ዘመን ፍጡር ኮይኑ ንፍጡራን ጠቐመ!

ዘመን ፍጡር ኮይኑ ንፍጡራን ጠቐመ

√ በስመ ሥላሴ!

√ ዘመን ፍጡር'ዩ፡ ክፍለ-ዘመን'ውን ኢድ እግዚኣብሔር'ያ ሰሪሓቶ፡፡ ዓመታት ኩላቶም ኣብ ዓይኒ እግዚኣብሔር ቁጹራት'ዮም፡ እዚ ድማ ባዕሉ ፈጣሪ ስለዝሰረሖም'ዩ፡፡ ኣዋርሕ፡ ሰሙናት፡ መዓልታት፡ ለይትታት፡ ሰዓታት፡ ደቓይቕ፡ ካልኢታት ኬክሮሳት ኩላቶም፡ ከም ኩላቶም ፍጥረታት ካብ ጥንቲ ኣብ ሕልንኡ ተዓቒሩም ዝነበሩ፡ ድሓር ድማ ኢድ እግዚኣብሔር ዝሰረሐቶም ፍጡራት'ዮም። ፍጡራት ብምኻኖም ከኣ፡ ንዓና ንፍጡራን ከም ንጥቀመሎም ገይሩ ሃበና እግዚኣብሔር።
ኣብ'ዚ ዓንኬለ-ተጠቃምነት'ዚ ክንዮ ሰብ ሓሊፍና፡ እንሲሳታት ከይተረፈ ብግዝያት ተጠቀምቲ ኮይኖም ምህላዎም ከነስተብህል ክኢልና ኣለና። ንኣብነት  እነገሊኣቶም እንሲሳታት ለይቲ ቀትሮም፡ እነገሊኦም ድማ ቀትሪ ለይቶም፡ ገሊኣቶም ብርሃን ጸልማቶም፡ እነገሊኦም ድማ ብዘይብርሃን ተወር ክብሉ ዘይክእሉ ኮይኖም ተፈጥሩ። እዚ ድማ ዘዕርፍሉን ዝምእርሩሉን ግዜ ፈሊጡም ይጥቀሙ ምህላዎም'ዩ ዘረድእ።

√ ደቂ ሰባት ንዘመናት ክድነቑዎምን ከኽብርዎምን እንከለዉ፡ ፍጡራት ምኻኖም ዘንጊዖም ኣይኮኑን። ብፍላይ ገለ-ገሊኣቶም ዕለታትን ዓመታትን፡ ኣብ ልቢ ደቂ ሰባት ፍሉይ ክብርን ጦብላሕታን ሃይልይዎም፡  ኣብ ኣእምሮ ደቂ ሰባት ከኣ ዓቢ ቦታ ረኺቦም ክንርኢ እንከለና፡ ወዲ ሰብ ንዘመናት ልዕሊ ፈጣሪ ገይሩ ስለዝሰረዖም ወይውን ኣብ እግዚኣብሔር ዘለዎ ኣምልኾ ስለዝተዛበዐ ኮይኑ ኣይኮነን። እንታይ ደኣ ንዘመናት ክሓስቦም እንከሎ፡ ንዖኦም ዝሰረሐን ዝሰረዐን ፈጣሪ ኣብ ኣእምርኡ ስለዝቕጀሎ'ዩ። ፍሉያትን ክቡራትን ዕለታት ንሓድሕዶም ዝበላለጽሉ ምኽንያት፡ እግዚኣብሔር ኣበላሊጹ ስለዝፈጠሮም ዘይኮነስ፡ ኣብ በበይኖም ግዜያት በበይኑ ዝኾነ ዓበይቲ መንፈሳዊ ክብርታት ከምዝኽሰቱ ስለዝገበረ'ዩ። ኩላቶም ዕለታት ከም ኩሉ ፍትረት፡ ክብርን ዕብየትን እግዚኣብሔር ዝትርኹ ዓበይቲ ተነበብቲ መጽሓፍቲ እካ እንተኾኑ፡ብፍላይ ገለ ገለ ዕለታት ግን፡ ኣብ ርእሲ'ቲ ከም ኩሎም ዕለታት ዘለዎም ክብሪ፡ ፍሉይን ጉሉሕን ፍጻሜታት እግዚኣብሔር እናዘከሩ ባርኾቱን ጸጋታቱን እንቕበለሎም ኮይኖም ኢና እንረኽቦም። ከም ኣብነት፡- ዘመነ ዮሓንስን፡ ዓውደ-ዓመት ቅዱስ ዮሓንስን፡ ወርሐ መስከረም ዕለት ሓደ ዕለተ ሰንበትን፡ ሓደ ካብቲ  ዓበይቲ ጥቕምታት ናይ ዘመናት፡ ንደቂ ሰባት ዝህብዎ ዓቢ እጃሞም ተዘኪሩ፡ ብኡኡ መጠን ድማ  እዞም ከም ኣብነት ዝተጠቕሱ ዕለታት'ዚኣቶም ዝፍንውዎ ዓቢ መንፈሳዊ ቃጭል  ከምዘሎ ኢና ነስተብህል።

√ ግዜ ነዊሕን ተመጣጥን እካ እንተኾነ፡ ዝውደኣሉን ዝሓለፈሉ እዋን ግን ኣሎ። ከምኡ ተዘይኮውን ነይሩ፡ መዓልቲ ኣይመስን'የ፡ ኢላ ወትሩ መዓልቲ ምኾነት፡ ለይቲ'ውን ኣይወግሕን'የ፡ ኢላ ወትሩ ንጸልማትነት ምመረጸት። ወቕትታት ናይ ዓመት፡ ከረምቲ፡ ቖውዒ፡ ሓጋይ ፅድያ፡ ከከም ግዚኦም ክሓልፉን ክቀዳደሙን ኣይምተበረሆምን ነይሩ። ኩላቶም ግን ሓለፍቲ ምኻኖም ንክትርኹ ዝተቐረቡ እንክመስሉ ዝተመደበሎም ሰዓት መምስ ኣኸለ ይውለዱን ይሓልፉን ኣለዉ። ኣብ ታሪኽ ተፈጥሮ፡ ግዜ ብክልተ መልክዕ ክምዘኑ ይከኣሉ ኢዮም። ቅድሚኡ ግን ቅድሚ ምፍጣር ዓለም ዘሎ ንውሓተ ዘመን ጽማቕ ርድኢት ክህልወና ባህርያዊ'ዩ፡፡ እዚ ማለት፡ ቅድሚ ምፍጣር ዓለም ዝነበረ እዋን፡ "በዚ ዕለት'ዚ በዚ ግዜ'ዚ!" ተባሂሉ ክንገር ኣይከኣልን'ዩ። ማለት ዕለትን ግዜን የብሉን። ምኽንያቱ ግዜ ኣይተፈጥረን ነይሩ። ግዜ ስለዘይነበረ ግን ፈጣሪ ኣይነበረን ማለት ኣይኮነን። ቅዱስ ዮሓንስ ወንጌላዊ፡ ንጅማሬ ፈጣርን ፍጥረትን ከሰማምዕም እንከሎ፡ "ብመጀመርያ ቃል ነበረ" ኢሉ ወንጌሉ ፈለመ። "ቃል መዓስን ኣበየናይ እዋንን'ዩ ነይሩ?" ኢልና ሕቶ እንተልዒልና ግን መልሲ የብሉን። ምኽንያቱ ቃል ፈጣሪ'ዩ፡ ፈጣሪ ድማ ጥንታውነቱ ኣይፍለጥን'ዩ። ስለዚ እታ "መጀመርያ" እንትብል ሓይለ ቃል፡ መጀመርያ ዘየብላ መጀመርያ ማለት ምኻና ግሁድ'ዩ።  በዚ መሰረት ቅድሚ ምፍጣር ዓለም ንዘሎ ዘይቁጸርን ንህልውና ፈጣሪ ጥራይ ዝውክልን መጀመርያ ዘየብሉ ግዜ'ዩ።

√ ቀጺሉ ቅዱስ ዮሓንስ ፡"ብኡኡ ኩሉ ኮነ!" ኢሉ፡ ኩላቶም ፍጥረታት ንግዜ ምስኣቶም ሓዊስካ፡ ዝፈለምሉ ጅማሬ ከምዘለዎምን፡ ፈጣሪኦም ድማ ቃል ምኻኑን ነገረ። ካብ'ዚ እዋን'ዚ ጀሚርና ድማ ደቂ ሰባት፡ ታሪኽን ኣመጻጽኣን ፍጥረታት ክንትንትንን ክንመሃርን ክኢልና። እዚ ዘመን'ዚ ፍጡር ብምኻኑ ዝተገደበ ዕድመ ሒዙ ይርከብ፡ ማለት ቀዳማይ ግድቡነቱ ክሳብ ምጽኣተ እግዚኣብሔር'ዩ። ካልኣይ ግዱብነቱ ድማ ድሕሪ ምጽኣት ዘሎ ግዜ 'ዩ። ክሳብ ምጽኣተ ክርስቶስ ዘሎ ዝመን፡ ነነፍሲ ወከፍ ዕለታት፡ ብዘይካ ኣስማቶም ጥራይ ተመሳሳሊ ክኾኑ ተዘይኮይኑ፡ ነናይ ገዛእ ርእሶም መልክዕን ውቃበን ሒዞም ከምዝህሉ ኢዩ ገይሩ እግዚኣብሔር።

√ እቲ ሓደ ድማ፡ ድሕሪ ምጽኣት እግዚኣብሔር ዘሎ ዝመንዩ። እዚ ድማ ምስ'ቲ ቅድሚ ምፍጣር ዓለም  ዝነበረ ዘመናት ክመሳስል ይኽእል'ዩ። ማለት ምንም እካ ጅማሬ እንተለዎ መወዳእታ ግን ዘየብሉ ብምኻኑ ጫፍ ንውሓተ ዕድሜኡ ከመሳስሎ ይኽእል'ዩ። መወዳእታ ስለዘየብሉ ግን ድሕሪ ምጽኣት ክርስቶስ ዘሎ ዘመን እግዚኣብሔር "ክልክዖ ኣይክእልን'ዩ!"  ክንብል ኣይከኣልን። ምኽንያቱ ርሑቕ ከይከድና ንሕና ደቂ ሰባት እካ፡ "ድሕሪ ምጽኣት ዘሎ ዘመን፡ በዚ ግዜ'ዚ'ዩ ጀሚሩ!" ኢልና ክንትርኽ ኢና። ድሕሪ ምጽኣት ቆጺርካ ዘይውዳእ፡ ሓንቲ መዓልቲ ኮይኑ ዝቕጽል'ዩ። እዛ ዕለት እዚኣ ሊቃውንት ቤተክርስትያን "ሰንበት ኢያ" ይብሉ። ማለት ኩሉ ግዜ ቅዳሴ፡ ወትሩ ምስጋና ወትሩ ስባሔ ወትሩ ኣምልኾ ኢዩ ክህሉ። ኣብ'ቲ ሓደ ዓለም ማለት ናይ ሓጥኣን ስፍራ፡ ኣብ ገሃንመ እሳት ድማ ወትሩ ስቅያት ብዘይዕረፍቲ ኣውያት ኢዩ ክኸውን። ኣብ ክልቲኣቶም ዓለማት፡ ኣብ መንግስተ ሰማያትን ኣብ ገሃንመ እሳትን ግን፡ ገደብ ዘየብሉ ዘመን ኢዩ ክኸውን። እግዚኣብሔር ኣምላኽ፡ ብንስሓ ተሓጺብና ኣብ ቅድሚኡ ዘይትሓፍር ነፍሲ ክዕድለና፡ ቅዱስ ፍቓዱ ይኹን።
ወስብሐት ለእግዚኣብሔር!
ሕቱም-መጽሓፍ!

ደረቐኛ ትውልዲ ብኸመይ ይፈሪ፧

በስመ ስላሴ ይቀጥቀጥ ከይሴ!

