ሓባሪት ፊስካ

ሓባሪት ፊስካ

ተነፊሓ ብሕሹኽታ
ምኽንያታ ክትድርጉሖ
ንሰማዒኣ ከተስምዖ
ወዮ ሰሚዕዋ
ድምጻ እንከይወጸ
ቀዲምዋ
ንሳ ዝሓሰበቶ ንዓና
ንሱ ግን ከይተሰምዐት ሰሚዕዋ

ኣየ ፈጣሪ
ንምኽንያት ልቢ
ኣንባብቢ
ድምጺ ስለዘየውጽአት ነይግድሶ
ንሕና እንከይሰማዕናያ'ዛ ፊስካ
ሰሚዒዋ ኣሪምዋ
ጀሚሩ መልሲ
ከይትጠፍኦ'ዛ ነፍሲ
ንሕቶኣ ይምልሶ
 ይመላልሶ
"ግድፊ ፊስካ ልቢ
ዝዝረብ ተዛረቢ
ዝስማዕ ተናበቢ
ብሰብካ'ዚ ሰብ ከይትከዓቢ
 ዝሓፈርኪ
ኣነኸደኣ ናበይ ተሰዊረኪ
ኣይረኣየክን ድየ ኣብ ውሽጢ
ኣብ ልብኺ
ኣብ ሕልናኺ!"

እናለ የሕሾኽሽኻ
ብዓውታ ይጽውዓ
'ተተሰምዓ
ድምጻ ብሕሽኽትኡ
ናቱ ብዓውትኡ
 ሰሚዕናዮ
ምኽንያት'ዛ ፊስካ
እንከይበጽሐ ናብ ኣእዛንና
ተግሳጹ ሰሚዕናዮ
ንሕናውን ተገሲጽናዮ
ምዕድኡ ተመጊብናዮ

ኣየ ፈጣሪ
መን ይቕድሞ
ምኽንያታ'ዛ ልቢ ኣላሊይዋ
ቅድሙ ሓሲባ ክትጥብሮ
ግንከ ፈጣሪ፡-
ኩሉ ከምዘይስወሮ
ምኽንያታ ከምዝዕይሮ
ኣብ ዕምኮኡ ከምዘዕቕሮ
ከምዝመዝኖ
ትፈልጥ'ያ'ዛ ፊስካ
ኣየ ፊስካ ልቢ!!!

ንብዓት ሕንጢት!

በስመ ኣብ ወወልድ ወመንፈስ ቅዱስ ኣሀዱ ኣምላክ።

ሕንጢት ትነብዕ ኣላ!

''ሕንጢት'' ኢለ ክጽውዓ ሓሲበስ፡
ተረኣኽዋ ግን ፍርዝን ዝበለት ኮይና ጸኒሓ።
"እንታእዋና ደኣላ ጎቢዛ" እንዳበልኩ ብልበይ፣
'' እንታይ ደኣ ጠፊእኪ! እ....ሓፍትኺ ድያዚኣኸ" ካብ ሕቕፊ'ታ ዓባይ ሓፍታ ተቐቢለ ሰዓምክዋ ንሕንጢት።
" እወ! እ...እ...ማማ ...እንድያ'ሞ ናብ ቤተክልስትያን እ...እ...ዘይመጸት ኮይና።"
ኢላ እታ ንሽቶ ሕንጢት ሓፍታ ቀዲማ መለሰት።
"ኣ...ኣ... ኣባ ቀሺ...እ...እ...ጸሎትባ መሃሌና!"
በለትኒ ደጊማ።

በቲ ራህሪሄላ
ልበይ ተሰይሩ
ድራር ዓለም ከይኮና
'እንታይ'የን ክኾና!" ብምባል
ብመጻኢአን ተሻቒሉ
በቲ ድማ ተስፋ ገይረ
ንቃሉ ናፊቐን
ናብ ቤቱ ብምምጸአን
ብቆሪጸ ተስፋ
ንዝደቀሰ ልበይ ኣበራቢረ
ክሕግዘን ብሕልናይ ተላዒለ

"ኣብ ገዛ፡ ምስ ማማ ትጽልያዶ፧"
ኢለ ሓተትክዋ።
"እ...እ...ማማ ደኣ...እ...እ... እንታይ ትጽሊ ኮይና!"
"እንታይ ደኣ ከይጸለየት ትድቅስ፧"
"ኣ...ኣ...ኣይኮነን...እ...እ...ደልፊ እምበል ትሰምዕ!"
በለትኒ ሕጢት።
እታ ዓባይ ሓፍታ፡ ስቕ ኢላ ክትሰምዕ ጸኒሓ፡ሕጂ ግን "ይኣኽለኪ" ዝበለታ እንክትመስል ብዓይና ገነሐታሞ፡
"ካብ መጽሓፍ ቅዱስባ፡ታሪኽ መሃረና!" በለትኒ እታ ዓባይ።
ኩሉ ናይ'ታ ሕንጢት ዘረባ ከይግደሰሉሞ፡ከይንዕቐን ግን ኣዝያ እንዳፈረሐት'ያ።
"ኣጆኺ፡ኣጆኺ፡እዚ ደኣ ስርሐይ እንድዩ።ወሸለ ናብ ቤቱ መዓልታዊ መጺኽን፡ ጥራይ ድሊየት ይሃሉ እምበር ኣብ ዝኾነ ግዜ ኣነ ወትሩ ቅሩብ ኢየ።" ኢለ ንስክፍትኣ ከይርሕቐላ ፈተንኩ።" እ...ቅዱሳን ጽሑፋት፡ ኩላቶም ንሕይወትና መራሕቲ ስለዝኾኑ፡ ሰሰሚዕና ከነተግብሮም ኣሎና፡ሕራይ!"
በልክዋ።
ብርእሳ ነቕ-ነቕ እንዳበለት እወታኣ ነገረትኒ።እንተላይ'ቶም ኣብቲ ጉባኤ ዝነበሩ ህጻናት ሕጉስ ገጽ ኣርአዩኒ'ሞ፡
ሽዕኡኡ፡"ሕጻናት ናባይ ይምጽኡ ሕደጉ ኣይትኸልዎ፡"
ዝብል ጽሑፍ ክትርኸሎም ጀመርኩ።

