ሕጽር ዝበለ መንፈሳዊ መልሲ ንሕቶኹም፡

1) ብዜይካይ ካልእ ኣምላኽ ኣይተምልኹ እንዳበለስ፡ንምንታይ ንማርያም፡ንመልኣኽቲ፡ንቅዱሳን ንሰግድ፧(ዘጽ20፥3)

መልሲ¶¶¶ 

ኣምላኽ እንታይ ማለት ኢዩ?ምምላኽ ማለትከ፧
ኣምላኽ ማለት ካብ መለከ፡ገዝአ ዝብል ግእዛዊ ግሲ ዝወጸ ኮይኑ፡መላኺ፡ገዛኢ ማለት ኢዪ።ዘጽ20፣3 ተጻሒፉ ዘሎ፡ብዜይካይ ካልእ ኣምላኽ ኣይተምልኽ ኢሉ።ኣስተውዕል፡"ብዜይካይ" ትብል ዘላ ቃል ነስተብህለላ።ኣብ ክንዳይ ተኪእካ፡እዚ ኣምላኽ ኢዩ፡"እዚ ኣምላኽነቱ፡ገዛእነቱ፡ሓያልነቱ ክንዲ እግዞኣብሄር ይኸውን ኢዩ፡! ኢልካ ንዓይ ንእግዚኣብሄር ንድሕሪት ገዲፍካ፡ኣብ ልዕለይ ካልእ መላኺ ኣይትግበር።ምኽንያቱ ብዘይካይ ካልእ ክመልከካ ዝኽእል ሓይሊ ዘለዎ የለን።" ኢዩ ዝብል ዘሎ።ልክዕ ኢዩ፡ኣብ ቤተ ክርስትያን ምስ እግዚኣብሄር ኣመዓራሪና እንርእዮ ፍጡር የለን፡ብሕጂውን ኣይክህሉን ኢዩ።

እዚ ዝበለ እግዚኣብሄር፡ወድሰብ ንፍጡር ከምልክ ስለዝጀመረ፡እስራኤላውያን፡ከይተረፈ እዚኩሉ ተኣምር እንዳገበረ ኣብ ዓዲ ስደት ክንድዚ ዝኣክል ክብሪ እንዳርኣዮም ከብቅዕ፡ከምቶም ግብጻውያን ኣብ ጣዖት መታን ከየምልኹ፡ነቶም ዘምልኹ ዝነበሩ ድማ፡ተኣልዮም ናብ እግዚኣብሄር መታን ክምለሱ ኢዩ ከምኡ ዝበለ።ጣዖት ንኸየምልኹ ዝተዋህበ ቃል ኢዩ።

ተመልከት፡-ሰብ ናብ ጣዖት ከምልኽ እንከሎ፡"እዚ ፈጣሪ ኢዩ፡ዕብየቱ፡ክብረቱ፡ሓያልነቱ፡መላኽነቱ ክንዲ እግዚኣብሄር ጥራይ ዘይኮነስ፡ንእግዚኣብሄር ይሓልፎ ኢዩ፡"እንዳበሉ ኢዮም ዘምልኹ ነይሮም።(ዘጽ7፣10-11 ሙሴ ንንጉስ ፎርዖን ህዝበይ ሃበኒ ንኣምላኹ ከምልኽ ሕደጎ ምስ በሎ፡ተኣምር ኣርእየኒ በለ፡ሙሴ ነታ በትሪ ናብ ተመን ምስ ቀየራ ድማ፡ነቶም ጠንቆልቲ ጸዊዑ፡ሃየ ነቲ ነምልኾ ኣምላኽና ለምንዎ፡ናይ ሙሴ ኣምላኽ ካብ ኣምላኽና ክሕይል የብሉን፡ከነሕፍሮ ኣሎና።ብጥንቁልናኹም ከምቲ ናይ ሙሴ ግበሩ" ኢሉ ኣዘዘ ይብለና።ኣብዚ ንርድኦ፡ንፈርዖን "እቲ ተምልኾ ጣዖትዶ ይዓቢ፡ዋላስ እግዚኣብሄር፡መኖም ይሕይል"ኢልና እንተሓቲትናዮ፡ብዘይውልውል፡ጣዖተይ ይሕይል ኢሉ ይምልሰልና።ነዚ ንኽቃወም ኢዩ እግዚኣብሄር ብዘይካይ ዝበለና።

ስለዚ እግዚኣብሄር ብዝኾነ ይኹን መለክዒ ንዓይ ዝቕድም የለን፡ኣነ ዘይነበርክሉ ዘመን የለን።ፍጥረታት ግን ፈጣሪኦም ኣነ ስለዝኾንኩ ኩሎም ድሐረይ ኢዮም።ስለዚ ክትሰግዱለይ እንከለኹም፡ንኣብ፡ቀዳምነት፡ንወልድ መበል ካልኣይ፡ንመንፈስ ቅዱስ ድማ ሳልሳይ ኢልኩም ከይከፋፈልኩም፡ንሰለስተ ኣካላት ሓደ ስልጣን፡ሓንቲ መላኽነት፡ሓንቲ ፈራድነት ስለዘላትና፡ንስላሴ ሓደ ኣምልኾ ሃቡ፡ካልእ ኩሉ ድሕረይ ኢዩ።ኢሉ እዚ ጥቕሲ ይምህረና።

ሕቶ? ? ?
እሞ እዚ እንዳበለ ደኣ ንምንታይ ናብ ቅዱሳን ንሰግድ፧ ንምንታይ ነመስግኖም፧

ኣስተውዕል ወገነይ።እግዚኣብሄር ብዜይካይ ካልእ ኣምላኽ ኣይተምልኽ ኢዩ፡ዝበለ እምበር፡ንካልእ ኣነ ዘኽበርክዎም ኣይተኽብሮም፡ኣነ ዘመስገንክዎም ኣይተመስግኖም ኣይበለን።ነቶም ኣነ ዘኽበርክዎም ልዕለይ ኣይትገሮም ኢሉ ኢዩ፡ትሕተይ ሰሪዕካ ግን ማዕረቲ ኣነ ዝህቦም ክብሪ፡ክብሪ ሃቦም ግን ኢሉና ኢዪ።እዚ ቃሉ ኢዪ።