ናይ'ዞም ደረቐኛታት ትውልዲ ቀንዲ ምኽንያታዊ ምጭጫሖም፡ ሓደ ኣምስሉ ሰብ ዓብን ቀንድን መምህሮም'ዩ።

ንዝርዝርን ሜላን ትምህርቱ ዝምልከት፥-

√ "ተባዓት ኩኑ!" ኢሉ ዝምህር ንሱ ግን ብፍርሕን ስጋዊ ጥቕማ-ጥቕምን ቤቱ ገዲፉ ኣብ ስደት ተሸጊጡ ይነበር፡፡

√ "ከቢድ ጽዕነት ተሰከሙ!" ኢሉ ዝእውጅ፡ ንሱ ግን ብጫፍ ኣጻብዑ ክትንክፍ ዘይፈቱ፡

√ "ሞትን ማእሰርትን ፈሪሑ ዝሃደመ፡ ንኻልኦት ግን ሰማእትነት "ተዘይከፈልኩም!" ኢሉ ጥሩምባ ዝነፍሕ፡

√ ብጣዕምታት ዓለምን ፍትወታን ዝዘቕበበ ክንሱ፡ ነቶም መናንያንን ዓለም ዝነዓቑን ንጹሓን ደናግል ግን፡  ኣብርእሲ'ቲ ንዓለም ብምምናን ዝኸፈልዎ ዓቢ መንፈሳዊ ዋጋ፡ ከም ኢምንት ብምቕጻር "እዚ ምናኔ'ዚ ኣኻሊ ኣይኮነን፡ ውሒዱ ኣሎ፡ ክትስየፉ፡ ክትእሰሩ ኣለኩም" ብምባል ነታ ንሱ ፈሪሑ ዝሃደመላ ጾር ከሰክሞም ይህቅን፡

√ ኣይኮነን ምሉእ ለይትስ፡ ነዛ ሓንቲ ሰዓት እካ ነቒሑ ክጽሊ ዓቕሚ ዘየብሉ ክንሱ፡ ምስቶም ምሉእ ለይትን ምሉእ ረፍድን ብጸሎተ-ማህሌትን ቅዳሴን  ነብሶም ምስ ፈጣሪኦም ከራኽቡ ዝሓደሩ ኣካላት፡ "እዚ ምግባርኩም ኣኻሊ ኣይኮነን፡ ውሒዱ'ሎ፡ ወስኹ፡ ወስኹ ወስኹ!" እንዳለ ነቲ ዝጸለይዎ ከይተረፈ ዘቃሽሽ።

 √ እረ እናሓንሳእሲ፡ ማህሌት ኣብ ዝግበረሉ ግዜ፡ ምስቶም ማህሌት ዝቖሙ ሰብ ጸሎት ከይቆውም፡ ናይ ባዕሉ ካልእ ማህሌት ይፈጥር። ማለት ከም'ቶም ድኻምን ድቃስን ዝጸቐጦም ሰባት "ደኺመ" ኢሉ ከም ሰቡ ናብ መደቀሲኡ ከይዕዘርሲ፡ በቲ ሓደ ኣንጎሎ ጉጅለ ፈጢሩ ምሉእ ለይቲ ጉጅም ክብልን ክሓምን ይሓድር።

√ ቦትኡን ደረጅኡን ረሲዑ፡ ደረጃን ልዕልናን ካልኦት ንምውራስ፡ ፈላጥን ሊቕን መሲሉ ንኽረአ ልዕሊ ዓቐን ይህቅን።

√ ዕለታዊ ኣብ መስኮት ሜድያታት፡ ተተቐልቂሉ ዓብላልን ተሰማዕን ኮይኑ ክረአ ይደሊ።

√ ነታ ብኣዝዮም ውሑዳት፡ እረ በኣጻብዕ ዝቑጸሩ ትሑታት ሰባት ዝሰረትዋ ቅድስት ቤት ኣምላኽ፡ ከቢድ ጻዕርን መንፈሳዊ ተወፋይነትን ዝኸፈሉላ ቤተክርስትያን፡ ኣብ ክንዲ ሕጂ መጺኡ፡ በቲ ዝረኸቦ ክፉት ናይ ኣምልኾ ዕድላት ኣመስጊኑ፡ ንዓኣ ንምዕባይ ዓቕሙ ዝፈቐዶ እጃሙ ዘበርክት፡ ክብሪ ገዛእ ርእሱ ከርኢ ብምባልን ስሙ ንኸጸውዕን ከም ሕሱም ጎረቤት፡ ኣብ ጥቓ'ዛ ዝጸነሐቶ ቤት ኣምላኽ፡ ካልእ ናይ ገዛእ ርእሱ ክብሪ እተንጸባርቕ ማሕበር ክስርት ሓርኮትኮት ይብል።

√ እረ እነ ገሊኡስ፡ "ንስኹም ምስወዳእኩም ብድሕሬኹም ኣብዛ ቤተክርስትያን፡ ናትና ናይ በይንና ፕሮግራም ክንሰርዕ ፍቐዱልና!" ክሳብ ምባል ይደናደን፡ ብድፍረት ይወሓጥ!!

ወዘተ. ወዘተ. ወዘተ! መልእዎ፡ ካልእ  ብዙሕ ብዙሕ ክጥቀስ ይከኣል'ዩ!

እቶም ኣብ ትሕቲ ወንበረ-ደረቀኛታት ኮፍ ኢሎም ዝመሃሩ መንፈሳውያን ሰባት ድማ፡ 10 ዕጫታት የጋጥሞም። ልዕሊኡ'ውን ክኸውን ይኽእል'ዩ።

1. ልብኻ ካብ ንስሓን መንፈሳውነትን ርሒቕካ፡ ኣገልጋሊ ቤተክርስትያን ምንባርካ ተረሲዑ፡ ናይ facebook ኣገልጋሊ ኬንካ ምትራፍ።

2. ዕለታዊ ሓጢኣትካ ብምዝካር፡ ብፍርሕን ምንቅጥቃጥን ንኽትረግጻ ትብዓት ትስእን ዝነበርካ ቤተ እግዚኣብሔር፡ ትምህርቲ ደረቐኛታት ምስ ሰነቕካ ግን፡ ኣብ'ቲ ቅዱስ ስጋኡን ክቡር ደሙን ዝፍተተሉ ቅዱስ ስፍራ፡ ካብ  ኣራግጻኻ ክሳብ ኮፍ ኣበሃህላኻ ጠገለ ዘየብሉ ይኸውን፡፡ ቅድሚት ኮፍ ምባል ኣዝዩ ዝኸብደካን ዘፍርሃካን ዝነበረ፡ ሕጂ ግን ብድፍረት፡ ክሳብ ናብ ቅድስተ ቅዱሳን ኣቲኻ ነቲ ቀዳሲ ካህን'ውን ከይተረፈ ኣዒይትኻ ከተፍጥጠሉን ኢድካ ከተዋጣውጠሉን ከም እትደሊ ትኸውን።

3. እቲ "ቦ ዘኣስታሕቀረ ዝንቱ ቃለ ቀሲስ፡ ኣው ዘሰሓቀ...!" ዝብል ከቢድ መንፈሳዊ መጠንቀቕታት ናይ ድያቆን ንዓኻ ግን ከምዘይምልከተካ ገይርካ ከምእትሓስቦ ትኸውን።

4. ናይ ቅድሚ ሕጂ ዝነበረ ድምጺ ኣልቦ መንፈሳዊ ኣራግጻኻ ተረሲዑ፡ ሕጅስ ከምኡ ገይርካ እካ ኣብ ጽርግያ ኣይትዘልልን፡፡ ካብዝን ናብትን ዲግ ዲግ ክትብል ክሳብ ክንድዚ ንቤት ኣምላኽ ከምእትንዕቖን ተቃልሎን ትኸውን!

5. ኣዛራርባኻ፡ ዘለፋን ምውጥዋጥ ኣእዳን ዝዓብለሎ ይኸውን። ኣብ ልዕሊ ንጹሓን ኣገልገልቲ እግዚኣብሔር፡ ዝነበረካ ሕፍረትን ትሕትናን ፈጺሙ ይርሳዕ።

6. ኣብ ክንዲ ከም'ቲ ቅድም ኣብ ምጅማር መንፈሳውነትካ፡ ዝነበርካዮን ንኣገልገልቲ እግዚኣብሔር እትህቦም ዝነበርካ ክብርን መመሊስካ ተማዕብሎስ፡ ንሱ ኣሻቡ ተረሲዑ፡ ሰብ ምኻኖም እንካን ፈጺምካ ትዝንግዖ፡፡ መራሕትኻ ብምኻኖም'ውን ጭምር ልዑል ትሕትናኻን ኣኽብሮትካን ተርእዮም ዝነበርካ ተዘንጊዑ፡ ከም ሓደ ምንኣስካ ንእሽቶ ሕንጣይ ቆልዓ ብምሕሳብ ክትዳፈሮምን ክትዝልፎምን ከምዝቐለልካ ትኸውን።

7.እረ እናሓንሳእ ሓንሳእሲ፡ እቲ ከም ሰብ ጥራይ እካ ክቡራት ምኻኖም ተዘንጊዑ፣ ክብርታት ሰብኣውነቶም ጨሪሱ ካብ ልብኻ ተሓኺኹ፡ ትሕቲ ሰብ ሰሪዕካ፡ ኣብ ፌስቡክን ዩትዩብን ብዘይፍቓዶም ስእልታቶምን ድምጾምን ብምልጣፍ፡ ጽርስፍ ውዒልካዮም ከይኣክል፡ ንጸራፊ ኣሕሊፍካ ክትህቦም ከምትውዕል ትኸውን።

8. ኣብ ሕጊ ዓለም፡ ስእልን ምስልን ናይ ሓደ ሰብ፣ ብዘይፍቓዱ ክትዝርግሖ ምስትርከብ ኣዝዩ ከቢድ ዝኾነ ቅጽዓት ኢዩ ዘምጽእ። መንፈሳውያን ሰባት ግን መንፈሳዊ ትዕግስቲ ገይሮም ስቕ እንተበሉልካ፡ ዝፈርሑኻ፡ ነቲ ትብትኖ ዘለኻ ድፍረት'ውን ዘድነቑልካ ክሳብ ዝመስለካ ቸይ-ቸይ ከምእትብል ትኸውን።

9. ንስኻ ንባዕልኻ ጥራይ ካብ ቅድስና ምህዳምካ ከይኣክልሲ፡ ካልኦት ከማኻ ንካህናት ዝጽየፉ፡ ንስሓ ዝሕሰሙ፡ ቅዱስ ቁርባን ጨሪሶም ዘቃርጹ፡ ምስ ፈጣሪኦም ዘለዎም ርክብ ጸሎት ይኹን ካልኦት መንፈሳውያን ግብራት ፈጺሞም ዝርስዑ ኣካላት ከምተፍሪ ትኸውን።

10. ልብኻ መሕደሪ እግዚኣብሔርን ቅድስና ዝዋህለሎን መንፈሳዊ ጎጆ ዝነበረት ተረሲዑ፡ ንሓጢኣትን ድርቅናን ምችእቲ ክትገብራ ትደራደር።

ከም'ዚ ዓይነት ብዝሒ ትውልዲ ኣብ ዘመንና ብብርቱዕ ናህሪ ይውስኽ ኣሎ።

ኣብ ቅዱሳን ናይ ትንቢት መጽሓፍቲ፡-

"በቲ ግዜ'ቲ ወረ ንምስማዕ፡ ነገር ንምርኣይ ናብ`ዝን ናብትን ቀልባዕባዕ ክብሉ ኢዮም።
( ፍካሬ-ኢየሱስ ገጽ 29)

"ዓመት ዝገበሩ ቆልዑ ክዛረቡ ክጅምሩ ኢዮም...። (2ይ እዝራ 6፥21)

"በቲ ግዜ'ቲ ኣብ ማኅፀን ኣዴኦም ከለዉ ዝንቅዉ ኣኽላባት ክውለዱ ኢዮም፡፡ ኣኽላባት ዝተባህሉ፡ ኣኽላባት ኣይኮኑን፡፡ ኣብ'ቲ ግዜ'ቲ ዝውለዱ ሕፃናት ደኣ ኢዮም፡ ኣብ'ቲ ዘመን'ቲ ዝውለዱ ሕፃናት፡ ቃሎም ልዕል ልዕል የብሉ፡ ኣብ ልዕሊ ወለዶም ይትንሥኡ፡ ንወለዶም ኣይእዘዙን፡ ነቦኦምን ነዴኦምን ኣየኽብሩን።"
(ፍካሬ ኢየሱስ ገጽ 31)

"ሓንቲ ሃገር ነታ ጎረቤታ ዝኾነት ሃገር ' ጽድቂ ንባዕላ ወይ ጽድቂ ዝገብር ሰብዶ ርኢኺ ትፈልጢ፧' ኢላ ክትሓታ ኢያ። መልሲ ግና ኩሉ ግዜ 'ኣይረኣኹን!' ዝብል ክኸውን'ዩ።
 (2ይ እዝራ 5፥11)

ዝብሉ ትንቢታት ግዜኦም ዝኣኸለ መሲሉ ይረአ ኣሎ!!
ኦ እግዚኣብሔር ነዞም ናይ ሎሚ ትውልዲ ደቅኻ ኢና`ሞ፣ ብምሕረት ዓይንኻ ጠምተና። 
ለቱ ስብሐት!!!

ዕብየታን ክብራን ናይ ኣዴና ቅድስት ድንግል ማርያም! 1ይ ክፋል

በስመ ስላሴ!