"ሕደግዎም ይምጽኡ
እንታይከ ኣቢሶም ካብ ቤተይ ክወጽኡ
ስለምታይ ተፈራርሕዎም ንኽወጽኡ
ወረ ናበይ ክርሕቁ
ናበይ ክጠፍኡ
ደቅኹም ተማልኡ
እምበር በይንኹም ኣይትምጽኡ
መንግስተይ ንኸምዚኦም  ዝኣመሰሉ ኢያ'ሞ
ባሩኾተይ ክነስኡ
ሕደግዎም ይምጽኡ

እናበለ ዝመሃረ
ንጽህነኦም ዘበሰረ
ነቶም ዘይፈለጡ
ብንዕቐት ዝተበዓጡ
ንልቦም ሰቢኽዎ
ትዕቢቶም ነቒፍዎ
መንግስተ ሰማያት
ብህጻናት መሲልዎ
ልዕሊ ህጻናት ኢና'ናሉ
ህጻናት ዝኸልከሉ
ኣትሪሩ መኺሩ
ንህጻናት ክመስሉ

ኢለ ምስ ምስ ጀመርኩላ
ሕንቕንቕ ኢልዋ
ተደናጊራ ድያ ኣሕነቕኒቕዋ
እንድዒ!
ገጻ ግን ንብዓት ተኻዒይዋ
እንተስ ብጉድለት ወለዳ
ክትማጎቶም እንክትመስል
ናብ ቤቱ ስለዘየምጽእዋ፡
እንተስ ብጸወታ ዝኸሰረቶ ግዜ ኣጣዒስዋ
መመሊሱ ኣንቢዕዋ

ነቲ ሓጢኣት ዘይእንታዩ ዝነበረ ሰብነታ
ብንጽህንኡ፡ ዘይነበሮ መሰታ
ጎጎቲታ
ምስ ነንኣሽቱ ሓጣውእ ተለማምዶ ብምህላዋ
ትነብዕ ጠጠሚታ

በቲ ናብ ንቡር ክትምለስ ትደሊ
ንዓለም ዝነዓቐቶ
ኮይና ክትረአ ከምቲ ቀደም ዝነበረቶ
በቲ ድማ ሓይላ ይደኽማ
መጻኢኣ ይድብና
እቲ ቀረባ፡ ክንዮ ማዕዶ ይኾና
"መን ክመርሓኒ
መንከ ክሕግዘኒ
ስድራይ እካ ንጋዳ
ዘይንሳቶምሲ ኣብኡ እንደኣሎም ዘለዉ
ኣብታ ዓባይ ከተማ
ናይ ሓጢኣት ዕዳጋ
ይሸጡ ይሻየጡ
ንዓይ ደኣ በየን ክሓስቡኒ
ወረ ናብኡ ከይጎትኒ
ናብቲ ዕዳጋ ከየቕሩቡኒ"

ትብል እንክትመስል
ቶኪራ ትርኢ
ልባ ንቃሉ ጸሚኣ
ደጊኣ ብዓለም ሓሲኣ
ብኽልተ ምርጫ ትርኢ'ላ
ናይ መን ክትመርጽ
ብምስሊ መን ክትቅረጽ
ኣብ ክልተ ተመቒላ
ሕንጢት፡

"ናብ'ታ ነጸብራቓዊት ርስቲ
ክኾኑ ተኻፈልቲ
ናይ ሎሚ ጀመርቲ
ንጽባሕ መራሕቲ
ተካእቲ ኮይኖም
ኣብ ቤቱ ክስረቱ
ቅዱሳን ንኽወልዱ
ረቒሕዎም ብዓነዉኡ
ክንዮ ሕጂ
ክንዮ ትማል ገና ናብ ዓለም እንከይመጹኡ
እረ ካብ ማሕጸን እንከይወጽኡ
"ሐረኩከ እምከርሰ እምከ"

ዝበል ተስፍኡ ዘዘኪራ፡
ክትበጽሖ ትደሊ
ሓንሳብ ናብ ዓለም
ሓንሳብ ናብ  ወለዲ
ሓንሳብ ናብ ቤተክርስትያን
ሓንሳብ ንዓለማውያን
መንገዲ ቅድስና ዘርእይዋ
ተማዕዱ ገለ ተመርሕዋ
ግን መን ይምርሓያ'ዛ ህጻን፧
ትነብዕ ኣላ ሕንጢት!
ወስብሐት ለእግዚኣብሔር።

ስለምንታይ ንቅዱሳን ነመስግኖም፣ምስጋና ደኣ ንኣምላኽ ጥራይዶ ኣይኮነን ዝግባእ?

ንዝሓተቱ ሓጺር መልሲ፣

በስመ ኣብ ወወልድ ወመንፈስ ቅዱስ ኣሀዱ ኣምላክ።

ናብ ሕቶኻ ክኸይድ፣ ኣብ ቤተክርስትያን ቅዱሳን ክምስገኑ ክትሰምዕ እንከለኻ ኣይትሰንብድ።ፐርከስ ክልተ ዓይነት ምስጋና ወይ መዝሙር ኢዩ ዘሎ፣፣እዚ ከኣ ንፈጣሪ ዝወሃብ ናይ ኣምልኾ ምስጋና ኣሎ፣ንፍጡር ማለት ንክቡርን ንኡድን ዝኾነ ፍጡር ዝወሃብ ድማ ናይ ኣኽብሮት ምስጋና ኣሎ።ፈጣሪ ንዑኡ ጥራይ ንበይኑ ናይ ባህርይ ኣምልኾን ምስጋናን ከምዝግበኦ ኩሉ ሰብ ክርደኦ ዝኽእል ነገርንኢዩ።ክቡራንን ብእምነቶም ንኡዳንን ዝኾኑ ቅዱሳን ድማ ምስጋና ከምዝግበኦም ጎይታ ባዕሉ ምሂሩና ኢዩ።ንኣብነት ሓንቲ ካብ ብሉይ ሓንቲ ድማ ካብ ሓዲሳን ጥቕስታት ክነግረካ።ኣብ ብሉይ ኪዳን፣ኢሳይያስ 3፣10 "ንጻድቕ ፍረ ግብሩ ክበልዕ ኢዩሞ ተዓዊትካ በልዎ።"ተባሂሉ ተጻሒፉ ንረኽብ። እዚ ምስና ኢዩ፣ቑጽሪ 11 ከኣ "ንረሲእሲ እኩይ ክረኽቦ ኢዩ፣ግብሪ ኢዱ ክፍደ ኢዩሞ፣ ወይልኡ።" ዝብል ተጻሒፍልና ኣሎ።ተመልከት፣እታ ቀዳመይቲ ቑጽሪ 10 ምስጋና ኢያ፣ "ተዓዊትካ በልዎ፣"እትብል ምስጋና።እካ ደኣ ነቲ ዘየመስግን ሰብ ከመስግን ከምዘለዎ እተዘኻኽር ጥቕሲ ኢያ።ንጻድቕ ዝወሃብ ናይ እክብሮት ምስጋና ኢዩ፣እታ ካልአይቲ እብ ቑጽሪ 11 ዘላ ድማ ወቐሳ ኢያ፣ንሓጥእ እትወሃብ መጠንቀቕታዊት ወቐሳ።" ወይልኡ!" እትብል ኢያ።ካልእ ኣብ ብሉይ ኪዳን ምስጋና ንክቡራን ወይ ቅዱሳን መዝሙር ከምዝተዘመረ ኣብ ብዙሕ ቦታ ተጻሒፉ ክንረኽቦ ንኽእል ኢና።እዚ ምስጋናዚ ከምቲ ንፈጣሪና ክርስቶስ ዝወሃብ ናይ ኣምልኾ ምስጋና ኣይኮነን።ከምኡ ከምዘይምኻኑ ከኣ ባዕሉ ክርስቶስ ኣምላኽና ይፈልጥ ኢዩ።

