ምንባር

በስመ ኣብ ወወልድ ወመንፈስ ቅዱስ ኣሀዱ ኣምላክ።

ምንባር፡

ምንባር ንዓኻ እንታይ ኢዩ፧ ነዚ ሞይትካ እንከለኻ ምንባር ዲኻ ምንባር ኢልካዮ፧ ብዙሓትኮ ህልዋት ክንሶም ንዘልኣለም ዝነብሩ ኣሎዉ፡ብዙሓት ድማ ህልዋት ኢና እንዳበሉ፡ምውታን ኮይኖም ዝነብሩ ኣሎዉ።ምንባር ብምርጫ ድኣምበር ተዓዲልካ ብትካቦ እትነብሮ ኣይኮነን።ክትፍጠር እንከለኻ፡እቲ ዝሰርሓካ ፈጣሪ፡ንስኻ ገና "ኣእዛን ፍጠረለይ፡የዒንቲ ግብረለይ፡መልሓስ ኣብ ትንሓገይ ኣቐምጠለይ፡መታን ክበልዕ ኣስናን ግበረለይ ወዘተ" ኢልካ እንከይለምንካዮ፡ነዞም ነገራትካ እዚኣቶም ኣጣጢሑ ኣብ ምንባርካ ወሳንነት እጃም ንክትህብ ምሉእ ዕድል ሂቡ ናብዛ ዓለም ኣምጺእካ ኢዩ።ድሕሪኡ ዘሎ ንምንባርን ንሞትን ምሕራይ ግን ናባኻ ኢዩ።ድማ ኣብ ዝማእማኣካ መሪጽካ ምንባርን፡ሓላፍነት ክትስከመሉን እቲ ዕድል ምርጫ ነዓኻ ተዋሂቡ ኣሎ። ሕጂ ንስኻ ይነብር ኣሎኹ ትብል ኣሎኻ።ፈጣሪኻ፡ምንባር ኢሉ ዝሰምዮ ግን ከመይ ዓይነት ምንባር ምኻኑ ኣይትዝንግዖን ኢኻ።ዋላ ንዓይ ንኸማኻ ሰብ ይነብር ኣሎኹ ኢልካ ከተታልለኒ እንተፈትንካ፡ንውሽጥኻን፡ነቲ ንናይ ውሽጥኻ ሕሹኽታ ዝሰምዕ ፈጣሪኻን ግን ከተሽክዕ ኣይከኣለካን ኢዩ።

እሞ ኦ ወገን፡ሞይትካ እንተሊኻ፡ተንስእ ተበራበር፡፡ ኣሽንካይዶ ንስኻ እዚ ንናይ ሂወት ምምራጽ ዕድል ንስሓ ዘለካሰብ ክትነዓቕሲ፡ኣብ መቓብር ካብ ዝቕበሩ ንዝቡሕ መዓልትታት ዝገበሩ እካ ኣይተናዕቁን።እረ "ሬሳዩሞ ከይጨንወና" ኢሎም ኣፍንጨኦም ዝዓበሱ፡ፈጣሪ ግን ብስሞም እኽቢሩ ዝጸውዖም ብዙሓት ከምዘለዉ ከመይ ዘንጊዕካዮ!! በል ኮንቱ ምኽንያት ገዲፍካ ካብ ሙማትካ ተንስእ።ንሱ ከተንስኣካ ኣይእግሞን ኢዩ።ንስኻ ጥራይ ፍቓደኝነትካ ግለጸሉ።ነዚ ኣምላኽካ ክትትንስእ ምስትፍትን ድቃስ ኢሉ ኢዩ ዝሰምዮ፡ትነብር ተሊኻ ድማ፡ኣነባብራኻ ለውጢ ግበረሉ፡ዓምን ሎምዘመንንን ሓደ ዓይነት ናብራ ክህልወካ ኣይትምረጽ፡ፐርከስ ንስኻ ካብ ባዶነት ናብ ምልኣት ቅድስንኡ ንኽትበጽሕ ዝተዓደምካ ናይ ፈጣሪኻ፡ክቡር ጋሻ ኢኻ።ኣብ ቅድሜኻ ብዙሕን ዘይምኖን መኣዲ ተቐሪቡ ኣሎ።አረ በሊዕካዮን ሰቲኻዮን ዘይምኖ ጥዑም ናይ ሂወት መኣዲ!! ነዚ ተሓሲምካ ብቅጫን፡ሽሮን ጥራይ ክነብር ይኽእል ኢየ፡ትብል እንተኮይካ ግን፡ጾምካ እረ ኣብ መካነ ምውታን ተቐቢርካ ምህላውካ ተገንዘብ።መጽሓፍ" እቲ ካብ ሰማይ ዝወረደ ሕብስቲ ኣነ ኢየ፡ብልዐይ ብልዒ ሓቂ፡መስተይ ድማ መስተ ሓቂ ኢዩ።" በለ።(ዮሐ6) ንዘሎ ኣንብቦ።ኣብኡ፡ስጋይ ዘይበለዐ፡ደመይ ዘይሰተየ፡ናይ ዘልኣለም ሂዎት የብሉን፡ዝብል ጽሑፍ ከተንብብ ኢኻ።በል ኣንታ ክቡር ንብረት ናይ እግዚኣብሔር ዝኾንካ ሓወይ፡ምንባር በዚ ብልዒዚ፡በዚ መስቲ ደኣምበር፡ብጥብስን ጮማን ጥራይ ኣይትምዘንን ኢያ።ከምኡ ተትኾውን እሞ፡ፈጣሪኻ ናብዛ ዓለም ስጋኻ ለቢሱ ምምጻእ ኣይመድለዮን።ዓንተቡኡውን እዛ ዓለምና ስጋን ጮማን ሕምቶንሲ ኣይተነፍጋን ነይሩ።

በል ተንስእ ስምካ ካብ ናይ ምውታን መዝገብ ተፋሒቑ ክድምሰስ መታን፡ናብ ሂወት ምረጽ።ሽዑኡ ጎይታኻ፡" ወደይ ሞይቱ ነይሩ ተንሲኡ፡" ኢሉ ፈጣሪኻ ብኣኻ ክሕበን ክጅምር ኢዩ። ክትትንስእ ኣንከለኻ ግን ነቲ መሪጽካዮ ዝነበርካ ናይ ምውታን ስነምግባራት ፈጺምካ ፈንፍኖ።እዚ ግብረ ምውታንዚ፡ንዓኻ መሊሱ ናብቲ ዝነበርካዮ ሞት ዝወስድ እምበር፡ኣብ ህላወኻ ቁንጣሮ እጃም የብሉን።
ወስብሀት ለእግዚኣብሔር።

እንተዘይሞይትካ ኣይቀትሉኻን'ዮም

እንተዘይሞይትካ ኣይቀትሉኻን'ዮም!

በስመ ኣብ ወወልድ ወመንፈስ ቅዱስ ኣሀዱ ኣምላክ፡

ወዮ ሓደ ሓረስታይ ዝፈትዋ ኣድጉ ኣብ ጉድጛድ ኣተወቶ።እቲ ጉድጛድ ኣዝዩ ነዊሕ ካብ ምኻኑ ዝተላዕለ ከኣ እታ ኣድጊ ባዕላ ንምውጻእ ኣዝያ ተሸገረት።በዚ መሰረት ብዓቢ ድምጺ ክትንቁ ጀመረት።ዋናኣ'ውን ንኸውጽኣ ብዙሕ ፈተናታት እካ እንተገበረ ክሰልጦ ኣይከኣለን።እታ ኣድጊ ብዙሕ ዘገልገለትን፡ዕድሜኣ ሓሊፉ ኣዝያ ዝኣረገትን ስለዝነበረት ግን፡"ካልኦት እንሲሳታት ድማ ኣብቲ ጉድጛድ ከይኣትዉ" ኢሉ ብምሕሳብ ነቲ ጉድጛድ ክደፍኖ ወሰነ።ኣማራጺ ስለዝሰኣነ ድማ ነታ ኣድጊ ኣብኡ ክደፍና ሓሰበ።

በዚ መሰረት እቲ ጉድጛድ ቀልጢፉ መታን ክድፈን፡ንምድፋን ክሕግዝዎ ዝኽእሉ ጎረባብቲ ጸዊዑ፡ነቲ ጉድጛድ ብሓመድ ክደፍኖ ጀመረ።እታ ኣድጊ ድማ ነዚ ርእያ ጨኪኑ ይቐብራ ምህላዉ ተረዲኣ፡እንዳሕነቕነቐት ብዝበርተዐ መልክዑ ከተልቅስ ጀመረት።እቲ ዋናኣ'ውን ንልቕሶኣ ምጽዋሩ እካ እንተጸገሞ፡ካልእ ማራጺ ስለዝሰኣነ ግን፡ካልኦት ዝፈትዎም እንሲሳታት ከይድገሙዎ ብምሕሳብ ተቐላጢፉ ክደፍኖ ነይርዎ።

እቶም ደፈንቲ ተቐላጢፎም ክደፍኑ ምስጀመሩ ግን፡ሃንደበት እታ ኣድጊ ሓደ ነገር ሓሰበት።ነፍሲ-ወከፍ ሓመድ ንኽትድፈን ኣብ ልዕሊኣ ክዓልብ እንከሎ፡ነቲ ኣብ ልዕሌኣ ዝዓልብ ዝነበረ ሓመድ ክትነግፎን ብእግራ ክትረግጾን ጀመረት።በዚ መሰረት ድማ፡ሓመድ ክድፈኣላ እንከሎ፡ንሳ'ውን ነቲ ሓመድ ነጊፋ ሓንቲ ብራኸ ብምውሳኽ ንላዕሊ ክብ ክትብል ከኣለት።በተደጋጋሚ ሓመድ ክድፈኣላ እንከሎ፡ንሳ ድማ ብተደጋጋሚ ኣብ ዝባና ንዝዓለበ ሓመድ ነነጊፋ ሓፍ እንዳበለት፡ሓፍ እንዳበለት ኣብ መወዳእታ እቲ ጉድጛድ ምሉእ ብምሉእ ክድፈን እንከሎ፡ንሳ ድማ ምሉእ ብምሉእ ካብቲ ጉድጛድ ክትወጽእ ከኣለት።

ብዝገርም መልክዑ፡ክቐብርዋ ዝሓሰቡ ኣድጊ፡ንሳ ግን ብዘይተጸበይዎ መንገዲ ካብቲ ጉድጛድ ምሉእ-ብምሉእ ከተምልጥ ከኣለት።

ኣብ ሕይወትና ዘለና ኣማራጺታት ክልተ ጥራይ ኢዮም። ወይ ንላዕሊ ምውጻእ፡ወይ ድማ ንታሕቲ ወሪድካ ኣብቲ ጥልቀታዊ ጉድጛድ ተቐቢርካ ምትራፍ።

