በእንተ ጾመ ነብያት:- 2ይ ክፋል

በስመኣብ ወወልድ ወመንፈስ ቅዱስ ኣሀዱ ኣምላክ፣

በእንተ ጾመ ነብያት፣- 2ይ ክፋል

• ካብ ናይ ኣህዛብ መስዋእቲ ምኽልካል፣-

ኣብዚ ዘመንዚ፣መብዛሕትኡ ሰብ መስዋእቲ ኣምላኽን፣መስዋእቲ ኣጋንንትን ክፈልየሉ ናብ ዘይክእል ደረጃ እንዳበጽሐ ይኸይድ ኣሎ።እግዚኣብሔር ደቁ፣ናቱ መስዋእቲ'ምበር፣ነቲ ተጻራሪኡ ሰይጣን ተባሂሉ ዝቐረበ መስዋእቲ ክምገቡ ኣይደልን ኢዩ።ታሪኽ ደቂሰባት እንተድኣ በብሓደ ፈቲሽናዮ፣ሰብ ካብ ኣምልኾ ሓራ ወጺኡ ኣይፈልጥን 'ዩ።ሰብ ተመላኺ ናይ ምኻን ባህሪ ዘለዎ ኮይኑ ኢዩ ተፈጢሩ።ስለዚ ሰብ እቲ ዝገዝኦ ይፈላለምበር፣ካብ ተገዛኢ ምኻንስ ተፈልዩ ኣይፈልጥን ኢዩ። እቲ ሓቀኛ ገዛኢኦም ብፍታዎም መታን ክግዝእዎ ኢሉ ቃሉ ወትሩ ኣብ ልቦም ይኩሕኩሕ፣፣እቲ ሓሳዊ ገዛኢ ሰይጣን ድማ ብፍታዎም ክግዝእዎ ወትሩ ምትላሉ ኣየቃርጽን።ከምቲ ንእግዚኣብሔር ተባሂሉ ዝቐርብ በበይኑ ዓይነት መስዋእቲ ዘሎ፣ንሰይጣን ተባሂሉ ዝቐርብ መስዋእቲ ድማ መሊኡ ኢዩ።ስለዚ መስዋእቲ እግዚኣብሔር ዝለመደት መንፈሳዊት ከስዐ፣ናይ ሰጣን መስዋእቲ ክትምነይ ኣይግባኣን።ስለዝኾነ ከኣ እግዚኣብሔር ንደቁ ካብዚ ክኽልከሉ ወትሩ ይነግሮም።

ዳኒ1፣8 <<ዳኒኤል ግና በቲ ብልዒ ንጉስን በቲ ዝሰትዮ ነቢትን ከይረክስ ብልቡ መደበ፣ብግዲ ብላዕ ኢሉ ከየገድዶ ድማ፣ነቲ ሓለቓ ሽማምንቲ ለመኖ።>>ዝብል ጽሑፍ ጽሒፍልና ኣሎ።እዚ ናይ እግዚኣብሔር ሰብ ዝኾነ ነብይ፣ናይቶም ነገስታት መግብን መስተን፣ንዑኡ ከምዘርክስ ስለዝፈለጠ፣ንከይበልዕ፣በንጻሩ እካ ድኣ ሓምልን ኣቕጽልትን ከምጽእሉ ከምዝለመነ ይነግር።ብሓፈሻ ናይ ኣህዛብ መስዋእቲ ክበሃል እንከሎ፣ነቲ ዝኣምንዎ ኢሎም ዘቕርብዎ ኣማሃ ከም ምኻኑ መጠን፣ካብ ዝደቐቐት ክሳብ ዝዓበየትን፣ንክርስትያን ኣይሰማምዖን ኢዩ።

ኣብ ሓዱሽ ኪዳን፣ኣብ ጅማሬ ናይ ቤተክርስትያን፣ኣብ መንጎ ሓደስቲ ኣመንትን ኣብ መንጎ ኣይሁድን ሰፊሕ ክርክር ኣጋጢሙ ነይሩ።ሓደ ካብቲ ክርክራዊ ዛዕባ ብዛዕባ ብልዒ ዝምልከት ኢዩ ነይሩ። እቶም ካብ ኣምልኾ ጣዕት ናብ እምነት ክርስትና ዝመጹ፣ንናይ ሕገ እግዚኣብሔር ሓደስቲ ስለዝነበሩ፣ንናይ ሕሉፍ ኣምልኾኦምን ንዝምገብዎ ዝምልከትን ንጹር መረዳእታ ስለዝደለዩ፣ናብቶም መራሕቶም ዝኾኑ ሃዋርያት መልእኽቲ ሰዲዶም።፣ኣይሁድ ክርስትያን ድማ፣በዚ ዝበልናኩም ተዘይከይድኩም መንግስተ እግዚኣብሔር ኣይክትኣትዉን ኢኹም ብምባል ሰፊሕ ፍልልያት ኣብ መንጎኦም ይረአ ስለዝነበረ፣ሃዋርያት ካብተን <<ንመጀመርያ ግዜ ሲኖዶሳዊ ጉባኤ ገይሮም>> ኢልና እንሰብከሉ፣ኣብዚ ሰዓትዚ ንሕቶኦም መልሲ ንምሃብ ጉባኤ ገይሮም። ብዛዕባ ስጋዊ ብልዒ ዝምልከት ድማ መልሲ ጸሓፉ።

ግብ፣15፣27-29. እንሆ ድማ ነዚ ነገርዚ ካብ ኣፎም ምእንቲ ክትሰምዕዎ ይሁዳን ሲላስን ሰዲድናልኩም ኣሎና። '' ብዘይካ እቲ ዝተገበአ ገለ ሓለፋ ጾር እካ ከይነኽብደልኩም፣ንመንፈስቅዱስን ንዓናን ተራእዩና ኣሎ።ስለዚ ንርእስኹም ንጣዖት ካብ ዝተሰወዐ መግብን፣ካብ ደምን፣ካብ ስጋ ዝሓለቐ እንስሳን ካብ ዝሙትን ተኸልከሉ።'' ካብዚ እንተ ተኸልኪልኩም ጽቡቕ ክትረኽቡ ኢኹም፣ድሓን ኩኑ። ኢሎም ኣብ ቅዱስ ሲኖዶሶም ነዚ ውሳነዚ ወሰኑ።

ሓጺር መረዳእታ፣-

ንኣብነት፣ኣህዛብ ካብ ዘቕርብዎ መስዋእቲ ሓደ፣ መንፈሳዊ ትምህርቲ ኢዩ፣፣

ክርስትያን ድማ ንኣምላኾም ንምሕጛስ ኢሎም ዘቕርብዎ መንፈሳዊ መስዋእቲ ኣሎዎም። ትምህርተ ወንጌል።ንክርስትያን ካብ ናይ ኣህዛብ ኣዝዩ ዝበለጸ መንፈሳዊ ትምህርቲ ስለዘለዎም ድማ፣ናብ ናይ ኣህዛብ መንፈሳዊ ትምህርቲ፣ማለት ንኣምልኾ ኣህዛብ ዝምልከት ንምርካብ፣ክርስትያን ከምባህቑን ከቕባሕብሑን ኣይግባእን። ናይ ክርስትያን መንፈሳዊ መርገጺኦም ንጹርን ፍሉጥን ኢዩ።ቅድስቲ ቤተክርስትያኖም ዝወሰነቶ መንፈሳዊ ውሳነ ብዘይ ነግ ፈረግ ተቐቢሎም፣ብኡኡ ክድሕኑ ምኻኖም ብእምነት ምቕባል ኢዩ።እቲ ዓብላላዊ ወሳንነት፣ናይ ብዝሒ መራሕቲ ዘይኮነስ፣ናይቲ ቅዱስ ሲኖዶስ ኢዩ።እዚ ድማ ሰንሰለት ናይ ቅዱሳን ሃዋርያት ዝሓለወ፣ዘይብተኽ ናይ መንፈስ ቅዱስ ስራሕ ኢዩ።<<....ኣነ ድማ ክሳብ መወዳእታ ዓለም ምሳኹም ኣሎኹ፣ማቴ28,18-19>> ከምዝብል መጽሓፍ።

ኣህዛብ ዘቕርብዎ መስዋእቲ፣መዝሙርን ጸሎትን ኢዩ፣

ክርስትያን ድማ ካብ ናይ ኣህዛብ መዝሙር ዝበለጸ ናይ ቅዱሳን መዝሙር ስለዘለዎም፣ናይ ካልእ መዝሙር ዘይሰማዕና ኢሎም ከዕለብጡ ኣይግባኦምን።ብፍላይ ምስዚ ዝተሓሓዝ፣ደርፍን ጛይላንን ኣብ ግዜ ጾም ካልእ ንርኽሰት ዝመርሕ ናይ ሓጢኣት ጭማራን ዘይቀመስኩ ኢልካ ምዕጥይጣይ ናይ ክርስትያን ባህሪ ኣይኮነን።

ኣህዛብ ዘቕርብዎ መስዋእቲ፣ስጋዊ ብልዖት ኢዩ፡፣

ክርስትያን ድማ ልዕሊ ስጋዊ መግቢ ኣማናዊ ስጋ ወደሙ ናይ ክርስቶስ ስለዘሎዎም፣መስዋእቲ ናይ ኣህዛብ ዘይበላዕኩ፣ኣብ ንግደቶምን በረኸቶምን ዘይተኻፈልኩ ኢሉ፣ነቲ ክብር ስጋን ክቡር ደምን ናይ ክርስቶስ ዝተመገበ ከስዐ፣ብናይ ኣህዛብ መስዋእቲ ገይሩ ንክርስቶስ ከሳጉጎ ኣይግባእን።ቅዱስ ጳውሎስ፣እሞ መስዋእቲ ኣህዛብ ካብ ተመገብናስ፣ንክርስቶስ ነቕንኣዮዶ፧ ኢሉ ይሓትት።መቸም ክርስቶስ ናይ ኣህዛብ ብልዖት ካብ ናይ ክርስትያን መግቢ ኣብሊጽና ብምርኣይና ብርግጽ ይቀንእ ምኻኑ ርጉጽ ኢዩ፣ምኽንያቱ ንሱ ጥራይ ኣምላኽን፣ክምለኽ ዝግበኦን ምኻኑ እንዳፈለጠስ፣እቶም ደቁ ገዲፎሞ ናብ ካልእ ኣምልኾ ክኾዱ ናይ ኣምልኾኦም ተኻፈልቲ ክኾኑ እንከለዉ፣ከመይ ዘይቀንእ።እዚ ክኸውን እንከሎ ግን ኣምላኽነቱ መታን ከይወስዶ ኢሉ ኣይኮነን፣እንታይ ደኣ፣ደቁ ብምዕላዎም፣ነታ ናይ ተስፋ መንግስቱ ከምትንፈጎም ፈሊጡ ስለዝድንግጸሎም ኢዩ።

ካልእ፣ካብ ሓሊቑ፡ዝጸነሐስጋ፣ኣይትብልዑ፡

ኢሎም ሃዋርያት ደብዳበ ጽሒፎም።ዝሓለቐ፣ማለት፣ሕሉቕ፣ዘይተኸስተነ፣ዘይተባረኸ፣ማለት ኢዩ።ክንዮዚ ግን ክርስትያን ቀንዲ ክብህግዎ ዝግበኦም መግቢ ምድራዊ ስጋ ዘይኮነስ፣ሰማያዊ ስጋ፣ንኽሰትይዎ ዝህንጠይዎ ደም፣ድማ ምድራዊ ደም ዘይኮነስ ሰማያዊ ደም ኢዩሞ፣ነቲ ዝዓበየ ናይ ነፍሲ መግቢ ንምምጋብ ክቱር ህርፋን ክህልወና ኣብ ግዜ ጾም ኣዝዩ ኣገዳሲ ኢዩ።መብዛሕትኡ ድኻማትና ኣብ ግዜ ጾም ከነስተኻኽሎም እንተተበጊስና ዘይሕከምሉ ምኽንያት የለን።