ኣብ ሓዱሽ ኪዳን እንተመጺናውን፣ባዕሉ ጎይታ፣"ብጹኣን፣ብጹኣን፣" እንዳበለ፣ ኣብ ማቴዎስ 5 ነቶም ሰናይ ዝገብሩ ፍጡራቱ ከመስግኖም ከሎ ንርኢ ኢና።ክርስቶስ ኣምላኽና ነቶም ከምቲ ዝደለዮም ኮይኖም ዝጸንሑ ሰባት ብጹኣን እንዳበለ የመስግኖም።ሓደ ሰብ ብጹእ እንተኢሉካ መቸም፣ ይራገመካ ዘይኮነስ፣የመስግነካ ፣ምህላዉ ርዱእ ኢዩ።ስለዚ ክርስቶስ ንባዕሉ ነቶም ንጹሐን ፍጡራቱ ናይ ኣኽብሮት ምስጋና እንተሃቦም ኣይንግረምን ኢና።"ተጋግዩ ፈጣሪ እንከሎስ ከም ኣምላኽ ሓሲቡ ኣምሊኽዎም" ክንብልውን ኣይከኣለናን ኢዩ።ምኽንያቱ እዚ ናይ ኣኽብሮት ምስጋና ደኣምበር፣ናይ ኣምልኾ ማለት ከምቲ ንፈጣሪ ዝወሃብ ምስጋና ስለዘይኮነ።

ንባዕሉ ኣብ ዳግማይ ምጽኣት ኣብ ማቴዎስ 25፣34 ነቶም ሰናይ ምግባር ናይ ክርስትና ዝገበሩ፣ኣብ ዙፋኑ ተቐሚጡ "ኣንቱም ብሩኻት ናይ ኣቦይ" ክብሎም ምኻኑ ቃል ኣትዩልና ኣሎ።ብሩኽ ዝብል ቃል ምስጋና ኢዩ።ግን ንጎይታ "ተጋጊኻ ንሕና ከመይ ገይርና ብኣኻ ክንምስገን ክንብሎ ኣይከኣልን።"ምኽንያቱ እንታይ ዓይነት ምስጋና የመስግን ከምዘሎ ዝጠፍኦ ጎይታ ኣይኮነን።

ብኻልእ መንጽርውን፣ ኣባና ኣብ ደቂ ሰባት ዕለታዊ ብምስትብሃል ይኹን ብልምዲ፣እንጥቀመሉ ቃለ ኣብነት ንውሰድ። ንሓደ ጽቡቕ ዝገበረልካ ሰብ፣የቐንየለይ ትብሎ ኢኻ። ብቃንቃ እንግሊዝ thank you.ዝብል ኮይኑ፣ እዚ ቃል ኣብ ዕለታዊ ናብራና ንጥቀመሉ ነገር ኢዩ።ግን ነቲ ሰብ ከም ኣምላኽ ቆጺርና ነመስግኖ ኣሎና ማለት ኣይኮነን።እንታይ ደኣ ናይ ኣኽብሮት ኢዩ።ጎይታናን ኣምላኽናን መድሓኒናን ኢየሱስ ክርስቶስ ነቶም ሰናይ ዝገብሩ ከምቲ ሰናይ ግብሮም ኣመስጊንዎም፣ነቶም ክፉኣን ሓጥኣን ድማ "ኣንቱም ርጉማት ካባይ ርሓቑ፣ናብቲ ንሰይጣንን ንሰራኣዊቱን እተዳለወ ናይ ዘለኣለም ሓዊ ኢዱ።"ክብሎም ምኻኑ፣ኣብ ቃሉ ማቴ 25፣41 ተጻሒፉ ንረኽቦ።እዚ ድማ ወቐሳን ነቔፌታን ኢዩ።በዚ መሰረት፣ንፈጣሪ ዝወሃብ ምስጋና ኣሎ፣ንፍጡር ዝወሃብ ምስጋናውን ኣሎ።ሚዛኑን መልእኽቱን ግን ይፈላለ።እቲ ንፈጣሪ ጥራይ ፈሊኻ ዝወሃብ ናይ ኣምልኾ ምስጋና ኢዩ፣እዚ ድማ ናይ ኣኽብሮት፣ናይ ጸጋ ምስጋና ኢዩ።ሕጂ ኣነ ንዓኻ በቲ ዝገበርካለይ የቐንየለይ፣Thank you. እንተኢለካስ ከም ኣምላኽ ሓሲበካ ማለት ድዩ፧ ኣይኮነን።እንታይ ደኣ ኣባኻ ዘለኒ ኣኽብሮት ይገልጽ ኣሎኹ እምበር።