ጽሓፊ፡ ድ,ዳኒኤል ክብረት
ትርጉም፡ተኽለማርያም

በእንተ ጾመ ነብያት 3ይን መወዳእታን ክፋል

ብስመ ኣብ ወወልድ ወመንፈስ ቅዱስ ኣሀዱ ኣምላክ

በእንተ ጾመ ነብያት 3ይን መወዳእታን ክፋል

ጾም ማለት ካብ ኩሉ ሓጢኣት ምኽልካል ማለት ኢዩ፣

ኩላቶም ሓጣውእ፣ኣንጻር እግዚኣብሔር ኢዮም።ጽድቅን ሓጢኣትን፣ሓቅን ሓሶትን፣ቅድስናን ርኽሰትን፣መንፈሳውነትን ስጋውነትን፣ብርሃንን ጸልማትን እግዚኣብሔርን ሰይጣንን ተጻረርቲ ኢዮም።ስለዚ ክርስትያን ካብቲ ንፈጣሪኦም ዝጻረር ነገር ዘበለ ኩሉ ክኽልከሉ ይግበኦም።እዞም ፈጣሪ ዝጸልኦም ዝበልናዮም ነገራት፣ዘርዚርካ ኣይውድኡን ኢዮም፣ንኹሉ ሓጢኣን ንምፍላጥን፣ንኹሉ ጽድቂ ምፍላጥ የድሊ።ንኹሉ ሓጢኣት ንምኽልካል ድማ፣ኩሉ ጽድቂ ምግባር የድሊ።ስለዚ ክርስትያን ካብ ሓጢኣት ክሕረሙ፣ንጽድቂ ድማ ክርዕሙ እንከለዉ፣ብተዘዋዋሪ መንገዲ፣ጸወምቲ ሓጢኣት፣ተመገብቲ ጽድቂ እንዳኾኑ መንፈሳዊ ሂዎት ይድልድሉ።

ነብያት ስለምንታይ ጾይሞም፣-

ኣብ ዘመነ ነብያት፣ሓጢኣት ኣብ ደቂ ሰባት ነጊሱ ነይሩ ብምንባሩ፣ንእግዚኣብሔር ኣብ መጺኦ ክነግሰሎም ሃረር ይብሉ ነይሮም።

ልቢ ደቂ ሰባት ዋላካ ማዕረ መጠን ኣልቦ ምስፈጣሪኦም እንተተጣበቐት << ጽድቅና ከም መርገም ጨርቂ ኮነ፣>>

ክሳብ ምባል ግን ንናይ ፈጣሪኦም ናብ ምድሪ ምምጻእ ፍጹም ተመነዩ።

ደቂ ሰባት ካብ ምድሪ ዝተፈጠሩ እካ እንተኾኑ፣ግን ኣብ ገነት ኢዮም ዝቕመጡ ነይሮም።

ኣብ ቅድሚ ፈጣሪኦም ዓመጽ ስለዝፈጸሙ ግን፣ገበኖም ናብ ምድሪ ከምዝወርዱ ገበሮም።

ስለዚ ናብታ ጥንታዊ ሃገሮም ክምለሱ ፍጹም ደለዩ።ንህነሰ ሀገሪትነ ዘበሰማያት እንዳበሉ ጨደሩ።

ናብኣ ክወስዶም ዝኽእል ድማ እቲ ካብኣ ዝሰጎጎም ፈጣሪ ምኻኑ ይፈልጡ ኢዮም።ክመልሶም እንተኾይኑ ድማ፣

ብምሕረቱን ብዘይ ምርመር ጥበቡን እምበር፣ብናታቶም ክእለት ከምዘይኮነ ኣዳዕዲዖም ይፈልጡ ኢዮም።

ስለዚ እታ እንኮ ክገብርዋ ዝኽእሉ፣ከምታ ናብ ምድሪ ዝሰጎጎም፣

ሕጂ ድማ ናብ ምድሪ መጺኡ ክወስዶም ናብታ ጥንታዊት ሰማያዊት ሃገሮም  ክወስዶም፣ክልምንዎን

፣ምእንትኡ ክብሉ ጾምን ሱባኤን ክገብሩን፣

ከምዘለዎም ተረድኡ።ነዚ ድማ ካብቶም ቀዳሞት ነብያት ክሳብቶም ዳሕረዎት በብዘመኖም ጸሙን ጸለዩን።

ቀዳማይ ነብይ፣ኣቦና ኣዳም ኢዩ።100 ዓመታት ድማ ብጾምን ብጾሎትን ምስ ፈጣሪኡ ተዘራረበ።ቀጺሉ ዝመጸ ነብይ

፣ሴት ወዲ ኣዳም ኢዩ።ንሱ ውን ከምኣቡኡ ብጾምን ጸሎቱን እንዳነበረ፣ናብቲ ዝቕጽል ወለዶ ኣሰጋገሮ።

ኩላቶም ቅዱሳን ነብያት ድማ ክሳብ እቲ ናይ መወዳእታ ነብይ ናይ ሃዋርያትከኣ ጀማሪ ተባሂሉ ዝንገረሉ

ዮውሓንስ መጥመቕ ብጾምን ብጾሎትን ፈጣሪኦም ሰማያት ጨንዲሑ ናብ ምድሪ ክወርደሎም፣ናብ ስፍራኦም ከኣ

ክመልሶም ለመንዎ።እግዚኣብሔር ድማ ነቲ ኣቐዲሙ ስሌኣቶም ክብል ክኸፍሎ ዝሓለኖ መስዋእቲ ክሳብ ሞት ከፍቅሮም ምኻኑ፣

ነዚ ሞት ዝሰማምዖ ስጋ ሕዛ እትርከብ ድማ ሓጢኣት ይኹን መርገም ዘይሓለፋ፣ድንግል ብሕልና ወድግንል በስጋ፣

ንድግል ማርያም ኣብ ሕልንኡ ኣቂብዋ ከምዝጸንሕሞ ካብኣ ከምዝግለጸሎም ኣኣብ ዘመኖም የበስሮም ነበረ።መዓልቱን

ሰዓቱን ምስ ኣኸለ ድማ፣ብሓጺር ቁመት፣ብጸቢብ ደረት ኣብ መብልዒ ማል ተለደልና።

• ክርስትያን ስለምንታይ ኢዮም ጾመ ሃዋርያት ንክጸሙ ቤተክርስትያን እትእዝዞም፣

እቲ ዓለም ምቕባል ኣብያቶ፣ከም መጻእተኛ ኣብ መብልዒ ማል ዝተወልደ ሰማያዊ ንጉስ፣ሕጂ ግን ልበይ መብልዒ ማል ክኾነካ ንዓ ተወለድ ኢሎም ኩሎም ህዝበ ክርስትያን ልቦም መታን ክቕደሰሎም ኽጸምዎ ቤተክርስትያን ትእውጀሎም።ኣብቲ ኣብ መብልዒ ማል ዝተወልደሉ ዘመን፣እቶም እንስሳታት ኣብ መብልዒኦም ስለዝተወልደ፣ብልዒ ኣቃሪጾም፣ብትንፋሶም የምቕዎ ነይሮም።ክርስትያን ድማ ኣነ ካብ እንስሳታት ይበልጸካ ኢየሞ፣ኦ ንጉሰይ እቶም ምእንተኦም ኢልካ ዘይተወለድካሎም እንስሳታት ተኣዚዞም ካብ ኣሞቑኻስ፣ኣነ ደኣ እንታይ ወሪዱኒ ምእንታኻ ክብል ብልዐይ ዘይሓድግ ክብሉ፣ንፈጣሪኦም ክብሪ ብምሃብ ነታ ንፈጣሪ መሞቒ እቲኾኖ ልቦም መታን ክህብዎ ቤተክርስትያን ወትሩ ዓመት መጸ ተዘኻኽሮም።ምኽንያቱ ናይ ክርስትያን ልቢ፣ካብ መብልዒ ማል ስለትበልጽ፣ናይ ክርስትያን ነፍሲ ድማ ካብ ናይ እንስሳታት ሂዎት ስለትበልጽ።ናይ ክርስትያን ተስፋ ካብ ናይ እንስሳ ተስፋውን  ስለእትዛይድ።እቶም ክንዲ ናይ ሰብ ክብሪ ዘይብሎም እንስሳታት፣ንፈጣሪ ኣብ ልደቱ ብልዖም ኣቃርጾም ብእስትንፋሶም ኣሚቖሞ ሓዲሮም፣ናይ ክርስትያን ነፍሲ ድማ ብጾሎታውን ጾማውን መንፈሳውነታ ንክርስቶስ ከተምቖ ስለዝግበኣ ቤተክርስትያን ወትሩ ዓመት መጸ ጾመ ነብያት ንደቃ ንክጾሙ ትእውጀሎም።ነብያት ብልዒ ሓቂ፣መስተ ሓቂ መታን ክውለድ ጾይሞም፣ጋህዲ ድማ ኮይንሎም።ክርስትያን ድማ ነቲ ብልዒ ሓቅን፣መስተ ሓቅን ስለዝረኸብዎ፣ምእቲ እቲ ምስኦም ዘሎ ብልዒ ሓቂ ክብሉ፣ነቲ ሓላፊ ብልዒ ክሓድግዎ ይመርጹ።ስለዚ ኢዮም ህዝበ ክርስትያን ብፍታዎም ከም ኣቦታቶም ነብያት ነዚ ጾምዚ ናብ ብልዒ ሓቅን መስተ ሓቅን ንምስግጋር ስጋዊ ብልዕን ሓጢኣትን ብፍታዎም ዝኽልከሉ።

ጾምና ብሰላም ኣጀሚሩ ብሰላም ዘፈጸመና ኣምላኽና ዝኸበረን ዝተመስገነን ይኹን።

ኣሜን።

ወስብሀት ለእግዚኣብሔር።

ሕቱም መጽሓፍ

ህድኣት ሃዲኣ!

በስመ ሥላሴ

ፈላለይቲ ስምዒታት፡ ሓደሽቲ ሕርኽራኻት፡ ኣጋይሽ ሓሳባት ናብ ስነ-ልቦና ክኣትዉ ከለዉ፡ ኣእምሮ ይርበሽ፡ ሕልና ይስነፍ፡ እምነት ይልሕልሕ፡ ምግባረ-ሃይማኖት ይርሳዕ፡ እቲ ቀረባኻ ዝኾነ እግዚአብሔር ከኣ፡ ከም ጓናኻ ኴኑ ይስምዓካ። ልብን ሕልናን፡ ሓሳብን ፍልጠትን፡ ምግባርን ሃይማኖትን እናተበኣሱ የሸግሩኻ። ልብኻ ብዝርጉሕ ኢዳ፡ ንዂሉ ፍጡር ብፍቕርን ግርህነትን ትልግስ ዝነበረት፡ ሎሚ ፍቕሪ ይኹን ህያብ ክትቅበል ዓቐብ ይኾና፡፡ ምስ ኣእላፋት ብሰላምን እፎይታን ክትነብር ዘይእግመካ ዝነበርካ ሰብ፡ ድሕሪ ዝርግርግ ግን ምስ ገዛ ርእስኻ'ኳ ምትዕራቕ ይሰኣነካ። ውሽጥኻ ብቃል ኣምላኽ ክጠልል ዝግበኦ፡ እንታእዋኑ ቃልቃል ከብለካ ይጅምር። ቃሉን ተግሳጹን ንምስምዑ ዓቐብ ይኾነካ። እንታይ ጉዱ፧ እንታይ'የ ዝኸውን ዘለኹ፧ ንምርባሸይን ምጭናቐይን መን ተሓታቲ፧ ንመን'የ ዘላግበሉ፧ ንእግዚአብሔር፧ ፍጹም!