ንኣብነት፦ ሀ)ማቴ 5 ዘሎ ኣንቀጸ ብጿኣንሲ፡እቲ" ብጿኣን ብጿኣን! " እንዳበለ ዘመስግን ዝነበረ መን ኢዩ፧እግዚኣብሄር ኢዩ ብርግጽ።እቲ ከምኡ ኢሉ ዝሰብኽ ዝነበረ ክርስቶስ ኢዮሱስ ኢዩ።እዛ ብጿኣን እትብል ቃል ምስጋና ኢያምበር ምርጋም ኣይኮነትን።ስለዚ ስለጽድቂ ዝጸሙኡ፡ስለጽድቂ ዝስደዱ ብጿኣን ኢዮም ክብል ከሎ፡ስለቲ ዝገብርዎ ሰናይ ነገር የመስግንልም ድኣ ኣሎምበር ይረግሞም ኣይኮነን ዘሎ።ሕጂ ስለዘመስገኖም ኣምሊኽዎም ማለት ድዩ፧እሞ ንእግዚኣብሄር ተጋጊኻዶ ንበሎ፧ነቶም ነዚ ዝገበሩ ቅዱሳን ንሱ ብጿኣን ኢሉ ዘመስገኖም፡ንሕና ድማ ብጿኣን ኢልና እንተመስገንናዮም ኣምሊኽናዮም ማለት ድዩ፧እንተድኣ ከምኡ ምግባርና ኣምሊኻናዮም የብለና ኮይኑ፡ክርስቶስውን ተጋግዩ፡ኣምሊኵዎም ማለት ኢዩ፧ኣይፋሉን ደኣ።ንሱስ ኣኽቢርዎም እምበር።ንሕና ድማ ከም ቃሉ ነኽብሮም ኣሎና።

ኣብነት2)ኢዮሱስ ክርስቶስ ንሃዋርያቱ ትሕትና ንኽምህር ኢሉ፡ብዕለተ ሓሙስ ተደቢሩ የእጋሮም ሓጺብዎም ኢዩ።ኣብዚ ተምበርኪኹ ኢዩ ዝሃጺቦም።
(ዮው13፣5 ንመልከት)።እሞ ክርስቶስ ክሳብ ክንድዚ ስለዘኽበሮምሲ፡ኣምሊኽዎም ማለት ድዩ፧ ኣንታ "ብዘይካይ ካልእ ኣምላክ ኣይተምልኽ ኢሉ እንድዩ፧ ኢልካ እትከራኸር ዘለኻ ሕልና መልሰለይ፧ ክርስቶስ ነዚ ትእዛዝ እዚ ዝኣዘዘ ንሱ ኢዩ።እሞ ባዕሉ ኣዚዙ ባዕሉ ይስዕሮ ኢልካ ትሓስብዶ፧ እስከ ምስ ነብፍስኻ ተዛራረብ።
ብርግጽ እምበኣር፡ክርስቶስ ንሃዋርያት ልዕሊኡ ኣማልኽቲ ስለዝኾኑ፡ንሱ ድማ ትሕቲኦም ስለዝኾነ ኣይኮነን ተምበርኪኹ ሓጺብዎ።ኣነን ንስኻን ነቶም ንዑኡ ዘኽብሩ ከምዚ ገይርና መታን ከነኽብሮም ንኽምህረና ደኣምበር።ንሱ ክርስቶስ ልዕሊኡ መላኺ ከምዘየለ ይፈጥ ኢዩ፡ግን ብጸጋ ዘኽበሮም፡ካብ ክብሩ ክብሪ፡ካብ ምስጋንኡ ምስጋና፡ካብ ጸግኡ ጸጋ ዝመጠወሎም ብዙሓት ቅዱሳን ኣሎዉ።ንስኻውን ኣንታ ንናይ ቅዱሳን ክብሪ እትቃወም ዘለኻ፡ክርስቶስ መጽዩ እግርኻ ክሓጽበካ እንተዝብለካስ፡ኣነ ኣምላኽ ኣይኮንኩ፡ኣይትጋገ ንስኻ ኢካ ኣምላኽ ኢልካ ምመለስካሉ ማለት ሲዩ።ንሱ ጥራይ ኣምላኽ ናይ ባህርይ ኣምላኽ ምኻኑ ድኣ ንስኻ ዲኻ ትነግሮ።ጴጥሮስ ሃዋርያኮ፡ኣይትሓጽበንን፡ኢካ፡ንስኻ ኢኻ ኣምላኽ ዝዓይነቱ ተዛሪብዎ ኢዪ።ክርስቶስ ግን ኣረሞ።እግሪኻ ተምበርኪከ ተዘይሓጺበካ ምሳይ ግደ የብልካን በሎ።ንቅዱሳን ከምዚ ዘኽበርክኹዎም ተዘይ ኣኽቢርካ ምሳይ ተራ የብልካን በሎ።ንስኻ ውን ሓወይ ንቅዱሳን ትሕቲ እግዚኣብሄር ከከም ዝተዋህቦም ጸጋ፡ከክብሮም ተዘይኣኽቢርካዮም ካብ ክርስቶስ ክብሪ ኣይክትረክብን ኢኻ።

ኣብነት3) ማቴ25፣34-- ኣንቱም ናይ ኣቦይ ብሩኻን፡-እዛ ጻዊዒትዚኣ ክርስቶስ ኢዩ ከምኡ ኢሉ ነቶም ከም፡ቃሉ ዝነበሩ ኣብ ዘመነ ፍርዲ ክጽውዖም።ሽዑኡ እቶም ሓጥኣን፡ኣንቱም ርጉማን ተባሂሎም ክዝለፉ ኢዮም እትኦም ቅዱሳን ግን ኣንቱም ብሩኻን ተባሂሎም ክምስገኑ ኢዮም።እቶም ዝዝልፎምን፡ዘመስግንክምን ድማ እቲ ፈራዲ ኣምላከ ኣማልክት ክርስቶስ ኢዪ።እሞ ርጉማን ኢሉ ክዝልፍሲ ኣምላኻዊ ዓቕሚ ስለዘለዎ ኢዩ ንበል፡ብሩካን፡ ክብል ከሎ ግን ንምንታይ የመስግኖም፧ ፈጣሪዶ ንፍጡር የመስግን ኢዩ።ፍጡር ድዩ ንፈጣሪ ዘመስግኖ ወይሲ ፈጣሪ፧ከምቲ ንስኻ"ብዘይካይ ካልእ ኣምላኽ ኣይተምልኽ ኢሉ እንድዩ" ኢልካ እትትርግሞ ዘለኻ ኣተራጉማ፡እሞ ክርስቶስውን ነቶም ቅዱሳን ብሩኻን ኢሉ ስለዘመስገኖም፡ኣምሊኽዎም ማለት ኢዩ፧ ንሓደ ነገር እንተኣመስጊንካዮ፡እንተወዲስካዮ ብቐጥታ ኣምላኻዊ ስልጣን ሂብካዮ ማለት ድዩ።ኣይኮነን።ብፍጹም ኣይኮነን።