በንጻሩ ድማ ቅዱሳን ትሕትና ዝተመልኡ ስለዝኾኑ፣ምስጋና ክመጾም እንከሎ፣"ኣነ ፍጡር'የ፣ንዓይ ኣይግባእን ኢዩ፣ኣነን ንስኻን ሓደ ኢና፣" ኢሎም ብትሕትና ክምልሱ ንርኢ ኢና። ማዕረ ክንደይ ዝበቕዑ ክንሶም ንሳቶም ግን ትሕትነኦም ንምግላጽ፣ገና ከምዘይበቅዑ ገይሮም ንነብሶ የእምንዎ።ብደጋዊ ገለጻ፣ዋላ ንሕና ከም ሕብረተ-ሰብውን እንተኾነ፣ኣብ ዕለታዊ ናብራና እንጥቀመሉ ገጸ ባህሪ ኢዩ።ሓደ ሰብ በቲ ጽብቕ ግብርታትካ ከመስግነካ እንከሎ፣"ኣይ ኣነ ደኣ እንታይ ገይረ" ኢኻ ትብሎ እምበር፣"እወ ይግበኣኒ ኢዩ" ኣይብሎን ኢኻ።እዚኸኣ ገባሪ ሰናዩ እንክንስኻ፣ትሕትናኻ ክትገልጽ ክትብል ከምዘይገበርካ ገይርካ ንነብስኻ ትቖጽራ ማለት ኢዩ።ካልእ ኣብነት፣ኣብ ባስ እንዳከድካ ከለኻ ካባኻ ዝዓቢ ሽማግለ ዶው ኢሉ ትርኢ ንበል፣፣ንስኻ ኮፍ ኢልካ ንሱ ግን ብደዉ ክኸይድ ስቕ ኢልካ ኣይትርእዮን ኢኻ።እንታይ ደኣ ተንሲእካ ኮፍ ተብሎሞ፣ንሱ ከኣ "ያእ፣ኣይግባእን" ኢሉ ትሕትና ይገበር፣፣ግን ትሕትና ስለዝገበረ ድማ ስቕ ኢልካ ኣይትርእዮን።ብፍላይ ኣብ ዓድና ዓቢ ከም ዕብየቱ ተኽብሮ ስለዝኾንካ ተንሲእካ ኢኻ ኮፍ ተብሎ ፣ንሱውን "ኣይግበኣንን ኢዩ!" ኢሉ ይምልስ። እዚ ንዑኡ መግለጺ ትሕትንኡ ኢዩ።ነቲ ዘኽብሮ ዘሎ ሰብ ድማ፣ከም ኣምላኽ ስለዝሓሰቦ ዘይኮነስ፣ኣኽብሮት ኢዩ ዝገልጸሉ ዘሎ።ስለዚ ክልቲኣቶም መርኣያ ትሕትንኦም ከምኡ ይገብሩ ማለት ኢዩ።

ሰላምታ ክንለዋወጥ እንከለናውን ካልእ ኣብነት ንርአ።ንሓደ ሰብ ሰላም ንምባል ድንን ኢልካ ሰላም ትብሎ ኢኻ።ሕጂ ከም ኣምላኽ ሓሲብካዮ፣ማለት ግን ኣይኮነን።ክርስቶስውንኮ፣ነቶም 12 ደቀ መዛሙርቱ ብዕለተ ሓሙስ ለይቲ ናብ ዓርቢ ስቕለት ዘውግሕ፣ተምበርኪኹ ኣእጋሮም ሓጺብዎም ኢዩ።ኣብ ወንጌለ ዮሐንስ 13 ኣሎና ነንብቦ።እሞ ስለዝተምበርከኸሎምሲ ተጋግዩ ማለት ድዩ፧ ብፍጹም። ተጋግዩ ዘይኮነንስ፣ትሕትና ኢዩ ዝምህር ነይሩ።ቀጺሉ ንስኻትኩምውን ከምዚ ኣነ ዝገበርክዎ ግበሩ ኢሉ ኣዚዝዎም።እዚ ኣርኣያ ንክኾኖም ዝገበሮ ኢዩ።ስለዚ ንሓደ ሰብ ስለዝደነንካሉ፣ወይ ትሕት ኢልካ ሰላም ስለዝበልካዮ፣ከም ኣምላኽ ሓሲብካዮ ማለት ኣይኮነን።

በጃኹም፣እቶም ዘይተረደኣና፣ከምዝተረደኣና ኣይንኹን።ሰብ ተዘይተረዲእዎኮ ነውሪ ኣይኮነን፣ መዓስ ኢዩ ነውሪ ዝኸውን እንተኢልና ግን ዘይተረደአቶ ክንሳ ከምዝተረደኦን ከምዝፈልጥን ኮይኑ ክመጽእ እንከሎ ኢዩ'ቲ ሽግር።ስለዚ ሰብ ክሳብ ዝኾንካ ኩሉ ትፈልጥ ዘይምኻንካ ተረዳኣ፣፣ምኽንያቱ ፍጡር ክንዲ ፈጣሪ ዝኣልክል ፍልጠን ኣይውንን ኢዩ።እምበኣር ካብ ፈላጣት  ኮይንና ኣብ ልዕሊ ካልኦት ዓብላልነት ከነርኢ ንፍትን፣ተኺኢልና ንሕተት ተዘይኮነ ድማ ገና ዝምላእ ከምዘለና ንርእስና ነእምኖ። እዚ እንተዘይገይርና ግን ዋጋ ኣይክህልወናን ኢዩ።ተዓዛቢናውን ምንም ዓቕሚ ኣፍልጦ ከምዘየብልና ንኽርዶ ዝጽግሞ ኣይኮንውን።ትፈልጡ ዶ ኣብ ዕድሚኡ ከይተማሃረ ዝነብር ሰብ ከምዘሎ፧እዚ ሰብዚ እቲ ዘይተረደአቶ ክንሳ ከምዝፈልጣ ኮይኑ ዝቐርብ ሰብ ኢዩ፣እቲ ጽን ኢሉ ዝሰምዕ ሰብ ግን ብውሕዱ እካ ነታ ዝነበረቶ ደረጃ እምዳወሰኸላ ኢዩ።

ካልኣይ ነገር፣ ሰብ ናብቲ ንስኻ እትኣምኖ ተወጢጡ ስለዘይመጸ ኣይትጽለኣዮ፣እንታይ ኣሕሊፍካሉ ኢኻሞ ክትጸልኦ።በዓቢኡ ፈጣሪኡ ክሳብ ዝምለስ ናይ ንስሓ ዕድል እንዳሃበ፣ኣብዛ ዓለም ናይ ምንባር ዕድል ሂብዎ ክንሱስ፣ንስኻ ደኣ መን ኮይንካ ኢኻ፣ እትጸልኦን እተናሽዎን። ንስኻስ እንካዕ ድኣ ኣምላኽ ኣይትኸውን! ዕላማ ክርስትናኮ እትፍቅሮም ሰባት ከተጥሪ እምበር፣እትጸልእዕም ሰባት ንኽህልውኻ ኣይኮነን።ስለዚ ናይ ማንም ሰብ ጥፍኣት ኣይትምነ።ተኸኣልካ ንሰብ ሓግዞ'ተዘይከኣልካ ድማ ኣይትግደኣዮ።

ስለቃሉ እግዚኣብሔር ይኽበር ይመስገን።

ወስብሀት ለእግዚኣብሔር።

“ምስምማዕ ዝኣበዩ ማንታ!”