ኣብ ውሽጠይ ርእየዮም ዘይፈልጥ፣ንኣሽቱ ዝመስሉ ግን ከኣ ፍርዝን-ፍርዝን ዝበሉ፡ ንናይ ውሽጠይ ህድኣት ዝህውኹ፣ሓደሽቲ ዝመስሉ ግን ከኣ ዘመናት ዘቕጸሩ፣ስጋዊ መንነት ዘለዎም ዝመስሉ፡ ግን ከኣ ምስ ጅማሬ  ዕድመ ናይቶም ርኹሳን መናፍስቲ ምትሕሓዝ ዘለዎም፣ ንትዕግስተይ ዝፈታትኑ ህዉኻት ኣጋይሽ ኣብ ውሽጠይ፡ብናይ ሕልናይ መነጸር የንብቦም ኣሎኹ።ቅድሚ ሕጂ ተፈሊጦምኒ ዘይፈልጡ፡ኣሻቦም ተረበጽቲ መናፍስቲ ይበቕሉኒ ኣሎዉ።ብኸመይ ከምዝኣልዮም፣ብኸመይ ከምዝሃድእ መፍትሒ ክደሊ ዝተበገስክሉ ግዜ ኣይነበረንንን።ንዒቐዮም ግዲ ኮይነስ፣ብዙሕ ግምት ኣይሃብክዎምን።ግን ድሮ ዘሰነፉኒ መሲሎም ይረኣዩኒ ኣሎዉ።ቀልጢፈ ቁጥዕ-ቁጥዕ ይብል።ንዝተሓተተኒ ይኹን ንዝመጻኒ ነቔፌታ፣ ግብረ መልሲ ንምሃብን ንምምላስን ብዓይኒ ጥርጣሪ ጥራይ ክጥምት ካብ ዝጅምር ነዊሕ ግዜ ኣቚጺረ ኣሎኹ።ስመይ ህድኣት ኢዩ። ንነገራት ግን ብህድኣት ክምልከቶም ኣይተኸኣለንን።መቸስ ዝተጸዋዕክሉ ዕላማ፣ብዝተረበሸ መንፈስ ንዝርበሹ ዘለዉ ወገናት ንከህድኦም'ዩ ነይሩ።ግን እንከይሃዳእኩ ክህድእ ብምፍታነይ፣ነቶም ዝህወኹ ዘለዉ እንደገና ከምዝህወጹ ገይረዮም'የ።ናይ ምርባሽ ሓዊ ኣሳዊረ ቃል ቃል ኣቢለዮም።ሳላይ ክሃድኡ ዝግበኦም፣ብሰንከይ ክቃጸሉ ጀሚሮም።ናብ ቤት ህድኣት እንዳተመላለስኩ፣ህድኣት ቀሲመ ህድኣት ንከቐስሞም ጸጊምኒ።ዘንብቦም መጽሓፍቲ ኩላቶም ብዛዕባ ህድኣት ተንቲኖም ዘረድኡ፣ነገራት ብኸመይ ከምእትፈትሖም ዝገልጹ ህዱኣት መጽሓፍቲ ክንሶም፣ኣነ ግን ህድኣት ተማሂረ፡ኣይኮነን ክምህረሎምሲ፣ህድኣት ክለብሰሎም'ውን ኣይከኣልኩን።ካበይኮን'ዩ'ቲ ጸገም! ካብቶም መጽሓፍቲዶ ወይሲ ካባይ፧ብዙሓት ናይ ወንጌል መምሃራነይ፣መራሕተይ ኣዝዮም ህዱኣትን ትሑታትን ክንሶም፣ነዚ ባህሪ'ዚ ካብኣቶም ክወርሶ ኣይተኻእለንን።ካብ ልሳኖም ዝፍኖ ቃል፣ብዛዕባ ህድኣት'ዩ፣ልበይ ግን ተሪሩ ድዩ ፈርኪሹ ክሃድእ ኣይከኣለን።ኣቡ-ነፍሰይ፣ንናይ ነፍሰይ ህድኣት ብዘይ ምትኻስ ከምዝዓዩ እንዳፈለጥኩ፣ኣነ ግን ክሃድእ ኣይከኣልኩን።ካብ ጥቕሉልን ድምርን ናይ ከባብየይ ወትሩ ዝመሃሮ ዘለኹ ነገራት፡ ብሓፈሻ ብዛዕባ ህድኣት'ዩ። እናሻዕ  ዝኾኖ ዘለኹ ግን፡ ታህዋጽ ዝተመልአ ሕይወት ኴኑ በቃ!

እንታይ ኢዩ እቲ ጸገም፧እሞ ስመይዶ ክቕይር ነይሩኒ፡ ወይሲ ነቶም ናይ ህድኣት መምሃራነይ ክልውጦም ኣሎኒ፧ማለት ከምዚ ከማይ ህዉኻት ክገብሮም፣ኣንፈቶም ዝለወጡ ናይ ህውከት መምሃራን ገይረ ክልውጦም።እዚሞ ፈጺምካ ዘይሕሰብ'ዩ!! ከመይ ኢልካ ይከኣል፧ ኣነ ስለዝተረበሽኩኸ ከመይ ከማይ ህዉኻት ክገብሮም፧ "ቊላዕ እኮ ቁሩብ ዓቕሊ 'ተዝገብር፣ቁላዕ ኮይኑ ኣይምተወልደን" ኢሎም ይምስሉ ኣቦታት።ተሃዊኽካን ተረቢሽካንከ መፍትሒ ድዩ፧ በንጻሩስ ኩሉ ርቡሽ ነይሩ ተዝኸውን ደኣ፣ህድኣት ኣበይ ምሃለወ፣ኩሉ ህዱእ ነይሩ ተዝኸው'ውን ናይ ህድኣት መምሃራን ኣይምነበሩን።እግዚኣብሔር ብቐንዱ ህዱእ ኣምላኽ'ዩ። ኩሉ ፍጡር ህዱእ ነይሩ ተዝኸውን ደኣ፣ንምንታይ ህድኣቱ ኣድለየና።ዓለም ብቐንዳ ህድእቲ 'ተትነብር፣ ቤተክርስትያን ኣብ ዓለም ክትህሉ ኣይመድለየትን።ዋና ተልእኾ ናይ ቤተክርስትያንከ እንታይ'ዩ፧ ንዓለም ካብ ህውከት ንከትህድእ ኢሉ ፈጣሪ  ዝሰረታ ናይ ውልቁ መንፈሳዊት ኤምባሲ ኢያ።ዋይ ኣነ ህድኣት!!ደጊም ስመይዶ ክልውጥ።ነዛ ''ህድኣት'' እትብል ስመይ ክልውጣ። "ርብሽቲ" ተባሂለ ክስመ፡ ብቐሊሉ እትርበሽ።ወይሲ 'ድህልልቲ' ክስመ ህድኣት ዘየድልያ።ከመይ ኢለየ'ሞ ኣነ ከይሃዳእኩ ህዱኣት ዉሉዳት ከፍሪ ዝከኣለኒ፧ ብጭራሽ! "እንጣጢዕሲ ቀስ ኢላ ከይትበስል ክትብል ኣይንዘርኢ ኣይንኸብዲ ኮይና ተሪፋ" ይብሉ ተዛረብቲ። ኣብ ሓዊ ምስተሰኽተተት'ዛ እንጣጢዕ፡ ምቕላዋ ዘይተርፋ ስቕ ኢላ ከይትቕሎሞ፡ቀለብ ሰብ መታን ከይትኸውን ክትብል፡ነነጢራ ናብዛ ምድራ።ወዮ ኣብ ምድሪ ወዲቓኸ ክትበቁል ድያ፧ ወሪድዋ!ኣብ መሬት ድማ ከይፈረየት ትተርፍ። ኣነ ህድኣት'ውን፡ ክርስትያናዊ ትርጉም ስመይ፡ ብናይዛ ዓለም ቀለውቲ ነገራት ተቐሊኻ ቀለብ'ቶም ርሁባት ምኻን'ዩ ነይሩ ጽዉዐይ። "ንዝጸፍዓካ ጽፋዕ" ዘይኮነስ፡"ንዝጸፍዓካ ድገመኒ" በሎ ኢዩ ነይሩ ነገሩ።ድገመኒ ምኸኣል ተሲኢንካ ድማ ስቕ ኢልካ ጽፍዒትካ ምቕባል። "ኣናወጽቲ ነገራት ብተጸዋርነት ኢዮም ዝሓልፉ" ትብል ነይራ ኣደይ። ምስ ኣቦይ ኣብ ገለ-ገለ  እዋናት ዘየረዳድእ ኩነት ይኽሰት'ሞ፡ኣቦይ ንነገራት፡ካብ ብምርድዳእ ብቕልጽሙ ክፈትሖም ስለዝቐለሉ፡ብዙሕ ግዜ ብበትሪ ከም ንሓጺን ክድስቓን ኣደይ ድማ ክትበክን እንከላ ፈጺመ ኣይርስዖን'የ። ነቲ ነገር  ብትዕግስቲ ምስ ሓለፈቶ ድማ፡ ናብ ንቡር ተመሊሶም፡እረ ቡን ከሽ-ከሽ ኣቢላ፡ ጉጁም ክብሉ እንከለዉ ተትሪኦም፡ ግርም ይብለካ! ፍቕሮም ኣዝዩ'ዩ ዘቕንኣካ።ኣደይ፡ "ንኹሎም መሓለኻታት ናይ ሓዳረይ ብትዕግስቲ ተዘይሓልፎም ነይረ፡ንዓኻትኩም ኣይምወለድኩን፡ ስሳ ዓመታት ድማ ምስ ኣቦኺ ኣይምነበርኩን" ኢያ ትብለኒ ነይራ። 60 ዓመትኮ ክንዲ ክልተ ዕድመይ'ዩ።ካብኡ ዝተበገሰት ከይኮነት ኣይትተርፍን ህድኣት ኢላ ዝሰየመትኒ።ንኹላቶም መሓለኻታት ሕይወት፡ ብህድኣትን ትዕግስትን መታን ክሓልፎም ኢላ ከይኮነት ኣይትተርፍን።ኣበይሞ! ሕጂስ እንቋዕ ኣብዚ ምሳይ ኣይትህሉ፡"ነዚ ክትኮኒ ኢለ ስለዘየውጻኹልኪ ደጊም ስምኪ ቀይሪ"ምበለትኒ።

ምዃን እቶም ኣብዚ ኣዋን፡ናብ ልበይ ዝኣትዉ ዘለዉ ቃላትኮ፡ ኩላቶም ካብ ናይ ህድኣት ማዕከን ጥራይ ዝመንጨዉ ዘለዉ ኣይኮኑን።ከመይ ኢለኸ ደኣ ኣነ ኣጠቓቕማ ኣእዛነይ ከየስተኻኸልኩ፣ምስ ነፍሰይ ክማጎት ዝኽእል፧ መቸስ፣ኣእዛነይ ከምዚ ትርእይወን ሰሲዐን ግዲ ኮይነን፣ኣነ በብዘገደድክወን መሰረት፣ክልቲኡ መንፈስ፡ ማለት፣ ዓለማውን መንፈሳውን፣ርቡሽን ህዱእን፡እረ እንሓንሳእሲ፡ መንነቶም ዘይተፈልጠ በየን በየን በቒሎም ዘይፈልጦም፡ መትሓዚ ብዘየብሎም ነገራት ዝተመስርሑ ቃላት ክሰምዓ ካብ ዝጅምራ ነዊሕ ኣውቕጺረን ኢየን'ዘን የእዛነይ።ለካ ነቲ ዝተማሃርክዎ ኢየ ዝነብር ዘለኹ።ከምኡ ተዘይምሃር ነይረሞ፣ከምዚ ዘለኽዎ ኣይምኾንኩን።ዝኾኖ ዘለኹስ፣ንህውከተይ ዘበራትዑ፡ ናይ ህውከት ቃላት ብናይ ሰብነተይ መሳኹቲ እንኮላይ ብየዒንተይ፡  እናሻዕ ይሰንቕ ስለዘለኹ'የ። ይኸይድሞ፡ ካብ'ታ ህድእቲ ቤት ኣምልኣኽ፡ ናይ ህድኣት መንፈስ ይቕበል፣ናብቲ ሰጊረ ድማ፣ ካብቲ ሕንፍሽፍሻዊ ዓለም፡ ናይ ህውኰት መንፈስ ይዕንገል።ግን ዝያዳ'ቲ ህድኣታዊ መግቢ፣ነቲ ሕንፍሽፍሽ፡ ኣኻዕቢተ ስለዘዛየድክዎ፣ንሱ ስዒሩ።እወ! ርኹስ መንፈስ ዝስዕረሉ ኣጋጣሚ'ውን ለካ ኣሎ'ዩ።ርኹስ መንፈስ፣ህድኣት ኣልቦ ናይ ዝርግርግ መንፈስ፣ኣባይ ክሓድር ምሉእ ውክልና ተዘይህቦ ነይረ፣ኣባይ ህውኽ-ህውኽ ዝብል መንፈስ ኣይምሃለወን ነይሩ።ዓይነት ኣጋንንቲ ብዙሓት ኢዮም።ናይ ምርባሽ፣ናይ ዝርግርግ፣ናይ ጥርጣሬ፣ናይ ባእሲ፣ናይ ቂም-በቐል፣ናይ ጽልኢ፣ናይ ቅርሕንቲ፣ናይ ፈኸራ፣ናይ ጃህራ፣ናይ ዓሌትነት፣ናይ ንዕቀት፣ናይ ሻራ፣ናይ ስስዐ፣ናይ ምንፍቕና፣ናይ ክሕደት።እዞም ጠባያት'ዚኣቶም፡ በብሞይኦም ዝዓዩ ዓይነት ኣጋንንቲ፡ ዝጥቀምሉ ኣጽዋር ሰይጣውንቲ ኢዮም።ንሱ'ቲ ሰይጣን ነዚኣቶም ኣጸባቢቑ፣ብደገ ዝወቀበ ሽፋን ኣልቢሱ፡  ሓይሉ ዝገልጸሎም ዓይነታት ኣጽዋራቱ ኢዮም።ዕላማኦም ናይዞም ኣጽዋር፣ ናብ ሓደ ዘአንፈተ'ዩ።ናብ ክሕደት ዝወስዱ፣ ኣምላኽ የሎን ናብ ምባል መሪሖም ዝወስዱ ጎደናታት ሲኦል ኢዮም። እትውንኖ ህድኣት ዝሻመዉ ክፉኣት ሓሳባት'ዮም።

