም ዝሰዓዓሙ ገይራቶም።

ስለዚ ካብቶም ገዘፍቲ ኣሰማማዕቲ ነገራት ዝበሃሉ ናይ ሓባር ቋንቋታትና፡ ቊጽሪ ሓደ ፍቕሪ'ያ። ፍቕሪ ንዂላቶም ፍልልያት ከምትጸውር እትገብር ገዛፍ እምባ ኢያ። ብጽልኢ ቂሒሩ ዝነበረ ልቢ፣ ፍቕሪ ከተራጋግኦ እኹል ዓቕሚ ኣሎዋ።ፍቕሪ ሃይማኖት ወይ እምነት፣ ሕብሪ-ቆርበት፡ ሃብቲ፣ ዝና፣ፖሎቲካ፣ ገዛውቲ፣ ዓሌት፣ ቋንቋ፣ ባህሊ ወዘተ ኣይትፈልን ኢያ። ሰብ ንዘበለ ኲሉ ብዘይኣፋላላይ ከተፍቅሮ ከምዘለካ፡ ተፎጥሮኣዊ ግዴታ ሒዛ እትርከብ ኣርማ'ያ ፍቕሪ።ስለዚ ንስኻ ከም ሰብ ንሰብ ተፍቅር እንተኾይንካ፣ ነቲ ካብ ኣተሓሳስባኻ ዝተፈልየ ኮይኑ ዝተረኽበ ሰብ፣ ሓሳባትካ ንምግላጽ እትጥቀመሉ ቅማሜ ፍቕሪ ዝመለኦ፣ንዕቀት ዘወገደ እንተዘይኮይኑ፣ ዋላ ንስኻ ቅኑዕ ሃሉ፣ቅንዕናኻ ንዑኡ ዋጋ ኣልቦ ኴኑ ኢዩ ክረኣዮ።ንሱ ጥራይ ከይኣክል ድማ፣ኣባኻ ገዚፍ ጽልኢ ንኸሐድር ባይታ ትፈጥረሉ ምህላውካ'ዩ። እምበኣር ሓወይ፣ዋላ ንሱ ንሰናያትካ ዝጸልእ ሰብ ይኹን፣ንስኻ ግን ድሌታትካ ንምግላጽ ፍቕራያን ቃላት፣ፍቕራዊት ልቢ፣ብፍቕሪ ዝተቐብኡ ከናፍር ኣጥሪ። ዘመኑ ንዓለምና ፍቕሪ ፍቕሪ ከምትሽትት ይግበራ ስለዘሎ፡ ( ዜና ዕርቂ ክልቲኤን ኮርያን፡ ኤርትራን ኢትዮጵያን ማለት'ዩ)  በዚ ሽታዚ ክትማረኽ እምበር፣ካብ ፍቕሪ እትሃድመሉ ምኽንያት ንምርካብ ሃሰው ክትብል ኣይትንበር።

ብኻልእ ገጻት ድማ ዝኸፈአ ጽልእኻ ንምንጋር  ኣሽሙር ዝብሃል ጣቋ ኣሎ።ብደጊኡ ፍቕሪ ለበሰ ዝመስል፣ ኣብ ውሽጡ ግን ድጉል ጽልኢ።ኣሽሙር ንኣሽሓት ደቂዛ ምድሪ፣ ንሞት ተፈሪድሎም ከምዝጠፍኡ ዝገበረ፣ ረቂቕ ኲናት ኢዩ።ፍቕሪ ኣሎኒ እናበልካ፡ በንጻሩ ኣሽሙራት ትነዝሕ እንተኾይንካ፣ፍቕራዊት ልብኻ ካባኻ ጎጥጒጥካ ብምውጻእ፣ ብጽልኢ እንዳተካእኻያ ኢኻ።እቲ ምሳኻ ብዛዕባ ፍልልያትኩም ዝማጎት  ዘሎ ሰብ፣ ቅድሚ ምስኡ ክትላዘብ ምጅማርካ፣ከማኻ ሰብ ምኻኑ ፍለጥ። ምስ ሰብ ትላዘብ ተሃሊኻ፡ ሰብኣዊ ፍቕሪ ክትልግሰሉ ሕገ ተፈጥሮ ይግድደካ ኢዩ። ሓሳብካ ቅድሚ ክትገልጽ ምጅማርካ፡ ነቲ ሰብ ብዘይ ነግ ፈረግ ከተፍቅሮ ሓልን። ሽዑኡ እቶም ንሱ ዘውጽኦም ቃላት ዋላ ጎዳእቲ ይኹኑ፣ ኣማሲኡ ንዑኡ እምበር ንዓኻ ኣይክጎድኡኻን ኢዮም።ንዑኡ ተጎዲኦሞ ድማ ውዒሉ ሓዲሩ ክጠዓሰሎም ምዃኑ ኣይትዘንግዕ።

እግዚአብሔር ኣምላኽና፡ ንህዝብናን ሃገርናን ዓለምናን ዘሰማምዕ መንፈሳዊ ፍቕሪ፡ ንነፍሲ-ወከፍና ክምጥወልና ቅዱስ ፍቓዱ ይኹን።እቶም ወትሩ ኣብ ሕልናና ዘለዉ ሰማእታት ኤርትራ ድማ፣እግዚአብሔር ኣምላኽ ነፍሶም የዕርፍ። ደቆምን ቤተ-ሰቦምን ድማ ጽንዓቱ በረኸቱን ይልኣኽ።

ወስብሀት ለእግዚአብሔር!