በስመ አብ ወወልድ ወመንፈስ ቅዱስ አሐዱ ኣምላክ ኣሜን!

“ከመይ ትመስል ኢኻ ክትምርዖ ትደሊ፧” በለ እቲ ፍርዝን ዝበለ ርእሲ ዝውንን፣ድሙቕ ጸሊም ጸግሪ ርእሱ፣ከደራይ ሕብረ ቆርቦቱ ማንታ።ማንታ ኮይኖም ብሓደ  ምስቲ ጻዕዳ ማንትኡ ኣብ ሓንቲ ማሕጸን ክነብሩ ካብ ዝጅምሩ ነዊሕ ኮይኑ`ዩ።ኣብ ነፍሲ-ወከፍ ክርክራቶም ከይተሰማምዑ ኢዮም ዝበታተኑ።ካብ ተሓጓጒሶምሲ፡ ብቅሬታ ተተፋኒኖም ክፈላለዩ ኢዩ ዝቐለሎም።ድሮ ናይ ማህጸን ናብራ ወዲኦም ክጣየሱ ግዲ ኮይኖም፣ናይ ሎሚ ክርክሮም ዝውዳእ ኣይመስልን።መብዛሕትኡ`ቲ ናይ ሕሉፍ ክርክራቶም ብኣሽሙር ዝተሰነየ ኢዩ ነይሩ።ሎሚ ግን ግልጺ ብግልጺ፣ጥቕሲ ብጥቕሲ፣ድብንብን ሕብእብእ ዘየብሉ ኣርእስቲ'ዮም ኣልዒሎም ዝመስሉ።እቲ ከደራይ ማንታ፣``ኣነ ብስነ-ስርዓት ዝተመላኸዐት፣ደጋዊ ሕብራ ብዘየገድስ፣ውሽጣውነታ ግን ብመንፈስ ፈጣሪ ዝተኸለለት ጓል'የ ክምርዖ ዘለኒ፣`` ዝብል መርገጺ ዝሓዘ ኢዩ ዝመስል። ገና ኣብ ማሕጸን እንከለዉስ፡ ብዛዕባ መርዓ ይዝትዩ! መብዛሕቱ ላዛ ቃላት ናይቲ ከደራይ ብትሕትና ካብ ዝወቀበት ልቡ ኢዮም ዝፍልፍሉ።

``ብመንፈስ ፈጣሪ ዝተመላኸዐት ጓል ንምርካብኮ፣መጀመርያ ንስኻ ብመንፈሱ ዝወቀብካ ኢንታ ዘየብልካ ሰብ ክትከውን`ዩ ዘድሊ።እዚ ንምኻን ከኣ ፈጺምካ ዘይከኣልን ክሕሰብ ዘየብሉን ነገር ኢዩ።እምበርከስ፡ ካብዛ ሰላም ዝሰፈና ማህጸን ወጺኻስ፣ከመይ ኢልካ`ዩ  ኣብዛ ሰላም ኣልቦ ዝኾነት ዓለም፣እሞ ድማ ንሓድሕድካ ንኽትናኸስ እምበር፣ሕድሕዳዊ ሰላም ንክህልወካ ፈጺማ ዘይትደሊ ዓለም፡ መንፈስ ፈጣሪ ዝመልኣካ ሰብ ክትከውን ዝከኣል፧`` በለ እቲ ኣዝዩ ጻዕዳ ሕብረ ቆርቦት ዝውንን ማንታ። ርእሱ ኣዝያ ንእሽቶ ኢያ።ጸግሪ ርእሱ  ብጫ ዝመስል ፍልይ ዝበለ ሕብሪ ኢዩ ዘለዎ። ላዛ ኣዘራርብኡ ብኣሽሙር ተዘይኮይኑ ግልጺ ኮይንካ ምዝርራብ ኣይብረሆን ኢዩ።ኣብ ገጹ ፍሽኽታ ኣይረአን፡ ወትሩ ዕትብ ኢሉ ክረአ ኢዩ ዝደሊ፣እንተተፈሺኹ ድማ ካብ ውሽጡ ዝተጨንጎዐ ፍሽኽታ ዘይምኻኑ ብማዕዶ ዝልለ ኮይኑ፣ካብ ክሳድ ንላዕሊ "ኪርኪር" ኢሉ ኢዩ ዝፍሸኽን ዝስሕቕን።ንበሊሕን ትኩርን ተዓዛቢ ግን ተዋስኦ የርእዮ ምህላዉ ንኽርዳእ ኣየጸግምን'ዩ።

`` ናበይ ናበይ ኢኻ ተብሎ`ዚ ዘረባ፣እዛ ማህጸን፡ ሰላም ኣልባ ስለዝኾነት ዲና ክሳብ ሕጂ ንከራኸር ዘለና፣ዓለም'ውንኮ ሰላም ክህልዋን ዘይክህልዋን፣መንፈስ ኣምላኽ ክመልኣን ዘይክመልኣን፣ሕዝባ ሰላማውያን ክኾኑን ዘይክኾኑን፡ እቲ ጅማሬ ኣብቶም ሰባት እምበር ኣብታ ዓለም  ኣይመስለንን።ምኽንያቱ በዚ ናትና መንጽር ለኪዕና እንተወሲድናዮ፣ንሕና ብሰላም ናይ ምንባርን ዘይምባርን ፍጻሜን ዝውስኖ፡ እዛ ማህጸን ዘይኮነትሲ፣ንሕና ኣባናን ዘሎ ዘይምቅዳውን ኢዩ።ኣብ ነገራትና ፍልልይ ናይ ኣረኣእያ ክህልወና ባህርያዊ እኳ እንተኾነ፡ ክሳብ ክንድዚ ብኣሽሙር ክንናኸስ ዝገደደና ግን እዛ ማህጸን ኣይኮነትን። ንሕና ነንባዕልና ክንጣቛቈስ እምበር ክንጠቓቐም ስለዘይከኣልና'ዩ መስለኒ እቲ ጉዳይ።`` በለ ዝመረሮ እንክመስል  እቲ ከደራይ ዝሕብሩ ማንታ። ግልጹነት ምዃን ስለደለየ፡ ኣሽሙራውያን ቃላት ጨሪሱ መኒዎም ኢዩ።

