በስመ ሥላሴ!
'ፖሎቲካን ሃይማኖትንሲ መዓስ'ዮም ዝሳነዩ፧' እናሉ ዓቕሎም ዘጽብቡ ሰባት ካብ ዘጋጥሙኒ ነዊሕ ኣቚጺረ'ለኹ። ብፍላይ ከኣ ኣብዚ ቅነ። ፖሎቲካን ሃይማኖትን ክንገር እንከሎ፡ ፍቕርን ጽልእን፡ ሓቅን ሓሶትን ዝብላ ቃላት ብብዝሒ ክደጋገማ ይዕዘብ'የ።
ምስ ሓደ ቀራብየይሲ፡ ሓደ ግዜ ብዛዕባ ንሱ ደስ ዝብሎ ኣርእስቲ ኣልዒለ ዘተ ጀሚረልኩም፡፡ ንሓሳባቱ ክቕበሎን ከይቕበሎን ግዳሸይ ከምዘይብሉ ኣቐዲሙ ነጊሩኒ'ዩ፡፡ ብጽፉፉን እርኑብን ኣነጋግራ ገይሩ መልእኽቱ ከመሓላልፍ ከምዝደሊ፡ ብከምዚ ዝስዕብ ብርእሰ-ተኣማንነት እንክገልጸለይ ይዝክሮ። "ትጸልኣኒ ዲኻ ተፍቅረኒ፧ ኢለ ክሓተካ ዘይምጽባይካ ብልሒ'ዩ።" ካብ ገጸይ ዋላ-ሓደ ምልክት ስለዘይረኣየ መስለኒ ነዚ ዝበለ። 'ለካ ገጽ ሰብሲ ዝንበብ ከብሒ'ዩ!' ድማ 'ለ ኣነ ብውሽጠይ። ቀጺሉ፡ "እምበርከ ስነ-ልቦናኻ ሰንኪ እዚ ካብ ልሳነይ እትሰምዖ ዘለኻ ቃላት ክጒዳእ ወይ ክጽገን ከምዝኽእል ይፈልጥ'የ። እምበኣር ብዛዕባይ ማለት ብዛዕባ ሓሳባተይ ግዲ ኣለካ ድዩ የብልካን ክሓተካ ትደሊ ኣይትመስልን ኢኻሞ፡ ብልሕኻ' ዩ ዝንበበለይ ዘሎ። ግን "ትጸልኣኒ ዲኻ ተፍቅረኒ" ንዝብል ሕቶይ ትጽቢት ኣለካ'ዩ'ሞ ንበል። መልስኻ 'እወ ይጸልኣካ'የ እንተዄኑ፡ ከምትጸልኣኒ መርትዖታት ምፍሓር ኣየከድልየንን'ዩ። መልስኻ እወ የፍቅረካን ይድግፈካን'የ፡ እንተ'ልካኒ ግን፡ ሓቅነትካ ክሳብ ክንደይ ትርኑዕ'ዩ ንምፍላጥ ብዙሕ ኲዕታ ከካይድ'የ።" ወይ ጉድ!
እዛ ምድሪ ወናኒት ሓንቲ ገጽ ክንሳ፡ ዝተፈላለዩ ገጻት ብዘለዎም ሰባት ኣዕለቕሊቓ ምህላዋ መቸም ንዝበዝሐ ሰብ በሪህሉ'ዩ። ኣአንጋዲት ኣእላፋት ሓሳባት ምዃና ከይኣኽላ ዓለምና፡ ጠጠሊቖም ዝወጹላን ዝሕምብሱላን ሕብረ-ብዙሕ ገጻት እናኾነት ትምጠጥ'ላ'ዛ ምድሪ። በቲ ሓደ ገጻ ደጊኡ እርኑብን ህርኩትን ዝዀነ፡ ግን ከኣ ብሕሜት ኣብ ልሳን ብዙሓት ዝወደቐ ሰብ ይረክባ። ቅርብ እንክብሎ ጒዳይ ሒዙ ይጸንሕ፡፡ ጉዳዩ ጉዳይ በይንኻ ምዝራብ'ዩ። በይኖም ዝዛረቡ ሰባት፡ ንመብዛሕትኦም ሻቕሎት ኣለዎም። ሕብረ-ብዙሕ ዝኾነ ሻቕሎት!
"በይንኻ ምዝራብ ዓይነቱ ብዙሕ'ዩ " ይብል ነበረ ናይ እንግሊዝ መምህርና። ማለቱ፡ 'ብዛዕባ ሕሉፍን መጻእን መደባትካ፡ ንምሕንጻጽ ወይ ንምንቃፍ በይንኻ ከምእትዛረብ ክገብረካ ይኽእል'ዩ' ንምባል'ዩ መስለኒ። እዚ እቲ ካልኣይ ገጽ'ዩ ዝኸውን ዘሎ። በቲ ካልእ ገጽ'ውን፡ እነገሊኦም ሰንኪ ምስ ገሊኦም ምጽላኦም'ዮም ዝኾኑ፡ ኢዶም እንዳሰንደዉ ሓውሲ ቈይቊ ዝመስል በይንነታዊ ዘረባ ዝዛረቡ ኣጋጢሞምኒ ይፈልጡ'ዮም። ምስ ካልኦት ምጽላኦምን ዘይምጽላኦምን ግን፡ ገጾም ከምኡ ስለዝንበብ'የ እምበር ሓቲተዮም ኰይነ ኣይኮንኩን። ከመይ'ለኸ ክሓቶም፧ ክጭልግሙኒ!