ክርስቶስ ዘመስግኖም ዘሎ ስለዝተጋገየ ዘይኮነስ፡ከምዘኽበሮም ንኽገልጸሎም ኢዩ።ንሱ ክሳብ ክንድዚ እንዳወደሰ ባሪክዎም፡ንሕና ድማ ንሱ ዘመስገኖም ማዕረቲ ዝሃቦም ክብሪ፡ክብሪ ክንህቦም ግቡእና ኢዪ።

ስለዚ ብዙሕ ክበሃል ይከኣል ኢዩ፡ነገር ግን ንጠቢብ ሓንቲ ቃል ትኣኽሎ።ቤተ ክርስትያን ግን ልዕሊ እግዚኣብሄር ኣሎ ኢላ እተምልኾ ፍጢር የለን፡ኣይክህሉንውን ኢዩ ከኣ።ንቅድስት ድንግል ማርያም፡ንቅዱሳን እትህቦም ክብሪ ትሕቲ እግዚኣብሄር ከምቲ ንሱ ዘኽበሮም ደኣምበር፡ልዕሊኡ ፡ንፍጡር ልዕሊ ኣምላኽ ኣይትሰርዖምን ኢያ።

ወስብሀት ለእግዚኣብሄር ወለወላዲቱ ድንግል ወለመንስቀሉ ክቡር ኣሜን።

ክውለድ እንከሎ፡እተን መሕረስቲ ኩለን ዓለላ፡ክቕበር እንከሎ ግን እቶም ቀባሮ ኩሎም ወጨጩ።

በስም ኣብ ወወልድ ወመንፈስ ቅዱስ ኣሀዱ ኣምላክ ኣሜን።
ሓደ ግዜ ካብ ማህጸን ኣዲኡ ክወጽእ እንከሎ ዝውጭጭ ህጻን ሰማዕኩ።እዚ ህጻን ምውጫጩ ንዓይ ገረመኒሞ፡ንሱ ክምልሰለይ ስለዘይክእል ንሕልናይ ሓተትክዎ፥"እንታይ ኮይኑ ኢዩ እዚ ህጻን ዝወጨጨ፧" ዝምልሰለይ ሰብ ኣይነበረን።ንነዊሕ እዋን ዓቒረዮ ስለዝጸናሕኩ ግን ነቲ ናይ ትማሊ ህጻን ናይ ሎሚ ግን መንእሰይ ዝኾነ ሰብ፡'ብህጻንነትካ እንከለኻስ፡ካብ ማህጸን ኣዲኻ ውጽእ እንክትብል " እንኛርርርርር!" ኢልካ በኺኻ ኢኻሞ ስለምንታይ ይመስለካ ኢለ ሓተትክዎ።

እዚ መንእሰይ ነዊሕ እዋን ኣብዛ ምድሪ ተጋዒዙ፡ምስ ብዙሓት ተላሊዩ፡ምስ ብዙሓት ተራሳሲዑ፡ንብዙሓት ኣሕጊሱ፡ንቡዙሓት ኣግህዩ፡ብዙሕ ግዜ ጽድቂ ገይሩ፡ብዙሕ ግዜ ድማ ሓጥያት ፈጺሙ።ብዙሕ ተማሂሩ፡ንቡዙሓት ሚሂሩ፡ብዙሕ ደኺሙ፡ብዙሕውን ጠንኪሩ፡ኮታ ዉረድ ደይብ ናይዛ ዓለም ዝተረደአ ሰብ ኮይኑ ኢዩ ጸኒሑ።ንኹለን ትጥቕልለን ርግጸኛ ኮይኑ ዝፈለጣ እንተላ ድማ ሓንቲ ነገር ኢያ፡ከምታ ካብ ማህጸን ኣዲኡ ተፈልዩ፡ንሕምብርቱ እተላግብ መለጋግቦ ገመድ መስል፡ብላማ ቀንጢበን እተን መሕረስቲ ካብታ ኣዝዩ ዘፍቅራ ማህጸን ኣዴኡ ዝፈለይኦ፡ከምኡ ድማ ካብዛ ዓለም ካብቲ ኩሉ ዘፍቅሮ ሃብቱን ንብረቱን፡ጉልበቱን ትምህርቱ፡ከይፈተወ እቶም ናብ ዳግማዊት ማህጸን እትመስል መቓብር ዝቐብሩ ቀባሮ ክደፍንዎ ምኻኖም ፈለጠ።ክውለድ እንከሎ፡እተን መሕረስቲ ኩለን ዓለላ፡ክቕበር እንከሎ ግን እቶም ቀባሮ ኩሎም ወጨጩ።

