በስመ ስላሴ
√ ካብ ውሽጥኻ፡ መናድቕ ትዕቢት ክፈርስ ትደልዮ እንተኾይንካ፡ብመጀመርያ፡-
√ ንስኻ ሓደ ካብ ሰባት'ምበር ልዕሊ ኩሉ ሰብ ዘይምኻ ተረዳእ!
√ ኣካል ናይ ሓደ ሕብረተ-ሰብ ኢኻ'ምበር፡ ልዕሊ ኩሉ ዘይምኻንካ ክትኣምን ኣለካ።
√ ኣካል ናይ ሓደ ሕዝቢ እምበር ልዕሊ ኩሉ ሕዝቢ ከምዘይምኻንካ ክስቆረካ ኣሎዎ!
√ ከም ኩሉ ክርስትያን ሓደ ዓይነት ሰማያዊ ርስቲ እትወርስ'ምበር፡ ንመንግስተ ሰማያት ልዕሊ ኩሉ ከምትጽሓካ ገይርካ ኣይትሕሰብ!
√ ንስኻ ኣካል ናይ ሓንቲ ማሕበረ ክርስትያን ኢኻ'ምበር፡ ንነብስኻ "ዓይኒ ማሕበር ኢየ! እንዳበልካ ኣይተታልላ።
√ ካልኦት ብመንፈሳዊ ይኹን ስጋዊ ብቕዓት ኣዝዮም ዝበልጹኻ ክህልዉ ከምዝኽእሉ እመን!
ስለዚ፡-
√ ስለቤተክርስትያን ክትብል "ሓልዮተይ ዘይተፈልጠለይ!" ኢልካ ኣይከተዕገርግርን ኢኻ፡ ምኽንያቱ ነቲ ከማኻ ዘገልግል ዘሎ ብጻይካ'ውን ከምቲ ናትካ ሓልዮት ናይ ቤተክርስትያን ክስምዖ ከምዝኽእል ስለእትፈልጥ'ዩ።
√ "ቅድመ ኩነት ናተይ ሓሳብ ይተግበር!" ዝብል ሰይጣናዊ ድርቅና ኣይክሕዘካን'ዩ፡ እምበርከስ ካብዚ ናትካ ዝበልጹ ካልኦት ዓበይቲ መንፈሳውያን ሓሳባት ክውሕዙ ከምዝኽእሉ ስለእትርዳእ'ዩ!
√ ብደገ ዝመጸካ ነቐፌታን ተቓውሞን፡ "ከም ፍቓድካ ይኹን ኣምላኸይ!" ኢልካ ንምቕባሉ ኣይክጽግመካን'ዩ፡ ምኽንያቱ ልሳንካ ንባዕላ፡ኣብ ምጽራፍን ምድፋርን ዘሕለፈቶ ግዝያት ቀሊል ከምዘይኮነ ስለትርዳእ!
√ ማለት ሓንቲ እትነቅፍ ልሳን ዘላቶ ሰብ፡ ልሳኑ ኣብ ነቐፌታ ዝቕበል ኣቕምሮ ዝተተኽለት ልሳን ክትከውን ስለዘለዋ'ዩ።
√ ጌጋታት ንምርኣይ ዝህወኻ ኣዕይቲ ዘለወኦ ሰብ ድማ፡ ንሳተን እተን የዕይንቱ ኣብ ንጌግኡ ክቕበል ዝህወኽ ኣእምሮ ክትከላ ስለዘለወን'ዩ።
√ እቲ ጌጋታት ንምእራም ዝወጣወጣ ኣጻብዕቲ ዘለወኦ ሰብከ፡ ኩለን ኣጻብዑኡ፡ ብክጋገ ዝኽእል ኣእምሮ ይእዘዛ ምህላወን ፍሉጥ ስለዝኾነ'ዩ።
ሓንቲ ምሳሌ፦
√ ንምሳሌ፡ በታ ንምፍርራሕን ጌጋ ንምእራምን ኢልና ንምውጥዋጥ እንጥቀመላ መመልከቲቶና፡ በይና ፈሊና ናብቲ "ጌገኛ'ዩ!" ዝበልናዮ ሰብ ገጽና ብምምልካት ምስ ኣዋጣወጣናያ፡ እተን ዝተረፋ ዝበዝሓ ኣጻብዕትና ግና ናብ ገዛእ ርእስና ኢየን እንዳመልከታ ዘወጣውጣልና። እምበኣረከስ ተፈጥሮ ኣጻብዕና፡ ንናይ ሰባት ጌጋ ንምፍላጥን ንምግናሕን እካ ንጥቀመለን እንተኾንና፡ ብሚእታዊት ክረአ ተኾይኑ ግን፡ 25% ሓንቲ ጻብዕቲ ጥራይ ንናይ ካልኦት ሰባት ጉድለት ንምግናሕ ክትጠቕማና እንከላ፡ እቲ ዝበዝሐ ቁጽረን ግን 75% ናትና ጉድለት ከርእያና ክብላ ኢየን በቲ ዝበዝሐ ቁጽረን ገይረን ናብ ገዛእ ርእስና ዘአንፍታ።
√ ስለዚ ድርቅናናን ትዕቢትን ወጢርና እካ ጉድለት ካልኦት ክንርኢ ህዉኻት እንተኾንና፡ እግዚኣብሔር ግን በዘን ናይ ኣጻብዕትና ተፈጥሮ ገይሩ ቀዳምነት ናትና ክንርኢ ከምዘለና እንዳመሃረና ይነብር።
እግዚኣብሔር ኣምላኽ ትዕቢተ ሰይጣን የርሕቐልና፡ ትሕትና ቅዱሳን ድማ ይዓድለና!