እምበኣር ወሲነ ኣሎኹ ሕጂ።ንኹሉ ኣንጻር ህድኣት ኮይኑ ዝመጻኒ ሓይሊ፣ብመስቀል ክርስቶስ ተቢዐ ክቖውም፡በቲ ዝንውንወኒ ደፋኢ ሓይሊ መታን ከይወድቕ ጨሪሰ ክጸንዕ። ብሓይለይ ዘይኮነ ብኡኡ ብእግዚኣብሔር ክምካሕ ወሲነ ኣሎኹ።እቲ ክሳብ ኣብ መስቀል ምስቃል ዝተዓገሰ፣ካብ ትዕግስቱ ከምዝመቕለኒ ይፈልጥ ኢየ።ብዙሓት ዝደፍኡኒ፣ናብቲ ናታቶም ናይ ታህዋጽ ጎዶና ክንውንዉኒ ምኻኖም ይርደኣኒ'ዩ። ግን መስቀል ክከላኸለለይ ኢዩ።ክርስቶስ ክደፍእዎ እንከለዉ ብፈጣርነቱ "ከይምንጥሉኒ፡ከይስዕሩኒ!" ኢሉ ኣይተጠራጠረን።በንጻሩ፣ብትዕግስቱ ካብ ናይ ሲኦል ምጭብርባር ክወጹ ይዓዪ ነይሩ፣ንሳቶም ብትዕቢት ከላግጽሉ እንከለዉ፣ንሱ ድማ ብትዕግስቲ ናብ ትሕትና ንኽመጹ ይቃለስ ነይሩ።ንሳቶም ክንውንዉዎ እንከለዉ፣ንሱ ድማ ካብ ናይ ሲኦል ጸድፊ ይስሕቦም ነይሩ።እሞ ኣነ ደኣ መን ኮይነ'የ ምስቶም ዝንውነዉ ዝንኖ ዘለኹ፧በቃ ክሃድእ ኢየ፣ስም ይመርሕ ጥዋፍ የብርህ እውንኮ ተባሂሉ ኢዩ።

ክርስትና ናይ ህድኣት ጎደና እምበር፣ናይ ዝርግርግ መንገዲ ኣይኮነን።ክርስትና ምስ ኣቡ-ነፍስኻ ሃዲእካ እትላዘበሉ፣ምኽሪ ኣቡ-ነፍስኻ እትሰንቀሉ፣ስግኡን ደሙን ብንስሓን ቀነኖናን ኣሰኒኻ እትቕበለሉን፡ ካብ ረበሻ እትሃድኣሉ ስፍራ እምበር፣በብዝጥዕመካ ኢድካ ናብቲ ክቡር ምስሊ እግዚኣብሔር ዝውንን ሰብ እና ኣዋጣወጥካ፣ንገዛእ-ርእስኻ ተረቢሽካ ንኻልኦት እትርብሸሉ ናይ ዕብዳን ኣዳራሽ ኣይኮነን።በሉ ኦ ወገናተይ ህድኣትናን ናይ ርግኣትና ምንጭን እግዚኣብሔር ካብ ኮነ፣ንህዳእ፣ርግእ ንበል።ኣብ ውሽጥና ዘሎ መንፈስ ኣምላኽና ካባና ከይስደድ፣ብህድኣት ኣባና ከምዝነብር ንግበሮ።ብርግጽ መንፈስ ኣምላኽ ኣብ ልብና ኣሎ፣ግን ኣይነጒህዮ።እንተንጸርጺርና ኢዩ ዝጉሂ፣እንተተረቢሽና ኢዩ ካባና ዝስደድ፣ንሓድሕድና እንተተጻልኢና ኢዩ ዝጸልኣና።እግዚኣብሔር ዝተጻለኦ ሰብከ መን'ዩ ምስ እግዚኣብሔር ከተዓርቖ ዝኽእል፧እምበኣር ኣነ ከምታ ስመይ ክሃድእ ወሲነ ኣሎኹ።ንስኻትኩምውን ካብ ክትርበሹ፣ክትሃድኡ ይመርጸልኩም፣ካብ ክተዕገርግሩ፣ልዝብ ኢልኩም ክትሓስቡ ይምነየልኩም።

እግዚኣብሔር ኣምላኽ ህድኣቱን ትዕግስቱን ይስደደልና፡ በረኸት ናይ ቅዱሳኑ ይኽፈለና፡ ኣሜን።

ሎቱ-ስብሐት!

በእንተ ጾመ ነብያት:- 2ይ ክፋል

በስመኣብ ወወልድ ወመንፈስ ቅዱስ ኣሀዱ ኣምላክ፣

በእንተ ጾመ ነብያት፣- 2ይ ክፋል

• ካብ ናይ ኣህዛብ መስዋእቲ ምኽልካል፣-

ኣብዚ ዘመንዚ፣መብዛሕትኡ ሰብ መስዋእቲ ኣምላኽን፣መስዋእቲ ኣጋንንትን ክፈልየሉ ናብ ዘይክእል ደረጃ እንዳበጽሐ ይኸይድ ኣሎ።እግዚኣብሔር ደቁ፣ናቱ መስዋእቲ'ምበር፣ነቲ ተጻራሪኡ ሰይጣን ተባሂሉ ዝቐረበ መስዋእቲ ክምገቡ ኣይደልን ኢዩ።ታሪኽ ደቂሰባት እንተድኣ በብሓደ ፈቲሽናዮ፣ሰብ ካብ ኣምልኾ ሓራ ወጺኡ ኣይፈልጥን 'ዩ።ሰብ ተመላኺ ናይ ምኻን ባህሪ ዘለዎ ኮይኑ ኢዩ ተፈጢሩ።ስለዚ ሰብ እቲ ዝገዝኦ ይፈላለምበር፣ካብ ተገዛኢ ምኻንስ ተፈልዩ ኣይፈልጥን ኢዩ። እቲ ሓቀኛ ገዛኢኦም ብፍታዎም መታን ክግዝእዎ ኢሉ ቃሉ ወትሩ ኣብ ልቦም ይኩሕኩሕ፣፣እቲ ሓሳዊ ገዛኢ ሰይጣን ድማ ብፍታዎም ክግዝእዎ ወትሩ ምትላሉ ኣየቃርጽን።ከምቲ ንእግዚኣብሔር ተባሂሉ ዝቐርብ በበይኑ ዓይነት መስዋእቲ ዘሎ፣ንሰይጣን ተባሂሉ ዝቐርብ መስዋእቲ ድማ መሊኡ ኢዩ።ስለዚ መስዋእቲ እግዚኣብሔር ዝለመደት መንፈሳዊት ከስዐ፣ናይ ሰጣን መስዋእቲ ክትምነይ ኣይግባኣን።ስለዝኾነ ከኣ እግዚኣብሔር ንደቁ ካብዚ ክኽልከሉ ወትሩ ይነግሮም።

ዳኒ1፣8 <<ዳኒኤል ግና በቲ ብልዒ ንጉስን በቲ ዝሰትዮ ነቢትን ከይረክስ ብልቡ መደበ፣ብግዲ ብላዕ ኢሉ ከየገድዶ ድማ፣ነቲ ሓለቓ ሽማምንቲ ለመኖ።>>ዝብል ጽሑፍ ጽሒፍልና ኣሎ።እዚ ናይ እግዚኣብሔር ሰብ ዝኾነ ነብይ፣ናይቶም ነገስታት መግብን መስተን፣ንዑኡ ከምዘርክስ ስለዝፈለጠ፣ንከይበልዕ፣በንጻሩ እካ ድኣ ሓምልን ኣቕጽልትን ከምጽእሉ ከምዝለመነ ይነግር።ብሓፈሻ ናይ ኣህዛብ መስዋእቲ ክበሃል እንከሎ፣ነቲ ዝኣምንዎ ኢሎም ዘቕርብዎ ኣማሃ ከም ምኻኑ መጠን፣ካብ ዝደቐቐት ክሳብ ዝዓበየትን፣ንክርስትያን ኣይሰማምዖን ኢዩ።

ኣብ ሓዱሽ ኪዳን፣ኣብ ጅማሬ ናይ ቤተክርስትያን፣ኣብ መንጎ ሓደስቲ ኣመንትን ኣብ መንጎ ኣይሁድን ሰፊሕ ክርክር ኣጋጢሙ ነይሩ።ሓደ ካብቲ ክርክራዊ ዛዕባ ብዛዕባ ብልዒ ዝምልከት ኢዩ ነይሩ። እቶም ካብ ኣምልኾ ጣዕት ናብ እምነት ክርስትና ዝመጹ፣ንናይ ሕገ እግዚኣብሔር ሓደስቲ ስለዝነበሩ፣ንናይ ሕሉፍ ኣምልኾኦምን ንዝምገብዎ ዝምልከትን ንጹር መረዳእታ ስለዝደለዩ፣ናብቶም መራሕቶም ዝኾኑ ሃዋርያት መልእኽቲ ሰዲዶም።፣ኣይሁድ ክርስትያን ድማ፣በዚ ዝበልናኩም ተዘይከይድኩም መንግስተ እግዚኣብሔር ኣይክትኣትዉን ኢኹም ብምባል ሰፊሕ ፍልልያት ኣብ መንጎኦም ይረአ ስለዝነበረ፣ሃዋርያት ካብተን <<ንመጀመርያ ግዜ ሲኖዶሳዊ ጉባኤ ገይሮም>> ኢልና እንሰብከሉ፣ኣብዚ ሰዓትዚ ንሕቶኦም መልሲ ንምሃብ ጉባኤ ገይሮም። ብዛዕባ ስጋዊ ብልዒ ዝምልከት ድማ መልሲ ጸሓፉ።