ኮይኑ ግን፣ ክርስትያን ኣህዛብ ንዘቕርብዎ መስዋእቲ፣ ኣብ መስዋእቶም እንተድኣ ሓቢሩ፣ንሲኦልን መንግስተ ሰማያትን ሓደ ክገብረን ይቃለስ ኣሎ ማለት ኢዩ።እቲ <<እንታይ ጸገም ኣሎዎ>> ኢሉ፣ምስ ኣህዛብ ኣብ መስዋእቶም ክሓብርን፣በረኸቶም ከምባሁቕን ዝውዕል ክርስትያን፣ኣብ መንገስተ ሰማያት ኣትዩውን ናይ ሲኦል ምረት ከምዝናፍቕ ዘየማትእ ነገር ኢዩ። ካብ ናይ ሓሶት ኣምልኾኸከ እንታይ በረኸት ክርከብ፧ ኣብ ምድሪ ዘለዉ ኣህዛብ፣እግዚኣብሔር ገለ ንስሓ ኣቲዮም ምስ ክርስትያን እንተተጸምበሩ ኢሉ ኢዩ ዕድል ናይ ዕድመ ንስሓ ዝህቦም ዘሎምበር፣ክርስትያን ምስ ኣህዛብ መታን ክተሓዋወሱ ኢሉ ኣይኮነን።ክርስትያን ኣብዛ ዓለም ምስ ኣህዛብ ተጸምቢሮም ይነብሩ እካ እንተሃለዉ፣ካብ ኣምልኾኦምን፣መንፈሳዊ ተግባራቶምን ግን ከይጽምበሩ ፈጺሞም ክውስኑ ይግባእ።ምኽንያቱ ሓቀኛ መርገጺ ናይ ክርስትያን መንፈሳውነት ኢዩ።እዚ መንፈስ እዚ ድማ ናይ ኣምላኽ መንፈስ ኢዩ።

ካብኡ ወጻኢ ዘሎ ግን ሰይጣናዊ ኢዩ።<<ጸገም የብሉን ክርስቶስ ኣብ ልበይ ሒዘዮ ናብኣቶም ምስ ከድኩ ክቕድሶም ኢዩ!!>> ዝብል ክርስትያን እንተሎ ግን፣ነቲ ዘይኣምነሉን ወትሩ ክራገሞን ዝውዕል ክርስቶስ፣ <<ብሓይሊ የድሌካ ኢዩ፣ንዓ ብኡኡ ገይረ ክባርኸካ፣>> እንዳበሎ ምኻኑ ይረዳእ።እግዚኣብሔር ክባርኽ እንተኾይኑ፣ ክርስቶስ ኣብኣቶም ክነግስን ክባርኾምን ፍታዎም ክኸውን ኣሎዎ።እምበኣር፡እዚ ከይኮነ እንከሎ ሒዝካሎም ትመጽእ ዘይኮነስ፣ባዕሎም ንክርስቶስ ክባርኾም ቅድም ክኣምንዎ እንከለዉ ኢዩ።ምላልባሽ እቲ ካብቲ ናቱ መስዋቱ ክትካፈለሉ ዝደሌካ ዘሎ ሰብ ንዓኻ ይፈልጥ ይኾውን፣ንክርስቶስ ግን ኣይፈልጦን ኢዩ፣ክፈልጦ ድማ ፍቓደኛ ኣይኮነን።ንስኻ ድማ ንክርስቶስ ስለእትፈልጦ፡ብመንገድኻ እቲ ኣምላኺ ጣዖት ብክርስቶስ ዝባረኽ መሲልካ ናብቲ ናቱ መስዋእቲ ትኸይድ ኣሎኻ።እዚ ሰብዚ ግን ንዓኻ እምበር፡ንክርስቶስ ኣይፈልጦን ዩ፡ክፈልጦውን ኣይደለየን።ስለዚ መን ክፍለጠልካ ትደሊ፣ክርስቶስዶ ዋላስ ንስኻ፧ ኣብቲ መንፈሳዊ በዓል ኢሎም ዝዕድሙኻ ዘለዉኸ፣መን ዝተዓደመሉ በረኸት ክትካፈል ትደሊ፣ክርስቶስ ዝተዓደሞ መስዋእቲዶ፣ወይሲ ሰይጣን ኢዱ ዘምበረሉ መስዋእቲ፣ክርስትያን ነዚ ክፈልጥዎን፣ክስዕብዎን ከምዝግባእ ስለዝፈለጠት፣ቅድስት ቤተክርስትያን ንደቃ ካብ ናይ ኣህዛብ መስዋእቲ ከይካፈሉ ትኽልክል።

ስለዝሙት፣-

ዝሙት ጅማሬኡ ኣብ ሕልና፣ፍጻሜኡ ድማ በዞም ዝተዋህቡና ህዋሳት ኢዩ። መብዛሕትኦም ናይ ዝሙት መንገድታት ሎም ኣዝዩ ቅሉዕ እናኾኑ ይመጹ ኣሎዉ።ሕሉፍ ሓሊፉ ክርስትያን ተባሂሉ፣ንዝሙት ከም ሕጋዉ ተቆጺሩ፣ከም ናይ ኣህዛብ ኣበሃህላ፣ኣፍቃሪተይ ኢያ፣ኣፍቃርየይ ኢዩ፣ብዝል ሽፋን ሆ ኢልና ንዝሙት ከምእንለዓዓል ኮይንና ኣሎና።ንመንፈሳዊ ኣገልግሎት መጺኻ ክንስኻ፣ብዓይኒ ዝሙት ክትጠማመት ኣዝዩ ኣነዋሪ ነገር ኢዩ።ብፍላይ ድማ ክርስትያን ኮይንካ፣ዘይተዋህበካን፣ብሕጊ ዘይኣሰርካሉን ነገር፣ብሕልና፣ብግብሪ፣ብዝተፈላለየ ቅድመ ሕገ ቤተክርስትያን፡ብገዛእርስኻ ርእየት፡ ውሽጣዊ ፍትወትካ ክትድርጉሕ ክትብል ንኣምላኽ ምብዳል ኣዝዩ ንፍርዲ እግዚኣብሔር ዘቀላጥፍ ነገር ኢዩ።ሎሚ-ሎሚ፣ክርትያን ተባሂሉ፣<< ቅድሚ ዝኣገረ፣ቃል ኪዳን እንተኣሲረላስ፣ክትጠልመኒ ኢያ፣ቅድሚ ዝኣገረ እንተተመርዕየዮስ፣ክጠልመኒ ኢዩ፣>>ብዝብል ሰነፍን፣ዘይክርስትያናውን ሓሳብ ተዋሒጡ፣ጥምቀትን መርዓን ብሓደ ኮይኑ መብዛሕትኡ ክርስትያን ለሚድዎ፣ኩሎም ኣህዛብን ተጻረርቲ ቤተክርስትያንን ድማ ገሪምዎም ኣሎ።እምበኣር ሃዋርያት ኣብ ሲኖዶሶም ዘጽደቕዎ ብጥቕልሉ ቤተክርስትያን ዘይትፈቕዶ ምግባር፣ኩሉ ዝሙት ኢዩሞ፣ብጾም ክንስዕሮ፣እቶም ዝወደቕና ብጾም ክንትንስእ፣እቶም ንምትንሳኡ ዝተጸገምና ድማ ብጾም ሓይሊ እግዚኣብሔር ክንቅበል ጾም የድልየና።

ወስብሀት ለእግዚኣብሔር።
3ይ ክፍላይ ይቕጽል፣

ሕቱም መጽሓፍ።

መልሲ ንጥንተኣብሳውያን፡-

በስመ ኣብ ወወልድ ወመንፈስ ቅዱስ ኣሀዱ ኣምላም፡

1.ድንግል ማርያም ጥንተ ቅድስና እምበር ጥንተ ኣብሶ የብላን።

ዝወረሰቶ ቅድስና እምበር፡ዝወረሰቶ ሓጢኣት የብላን።ድንግል ማርያም ካብ ኣዳም ጥንታዊት ቅድስንኡ፡ካብታ ኣዳም እንክፍጠር ከሎ ዝነበረቶ ቅድስና ደኣሉ ዘለዋ እምበር፡ካብ ድሕሪ ፍጥረቱ 7 ዓመት ጸኒሑ ብገዛእ ድኻሙ ዝለበሳ ሓጢኣት ሒዛ ኣይተወልደትን።ስለዚ ብግብራ ይኹን ብሕልናኣ ሓጢኣት ኣይፈጸመትን ኢልኩም ምምስካርኩም ጽቡቕ ኢዩ። ግን ከምኡ ምባል ጥራይ ከኣ ኣኻሊ ኣይኮነን።ገና ከይተወልደት እንከላውን ዝሓለፋ ሓጢኣት ወይ ኣበሳ የለን ምባል ከድልየኩም ኢዩ።እዚ ምባል ጥራይ ዘይኮነ ድማ፡በንጻሩ  ዝሓለፋ ንጽሕና ኣሎ ኢልኩም መስክሩ።ናይ ኣዳም ጥንታዊት ንጽሕና።
ጥቕሲ፦ ኢሳ1፣9 እግዚኣብሔር ሒደት ዘርኢ ተረፍ ተዘይሓድገልና ነይሩ....
ኤፌ1፣4-5 እግዚኣብሔር ቅድሚ ምፍጣር ዓለም ሓረየና።
ቅዱስ ያሬድ፡- ድንግል ማርያም ኣብ ሕቆ ሓዳም ከም ዕንቂ ባሕሪ ተብርህ ነበረት።
ድንግል ማርያም ትነጽሕ እምበላእክት፡ድንግል ማርያም ነበረት በሕልና ኣምላኽ እምቅድመ ዓለም፡
ድንግል ማርያም ካብ መላእክት ትነጽሕ፡ዓለም ቅድሚ ምፍጣሩ ኣብ ሕልና ኣምላኽ ነበረት።(ቅዳሴ ማርያም)

እዘን ጥቕስታት ኩላተን፡ብዛዕባ ድንግል ማርያም ሓጢኣት ሰሪሓን ኣይሰርሐትን ዘይኮናስ፡ብዛዕባ ገና ከይተፈጥረት እንከላ፡እረ ኣዳምውን ገና ከይተፈጥረ እንከሎ ንዝነበረ ንጽሕና ናይ ድንግል ኢየን ዘዘንትዋ።እሞ ቤተክርስትያን ትሓተኩም ዘላ፡"ጥንተ ኣብሶ ኣሎዋ ድዩ የብላን?" ኢላ ኢያ። ንስኹም እትምልስዎ ድማ ኣይሰረሐትን።ሓታትን መላስን በበይንኹም ኣሎኹም።ቤተክርስትያን ግን ንድንግል ማርያም ገና ከይተወልደት እንከላ፡እግዚኣብሔር ካብ ኩሉ ርኽሰት ሓሊይዋ ነይሩ፡ምስተወልደት ድማ ከምዚ ዝበልክሞ፡ዝፈጸመቶ ኣበሳ ብሕልና ይኹን ብግብሪ ፈጺምካ የለን ትብል።እዚ ኢዩ ናይ ቅዱሳን መጽሓፍቲ ትምህርቲ።ሓጢኣት ኣይሰረሐትን ምባልኩም ጽቡቕ ኢዩ፡ግን ሓንቲ ነገር ጎዲላትኩም፡ዝሓለፋ ኣበሳውን የለን ምባል ከድሊ ኢዩ።ፐርከስ እግዚኣብሔር ኣበሳ ዘለዎ ስጋ ክወሃሃድ ምስ ባህሪኡ ዝኸይድ ኣይኮነን።

