በስመ ሥላሴ
ህዉኽ ዝብእስ፡ ቀርኒ ብዕራይ ይነክስ" ትብል ኣደይ። ነዘን ቃላት'ዚኣተን ክግደሰለንን ከስተብህለለንን ዝጀመርኩ መዓስ'ዩ፧ መልሲ፣- ኣብቲ ብእግረይ ደልዲለ ኣብዛ ዓለም ምርጋጽ ዝፈለምክሉ እዋን፡ ንዓርከ-መዘና ከኣ ከም ተወሳኺ ናይቲ ኣብ ቤት-ኣቦይ ዝነበረ ስድራ-ቤታዊ ሕውነት፡ ክግደሰሉ ኣብ ዝጀመርክሉ ዕድመ ንእስነት'ዩ። እቲ ዕድመ'ቲ፡ ብዙሕ ዝተጠናነጉ ማሕለኻታት ሕይወት ከተሳስየሉ ዘይትኽእል፡ ቦዱ ኣእምሮ ዝውንን ክልል ዕድመ'ዩ። ስለዝኾነ ከኣ'ያ ወላዲተይ፡ ታህዋኽ ቀታሊ ዓወት ምዃኑ ንምስትምሃር፡ ትጥቀምውላ ዝነበረት ነዛ ምስላ ትግርኛ።
"ህውኽ ዝብእስ ቀርኒ ብዕራይ ይነክስ" ጨለን ወሓለን ምስላ'ዩ። ሰብ ካብ ማሕጸን ኣዲኡ ብሰላም ተወሊዱ፡ ናብዛ ዓለም ምስ መጸ፡ ቀዳምነት ዝረኽቦምን ምስ ካልኦት ሕብረተ-ሰባት ብዝተረጋገአ መንፈስ ክነብር ከምዝእእል ዘስተምህርዎን ወለዱ፡ ብዝያዳ ድማ ኣዲኡ'ያ። እምበኣር ወለዲ፡ ዉላዶም ብሰንኪ ታህዋኽ ኣብ ሕማቕ ከይወድቕ፡ ክቱር ጻዕርታት'ዮም ዝገብሩሉ። ምህዋኽ ጽቡቕ'ኳ እንተዘይኮነ፡ ንዝጎድኣካ ነገር ምርባጽ ግና ጉድኣቱ ዝያዳ ይብእስ። ከም ዝፍለጥ፡ ባህርይ ዝብኢ ብሓይሊ ሃዲንካ ምምእራር'ዩ። ብሕጽር ዝበለ፣ ስነ-ሓሳብ ኣያ ዝብኢ፡ ብዕራይ ቀቲልካ ሕይወትካ ምምራሕ እዩ። እዚ ብዓይነ-ርድኢት ኣብዑር ዓመጽ ኴኑ ክረአ እንከሎ፣ ንዝብኢ ግን ጉዳይ ከብድኻ ምግባር ስለዝኾነ ግድን'ዩ ክሃድን። ተሃዊኽካ ቀርኒ ምንካስ ግና ክልተ ክሳራ ኣለዎ ንዝብኢ።
√ እተን ድልዱላትን ተረርትን ኣስናኑ ተሰባቢረን፡ ምንጋግኡ ብዘይ ሓንቲ ስኒ ባዶ ትተርፍ። ድልዱላት ኣስናኑ፣ ተሪር ጅማትን ስጋን ክንጭታ ዝኽእላ ዝነበራ፣ ሰንኪ ታሕዋኽ ቀርኒ ስለዝነኸሳ፣ ጓህማም ዝብኢ ይቕየር። እዚ ኲነት'ዚ፣ ኣስናንኑ ስለዝረገፈ፣ ናይ ምንባብር መጻኢኡ ሕቶ ምልክት`ዩ። እምበርከ፣ ክሕኽን ይኹን ክቚርጥም እንተዘይክኢሉ፣ ካልእል ክሃድነሉ ዝኽእል መሳርያ ኣይተዓደለን።