ስለዚ ሓተትክዎ! ብህጻንነትካስ ስለምንታይ በኸኻ፧ንሱ መለሰለይ።
1)ህጻን "ኣብዛ ዓለም ንዝርከብ ውረድ ደይብን፡ኣቐዲሙ ግዲ ተረዲኡኒ ነይሩስ፡ነቲ ጥዑም ብልዖት፡ከይሰራሕካን ከይረሃጽካን ዝንበሮ ናብራ ማህጸን ክፍለዮ እንከለኹ ተደፋነቕኩሞ፡ካብዛ ንእሽቶይ ገነት ተፈልየስ እንታይ ጡዑም ክረክብ ኢየ'ብምባል በኸኹ።
2)ኣብ ማህጸን እንከለኹ ሓጥያት ኣይርኢ፡ጽድቂ ኣይሰምዕ፡ማህጸን ንዓይ ኩሉ ግዜ ትሰትረኒ ነይራ፡ካብኣ ክፍለ እንከለኹ ግን እዚ ኩሊ ዝገበርክዎን ዝገብሮ ዘለኩን ብሕጂ ዝገብሮን ካብ ማህጸን ምፍላይ ዘምጽኦ ጣጣ ኢዩ።
3)ብዙሕ ሃብትን ፍልጠትን ክድልብ ምኻነይ እካ እተን መሕረስቲ ተረዲእወን ነይሩ እንተዓለላ፡ኣነ ግን ድሮ ገዲፈዮ ክኸይድ ምኻነይ ተረዳኣኒሞ ንዕዑ በኸኽሉ!
ስለዚ ካብዛ ዓለም ክፍለ እንከለኹ ዳግማይ ምውጫጭ ኣየድልየንን ኢዩ።ኩሉ ሙሉ ንብኽያት ዘድሊ ዘበለ ወዲኤ መልቀሰይ ኣጻፊፈ ኢየ።ሽዑኡ ንስኻትኩም ኢኹም ከተልቅሱለይ።ኣነ ግን ንብዓተይ ብዓንተውኡ ስለዝጨረስኩ ስቕ ኢየ ክብል" ኢሉ መለሰለይ።

ወይ ጉድ!!!!

ናይዚ ህጻን ካብ ማህጸን ወጺኻ ውጨጫ፡ምስ ናይዚ ሎሚ ካብ ቤተ ክርስትያን ዝወጽእ ዘሎ መንእሰይ ይመሳሰል።እቲ ህጻን ካብታ ማህጸን ውጽእ እንክብል ኣውያት ጀመረ፡እዚ ናይ ሎሚ መንእሰይ ድማ ካብ ቤት ኣምላኽ ውጽእ እንክብል ናይ ጽባሕ ውድቀቱ ግዲ ተረድእዎ ይሁዳዊ ንብዓት ክነብዕ ጀመረ።ይሁዳዊ ንብዓት ግን ገመድ እምበር፡ስርየት ኣየውህብን።

ኣንታ ካብ ቤተ ክርስትያን ንኽትፍለ ህርድግ ትብል ዘለኻ መንእሰይ፡ኣዴኻ ቤተ ክርስትያን ክትወጽእ ኣይደለየትካን ኢያ።ንስኻ ትወጻሉ ሰዓት ኣሎ፡ ሕጂ ኣይኮነን፡ሽዑኡ መርዓዊ መጺኡ ኢዩ ክጸባጸባ፡ንሳ ንዓኻ ብሓደራ ካብ ማይ ዮርዳኖስ ብዝተረኽበ ጥምቀት ተረኪባትካ ኢያ፡ብሓደራ ድማ ናብ ዋናእ ኣብ ምጽኣት ከተረክበካ ትደሊ ኣላ።ሕጂ ግን ኣጋንንቲ ካብታ ምስ ኣዴኻ ቤተ ክርስትያን ዘሎ ናይ ሕምብርትኻ መለጋግቦ ክበትኩ ወትሩ ይጽዕሩ ኣሎዉ።ንስኻስ ተኸኣልካ ስቕ ኢልካ ንበር ኣመስገን፡ስግኡን ደሙን ብንስሓ እንዳተቐበልካ ንበር እምበር፡ነቲ ክፉእ ሰይጣን ንኽቕንጥባ "ኣብዚ ህረመኒ፡ኣብዚኣ ጨንድሓያ" እንዳበልካ ቁስልኻ ኣይተርእዮ።

ኣንታ ኣብዘይ መዓልትኻ ካብ ቤተ ክርስትያን ተፈሊኻ ሉጋም ከምዘይብላ ፈረስ ትነብር ዘለኻ ወገነይ፡መዓልቲ መርዓዊ ከይኣኸለ ስለዝወጻኻ ተመለስ፡ዳግማይ ናብ ናይ ህጻን ሳጹን እቶ፡መዓልትኻ ክሳብ ዝኣክል፡እቶም ካብ ክርስቶስ ምሉእ ናይ ሓኪምነትን፡ዶክተርነት ስልጣን፡ዝተዋህቡ ቅዱሳን ካህናተ እግዚኣብሄር ምክትታል ጥዕናኻ ልገብሩ ኢዮም።

ኣንቲ ኦሮማይ ኦሮማይ እንዳበልኪ፡ተልቅሲ ዘለኺ ወይዘሪት፡ቅዱሳን መላእኽቲ ግን ትንሳኤኺ ንኽርእዩ ወትሩ ነቒሖም፡ይጽበዩኪ ኣሎዉ።ካብ ማህጸን ምውጻእ ከቢድ እካ እንተኾነ፡ኣብዘይ መዓልትኻ ምውጻእ ግን ቁላዕ ኮይንካ ኢካ ትተርፍ።ስለዚ እግዚኣብሄር ዘፍቅረኪ ሓፍተይ፡እግዚኣብሄር ቁላዕ ኮይንኪ ካብ ቤቱ ዝወጻኽዮ ኣጉሂዎ ኢዩሞ፡ተመለሲ ምሉእ ፈውሲ ክህበኪ ኢዩ።እግዝኣብሄር ንዝጠፍአት ነፍሲ ክረክብ፡ንዝተዘርፈት ክመልስ፡ንዝሞተተት ከይተረፈ ከሕዊ ዝኽእል ኤልሻዳ ኣምላኽ ኢዩ።