2.ብስጋ ስለዝዓረፈት ጥንተኣብሶ ሓሊፍዋ ኣይንብልን፡ስጋዊ ሞት ኣብ ክርስትና ጥንታዊ ኣበሳ ዘይኮነስ፡ናብታ ጥንታዊ ቤትና ዘሰጋግር ድልድል ኢዩ፡-

ፐርከስ ታሪኽ ሞት ኣብ ሓድሽ ኪዳን ተሓዲሱ ተለዊጡ ኢዩ።ስጋዊ ሞት ንክርስትያን ኣበሳ ኣይኮነን፡ንሕና ኩሉና ክርስትያን ብስጋ እንመውት ዝሓለፈና ኣበሳ ወይ ጥንተኣብሶ ስለዘለና ኣይኮነን።እንታይ ደኣ፡ብስጋ ተሞትናስ ናብ ሕቕፉ ክንከይድ ስለዝዘለና መሰጋገሪና ኢዩ።
ብርግጽ ድንግል ማርያም፡ዓሪፋ ኢያ።ሞይታ ግን ኣይንብልን።ሞት ኣብ ክርስትና ዝተናዕቀ ነገር ኢዩ።ድንግል ማርያም መቓብር ቀሚሳ ኢያ፡ግን ጥንተ ኣብሶ ስለዝነበራ ኢዩ ኣይንብልን፡ምኽንያቱ መቓብር ኣብ ሓድሽ ኪዳን ናብ መንግስተ ሰማያት ዘሰጋግር ድልድል ስለዝኾነ።ድንግል ማርያም ናይዛ ዓለም ድኻምን ጻዕርን ዘበለ ኩሉ ካብ ጽንሰታ ክሳብ ዕረፍታ ቀሚሳቶ ኢያ፡ግን እቲ "ምድሪ ብሰንክኻ ርግምቲ ትኹን"ዝበሎ መርገም ስለዝሓለፋ ኣይኮነን።እንታይ ድኣ፡ሕገ ክርስትና ደኺምካን ጽዒርካን ዓስብኻ እትወሃበሉ ምኻኑ ንምስትምሃር ኢሉ ዝመደባ ኣደ ስለዝኾነት'ምበር።ፈጣሪና ብመምህርነቱ ንከስተምህረና እንተላይ ነዲኡ ከይተረፈ ኣይበቐቐልናን።ካብ ፍጡራን መምህር ክትከውን ዝተመደበት፡ብዙሓት እካ እንተሃለዉ፡ልዕሊ ኩላቶም ግን ድንግል ማርያም ኢያ።ልዕሊኣ ዝዓቢ ፍጡር የለን፡ልዕሊኣ ንናይዛ ዓለም ሽግርን መከራን ከስተምህረና ዝኽእልን ድማ የለን።ሞታ ንዓና መስተምሃሪ ደኣምበር፡መጠቆሚ ኣይኮነ ክኾውን ዝግበኦ።ንሳ ዝሞተት ጥንተተኣብሶ ሓሊፉኪ ኢልና ንኽንጥቁማ ዘይኪነትሲ፡ብመከራኣ ንኽንመሃር፡ብሞታ ንክንጸናናዕ ኢዩ።ንሳ ብስጋ ክትዓርፍ እንከላኮ፡ ክንደይ ኣሽሓት ነፍሳት ናይ ሲኦል ሒዛ ኢያ ዓሪጋ።ሓራ ኣውጺኣቶም።እሞ ብስጋ ሙማታ ንዓና ከደንቐናን ከስደምመናን ምተገበአ እምበር፡ከውቅሳ ኣይግበኦን ኢዩ።እስከ ንሰተውዕሎ፡ንሳ  ብስጋ ስለዝዓረፈት፡ንሞታ ጥንተተኣብሶ እንተኢልናዮ ደኣ፡እቶም ብስጋ ዘይዓረፉ እንበዓል ኤልያስ፡ሄኖክከ እንታይ ክንብሎም ኢና፡ ኣይሓለፎምን ክንብል፧ ይበልጹዋ ኢዮም ክንብል፧ ብጭራሽ ዝበልጻ የለን።ሞታ ንዓና ንሞት ከምእንንዕቆ ኢዩ ዝገብረና እምበር፡ንሳ ብስጋ ስለዝሞተት ብሞት ክንብህርር ኣይግባን።ጥንተተኣብሶ ኣሎዋ እንተኢልናኮ፡ገና ፍርሒ ሞት ኣይወጻልናን።ብክርስቶስ ዝተሳዕረ ሞት፡ንሕና ግን ገና ኣብ ትሕቲ ግዝኣቱ ኣሎና ኢልና ንክርስቶስ ንክሕዶ ምህላውናዶ ኣይኮነን።

ንሱ ጥራይ ዘይኮነውን፡ኣቦና ኣዳም ምድሪ ብሰንክኻ ርግምቲ ትኹን ደኣ ይበሃል እምበር፡ቅድስት ምድሪ ከምዘላ ነኸነጽርውን፡ንሙሴን ንኢያሱ፡እዛ ዘለኻያ ቅድስቲ ምድሪ ኢያሞ ኣሳእንካ ኣውጽእ ተባሂሎም ኢዮም።ስለዚ ኩላ ምድሪ እካ  ሰንኪ ድኻም ኣዳም እንተተረግመት፡ስላ ጸጋ እግዚኣብሔር ግን መርገም ዘይሓለፋ ምድሪ ከምዘላ ክንዝንግዕ ኣይግባእን።ብኻልእ መንጽርውን፡ንናይዛ ዓለም ፈተና ከመይ ኢልካ ከምዝሕለፍ ንምስትምሃር ዋላ በዲኡ ገይሩ ክምህረና ስለዝመደበ፡ኣዲኡ ልዕሊ ኩሎም ፍጡራት ክንሳ፡ልዕሊ ኩሉ ፍጡር መከራ ከምትቐምስ ገበረ።
እሞ፡ነቲ ንሳ ካብዛ ዓለም  ዕረፍታ ኮይኑ ዝተፈለየታን፡ሽግራን ጸበበኣን ከም ጥንተኣብሶ እንተቆጺርናዮስ፡ክርስቶስ ስለኹሉ ክብል ኣብ መስቀል ምስቃሉስ ዋጋ ከምዘይሃብናዮ ዶ ኣይኮነን ዘስምዕ፧ ሞተ ስጋ ስለዝቐመሰት፡ንናይ ስጋ ሞት ጥንተኣብሶ እንተኢልናዮ፡ክርስቶስ ጥንተኣብሶ ኣሎዎ ኢልኩም ከምእትመጹና ኣየጠራጥርን ኢዩ።ሞት ግን ባህርይ ኣይኮነን።ድሕሪ ፍጥረት ኣዳም ዝመጸ ጭማሮ ድኣምበር፡ባህሪ ኮይኑ ኣብቶም 7 ባህርያት ናይ ኣዳም መበል 8ይ  ባህሪ ተወሲኹ ዝተጠፈዐ ኣይኮነን ሞት።ክርስቶስ ምስመጸ ጥንታዊ ሞት፡ ታሪኹ ቀይሩ ፈጺሙ ተለዊጡ ኢዩ።ሞት ንክርስትያን ዝተናዕቀን ኣብ ልዕሊ ሞት ስልጣን ከምዘለናን ምኻኑ ከነጽር ቅዱስ ጳውሎስ፡ኦ ሞት ኣበይ ኣሎ ሓይልኻ ኢሉ፡ፈከረ።እሞ ደጊም ንሕና ክርስትያን ኣብ ልዕሊ ሞት ክንፍክር ደኣምበር,ነታ ኣደ ፈጣሪና ዝኾነት ድንግል ነቲ ንክንዕቆ ስልጣን ዝተዋህበና ሞት፡ከም ዘይተፋሕቐ ኣበሳ ቆጺርና፡ ኣዴና ኣበሳ ሓሊፍዋ ኢዩ ክንልብል ኣይግባእን።ጨአኢስካ ጽዩፍ ኣበሃህላ ውን ኢዩ።

ጥቕሲ፦ ወሰጠጠ መጽሓፈ ዕዳሆሙ ለኣዳም ወለሄዋን።ናይ ዕዳ ( ናይ ክሲ) ደብዳቤኦም ድማ ቀደዶ።ውዳሴ ማርያም ዘሶኑይ፡
ናይ ዕዳ ደብዳበኮ ተቐዲዱ ኢዩ፡ክርስቶስ ቀዲድዎ ኢዩ።ኣበይ ዝጸነሐት ናይ ጥንታዊት ደብዳበ ደኣላ ናብ ድንግል ማርያም ሓሊፋ እትብሉና ዘለኹም፧
ኦ ሞት ኣይተ ሀሎ ሐይልከ፡ኦ ሞት ሓይልኻ ኣበይ ኣሎ።

3.ገብርኤል መልኣክ ንከብስር እምበር፡ጥንታዊት ኣበሳ ክድምሥስ ኣይተላእከን።

ፈጺምካውን ምስ ዓቕሙ እትኸይድ ኣይኮነትን እዛ ጥንተኣብሶ ምድምሳስ።ጥንተኣብሶ ክድምሲስ ዝኽእል ነይሩ ተዝኾውን እኮ፡ቅድሚ ንድግል ማርያም ካልኦት  ብዙሓት ዘብሰሮም ኣሎዉ።
ኣብነት፡-
ነብይ ንዳኒኤል ኣበሲርዎ ግን ጥንተኣብሶ ከርሕቐሉ ኣይተኻእሎን፡-(ዳኒ10)።ንካህን ዘካርያስ ኣበሲርዎ፡ጥንተኣብሶኡ ከርሕቐሉ ግን ኣይከኣለን(ሉቃ1) ።ንድግል ማርያም ግን ከበስራ፡ጥንተ ኣብሶ ከምዘየብላ፡ምልእተ ጸጋ ምኻና ክነግራሞ፡ንኣምላኽ ንምጽናስ ከምዝበቐዐት ድማ ከበስራ፡ደኣምበር  ጥንተኣብሶ ክድምሲሰላ ኢሉ ኣይመጸን።
ከምኡ ተዝኾውንሞ፡-

* ተፈሲሂ ኦ ምልእተ ጸጋ፡ ኦ ምልእተ ጸጋ ደስ ይበልኪ ኢሉ ኣይመመስገናን።ምሉእ ጸጋ እንተሊዋኸድኣ ነየናይ ኣበሳ ኢዩ ከርሕቕ ኢሉ ክመጽእ፧ምልእቲ ጸጋ ማለት እኮ ንጹር ትግርኛ ኢዩ።ኣበር ዘየብላ ማለት ዩ።ብርግጽ ካልኦት ከምዚ ዓይነት ምስጋና ዝተቐብውሉ ኣሎዉ፡እንበዓል መጥብቀ መለኮት ቅዱስ ዮሐንስ፡"ካብ ኣንስቲ ዝወለድኦም ከም ዮውሓንስ ዝበለ የለን" ተባሂሎም፡እቶም ኣብ ምጽኣት ክርስቶስ ምስጉናት ኮይኖም ዝተረኽቡ ናይ ብሓቂ ክርስትያን "ኣንቱም ናይ ኣቦይ ብሩኻት፡ንዑ ናብቲ ዓለም ቅድሚ ምፍጣራ ዝተዳለወልኩም ክትወርሱ፡ማቴ25" ተባሂሎም።እዚ ግን ምስ ናይ ድንግል ማርያም ምልኣታዊ ምስጋና ክወዳደሮ ዝኽእል ዓይነት ምስጋና ኣይኮነን።ኩሎም ቅዱሳን ብእግዚኣብሔር ምስጉናት እካ እንተኾኑ፡ናይ ድንግል ማርያም ኣብ ቅድሚ ፈጣሪ ዘለዋ ሞገስ ግን ልዕሊ ኩሎም ቅዱሳን ፍሉይ ኢዩ።ምልእተ ጸጋ እትብል ሓረግ፡ንኹሉ ልዕልነኣ ኣጠቓሊላ ከተረስኣና እትኽእል ዓባይ ምስጋና ኢያ።