በእንተ ዕበያ ወክብራ ለእግዝእትነ ቅድስት ድንግል በክልኤ ማርያም።

ናሁ ኣነ እነግር  ክብራ ወዕበያ ለእግዝእተ ኩልነ ቅድስት ድንግል በክልኤ ማርያም ወላዲተ ኣምላክ፡ በትሕትና ወበፍርሀት፡ ዘተቀድሐ እምሀበ ትምህርተ ኣበዊነ ቅዱሳን፡  ከመ ይኩን ለዚኣነ በረከተ ሰናየ፡፡ ወለዝንቱ መናፍቃንሰ ዘኣልቦሙ ርትይዕተ ሃይማኖት ይኩኖሙ ተግሳጸ።

-- ንዓና በረኸት፡ ንደፋራት መናፍቃን ድማ ተግሳጽ ይግበረልና።

ሀ)  ስለዕብየትን ልዕልናን ቅድስናን ናይ ኣዴና ቅድስት ድንግል ማርያም፡ ኣብ ቤተክርስትያን ክንገረና እንከሎ፡ ካብቲ ኩሉ ዝኽእል ፈጣሪና፡ ኣምላኻዊ ቃሉ ተቐዲሑ ዘይውዳእ ፈልፋሊ ትምህርተ ቤተክርስትያን ደኣምበር፡ ምድራዊ ፍልስፍና ዘንቀሎ ኣይኮነን።

1. ድንግል ማርያም ቅድሚ ምፍጣር ዓለም ኣብ ሕልና እግዚኣብሔር ተሓሲባ ነይራ።
√ ብኡኡን፡ (( በታ ቀደም ዝተዋህበትና ጸጋን))  ኣድሓነና።
2ጢሞ1፥9-10
-- ኣስተውዕል፡
"ብኡኡ ተዋህበትና " ዝተባህለ እግዚኣብሔርነቱ'ዩ፡ "በታ ቀደም ዝተዋህበትና ጸጋ" እትበሃል ዘላ ግን፡ ናይ ኣዳምን ዘርኡን ግምጃ ኮይና ዝጸነሐት ቅድስት ድንግል'ያ። እግዚኣብሔር ዘድሓነና ብመለኮቱ ጥራይ ኣይኮነን፡ ፐርከስ መለኮት ኣይሓምምን ኣይመውትን'ዩ። እንታይ ደኣ ብተዋህዶ ስጋን መለኮትን'ምበር። ስለዚ እታ ርስሓት ንከይኣትዋ ብመንፈሳዊ ሓይሉ ዓቂብዋ ዝጸነሐ ድንግል፡ ዕለቱ ምስ ኣኸለ፡ እቲ ንጹሕ ኣምላኽ ኣብ ማሕጸና ብመንፈሳዊ ሚስጥር ተቐመመ። ንሕና ድማ ኣምላኻዊ ፍርዱ እካ ብሰንኪ ግብርና ናብ ሲኦል የውርደና እንተነበረ፡ ኣምላኻዊ ምሕረቱ ግን በዛ ተረፍ ቅድስና ኣዳም ዝኾነት ድንግል ካብ ሲኦል ከምእነምልጥ ገበረና። "ነዚ ጥበብ'ዚ ኣንክሮ ይግባእ!" በለ ኣባ ጊዮርጊስ ዘጋስጫ።
ገላ4፣4
√ እግዝእትነ ማርያም ነበረት እምቅድመ ዓለም በሕልና ኣምላክ።
ቅዱስ ኣባ ደቅስዮስ (ግብጻዊ)፡ መቅድመ ተኣምረ ማርያም

2. እግዚኣብሔር ቅኑዕ ፈራዲ ብምኻኑ ንኣዳም ብግብሩ እካ እንተፈረዶ፡  ቅኑዕ ምሕረቱ ንከርኢ ግን፡ ብርሃናዊት ተስፋ ድሕነት ኣብ ሕቖ ኣዳም ኣቐመጠ። ስለዚ ንእግዚኣብሔር "ዘይፈረዶ" ኢልና እንወቕሰሉ ሓይሊ የብልናን፡ ምኽንያቱ ንኣዳም ፈሪድዎ ዩ። "ምሕረቱ ተሰዊራ!" ኢልናውን እንወቕሰሉ ምኽንያት ኣይነበረናን፡ ምኽንያቱ ኣብ ባህሪ ኣዳም ሓንቲ መርገም ዘይሓለፈ ንጽሕት ተረፍ ቅድስና ኣትሪፍልና'ዩ እግዚኣብሔር። ምሕረቱ ኣብዚ እነሃ ተገሊጻ። ቅዱሳን ድማ ብዛዕባዛ ተረፍ ቅድስና ኣዳም ዝኾነት ድንግል፡ ብዝተፈላለየ ምሳሌ ትረኣዮም ስለዝነበረት፡ ኣኣብ ዝነበርሉ ዘመን በብጸገኦም ተነበዩላ። "ኢሳይያስ ተረፍ ተዘይሓድገልና..." በለ፡ ጳውሎስ ድማ "ንዑኡ ኣመስገንቲ ንክንከውን ቅድሚ ምፍጣር ዓለም ሓረየና!" ኢሉ ተርጎሞ። ሕርየት፡ ካብዝን ካብትን ኢልካ'ዩ። እግዚኣብሔር ንሰብ ድሕሪ ምፍጣር ዓለም ፈጢርዎ ከብቅዕ፡ ቅድሚ ምፍጣር ዓለም ግን ሓረዮ፡ ማለት ካብ ኩሎም ፍጥረታት ኣብሊጹ ሓለኖ። ስለዚ ኣዳም  ብውድቀቱ እካ ክብሩ ትሕቲ ኩሎም ፍጥረት ብምኻኑ ብኹሎም እንተተናዕቀ፡ በታ እግዚኣብሔር ኣብ ባህሪ ኣዳም ዓቒርሉ ዝጸነሐ ተረፍ ቅድስና ግን ሕርየቱ ብምኽንያት ድንግል ማርያም ልዕሊ ኩሎም ኮይኑ ክቕጽል ጸነሐ።
√ ኢሳ 1፥9፡ ኤፌ1፥4, 2ጢሞ1፡9-10
√ ከም ዕንቂ ባሕሪ ኣብ ከርሰ ኣዳም ኮይና ተበህ ነበረት።
ቅዱስ ያሬድ ማህሌታይ

3. ቅድስት ድንግል ማርያም ጥንተ ቅድስና እምበር ጥንተ ኣብሶ የብላን።
-- "ጥንተ" ዝበሃል ዘሎ፡ ኣዳም ቅድሚ ምውዳቑን ድሕሪ ምውዳቑን ዘመልክት ትረኻ'ዩ። ኣቦና ኣዳም ቅድሚ ምውዳቑ ቅዱስ ንጹሕ ገይሩ እግዚኣብሔር ብጥበቡ ፈጠሮ፡፡ በዚ ድማ መላእክት ብክብሪ ዓጆቦም ኣኽበርዎ፡ ኣብ ገነት ድማ ን7 ዓመታት ብቅድስና ከቢሩ ጸነሐ።
ቀሌመንጦስ 1፥38፡ ኩፋሌ 4 ተመልከት፡
--ምስ ወደቐ ግን ክብሩ ብፍርዲ እግዚኣብሔር ተነጥቀ። ስለዚ ድንግል ካብቲ ጥንታዊ ቅድስና ኣዳም ድኣ እምበር፡ ካብቲ ድሒሩ ዝመጸ ኣበሳ ኣዳም ሒዛ ኣይተወልደትን። ምኽንያቱ እግዚኣብሔር ካብቲ ኣምላኻዊ ፍርዱ፡ ብኣምላኻዊ ጥበቡ ከምእተምልጥ ገይርዋ ኢዩሞ።

√ እግዚእትነ ማርያም ትነጽሕ እመላእክት፡ እግዝእትነ ማርያም ትዓቢ እምኩሉ ፍጥረት።
እመ ቤትና ማርያም ካብ መላእክት ትነጽሕ፡ ካብ ኩሉ ፍጥረት ድማ ትዓቢ።
-- ዕብየታን ንጽሕናኣን ልዕሊ ኩሉ ፍጥረት፡ ግን ከኣ ትሕቲ ፈጣሪ ኢልካ ንምንጋር ደኣምበር፡ መላእክት ኣበሳ ስለዘለዎም ኣይኮነን ካብ መላእክት ትነጽሕ ዝበሃል ዘሎ።
መቅድም ተኣምረ ማርያም ተመልከት፡ ቅዱስ ደቅሲዮስ (ግብጻዊ ኣቦ)

4. ቅድስት ድንግል ማርያም ጥንታዊት ቅድስና ሒዛ እምበር፡ ጥንታዊት በደል ሒዛ ኣይተወልደትን።
√ ንስኺ ግን ንኹለን ትበልጽየን ኢኺ፡ ምሳ31፥29
√ ሐረያ እግዚእ ለጽዮን ከመ ትኩኖ ማህደሩ፡ መዝ132፥13
-- "ሐረያ!" ዝብሃል ዘሎ፡ መዓስ ሓርይዋ ብዝብል ገጽታ፡ ናብቲ ጥንተ ፍጥረት ኣዳም ይወስደና። ገለ ገሌኦም፡ " ከመይ ኢልካ፡ "ከይተወልደት እንከላ ሓርይዋ" ብምባል ንእግዚኣብሔር መዳለዊ ትገብሮ ኣለኻ!" ዝብሉ ኣለዉ። እሞ እንታይ  ንበል፡ እግዚኣብሔር ንኹሉ ምሉ ምልኣታዊ ባህሪ ኣዳም ፈሪድዎ'ዩ፡ እንተበልና ደኣ፡ ምሕረቱኸ ኣይዘንጋዕናዮንዶ፧ ቅዱስን ልዕሊ ኩሉን ገይሩ ንኣዳም ብመልክዑ እንክፈጥሮ መዳለዊ ዘይተባህለስ፡ ሕጂ ተረፍ ቅድስና ኣዳም፡ ኣብ ሕቖኡ ስለዘቐመጠ ክንቅልቀፍ? በጭራሽ!! በዚስ ንጥበበ እግዚኣብሔር ንንእዶ እምበር፡ መዳሊዊ ኢልና ኣይንነቕፎን።

√ ጸጋ ረኺብኪ ኢኺ'ሞ ኣይትፍርሂ።
-- ((ኣስተውዕል " ጸጋ ክትረኽቢ ኢኺ" ኣይኮነን ዝብል'ዘሎ ቅዱስ ገብርኤል። ገና ጥንሲ እንከይተጀመረ ንሳ ግን ኣብ ዘመነ ብሉይ ኪዳን ጸጋ ረኺባ ስለዝጸነሐት'ዩ ዘመስግናን ዘበስራን ዘሎ ።))
ቅዱስ ገብርኤል መልኣኽ።
(ሉቃ1፥30)

5. ትምህርተ ኣበው ቅዱሳን፡-

√ ኢያእመረ እስመ ዘተፈጥረት እምነ ጽቡር ወጽሩይ ትከውን መቅደሶ ለእግዚኣብሔር።
-- ካብ ንጹሕ ጽሩይ ዘርኢ ዝተፈጥረት ኮይና፡ ንእግዚኣብሔር መሕደሪኡ ከምእትኸውን ኣይፈለጣን።
ዘኢራቅሊስ ናይ ቆስጠንጥንያ ኤጲስቆጶስ ዝነበረ ኣቦ
ሃይማኖት ኣበው48፥31
- ብዛዕባ ፈሊጥ ናይ ጻድቅ ዮሴፍ'ዩ ዝትርኽ ዘሎ። ታሪኹ ኣብ ወንጌል ኣለና፡ ጸኒሳ ስለዝጸነሕት፡ እንታይነታዊ ክብራን ቅድስናዊ መንነታን ክርደኦ ኣይከኣለን። ንሳ ካብ ዘርኢ ሰብኣይ ከምዘይምኻኑ እቲ ጽንሲ ነጊራቶ'ያ፡ መልኣኽ ድማ ብሕልመ ለይቲ ክሓድጋ ከምዘይብሉ ምስ መጠንቀቕትኡ ኣረዲእዎ'ዩ። እምበኣር ዮሴፍ ኣረጋዊ፡ ክሳብ ኣብ ቤተልሔም ንጎይታ እትወልዶ ክብራን ዕብየታን ክርደኦ ብዘይምኽኣሉ፡ "ኣይፈለጣን!" ተባሂሉ ደጋጊሙ ተነግረ። ቅዱስ ዘኢራቅሊስ ድማ ስለቲ ቅድመ ምጽናሳ ዝነበረ ክብረ ቅድስናኣ ብሓጺር ገለጻ፡ ነዊሕን ሰንሰለታውን ጽሩይነታ ተረኸልና።

√ ወሐደረ በከርሰ ማርያም ድንግል ንጽሕት ወትረ ወጽሩት እምቅደመ ድንግልናሃ።
-- ኣቐዲማ ቅድሚ ምጽናሳን ድሕሪ ምጽናሳን ድንግል ንጽሕቲ ጽርይቲ ኣብ ዝኾነት ኣብ ማርርያም ድንግል ሓደረ።
ቅዱስ ዘሚናስ ዘእስክንድርያ ሊቀ ጳጳስ (ግብጻዊ)

-- ቅድሚ ጽንሰት ብሉይ ኪዳን'ዩ፡ ካብታ "ከምቲ ዝበልካዮ ይዂነለይ፡" ዝበለትላ እዋን ኣትሒዙ ግን ሓዲስ ኪዳን ጀመረ፡ ስጉው ቃል ኣብ ማህጸና ንድሕነት ደቂ ኣዳም ክስጎው ጀመረ። ስለዚ ቅዱስ ሚናስ፡ "ነየናይ ቅድስናኣ'ዩ ዘድንቕ ዘሎ?"  ኢልና እንተሓቲትና ነቲ ቅድሚ ምጽናሳ ዝነበረ ቅድስና ምኻኑ የረድኣና'ሎ።

√ ዕበያ ለድንግል ኢትከሀል ለተነግሮ እስመ እግዚእ ሐረያ ወመጽአ ወሐደረ ላዕሌሀ።
-- ዕብየታ ናይ ድንግል ክንገር ኣይከኣልን'ዩሞ፡ ጎይታ ሓርይዋ መጺኡ ድማ ኣብ ልዕሌኣ ሓደረ።
ቅዱስ ኤፍሬም ሶርያዊ
ውዳሴ ማርያም ዘሰሉስ
-- ቅዱስ ኤፍሬም ሶርያዊ ንናይ ገብርኤል መልኣኽን ቅድስት ኤልሳቤጥን ምስጋና ምርኩስ ብምግባር ተመሲጡ፡ ንዕቤተ ድንግል ብኣደነቕቲ ቃላት ይነግር ኣሎ።