መቸም ስደት ዘይርኡይን ዘይስሙዕን እንድዩ ዘርእየካን ዘስምዓካን። መልሲ ስኢኖም ዝተወጠሩ እንክመስሉ መመልከቲቶኦም ኣብ መትልሖም ጔሪም ዘስቊርቊሩ ሰባት'ውን ስደት ኣርእዩኒ'ዩ። ኣብ ከምዚ ኲነት ንዘለዉ ሰባት ክትዛረቦም ምድላይ'ኳ፡ ከም ንኣብ ምቁር ሕልሚ ንዘሎ ሰብ ቀስቂስካ ሕልሙ ከተጥፍኣሉ ምኽኣል'ዩ ዝመስል። ምኽንያቱ ምውቕ ወይ ዝሕቱል ዕላል ሒዙ እንከሎ እንተቀስቂስካዮ፡ ምላልባሽ ምስ መን የዕልል ምንባሩ ስለዘይትፈልጥ ንክልቴኣትካ ቀይሕ መስመር ክኾነካ ይኽእል'ዩ። ኣብ ስደት ካብ ዝፈልጦም ናይ ተዘክሮ ኣዕሩኸይ ሓደ፡ "ስከ ስከ! ግደፍ ኣይትዂለፈኒ፡ ሓንሳእ ይሓስብ'ለኹ!" ዝበለኒ መሓዛ ይዝክር'የ። ክዛረቦ ወስ ምስ በልኩ ዝበለኒ'ዩ። ደኾን፡ ኤውሮጳ ወይ እስራኤል ንምኻድ ናይ ሽዑ ራኢና ስለዝነበረ "ሳህራ ከመይ ይስግር ኢሉ ይማጎት ነይሩ ይኸውን፧ እዝጊ ዋንኡ!
ነገሩ በይኖም ተዛሪቦም በይንኻ ተዛረብ ዝብሉ ስለዘይወሓዱ'ውን'ዩ መስለኒ፡ ጽርግያ ብጽርግይኡ በይኑ ዝዛረብ ሰብ ዘዕለቕልቕቖ ዘሎ። "ዕሩይን ጽፉፉን ፕረሰንቴሽን ከተቕርቡ 'ተዄንኩም፡ ምስልኹም ኣብ መስቲያት እናረኣኹም በይንኹም ክትዛረቡ ኣለኩም" ትብል ናይ 10ይ ክፍሊ መምህር'ውን ነይራትኒ'ያ። ተመኲሮኣ'ዩ ዝኸውን ዘሎ። ሓቂ ይሓይሽ ኣብቲ ፍልም ስሒቐያ'የ፡፡ በይነይ ዘይኮንኩ'ውን ክላስ ምሉእ ብጅምላ ኢና ስሒቕናያ። ዳሕራዩ ግን ለካ በይንኻ ምዝራብሲ ጠቐመ ከኣ'ምበር። እቶም ብዙሕ ግዜ በይኖም ዝተዛረቡ ዝበዝሐ ነጥቢ፡ እቶም በይኖም ዘይተዛረቡ ግን በይኖም ከጒረምርሙ ተራእዮም። ወይ ጉድ ኣብ ግዚኡ በይንኹም ተዛረቡ ተባሂሎም ዘይተዛረቡስ፡ ግዜ ምስ ሓለፈ በይንኻ ምጒርምራም እንታይ'ዩ ጣቊኡ! እቶም በይኖም ምስ መስትያት ዝተዛረቡ፡ ካዕቦ ነጥቢ ብምሕፋስ፡ ድሮ በኖም ምዝራብ ኣቋሪጾም፡፡ እቶም በይኖም ዘይተዛረቡ ግን ነጥቢ ስለዝተኸልከሉ በይኖም ምጒርምራም ጀሚሮም። ጉድ'ዩ!
በቲ'ልካ በዚ፡ "ሎም-ሎምስ እምበርዶ ምስ ሰብ ዝዛረብ ሰብ ክርከብ'ዩ" ኢለ በይነይ ዘስቈርቈርኲሉ ግዜ እናበዘሐ ይመጽእ'ሎ። ሓንቲ ነጥቢ ግን ተረዲኤ'ለኹ። ወረግ እንኮ ነጥቢ ጥራይ ኣይኮነትን።
√ ፍቕርን ጽልእን፡ ሓቅን ሓሶትን ንምልላይ ዝግበር ከይዲ ጠቓሚ ምዃኑ፡ ሓደ በለለይ!
√ ኣብ ግዜኻ በይንኻ ምዝራብ ነጥቢ ከምዘውህብ፡ ከምዛ ናይዛ መምህርና።
√ ነብሰ-ፍተሻ ምግባር ንነብስኻ ከምዝጠቅም፡
√ በይንነታዊ ዘረባኻ ዕለቱ ምስ ዝወድቕ ግን፡ ኣጒረምራሚ ከምዝገብረካ።ኤክስፓየር ዴትሲ ዋላ ንበይንኻ ምዝራብ'ውን ይውክሎ'ዩ ለካ።
ክንቅጽላዶ፧ ደሓንስከ ኣንበብቲ ዋላ ባዕልኹም መልእዎ...
እምበኣር ፍቕርን ስኒትን ይሃበና ፈጣሪ!!