*ገብርኤል ጥንተኣብሶ ከርሕቕ ዝኽእል ነይሩ ተዝኾውን ኮ፡ናይ ክርስቶስ ምምጻእ ኣገዳስነት ኣይመሃለዎን።
ዋና ነገሩ፡ክርስቶስ ናብዛ ዓለም መምጽኢኡ ኣዳማዊ ሓጢኣትና ንከርሕቐልና ኢዩ።ምኽንያቱ እታ ክትሞውት ኢኻ እትብል ፍርዲ ንሱ ኢዩ ፈሪድዋ፡ንሱ ድማ ይድምሲሳ።ስለዚ ጥንተኣብሶ ዘይሓለፎ ስጋ ወሲዱ ክለብስ ነይርዎ።እዚ ድማ ኣቐዲሙ ጥንተኣብሶ ዘይሓለፋ ኣደ ከዳሉ ነይርዎ።
እምበኣር ድንግል ማርያም፡ጥንተኣብሶ ዘይኮነ ሓሊፍዋ እንብልሲ፡ጥንተ ቅድስና ሒዛ ኢያ ተወሊዳ።እዚ ትምህርቲዚ ንጹር ዩ፡ክርስቶስ ጥንታውነቱ ካብ ዘልኣለም ክሳብ ዘለኣለም ቅዱስ ኢዩ።ኣዳም ድማ ክፍጠር እንከሎ፡ካብ እግዚኣብሔር ቅድስና ብጸጋ ስለዝተመጠዎ፡ቅዱስ ኮይኑ ተፈጢሩ።ስለዚ ዋላ እንተወደቐን እንተሞተን፡ኣብ ውሽጡ ግን ንእሽቶ ተረፍ ቅድስና ነይራቶ።ኣብ ሲኦል,ኣብ ውሽጢ ኣዳም ኮይና ከም ዕንቂ ባሕሪ እተብርህ፡ንኹላቶም ቅዱሳን ነብያት   ብዝተፈላለየ ምሳሌታት ኮይና እንዳተገልጸት፡ኣብ መወዳእታ ድማ ብቀንዳ ምስተወልደት ኣትሒዛ ክሳብ ንክርስቶስ እትጸንስ፡ብመልኣኽቲ ትዕጀብን ትንከባኸብን ነይራ።ኣብ ምጽናሳ ካብ ምድራውያንን ካብ ሰማያውያንን ቅዱሳን ፍጥረታት ኣምላኽ ምስክርነት ሰሚዕና።ገብሪኤል ካብ ቀደም ስለዝፈልጣ፡ንኹላቶም ሰማያውያን ወኪሉ ጥንታዊ ቅድስናኣ መስኪሩ።ቅ.ኤልሳቤጥ ድማ፡ካብ ቀደም ስለእትፈልጣ ብዛዕባ ኣብ ምድሪ ንዝነበራ ክብሪ ንምድራውያን ወኪላ መስኪራ።ኣደ ጎይታ፡ናባይ ክትመጺ እዚ ከመይ ኢሉ ይኾነለይ በለት።

4.ኣስተውዕሉ ንድግል ማርያም ከምዚ ኢልና ክሳብ ክንድዚ ስለዘኽበርናያ፡ሰማያዊት ፍጥረት ዝገበርናያ ኣይምሰልኩም።

ጥንተኣብስ ዘይምህላውኮ፡ንሰማያዊ ፍጥረት ዘምስል ኣይኮነን።ፐርከስ ኣዳም ኣብተን 7 ዓመታት ኣበሳን ኣበርን ኣይነበሮን፡እዚ ዘይምንባሩ ድማ ፍጥረቱ ካልእ ዓይነት ኮይኑ ኣይፈልጥን።ኣዳም ክፍጠር እንከሎ ኣዳም ነይሩ፡ክወድቕ እንከሎ ድማ ኣዳም ነይሩ።ቅድስንኡ ንፍጥረትነቱ ክልውጦ ኣይከኣልን ኢዩ።ኣበሳኡ ድማ ንፍጥረትነቱ ክብርዞ ኣይክእልን ኢዩ።ኣዳም ክፍጠር እንከልክ 3 ባህርያተ ነፍሲ፡4 ባህርያተ ስጋ ሒዙ ተፈጢሩ።ብተወሳኺ ድማ ግርማ እግዚኣብሔር፡ጸጋ እግዚኣብሔር ዓሲልዎ ብመልኣኽቲ ተመስጊኑ።ድንግል ማርያም ተረፍ ናይዚ ግርማዚ ኢያ።ተረፍ ናይዛ ንኣዳም ዝተዋህበቶ ጸጋ ሒዛ ዝተረኽበት ኢያ።ኣዳም ምስ ወደቐ  እቶም 7 ባህርያት ኣይተፈለይዎን ኣይተወሰኽዎንውን።እቲ ዝተቐነሶ እንታይ ኢዩ እንተኢልና ጸጋኡ ተገፊፉ ዕራቑ ተሪፉ፡ኣበሳ ስለዝፈለጠ ክሓፍር ጀሚሩ።ንኹላቶም ፍጥረታት ዝገዝኦም ዝነበረ ሕጂ ግን ኩላቶም ፍጥረታት ከፍርሕዎ ጀሚሮም።ንመሬት ዝረግጻ ዝነበረ፡ሕጂ ግን ክትቀብሮ ጀሚራ።እዚ ድማ ክሳብ እቲ ናይ ተስፋ ዕለት ዝኣክል፡ስጋኡ ብሞት ስለዝተተሕዘ ናብ መቓብር፡ብኡ ኣቢሉ ድማ ነፍሱ ናብ ሲኦል ይወርድ ነይሩ።ግን ኣበሳ ኣዳም ባዕሉ ዘምዝኦ መርገም ደኣምበር፡ከም ፍጥረት ኮይኑ ከም መበል 8ይ ባህሪ ዝተወሰኾ ኣይኮነን።እግዝኣብሔር ነዚ ኣበሳዚ ሓንቲ መዓልቲ ከርሕቀሉ ምኻኑ ይፈልጥ ነይሩ።ዕለቱ ክሳብ ዝኣክል ግን ካብታ ጥንታዊ ቅድስቲ ንጽህቲ ባህሪ ኣዳም ንእሽቶ ጩራ ኣትሪፉ፡ብተስፋ ክጽበያ ንኣዳም ተላብይዎ።" እትወለድ እምወለተ ወለትከ" ካብ ጛል ጛልካ ተወሊደ ከድሕነካ ኢየ ብምባል።ነዛ ተስፋ እዚኣ ናብ ደቁ ብለበዋ ኣመሓላለፋ፡ማለት ናብ ወዱ ሴት።ሴት ድማ ነቶም ዝተወልዱ ደቁ"ኣምላኽ ካብ ባህሪና ክለብሳ ዘለዎ ንጽሕቲ ባህሪ ኣላ፡ንሳ ናትና ዘርኢ ኢያ።ካብ ስጋኣ ስጋ፡ካብ ነፍሳ ነፍሲ ወሲዱ ከድሕነና ስለዝኾነ ድማ፡ነዛ ንሱ ክለብሳ ዘለዎ ሰብ ካብ ናትና ኣበሳ ከመዘይሓልፋ ገይሩ ንሱ ብዝምርምሮ መለኮታዊ ሓለዋ ክሕልዋ ኢዩ።"ኢሎም ተስፋ ክገብሩ፡ብእምነት ክጽበዩ፡ነዚ ትምህርቲዚ ድማ ናብ ወሎዶታት ከሰጋግሩ ተላብይዎም ዓሪፉ ኣቦና ሴት።(መጽሓፈ ቀሌሜንጦስ12)።

እሞ ድንግል ማርያም፡ኣበሳ ኣይሰረበትን ጥራይ ዘይኮነስ፡ገና ከይተወልደት ጀሚሩ፡ ጥንታዊ ኣበሳ የብላን ስለዝበልናስ፡ፍጥረታ ካልእ ዓይነት ኢያ ንብል ዘለና ኣይምሰልኩም።ምኽንያቱ ኣዳም ኮይንካውን ጥንታዊ ኣበሳ ከይሓለፈካ ክትርከብ ስለዝከኣል።እነሆ እካ ንድንግል ማርያም ርኢና።እሂ እተምልኽዎ ኣምላኽ ነዚ ክገበር ዘይክእል ድዩ፧ ንድግል ማርያምሲ፡ፍጥረትነታ ከይተለወጠ፡እቶም 7 ባህርያታ ካብኣ ከየልገሱ፡ወይ ካልእ ዓይነት ተውሲኽ ከይሃለዋ፡ብዘይጥንተኣብሶ ከምትውለድ ክገብራ ኣይክእልን ኢዩ? እንድዒ ናትኩም ኣምላኽ እምበር፡ኣምላኽናስ ይከኣሎ ኢዩ።ንሱ ዘይክእሎ የለን።እስመ ኣልቦ ነገር ዘይሰኣኖ ለእግዚኣብሔር፡ኢልና ኢና ንሕና እንቕበሎ።ስለዚ እግዚኣብሔር ንፍጥረትነት ናይ ድንግል ከምቶም ጥንታውያን ኣዳምን ሄዋንን፡ካብ ጛል ጛሉ ንኣዳም ዝተረኽበት፡ኣበሳ ከይሓለፋ ዝተረኽበት ኣደ ፈጣሪ ኢያ።ክርስቶስ ድማ ነዚ ነገር እዚ ኣቐዲሙ ይፈልጦ ነበረ።ዕለቱ ምስ ኣኸለ ድማ መጺኡ ፍቓደኝነት ካብኣ ብምሕታት ተጸኒሱ ተወሊዱ ንዓና ከኣ ናይ ድሕነት ዕድል ከፈተልና።

ክብሪ ምስጋና ንዑኡ ጸሓዮ ንእግዚኣብሔር።
ምስጋና ንድግል ማርያም ይኹን።

ሕቱም-መጽሓፍ።

በእንተ ጾመ ነብያት

በእንተ ጾመ ነብያት

በስመ ኣብ ወወልድ ወመንፈስ ቅዱስ ኣሀዱ ኣምላክ ኣሜን።

እዚ ኣውደ-ጾምዚ፣ቅድስት ቤተክርስትያን ንህዝባ ጽድቂ ኣዋህሊሎም ኣሰር ቅዱሳን ኣቦታቶም መታን
ክስዕቡ ኢላ ንደቃ እትሰርዖ ሓደ ካብቶም 7 ናይ ኣዋጅ ኣጽዋማት ኢዩ።ህዝበ እግዚኣብሔር ንፈጣሪኦም
ንዘለዎም መንፈሳዊ ፍቕሪ ክንድምንታይ ልካዔ ከምዘለዎም ንምምልካት ብፍታዎም፣ትእዛዝ
ቤተክርስትያኖም ንምኽባር ይተግሁ።እዚ ናይ ኣዋጅ ጾምዚ ድማ ሓደ ካብቶም ንፈጣሪኻ ንምኽባርን ንምምላኽን ተባሂሉ ዝፍጸም ተኣዛዝነት ኢዩ።