`` ንበል እንዶ ንኣብነት፣`` በለ እቲ ጻዕዳ ምሽልጥ ዝበለ ሕብረ-ቆርበት ዘለዎ ማንታ። `` ኣነን ንስኻን ብዝሕና ክልተ'ዩ። እዛ ንንነብረላ ዘለና ማሕጸን ከኣ ኣዝያ ጸባብ፡ እረ ምስቲ ስፍሓት ናይታ ክንነብረላ ኢልና ተስፋ ንገብረላ ዘለና ዓለም እንተኣወዳዲርካዮስ ክንዲ ኢምንታ እትኾውን ኣዝያ ጸባብ ክንሳ፡ ጨሪስና መንፈስ ኣምላኽ ዝመልኦም ሰባት ኴንና ክንነብረላ ኣይተኸኣልናን። ከመይ ኢልና ኢኻ፡ ኣብዛ ኣዝያ ገፋሕን ብብዙሓት ሕብረ-ቀለማት ናይ ኣተሓሳስባ ደቂ ሰባት ዝተመላኸዐትን ዓለም፡ መንፈስ ኣምላኽ ዝተመላእና ሰባት ክንከውን እትጽበ ዘለኻ፧`` በለ እቲ ብሕብሩ፡ ኣብቲ ማህጸን ኣዝዩ ዘንጸባርቕ ቆርበት ዘለዎ ማንታ። እንደገና ሓውሲ ኣሽሙር ገይሩ እንዳሸምጠጠ  ወሰኸ። `` እስከ፡ እዛ ጠኒሳትና ዘላ ኣደ ኣብነት ንግበራ፣ብምንታይ ጠኒሳትና ትኸውን ኢልካ ትሓስብ፧ ብሕጊ ኣምላኽ ዝተማእከለ፣መንፈስ ፈጣሪ ዝተሰማማዓሉ፣ማሕተም ናይ መንፈሱ ብዝወደቖ ስርዓትዶ፣ወይስ በንጻሩ፧ ኣነ በዛ ወገነይ፡ ኣብዛ ግናይ ዝኾነት ዓለም እንዳነበረት ክንሳ፣ብሓቀኛን ፍቓድ ፈጣሪ ብዝተማእከለን'ያ ጠኒሳትና ዝብል እምነት፡ 100% ኮይነ ክቕበሎ ይጽግመኒ`ዩ።ብውሕዱስ ካብቲ ብቃል ኪዳን ዝተመርዓወቶ በዓል ቤታ ወጻኢ፡ ትሰርቕ ኢያ ዝብል ስክፍታታት ኣለኒ።`` በለ ደጊሙ እቲ ጻዕዳ ዝሕብሩ ማንታ። ነቲ ሕቡእ ኣጀንድኡ ግልጹነት ከልብሶ ዝፈተነ'ዩ ዝመስል።

``መቸም ኣዴና ኣይትጽረፈልና፣ ከምእትብለኒ ይርደኣኒ ኢዩ።ግንስከ ከምዚ ዝበልክዎ ኮይኑሞ ንበል፣ከመይ ኢልካ ኢኻ  ``መንፈስ ፈጣሪ ዝዓሰላ ሰብ ክረክብ`የ'` ኢልካ እትሓስብ፣ንባዕልኻ እንክትጥነስ ብዘይሕጋዊ ዝተጠነስካ ኢኻ፧` በለ እቲ ጻዕዳ ሕብሪ ዘለዎ ማንታ፡ ሓውሲ ድፍረት ውስኽ ኣቢሉ። '' ይርደኣኒ ኢዩ፣ከመይ ብዘይሕጋዊ ከምዝተጸነስና ርግጸኛ ክትከውን ክኢልካ ኢልካ ከምእትሓተኒ።ግን ብዙሕ መርትዖታት ክህበካ ይኽእል'የ። ብሕጋዊ ዝተጸነስና ተንኾውን፣ሕብረ ቆርበትና ረኣዮ፣ጾግሪ ርእስና፣ግዝፊ ኣከላትና፣ኣተሓሳስባና እምነትና፣ኩሉሙሉ ጨሪስካ ዘይራኸብ ኢዩ።ከምዝርደኣኒ፣ንስኻ ምስዚ ዘለካ ኣዝዩ ጸሊም ሕብሪ፣ካብ ኣዝዮም ጸለምቲ ዓሌት ከምዝቦቖልካ፡ ግምት ጥራይ ክኸውን ኣይክእልን። ብዛዕባ ሕብሪ ኣተሓሳስባናን ግንዛቤናን'ውን ንመልከት። ንስኻ፡ ንነገራት ካብ ክትመራመረሎም፡ ብእምነት ድምዳሜ ንክትህበሎም ክሳብ ክንድዚ ፈጣን ምኻንካ ወትሩ ዝዕዘቦ ነገር'ዩ። እዚ ኸኣ ካብ ኣዝዩ ኣማኒ ሕብረተ-ሰብ ዝኾኑ ዓሌት ከምዝቦቐልካ፡ ጭቡጥ መርኣያ'ዩ።ኣነ ከምዚ ትርእየኒ፣ንነገራት ቀልጢፈ ብእምነት ድምዳሜ ንምሃብ ኣይህወኽን ኢየ።ከየረጋጽኩ፣ኣእምሮይ ተመራሚሩ ድምዳሜ ከይሃበኒ፣ንኽኣምን ኣዝየ ኢየ ዝሽገር።ስለዚ ቀልጢፈ ካብ ዝኣምን፡ ቀልጢፈ ክጠራጠር ይቐለለይ። ደጋዊ ሕብረ ቀለመይ፣ ከምዚ ትርእዮ ኣዝየ ጻዕዳ ኢየ። ለማሸ ጾጒረይ ረኣዮ። ኣነባብራይ'ውን እንተኾነ ከምዚ ናትካ፡ ብሸለልትነት ዝተኸበበ ዓይነት ኣይኮነን።ነፍሲ-ወከፍ ካብዛ ኣደ ዝነዝዕ መግቢ፣ኣየናይ ኢዩ መኣዛ ዘለዎ፡ ኣየናይ ዘየብሉ መምየ ክምገብ ተዘይክኢለ፣ንነፍሰይ ከም ሰነፍ ኢየ ዝቖጽራ።እምበኣር ኣነ ካብ ኣዝዮም ምዕቡላትን ምሁራትን ሕብረተ-ሰብ ከይኮንኩ ኣይተርፍን።በቲ ሓደ ወገን ሳዕቤን ናይ ኣዚኻ ምሁር ምኻን፣ ኣብ እምነት ዝዛሕተልካን ብጥርጣሬ ዝተኸበብካን ኢኻ ትኸውን መስለኒ። ጥንተ መበቆለይ'ውን ከምኡ ከይኮኑ ኣይተርፍን።ምኽንያቱስ ትርእየኒ ኣሎኻ፣ኣብዛ ማህጸን ንዘጋጥም ምዕባለታት ኩላቶም በዓይኒ ጥርጣሬ ክዕዘቦም ካብ ዝጅምር ነዊሕ ኢየ ኣቕጺረ፣፣ንነፍሲ ወከፍ ምዕባሌታት ናይዛ ማህጸን ድማ፣ብመለክዒ ጽበት ኣእምሮይ እናተመራመርኩ ድምዳሜ ንምሃብ ይቀላጠፍ።ንስኻ ግን መብዛሕትኡ ግዜኻ ብድቃስ ኢኻ ተሕልፎ። ንክትመራመር ኣዚኻ ዝደኸምካ ሰብ ኢኻ። ሰንኪ ኣማኒ ምኻንካ ኢዩ መስለኒ፡ ነዚ ኩሉ ነገራት እምብዛ ንኸይትመራመር ጋሪዱካ ዘሎ።'' ኢሉ ሸምጠጣን ዓብላልነትን ዶርጎሓሉ እቲ ጻዕዳ ምሽልጥ ዝበለ ሕብረ ቆርበት ዘለዎ ማንታ ሓዉ።