ግብ፣15፣27-29. እንሆ ድማ ነዚ ነገርዚ ካብ ኣፎም ምእንቲ ክትሰምዕዎ ይሁዳን ሲላስን ሰዲድናልኩም ኣሎና። '' ብዘይካ እቲ ዝተገበአ ገለ ሓለፋ ጾር እካ ከይነኽብደልኩም፣ንመንፈስቅዱስን ንዓናን ተራእዩና ኣሎ።ስለዚ ንርእስኹም ንጣዖት ካብ ዝተሰወዐ መግብን፣ካብ ደምን፣ካብ ስጋ ዝሓለቐ እንስሳን ካብ ዝሙትን ተኸልከሉ።'' ካብዚ እንተ ተኸልኪልኩም ጽቡቕ ክትረኽቡ ኢኹም፣ድሓን ኩኑ። ኢሎም ኣብ ቅዱስ ሲኖዶሶም ነዚ ውሳነዚ ወሰኑ።

ሓጺር መረዳእታ፣-

ንኣብነት፣ኣህዛብ ካብ ዘቕርብዎ መስዋእቲ ሓደ፣ መንፈሳዊ ትምህርቲ ኢዩ፣፣

ክርስትያን ድማ ንኣምላኾም ንምሕጛስ ኢሎም ዘቕርብዎ መንፈሳዊ መስዋእቲ ኣሎዎም። ትምህርተ ወንጌል።ንክርስትያን ካብ ናይ ኣህዛብ ኣዝዩ ዝበለጸ መንፈሳዊ ትምህርቲ ስለዘለዎም ድማ፣ናብ ናይ ኣህዛብ መንፈሳዊ ትምህርቲ፣ማለት ንኣምልኾ ኣህዛብ ዝምልከት ንምርካብ፣ክርስትያን ከምባህቑን ከቕባሕብሑን ኣይግባእን። ናይ ክርስትያን መንፈሳዊ መርገጺኦም ንጹርን ፍሉጥን ኢዩ።ቅድስቲ ቤተክርስትያኖም ዝወሰነቶ መንፈሳዊ ውሳነ ብዘይ ነግ ፈረግ ተቐቢሎም፣ብኡኡ ክድሕኑ ምኻኖም ብእምነት ምቕባል ኢዩ።እቲ ዓብላላዊ ወሳንነት፣ናይ ብዝሒ መራሕቲ ዘይኮነስ፣ናይቲ ቅዱስ ሲኖዶስ ኢዩ።እዚ ድማ ሰንሰለት ናይ ቅዱሳን ሃዋርያት ዝሓለወ፣ዘይብተኽ ናይ መንፈስ ቅዱስ ስራሕ ኢዩ።<<....ኣነ ድማ ክሳብ መወዳእታ ዓለም ምሳኹም ኣሎኹ፣ማቴ28,18-19>> ከምዝብል መጽሓፍ።

ኣህዛብ ዘቕርብዎ መስዋእቲ፣መዝሙርን ጸሎትን ኢዩ፣

ክርስትያን ድማ ካብ ናይ ኣህዛብ መዝሙር ዝበለጸ ናይ ቅዱሳን መዝሙር ስለዘለዎም፣ናይ ካልእ መዝሙር ዘይሰማዕና ኢሎም ከዕለብጡ ኣይግባኦምን።ብፍላይ ምስዚ ዝተሓሓዝ፣ደርፍን ጛይላንን ኣብ ግዜ ጾም ካልእ ንርኽሰት ዝመርሕ ናይ ሓጢኣት ጭማራን ዘይቀመስኩ ኢልካ ምዕጥይጣይ ናይ ክርስትያን ባህሪ ኣይኮነን።

ኣህዛብ ዘቕርብዎ መስዋእቲ፣ስጋዊ ብልዖት ኢዩ፡፣

ክርስትያን ድማ ልዕሊ ስጋዊ መግቢ ኣማናዊ ስጋ ወደሙ ናይ ክርስቶስ ስለዘሎዎም፣መስዋእቲ ናይ ኣህዛብ ዘይበላዕኩ፣ኣብ ንግደቶምን በረኸቶምን ዘይተኻፈልኩ ኢሉ፣ነቲ ክብር ስጋን ክቡር ደምን ናይ ክርስቶስ ዝተመገበ ከስዐ፣ብናይ ኣህዛብ መስዋእቲ ገይሩ ንክርስቶስ ከሳጉጎ ኣይግባእን።ቅዱስ ጳውሎስ፣እሞ መስዋእቲ ኣህዛብ ካብ ተመገብናስ፣ንክርስቶስ ነቕንኣዮዶ፧ ኢሉ ይሓትት።መቸም ክርስቶስ ናይ ኣህዛብ ብልዖት ካብ ናይ ክርስትያን መግቢ ኣብሊጽና ብምርኣይና ብርግጽ ይቀንእ ምኻኑ ርጉጽ ኢዩ፣ምኽንያቱ ንሱ ጥራይ ኣምላኽን፣ክምለኽ ዝግበኦን ምኻኑ እንዳፈለጠስ፣እቶም ደቁ ገዲፎሞ ናብ ካልእ ኣምልኾ ክኾዱ ናይ ኣምልኾኦም ተኻፈልቲ ክኾኑ እንከለዉ፣ከመይ ዘይቀንእ።እዚ ክኸውን እንከሎ ግን ኣምላኽነቱ መታን ከይወስዶ ኢሉ ኣይኮነን፣እንታይ ደኣ፣ደቁ ብምዕላዎም፣ነታ ናይ ተስፋ መንግስቱ ከምትንፈጎም ፈሊጡ ስለዝድንግጸሎም ኢዩ።

ካልእ፣ካብ ሓሊቑ፡ዝጸነሐስጋ፣ኣይትብልዑ፡

ኢሎም ሃዋርያት ደብዳበ ጽሒፎም።ዝሓለቐ፣ማለት፣ሕሉቕ፣ዘይተኸስተነ፣ዘይተባረኸ፣ማለት ኢዩ።ክንዮዚ ግን ክርስትያን ቀንዲ ክብህግዎ ዝግበኦም መግቢ ምድራዊ ስጋ ዘይኮነስ፣ሰማያዊ ስጋ፣ንኽሰትይዎ ዝህንጠይዎ ደም፣ድማ ምድራዊ ደም ዘይኮነስ ሰማያዊ ደም ኢዩሞ፣ነቲ ዝዓበየ ናይ ነፍሲ መግቢ ንምምጋብ ክቱር ህርፋን ክህልወና ኣብ ግዜ ጾም ኣዝዩ ኣገዳሲ ኢዩ።መብዛሕትኡ ድኻማትና ኣብ ግዜ ጾም ከነስተኻኽሎም እንተተበጊስና ዘይሕከምሉ ምኽንያት የለን።

ኮይኑ ግን፣ ክርስትያን ኣህዛብ ንዘቕርብዎ መስዋእቲ፣ ኣብ መስዋእቶም እንተድኣ ሓቢሩ፣ንሲኦልን መንግስተ ሰማያትን ሓደ ክገብረን ይቃለስ ኣሎ ማለት ኢዩ።እቲ <<እንታይ ጸገም ኣሎዎ>> ኢሉ፣ምስ ኣህዛብ ኣብ መስዋእቶም ክሓብርን፣በረኸቶም ከምባሁቕን ዝውዕል ክርስትያን፣ኣብ መንገስተ ሰማያት ኣትዩውን ናይ ሲኦል ምረት ከምዝናፍቕ ዘየማትእ ነገር ኢዩ። ካብ ናይ ሓሶት ኣምልኾኸከ እንታይ በረኸት ክርከብ፧ ኣብ ምድሪ ዘለዉ ኣህዛብ፣እግዚኣብሔር ገለ ንስሓ ኣቲዮም ምስ ክርስትያን እንተተጸምበሩ ኢሉ ኢዩ ዕድል ናይ ዕድመ ንስሓ ዝህቦም ዘሎምበር፣ክርስትያን ምስ ኣህዛብ መታን ክተሓዋወሱ ኢሉ ኣይኮነን።ክርስትያን ኣብዛ ዓለም ምስ ኣህዛብ ተጸምቢሮም ይነብሩ እካ እንተሃለዉ፣ካብ ኣምልኾኦምን፣መንፈሳዊ ተግባራቶምን ግን ከይጽምበሩ ፈጺሞም ክውስኑ ይግባእ።ምኽንያቱ ሓቀኛ መርገጺ ናይ ክርስትያን መንፈሳውነት ኢዩ።እዚ መንፈስ እዚ ድማ ናይ ኣምላኽ መንፈስ ኢዩ።

ካብኡ ወጻኢ ዘሎ ግን ሰይጣናዊ ኢዩ።<<ጸገም የብሉን ክርስቶስ ኣብ ልበይ ሒዘዮ ናብኣቶም ምስ ከድኩ ክቕድሶም ኢዩ!!>> ዝብል ክርስትያን እንተሎ ግን፣ነቲ ዘይኣምነሉን ወትሩ ክራገሞን ዝውዕል ክርስቶስ፣ <<ብሓይሊ የድሌካ ኢዩ፣ንዓ ብኡኡ ገይረ ክባርኸካ፣>> እንዳበሎ ምኻኑ ይረዳእ።እግዚኣብሔር ክባርኽ እንተኾይኑ፣ ክርስቶስ ኣብኣቶም ክነግስን ክባርኾምን ፍታዎም ክኸውን ኣሎዎ።እምበኣር፡እዚ ከይኮነ እንከሎ ሒዝካሎም ትመጽእ ዘይኮነስ፣ባዕሎም ንክርስቶስ ክባርኾም ቅድም ክኣምንዎ እንከለዉ ኢዩ።ምላልባሽ እቲ ካብቲ ናቱ መስዋቱ ክትካፈለሉ ዝደሌካ ዘሎ ሰብ ንዓኻ ይፈልጥ ይኾውን፣ንክርስቶስ ግን ኣይፈልጦን ኢዩ፣ክፈልጦ ድማ ፍቓደኛ ኣይኮነን።ንስኻ ድማ ንክርስቶስ ስለእትፈልጦ፡ብመንገድኻ እቲ ኣምላኺ ጣዖት ብክርስቶስ ዝባረኽ መሲልካ ናብቲ ናቱ መስዋእቲ ትኸይድ ኣሎኻ።እዚ ሰብዚ ግን ንዓኻ እምበር፡ንክርስቶስ ኣይፈልጦን ዩ፡ክፈልጦውን ኣይደለየን።ስለዚ መን ክፍለጠልካ ትደሊ፣ክርስቶስዶ ዋላስ ንስኻ፧ ኣብቲ መንፈሳዊ በዓል ኢሎም ዝዕድሙኻ ዘለዉኸ፣መን ዝተዓደመሉ በረኸት ክትካፈል ትደሊ፣ክርስቶስ ዝተዓደሞ መስዋእቲዶ፣ወይሲ ሰይጣን ኢዱ ዘምበረሉ መስዋእቲ፣ክርስትያን ነዚ ክፈልጥዎን፣ክስዕብዎን ከምዝግባእ ስለዝፈለጠት፣ቅድስት ቤተክርስትያን ንደቃ ካብ ናይ ኣህዛብ መስዋእቲ ከይካፈሉ ትኽልክል።

