ሰብ ተሰሪሑ ዝተወደአ ኣይኮነን!

በስመ ሥላሴ

ኣእምሮ ብተፈጥኡ ለምለም ኢዩ፡፡ እግዚአብሔር ከኣ ብጠንካራ ዓጽሚ ገይሩ ኣዳለዎ፡፡ ሰናይ ይኹን ክፉእ ነገር ኲሉ ካብኡ ካብ ኣእምሮ'ዩ ዝምንጩ። ተመልከት! ሰብ ተጸሊሉ፡ዓቢዱ ዝብሃል ኣእምሮ እንተተንኪፉ ማለት ኢዩ፡፡ እወ! ሓንቲ መኪና'ውን  ሞተራ ኣዝዩ ሕማቕ ሕማቕን ንሓደጋ ዝተቓለዐን ክንሱ፡ ጋቤኛኣ ግን በንጻሩ ብወርቂ ዝተሰርሐ ምስትኾውን፡እታ ማኪና ንፎርማ እምበር ንመጉዓዝያ ክትኾውን ኣይትኽእልን'ያ።

ክገርመኩም ሓደ ሓደ ግዜ መልክዕና ኣዝዩ ጸቢቑ ጥርዚ ዋላ እንተበጸሐ፡ኣእምሮና እንተተባላሽዩ ግን ሓምሓም ኮይንና ኢንና ንተርፍ።ሓምሓም ተሰባሪ ኢዩ፡ሰብኣውነትና ድማ ተሰባሪ ይኾውን።

ሰብ ተሰሪሑ ዝተወደአ ኣይኮነ፡እናሻዕ ጽባቐኡ እንዳተኾለዐ ዝህነጽ ህንጻ ኢዩ።እግዚአብሔር ምስ ፈጠረና፡ 'ደጊም ስርሐይ ወዲኤ ኢየ፡ ባዕልኹም ትፈልጡ!' ኢሉ ኣይሰንደወልናን።ንሕና ኣይኮንና ብዛዕባ ከመይ ክንከውን ከምዘለና ንፈልጥ፡ማንዋል ኣብ ኢዱ ዝፈልጠልና'ውን ባዕሉ ንሱ'ዩ።ከምዚ ከምቲ ከይትበልዑ ተባሂልና ክንስና፡  ዘይተገበአ ዋላ እንተበላዕና፡ኪዱ ጥፉኡ ኢሉ ንዘልኣለም ኣይኮነነናን፡፡ ግዜ ፈልዩ ኩሉ ግዜ ምሰ ሰብ እንዳኾነ፡ንኣእምሮ ወዲሰብ እንዳመገበ፡ኣብ መወዳእታ ዘመናት፡ሰብ ኮይኑ ኣድሓነና።

ድሕሪኡ'ውን ሕጂስ ወዲኤ ኣሎኹ ኣይበለን፡ኣማናዊ መጽንዒ መንፈስ ቅዱስ እናሰደደ፡ሰብኣውነትና ንኽህነጽ ዝገብር ዘሎ እግዚአብሔር ኢዩ። "ወሶበ መጽአ ጰራቅሊጦስ ዘአነ እፌኑ ለክሙ  እምኀበ  አብ፡ መንፈሰ ጽድቅ ዘይወጽእ፡ እምኀበ አብ ውእቱ ሰማዕትየ!" (መንፈስ ቅዱስ ካብ ኣቦይ ወሲደይ ክሰደልኩም ኢየ፡ ንሱ ንዂሉ ከብርሃልኩም ኢዩ) (ዮው15፥26) ይብል።

ለካ ውዲ ሰብ ካብ መሰረት ጀሚሩ እንዳዓበየ ዝነብር ሕንጻ ኢዩ።ህንጻ ብሓንቲ እምኒ መሰረት ትጅምርሞ፡ ግና ዋላ ተነዲቓ ትዛዘም ደኣምበር፡ እናተኾስተረት እናጸረየት እናተዀለዐት ስለትቕጽል  ጽባቐ ምውሳኽ ኣይተቃርጽን'ያ።