``ድላይካ ክትኣምን፣ንድላይካ ክትስዕብ ዝኽልክለካ የለን።የግዳስ ኣነ ፈጣሪ ከምዘሎ፣ብኢደ ፈጣሪ ከምዝተሰራሕኩን ምእማነይ እንታይ ኢዩ ነቐፋይ። ዋላ ድኣ ከምዚ ዝበልካዮ፡ "እዛ ጸይራትና ዘላ ኣደ ብዘይሕጊ ኣምላኽ ዝጠነሰት'ያ" ኢልና ድምዳሜ ንሃበሉ  እምበር፣ገባሪት ጽቡቕና ምኻናኸ ከመይ ክርሳዕ ተኻኢሉ፧ ክንዲ ዝመገበትና፡ ክነኽብራን ብጉድለታታ ተማሂርና ድማ ነቲ ንሳ ክተተግብሮም ዘይተኻእላ ጽቡቕ ነገራት ንምትግባር ክንተግህን ምተገበአ እምበር፣ንኹሉ ጽቡቕ ነገራታ ሰሪዝና፣ብዓይነ ነቐፋን ዘለፋን ክንርእያ እንታይ ኢዩ ጣቁኡ፧`` ኢሉ መረሩኡ  ገለጸ እቲ ከደራይ ማንታ።`` ድሓን ንስኻ ድላይካ ሕሰብ፣ኣነ ድማ ቅኑዕ ኢዩ ዝበልክዎ ድላየይ ክሓስብ ኢየ።ንዓይ ፈጣሪ ብክርደኦ ዘይክእል ኣዝዩ እጹብ ዝኾነ ኣሰራርሓ ኢዩ ሰሪሑኒ፣ንዓኻውን ከምኡ።ነዚ ብምግባሩ ድማ፡ ንፈጣሪ ኣነ ኣዝየ የድንቖን ፍቕራዊ ፍርሓተይ ይልግሰሉን።ብሕጂውን ክንዮኡ ኣዝዩ ብዙሕ ጽቡቕ ነገራት ከምዝገብረለይ ብእምነት ይቕበሎ እምበር፡ ብጥርጣሬ ተኸቢበ ንፈጣሪየይ` እዚ ጎዲልካ፣እዚ መልእ፣ስለምንታይ ከምዚ ትገብር!` ኢለ ኣብ ልዕሊኡ ነቐፋ ኣይገብርን፡ ኣይደፍርን'ውን። ናተይ እጃም ነዚ ድንቂ ስርሓቱ ከድንቖን ከመስግኖን ኢዩ።ድማ ከምኡ ተገበርኩ ጉቡአይ ኢዩ ።ብድሕሪኡ፡ ካብዛ ማህጸን ምስ ወጻና፣ልክዕ ብኸምዚ ከማይ፡ ብኢድ ፈጣሪ ዝተሰረሐት ጓል ሔዋን፣ሕጊ ኣምላኽ እትፈልጥን እትርዳእን፣ንፈጣሪ እትፈርህን ኢየ ከእቱ ዝደሊ።ነዚ ብምሕሳበይ ከምዘይትቕበለኒ ኣዳዕዲዐ ይፈልጥ ኢየ።እረ ንፈጣርየይ ብምእማነይ ዕሽነት ኮይኑ ክስመዓካ ከምዝኽእል ይርደኣኒ ኢዩ።ንፈጣሪኻ ንኽትኣምኖ ኣነ ከገድደካ ኣይደልን`የ፡ መሰልካ ኢዩ ድላይካ ክትሓስብ።ናይ ክልቲኣትና ፍረ ሓሳብ ግን፡ ብናይ ፈጣሪ መንፊት ዝንፈየሉ ግዜ ክመጽእ ኢዩ።መንና ኢዩ ቅኑዕ መንና ኢዩ ግገኛ ድማ ፈጣሪ ፍርዱ ክህብ ኢዩ።'' ኢሉ ድምዳሜኡ ሃበ እቲ ከደራይ።