√ ተፈስሒ ኦ ሙዳይ እንተ ኣልባቲ ነወር ፍጽምት ዘኣልባ ርስሐት።
-- ኣንቲ ኣበርን ርስሓትን ዘየብልኪ ፍጽምቲ ሙዳይ ተሓጎሰ ደስ ይበልኪ።
ቅዱስ ኤፍሬም ሶርያዊ፡ ውዳሴ ማርያም ዘረቡዕ
-- ቅዱስ ኤፍሬም '?"ነዚ ንድግል ዝወሃብ ምስጋናን ኣድናቖትን ካበይ ወሲድዎ፥ መን'ዩ ምሂርዎ?" ኢልና እንተሓቲትና፡ ካብ ቅዱስ ገብርኤል መልኣኽ'ዩ ተማሂርዎ። ነታ
"ኦ ምልእተ ጸጋ"  እትብል፡ ዘርዚሩ ዝተርጎማ'ዩ።

√ ብኪ ግርማ ራእይ ዘየዓቢ እምግርማ ኪሩቤል እለ ብዙሐን ኣዒንይንቲሆሙ፡ ወሱራፌል እለ ስድስቱ ከነዲሆሙ።
ቅዱስ ያሬድ ማህሌታይ፡ ኣንቀጸ ብርሀን
-- ግርማኺ ካብ ግርማ ኩሩቤል ብዙሓት ዘዒንቶም፡ ሱራፌል ሽዱሽተ ዘኽናፎም ይዓቢ።
-- እግዚኣብሔር ብባህሪኡ ካብ ማንም ዘየምጽኡ፡ ማንምውን ክወስደሉ ዘይክእሉ ገንዘቡ ዝኾነ ኣምላኻዊ ግርማ ኣለዎ። እዚ ኣብን ወልድን መንፈስ ቅዱስን ሓደ ኣምላኽ ማለተይ'የ። ኩላቶም ፍጥረቱ ድማ በበቲ ዝሃቦም ናይ ጸጋ ክብሪ፡ ንሓድሕዱ ዝበላለጽ ግርማ ኣለዎም። ድንግል ማርያም ግን እግዚኣብሔር ጥራይ ደኣሉ ብኣምላኻዊ ግርማኡ ዝበልጻ እምበር፡ ግርማኣስ ልዕሊዞም ተሰምዮም ዘለዎ ኪሩቤልን ሱራፌልን እረ ልዕሊ ኩሉ ፍጥረት፡ ናይ ኣደ ኣምላኽ ምኻን ግርማ ዝተዓደለት ምኻና የዘንቱ ኣሎ ቅዱስ ያሬድ ማህሌታይ።


√ ኣኮ ዘተኣምሪ ርስሐተ ከመ ኣንስት እለ እምድሕሬኪ ወእምቅድሜኪ።
-- ከምተን ድሕሬኽን ቅድሜኽን ዝነበራ ኣንስቲ ርስሓት ኣይትፈልጥን ኢኺ።
ቅዱስ ኣባ ህርያቆስ፡፡ ቅዳሴ ማርያም፡
-- ድሕሬኣ ዝተወልዳ ናይ ሓዱሽ ኪዳን ደቀንስትዮ ኢየን፡ ቅድሜኣ ዝነበራ ድማ ናይ ብሉይ ኪዳን'የን። ከምኣተን ርስሓት እትፈልጢ ኣይኮንክን ኢሉ የድንቓ ኣሎ ቅዱስ ህርያቆስ።

ጣዕመ ፍቅራ ወበረከታ ይክፈለነ።
እግዚኣብሔር ብፍቕሩ ምስ ቅዱሳኑ ይደምረና።
ወስብሐት ለእግዚኣብሔር።
2ይ ክፋል ይቕጽል።
√ ሕቱም-መጽሓፍ

ዘመነ ሓዊ-ሓሰር

በስመ ሥላሴ!
ሞልቂ-2005

2005 ኣቢሉ ይኸውን ምስ ሓደ ኣዝየ ዘፍቅሮ ዓርከይን መታዓቢተይን፣ ``ግጥሚ ንጽሓፍ`ሞ  መንና ቀልጢፉ ዝጸበቐት የዳሉ`` ተባሃሂልና፣ ውዕውዕ ክልቲኣዊ ውድድር እንከነካይድ ሕጂ ይዝከረኒ። ኣብቲ እዋን`ቲ፡ ቤት ትምህርቲ ካልኣይ ደረጃ ሞልቂ ጅሃን፡ ውዕዉዓት ተመሃሮ ዝጠርነፈት፣ ብስፖርታውን ስነ-ጥበባውን መዳይ ድማ ነቲ ዝነበረ ሓፈሻዊ ሕጽረታትን ኩነታትን ኣብ ግምት የእቲኻ፡ ''ከባቢ ንኡስ ዞባ ሞልቂ ኣዝዩ ጸላውን ትስፉውን ትውልዲ ኣፍርያ``፣ ኢልካ እትሕበነሉ መድረኽ ዝቐረበ መሲሉ ይረአ ነይሩ ።ክቡራት ኣንበብቲ ናብ'ቲ ናይ ሽዑ ወቕቲ ክመልሰኩም።  ቅንያቱ በቶም ናይ ሞልቅን ከባቢኣን ተምሃሮ፣ ዝተፈላለየ ኣካላውን ስነ-ኣእምሮኣውን ንጥፈታት ዘካተተ ውድድራት ዝካየደሉ እዋን ብምንባሩ፣ ኣነ ከም ሰበይ  በተን ሽዑ ዝሕንጥጣ ዝነበራ ኣእዳወይ ገይረ፣ ምስቶም ሞዛነይ ንውድድር ኣብ ጽዑቕ ልምምድ ግጥምን ስነ ጽሑፍን ኣትየ ምንባረይ ትዝ ይብለኒ። ብምፍላይ ምስ'ቲ መጋጥምተይ ገጣማይ ኴነ፣ ኣብታ ንሱ ተኻርይዋ ዝነበረ ናይ ስካፕሊ ንእሽቶ ቤት ኮይንና፡ ሓጻርን ጽዕጽዕትን ናይ ልምምድ ግዜ ዘሕለፍናያ ህሞት ሕጂ እንክዝክራ ገለ ጦብላሕታ ፈጢራትለይ ኣላ። 

ስሙ ንግዚኡ ዓቂበ ናብቲ ናይ ሽዑ ቊምነገር ክወስደኩም። እቲ መስርሕ ሓባራዊ ዝኾነ ዛዕባ ኣልዒልካ ንዑኡ ዝምልከት ምጽሓፍ ኢዩ ነይሩ። መቸም 'ነቲ ሽዑ ዝጸሓፍክሞባ ንኹሉ በበሓደ ንገረና' ተትብሉኒ፡ ምስ ምንዋሕ ግዜ፡ ንዂሉ'ውን ኣብ ግምት የእቲኻ፡ ሸምዲደ ንምዝካር ዓቕሚ ይሓጽረኒ ምኻኑ ርዱእ`ዩ፣፣ ብሓጸርቲ ደቓይቕ ኣብ ሓደ ዓንኴል ዛዕባ ዝገበረን፡ክልቲኣትና ንናይ ክልቲኣትና ልምምድ ዘቕረብናዮን ስለዝዀነ ግን፡ ዋላ ደኣ ትሕዝቶ'ተን ግጥምታት ኣይዘክሮ'ምበር፡ ፍረ-ነገረን ንዓቕሚ ኣእምሮና ዕጋበት ከምዝፈጠረሉ፡ ብኡኡ መጠን'ውን በበቲ ዝጸሓፍናዮ ገጽታ፣ ሕድሕዳዊ ስሓቕን ወኻዕታን ከምዝሰነቕና ኣይርስዖን'የ።

ናብ`ዚ ናይ ሕጂ ጉዳየይ ክኣቱ፣፣ እታ ሽዑኡ ንግጥሚ ኢልና ዝመርጽናያ ኣርእስቲ፣ '' ሓውን ሓሰርን!`` ኢያ ትብል ነይራ። ድማ `ኣብዚ ሕጂ እዋን በበዚ ዘለኹሞ ህሉው መድረኽኩም ኣብ ግምት የእቲኹም ዘለኩም ርድኢት፣ "ሓውን ሓሰርን ዝብል  ከም ቀንዲ ኣርእስቲ ጔርኩም ጸሓፉ" ተንበሃል መቸም፣ ንባዕሉ እዚ ዘለናዮ ወቕቲ ነዚ ኣርእስቲ ዝመጣጠን ስለዝኾነ፣ ቃላት ክንመርጽ ምጸገመና ኣይብልን`የ።  ምኽንያቱ ሓንቲ ፊደል ክንጽሕፍ ከይጀመርና እኳ፣ ባዕሉ ኣፍ ኣውጺኡ እዚ ግዜ ዝንበብ ጽሑፍ ምኾነልና ይብል ኣነ።

ተመልከቱ!

ኣብ መንፈሳውን ስጋውን ዓለም ዘሎ ናይ ሎም ትውልድና፡ ሓውን ሓሰርን መሲሉ ንሓድሕዱ ክረአአ ካብ ዝጅምር ነዊሕ እዋን ኣቕጺሩ`ሎ። ሓዴኦም ዓብላሊ፣ ሓዴኦም ጠፋኢ ንምኻን ኣብ ቅልስ ዘለዉ እንክመስሉ፣ ምስ ሓውን ሓሰርን ይመሳሰሉ'ለዉ። ኣብ ዓድና `` ጽርዲ!`` ዝበሃል ናይ ቁልዕነትና ኣበሃህላ ኣሎ፣ ጽርዲ ማለት ኣብ ግዜ ህጻንነት ተጠቃምነት ዝረክብ ኣበሃህላ ኴኑ፣ ኣይተሕምቖ፣ ኣየሕምቐካ፣ ወትሩ ጽልእ ኮይንካ ምንባር ማለት`ዩ። ንስኻ ትመልኽ ተኾይንካ፣ እቲ ሓደ ተንከስ ኢሉ ኣንጻርካ ክለዓል ኣይክእልን`ዩ። ብመጠኑ ሓዴኻ ዘሕምቕ ኮይኑ`ተጸኒሑ ግን፣ ካብ ጽርዲ ምዃን ዝፍለየሉ ባእታ'ሎ። እዚ ከኣ ኣብ መንጎኻ ግዝያዊ ሰላም ሰፊኑ ስለዝረአ`ዩ፣፣ ማለት ንሓድሕድካ ኣይትባላዕን ኢኻ፡ ኣይትተሃራረምን'ውን። ንስኻ ስለትመልኮ 'ክሃርመኒ ኢዩ' ዝብል ስክፍታ ከይሃለወክ ቀሲንካ ትሓድረሉ መድረኽ'ዩ። ንሱ`ውን ስለተሕምቖ 'ተዘይተኸራኸርክዎን 'ተዘይፈጋእክዎን' ኢሉ ከዕገርግር ዕድሚኡ ኣይከስርን'ዩ። ጽርዲ ምዃን ግና ሰላም ዝበሃል የብሉን። ነፍሲ ወከፍ ኣብ እትራኸበላ ግዜ በብዝጥዕመካ ምቱዃስ`ዩ። በቃ በብዝተራኸብካሉ ትበኣስ ካብ ኰንካስ ዘይምርኻብ ትምነየሉ ኣጋጣሚ'ሎ። ምስ ጎበዝካን ኣብ ስብእናዊ ዕድመ ምስ በጻሕካን ግን፡ ዂሉ ጽልእታት ናይ ቁልዕነት ኣሻቡ  ስለዝርሳዕ፣ ወኻዕካዕ እናልካ መዕለልን መስሓቕን መታን ክኾነካ እናዘከርካዮ ኢኻ ትነብር። 

ኣብ'ዚ ምዕቡል ዘመነ-ዓውላማ፡ ጉዳይ ጽርዲ ምዕራፍ ክልተ፡ ሕጂ እንደገና ጀሚሩ ዝያዳ ጎሊሑ ዝረአ ዘሎ ይመስል። ዘመነ ጽርዲ በቲ ዘገርም መልክዑ፣ ከም ሓውን ሓሰርን ብናህሪ ክጎብጠና ደልዩ እነሆ።  ሕብረተ-ሰብና ንሓድሕዱ፡  ብቂም በቐል፣ ክባላላዕ ተሃንዲዱ፣ ክርቢት ከነቐብሎ ኣእዳዊ ዊጥ ዘበለ መሲሉ ክረአ ካብ ዝጅምር፡ ቀሊል ግዜ ኣየቕጸረን። ክልተ ኣሕዋት፣ ክልተ ሰብ ሓዳር፣ ክልተ ስድራ፣፣ ክልተ ኣዝዮም ሕፉራትን ክቡራት ቤተሰብ፡ ክወናጀሉ፡ ክወቓቐሱ፣ ክናኸሱ፣ ክጸራረፉ፣ እናሻዕ ብዘርእይዎ ሕድሕዳዊ ቂም በቐል፣'ንሓውን ሓሰርን' ዝሓለፍዎም ዝመስልሉ ግዜ እናበዘሐ ይመጽእ ኣሎ። ደረስቲ ክልተ ገጸ-ባህርያት ናይ፡ "Tom and Jerry", William Hanna and Josuph Barber, 1940-1958, ነዚ ኣብ`ዚ እዋን ዘሎ ናይ ትውልድና ገጽታ ኣንቢቦም ዝተረድኡ ይመስሉ። እዞም ክልተ ደረስቲ፡ ናይ ኣንጭዋን ድሙን ባሕርያት'ዮም ኣብ ትራጀዲ የእትዮም ዝምህሩና። ንዓይ ግን ንሕና ደሪስና ባዕሉ ህሉው ሕይወትና ዝዋስኦ ዘሎ'ዩ ዝመስለኒ። ወለዶና ሓደ ነቲ ሓደ ከጥፍእ ይህንደድ ኣሎ። ክልተ ፍጹም ጽልኢ ክጸላልኡ ትርኢ`ሞ፣ በቲ ድማ ተኣኪቦም `` ንሕና ናይ ሰላም ኢና፣ ዕርቂ ኣባና`ዩ ሰፈሩ፣`` ዝብል ዜና ካብ ኣፍ ክልቲኣቶም  ክፍኖ እንክትሰምዕ። ኣርምም የብለካ፡ ንኣርመምቲ ክትህቦ'ኳ ኣይትጸልእን።