እዚ ህጻን ሓንቲ ነገር ይኽእል፡ምስ ኣምላኽ ምምባር።ነተን መሕረስቲ ግን ዳግማይ ናብ ማህጸን ኣደይ ምለሳኒ ተዝብለን እካ ኣይከኣልን ኢዩ።ሰብ ካብ ማህጸን ምስ ወጸ ብሰንኪ ጽልኣት ዓለም ዳግማይ ናብ ማህጸን ክምለስ ኣይከኣልን፡ እግዚኣብሄር ግን ካልእ ውቅብቲ ማህጸን ኣዳልዩልና ጸነሐ።
እዛ ማህጸን እዚኣ፡ከም መንግስተ ሰማያት እንክትመስል ፈተነካ ተለዋ ብሓለዋ ግን ዝተኸበት፡እታ ኣደ ናይቲ ህጻን እካ ትሃልኽ ተኾነት፡ዘይሸመትካዮ፡ዘይከፈልካሉ ስጉኡን ደሙን ግን ትምጥወካ፡ከም ያዕቆብ ንኤሳው ኣብ ማህጸን ኮይንካ እካ እንተባሕጨርካያን፡ንሓውኻ ከም ኤሳውን ያዕቆብን ንሓድሕድካ እንተተጋነጽካን፡ንሳ ግን ንኽትናሳሕ ጣዕሳኻ ወትሩ ትጽበ ቤት ኢያ።እሞ ካብዛ ቤት እዚኣስ ካብ ምውጻእ ኣብኣ ምምባር እቲ እንኮ ኣማራጺ ኢዩ።
እግዚኣብሄር ኣብ ቤቱ የምብረና፡ወስብሀት ለእግዚኣብሄር ኣሜን።

ፍቕሪ እግዚኣብሄር ብምሳሌ ክገልጾ ፈቲነስ ምሳሌታት ውሒዶምኒ።

እግዚኣብሄር ኣባና ዘለዎ ፍቕሪሲ በየናይ ምሳሌ ከተረድኡኒ ትኽእሉ፧ ኣባና ዘላቶ ፍቕሪ በታ ድኽምቲ ሕልናይ ብምሳሌ ክገልጸልኩም ይፈቱ።
፩፣ሓደ በጽሒ መንእሰይ፣ኣብ ብሩኩ ዘስንተንፍስ እኹል ጎበዝ፣ከም ንሓንቲ ዕድሜኣ ዝወዴአት ሽማግሌ ሰበይቲ ክምርዖ እንከሎ ተትርእይዎ እንታይ ምበልኩም፧ ኩሎም ቤተ ሰቡ ምኸዓብዎ።ፎእ ምበልዎ፣ንስኻ ትመስል መንስእሰይሲ ነዛ ኣራጊት እንዳበሉ መዋረድዎ። ሓቂ ኢዩ፣እግዚኣብሄር ንኣስታት 5500 ዓመታት ዝኣከል ብምረት ሓጥያት ዝላደየት ንነፍስና ብቅድስቲ ፍቕሩ ፍጹም ኣፍቀራ።ኩሎም ፈተውቱ ቅዱሳን መላእክት ክሳብ ክንድዚ ንስሌና ክብል ዚከፈሎ ፍቕሪ ፍጹም ክሳብ ዝድንጽዎም ኮኑ፣ንሱ ግን ዋላ ብሓጥያት ኣረገውቲ ንኹን፣ክሳብ ሰብ ምኻን ኣፍቀረና።ንሕና ናቱ ልብሲ ለቢስና ግምጃ ክንክለል ዝግባእ፣ነቲ ጺእ ዝጨኑ ስጋና፣ ካብታ ጨና ሓጥያት ዘየብላ ፍጽምቲ ምእዝቲ ዕምበባ ብዝወሰዶ ፍጹም ስጋ፣ግርማ ልብሲ መርዓውቲ ኣልበሰና።

እዚ ነዛ ሽማግለ ዝተመርዓወ መንእሰይ፣ገሌኦም ስለዚሓለይሉ ናይ ሓልዮት ክብሉ ክኽዕብዎ እንከለዉ፣ገሊኦም ድማ መንቀኝነት ዝመበገሲኡ፣ነዛ ሽማግለ ሰበይቲ ምስ መንእሰይ ተምርዕያ ክብሪ ከይስምዓ ኢሎም፣ኣንጻሩ ዝዕጠቑ ኣይሰኣኑን ኢዮም።እዚኦም ብርግጽ ፈተውቲ ናይታ ሰበይቲ ኣይኮኑን፣ሓለይቲ ናይቲ መንእሰይ ድማ ኣይኮነን።

ኢዮሱስ ክርስቶስ፣ኣብ መስቀል ንኽስቀል፣ቀሌቤት ቃል ኪዳንና ድማ ብቀለመ ደሙን ቅዱስ ማዩን ክሓትሞ ምስ ወሰነ፣ብዙሓት ግን ኣይተሓጎሱን።ገሊኦም ቅዱሳን መላእክቲ እረ ክንድምንታይ ቲሕትና ኢዩ፣ኢዮም ብኣንክሮ ዓቢ ምስጋና ኣቕረቡ፣እቶም ርኹሳን መናፍስቲ ግን፣ንሕና ብሓጥያት ዝጨቀና ምስ እግዚኣብሄር ክንምርዖ ስለዘይተሓጎሱ፣ፈጺሞም ቀንኡልና።ንሳቶም ክርስቶስ ኢዮሱስ ከፍቅረና ኣይደልዩም ኢዮም ክቑጠዓናምበር፣ክምርዓወና ኣይደልዩን ኢዮም ክፋታሓና፣ቃል ኪዳኑ ክበትኽ እምበር፣ክሕልወና ኣይደልዩን ኢዮም ክርሕርሓና ዋና ከምዘይብሎም ክገድፈና እምበር።እግዚኣብሄር ግን ፍጹም ኣፍቃሪ ኮይኑ ክሳብ መቓብር ኣፍቀረና።ንመቓብር ቤት ሕማ ተጠቐመሉ፣ናብቲ ዝዓበየ ቤተ ሕጽኖት ንኺወስደና ግን ኣብዚ ጽንሑ ኢሉና ንሰማያት ዓረገ።ወገነይ እግዚኣብሄር ናብ ሕጽኖት ንኽትኣቱ ምስተን ዓሰርተ ደናግል ኣምቢርካ ከይዱ ኣሎ።ንስኻ ግን ለባም ድንግል ኮይንካ ጽናሕ።ገሊኤን ደናግል ዓያሹ ኮይነን ዝጸንሓ ኣሎዋሞ፣ንሳተን ድንግልነአን ንጓና ኣሕሊፈን ዚሃባ ስለዝኾና ናብ ቤት ሕጽኖት ኣይክኣትዋን ኢየ።ንስኻ ግን መንፈሳዊት ድንግልናኻ ዓቅብ፣እናሻዕ ንሲሓ እናተሓጸብካ ድንግልናኻ የሕድሳ።
፪፣ሓንቲ ኣዝያ ድኻ ዝኾነት ሰበይቲ፣ዋላ ጽባቐ ይሃልዋ ካብ ምሒር ድኽነታ ዝኣክል፣ብዙሕ ሰብ ኣይቀርባን ኢዩ።ዋላ ደጋዊ ጽባቐ ይሃልዋ፣እቶም ዝቐርብዋ መንእሰያት ግዝያዊት ዕግበት ንኽረኽቡ ኢሎም እምበር ንቃል ኪዳን፣ንቑምነገር ኢሉ ዝቐርባ ሰብ ውሑድ ኢዩ።ገዛኣ ዝተናዕቀ ስለዝኾነ፣ጓል ሃቡና ኢሎም ዝመጹ ዳርጋ የለዉን።እዛ ጎርዞ ጎጆ ፍቕሪ ንኽተማዕዱ ናብ ፈቐዱኡ ከተማ ኮለል ትብል፣ግን ኩሎም ዕግበቶም አኣርውዮም ምስኣ ደደቂሶም፣ኣርኪሶማ ይሃድሙ እምበር ንዒ ኣነ ኾነኪ ኢየ፣ኣያን ኣቦን ኮይነ ጎንኺ ክኾነኪ ዝብላ ሰብ ኣይትረክብን።ብዙሓት ክቐርብዋ እንከለዉ፣ክሳብታ ተድልዮም ዝረኽቡ እዚ ዘይብሃል ዉዳሴ እንዳወደሱ ነታ ተድልዮም ይወስዱሞ፣ክርሕቁዋ እንከለዉ ድማ ብእልቢ ዘየብሉ ጸርፊ እንዳላሃሙ ይፋነዉዋ።