ስለዝሙት፣-

ዝሙት ጅማሬኡ ኣብ ሕልና፣ፍጻሜኡ ድማ በዞም ዝተዋህቡና ህዋሳት ኢዩ። መብዛሕትኦም ናይ ዝሙት መንገድታት ሎም ኣዝዩ ቅሉዕ እናኾኑ ይመጹ ኣሎዉ።ሕሉፍ ሓሊፉ ክርስትያን ተባሂሉ፣ንዝሙት ከም ሕጋዉ ተቆጺሩ፣ከም ናይ ኣህዛብ ኣበሃህላ፣ኣፍቃሪተይ ኢያ፣ኣፍቃርየይ ኢዩ፣ብዝል ሽፋን ሆ ኢልና ንዝሙት ከምእንለዓዓል ኮይንና ኣሎና።ንመንፈሳዊ ኣገልግሎት መጺኻ ክንስኻ፣ብዓይኒ ዝሙት ክትጠማመት ኣዝዩ ኣነዋሪ ነገር ኢዩ።ብፍላይ ድማ ክርስትያን ኮይንካ፣ዘይተዋህበካን፣ብሕጊ ዘይኣሰርካሉን ነገር፣ብሕልና፣ብግብሪ፣ብዝተፈላለየ ቅድመ ሕገ ቤተክርስትያን፡ብገዛእርስኻ ርእየት፡ ውሽጣዊ ፍትወትካ ክትድርጉሕ ክትብል ንኣምላኽ ምብዳል ኣዝዩ ንፍርዲ እግዚኣብሔር ዘቀላጥፍ ነገር ኢዩ።ሎሚ-ሎሚ፣ክርትያን ተባሂሉ፣<< ቅድሚ ዝኣገረ፣ቃል ኪዳን እንተኣሲረላስ፣ክትጠልመኒ ኢያ፣ቅድሚ ዝኣገረ እንተተመርዕየዮስ፣ክጠልመኒ ኢዩ፣>>ብዝብል ሰነፍን፣ዘይክርስትያናውን ሓሳብ ተዋሒጡ፣ጥምቀትን መርዓን ብሓደ ኮይኑ መብዛሕትኡ ክርስትያን ለሚድዎ፣ኩሎም ኣህዛብን ተጻረርቲ ቤተክርስትያንን ድማ ገሪምዎም ኣሎ።እምበኣር ሃዋርያት ኣብ ሲኖዶሶም ዘጽደቕዎ ብጥቕልሉ ቤተክርስትያን ዘይትፈቕዶ ምግባር፣ኩሉ ዝሙት ኢዩሞ፣ብጾም ክንስዕሮ፣እቶም ዝወደቕና ብጾም ክንትንስእ፣እቶም ንምትንሳኡ ዝተጸገምና ድማ ብጾም ሓይሊ እግዚኣብሔር ክንቅበል ጾም የድልየና።

ወስብሀት ለእግዚኣብሔር።
3ይ ክፍላይ ይቕጽል፣

ሕቱም መጽሓፍ።

መልሲ ንጥንተኣብሳውያን፡-

በስመ ኣብ ወወልድ ወመንፈስ ቅዱስ ኣሀዱ ኣምላም፡

1.ድንግል ማርያም ጥንተ ቅድስና እምበር ጥንተ ኣብሶ የብላን።

ዝወረሰቶ ቅድስና እምበር፡ዝወረሰቶ ሓጢኣት የብላን።ድንግል ማርያም ካብ ኣዳም ጥንታዊት ቅድስንኡ፡ካብታ ኣዳም እንክፍጠር ከሎ ዝነበረቶ ቅድስና ደኣሉ ዘለዋ እምበር፡ካብ ድሕሪ ፍጥረቱ 7 ዓመት ጸኒሑ ብገዛእ ድኻሙ ዝለበሳ ሓጢኣት ሒዛ ኣይተወልደትን።ስለዚ ብግብራ ይኹን ብሕልናኣ ሓጢኣት ኣይፈጸመትን ኢልኩም ምምስካርኩም ጽቡቕ ኢዩ። ግን ከምኡ ምባል ጥራይ ከኣ ኣኻሊ ኣይኮነን።ገና ከይተወልደት እንከላውን ዝሓለፋ ሓጢኣት ወይ ኣበሳ የለን ምባል ከድልየኩም ኢዩ።እዚ ምባል ጥራይ ዘይኮነ ድማ፡በንጻሩ  ዝሓለፋ ንጽሕና ኣሎ ኢልኩም መስክሩ።ናይ ኣዳም ጥንታዊት ንጽሕና።
ጥቕሲ፦ ኢሳ1፣9 እግዚኣብሔር ሒደት ዘርኢ ተረፍ ተዘይሓድገልና ነይሩ....
ኤፌ1፣4-5 እግዚኣብሔር ቅድሚ ምፍጣር ዓለም ሓረየና።
ቅዱስ ያሬድ፡- ድንግል ማርያም ኣብ ሕቆ ሓዳም ከም ዕንቂ ባሕሪ ተብርህ ነበረት።
ድንግል ማርያም ትነጽሕ እምበላእክት፡ድንግል ማርያም ነበረት በሕልና ኣምላኽ እምቅድመ ዓለም፡
ድንግል ማርያም ካብ መላእክት ትነጽሕ፡ዓለም ቅድሚ ምፍጣሩ ኣብ ሕልና ኣምላኽ ነበረት።(ቅዳሴ ማርያም)

እዘን ጥቕስታት ኩላተን፡ብዛዕባ ድንግል ማርያም ሓጢኣት ሰሪሓን ኣይሰርሐትን ዘይኮናስ፡ብዛዕባ ገና ከይተፈጥረት እንከላ፡እረ ኣዳምውን ገና ከይተፈጥረ እንከሎ ንዝነበረ ንጽሕና ናይ ድንግል ኢየን ዘዘንትዋ።እሞ ቤተክርስትያን ትሓተኩም ዘላ፡"ጥንተ ኣብሶ ኣሎዋ ድዩ የብላን?" ኢላ ኢያ። ንስኹም እትምልስዎ ድማ ኣይሰረሐትን።ሓታትን መላስን በበይንኹም ኣሎኹም።ቤተክርስትያን ግን ንድንግል ማርያም ገና ከይተወልደት እንከላ፡እግዚኣብሔር ካብ ኩሉ ርኽሰት ሓሊይዋ ነይሩ፡ምስተወልደት ድማ ከምዚ ዝበልክሞ፡ዝፈጸመቶ ኣበሳ ብሕልና ይኹን ብግብሪ ፈጺምካ የለን ትብል።እዚ ኢዩ ናይ ቅዱሳን መጽሓፍቲ ትምህርቲ።ሓጢኣት ኣይሰረሐትን ምባልኩም ጽቡቕ ኢዩ፡ግን ሓንቲ ነገር ጎዲላትኩም፡ዝሓለፋ ኣበሳውን የለን ምባል ከድሊ ኢዩ።ፐርከስ እግዚኣብሔር ኣበሳ ዘለዎ ስጋ ክወሃሃድ ምስ ባህሪኡ ዝኸይድ ኣይኮነን።

2.ብስጋ ስለዝዓረፈት ጥንተኣብሶ ሓሊፍዋ ኣይንብልን፡ስጋዊ ሞት ኣብ ክርስትና ጥንታዊ ኣበሳ ዘይኮነስ፡ናብታ ጥንታዊ ቤትና ዘሰጋግር ድልድል ኢዩ፡-

ፐርከስ ታሪኽ ሞት ኣብ ሓድሽ ኪዳን ተሓዲሱ ተለዊጡ ኢዩ።ስጋዊ ሞት ንክርስትያን ኣበሳ ኣይኮነን፡ንሕና ኩሉና ክርስትያን ብስጋ እንመውት ዝሓለፈና ኣበሳ ወይ ጥንተኣብሶ ስለዘለና ኣይኮነን።እንታይ ደኣ፡ብስጋ ተሞትናስ ናብ ሕቕፉ ክንከይድ ስለዝዘለና መሰጋገሪና ኢዩ።
ብርግጽ ድንግል ማርያም፡ዓሪፋ ኢያ።ሞይታ ግን ኣይንብልን።ሞት ኣብ ክርስትና ዝተናዕቀ ነገር ኢዩ።ድንግል ማርያም መቓብር ቀሚሳ ኢያ፡ግን ጥንተ ኣብሶ ስለዝነበራ ኢዩ ኣይንብልን፡ምኽንያቱ መቓብር ኣብ ሓድሽ ኪዳን ናብ መንግስተ ሰማያት ዘሰጋግር ድልድል ስለዝኾነ።ድንግል ማርያም ናይዛ ዓለም ድኻምን ጻዕርን ዘበለ ኩሉ ካብ ጽንሰታ ክሳብ ዕረፍታ ቀሚሳቶ ኢያ፡ግን እቲ "ምድሪ ብሰንክኻ ርግምቲ ትኹን"ዝበሎ መርገም ስለዝሓለፋ ኣይኮነን።እንታይ ድኣ፡ሕገ ክርስትና ደኺምካን ጽዒርካን ዓስብኻ እትወሃበሉ ምኻኑ ንምስትምሃር ኢሉ ዝመደባ ኣደ ስለዝኾነት'ምበር።ፈጣሪና ብመምህርነቱ ንከስተምህረና እንተላይ ነዲኡ ከይተረፈ ኣይበቐቐልናን።ካብ ፍጡራን መምህር ክትከውን ዝተመደበት፡ብዙሓት እካ እንተሃለዉ፡ልዕሊ ኩላቶም ግን ድንግል ማርያም ኢያ።ልዕሊኣ ዝዓቢ ፍጡር የለን፡ልዕሊኣ ንናይዛ ዓለም ሽግርን መከራን ከስተምህረና ዝኽእልን ድማ የለን።ሞታ ንዓና መስተምሃሪ ደኣምበር፡መጠቆሚ ኣይኮነ ክኾውን ዝግበኦ።ንሳ ዝሞተት ጥንተተኣብሶ ሓሊፉኪ ኢልና ንኽንጥቁማ ዘይኪነትሲ፡ብመከራኣ ንኽንመሃር፡ብሞታ ንክንጸናናዕ ኢዩ።ንሳ ብስጋ ክትዓርፍ እንከላኮ፡ ክንደይ ኣሽሓት ነፍሳት ናይ ሲኦል ሒዛ ኢያ ዓሪጋ።ሓራ ኣውጺኣቶም።እሞ ብስጋ ሙማታ ንዓና ከደንቐናን ከስደምመናን ምተገበአ እምበር፡ከውቅሳ ኣይግበኦን ኢዩ።እስከ ንሰተውዕሎ፡ንሳ  ብስጋ ስለዝዓረፈት፡ንሞታ ጥንተተኣብሶ እንተኢልናዮ ደኣ፡እቶም ብስጋ ዘይዓረፉ እንበዓል ኤልያስ፡ሄኖክከ እንታይ ክንብሎም ኢና፡ ኣይሓለፎምን ክንብል፧ ይበልጹዋ ኢዮም ክንብል፧ ብጭራሽ ዝበልጻ የለን።ሞታ ንዓና ንሞት ከምእንንዕቆ ኢዩ ዝገብረና እምበር፡ንሳ ብስጋ ስለዝሞተት ብሞት ክንብህርር ኣይግባን።ጥንተተኣብሶ ኣሎዋ እንተኢልናኮ፡ገና ፍርሒ ሞት ኣይወጻልናን።ብክርስቶስ ዝተሳዕረ ሞት፡ንሕና ግን ገና ኣብ ትሕቲ ግዝኣቱ ኣሎና ኢልና ንክርስቶስ ንክሕዶ ምህላውናዶ ኣይኮነን።

