ቆርበት-ሰብ!
ስመ ሥላሴ
ትኽ-ትንፋስ'የን ክልቲኤን መዛኑ
መንፍዓተን ሓደ ሚዛኑ
ቊመተን ሓደ ሕብረን ግን ነንበይኑ
መምህረን ሓደ'ዩ ብዓል ሓደ ዓይኑ
ጒድ'ዩ ከረድእ ንታሪኽ ተንቲኑ
ስለ ቈርበት-ሰብ ይፈልጦ-ይፈላልጦ
ኣጥዕዩ ይትንትነለን ነናይ እን-እኑ
"ዕዳጋ ቀደም ነይሩ
ኲሉ ሰብ ክቀዳደም ነንሕብሩ
'ቲ ሓደ ክሽየጥ ተገቲሩ
ይውዕል ብሞቚሕ ተሓይሩ
'ቲ ሓደ ክሻየጥ በብዲሉ
ብገንዘቡ ይረአ ሕልፊ ከቢሩ
ኲሎም ብሓደ ኣብ ሐደ
ኣብ ሓንቲ ጸሓይ ይውዕሉ
ኣብ ሓደ ዕዳጋ ጽቕጥቅጥ ይብሉ
ብሓንቲ ምድሪ ዝዕንገሉ
ብሓንቲ ደመና ዘጽልሉ
ብሓንቲ ሽያኽ ዝጠሉ
ክንሶም ይበዳደሉ
ነይሮም ግን ሓደ-ሓደ
'ድሪም ከቢሩ
ቆርበት ሰብ ሓሲሩ'
'ና'ሉ ዘማርሩ"
ኢሉ ዝመሃረን መምህረን ከጽንዓ
ኣብ ፈተናአን ከድምዓ
ናብ ቤተ መጽሓፍቲ ኣቕንዓ
ብከተማ ሕልፍ ክብላ
ሎሚ'ውን ለካ ኣሎ ዕዳጋ
ቆርበት-ሰብ ዝሽየጦ ብሪጋ
ኣብቲ ጽዑቕ ዕዳጋ
ከይተፈለጠን ተጸምዳ
ሕብሪ ሰብ ከም ወጠጦ ክዕድጋ
ይመርጻ ሜክ-ኣብ ይወስዳ
ኣብኡ ንሓንቲ ሰምዒዐንኣ
ምስኡ ምስቲኣ ከተማርር ብዕዳጋኣ
ጸሊም ሜክ-ኣብ ቀሪባስ ሓሲርዋ
ምሻጡ ኣብይዋ
ክትበኪ ርኤንኣ
"ዕዳጋይ ሓሚዱ
ቀቀይሑ ተለሚዱ
'ዚ ቆርበትና ብሓመዱ
እንታይ ጉዱ ንሓድሕዱ
ጻዕዳ ድዩ ሕልፊ ረጒዱ
ወይሲ ቀይሕ'ዩ ጻዕድዩ
ደምና'ሞ ኲሉ ሓደ'ዩ
ግዝኡለይ'ባ ስለፈጣሪ
ድራረይ ክኣሪ"
ክትብል ሰሚዐን
ናይ መምህረን ዘዘኪረን
ብልበን ነቢዐን
ሽዑ ስለፍቕሪ ክብላ
ንሸቃጦ ብሓደ ክጠምራ
ምሕዝነተን ከይከስራ
ሓንቲአን ኣብቲ ሓደ
ሓዴአን ኣብዚ ሓደ
ሕብረ-ጸሊም ጻዕዳ
መሪጸን ክዕዳጋ
ሎቱ ስብሐት!