ዳርጋ ኲሉ ግዜ ክትብል ትደፍር፣ ሓውን ሓሰርን እንተተራኺቦም፣ ሰዓርን ዓብላን ኮይኑ ዝወጽእ ሓዊ`ዩ። ``ንጣር ቁልዒ ንምሉእ እምባ ዘባርዕ ሓይሊ ኣለዋ፣`` ዝብል ኣበሃህላ ኣሎ። እቲ ዘገርም ግን ክበኣሱ እንከለዉ፣ ናይ ክልቲኣቶም ህልውና የብቅዕ ምዃኑ`ዩ። ሓሰር ናብ ሓሙዂቲ፣ ሓዊ ድማ ናብ ቃህሚ ተለዊጡ ቅሂሙ ይጠፍእ። ባርዕ ንዂሉ እምባታትን ጎላጉን ኣቃጽሉ ምስወደአ፣ ንባዕሉ ሓሙኽሽቲ ኰይኑ ይተርፍ ምዃኑ ይገርመካ። ክልቲኣቶም ክህልዉ እንተኾይኖም፣ ከይተታኾቡ፣ እቲ እሳትንቱን ንገዛእ ርእሱን ዓቒቡ፣ እዚ ድማ ሳዕርነቱ ከይበተነ ብሓደ ተጠርኒፉ ምስ ዝነብር'ዩ፡፡ በዚ መስርሕ'ዚ፡ ህልውና ክልቲኣኣቶም ኣብ ምልክት ሕቶ ክኣቱ ኣይምኸኣለን። እታ ምስዚ መታዓቢተይ ብዘመን ቊልዕነትና፡ ኣብ 2005 ዘልዓልናያ ኣርእስትስ ለካ፣ ብዛዕባኣ ንምሕንጣጥ ' ካብ ሽዑ ዝያዳ ሕጂ ምመቸአት'  ክብል ምደፈርኩ። 

ዓለምና፣ ንሓጢኣንን ጻድቃንን፣ ሃብታማትን ድኻታትን፣ ሕሱማትን ሕያዎትን፣ ኣመንትን ከሓድትን፣እሱራትን ውጹኣት ሓራን፣ ተንኰለኛታትን ገርህታትን፣ ቀተልትን መሓርትን፣ ጮቆንትን ፍትሓውያንን፣ ዘሞውትን ደናግልን፣ ምሁራትን ጭዋታትን፣ እንስሳታትን ሰባትን ክሓቁፍ ዝኽእል እኹል ጎጆ ኣለዋ። ክንዮ`ዚ`ውን ብስጋ ምስ ዓረፍና ከይተረፈ፣ ኣብ ከርሳ ክትዓቚረና ዘኽእል ኣዝዩ ሃብታም ዝኾነ ውሻጠ ኣለዋ። እቲ ዘገርም ግን፡ ኩሉ ወድ ሰብ ነባሪ ዘይምኻኑ እናፈለጠ፣ ሕልፊ ሰቡ ኣብዛ ዓለም ዝነብር መሲልዎ፡ ናይ ካልኦት ክብርታት ክነጥቕ ይነብር ምህላዉ ኢዩ። እዚአብሔር ድማ ነዛ ኢዱ ዝፈጠረታ ዓለም፣ ሓደ ኣብ ልዕሊ ሓደ በብዕለቱ ክሓንን እኳ ይርኢ እንተሃለወ፡ ምስ ምሉእ ትዕግስቱ፡ መን ይኹን መን ብዘየገድስ፡ እዛ ዓለም ክሳብ`ቲ ዝተመደበላ ዕለት ብዘይ ነግ ፈረግ ንዂሉ ወዲ ኣዳም ክትጸውር ከምዘለዋ በዓንተዉኡ ኣዘዘ። ግዜኣ ኣኺሉ ምስ ኣረገት ግን፡ ከም ሓሙኽሽቲ ክትበንን'ያ። ንዓና ንኹላትና ናብ ዋናኣ ተፊኣ ንፍርዲ ኣሕሊፋ ክትህበና ምኻና ፈሊጣ ድማ፡ እነሃ ብስቕታ ንምጽኣተ እግዚኣብሔር በዓቕሊ ትጽበ`ላ።

እግዚኣብሔር ሕድሕዳዊ ፍቕርን ስኒትን ክህልወና ሓይሉ ይልኣኸልና!!

ሕቱም-መጽሓፍ፣

ኣፍቀርትና እናወሓዱ፡ ጸላእትና እንዳበዝሑ ይኸዱ ኣሎዉ!

በስመ ስላሴ!

ኣፍቀርትና እናወሓዱ፡ ጸላእትና እንዳበዝሑ ይኸዱ ኣሎዉ!

√ ጠንቁ ዘፍቅረና ሰብ ስለዝተሳእነ ኣይኮነን፡ ብሓቅን ብምሉእ ልብናን እነፍቅሮ ስለዘየብልና'ዩ።
√ ጸላእቲ ስለዝበዝሑና ኣይኮነን፡ ልብና እትጸልኦም ስለዝበዝሑ'ዩ።
√ ቁጽሪ ተጻረርትና ስለዝበዝሐ ኣይኮነን፡ ንህልኽ እንምነዮም ኣካላት ባዕልና እንዳብዛሕናዮም ንመጽእ ስለዘለና'ዩ።
√ ቃል ጸላእትና ንከይምቅር ዝገበሮ ወጥሪ፡ ልሳንና ጥዑም ቃል ንኸይተውጽእ ስለዝተሓረማ'ዩ።
√ ኩሉ ኢዱ ዘወጣውጠልና ዘሎ፡ ኣእዳውና ናብ ብዙሓት ስለዝወጣወጣ ኢየን።

√ መን ኣብ ልዕሊ መን ክፈርድ፧

√ ኩሉ ፈራዲ ተዝኸውን ዝፍረድ ምተሳእነ ነይሩ።
√ ኩሉ ተፈራዲ ተዝኸውን ድማ ዝፈርድ እምበይምሃለወን።
√ ፈጣሪ ግን ንኹሉ በብመስርዑ ገይሩ ብጥበቡ መደቦም።
√ ኣብ መንጎና ብዙሓት ዳነይቲ ኣሎዉና፡ ብዙሓት ድማ ተጸበይቲ ፍርዲ ኣሎዉ። ዓይነቶም ጥራይ ኢዩ ዝፍለ።
√ ኩሉና ፈራዶ ኣይኮንና፡ ፈራዶ ዘይክንስና ድማ፡ ብኢደ-ዋኒንና ዝፈረድናዮም ኣካላት መሊኦም'ዮም፡፡ ንሱ እዚ ዝፈረድናዮ ሰብ'ውን ክፈርደና ወይ ኣሕሊፉ ንፈራዲ ክህበና ባይህርያዊ ኢዩ።

√ እምበኣር ፍርዲ ንፈራዲ ንሃቦ። ኣብ መንፈሳዊ ዓለም ንፈራድነት ዝተረቕሑ ኣካላት ኣለዉ፡ ኣብ ማሕበራዊ ዓለም ድማ ንዳንነት ዝተመደቡ ሰባት ኣለዉ። ነዚ ደረጃ'ዚ ክቕመጥዎ ዝኸኣሉ ብዘይፍላጥ እግዚኣብሔር ኣይኮነን። ንሕና ምስ'ዞም ፈራዶ'ዚኣቶም ዘይተመደቡ ኣካላት ክሳብዝኾንና ድማ፡ ኢድና ኣይነወጣውጥ፡ ኣፍና'ውን ኣይንረምጥጥ! ተኸኣልና ግን ንኹሉ ብዓይኒ ፍቕሪ እንዳጠመትና ንተሓጋገዝ፡፡ ተዘይከኣልና ድማ ልብና ጽልኢ ንኽትጭንጉዕ ኣይንደፋፍኣያ ።

√ ጠንቂ ቁጽሪ ጸላእትና እንዳበዘሐ ምምጽኡ፡ እቶም ተጻረርትና፡ ንኽጸልኡና ካልእ ብዙሕ ምክንያታት እካ እንተሃለዎም፡ ናይ ልብና ዘይምህራህ'ውን ንቅርሕንቶም ከምዝንህር ይገብሮ'ሎ።
√ ልብና ብዝጨከነትሉ ቁጽሪ ከኣ፡ ብዝሒ ጸላእትና እናዛየደ ከም ዝኸይድ ይገብሮ ።

√ ክርስትና ናይ ርህራሄ ጎደና እምበር፡ ንዕቀትን ኣሽሙርን እተርእየሉ ናይ መድረኽ ድራማ ኣይኮነን።
√ ክርስትና ንኹሉ ከም ፈጣሪ ብዓይኒ ፍቕሪ እትመዝነሉ መንፈሳዊ መነጸር'ምበር፡ ብሌላን ጉሌናን እትሕመሰሉ ናይ ዓሌታውያን ከይዲ ኣይኮነን።
√ መጽሓፍ ቅዱስ "ነቶም ዝጸልኡና ክነፍቅሮም!" ኣዚዙና፡ ንሕና ደቂ ሰባት ግን እቶም ዝጸላእናዮም ኣካላት፡ "ስለምንታይ ዘየፍቀሩና፧" ኢልና ነጉረምርም።

√ ክርስቶስ ኣምላኽና፡ ንዓና ንእንጸልኦ ሰባት ክሳብ ኣብ መስቀል ምስቃል፡ እረ ክሳብ ናብ ሲኦል ብምኻድ ፍቕሩ ገሊጹ፡ ብቃልን ብግብርን ኣርኣየና። ንሕና ደቂ ሰባት ግን እቶም ዘዋረድናዮም ሰባት ከፍቁሩና ንደሊ።

√ ኣይፋሉን! ንሕና መን ሰዓረ፡ መን በለጸ ኢልና እንተሃላለኸሉ ምኽንያት የብልናን። ልዕሊ ኩሉ እግዚኣብሔር ይበልጽ፡ ኣብ ትሕቲኡ ድማ መርዓቱ ቅድስት ቤተክርስትያን ኣላትና። ኣብኣ ኣእላፍ ቅዱሳን ምስ ቅድስት ኣዴኡ ብሕብረት ኣለዉልና።

ንሕና ኩልና፡ ንሳ እዛ ቤተክርስትያን ምስ ፈጣሪ ስለዘላለየትና፡ "ልዕሊኣ'የ!" ኢልና እንንየተሉ ዓቕሚ የብልናን። እረ ብሓጢኣት ዝዘቕበብና፡ ፍርድን ቁጥዓን እግዚኣብሔር ዝግበኣና እምበር፡ ናብ ቤቱ ክንሳጉምን ንስሙ ክንጽውዕን ዘይንበቅዕ ምኻንና ክርደኣና ኣለዎ። እዚ ተገይርና ድማ ሓጢኣትን ቁስልን ካልኦት ኣይክነድህበሉን ኢና። ሓጢኣትና ረሲዕና፡ ሓጢኣት ካልኦት ንምዕዛብ ናብ ቤቱ ንግስግስ ተሊና ግን፡ ሕማም ክንውስኽ ተዘይኮይንና፡ እንፍወሰሉ መገዲ እንዳጸበበ ክኸይድ'ዩ።

√ ናብ ሕክምና ዝኸዱ ስለስተ ዓይነት ሰባት ኣለዉ።

1) ሕሙም-ክሕከም ዝደሊ!
2) ሓጋዚ ሕሙም- ንመቕረቡ ናብ ሕክምና ወሲዱ ከርእዮ ዝደሊ።
3) በጻሒ- ኣብ ሕክምና ንዘሎ ብጻዩ ክርኢ ዝኸይድ።

ካብዞም ሰለስተ ዓይነት ሰባት፡ እቶም ክልተ (1ይን 2ይን) ይመሳሰሉ።(1ይ) ዝሓመመ ሰብ፡ ሕማሙ ጥራይ ስለዝረኣዮ፡ ኣብ ሕክምና ከይዱ ናይ ካልኦት ቁስሊ ረርእዩ ንክጽየን ልቡ ኣይእዝዞን'ዩ። ብኸመይ ይሓዊ ዝብል ስምዒት'ምበር፡ ናይ ካልኦት ሕማም ዘስተብህል ኣእምሮ ኣይህልዎን'ዩ።
(2ይ) እቲ ንመቕረብ ንሕክምና ከርእዮ ሒዝዎ ዝኸይድ ሰብ'ውን ሕማም ብጻዩ ከም ሕማም ገዛእ ርእሱ ቆጺሩ፡ ብጻዩ እንክቕንዞ ንሱ'ውን ስለዝቕንዞ፡ "ሓወይ ብኸመይ ይሓዊ!" ዝብል ዕላማ ተዘይኮይኑ፡ ኣብ'ቲ ሕክምና ንዘለዉ ካልኦት ሕሙማት ረርእዩ ክፍንፍንን ክጽየንን ሕልንኡ ኣይእዝዞን'ዩ።