ንሱ ጥራይ ዘይኮነውን፡ኣቦና ኣዳም ምድሪ ብሰንክኻ ርግምቲ ትኹን ደኣ ይበሃል እምበር፡ቅድስት ምድሪ ከምዘላ ነኸነጽርውን፡ንሙሴን ንኢያሱ፡እዛ ዘለኻያ ቅድስቲ ምድሪ ኢያሞ ኣሳእንካ ኣውጽእ ተባሂሎም ኢዮም።ስለዚ ኩላ ምድሪ እካ  ሰንኪ ድኻም ኣዳም እንተተረግመት፡ስላ ጸጋ እግዚኣብሔር ግን መርገም ዘይሓለፋ ምድሪ ከምዘላ ክንዝንግዕ ኣይግባእን።ብኻልእ መንጽርውን፡ንናይዛ ዓለም ፈተና ከመይ ኢልካ ከምዝሕለፍ ንምስትምሃር ዋላ በዲኡ ገይሩ ክምህረና ስለዝመደበ፡ኣዲኡ ልዕሊ ኩሎም ፍጡራት ክንሳ፡ልዕሊ ኩሉ ፍጡር መከራ ከምትቐምስ ገበረ።
እሞ፡ነቲ ንሳ ካብዛ ዓለም  ዕረፍታ ኮይኑ ዝተፈለየታን፡ሽግራን ጸበበኣን ከም ጥንተኣብሶ እንተቆጺርናዮስ፡ክርስቶስ ስለኹሉ ክብል ኣብ መስቀል ምስቃሉስ ዋጋ ከምዘይሃብናዮ ዶ ኣይኮነን ዘስምዕ፧ ሞተ ስጋ ስለዝቐመሰት፡ንናይ ስጋ ሞት ጥንተኣብሶ እንተኢልናዮ፡ክርስቶስ ጥንተኣብሶ ኣሎዎ ኢልኩም ከምእትመጹና ኣየጠራጥርን ኢዩ።ሞት ግን ባህርይ ኣይኮነን።ድሕሪ ፍጥረት ኣዳም ዝመጸ ጭማሮ ድኣምበር፡ባህሪ ኮይኑ ኣብቶም 7 ባህርያት ናይ ኣዳም መበል 8ይ  ባህሪ ተወሲኹ ዝተጠፈዐ ኣይኮነን ሞት።ክርስቶስ ምስመጸ ጥንታዊ ሞት፡ ታሪኹ ቀይሩ ፈጺሙ ተለዊጡ ኢዩ።ሞት ንክርስትያን ዝተናዕቀን ኣብ ልዕሊ ሞት ስልጣን ከምዘለናን ምኻኑ ከነጽር ቅዱስ ጳውሎስ፡ኦ ሞት ኣበይ ኣሎ ሓይልኻ ኢሉ፡ፈከረ።እሞ ደጊም ንሕና ክርስትያን ኣብ ልዕሊ ሞት ክንፍክር ደኣምበር,ነታ ኣደ ፈጣሪና ዝኾነት ድንግል ነቲ ንክንዕቆ ስልጣን ዝተዋህበና ሞት፡ከም ዘይተፋሕቐ ኣበሳ ቆጺርና፡ ኣዴና ኣበሳ ሓሊፍዋ ኢዩ ክንልብል ኣይግባእን።ጨአኢስካ ጽዩፍ ኣበሃህላ ውን ኢዩ።

ጥቕሲ፦ ወሰጠጠ መጽሓፈ ዕዳሆሙ ለኣዳም ወለሄዋን።ናይ ዕዳ ( ናይ ክሲ) ደብዳቤኦም ድማ ቀደዶ።ውዳሴ ማርያም ዘሶኑይ፡
ናይ ዕዳ ደብዳበኮ ተቐዲዱ ኢዩ፡ክርስቶስ ቀዲድዎ ኢዩ።ኣበይ ዝጸነሐት ናይ ጥንታዊት ደብዳበ ደኣላ ናብ ድንግል ማርያም ሓሊፋ እትብሉና ዘለኹም፧
ኦ ሞት ኣይተ ሀሎ ሐይልከ፡ኦ ሞት ሓይልኻ ኣበይ ኣሎ።

3.ገብርኤል መልኣክ ንከብስር እምበር፡ጥንታዊት ኣበሳ ክድምሥስ ኣይተላእከን።

ፈጺምካውን ምስ ዓቕሙ እትኸይድ ኣይኮነትን እዛ ጥንተኣብሶ ምድምሳስ።ጥንተኣብሶ ክድምሲስ ዝኽእል ነይሩ ተዝኾውን እኮ፡ቅድሚ ንድግል ማርያም ካልኦት  ብዙሓት ዘብሰሮም ኣሎዉ።
ኣብነት፡-
ነብይ ንዳኒኤል ኣበሲርዎ ግን ጥንተኣብሶ ከርሕቐሉ ኣይተኻእሎን፡-(ዳኒ10)።ንካህን ዘካርያስ ኣበሲርዎ፡ጥንተኣብሶኡ ከርሕቐሉ ግን ኣይከኣለን(ሉቃ1) ።ንድግል ማርያም ግን ከበስራ፡ጥንተ ኣብሶ ከምዘየብላ፡ምልእተ ጸጋ ምኻና ክነግራሞ፡ንኣምላኽ ንምጽናስ ከምዝበቐዐት ድማ ከበስራ፡ደኣምበር  ጥንተኣብሶ ክድምሲሰላ ኢሉ ኣይመጸን።
ከምኡ ተዝኾውንሞ፡-

* ተፈሲሂ ኦ ምልእተ ጸጋ፡ ኦ ምልእተ ጸጋ ደስ ይበልኪ ኢሉ ኣይመመስገናን።ምሉእ ጸጋ እንተሊዋኸድኣ ነየናይ ኣበሳ ኢዩ ከርሕቕ ኢሉ ክመጽእ፧ምልእቲ ጸጋ ማለት እኮ ንጹር ትግርኛ ኢዩ።ኣበር ዘየብላ ማለት ዩ።ብርግጽ ካልኦት ከምዚ ዓይነት ምስጋና ዝተቐብውሉ ኣሎዉ፡እንበዓል መጥብቀ መለኮት ቅዱስ ዮሐንስ፡"ካብ ኣንስቲ ዝወለድኦም ከም ዮውሓንስ ዝበለ የለን" ተባሂሎም፡እቶም ኣብ ምጽኣት ክርስቶስ ምስጉናት ኮይኖም ዝተረኽቡ ናይ ብሓቂ ክርስትያን "ኣንቱም ናይ ኣቦይ ብሩኻት፡ንዑ ናብቲ ዓለም ቅድሚ ምፍጣራ ዝተዳለወልኩም ክትወርሱ፡ማቴ25" ተባሂሎም።እዚ ግን ምስ ናይ ድንግል ማርያም ምልኣታዊ ምስጋና ክወዳደሮ ዝኽእል ዓይነት ምስጋና ኣይኮነን።ኩሎም ቅዱሳን ብእግዚኣብሔር ምስጉናት እካ እንተኾኑ፡ናይ ድንግል ማርያም ኣብ ቅድሚ ፈጣሪ ዘለዋ ሞገስ ግን ልዕሊ ኩሎም ቅዱሳን ፍሉይ ኢዩ።ምልእተ ጸጋ እትብል ሓረግ፡ንኹሉ ልዕልነኣ ኣጠቓሊላ ከተረስኣና እትኽእል ዓባይ ምስጋና ኢያ።

*ገብርኤል ጥንተኣብሶ ከርሕቕ ዝኽእል ነይሩ ተዝኾውን ኮ፡ናይ ክርስቶስ ምምጻእ ኣገዳስነት ኣይመሃለዎን።
ዋና ነገሩ፡ክርስቶስ ናብዛ ዓለም መምጽኢኡ ኣዳማዊ ሓጢኣትና ንከርሕቐልና ኢዩ።ምኽንያቱ እታ ክትሞውት ኢኻ እትብል ፍርዲ ንሱ ኢዩ ፈሪድዋ፡ንሱ ድማ ይድምሲሳ።ስለዚ ጥንተኣብሶ ዘይሓለፎ ስጋ ወሲዱ ክለብስ ነይርዎ።እዚ ድማ ኣቐዲሙ ጥንተኣብሶ ዘይሓለፋ ኣደ ከዳሉ ነይርዎ።
እምበኣር ድንግል ማርያም፡ጥንተኣብሶ ዘይኮነ ሓሊፍዋ እንብልሲ፡ጥንተ ቅድስና ሒዛ ኢያ ተወሊዳ።እዚ ትምህርቲዚ ንጹር ዩ፡ክርስቶስ ጥንታውነቱ ካብ ዘልኣለም ክሳብ ዘለኣለም ቅዱስ ኢዩ።ኣዳም ድማ ክፍጠር እንከሎ፡ካብ እግዚኣብሔር ቅድስና ብጸጋ ስለዝተመጠዎ፡ቅዱስ ኮይኑ ተፈጢሩ።ስለዚ ዋላ እንተወደቐን እንተሞተን፡ኣብ ውሽጡ ግን ንእሽቶ ተረፍ ቅድስና ነይራቶ።ኣብ ሲኦል,ኣብ ውሽጢ ኣዳም ኮይና ከም ዕንቂ ባሕሪ እተብርህ፡ንኹላቶም ቅዱሳን ነብያት   ብዝተፈላለየ ምሳሌታት ኮይና እንዳተገልጸት፡ኣብ መወዳእታ ድማ ብቀንዳ ምስተወልደት ኣትሒዛ ክሳብ ንክርስቶስ እትጸንስ፡ብመልኣኽቲ ትዕጀብን ትንከባኸብን ነይራ።ኣብ ምጽናሳ ካብ ምድራውያንን ካብ ሰማያውያንን ቅዱሳን ፍጥረታት ኣምላኽ ምስክርነት ሰሚዕና።ገብሪኤል ካብ ቀደም ስለዝፈልጣ፡ንኹላቶም ሰማያውያን ወኪሉ ጥንታዊ ቅድስናኣ መስኪሩ።ቅ.ኤልሳቤጥ ድማ፡ካብ ቀደም ስለእትፈልጣ ብዛዕባ ኣብ ምድሪ ንዝነበራ ክብሪ ንምድራውያን ወኪላ መስኪራ።ኣደ ጎይታ፡ናባይ ክትመጺ እዚ ከመይ ኢሉ ይኾነለይ በለት።