ሕጅውን እዛ ምስኪነይቲ ጎርዞ፣ጎንና ዝኾነ ኣክሳብ ዘይረኸበት፣ኣብ እንዳባር ክቲሰርሕ ትጅምር፣ናይ ምንዝርና በዓልቲ ሞያ ተቖጺራ ናይ ኣጉባዝ ሃዳኒት ትቕየር፣መልክዓ እንዳኮክሓሓለት እናሻዕ ምስ መልክዓ ቅልስ ትገብር።ሕጅውን ኣይሰልጣን።እሞ በቃ ምኻን ካብ ኣበየኒ እድመይ መታን ከይውዳእ ኢላ፣ካብ ሓደ ዘይትፈልጦ ሰብ፣ንሱ መከላኸሊ ጥንሲ ተጠቒሙ ክንሱ ንሳ ግን ያኢ ብጥበባ ጥንሲ ካብኡ ትጠንስ።ኣቡኡ ዘይተፈልጠ ህጻን ወጢጣ ናብ ዓዳ ትኸይድሞ እተን መዛኑኣ ደቂ ዓዳ እንደገና ኣዝየን የዋርዷኣ።ሕጅዉን እንደገና ትነብዕ።ነዛ ጎርዞ እዚኣ ሓደ ኣዝዩ ሃብታምን ወዲ ኩቡራትን መጽኡ እንተዝምርዓዋ ከመይ ይስመዓኩም፧

ከምዚ እዛ ጎርዞ ካብ ኩሎም ዝደኸየት ዝነበረት፣ንሕናውን ምስ ኣምላኽ ዘዋዳድር ምንም ሃብተ ጸጋ ኣይነበረናን።ንሱ ባዕሉ ግን ጸገወና።ኣብ ፈቐድኡ ቤት ሓጥያት ኬድና ዘርከስናያ ሰብነት፣ኩሎም ኣጋንንቲ ሰሓቑና፣ባዕሎም ኣታሊሎም ኣውዲቖምና ክንሶም፣ክሳብታ ቅድስቲ ሰብነትና ዝረቕቡ ብዙህ ከንቱ ውዳሴ ደርዲሮም፣ድሌቶም ምስረኸቡ ግን ተገምጢሎም ሰሓቑና።ሲኦል ኣፋ መሌአት።ሓንቲ ነፍሲ ናብ ሲኦል ክትኣቱ እንከላ፣እንዳሓጨጩን እንዳሰሓቑን ይቕበልዋ ነበሩ።ብዙሕ ረኸስና፣ክርስቶስ መጺኡ ግን ምስዚ ኩሉ ድኻምና ብሃብቱ ሃብታማንት ገበረና።ኩሎም ኣጋንንቲ ነዓቑና፣ዘይንዕቕ መርዓዊ ግን መጺኡ ኣብ ድኽነትና መረጸሞ ናትና ሞት ጢዒሞ ናቱ ክብሪ ሃበና።መስቐልና ተሰኪሙ፣ኣብ ክሳድና ነኣዲኡ ብሓደራ ኣሰከመና፣ሕማምና ጸይሩ፣ፈዋስነቱ መጠወልና፣ኣብ ውሻጠ መቓብርና ኣትዩ ናብታ ቅድስተ ቅዱሳን ዚኾነት ጥንታዊት ሰፈርና መለሰና።ኣቤት ፍቕሪ እግዚኣብሄር ምሳሌ ተመሰልኩስ ምሳሌ ውሒዱኒ።
ስብሀት ለስሉስ ቅዱስ።