ትርጉም ጾም፣-

● ካብ ዝብላዕን ዝስተን ምኽልካል፣
እግዚኣብሔር ዝብላዕን ዝስተን ኢዩ።ስለዚ ህዝቢ እግዚኣብሔር፣ካብቲ ኣብዚ ዓለም ዝረኽብዎ ዝብላዕን
ዝስተን ነገራት ኣብሊጾም ንፈጣሪኦም ብምጥማት፣ካብ መግበ ስጋስ፣ንስኻ ትሕሸና፣ካብ መስተ ስጋውን
ንዓኻ ንጸምእ ኣሎና ኢሎም፣ነፍሲ ናይ ክርስትያን ብፈጣሪኣ እትዕንገለሉን እትረውየሉን ቅንያት
ኢዩ።ክርስትያን ካብዚ ኣብዛ ዓለም ዝርከብ ብልዕን መስተን ክኽልከል እንከሎ፣በኣንጻሩ ነቲ ዝብላዕን
ዝስተን እግዚኣብሔር ይጸምኦን ይጠምዮን ስለዝኾነ ኢዩ።መጽሓፍ፣-[[ ከመ ያፈቅር ሀይል ኣንቅዕተ
ማያት፣ከማሁ ታፈቅር ነፍስየ ሀበ እግዚኣብሔር፣ከምቲ ኢራብ ንዓይኒ ማያት እትጸምኦ፣ኣነ ድማ ኦ
እግዚኣብሔር ነፍሰይ ትጸምኣካ ኣላ። መዝ42፣2]] ኢሉ ይምህር።

● ካብ ስብሕን ንስጋና ዘህጥሩን ነገራት ምኽልካል፣
እግዚኣብሔር ንህዝበ ክርስትያን እቲ ሓደን መዳርግቲ ዘይርከቦን ከህጥሮምን ከስብሖምን ዝኽእል
ኢዩ።እግዚኣብሔር ነቶም ዘይቅበልዎን ዝቃወምዎን ከይተረፈ፣ናይ ስጋ መግብን መስተን
እንዳቐረበ፣ስጋዊ ናብርኦም ከ።ዝከናወን ይገብር ኢዩ።ነታ መንግስቱ ክወርስዋ ኢሉ ዘዳለዎም ሓቀኛታት
ክርስትያን ደቁ ግን፣ነዚ ኣብዚ ምድሪ ዝረኽብዎ ስጋዊ ስብሕን ህጥራንን ምስታ ክብርቲ መንግስቱ
ከዋዳድርዋ ኣይደልን ኢዩ።ስለዚ ድማ ኢዩ፣ናብኣ ክኣትዉ ዘለዎም ሰባት፣ስጋዊ ህጥራን ዘይተመነዩ፣ናይዛ
ዓለም ጽቡቕ ነገራት ዝነዓቑ፣ነፍሶም መታን ክትሃጥር ወትሩ ምእንትኡ ኢሎም ነቶም ንስጋ ዘህጥሩ
መግብታት ዝተኸልከሉ ስለዝኾኑ፣ንሱ ድማ ኣገናዕ ንኽብል፣ካልእ ህልነኦም ዘይሓለኖ፣ኣእምሮኦም
ተመራሚሩ ዘይበጽሖ፣የዒንቶም ዘይረኣየቶ፣ብልሳኖም ከምዚ ኢያ ኢሎም ክገልጽዋ ዘይክእሉ፣እጽብትን
ድንቅን ዝኾነት ቤት ብኢዱ ዝሃነጻ ናይ ክርስትያን ቤተ መስባሕቲ ኣዳልዩ፣ነዚኣ ንምርካብ ወትሩ ሃረር
ኢሎም ዕብየቱ ክሳብ ክንድዚ ከምዘድልዮም ክፈልጥሉ ይደሊ።

ቅዱስ ነብይ ዳኒኤል፣<< እተን ሰለስተ ሰሙን ክሳዕ ዚውድኣ፣ጥዑም መባልዕ ኣይበላዕኩን፣ስጋን ወይንን
ኣብ ኣፈይ ኣየእቶኹን፣ዘይቲውን ኣይተለኼኹን፣ ዳኒ 10፣3 >> ኢሉ የዘንትወልና። ስለምንታይ ካብ
ጥዑም መባልዕ ተኸልኪልካ፣ኢልና እንተድኣ ተወኪስናዮ፣ኣብቲ ጽሑፍ፣እግዚኣብሔር ክገልጸሉ ዝተደለዮ
ራእይ ነይርዎ።ስለዚ ህዝበ ኣምላኽ፣ካብ ኣምላኾም ክወሃቦም ዝደለይዎ መንፈሳዊ መግቢ ክህሉ
እንከሉ፣ስጋዊ ስብሖም ክቕንሱ የድልዮም።መንፈሳዊ ህጥራን ንምርካብ፣ስጋዊ ዕብራን የድሊ።ዳኒኤል
ጥዑም መንፈሳዊ መግቢ ንምርካብ፣ጥዑም መግብን መስተን ናይ ስጋ ከይበልዕ፣ንሰለስተ ሰሙን ዝኣክል ክኸልከል ወሰነ።
2ይ ክፋል ይቕጽል።
ወስብሐት ለእግዚኣብሔር።

ጸሎት!!

ጸሎት!!

በስመ ኣብ ወወልድ ወመንፈስ ቅዱስ ኣሀዱ ኣምላክ ኣሜን።

ጾሎተ ምስጋና ኣብ ቅድሚ እግዚኣብሔር፣

ኦ እግዚኣብሔር በተን ቅዱሳን ኣእዳውካ ገይርካ፣ንምስልኻ ከም እትመስል ገይርካ ዝፈጠርካያ ነፍሰይ፣ብገዛእ ስንፍናይን ንምኽሪ ሰይጣን ብምስመዐይን ካባኻ ከምትሽፍት ገይረያ ነይረ ኢየሞ፣ብምሕረትካ ነዛ ሓጥእ ነፍሰይ፣ናብ ምስጋናኻን ኣምልኾኻን ከምእትቐርብ ስለዝገበርካያ የመስግነካ ኣሎኹ። ጎይታየ፣ብክንድዚ ዝኣክል ክብደት ስንፍና ተዋሒጠ እንዳሃለኹ፣ጾሎተይ ከይነዓቕካ ጽን ኢልካ እትሰምዕ ኣምላኽ ምኻንካ ዕጹብ ድንቂ ኢኻሞ ምስጋና ንዓኻ ይኹን። ኦ እግዚአብሔር ኣብ ቅድሜኻ ቈይመ ክመጻደቐሉን ክማጎተሉን ዝኽእል ግብረ ጽድቂ ከምዘየብለይ ትፈልጥ ኢኻ።ነታ ገና መንፈሳውነት ዘይደልደለት ዕሸል ሰብነተይ፣በቲ ነቀይ ነቀይ ዝብል ኣካይዳኣ ንዮው-ነጆ ትንኖ እንዳሃለወት፣ኣብዚ ቆይመዮ ዘለኹ ናይ ምስጋናኻ ዙፋን ንምስጋናኻ፣ምስ ቅዱሳንካ ኮይነ ከመስግን ስለዝፈቐድካለይ ምስጋና ንዓኻ ይኹን።

ጣዕሳን ንስሓን ኣብ ቅድሚ ፈጣሪኻ፣

እምበኣር ኦ ጎይታይ፣ምእንቲ ሰብ ክትብል ስጋ ሰብ ለቢስካ፣ንዓጢኣት ረጊምካ፣ንጽድቅኻ መታን ኽንለብስ ናይ ድሕነት ዕድል ከፊትካልና ክንስኻ፣ዕሽነት ዓብሊሉኒ ዝወዓልክዎን ዝሓደርክዎን ትፈልጦ ኢኻ።እወ እቲ ዝወዓልክዎ ኣነውን ንኹሉ ደኣ ክዝክሮ ኣይኸኣል እምበር፣ካባኻ ከምዝፍለ ግን ገይሩኒ ኢዩ።ናብ ናይ ምስጋናኻ ስፍራ ወትሩ ክግስግሳ ዝግበአን ኣእጋረይ፣ኣገዲደ ናብቲ ንስኻ እትጽየፎ ስፍራ ከምዝኸዳ ገይረየን።ነቲ ብናይ ቅድስናኻ ነጸብራቕ ዝወቀበ ባህርይ ጽባቐኻ ኣብ ቤትካ ወትሩ እንዳረያኻ ክዓግባ ዝግበአን ኣዒይንተይ፣ብሓይሊ ወጢጠ ነቲ ንስኻ ዝረገምካዮን እትጽየፎን፣ ምኽረ ሰይጣን ዝከናወነሉን ነገራት ከምዝርእያ ገበርክወን። ኦ ጎይታይ፣ምስቶም ቅዱሳንን ንጹሐንን ኣመስገንትኻ ኮይነን ንኽብርኻ ክሽብሽባን ከጣቕዓን ዝግበአን ኣእዳወይ፣ኣነ ግን ንኽብሪ'ቲ ንስኻ እትጸየፎም ነገራት ከምዝትንክፋ፣ናብቶም ንስኻ ዘኽበርካዮም ንጹሓንካ ድማ፣ብድፍረትን ብንዕቀትን ከምዘወጣውጣን ገበርክወን።ስለኽብርኻ ክትዕልል፣ስለውዕለትካ ክትቓኒ፣ስለኣምላኽነትካ ክትምስክር፣ስለበደለይ ክትበኪ ዝግበኣ ልሳነይ፣ኣነ ግን ብገዛእ ኢደይን ፍቓደይን፣ንልሳነይ ደፊራ ድርቅና ለቢሳ፣ካብቲ ንስኻ እትቕመጠሉ  ዓሚቕ ውሽጣዊ መዝገብ ልቦናይ፡ ሕማቕን ኣቐያምን ቃላት ከምትተፍእ ገበርክዋ።በዚ ቃላት'ዚ ድማ ብዙሓት ነፍሳት ተጎድኡ፣ብዙሓት ሰንከሉ ብዙሓት'ውን ቀሓሩ።ብዓቢኡ ድማ ንዓኻ ብልሳነይ ከኽብረካ ዝግበኣ፣ ኣግሃኹኻ።እዚ ድማ ኣነ ባዕለይ፡ ሰይጣን ንክካረየንን ብልሳነይ ገይሩ ግብሩ ክፍጽምን ፍታወይ ስለዝነበረ ኢዩ።ደጋዊ ትርኢተይ ብኣኻን ብቅዱሳንካን ካብ ርሑቕ ዝፍቶን ዝበሃግን ኮይነ ናብ ሕቕፉኻ ዝጠበቐ ሰብ ክኾውን ዝግበኣኒ ክንሰይ፣ኣነ ግን እቲ ንብረቱ በቲኑ ኣብ እንዳሓሰማታት ዝጓሲ፣ እረ ዕንጋለ-ከርሲ ደልዩ ግን ክሳብ መግቢ ሓሰማታት ዝተሓረሞ ሰብ ዝኾንኩ፣ እነሆ ብድኻማቱ ዝሓነኸ ሰብ ኮይነ ተሪፈ ኣሎኹ።