√ (3ይ) እቲ ክበጽሕ ኢሉ ንሕክምና ዝኸይድ ሰብ ግን፡ ንዝሓመመ ብጻዩ ክርኢ ምካድ ጽቡቕ እካ እንተኾነ፡ ከባቢኡ ረርእዪ ኣፍንጭኡ ክዓብስ፡ ክጽይን ግን ይረአ። ስለዚ ኣብ ዕላማ መምጺኢኡ ጥራይ ኣተኩሮ ገይሩ ንቤቱ ክምለስ ዘለዎ ተኽእሎ ኣዝዩ ጸቢብ'ዩ። ፐርከስ ጥዑይ ኮይኑ ይኸይድ ስለዘሎ፡ "በቶም ሕሙማት ከይልከም" ዝብል ስግኣት ክሓድሮ ዝተለምደ'ዩ። በዚ ምኽንያት ድማ፡ ዋላ እካ ኣብ'ታ ብጻዩ ዘለዋ ክፍሊ ኮይኖም ብቑስሊ ኣዝዮም ፈጀቕ-ጀቕ ዝበሉ ሰባት ረርእዩ፡ ከይጽየን ትዕግስቲ እንተገበረ፡ ካብ'ቲ ሕክምና ክወጽእ እንከሎ ግን፡ ካልእ ሕሙም እንክርኢ ከይጨንዎ ኢሉ ኣፍንጭኡ ክዓብስ ባህርያዊ'ዩ።

√ እምበኣረከስ ቤተክርስትያን'ውን ሕክምና'ያ። ናብኣ ዝመጹ ኣካላት ድማ ሓጥኣን ምኻኖም ፈሊጦም ክሕከሙ ዝመጹ እምበር፡ ንሕሙማትን ብሓጢኣት ንዝቖሰሉን ሰባት፡ ክዕዘቡ ዝመጹ ኣየድልይዋንን ኢዮም። ንዓኣ ዘድልይዋ፡ ብሓጢኣት ንዝመሽመሹ ደቃ፡ ናብ ቤተክርስትያን ሕዞምላ ዝመጹ ርህሩሃት ሓለይቲ የሕዋቶም፡ ወይ ድማ ዝሓመመ ሰብ ሕማሙ ዘኪሩ ባዕሉ ክሕከም ወትሩ ዝግስግስ ውሉድ ኢያ ትደሊ ቤተክርስትያን።

√ እምበኣር ብመንገድና ኣብ ቤተክርስትያን መጺኦም ዝተሓከሙ ኣካላት ክሳብ ዘየጥረና፡ ብውሕዱ ሓጢኣት ሓድሕድና ዘይኮነስ፡ ሓጢኣት ገዛእ ርእስና እንዳዘከርና ናብ'ዛ መንፈሳዊ ሕምና ንክንሕከም ንገስግስ። ሓጢኣት ካልኦት ርኢኻ ንምጽያን ተኾይኑ ምምጻእና ግን፡ ከይተፈወስናን ሕማም ወሲኽናን ኢና ንቤትና ክንምለስ።

√ ቤተክርስትያን ድማ ነቲ ክሕከም ኢሉ ዝመጸ ኣካል፡ በቲ ዘለዋ መንፈሳዊ ጸጋ ክትፍውሶ ኢያ፡፡ ነቲ ሕሙም ተመሲሉ፡ ልዕልና ቤተክርስትያን ዕሽሽ ብምባል፡ ነቶም ንፍወሳ ዝቐረቡ ደቃ፡ መመሊሱ ክብክሎም ኢሉ ዝመጸ ድማ በቶም ሰማያውያን የዒንታ መምያ፡ በቲ ዝተዋህበቶ መለኮታዊ ስልጣና ገይራ ቆሪጻ ክትድርብዮ ኢያ።

" " ዛቲ ይእቲ ምዕራፍየ፡ ለ ዓለም ፡እስመ ሐረይክዋ ዘየ አኅድር ለዓለም!"
ወስብሐት ለእግዚኣብሔር!
ሕቱም-መጽሓፍ

ኩሉ ፍቑድ፡ ምርጫ ግን ናትና!

በስመ ስላሴ!
ኩሉ ፍቑድ፡ ምርጫ ግን ናትና!

√ ድላይካ ምረጽ ተባሂልና እምበር፡ "ዘዝመረጽክሞ ከጽድቐኩም'ዩ" ኣይተባሃልናን።
√ "ኢድካ ኣብ ዝመእምኣካ የእትዎ" ኢሉና'ምበር፡ "ክልቲኡ ሓጢኣይኮነን" ኣይበለናን።
√ ሰብ ከም ቃሕ ዝበሎ፡ ብፍቓዱ ክነብር ዘየመልክዓሉ ክንሱ ፈጣሪ ግን ናጻ ፍቓድ ሂብዎ ይርከብ።
√ ሰብ ስለዲሞክራሲ ስለመሰል ሰብ ብዙሕ ግዜ ክዛረብ ይስማዕ'ዩ፡ ግን ኮራብሽን ዘይገብር ሰብ ከኣ ፈጺምካ የለን። ብፍጽምቲ ሓቀኛ ዲሞክራስያዊ ኣገዛዝእ ዝገዝእ ግን እግዚኣብሔር ጥራይ'ዩ።

ሓጺር መረዳእታ ብዛዕባ ናጻ ፍቓድ ሰብ፡

√ ሰብ ክውለድ እንከሎ፡ ንዑኡ ንሰብ ንምስራሕ ተባሂሉ ዝተኸናወነ ነገራት ኩሉ ብምርጭኡ፡ "ከምዚ ይሕሸኒ፡" ኢሉ መሪጹ ዘምጽኦም ኣይኮኑን። ከይፈለጠን ብዘይፍታዉን ደኣ ናብዛ ዓለም መጸ፡፡ እቲ ዝሰርሖ ፈጣሪ ድማ በንጻሩ፡ባዕሉ ንሰብ ሰሪሕዎ ከብቅዕ፡ ከም ባዕሉ ዝተሰርሐ ንብረት፡ ከም ደስ ዝበሎ ክነብር ፍቓድ ሂብዎ። ከም ሓደ ዝተሰርሐ ኣቕሓስ፡ ምሉእ ፍቓድ ናይ ህላዌኡ ካብ ዋንኡ ክቕበል እንከሎ ማለት'ዩ። መቸም ሓንቲ ዝሰራሕካያ ንብረት ኣብ ድላያ ክትቕመጥ ስልጣን ኣይትህባን ኢኻ። ኣይኮነን ንንብረትሲ፡ ንእንሲሳ እካ "ድላያ ትግበር" ኣይትብላን። እግዚኣብሔር ግን ባዕሉ ዝሰርሖም ንብረቱ ክንስና ከም ማዕሪኡ ኣብ ሕይወትናን ሞትናን ናጻ ፍቓድን ሓላፍነትን ሂቢና ይርከብ።

√ ኣዳም ዝተፈጥረ፡ ንምፍጣሩ ባዕሉ ብዘቕረቦ ጥርዓን ኣይኮነን፡ ወይ ኣማኻሪ ኮይኑ ንፈጣሪኡ ብዛዕባ ተፈጥርኡን ኣፈጣጥርኡን ዝገበሮ ኣበርክቶ ዋላ ቅንጣብ ትኹን ሓገዝ የለን። ፈጣሪ ግን ነቲ ባዕሉ ብፍቓዱ ዝፈጠሮ ኣዳም፡ ምሉእ ፍቓድ ሂቡ፡ "ካብዚኣ ከይትበልዕ፡ ተበልዒኻ ግን ክትመዉት ኢኻ" ብምባል ናይ ምብላዕን ዘይምብላዕን ክልቲኣዊ ደሞዘን ብምኽሪ መልክዕ ገይሩ ሓበሮ።

√ ስለዚ ንሕና ፍቓዱ ንምምላእ እንተነበርና ይሕጎሰልና፡ ዓስቢ ድማ ንቕበል፡፡ ፍቓዱ ብፍቓድና ንምጥምዛዝን፡ ንዑኡ ንዘይምእዛዝንን እንተተቓለስና ግን ናጽነት እካ እንተሃለወና፡ እግዚኣብሔር ክሳብ ዘይተሓጎሰሉ ደሞዝ ናይ ዘይምእዛዝና ከምንቕበል ርጉጽ'ዩ።

√ ሓሰማ ተሓሲምናያ ዘይኮንናስ ፈጣሪ'ዩ ንኸይንበልዓ ኣዚዙና። ስለምንታይ ከምኡ ኢሉ ኣዘዘ፡ ንዑኡ ይምልከት! ልዕሊ እቲ ንሕና ኣብ ሰብነትና እንገብሮ ሓልዮት፡ ልዕሊ ዕጽፍታትና ንሱ ከምዝሓልየልና ግን ንኣምን።
√ ስጋ በቕሊ ፈንፊናዮ ዘይኮንናስ ንፈጣሪ ከነሐጉሶ ስለዝደለና ኢና።
√ ስጋ ኣንጭዋ ስግድ-ግድ ስለዝብለና ዘይኮነስ ፈጣሪና' ዩ "ኣይትደልይዎን ኣይጠቕመኩምን ኢዩ፡" ኢሉና።
√ "እነገሊኦም በሊዖሞ፡" ኢልና ኣይንበልዕን፡ እነገሊኦም ጸሊኦሞ ኢልና'ውን ኣይንጸልእን። ንፈጣሪ ከነሐጉስ ግን ኩሉ ዘዝበለና ንምግባሩ ንጽዕት ኣለና። ሰብ ገይርዎ ኢልና ዘይኮንናስ፡ እግዚኣብሔር ገይርዎ ኢልና ኣሰሩ ክንክተል ንጽዕር።

√ "ገሊኦም ስጋ ገበል በሊዖም" ኢልና ኣይንረግሞምን፡ ንሕና ስለዝተሓረምናዮ ድማ መንግስተ ሰማያት ዝወረስና መሲልና ብትዕቢት ኣይንውጥረናን። ዓስቢ ከምዘሎ ግን ኣይንስሕቶን።

√ ቤተክርስትያን ዝበለትና ኩሉ ከነተግብር ንጽዕት፡ ንሳ እትጸልኦ ዘበለ ድማ ንጸልእ። ንሳ እንተኸልኪላ፡ ንሕና ንኽልከል፡ ንሳ እንተፈቒዳ ድማ ፍቓዳ ንመልእ።
√ እግዚኣብሔር ንቤተክርስትያን ኩሉ ዘድሊ ምግባረ ጽድቂ ምሂሩዋ'ዩ፡ ንሳ'ውን ከከም ዓቕምና በብዝከኣላ መዳይ፡ ካብ ፍልጠታ ትዕድለና ኣላ። እሞ ዘይለበመ እንተሎ ናብ ቤተክርስትያን ይምጻእ እምበር፡ ዝለበመ መሲልዎ ንቤተክርስትያን ከለብማ ኢሉ ኣይምጻእ።

√ ማለት ማንም ሰብ ሓሳቡ ክሳኻዓሉ ኢሉ ንሓሳብ ቤተክርስትያን ክለዋውትጥ ከይሕልን። ስጋ ሓሰማ "ይጠቕመኒ'ዩ" ኢሉ ክበልዕ ዝደለየ ሰብ ይብላዕ፡ ንቤተክርስትያን ግን "ብልዑ ኢልኪ ፍቐድልና" ብምባል ክሓባብላ ኣይፈትን።
√ ንዓና ዘድልየና ኩሉ ልዕሌና ንሱ ፈጣሪና ይፈልጠልና'ዩ፡ ቤተክርስትያን ድማ እዚ ሓበሬታ'ዚ ብምሉኡ ካብ ኦሪት ክሳብ ሓዲሳት፡ እንኮላይ ብተውፊታት ኣብ ሕጋ ስፉር ኢዩ።

√ ንቤተክርስትያን "ስጋ ሓሰማ፡ ስጋ ኣንጭዋ ክንበልዕ ፍቐድልና!" ዝብል ምሕጽንታስ፡ ከመይ ዝበለ ድፍረት'ዩ። ስጋወደሙ ናይ ክርስቶስ ዝቐመሰ ከርሲኸ ወደይ፡ ስጋ ሓሰማ ስጋ ገበል ከተእትወሉ፡ ከመይ እቲ ከርሲ ክሰማምዖ ይኽእል፧