√ ከብዱ ክዕንገል ዝሓሰበ፡ ኣብ ዘይንከስ ኣብ ቀርኒ ስለዝነኸሰ፡ ንሓደጋ ይቃላዕ። ማለት ንብዕራይ፡ ብቕድሚኡን በተን ጒላ ዝዂዕተለን ተረርቲ ኣቕርንቱን ስለዝመጾ፥ ነብሰ-ምክልኻል ክገብር ምቹእ ባይታ የንጽፈሉ። ብተዘዋዋሪ ዝብኢ ንብዕራይ ምቹእ ጒላ ይኾነሉ ማለት'ዩ። ፍጥር ክብል ንሃድን ዘይተዓደለ ብዕራይ፡ ስንፍናን ታህዋኽን ዝብኢ ሃድን ከምዝለማመድ ይገብሮ።
ከብዱ ከዐንግል ዘሓሰበ ዝብኢ ከኣ፡ መዝሓል ሕርቃን ናይ ብዕራይ ኴኑ ከብዱ ይብትበት። ምላልባሽ ከምልጥ ዕድል እንተገይሩ ድማ፡ 'ብዕራይ ጎይይዎ' እናበሉ መስሓቕ መዘንኡ ኴኑ ይተርፍ። ታህዋኽሲ እምበኣር ለካ ማዕረ ክንድዚ'ዩ ዓወት ዘስእነካን ዘጽርፈካን።
ዘለናዮ ዘመን "መን እንታይ ኢሉ" ንምስማዕ ወይ ከተስምዕ እትህንደደሉ ናይ ማስ-ሜድያ ግዜ ኢና ዘለና። ብወገነይ ነዛ "ማስ-ሜድያ" እትብል ቃል ብትግርኛ ክትርጉማ ብዙሕ ፈተነታት ገይረ እንድየ፦ ማዕረ ክንድዚ ኣእምሮ ወዲ-ሰብ ገዚኡ (ብሒቱ) ይነብር ምህላዉ ግና ወርትግ'የ ዝግረም። ብዝኾነ፡ እንተስ ብይኸውን ወይስ ብይመስለኒ፡ ወይ ድማ ብፈሊጥ፡ "ማስ-ሜድያ፡ እትብል ጽንሰ-ሓሳብ፡ ብክልተ ድርብ ቃላት ዝቖመት ናይ እንግሊዝኛ ቃል ኴና፡ ብትግርኛ ምትሕልላፍ ሓበሬታ ማለት ይመስለኒ። ክንጥምዝዛ 'ንተተደልዩ ድማ፡ 'ሕጹጽ-ወረ' ወይ ከኣ 'ስሉጥ-ወረ' ማለት ክትከውን ኣለዋ" ኢለ ይሓስብ ነይረ ሓደ እዋን። ደሓን ክቡራት ኣንበብቲ፡ ነቲ ዘለኩም ዝያዳ ፍልጠትኩም ምስዚ ኣርእስቲ ዝመሳሰል ወስ ክትብሉ ንዓኻትኩም|ን ክሓድጎ።
ሓቂ ይሓይሽ ጥዕና ዘለዎ ወረ`ኳ ፈውሲ ኣእምሮ እንድዩ፥ ማዕረ ክንድኡ ወረ ከተባጽሕ ወይ ወረ ክትሰምዕ ህንጡይ ምዃን ግን፡ ምስቲ ህዉኽ ዝብኢ ተመሳስለካ። ናይ ሎም ሰብ ካብ ንጽቡቕ ዜና፡ ሕማቕ ወረ ክሰምዕ ወይ ከስምዕ ዝህወኽ ይዝሕ ኣሎ። ወለድና፡ ንሕማቕ ክንህወኸሉ እንከለና ዘይኮኑስ፡ ንጽቡቕ ነገር ክንህወኽ እንከለና እዮም፡ ነዛ ምስላ ዝደጋግሙልና ነይሮም። እቲ ምኽንያት'ውን ርዱእ'ዩ፡ ብሰንኪ ታህዋኽ ምስትውዓል ኣእምሮና ስለዝዛባዕ፡ ነቲ ዝሓሰብናዮ ጽቡቕ ነገር መታን ከይንኸስሮ ብማለት'ዮም። ናይ ሕጂ ሰብ ግን፡ ክልተ ነገራቱ'ዩ ዘገርም።
√ ብኣእምሮ ሰብ ኣብ ዝተሰርሐ ማስሜዳ፡ ግዙእ ኴኑ ይነብር ምህላዉ!
√ ኣክንዲ ጽቡቕ ፍልጠት ንምኽዕባት ዝህወኽ፡ መን እንታይ ኢሉ ወረ ንምእካብ ይህንደድ ምህላዉ!