ልመናን ተማሕጽኖን ንፈጣሪ፣

 ኦ ገይታይ፣ኣነ ብዛዕባኻ ሓንቲ ነገር ይፈልጥ። መሓሪ ምኻንካን፣ንሓጢኣን ከምዘይትንዕቅን።ንዝጠፍኡ ከምእትረክብን፣ብሓጢኣት ንዝመሽመሹን ኣብ ናይ ሓጣውእ መቓብር ንዝተቐብሩን ብስሞም ጸዊዕካ ከምእትሓቑፍን።ንምሉእ ዘመኖም ብሽፍትና ንዘሕለፍዎ፣ ብምሕረትካ ሓጺብካ፡ምስቶም ቀዳሞት ወረስቲ ክብርኻ ክኾኑ ከምእትገብርን፣ኣማኢት ሰባት ብሕሜታን ጽልእን ሓሪዶም ንዝበልዑ ድማ ፣ንስኻ ግን ንበደሎም ንምሕዳግ ከምዘይጽግመካ ይፈልጥ ኢየ። እምበኣር ኦ ጎይታይ ኣነ'ውን ምሕረትካ ንምቕባል ዝበቅዕ ሰብ እኳ እንተዘይኮንኩ፣ብዘይካኻ ዝጽውዖ ኣምላኽ ግን የብለይን።ብዘይካኻ ካልእ ኣማራጺ የብለይን።ንመን 'የኸ ደንግጸለይ ክብሎ፧ብዘይካኻኸ መን ኢዩ ክረድኣኒ፧ ጦንቆልቲ፣ከሓድቲ፣ሓጢኣን እንተተጸጋዕክዎም ካባኻ ክፈልዩኒ እምበር፣ከምቲ ናትካ ዕረፍቲ ክህቡኒ ኣይተኻእሎምን።ዓለምን ፍትወታን መመሊሳ ከተርክሰኒ እምበር፣ከተንጽሓኒ ኣይተኻእላን።ከመይ ኣቢላኸ ንርእሳ ከተንጽሕ ዘይተኻእላ ዓለም ንዓይ ከትንጽሓኒ፧ ኦ ጎይታይ፣ንዝጠፍአት ነፍሰይ፣ምስተን ኣባጊዕካ ኣብቲ ናትካ ሞጓሰ ከምእትጽንበር ግበራ።ምስጋናኻ ተሓሪምዋ ዝነበረት ልሳነይ፣ጎሮሮኣ ክሳብ ዝስንጠቕ ስለ ክብርኻ ከምእትዝምር ግበራ።ኦ ጎይታይ ብሰንኪ ደገ ከናፍረይ ብዙሓት ከይጉዱኡ፣ንስኻ'ውን ከይትጉሂ፣ኣነ ድማ ሰንኪ ዘይልኡም ቃላተይ ኣብ ቅድሜኻ ኣብ  ቅድሚ መንበረ ፍርድኻ ከይሓፍርሲ፣ንብህሎታተይ ቀፊር ግበረሉ።ብድፈረትን ድርቅናን ካባኻ ርሒቓ ዝነበረት ልበይ፣ብኣምልኾኻ ከምእትምበርክኽ ግበራ።ንስሓ ንዘይምእታው ርዒማ፣ሕጋጋታትካ ንምፍጻሙ ከቢድዋ ዝነበረት ሰብነትይ፣ብትእዛዛትካ ባህ ከምዝብላ ግበራ። እዚ ድማ ንስኻ ምስእትምሕረኒ፣ብናይ ድንጋጸ ዓይንኻ ምስእትርእየኒ ኢዩ።ኦ ጎይታይ ደንግጸለይ፣በደለይ ሕደገለይ።

ብቅዱሳነ እግዚኣብሔር ምምሕጻን፣

ንዓኻ ዘኽበሩ፣ንስኻውን ዘኽበርካዮም፣ከምዝኸማይ ስጋ ለበስ ነይሮም ክንሶም፣ብውድቀቶም ከይቀሓርካ ጣዕሳኦምን ተጋድሎኦምን ጥራይ ተመልኪትካ ናብቲ ንስኻ ዘዳለኻሎም ናይ ክብሪ ስፍራ ከምዝኣትዉ ዝገበርካዮም ብዙሓት ኢዮም።እወ፣ኣብዛ ምድሪ ብብዙሕ ተጋድሎ ናይ ቅድስና ሓሊፎም፣ዘኽበርካዮም፣ምስኣቶም ኮይንካውን ቃል ኪዳን ዝኣተኻሎም ብዙሓት ኢዮም።እምበኣር ኦ ጎይታ፣ምእንቲ ቅድስተ ቅዱሳን ድንግል ማርያም ኣዴኻ፣ምእንቲ ቅዱሳን መላእክትኻ፣ምእንቲ ንጹሓን ነብያትካ፣ምእንቲ ሕሩያን ሃዋርያትካ፣ምእንቲ እሙናት ሰማእታትካ፣ምእንቲ'ቶም ትጉሃን ኣኽበርቲ ቃልካ ዝኾኑ ሊቃውንቲ፣ምእንቲ ኩሎም ጻድቃናት፣ ምእንቲ'ቶም ንዓለም ዝመነኑ ንዓኻ ድማ ወትሩ ዘኽብሩኻ መነኮሳትን ደናግላንን፣ምእንቲ'ቶም ኣርዑት መስቀልካ ተሓንጊጦም፣ወትሩ ኣብ ኣገልግሎትካ ተጸሚዶም ዘለዉ ትጉሃን ኣገልገልትኻ ክትብል፣ንሕሉፍ በደል ናይ ነፍሰይ ይቕረ ግበረላ፣ካብ ኩሉ ዝመጽእ ርኽሰት ድማ ከምእትርነብ ግበራ።ኣብዛ ዓለም ዘለና ደቅኻ ኩሉና ኣብ ኣምልኾኻ ከምእንጽመድ፣ብፈተና ዓለም ከይተሰናኸልና ከምእንብርትዕ ግበረና። '' ኣብ ጸሎትካ ዘክረኒ፣'' ዝበሉኒ ደቅኻ ኣሎዉ።ኣነ ግን ንነብሰይ እኳ ካብ ፍትወት ዓለም ከምእተምልጥ ክገብራ ኣይተኻእለንን። ባርያኻ ክንሰይ ባርያ ካልእ ክገብራ  ዝህደድ ዘለኹ ድኹም ሰብ ኢየ'ሞ፣ኣብዛ ቆይመያ ዘለኹ ናይ ምስጋናን ጸሎተይን መኣዲ  ኮይኖም ምሳይ ከምዝጽልዩ ዘለዉ ገይርካ ሕሰቦም።ንናይ ኩሉና ጸሎት ድማ ስምዓዮ።ካባይ'ሞ ንሳቶም ኣብዚሖም ይሕሹ ፣እምበኣር ጸሎት ናይቶም ኣብ ጸሎትካ ዘክረኒ ዝበሉኒ ተቐበል።ብዓቢኡ ኣብዛ ቆይመያ ዘለኹ መኣዲ ጸሎት፡እልፊ ኣእላፋተ ቅዱሳን ተጋቢኦም ካባኻ ምሕረት ተሰኪሞም ናባይ ናብ ሓጥእ፡ ጸሎቶይ ጾሎት ደካማ ተሰኪሞም ድማ ናባኻ ናብ ልዑል ንምብብጽጻሕ ዝህንጠዩ ትጉሃንን ፈጣናትን ኣሎዉኻ።እምበኣር ኦ እግዚኣብሔር፡ ጸሎቶይ ኣብ ቅድሜኻ ዝበቅዕ መስዋእቲ ኣይኮነን እሞ ጸሎት ናይቶም ቅዱሳንካ ሰሚዕካ ምሕረትካ ናብ ኩሉና ልኣኽ።ኦ ጎይታ ኣነስ ዋላ ኣብ ልመናይ'ውን ዝጋገ ሰብ ኢየ። ነቲ ዘድልየኒ ማሚኻ እትፈልጥ፣ ነቲ ዘየድልየኒ ድማ ኮለ ገና እትምርምር ኣምላኽ  ስለዝኾንካ፡ ነቲ ዘድልየና ካብቲ ሃብተ መግቦትካ ቆሪስካ ልኣኸልና፣ንዘየድልየናን ዝጎድኣናን ነገራት ድማ ዋላ እካ ንሕና ንዝጎድኣና ነገር ንክንቅበል እንተለመንናካ፣ንስኻ ግን ብምሕረትካ ካባና ከውሎ።ምሕረትካ ልዕሊ ኩሉ ነገር ኢዩሞ፡ንኹሉና ደቅኻ ይቕረ ግበረልና።

ስለኻልኦት ምጽላይ፣

ኦ ፈጣሪ ንድኹማት ብርተዐኻ፣ንሕዙናን ጽኑዕ መንፈስካ፣ንድኻታት ሃብትኻ፣ንርቡሻት ህድኣትካ፣ንብቱናት ሓድነትካ፣ንእሱራት ፍትሕኻ፣ንሓጢኣን ይቕሬታኻ፣ንደፋራት ትሕትናኻ፣ንደናቑር ጥበብካ፣ንቂምተኛታት ርህራሄኻ፣ንሓተትትን ከሓድያንን መናፍቓንን እጹብ መልስኻ ክትህብ ይጽሊ ኣሎኹ።እዚ ድማ ብጥሙያትና እንዳሃለና፣ንበልዕ ዘለና፡ብጽሙኣትና እንዳሃለና ድማ ንረዊ ዘለና ስለዝመሰለና ኢዩ። ኣብቲ ንስኻ ዘዳለኻልና ምኡዝ መኣዲ ቅድስና መታን ክንሳተፎ እሞ፣ንብልዕኻ በሊዕና ክንዕንገል፣ነቲ ጥዑም መስተኻ ሰቲና ከኣ ክንረዊ እሞ፣ናብ መንግስትኻ ንምእታው ዝኽልክለና መጋረጃ መታን ከይርከብ ኢዩ።ምድራዊ ኣቦ እኳ፣ዓሳ ለሚነዮ ተመን ከምዘይህበኒ፣ዳቦ ለሚነዮ እምኒ ከምዘይምጥወለይ ይፈልጥ ኢየ።ንስኻ ግዳ ጎይታይ ክንድምንታይ ወሃብን ሰማዕን  ዘይትኸውን።እዚ ባህርይዚ ኣባኻ ንዘልኣለም ጸኒዑ ከምዝነብር ይፈልጥ ኢየሞ፣ንጾሎተይ ኣይትንዓቕ። ንኹሉ ሰብ ኣብ ቅድሜኻ ዝተመርከኸን ንስኻ እትሕጎሰሉን ሰብ ኮይኑ ክርከብ እጽሊ ኣሎኹ።ኣብ ጎጆ ሕልናኦም እንዳሃለኻ ዝተኸወልካዮም መሲልካዮም ንዓኻ ዝናፍቑ፣ምስኣቶም እንዳሃለኻ ዝረሓቕካዮም መሲልዎም ዝርበሹ፣ሓቒፍካዮም እንዳሃለኻ፣ ዝተፈለኻዮም መሲልዎም ሕቕፉኻ ዝናፍቑ፣መግቦትካ እንዳመገቦም ፣ብረሃብ ዝተጠቕዑ መሲልዎም፣ዕንጋለ ንዝልምኑ፣ኦ ጎይታ ግልጸትካ ከምዝስኽሰተሎም ክትገብር ይከኣለካ ኢዩሞ፣'' ኣሎኹልኩም'' ኢልካ መልሰሎም።ኣበራትዓዮም።ካብቶም ብምሉእ ሓይሎም ዝዋግዎም ርኹሳን፣ ናትካ ንጣብ ረድኤት ትሕይል።ካብቲ ፈታዊኦም ተመሲሉ ንድሕሪት ከምዝጉተቱ ዝገብር ሓያል ጸረ ሰናያት፣ እታ ካብቲ ጥልቀት ባሕሪ ስሒባ ከተውጽእ ዝከኣላ እተድሕን ኢድካ ትብርትዕ።ካብቶም ንውድቀቶም ዝህንደዱ እልፊ፣ንስኻ ንረዲኤት ደቂ ሰባት እትልእኾም ኣእላፋት ፈጣናት ቅዱሳንካ ይበዝሑን ይሕይሉን'ሞ፣ ኦ ጎይታ ናይ ልበይ ድኻምን ጥርጣረን ከይተመልከትካ ብረዲኤትካ ኩላቶም ከምዝርድኡ ግበር።