ኣእምሮ ወድሰብ'ውን ባዕሉ ብባዕሉ ተሰሪሑ ዝተወደአ ዘይኮነስ፡ ብኢስውርቲ እግዚአብሔር ተሰአኢሑ ዝተጀመረ ህንጻ ኢዩ። ወገናት ሰብ ስለዝኾንኩም ንነብስኹም ምሉእ ገይርኩም ከይትሓስብዋ፡፡ቃል እግዚአብሔር ክትሰምዑን፡ ከተንብቡን፡ክትመሃሩን እንከለኹም፡ ስብእናኹም እናወሰኸ ኢዪ። ህሉው ኲነታትኩም ብዘየገድስ፡ ዘለኹምሉ ቦታ፡ ኣተሓሳስባ፡ ኣብ ፖሎቲካ፡ ኣብ ደርፊ፡ኣብ ዝሙት ኮታ ኣብ ዝተፈላለየ ኩነት፡እእምሮኹም ናብቲ ናይ ብሓቂ ምልኣት ወድሰብ ከተብጽሕዎ ተደሊኹም፡ እቲ ዝሓይሽ ሞጒስዕ ሓጥያት እንዳመለስካ ምምባር ኣይኮነን። ንእግዚአብሔር ግዜ ሂብና፡ ቃሉ ንስማዕ፡ንመሃር ሽዑ ክንልወጥ ኢና። ብቃል እግዚአብሔር ዝተራሕወ ልቢ፡ካልእ ጋሻ ንኸአቱ ኣይፈቅድን ኢዩ።ብሓጥያት ዝተሰብረ ልቢውን ብቃል እግዚአብሔር ተዘይኮይኑ፡ብድግምጋም ግብረ ሓጥያት ኣይጽገንን'ዩ። 

ሕሉፍናን መጻኢናን መታን ኣብነት ረኺቡ ክጽገን፡ ቅዱሳን ኣበው፡ ቅዱሳን ኣዴታት ዝሓለፍዎ ገድሊ ቅድስና ነንብብ፡። ኣቦታትና ኣሕዋትናን ሰበኽቲ ወንጌል መምሃራን ተንሲኦም ክምህሩና እንከለዉ፡ ኣክንዲ 'ኣቤት እገለ ዝመሃረና!' ንብል፡፡እግዚአብሔር ምስ ልብና ጉዳይ ከምዘለዎ ፈሎጥና ባዕሉ ከምዝመሃረና ገይርና ነእምኖ። ካብ መጀመርትኡ'ውን ንምስማዕ ቃል እግዚአብሔር ክንዳሎ እንከለና፡ እግዚአብሔር ኣብ ቅድሜና ደው ኢሉ፥ 'ስምዑኒባ!' ዝብል ድምጺ የስምዕ ከምዘሎ ገይርና ንሓንጎልና ሕልናናን ነእምኖ። ሽዕኡ ጸጋኡ ተኣማኒ ስለዝኾነ ተንቲንካ ብዘይንገር ተኣምር ብጸጋ ክንምላእ ኢና።

እግዚአብሔር ነታ ርእሰ ከተማ ናይ ሰውንውትና ዝኾነት ልብና ክንህቦ ይደሊ። ንልብና ዙፋኑ ክገብራ፡ መምርሒኡ ካብኣ ናብ ምሉእ ኣካልና ከውሕዞ፡ ብድሕሪኡ ነተን ዝተረፋ ንኣሽቱ ከተማታት እንበዓል ዓይኒ፡እዝኒ፡ኣፍንጫ፡ መልሓስ ንምእዛዞም ክኽል ይደሊ። ነዚ ኲሉ ብሓይለ-ጥበቡ ኣይፈለየና።

እወ ምድራዊ ንጉስ እንኳን፡ ንምልእቲ ሃገር ንምቊጽጻር፡፡ተቐዳዲሙ ነታ ርእሲ ከተማ'ዩ ክሕዝ ዘለዎ። እዚ'ውን ብሓይልን ብግድ'ዩ። እምበርከ ርእሲ ከተማ ከይሓዝካ ሙሉእ ብምሉእ ተቓጻጺረ ክትብል ስለዘይከኣል።

ናይ ሰብነትና ርእሲ ከተማ ከኣ ልብና ኢያ። እግዚአብሔር ድማ ብመጽሓፉ "ወደየ ልብኻ ሃበኒ"  ኢሉ ወትሩ ይልምነና። ሓያል ንጉስ ክንሱስ፡ ኣብ ውሽጢ ልብና ንኽኣቱ፡ ብደገ ኰይኑ ይኲሕኲሕ።

ድምጺ ፈጣሪኣ ሰሚዓ ብኣጋ ማዕጾኣ እትኸፍል ልቢ ይዓድለና!

Posted 28.05.2016.

ሎቱ ስብሐት!