√ ልክዕ'ዩ፡ እግዚኣብሔር "ንኹሉ ቀዲስዎ ኢዩ" ተባሂሉ ተጻሒፍልና ኣሎ። ነገር ግን ክርስቶስ ንሓሰማ ከንጽሕ ኢሉ ከምዘይመጸ ንፈልጥ ኢና። ንገበል፡ ንተመን ንኣራዊት ከንጽሖምን ክሓጽቦምን ኢሉ ኣይኮነን ደሙ ኣፍሲሱ። ንሳቶም ሲኦል ኣይሰማምዕም፡ መንግስተሰማይ ኣይምልከቶም። እግዚኣብሔር ክፈጥሮም እንከሎ ከምዘይተጋገየን፡ ክፈጥር እንከሎ፡ ኣብ ነፍሲ-ወከፍ ስርሑ ሕጉስ ከምዝነበረን ግን ንኣምን። ቀንዲ ዕላማ ናብዛ ዓለም መምጺእኡ፡ ንሰብ ንምድሓን እምበር ንእንሲሳ ተስፋ መንግስተ ሰማያት ንምእታው ኣይኮነን።ብሕጂ እንጽበዮ ተስፋ ምጽኣቱ'ዉን፡ ንሰብ ንምፍራድ እምበር፡ ዓስቢ ዝወስዱን ዓስቢ ዝንፈጉን እንሲሳታት ክፈላሊ ኢሉ ኣይኮነን ክመጽእ።

√ ኣንታ ክቡር ሓወይ! ሐራይ፡ ሓሰማስ " ሕጂ ነጺሓ'ያሞ ንብልዓያ" በልካ፡ ላምከ ጻድቕ ነይራ ማለት ድዩ፧ዶስ ርኽስቲ እንከላ ኢያ ትብላዕ ነይራ፧
√ ኩሉስ ነጺሑ በልኩምና፡ ጤለ-በጊዕ ግን ሓጢኣት ኣይሓለፎምን ጸኒሑ ማለት ድዩ፧
√ ዶስ ዝሓጥኡን ዘይሓጥኡ ስለዝነበሩ ኢዮም፧
√ ኦይ ኣንቱም ሰባት፡ እግዚኣብሔር ንሰብ ንምድሓን ሰብ ኮነ እምበር፡ ንእንሲሳ ንምንጻሕ ደሙ ኣየፍሰሰን። ምላልባሽ ቅዱስ ስጋኡን፡ ክቡር ደሙን፡ ንኩሉ ክባርኽ እጃም ዘይነበሮ ኣይኮነን። ከምቲ ክፈጥር እንከሎ ቅልጽሙ ኣብ ኩሉ ፍጥረቱ ዋንነት ዘለዋ፡ ደሙ ክፈሲስ እንከሎ'ውን፡ እቲ ናትና ካባና ዝተወስደ ስጋ፡ ኣብ ኩሉ ፍጥረት፡ ፈጣርያዊ ዋንነት ብተዋህዶ ስልጣን ረኸበ። ስለዚ እቲ ዝፈስስ ዝነበረ ደም ናይ ፈጣሪ ደም'ዩ፡ እቲ ዝተቖርሰ ስጋ ድማ ኣብ ልዕሊ ኩሉ ፍጥረት ስልጣን ዘለዎ ኢዩ። ዋና ነገሩ ግን ንሰብ መንግስተ ሰማያት ንከአቱ እምበር፡ ነቶም ተስፋ መንግስቱ ዘይምልከቶም ፍጥረቱ ኢሉ ኣይኮነን ፈጣሪ ዝደመየ።
√ እንሲሳኸ መንግስሰማይ'ዶ ይወርስ'ዩ፧
√ ኣይፋልን፡ ንሳቶምሲ ይሓልፉ እምበር ኣይወርሱን'ባ።

√ እሞ "ኩሉ ብክርስቶስ ነጺሑ'ዩ" ዝብል ምኽኒት ከም ኣምጻኹምልና ደኣ፡ ልዕሊ ማንም ሰብ ብደም ክርስቶስ ነጺሑ ኢዩ'ሞ፡ ስጋ ሰብ ውን ብልዑ በሉና፡ ሓደ ኣፉ ሓቢርና ስጋ ሓድሕድና ክንበልዕ ማለት'ዩ።
√ እረ "ልዕሊ ኹሉ ዝነጸሐ" ተባሂሉ ዝንገር ክነግረኩም፡ ሓደ ብንስሓ ተሓጺቡ፡ብቅዱስ ቁርባን ዝተሓትመ ሰብ'ዩ። እሞ ነዚኸ ብስጋ ዓሪፉ ምስ ጸንሓና፡ "ክርስቶስ ኣንጺሕዎ ኢዩ" ኢልናዶ ንብልዓዮ፧
√ እዝጊ ኦ፡ ለቱ ስብሐት! ንስኻትኩም ደለኹም ግበሩ እምበር ንሕናስ ኣይንውዕሎን። ተተኸኣለና ድማ ክኒኡ ሓሊፍና ካብ ምሕማይን ንሰብ ካብ ምቁንጻብን ክንቆጠብ ንቃለስ እምበር፡ "ነጺሑ'ዩ" ኢልናስ ስጋ ሰብ ኣይንበልዕን።
√ ስጋ ሓሰማ ዝለመደ ከስዐ ግን ስጋ ሰብ ንኸይበልዕ ምኽንያት ኣይረክብን።

√ እምበኣረከስ ኣይፋሉን! ኩሉ እካ ብደም ክርስቶስ እንተተሓጽበ፡ ንሰብ ዝጠቕሞን ዘይጠቕሞን ነገራት ግን ኣሎ።
√ ንሕና "ቤተክርስትያን ነዞም ዝብልዑን ዘይብልዑን፡" ኢላ ዝፈለየቶም ብልዕታት፡ "ስለምንታይ'ዩ፡ እንታይ'ዩ መልእኽቶም!" ንምፍላጥ ተኾይኑ፡ ብትሕትና ደኣ ክንሓታ የምሕረልና እምበር፡  ካብ ቤተክርስትያን ዝተወለድካ ሰብ ክንስኻ፡ ልዕሊ ቤተክርስትያን ዝኾንካ መሲልካ ንሕጋ ክትቅይር ምህቃን ድፍረት'ዩ። 

√ ምላልባሽ ቤተክርስትያን ግን ነዞም ናይ ስጋ ብልዕታት ርኽሰት ሒዞም ስለዝተፈጥሩ ወይ ድማ፡ እግዚኣብሔር ክፈጥሮም እንከሎ ተጋግዩ ስለዝፈጠሮም ኣይኮነትን ዝኸልከለትና። ንዓና ስለዘየድልዩና ኢዮም። እግዚኣብሔር "እዚኣቶም ንዓኻትኩም ርኹሳት ይኹኑኹም፡ ኣየድሊኹምን ኢዮም።" ኢሉና ኣሎ። ንዑኡ ንሰራሒኦም ግን ተጋግዩ ዝፈጠሮም ክሳብ ዘይኮኑ፡ ዘጣዕስዎ ኣይኮኑን "ኣይፋሉን የድልዩና ኢዮም" ኢልካ ብህልኽ ምትንሳእ ግን፡ ንእግዚኣብሔር ክትእርሞን ከተማኽሮን ኢድካ ምውጥዋጥ ኢዩ።

√ ኦ ህዝበ ክርስትያን ተኾነ፡ ስጋዊ ብልዒ ኣብ መንግስተ ሰማይ ስለዘየብጽሕ፡ ህይወትና ብትሕርምቲ ተሕለፍናዮ ይምረጽ። ፐርከስ እዚ እንሃርፎን ልዕሊ መጠን እንብህጎን ብልዒ፡ ገና መንግስተ ሰማይ ከየብጸሐ፡ እረ ድሕሪ ዝተወሰነ ሰዓታት ቀልቀል ኮይኑ ብምኻድ፡ ኮንትነት ስጋዊ መግቢ ባዕሉ ኣፍ ኣውጺኡ ገና ካብ ቁልዕነትና ኣትሒዙ እንዳመስከረልና ኢዩ። እዚ ድማ ስለቲ ሰማያዊ ብልዒ፡ ማለት ቃሉ፡ ምስጋናኡ፡ ጾም-ጾሎት፡ ምምጽዋት፡ ዕሽር ምሃብ፡ ዓቕምና ዝኾነ ትሕርምቲ ምዝውታር፡ ንስሓ ቁርባን ዓቕምና ሱባኤ፡ እዚእታት እንዳገበርና ንክርስቶስ ኣብ ልብና ከነንግሶ፡ ስለመንግስተሰማይ ቀዳምነት ሰሪዕና ክንሓስብ ኢዩ ዝግበኣና። ተዘይኮነ ግን፡ ምስ ዝተጋገዩ ኣይንጋገ፡ ስጋ ሓሰማ ክበልዑ ስለዝረኣና ንቤተክርስትያን ከምዝተጋገየት ገይርና ብምሕሳብ ኣይንዳፈራ።

√ ነፍሲ-ወከፍ ሰብ ናይ እግዚኣብሔር መሕደሪ ንክኸውን ደኣ ይጽዓር'ምበር፡ ፍቓድ ቤተክርስትያን ንምቅላል መሕደር ኣጋንንቲ ኣይኹን።
√ እዚ ድማ ክርስቶስ ዘይሓደራ ሰብነት፡ ሰይጣን ክካረያ ግድነት ስለዝኾነ'ዩ።

ወስብሐት ለእግዚኣብሔር!

ንሕና ኣብ ቤተ ክርስትያን መን ኢና?

በስመ ሥላሴ! 
ንሕና ኣብ ቤተ ክርስትያን መን ኢና?

√ ንሕና ኣብ ቤተ ክርስትያን ተምሃሮ እምበር መምሃራን ኣይኮንናን።
√ ንሕና ኣብ ቤተክርስትያን ሓጥኣን'ምበር ጻድቃን ኣይኮንናን።
√ ንሕና ንቤተክርስትያን ብጽሞና እንሰምዓን እንኣምናን እምበር፡ ከነእምናን ክንምልሰላን ኢልና ኣይንህንደድን።
√ ንጎይታና ብመንገዳ ንምህጾኖ እምበር፡ ንሳ ብመንገድና ዘይተማህጸነቶ ኢልና ኣይነዕገርግርን።
√ ኩሉ ዘለና ሃብተ መንፈሳዊ ካብኣ ተቐበልና እምበር ፡ ንዓኣ እንውስኸላ ሃብቲ ዘሎ መሲልና ምስ ልዕሊ ዓቕምና ኣይንወዳደርን። ቅንጣብ ትኹን'ውን እንውስኸላ የለን።

√ ብርግጽ በቲ ናታ ሓይሊ ብዙሓት ቲፌዞ ኣጥሪና ኢና፡ እዚ ገበን'ዩ፡ ብሕገ-ፈጣሪ ይኹን በሕገ-ተፈጥሮ'ውን የሕትት'ዩ። ስለዚ ነዞም ናትና ዝገበርናዮም ከይወዓልና ከይሓደርና ንቤተክርስትያን ነረክቦም። እምበርከስ ናታ እምበር ናትና ኣይኮኑን። ንሕና ኣብ ቅድሜኣ ባዶ ምኻንና ተረዲእና ብጸጋኣ ክንመልእ ንጽዕት'ምበር፡ ዝመለአ ሰብነት ዘለና መሲልና ካብ ሑቕፋ ስድሪ ኣይንፍተትን።
√ ንሕና ንቤተክርስትያን ንሓታን ብመልስታታ'ውን ብምሉእ ልብና ንዓግብን'እምበር፡ በቶም ንሳ ዘላለየትና መጽሓፍትን፡ ባዕላ ዝመሃረትና ሕጋጋትን ገይርና፡" ከነረድአ ፡ ክንምህራ ክንውጥራ" ክንብል ኣይንደፍርን።

√ ብሕጋ ንቕየድ እምበር፡ ብሕግና ክትቕየደልና ኢልና ኢድና ኣይነወጣውላን። "ደጊም ቅድስነኣ ፈሪሱ'ዩ" ብምባል ሰይጣን ይጻረራ ብምህላዉ ዘገርም ይመስል። ንሳ ግን ካብ ጥንቲ፡ ብሕገ ልቦና ጀሚራ ካብ ፈጣሪኣ ፈጺማ ኣይተፈልየትን። ይጻረራ ምንባሩን ክሳብ ሕጂ እረ ክሳብ ምጽኣት ካብ መንቀኝነቱ ከምዘይዓርፍን'ውን ትፈልጥ' ያ።

√ ብፍላይ ናይ ኤርትራ ኦርቶዶክስ ተዋህዶ ቤተክርስትያን፡ ምስቲ ዝነበረ ደጋዊ ምትእትታው ዝነበራ ተጽዕኖታትን ተጻብኦታትን ከይተሓለለት፡ ኣብ ሕገ ልቦና፡ ንለባውያን ብቕድስናኣ ኣለቢማቶም። ኣብ ፍላመ ናይ ሓዱሽ ኪዳን፡ ንድግል ማርያም ምስ ወዳ በቲ ዘየጥፈአቶ ክብራ ገይራ ኣእንጊዳቶም። ኣብ ዘመነ ምህዞን ሰንዓን ፊደላት፡ ቅድሚ'ተን ጥንታውያን ሰብ ፊደል ተሰሪዓ ብምጽናሕ፡ ነቶም መሃዝቲ ፊደል ድሕረ ምንጻፍ ሒዛ ጸንሓቶም እሞ፡ ካብቲ ናታ ድሕረ-ባይታ ተበጊሶም "ካዕብ፡ ሳልስ፡ ራብዕ፡ ኀምስ፡ ሳድስ ሳብዕ" ኢሎም ክፈላሰፉ ኣተባበዐቶም። ብግዜ ሰማእታት፡ ንጽሕቲ መዕቆቢት ደብረ-ቅዱስ ኮይና ንብዙሓት ቅዱሳን ሓቖፎቶም። ኣብ ዘመነ ቱርኪ ን 300 ዓመታት ብንጽሕናኣ ተቓሊሳ መኪታን ሰዓረቶም። ዓቕሞም ተሓለለ'ምበር ኣየፍረስዋን!ከመይ ኢሎምከ ንቅድስናኣ ክደፍርዎ፧ ኣብ ዘመነ ጥልያን ብፍጽምናኣ ክሳብ 50-60 ዓመታት ሞጊታቶም።