በረኸት ረዲኤት ናይ ቅድስተ ቅዱሳን ድንግል ማርያም ኣዴኻ፣ጾሎት ኩሎም ቅዱሳንካ ኣይፈለየና ኣሜን።

ጾሎተይን ምስጋናይን ጣዕሳይን ስለዝተቐበልካ፣ክብሪ ምስጋና ኣምልኾ ውዳሴ ንዓኻ ይኹን ሎምን ኩሉ ሳዕን ንዘለኣለም ዓለም ኣሜን።

ወስብሐት ለእግዚኣብሔር።

ሕቱም መጽሓፍ፣

ደረቐኛ ልቢ፥-

በስመ ኣብ ወወልድ ወመንፈስ ቅዱስ ኣሀዱ ኣምላክ።

ደረቐኛ ልቢ፥-

ደረቕ ዕንጸይቲ ወይ ቀልጢፉ ክስበር ኢዩ፡ወይ ድማ ቀልጢፉ ክሰብር ኢዩ።ደርቕ ቅጫ ንምሕያኹ ጛዶ ወይ ድማ ንምሕቓቑ።ደረቕ ቃልውን ከምኡ፡ወይ ኣብ ምስምዑ የእዛን የጽምም፡ወይ ድማ ኣብ ምስትምቓሩ ሕልና ይጎድእ።መብዛሕትኦም ድርቀት ዝዓብሎሎም ቃላት፡ንልቢ ሰማዕቲ ምቹኣት ኮይኖም ስለዘይንዝሑ፡ውዒሎም ሓዲሩሮም ለበ-ልምሉማት ከይሰበሩ ኣይሰሩን።ብዙሓት ልምሉማት ልቢ፡ብደረቐኛታት ቃላት ክስበሩ ርኢናን ሰሚዕናን ኢና።ብደረቐኛ ቃል ዝተሰብረ ልቢ፡ንምጽጋኑ ከቢድ ዋጋ ኢዩ ዝሓትት።መብዛሕትኦም ደረቐቓታት፡ ልቢ ዝጽግኑ ዘሎዉ መሲልዎም ኢዮም ደረቐኝነት ዘዘውትሩ።እቲ ዘገርም ግን እቲ ደረቕ ቃሎም፡ንዝተሰብረ ልቢ፡ኣይኮነን ክጽግንሲ፡ክዒቱ እካ፡ንልቢ ርህራሄ ከምእተፈልፍል ክገብራ ኣይክእልን።በንጻሩ፡ በቲ ደረቐኛ ቃሎም እዛ ልቢ ስለእትስበር፡ወይ ንፋሶም ጸሊይዋ ንሳዉን ደረቕ ቃል ከተፈልፍል ትጅምር፡ወይ ድማ ልቦናኣን ልምላሜኣን ተሓንኪኹ ጨሪሳ ምስቶም ዘየለዉ ትህሉ።

መጽሓፍ ቅዱስ፡"ቃል ይቐትል፡ትርጉም ግን ህይወት ይህብ፣" ይብል።ልቢ ብትርጉም እንተዘይ ተሃኒጻ፡ክትጉብዝ ኣይትኽእልን ኢያ።ህጻን ስለምንታይ ሕቶታት የዘውትር ይመስለኩም? ልቡ ገና ነገራት ፍሒርካን ተመራሚርካን ንምፍላጥ ስለእትህጠ ኢዩ፣ " ከመይ፡ስለምንታይ፥ እንታይ፣ኣበይ!" ዝብሉ ትርጉም ሓዘል ዝኾኑ ነገራት ንምርካብ፡ነዞም ምርምራውያን ቃላት ካብ ልሳኑ ኣይፈልን ኢዩ።ፐርከስ ትርጉም ኢዩ ህይወት ዝህበካ፡እቲ ንጽል ብህሎ ጥራይ ንበይኑ ግን፡ኣርእስቲ ጥራይ ዝሓዘት መጽሓፍ ኢዩ ዝኾነካ።ንሓንቲ መጽሓፍ እሞ ንረኣያ፡ ምሉእ ትሑዝቶኣ ንምፍላጥ ኣርእስቲ የድሊ እካ እንተኾነ፡ብዘይዝርዝራዊ ጽሑፍ ግን  ኣርእስቲ ጥራይ ንበይኑ፡ ነቲ ጥበብን ርድኢትን ዝናፍቕ ኣእምሮ፡ ጭቡጥ መረድኢ ክሕዝ ኣጸጋሚ ኢዩ።ስለዚ እታ ደረቐኛ ልቢ ክትሓትት ኣብ ክንዲ ዝግበኣ፡ነቲ ዘይተመለሰላ ሕቶ፡ገና ተወንዝውፉ እንዳረኣየቶ፡ባዕላ መላሲት ኮይና ኣብ ድርቅናኣ ደሪቓ ትነብር።

ልምልምቲ ልቢ ክሳብ እትጉብዝ፡ሉምሉም ቃል እዩ ዘድልያ።ዓጺቓ ለምሊማ፡ደልዲላ ኣብ ፍረ ንእትበጽሕ ልቢ ግን፡እንደገና ማይ ዘይኮነ፡ኮስካስን፡ግሳጼን ኢዩ ዘድልያ።መታን ዓብያ ደልዳላ፡ፍረ ኣውጺ ደልዳላ ጉንዲ ናይ ጉባዜ ክህልዋ።መብዛሕትኦም ደረቐኛታት እንታይ ዓይነት ቃል የውጽኡ ኣሎዉ፡ደረቐኛ ቃሎም ንመን ናብ መን ይፍኖ ኣሎ ኣየስተብህሉሉን ኢዮም።ክምርምሩን ከስተብህሉን'ውን ግዜ ኣይወስዱን፡እታ ደረቐኛ ልቦም ዘዝሃበቶም ደረቕ ቃል፡ኣውጺኻ ምስንዳው ጥራይ ኢዩ ግብሮም።እምበኣር፡እታ ነቲ ደረቐኛ ቃሎም ዝተቐበለት ኣብቲ ማዕዶኦም ዘላ ልቢ፡እንተድኣ ኣብ ስብእናን ድልዳሌን ዝበጸሐት ኮይና ጸኒሓ፡ነቲ ዝተሰደደ ቃሎም ማምያን ኣገናዚባን ክተኾምስዕ እትኽእል ልቢ ስለዝኾነት፡እቲ ደረቐኛ ቃሎም ክጎድኣ ኣይክእልን'ዩ።እካ ድኣ ከም ጉስያ ዕፉን ኮይኑ ይኹስኩሳ እሞ፡30-60-100 መንፈሳዊ ሸዊት ዕፉን ከምትጫጭሕ ይገብራ።በንጻሩ እታ ተቐባሊት ልቢ ኣዝያ ዘይገርዘዐት፡ኣብ ፍላሜ ናይ ቡቕሎ ዘላ ገና ዘይዓበየት ልቢ እንተኾይና ግን፡ከምቲ ጉስያኣ እንከይኣኸለ እትሕረስ ግራትሞ፡ ሰንኩ ቀልጢፋ እትቅምስል ስለዝኾና፡እቲ ከም ማሕረሻ ተዋጋኢ ደረቐኛ ቃሎም፡ጠፊኣ ከምዘይነበረት ከምእትኸውን ይገብራ።እቲ ዘገርም ግን ንሱ ኣይኮነን፡፡ናብዘን ክልተ ዓይነት ልብታት ዝተወርወረ ደረቐኛ ቃል፡ነቲ ሰዳዲ ዘይጠቅም፡በንጻሩ እካደኣ ንዑኡ ዝጎድኦ ምኻኑ ኢዩ።

ከመይ ኢላ ሓንቲ ደረቐኛ ልቢ በቲ ደረቐኛ ቃላ ንባዕላ ትጉዳእ፧

ብደረቐኝነት ኣሰንዮም ዝፈነዉዎ ቃሎም፡ናብቲ እኹል ስብእናዊ ልቢ ዘለዎ ሰብ ይበጽሕሞ፡ እቲ ትሑትን መንፈሳዊ ብስለት ዘለዎን ሰብ ብድርቅነኦም ስለዘይስንብድ፡ብዘይምስንባዱ ንሳቶም ይስንብዱ።በዚ ድማ እቲ ተቐባሊ ቃሎም፡ድርቅነኦም ጉስያን ኮስካስን ኮይኑ ከም ተግሳጽ ገይሮም ይቕበልዎሞ፡እንደገናዊ ድልዳለ ከምዝውስኹ ይገብሮም።እቶም ደረቐኛታት ግን እቲ ደረቐኛ ቃላም ናባኣቶም ተመሊሱ፡ብጣዕሳን ብስጭትን ልቦም ተበታቲኹ ብመንፈሳዊ ስዕረት ረኽመሽመሽ ከምዝብሉ ይገብሮም።ባዕሎም ንባዕሎም ይጎድኡ።በቲ ካልእ መንጽርውን፡ናብቲ ገና ብድልዳለ ለበ-እግሩ ክረግጽ ዘይጀመረ፡ባጉም- ባጉም በሃሊ ህጻን፡ እወ ናብቲ መንፈሳዊ ስብኣና ዘይኣኸለ ሰብ ምስተወርወረ እቲ ደረቐኛ ቃሎም፡እቲ ዕሸል፡ብሰንኪ ደረቐኝነቶም ስለዝህሰ፡ንሳቶምውን ይህሰዩ ማለት በይኖም ክጎዩ ይጅምሩ። ንድርቅና በይኖም ይብሕትዎሞ፡" እዚ ተጋጊኻ፡ኣብዚ የዕርዮ፡ከምዚባ ግበር!" ኢሉ ዝእርሞምን ንጉዕዞኦም ዝከታተልን ዘየብሎም ኮይኖም ስለዝተርፉ በይኖም ይጎዩ።ካብ በይንኻ ምጉያይ ዝኸፍእ ምህሳይከ እንታይ ኣሎ፧ ለካ በይንኻ ምግያይውን ድሕሪት ምውጻእ ኢዩ።በይኑ ዝጎዪ ሰብ ዝቕድሞ ዘየብሉ መሲልዎ ኢዩ ዝጎዪ፡ግን ንንጥፈታቱ ዝከታተልን፡ቀስቂሱ ዘሳጉሞን ብዘይምህላዉ እናተሃሰየ ይነብር። እዚ ድማ ብኹሉንትናኻ እንዳተሳዓርካ ምንባር ኢዩ።

ስለዚ እቲ ደረቐኛ፡ሰንኪ ድርቅንኡ ደሪቑ ይነብር።ንላዕሊ ኣይውስኽ፡ንታሕቲ ኣይሓጽር።
እቲ ልምሉም ልቢ ዝወነነ ሰብ ግን፡ንዑኡ ዘደልዱሉ ምህሮታት ክፍትሽ ስለዝነብር፡ሓንቲ መዓልቲ ደልዲሉ ዝረግጸላ፡ኣብ መንፈሳዊ ሸዊት ዝበጽሓላ ናይ ፍረ ዘመን ከምዘላቶ ስለዘይጠራጠር ወትሩ መንፈሳውነቱ ከዐቢ'ዩ ዝነብር።ቃላት ክኸብድዎን ግድላት ክኾንዎን እንከለዉ ንዘመነ ህጻንነቱ ይዝክርሞ፡" ትማሊ ህጻን እንከለኹ እኮ ሕቶታተይ ብውንዝፉ ቀሲነ'የ ዝሓድር ነይረ፡ሕጂኸድኣ እንታይ ወሪዱኒ ኢየ፡ርግኣታዊ ልቢ ንኽህልወኒ ዘይጽዕር!" ኢሉ ምስ ልቡ እንዳተዛራረበ ይነብር።እግዚኣብሔር ድማ ምስትሑታት ልቢ እምበር ምስ ደረቐኛታት ዘይምኻኑ ይፈልጥ ኢዩ፡፡ እወ ምስ ርህሩሃት እምበር ምስ ጨካናት ኣይኮነን፡ምስ ፍርሃት ኣምላኽ ዘለዎም እምበር ምስቶም ደፋራት ንመዓርጋት ዝንዕቁ ኣይኮነን።እታ ትሕቲ ልቢ ትሑታት ቃላት ክትደሊ ትነብር፡እታ ደረቐኛ ልቢ ግን ንልምሉማት ቃላት ከተጽንት ትንበር።እግዚኣብሔር ድማ ስቕ ኢሉ ይዕዘብ።ነቲ ደረቐኛ ካብ ድርቅንኡ ክሳብ ዝምለስ፡ነቲ ትሑት ድማ ዓስቢ ትሕትንኡ ንምብርካት ኢሉ፡እንደገና ትሕትና ክሳብ ዝውስኽ ብትዕግስቲ ንኽልቲኦም ይጽበዮም።ሽዑ ነቲ" ኣንታ ብሩኽ  ብውሑድ ተኣሚንካ ኢኻሞ ኣብ ልዕሊ ብዙሕ ክሸመካ ኢየ" ኢሉ ይምጉሶ፡ነቲ ሓደ ድማ "ኪድ ካባይ ረሓቕ፡ቅድሚ ምርሓቑ ግን ነታ ዘላቶውን መንጥልዎ" ኢሉ ይነቕፎ።
እግዚኣብሔር ኣምላኽ ከምቲ ለውሃቱ፡ ለውሃት ይዓድለና።
ወስብሀት ለእግዚኣብሔር!
ሕቱም-መጽሓፍ