ወለድና ኲልንትናና ንማስሜዳ ተወፍዩ ምህላዉ ተዝርእዩዎስ እንታይ ኮን ምበሉ፧ 'ጽቡቕ ክትረክብ ምህንዳድሲ ድሓን ነይሩ፡ ድሓን ንዘየምጽእ ወረ ክትምእርር ግዜኻ ምብኻን ግና፡ 'ታይ'ዩ ጣቊኡን ቊንቊኝኡን፧' ኢሎም ምተገረሙ ይመስለኒ። ኤእ እንቋዕባ ኣይርእዩና፡ እንታይ ኢሎምከ ክምስሉ!
መን እንታይ ኢሉ ዘይኮነ ግና፡ መን እንታይ ይጠቕመኒ ተንኸውን ጽቡቕ ምበዝሐ። እወ፡- መን እንታይ ይብል ኣሎ፡ ዘይኮነስ መን እንታይ ተራ ኣለዎ ኣብ ሕይወተይ፡ መን መዓስ እንታይ ኢሉ ዘይኮነ ከኣ፡ መን መዓስ ይሃንጸኒ፡ መን ዘፍርስ ተዛሪቡ ዘይኮነ፡ መን እንታይ ዝሃንጽ ተዛሪቡ ኢልና ዝያዳ ተንግደስ፥ ኣብዛ ዓለምና ዝሃንጽን ዘሀብትምን ሓሳባት ምበዘሐ። እዚ ናይ ሕጂ ዝፈረሰ ኣእምሮና ድማ፡ 'ብቅልጡፍ ተጸጊኑ፡ ጽባሕ ተስፋ ዘለዎ ትውልዲ ከፍሪ'ዩ' ኢልካ ብዘይስክፍታ ምንባር ምተጀመረ። ሎምኮ ሰብ፡ ኣይኮነን ንናይ ጽባሕ ሰብ ሓድጊ ክገብርን ክምህዝን፡ መሃዚ ኣእምሮና ብማስሜድያ ተመንዚዑ፡ ሰብ ንርእሱ ክኾነሉ ኣብዘይክእል ደረጃ'ዩ ተበጺሑ ዘሎ።
ኣንክንዲ ቴክኖሎጅን ማስሜድያን ብምብዝሑ፡ ሃብታም ፍቕሪ ክህሉ ዝግብኦ፡ ኣብ ዲቕ ዝበለ ስሙር ጽልኢ ከም ንሽመም ኴንና ኣሎና። ይዋእ! ኣባ ጓይላ ዘይብሉ ዘመነ ስሙር ጽልኢ! እቲ ቀደም-ቀደምሲ፡ ኲሉ ጽሒፉን ኣንቢቡን ዝኽእል ስለዘይነበረ፡ ኣብ ርሑቕ ንዘሎ ሰብካ፡ ብሓደ ክኢላ ገይርካ ደብዳበ ተጽሕፍሞ፡ ሰታሪት ዓዲግካ ብምዕሻግ ብሰብ ትሰደሉ። እታ ሰታሪት ድሕሪ ነዊሕ መዓልታት ኣብ ቦታኣ ምስ በጽሐት ድማ፡ ንሱ እቲ ተቐባሊ ምንባብ ብዝኽእል ገይሩ የንብባ። ሽዑ እቲ ዝነበረ ፍቕርን ናፍቖትን እናሻዕ ፉሕ-ፉሕ ይብል ነይሩ። ሎም ግን ኣክንዲ ኲሉ ወዲ-ኣዳም መራኸቢታት ዝቐለለሉን ኲሉ ከንብብን ክጽሕፍን ዝኸኣለ፡ ኲሉ ንጽልኢ ህውኽ ኴኑ'ሎ።
ቴክኖሎጂ ከምቲ ሰብ ዘምጽኦ፡ ኲሉ ሰብ ንጽቡቕ ክጥቀመሉ ዝግብኦ፡ ብዙሕ ሰብ ንመጻልእን መማሰውን ክጥቀመሉ እንክትርኢ፥ ሕሉፍ ዘመነ ህውኽ ዝብኢ ዝበጻሕና ይመስለኒ። ካን በቃ፣ ሰብ ዳርጋ ጽቡቕ ክረክብ ኢሉ ኣይኮነን ኣብ ማስሜድያ ተሰጢሑ ዝውዕል ዘሎ ክትብል ትደፍር።
እግዚአብሔር አምላኽ፡ ንማስሜድያ እንቋጻጸረሉ ዘመን የምጻልና።
ሎቱ-ስብሐት!