`` ድሮ ሕጂውን ሕሉፍ ሓሊፍካ፣ነዚ ዝበልናዮን እንሓስቦን ነገራት፣ መማዪ ሽማግለ ኣሎ ኢልካ ትኣምን ምህላውካ ዘገርም ኢዩ፧ መን ኢዩ እንታይ ከምዝሓሰብኩ ዝፈልጥ፣መን ኢዩ ዝፈርደኒ፣መን ኢዩ'ኸ ዝዳንየኒ፧ ሸምጋሊ ኣየድልየንን ኢዩ።ባዕላይ ንባዕለይ ኢየ ሸምጋሊ።`` በለ እቲ ኣዝዩ ብርጡጥ ጻዕዳ ምሽልጥ ዝበለ ሕቡሩ።``ብዝኾነ ናብቲ ኣርእስቲ መበገሲና ክወስደካ፣'' ኢሉውን ጀመረ እንደገና እቲ ጻዕዳ ማንታ። ``ኣነ ክምርዓዋ ዝደሊ ሰብ፣ ሕበረ ቀለማ ምችእቲ ዝጸነሐትኒ ኢየ ዝደሊ።ስቕ ኢለ ክማሚ ግዜየይ ኣይከባኽንን ኢየ።እዚውን ከምዚ ንስኻ እትሓስቦ፣ሰብ ዓዲምካ፣መስከርቲ ሰባት ኣምጺኻ፣መንፈሳዊ ሕጊ ኣልቢስካ፣ብድሕሪኡ ድማ ሓንቲ ምስ ሓደ፣ሓደ ምስ ሓንቲ፣ዝብል ማሕላ ኣፈጺምካ ዘይኮነስ፣ ኣሳሪ ማሕለኻ ዘየብሉ ከም ደስ ዝበለኒ ኢየ ክነብር ዝደሊ።ስለዚ ሎሚ ዝተመራዕኽዋ ምላልባሽ፣ጽባሕ  ካልእ ልዕሌኣ ጽባቐ ዘለዋ ክረክብ ስለዝኽእል፣ኣብ ሓንቲ ዕድል እንዳነበርኩ፡ ንዝመጹ ካልኦት ማዕጾ ዕድላተይ ክኸስር ኣይደልን`የ።`` ኢሉ ኣስተንፈሰ፡ ዓይነ ዓይኑ እንዳጠመቶ እቲ ጻዕዳ ማንታ። ዘረብኡ ድምዳሜ እንከይሃበሉ ግን ክልቲኣቶም፣ ድምጺ ኣውያትን ምውስዋስ ማህጸንን ሰመዑ። እታ ኣደ`ያ ጻዕረ ሕርሲ ተታሒዛ።ካብ ማህጸን ዝፋነዉሉ ግዜ ኣኺሉ።ቃንዛ ስለዝብርተዓ፣ ጅማውቲ ናይቲ ማህጸን ተንቀሳቐሰሞ፣ ካብ ማህጸን ዝፈላለዩላ እዋን ከምዝኣኸለት ዝፈለጡ እንክመስሉ'' ኣነ ቅድም ክወጽእ፣ኣነባ`` ብምባል ዳግማይ ክርክር ሓደ ኢሎም ጀመሩ።

እታ ኣደ ቅልውላው በርተዓ።መን ኢዩ ቅድም ጽሓይ ክርኢ፣መን'ዩኸ ቅድም ጡብ ክቐምስ፣መን`ዩ ስዒሩ ዝዕወት፣ካብ ማህጸን ወጺኡ ተራኺ ማህጸን ክኸውን፧መን ኢዩ ከዘንትዎ ነቲ ዝነበረ ክርክር፧ህዝብን መቕረብን ቤተሰብን ዕልልታኦም ንኽሰምዕ ቀዳማይ ዝውለድ መን`ዩ፧ እቲ ሓደ እግሩ ይሰድድሞ፣እቲ ሓደ ድማ ነዲሑ ይሓድጎ፣እቲውን ብቴስታ የናጉጾሞ፣ብርእሱ ቀልጢፉ ክወጽእ ይደሊ። ክከራኸሩ ክብሉ ግዜ ወሲዶም። ከይተሰማምዑ ግዜ እንተወሲዶም መቸም ዝመጽእ ሳዕቤን ንኹላቶም ዝለኻኽም ምኻኑ ፍሉጥ ኢዩ።ሃንደበት ብዘይተሓሰበ ቦታ ቀዳድ ተፈጥረሞ፣ጩራ ጸሓይ ብማእከል ናይቲ ከብዲ በሲዓ ኣብ ማእከሎም ብርሃና ብማዕረ ደጉሓትሎም።ኦፕረሸን፡ መጥባሕቲ'ዩ። ብፍታዎም ብስምምዕ፣በብሪጋ ፡ ብሕጋዊ ኣፍደገ ክወጹ ዝግበኦም፣ ከይሰማምዑ ስለዝተሰማምዑ እዚ ኾነ። ስለዚ በፍንጫ፡ ብኦፕረሸን ክወጹ ተገደዱ። ክትሰማማዕ ተዘይክኢልካ ለካ ኣሰማማዒ ኣሎ'ዩ፣ክትውለድ ተዘይደሊኻ ኣውላዲ ኣሎ።ኣደ'ውን ባዕላ ክትሓርስ ተዘይክኢላ ኣሕረስቲ ክህልዋኣ ግድነት ኢዩ።ተዘይኮነ ግን ኣሕራሲ ሰንኪ ዘይምህላውን፣ሰንኪ ክርክር ናይቶም መናቱን፣እታ ኣደ ሂወታ ትስእንሞ፣ብኡ መንጽር ድማ እቶም ክልተ ማንታ ጸሓዮም ከይረኣዩ ኣብ ውሽጢ ማህጸን ምተቐብሩ። ማህጻን መንበሪቶምን መቓብሮምን ምኾነት።

ነገራት ብስምምዕ ክፍትሑ ጽቡቕ ኢዩ፣ተዘይኮይኑ ግን ከይፈተኻ ከሰማምዑኻ ዝኽእሉ ኩነታት ክኽሰቱ ባህርያዊ'ዩ።እዞም ክልተ መናቱ ከይተሰማምዑ ትሸዓተ ኣዋርሕ ኣብዛ ማህጸን ተቐሚጦም። ኣብ ግዜ ልደቶም'ውን ንስምምዕ ሓንጊዶም።ከይፈተዉ ዝሰማምዕሉ ኣጋጣሚ ግን ተፈጢሩ። በቃ ብመጥባሕቲ ክወጹ! ኣብዛ ዓለም ምስ መጹኸከ ይሰማምዑዶ ይኾ፧ ዓቢ ምልክት ሕቶ'ዩ፡፡

ወስብሐት ለእግዚኣብሔር፡

ሕቱም-መጽሓፍ