ሓባሪት ፊስካ

ሓባሪት ፊስካ

ተነፊሓ ብሕሹኽታ
ምኽንያታ ክትድርጉሖ
ንሰማዒኣ ከተስምዖ
ወዮ ሰሚዕዋ
ድምጻ እንከይወጸ
ቀዲምዋ
ንሳ ዝሓሰበቶ ንዓና
ንሱ ግን ከይተሰምዐት ሰሚዕዋ

ኣየ ፈጣሪ
ንምኽንያት ልቢ
ኣንባብቢ
ድምጺ ስለዘየውጽአት ነይግድሶ
ንሕና እንከይሰማዕናያ'ዛ ፊስካ
ሰሚዒዋ ኣሪምዋ
ጀሚሩ መልሲ
ከይትጠፍኦ'ዛ ነፍሲ
ንሕቶኣ ይምልሶ
 ይመላልሶ
"ግድፊ ፊስካ ልቢ
ዝዝረብ ተዛረቢ
ዝስማዕ ተናበቢ
ብሰብካ'ዚ ሰብ ከይትከዓቢ
 ዝሓፈርኪ
ኣነኸደኣ ናበይ ተሰዊረኪ
ኣይረኣየክን ድየ ኣብ ውሽጢ
ኣብ ልብኺ
ኣብ ሕልናኺ!"

እናለ የሕሾኽሽኻ
ብዓውታ ይጽውዓ
'ተተሰምዓ
ድምጻ ብሕሽኽትኡ
ናቱ ብዓውትኡ
 ሰሚዕናዮ
ምኽንያት'ዛ ፊስካ
እንከይበጽሐ ናብ ኣእዛንና
ተግሳጹ ሰሚዕናዮ
ንሕናውን ተገሲጽናዮ
ምዕድኡ ተመጊብናዮ

ኣየ ፈጣሪ
መን ይቕድሞ
ምኽንያታ'ዛ ልቢ ኣላሊይዋ
ቅድሙ ሓሲባ ክትጥብሮ
ግንከ ፈጣሪ፡-
ኩሉ ከምዘይስወሮ
ምኽንያታ ከምዝዕይሮ
ኣብ ዕምኮኡ ከምዘዕቕሮ
ከምዝመዝኖ
ትፈልጥ'ያ'ዛ ፊስካ
ኣየ ፊስካ ልቢ!!!

ንብዓት ሕንጢት!

በስመ ኣብ ወወልድ ወመንፈስ ቅዱስ ኣሀዱ ኣምላክ።

ሕንጢት ትነብዕ ኣላ!

''ሕንጢት'' ኢለ ክጽውዓ ሓሲበስ፡
ተረኣኽዋ ግን ፍርዝን ዝበለት ኮይና ጸኒሓ።
"እንታእዋና ደኣላ ጎቢዛ" እንዳበልኩ ብልበይ፣
'' እንታይ ደኣ ጠፊእኪ! እ....ሓፍትኺ ድያዚኣኸ" ካብ ሕቕፊ'ታ ዓባይ ሓፍታ ተቐቢለ ሰዓምክዋ ንሕንጢት።
" እወ! እ...እ...ማማ ...እንድያ'ሞ ናብ ቤተክልስትያን እ...እ...ዘይመጸት ኮይና።"
ኢላ እታ ንሽቶ ሕንጢት ሓፍታ ቀዲማ መለሰት።
"ኣ...ኣ... ኣባ ቀሺ...እ...እ...ጸሎትባ መሃሌና!"
በለትኒ ደጊማ።

በቲ ራህሪሄላ
ልበይ ተሰይሩ
ድራር ዓለም ከይኮና
'እንታይ'የን ክኾና!" ብምባል
ብመጻኢአን ተሻቒሉ
በቲ ድማ ተስፋ ገይረ
ንቃሉ ናፊቐን
ናብ ቤቱ ብምምጸአን
ብቆሪጸ ተስፋ
ንዝደቀሰ ልበይ ኣበራቢረ
ክሕግዘን ብሕልናይ ተላዒለ

"ኣብ ገዛ፡ ምስ ማማ ትጽልያዶ፧"
ኢለ ሓተትክዋ።
"እ...እ...ማማ ደኣ...እ...እ... እንታይ ትጽሊ ኮይና!"
"እንታይ ደኣ ከይጸለየት ትድቅስ፧"
"ኣ...ኣ...ኣይኮነን...እ...እ...ደልፊ እምበል ትሰምዕ!"
በለትኒ ሕጢት።
እታ ዓባይ ሓፍታ፡ ስቕ ኢላ ክትሰምዕ ጸኒሓ፡ሕጂ ግን "ይኣኽለኪ" ዝበለታ እንክትመስል ብዓይና ገነሐታሞ፡
"ካብ መጽሓፍ ቅዱስባ፡ታሪኽ መሃረና!" በለትኒ እታ ዓባይ።
ኩሉ ናይ'ታ ሕንጢት ዘረባ ከይግደሰሉሞ፡ከይንዕቐን ግን ኣዝያ እንዳፈረሐት'ያ።
"ኣጆኺ፡ኣጆኺ፡እዚ ደኣ ስርሐይ እንድዩ።ወሸለ ናብ ቤቱ መዓልታዊ መጺኽን፡ ጥራይ ድሊየት ይሃሉ እምበር ኣብ ዝኾነ ግዜ ኣነ ወትሩ ቅሩብ ኢየ።" ኢለ ንስክፍትኣ ከይርሕቐላ ፈተንኩ።" እ...ቅዱሳን ጽሑፋት፡ ኩላቶም ንሕይወትና መራሕቲ ስለዝኾኑ፡ ሰሰሚዕና ከነተግብሮም ኣሎና፡ሕራይ!"
በልክዋ።
ብርእሳ ነቕ-ነቕ እንዳበለት እወታኣ ነገረትኒ።እንተላይ'ቶም ኣብቲ ጉባኤ ዝነበሩ ህጻናት ሕጉስ ገጽ ኣርአዩኒ'ሞ፡
ሽዕኡኡ፡"ሕጻናት ናባይ ይምጽኡ ሕደጉ ኣይትኸልዎ፡"
ዝብል ጽሑፍ ክትርኸሎም ጀመርኩ።

"ሕደግዎም ይምጽኡ
እንታይከ ኣቢሶም ካብ ቤተይ ክወጽኡ
ስለምታይ ተፈራርሕዎም ንኽወጽኡ
ወረ ናበይ ክርሕቁ
ናበይ ክጠፍኡ
ደቅኹም ተማልኡ
እምበር በይንኹም ኣይትምጽኡ
መንግስተይ ንኸምዚኦም  ዝኣመሰሉ ኢያ'ሞ
ባሩኾተይ ክነስኡ
ሕደግዎም ይምጽኡ

እናበለ ዝመሃረ
ንጽህነኦም ዘበሰረ
ነቶም ዘይፈለጡ
ብንዕቐት ዝተበዓጡ
ንልቦም ሰቢኽዎ
ትዕቢቶም ነቒፍዎ
መንግስተ ሰማያት
ብህጻናት መሲልዎ
ልዕሊ ህጻናት ኢና'ናሉ
ህጻናት ዝኸልከሉ
ኣትሪሩ መኺሩ
ንህጻናት ክመስሉ

ኢለ ምስ ምስ ጀመርኩላ
ሕንቕንቕ ኢልዋ
ተደናጊራ ድያ ኣሕነቕኒቕዋ
እንድዒ!
ገጻ ግን ንብዓት ተኻዒይዋ
እንተስ ብጉድለት ወለዳ
ክትማጎቶም እንክትመስል
ናብ ቤቱ ስለዘየምጽእዋ፡
እንተስ ብጸወታ ዝኸሰረቶ ግዜ ኣጣዒስዋ
መመሊሱ ኣንቢዕዋ

ነቲ ሓጢኣት ዘይእንታዩ ዝነበረ ሰብነታ
ብንጽህንኡ፡ ዘይነበሮ መሰታ
ጎጎቲታ
ምስ ነንኣሽቱ ሓጣውእ ተለማምዶ ብምህላዋ
ትነብዕ ጠጠሚታ

በቲ ናብ ንቡር ክትምለስ ትደሊ
ንዓለም ዝነዓቐቶ
ኮይና ክትረአ ከምቲ ቀደም ዝነበረቶ
በቲ ድማ ሓይላ ይደኽማ
መጻኢኣ ይድብና
እቲ ቀረባ፡ ክንዮ ማዕዶ ይኾና
"መን ክመርሓኒ
መንከ ክሕግዘኒ
ስድራይ እካ ንጋዳ
ዘይንሳቶምሲ ኣብኡ እንደኣሎም ዘለዉ
ኣብታ ዓባይ ከተማ
ናይ ሓጢኣት ዕዳጋ
ይሸጡ ይሻየጡ
ንዓይ ደኣ በየን ክሓስቡኒ
ወረ ናብኡ ከይጎትኒ
ናብቲ ዕዳጋ ከየቕሩቡኒ"

ትብል እንክትመስል
ቶኪራ ትርኢ
ልባ ንቃሉ ጸሚኣ
ደጊኣ ብዓለም ሓሲኣ
ብኽልተ ምርጫ ትርኢ'ላ
ናይ መን ክትመርጽ
ብምስሊ መን ክትቅረጽ
ኣብ ክልተ ተመቒላ
ሕንጢት፡

"ናብ'ታ ነጸብራቓዊት ርስቲ
ክኾኑ ተኻፈልቲ
ናይ ሎሚ ጀመርቲ
ንጽባሕ መራሕቲ
ተካእቲ ኮይኖም
ኣብ ቤቱ ክስረቱ
ቅዱሳን ንኽወልዱ
ረቒሕዎም ብዓነዉኡ
ክንዮ ሕጂ
ክንዮ ትማል ገና ናብ ዓለም እንከይመጹኡ
እረ ካብ ማሕጸን እንከይወጽኡ
"ሐረኩከ እምከርሰ እምከ"

ዝበል ተስፍኡ ዘዘኪራ፡
ክትበጽሖ ትደሊ
ሓንሳብ ናብ ዓለም
ሓንሳብ ናብ  ወለዲ
ሓንሳብ ናብ ቤተክርስትያን
ሓንሳብ ንዓለማውያን
መንገዲ ቅድስና ዘርእይዋ
ተማዕዱ ገለ ተመርሕዋ
ግን መን ይምርሓያ'ዛ ህጻን፧
ትነብዕ ኣላ ሕንጢት!
ወስብሐት ለእግዚኣብሔር።