4.ኣስተውዕሉ ንድግል ማርያም ከምዚ ኢልና ክሳብ ክንድዚ ስለዘኽበርናያ፡ሰማያዊት ፍጥረት ዝገበርናያ ኣይምሰልኩም።

ጥንተኣብስ ዘይምህላውኮ፡ንሰማያዊ ፍጥረት ዘምስል ኣይኮነን።ፐርከስ ኣዳም ኣብተን 7 ዓመታት ኣበሳን ኣበርን ኣይነበሮን፡እዚ ዘይምንባሩ ድማ ፍጥረቱ ካልእ ዓይነት ኮይኑ ኣይፈልጥን።ኣዳም ክፍጠር እንከሎ ኣዳም ነይሩ፡ክወድቕ እንከሎ ድማ ኣዳም ነይሩ።ቅድስንኡ ንፍጥረትነቱ ክልውጦ ኣይከኣልን ኢዩ።ኣበሳኡ ድማ ንፍጥረትነቱ ክብርዞ ኣይክእልን ኢዩ።ኣዳም ክፍጠር እንከልክ 3 ባህርያተ ነፍሲ፡4 ባህርያተ ስጋ ሒዙ ተፈጢሩ።ብተወሳኺ ድማ ግርማ እግዚኣብሔር፡ጸጋ እግዚኣብሔር ዓሲልዎ ብመልኣኽቲ ተመስጊኑ።ድንግል ማርያም ተረፍ ናይዚ ግርማዚ ኢያ።ተረፍ ናይዛ ንኣዳም ዝተዋህበቶ ጸጋ ሒዛ ዝተረኽበት ኢያ።ኣዳም ምስ ወደቐ  እቶም 7 ባህርያት ኣይተፈለይዎን ኣይተወሰኽዎንውን።እቲ ዝተቐነሶ እንታይ ኢዩ እንተኢልና ጸጋኡ ተገፊፉ ዕራቑ ተሪፉ፡ኣበሳ ስለዝፈለጠ ክሓፍር ጀሚሩ።ንኹላቶም ፍጥረታት ዝገዝኦም ዝነበረ ሕጂ ግን ኩላቶም ፍጥረታት ከፍርሕዎ ጀሚሮም።ንመሬት ዝረግጻ ዝነበረ፡ሕጂ ግን ክትቀብሮ ጀሚራ።እዚ ድማ ክሳብ እቲ ናይ ተስፋ ዕለት ዝኣክል፡ስጋኡ ብሞት ስለዝተተሕዘ ናብ መቓብር፡ብኡ ኣቢሉ ድማ ነፍሱ ናብ ሲኦል ይወርድ ነይሩ።ግን ኣበሳ ኣዳም ባዕሉ ዘምዝኦ መርገም ደኣምበር፡ከም ፍጥረት ኮይኑ ከም መበል 8ይ ባህሪ ዝተወሰኾ ኣይኮነን።እግዝኣብሔር ነዚ ኣበሳዚ ሓንቲ መዓልቲ ከርሕቀሉ ምኻኑ ይፈልጥ ነይሩ።ዕለቱ ክሳብ ዝኣክል ግን ካብታ ጥንታዊ ቅድስቲ ንጽህቲ ባህሪ ኣዳም ንእሽቶ ጩራ ኣትሪፉ፡ብተስፋ ክጽበያ ንኣዳም ተላብይዎ።" እትወለድ እምወለተ ወለትከ" ካብ ጛል ጛልካ ተወሊደ ከድሕነካ ኢየ ብምባል።ነዛ ተስፋ እዚኣ ናብ ደቁ ብለበዋ ኣመሓላለፋ፡ማለት ናብ ወዱ ሴት።ሴት ድማ ነቶም ዝተወልዱ ደቁ"ኣምላኽ ካብ ባህሪና ክለብሳ ዘለዎ ንጽሕቲ ባህሪ ኣላ፡ንሳ ናትና ዘርኢ ኢያ።ካብ ስጋኣ ስጋ፡ካብ ነፍሳ ነፍሲ ወሲዱ ከድሕነና ስለዝኾነ ድማ፡ነዛ ንሱ ክለብሳ ዘለዎ ሰብ ካብ ናትና ኣበሳ ከመዘይሓልፋ ገይሩ ንሱ ብዝምርምሮ መለኮታዊ ሓለዋ ክሕልዋ ኢዩ።"ኢሎም ተስፋ ክገብሩ፡ብእምነት ክጽበዩ፡ነዚ ትምህርቲዚ ድማ ናብ ወሎዶታት ከሰጋግሩ ተላብይዎም ዓሪፉ ኣቦና ሴት።(መጽሓፈ ቀሌሜንጦስ12)።

እሞ ድንግል ማርያም፡ኣበሳ ኣይሰረበትን ጥራይ ዘይኮነስ፡ገና ከይተወልደት ጀሚሩ፡ ጥንታዊ ኣበሳ የብላን ስለዝበልናስ፡ፍጥረታ ካልእ ዓይነት ኢያ ንብል ዘለና ኣይምሰልኩም።ምኽንያቱ ኣዳም ኮይንካውን ጥንታዊ ኣበሳ ከይሓለፈካ ክትርከብ ስለዝከኣል።እነሆ እካ ንድንግል ማርያም ርኢና።እሂ እተምልኽዎ ኣምላኽ ነዚ ክገበር ዘይክእል ድዩ፧ ንድግል ማርያምሲ፡ፍጥረትነታ ከይተለወጠ፡እቶም 7 ባህርያታ ካብኣ ከየልገሱ፡ወይ ካልእ ዓይነት ተውሲኽ ከይሃለዋ፡ብዘይጥንተኣብሶ ከምትውለድ ክገብራ ኣይክእልን ኢዩ? እንድዒ ናትኩም ኣምላኽ እምበር፡ኣምላኽናስ ይከኣሎ ኢዩ።ንሱ ዘይክእሎ የለን።እስመ ኣልቦ ነገር ዘይሰኣኖ ለእግዚኣብሔር፡ኢልና ኢና ንሕና እንቕበሎ።ስለዚ እግዚኣብሔር ንፍጥረትነት ናይ ድንግል ከምቶም ጥንታውያን ኣዳምን ሄዋንን፡ካብ ጛል ጛሉ ንኣዳም ዝተረኽበት፡ኣበሳ ከይሓለፋ ዝተረኽበት ኣደ ፈጣሪ ኢያ።ክርስቶስ ድማ ነዚ ነገር እዚ ኣቐዲሙ ይፈልጦ ነበረ።ዕለቱ ምስ ኣኸለ ድማ መጺኡ ፍቓደኝነት ካብኣ ብምሕታት ተጸኒሱ ተወሊዱ ንዓና ከኣ ናይ ድሕነት ዕድል ከፈተልና።

ክብሪ ምስጋና ንዑኡ ጸሓዮ ንእግዚኣብሔር።
ምስጋና ንድግል ማርያም ይኹን።

ሕቱም-መጽሓፍ።

በእንተ ጾመ ነብያት

በእንተ ጾመ ነብያት

በስመ ኣብ ወወልድ ወመንፈስ ቅዱስ ኣሀዱ ኣምላክ ኣሜን።

እዚ ኣውደ-ጾምዚ፣ቅድስት ቤተክርስትያን ንህዝባ ጽድቂ ኣዋህሊሎም ኣሰር ቅዱሳን ኣቦታቶም መታን
ክስዕቡ ኢላ ንደቃ እትሰርዖ ሓደ ካብቶም 7 ናይ ኣዋጅ ኣጽዋማት ኢዩ።ህዝበ እግዚኣብሔር ንፈጣሪኦም
ንዘለዎም መንፈሳዊ ፍቕሪ ክንድምንታይ ልካዔ ከምዘለዎም ንምምልካት ብፍታዎም፣ትእዛዝ
ቤተክርስትያኖም ንምኽባር ይተግሁ።እዚ ናይ ኣዋጅ ጾምዚ ድማ ሓደ ካብቶም ንፈጣሪኻ ንምኽባርን ንምምላኽን ተባሂሉ ዝፍጸም ተኣዛዝነት ኢዩ።

ትርጉም ጾም፣-

● ካብ ዝብላዕን ዝስተን ምኽልካል፣
እግዚኣብሔር ዝብላዕን ዝስተን ኢዩ።ስለዚ ህዝቢ እግዚኣብሔር፣ካብቲ ኣብዚ ዓለም ዝረኽብዎ ዝብላዕን
ዝስተን ነገራት ኣብሊጾም ንፈጣሪኦም ብምጥማት፣ካብ መግበ ስጋስ፣ንስኻ ትሕሸና፣ካብ መስተ ስጋውን
ንዓኻ ንጸምእ ኣሎና ኢሎም፣ነፍሲ ናይ ክርስትያን ብፈጣሪኣ እትዕንገለሉን እትረውየሉን ቅንያት
ኢዩ።ክርስትያን ካብዚ ኣብዛ ዓለም ዝርከብ ብልዕን መስተን ክኽልከል እንከሎ፣በኣንጻሩ ነቲ ዝብላዕን
ዝስተን እግዚኣብሔር ይጸምኦን ይጠምዮን ስለዝኾነ ኢዩ።መጽሓፍ፣-[[ ከመ ያፈቅር ሀይል ኣንቅዕተ
ማያት፣ከማሁ ታፈቅር ነፍስየ ሀበ እግዚኣብሔር፣ከምቲ ኢራብ ንዓይኒ ማያት እትጸምኦ፣ኣነ ድማ ኦ
እግዚኣብሔር ነፍሰይ ትጸምኣካ ኣላ። መዝ42፣2]] ኢሉ ይምህር።

● ካብ ስብሕን ንስጋና ዘህጥሩን ነገራት ምኽልካል፣
እግዚኣብሔር ንህዝበ ክርስትያን እቲ ሓደን መዳርግቲ ዘይርከቦን ከህጥሮምን ከስብሖምን ዝኽእል
ኢዩ።እግዚኣብሔር ነቶም ዘይቅበልዎን ዝቃወምዎን ከይተረፈ፣ናይ ስጋ መግብን መስተን
እንዳቐረበ፣ስጋዊ ናብርኦም ከ።ዝከናወን ይገብር ኢዩ።ነታ መንግስቱ ክወርስዋ ኢሉ ዘዳለዎም ሓቀኛታት
ክርስትያን ደቁ ግን፣ነዚ ኣብዚ ምድሪ ዝረኽብዎ ስጋዊ ስብሕን ህጥራንን ምስታ ክብርቲ መንግስቱ
ከዋዳድርዋ ኣይደልን ኢዩ።ስለዚ ድማ ኢዩ፣ናብኣ ክኣትዉ ዘለዎም ሰባት፣ስጋዊ ህጥራን ዘይተመነዩ፣ናይዛ
ዓለም ጽቡቕ ነገራት ዝነዓቑ፣ነፍሶም መታን ክትሃጥር ወትሩ ምእንትኡ ኢሎም ነቶም ንስጋ ዘህጥሩ
መግብታት ዝተኸልከሉ ስለዝኾኑ፣ንሱ ድማ ኣገናዕ ንኽብል፣ካልእ ህልነኦም ዘይሓለኖ፣ኣእምሮኦም
ተመራሚሩ ዘይበጽሖ፣የዒንቶም ዘይረኣየቶ፣ብልሳኖም ከምዚ ኢያ ኢሎም ክገልጽዋ ዘይክእሉ፣እጽብትን
ድንቅን ዝኾነት ቤት ብኢዱ ዝሃነጻ ናይ ክርስትያን ቤተ መስባሕቲ ኣዳልዩ፣ነዚኣ ንምርካብ ወትሩ ሃረር
ኢሎም ዕብየቱ ክሳብ ክንድዚ ከምዘድልዮም ክፈልጥሉ ይደሊ።

ቅዱስ ነብይ ዳኒኤል፣<< እተን ሰለስተ ሰሙን ክሳዕ ዚውድኣ፣ጥዑም መባልዕ ኣይበላዕኩን፣ስጋን ወይንን
ኣብ ኣፈይ ኣየእቶኹን፣ዘይቲውን ኣይተለኼኹን፣ ዳኒ 10፣3 >> ኢሉ የዘንትወልና። ስለምንታይ ካብ
ጥዑም መባልዕ ተኸልኪልካ፣ኢልና እንተድኣ ተወኪስናዮ፣ኣብቲ ጽሑፍ፣እግዚኣብሔር ክገልጸሉ ዝተደለዮ
ራእይ ነይርዎ።ስለዚ ህዝበ ኣምላኽ፣ካብ ኣምላኾም ክወሃቦም ዝደለይዎ መንፈሳዊ መግቢ ክህሉ
እንከሉ፣ስጋዊ ስብሖም ክቕንሱ የድልዮም።መንፈሳዊ ህጥራን ንምርካብ፣ስጋዊ ዕብራን የድሊ።ዳኒኤል
ጥዑም መንፈሳዊ መግቢ ንምርካብ፣ጥዑም መግብን መስተን ናይ ስጋ ከይበልዕ፣ንሰለስተ ሰሙን ዝኣክል ክኸልከል ወሰነ።
2ይ ክፋል ይቕጽል።
ወስብሐት ለእግዚኣብሔር።