ቅድስና ክትሥበኽ ደሊኻያሞ፣ምዕራፍ ሓደ በየን ትጀመር፧

ስለሰብዶ ትጽሊ ኣሎኻ፣ስለሰብ ትምህር፧ንሰብ ጽቡቕ ምግባርዶ ትምህሮ ኣሎኻ ወይሲ ነቲ ንስኻ እትምህሮ መንፈሳዊ መልእኽቲ:ንምቕባል ዓቕሚ ካብ እግዚኣብሄር ንኪወሃብ ትጽልየሉ ኣሎኻ፧ ኣንታ ክቡር መምህር፣ንሰብ ስለእግዚብሄርዶ ትምህሮ ኣሎኻ: ዋላስ ኣቐዲምካ ንእግዚኣብሄር ስለቶም ንስኻ ትነግሮም ሰባት ብጸሎት ትነግሮ ኣሎኻ፧ንእግዚብሄር ስለሰባት ብጾሎት ምሕታትን፣ንሰባት ስለእግዚኣብሄር ምስትምሃርን ቅደም ተኸተል ዘድልዮ ነገር ኢዩ።ነቲ ሰብ ብዛዕባ ቅድስና ቅድሚ ምንጋርካ፣ነቲ ቅዱስ ኬድካ ቅድስቲ ልቢ ንኽቲህሉ ብጸሎት ለምኖ።ምኽኒያቱ ቅድስት ልቢ ከይተረኽበት ቅዱስ ቃል ክዝራእ ኣይከኣልን ኢዩ።ብዘይ ቅዱስ ልቢ ዝዝራ ቅዱስ ቃል፣ልምላሜ ናብ ዘይብሉ ግራት ከምዝዝራእ ዘርኢ ኢዩ።እሞ ፍረ ዘለዎ መንፈሳዊ ምህርቲ መታን ክሕፈስ፣ነታ ክትነግራ ዝደለኻ ልቢ መታን ከለምልማ፣ብእምነት ከጽንዓ ንኣምላኽካ ብጸሎት ንገሮ።ንሱ ድለ ክትረክብ፣ኳሕኲሕ ክራሓወልካ ዝብል እሙን ቃል ኪዳን ኣሎዎሞ፣ቅድሚ ቃሉ ምዝራእካ እታ ልቢ ንኽትስተኻኸል፣ነቲ ኣብኣ ዘሎ ሰይጣን ዝተኸሎ እሾኽ ብጸሎት መንቁሶ።

ደቂ ኦርቶዶስ ዝኾኑ ኣመንቲ ብዝተቐበልዎ መሪር 21 ሰማእትነት ናይ ሊብያ፣ኣብ ግብጺ ከቢድ ሓዘንን ሓጎስን ተደባሊቑ ነይሩ።እቲ ሓዘን ዝተባህለ፣ስጋ ለበስ ስለዝኾንና:ወገንካ ንዝኾነ ሰብ ብከቢድ ጭካነ ብካራ እሞ ድማ ኣብ ዓዲ ጓና ክሕረድ እንከሎ ከቢድ ኢዩ።እዚ ኢዩ ንህዝቢ ግብጺ ከቢድ ሓዘን ኮይንዎም ነይሩ፣ንህዝቢ ግብጺ ጥራይ ዘይኮነስ ንኹሉ ኣማኒ ኦርቶዶክስ ተዋህዶ።ዋላ እቲ ሕልናዊ ሰብኣውነት ዚሓስብ ሰብ ውን ኩሉ ኣብ መላእ ዓለም ነዚ ኣብ ሊብያ ዘጋጥም ዝነበረን ዘሎን ሰማእትነት ፈጺሙ ሓዚኑ ውዒሉ።

በንጻሩ ድማ ዓበይቲ መንፈሳውያን ሰባት ተሓጊሶም ውዒሎም።ሓንቲ ወዳ ዝተሓረዳ ሰበይቲ፣ኢንተርቪዩ ምስ ገበሩላ ከምዚ ክትብል መሊሳ።
ጋዜጤኛ፣ ነዚ ንወድኽን ዚሓረደ ሰብሲ እንታይ ምበልክንኦ፧
እታ ኣደ ኣዝየ መመስገንክዎ።
ጋዜጤኛ፣ እዋእ እሂ ስለምንታይ፧

እታ ኣደ፣ ምኽኒያቱ ኣነ ኣደ ኮይነ ክሓዝን ይኽእል ኢየ፣ወደይ ግን ምስቶም ሰማእታት ኢዩ ተቖጺሩ።እዚ ሓራዳይ ጠቒምንኒ ምበር ኣይጎደኣንን።ንዓይ ኣደ ሰማእት ገይርኒ፣ንወደይ ድማ ምስቶም ሰማእታት ተቖጺሩ ዓቢ ክብሪ ከምዝለብስ ገይርዎ።ንዓይ ኣብ እምነተይ ማዕረ ክንደይ ክተግህ ከምዘለኒ ነብሰይ ንኽምርምር ገይርኒ፣ንወደይ ድማ ፍጹም ተባዕ ኮይኑ ክሳዱ ንኻራ ንክህብ ዘተባብዐ መንፈስ ቅዱስ፣እምነቱ ህያሃው ኮይና ኣብ ዓለም ከምሲበኽ ገይሩ።ስለዚ ነዚ ሓራዳይዚ የመስግኖ እምበር ኣይራገሞን፣ይጽልየሉ እምበር ኣይጸርፎን ኢየ።መን ኮይነ ኢየኸ ክጽልየሉ።እቲ ዝተሓርደ ወደይ ሰማእት ጸልዩሉ ኢዩሞ ኣነደኣ ተኸኣልኩ ስለድኻመይ ንኽጽሊ ገይርኒ ኢዩሞ፣ወደይ ኣብቲ ገማግም ባሕሪ እንዳተሓርደ: ሰማእትነት እንዳተቐበለ እንከሎ ዝጸለያ ጸሎት፣ነዚ ሓራዳይ ናብ ንሲሓ ቀስቂሳቶ ትኾውን።እንሆ እኳ ንዓይ ማዕረ ክንድዚ ነብሰይ ከምዝፍቲሽ ገይራትኒ።

ኣምበሳ ኣብ ዘይብሉ ዓዲ ስእሊ ኣምበሳ ርኣኹ!!

ኣምበሳ ኣብ ዘይብሉ ዓዲ ስእሊ ኣምበሳ ርኣኹ!!