√ እሂ! የለዉን ድዮም እንሕበነሎም ኣብነታውያን ቅዱሳን ኣኣብ'ዚ ዝተጠቕሰ ዘመን፧ ማለት ካብዛ ናይ ኤርትራ ኦርቶዶክስ ተዋህዶ ቤተክርስትያን'ዚኣ ማለተይ'የ፧ መሊኦም'ባ! ኣብ ዘመነ እንግሊዝ፡ ብዶግማውን ተውፊታውን ፍጹምን ቅዱስን ዝኾነ ባህሪኣ ገይራ ንምንፍቕናዊ ሽበራኦም ረቲዓቶ'ያ። ቅድስናኣ ግን ክሳብ ሕጂ'ውን እንተኾነ ኣይተበረዘን። ን300 ዓመታት ዝኣክል " ኣብ ትሕቲ ግብጺ ስለዘይተቖረንኪ ቅድስና የብልክን" ኢሉ ፈጣሪ ኣይነቐፋን። ኣብ ዘመነ ቱርኪ ማለት'ዩ።  ን50-60 ዓመታት ኣብ ትሕቲ ኢትዮጵያ ስለዘይነበርኪ" ኢሉ ኣመኻንዩ ፈጣሪኣን መርዓዊኣን ቅድስንኡ ኣይነፈገላን። በንጻሩ እኳ ደኣ ኣብዚ ዝተጠቕሰ ዘመናት፡ ካብተን ከምኣ ዝኾና ኣሐታ ዘይሰንፍ በረኸት ከምዘውሓዘት ንፈልጥ ኢና። ብዙሓት ካብቲ ዘይነጽፍ መንፈሳዊ በረኸታ ከምዝተባረኹ ዕድሜና ዝምስክሮ ሓቂ'ዩ። በረኸቶም ድማ ክሳብ ሕጂ ኣሰር ኮይኑ ብዓይንና ይረኣየና እንዳሃለወ ክንክሕዶ ኣይከኣለናን።

√ ከምኦም፡ ከምዞም ኣብ'ዚ ዘመናት'ዚ ዝተጠቕሱ ቅዱሳን፡ ብስማ ከምእንቕደስ ተስፋ ንገብር እምበር፡ ንሕና ምስዝሓከሉ ኣይንሕክልን፡፡ ብድፍረት ድማ ብልሳነ ኣጋንንቲ ገይርና ኣይንዝልፋን።
√ ንሳ ንዓና ዝቕድስ እምበር ዘጸይን ባህርይ ስለዘየብላ ኣይንጽየፋን።
√ ርግጽ'ዩ፡ ሰይጣን ንቤተክርስትያን ከምዝጽየና ንፈልጥ ኢና። ብመንገዲ ካህናት ዝወሃብ ባርኾት ከምዘይፍተዎ'ውን ይርደኣና ኢዩ። እቲ ካብ እግሪ ጳጳሳት፡ ኤጲስቆጶሳት ቆሞሳት ቀሳውስት ዝፈስስ ወሓዚ መንፈሳዊ ባርኾት ጸርጊፍዎ መታን ከይከይድ ስለዝፈርሕ'ዩ ከኣ፡ ሰይጣን ናብ ቤተክርስትያን ቀሪቡ ክብሪ ክህባ ዘይደሊ። ብማዕዶ ኮይኑ ግን በንጻሩ ንልኡኻታ ክነቕፎምን ከናሽዎምን ይብረሆ።

√ ጠንቁ እቶም ኣቦታት ስለዝበርትዕዎ ጥራይ ኣይኮነን፡፡ እዞም ልኡኻታ ኣብታ ቤተክርስትያን ምህላዎም ንዑኡ ነዚ ርኹስ መንፈስ እኹል ዘባህርር ሓይሊ ኢዩ።
ንሕና ግን ከም ቅዱሳን መልኣኽቲ ናብ ውሽጣ ክንእከብ ንፈቱ እምበር፡ ከም ኣጋንቲ ማዕዶ ማዕዶ ኣይንብልን።

√ እሞ ንሕና ሓይሊ ቤተክርስትያን ከምዘይደኸመ ንኣምንን ንምሕጸንን እምበር፡ ከም ሰይጣን ኮይንና ንክብራ ንምንሻው ልሳንናን ልቦናናን ኣሕሊፍና ንጸረ ሰናያት ኣይንህብን።
√ ተኸኣልናስ ነቲ ካብ ታተ ኣሳጉማና ኣጀሚራ ክሳብ ብደውና እንረግጽ ዘሳለየትልና በዓልቲ ውዕለትና ቤተክርስትያን ነመስግናን ንምስክረላን እምበር፡ "ረኺሳ ኢያ" ኢልና ልሳንና ኣብ መስቀል ናይ ዝተኣስሩ ኣጋንንቲ መሳርሒኦም ክትከውን ኣሕሊፍና ኣይህብን።

√ ተረኺሳኮ ናትና ቅድስና'ውን ኣይሕሰብን ዩ። ብጥምቀት ዝተቐበልናዮ ጸጋ ኣይሕሰብን። ዝተሸምናዮ ሽመት ኣይሕሰብን። ዝተማሃርማዮ ትምህርቲ ኣይሕሰቡን።እሞ ከምኡ ተኾይኑ፡ ንዮ ኣብቲ ማዕዶ ኬድና ምጥማቕ ከድልየና ዩ። ሽመትና ተዘይተሓሲቡ'ውን ከምበሓድሽ ምሻም ከድልየና'ዩ። ከመይ ኢልናኸ ረኺሳ ኢያ ኢልና ደፈርና፧ ቤተክርስትያን ግን 10 ዓመት ይኹንሲ ንሓንቲ ሰከንድ እዉን ትኹን ክብራን ቅድስናኣን ከምዘይቀነሰት ንኣምን ንእመንን እምበር፡ ብምኽሪ ድያብሎስ፡ ንድያብሎስ ከነሐጉስ ክንብል ዝሃበትና ሕሉፍ ክብርታት ኣሕሊፍና ንርኽሰት ኣይንህብን።ተኸኣልናስ ብተጋድሎኣ ንጸናናዕ፡ ብተስፋኣ ድማ ንጸንዕ'ምበር ጥሪት ከንቱ ንምርካብ ምስቶም ከንታውያን ጸላእታ ኣይንሓብርን።

√ ንሕና ኣብ ቤተክርስትያን ኣብ መስቀል እምበር፡ ኣብ ሶፋ ከምዘይምህላውና ንፈልጥ፡፡ ስለዚ መከራ ቤተክርስትያን የሕመና፡ ኣብ ውሽጣ ኮይና ድማ ንቕንዞዎ።ብትዕግስታዊ ቃንዛኣ ገይራ፡ ማዕረ'ቲ ዝተዓገስናዮ ከምትናዝዘና ድማ ንኣምን። ምቾት ቤተክርስትያን'ውን ይምችኣና'ዩ፡ ኣብ በዓላታ ከኣ ብፍሰሃ ብሐሴት ሓቢርና ምስኣ ንዝምር እምበር፡ መከራኣ "ኣሕሚሚኒ" ኢልና ኣይንጠልማን፡ ምቾታ "ጥዒሚኒ" ኢልና'ውን፡ መጋበሪ ስጋዊ ጥቕምና ኣይንገብራን።

√ ንሕና ቤተክርስትያን ኩሉ ከምዝገበረትልና ንኣምንን ነመስግንን እምበር፡ ብምሒር ስጋዊ ሲሰዐ፡ "ጥቕማ-ጥቕሚ ከም ዝተነፍገና" ኮይንና ካብ ቤተክርስትያን ኣይንሕክልን። ንዝተመነናዮ ዝሰኣንናዮ መሲልና ኣይንዝልፋን።
√ ንዝረኸብናዮ ብቕልጽምና ዘምጸናዮ መሲልናውን ንንየተሉ ዓቕሚ የብልናን።
√ ብምኽኒት ንውድሳ እምበር፡ ብምኽኒት ኣሕሊፍና ንጓና ኣይንህባን።

√ ንሕና እቲ ትማል ኣብ ቅድሚ ኣውደምህረታ" ህዝበይ መሃሩ" ኢላ ቃላ ምስ ሃበትና ዝነበረና ኮልቶፍ-ቶፍን ወታእታእን፡ ንሳ እተርእየና ዝነበረት ትዕግስትን ዓቕልን ዘዘኪርና ነመስግን'ምበር፡ ጨሪስና ሕጂ-ሕጂ ካብ ሰማይ ከም ዝወረዱ መላእክት መሲልና ልዕሊኣ ሊቅ ክንኮነላ ኣይንህቅንን።
√ከመይ ኢልናኸ ክንደፍር!

√ ስለዚ ማንም ወዲ ቤተልርስትያን፡ ንቤተክርስትያን ልዕሊኡ ምኻና ይእመን። ድያብሎስ ንዕቤታን ኣገልገልታን ክወቅስን ከናሹን ካብ ዝጅምር ነዊሕ ኣቕጺሩ'ዩ። ክንዮ'ዚ'ውን ንሱ እቲ ጸረ-ሰናያት፡ ንደቂ ቤተክርስትያንን መራሕታን ክውድሶምን፡ ዝናኦም ከም ናይ ዓለማውያን ልዕል-ልዕል ከምሎን ንጽበ ተሊና ጨሪስና ተጋጊና ኣለና። ሰይጣንሲ ተተኻእሎ'ኳ ንቤተክርስትያን ተወር ኢሉ ዝኸይድ ሰብ ከይህሉ ኢዩ ሕልሙ። እሞ ማንም ወዲ ቤተክርስትያን ውዕለቱ ክመልስ ኢሉ ናብዛ ቤት ይገስግስ እምበር፡ ደቃ ከባርር ኢሉ ከይመጽእ።
√ ደቃ ከነባርር ተኾይኑ ዕላማና ግን ኣይንምጻእ ንግደፎ፡ እምበርከስ ናይ ነፍሲ ወከፍ ዝጠፈአት በጊዕ ክርስቶስ ተሓተትቲ ምዃንና ኣይንዘንግዓዮ።

√ ይዝከረኒ ወዲ 7-9 ዓመት እንከለኹ። 1992-1993 ኣቢሉ ይኸውን ካህን ክመጽእ እንክንሪኢ እንዳጎየና እግሩ ንምስላም ንቀዳደም ምንባርና ኣጸቢቑ ይዝክትሮ'የ። ንሕና እቶም ህጻናት ዝነበርና ጥራይ ዘይኮንና'ውን፡ እንኮላይ እቶም ዓበይቲ ዝነበሩ ከይተረፈ፡ ነቶም ካህናቶም ፍጹም ክብሪ ከርእዩ እግሮም እንክሳለሙ ብዓይነይ ዝረኣኽዎ ኣጸቢቐ ዝዝክሮ'ዩ።
√ ሎሚ ንሕና ተተኸኣለና ነዚ ክብሪ'ዚ ክንዕቅቦ ንጽዕር'ምበር፡ ንዘይተበረዙ ክብርታታ ክትብርዝ ምህቃን "ናይ ለባማት ባህርይ'ዩ" ኣይንብል፡፡ በንጻሩስ ክብሪ ቤተክርስቲያንን ክብሪ መራሕታን ምብራዝ ናይ ኢኣማንያን ጠባይ ምዃኑ ንፈልጥ።

√ስለዚ ኣመንቲ ንኹን!

√ እምበኣር ንሕና፡ ቤተክርስትያን ንዝወለደቶም ክቡራት ኣካላት፡ ካብ ህጻናቶም ጀሚርካ ክሳብ ዓበይቶም ውሉዳ፡ ኣኽበርትን ኣብ ቅድሜኦም ትሕት እንብልን ክንከውን'ምበር፡ "ቅድም ንሳቶም ተዘየኽበሩና" ኢልና ብትዕቢት ክንውጠር ግቡእ ኣይኮነን። ተገበርናዮ'ውን ንርገም እምበር ኣይንምረቕን። ክርስቶስ ኣሽንካይ'ዶ ንደቁ፡ ንኹሉ ብምስሉ ዝተፈጥረ ሰብ ከነኽብሮ፡ ከነፍቅሮ ጸውዒና' ዩ፡፡ ጻውዒት ጥራይ ዘይኮነ ድማ ኣዚዝና'ዩ።
√ ንሕና ድማ ዘይከበረ እንተሎ ክብሪ ቤተክርስትያን ከነርእዮ ኢልና ሃሰው ንበል እምበር፡ ነታ ብክርስቶስ ዝኸበረት ቅድስት ቤተክርስትያን ከነዋርድ፡ "ትሕተይ ዘይተምበርከኸት ኢልና "ኢድና ከነወጣውጥ ፍጹም ድፍረት 'ዩ።

እግዚአብሔር ኣጽራረ ቤተክርስትያንን ሓይሎምን የድክመልና።
ወስብሐት ለእግዚኣብሔር