እዋን እቶእቶ ኣቢሉ ከባቢ ሰዓት 5፥00 ብናይ ኤውሮጳ ኣቆጻጽራ ኢዩ።ኣብ ገዛ ስለዝወዓልኩ ክዛወር ብምባል በይነይ ናብ ከተማ ኣምራሕኩ።ቅንያቱ jule ferie ተሂሉ ዝብዓል ተውፊታዊ በዓል ናይዚ ዓዲ ብምኻኑ፡እቲ ጎደና በታ"ኣቦታትና ኣምልኾኦም ዝገልጽሉ ዝነበረ ኢዩ፡"ኢሎም ዝምክሕሉ julu tre ተሸላሊሙ፡ከም ሓንቲ ጎርዞ ንመርዓዊ ተባሂላ እትስለሞ ሽልማት ተመላኺዑ ነበረ።ህዝብ ኖርወይ ኣብ ክርስትያንሳንድ፡"ኣቦታትና"ብዝብል ውሽጣዊ ወኒ ዘለዎ ዝመስል ጥጁእ መግለጺ ኣምልኾ ንምግላጽ፡ገረብ ንምግዛእ ላዕልን ታሕትን እንክብሉ፡ንረኣይኡ የገርም።በይነይ ኢየ ዝጎዓዝ ነይረ፡ግን ከኣ በይነይ ኣይነበርኩን።ብሕልና ዝተፈላለየ ሓሳባት እንዳሳላሰልኩ ብስራሕ እግዚኣብሄር ይግረም ነይረ።

ብርክት ዝበሉ ኣንጎሎታትን ትኽ ዝበሉ መንገድን ከይተፈለጠኒ ጠረስኩ።ኣብዚ ዓዲ tur ዝብሃል ልምዲ ስለዘሎ ዳርጋ ተኣታቲና ኢዩ።ኣብ ኤርትራ እንከለኹ ሓደ መኻይደይ ዝነበረ ወደስመራ ዓርከይ ነዚ tur ተባሂሉ ዝጽዋዕ እግሪ ጉዕዞ "ጅራ ፋልሶ" ኢሉ ይጽውዖ ነይሩ።ክንንቀሳቐስ ተደልዩ፡መኻይዲ መታን ክሞኖ፡"ጅራ ፋልሶ ዶ ንኺድ" ክብለኒ ይዝከረኒ ኢዩ።ትርጉማ እካ ኣይፈልጣን ኢየ፡ግን ምንቅስቓስ ጥራይ ንማለት ምኻኑ ይርደኣ ነይረ።ሕጂ ኣብዚ ዘለኽዎ ዓዲ ምስ መጻኹ ግን ዳርጋ ጽቡቕ በዓል ሞያ ናይ ጅራ ፋልሶ ኢየ ኮይነ መስለኒ።

ናብ ሓደ ጽምው ዝበለ ጎደና እንክኸይድ ሃንደበት፡ነዊሕ ዓመታት ዘቕጸረ እንክመስል ኣስናኑ ዝሓርቀመ ምስሊ ኣምበሳ ኣብ ሓደ ቀጽሪ ረኣኹ።ብርግጽ ብዙሕ ግዜ ርእየዮ ኢየ፡ተመሲጠ ዝረኣኹሉ ግዜ ግን ሕጂ ኢዩ ነይሩ።ብሕልናይ ክሓስብ ስለዝጀመርኩ ብዛዕባኡ ተገሪመ ንነብሰይ ሓተትክዋ።

ኣብዚ ቤት ትምህርቲ ቃንቃ ክንምሃር እንከለና ብዛዕባ ኣብዚ ዓዲ ዘለዉን ዘየለዉን እንስሳታት ምስ መምሃራን ተዛራሪበ ስለዝነበርኩ፡ኣብ ኖርወይ ኣምበሳ ኣብ መካነ እንስሳታት እምበር ብኣካል ብጭራስ ከምዘየለ ተሓቢረ ኢየ።ስለዚ ነቶም ነዚ ኣምበሳዚ ብቅርጺ ሓወልቲ ቀሪጾም ዝሰርሑ ሰባት ብሕልናይ ሓተትክዎም።"ኣምበሳ ኣብዚ ዓዲ ዘየለስ ከመይ ኣምበሳ ተሳእለ፧ንስኹም ኣንቱም ሰኣልቲ ምላልባሽ ብከምዚ ከማይ ብስደት፡ወይ ብካልእ ኣጋጣሚ ርኢኹሞ ትኾኑ፡እቲ ኣብዚ ዘሎ ርእይዎ ዘይፈልጥ ሰብሲ ኣምበሳ ከምዚ ከምዚመስል ከመይ ገይሩ ኣመነ፧ነዚ ምሳኹም ዘሎውን ድሓንስከ፣ነቲ ድሕሪ ነዊሕ ዘመናት ዝውለድ ሰብከ ኣምበሳ ከምዚ ከምዝመስል ከመይ ክኣምን ትጽበይዎ፧ ዝብሉ ጽውጽዋያት ዝመስሉ ግን ከኣ ቀለልቲ ሕቶታት ዘይኮኑ ደራረብኩ።ንሳቶም እቶም ሰኣልቲ መጺኦም ክምልሱ ስለዘይከኣሉ ግን ዝበጽሓኹዎ ነገር ደምደምኩ

1)ወድ ሰብ ጅግንነቱን፡ውድቀቱን፡ርህራሄኡን ጭካኔኡን፡ዕሽነቱን ትኩርነቱን፡ሃብታምነቶን ነዳይነቱን ወዘተ ንምግላጽ ቃላት ስለዝሓጽርዎ፡ኣብ ከባቢኡ ንዘለዉ ነገራት ሃሰውሰው ይብል።ንኣብነት ሓንቲ ኣደ ነታ ጎርዞ ጋላ፡ምልክዕቲ ክትኮንለይ ኢኺ ንምባል"ጽሓይ ኩኑለይ" ትብላ፡እቲ ንዓኣ ክወስድ ንሕጸ ዝቀራረባ ዘሎ ወዲ ድማ" ንስኺ ንዓይ ጽሓየይ ኢኺ"ኢሉ ንጽሓይ ጽባቐ ናይታ ጎርዞ ንምግላጽ ይጥቀመላ።እታ ጽሓይ ትበሃል ዘላውን እዛ ሂዎት ዘየብላ ጽሓይ ዘይኮነትሲ ምሒር ውዳሴኣ ንምግላጹ ከምተጸገሙ ብምርዳእ ደስተኛ ኮይና ትቕበሎ።ኣቤት ውዳሴ!ኣቤት ፍጥረት!

2)ነገስታት ምድሪ ጅግምነቶም ብኣፎም ምግላጹ ስለዝጽግሞም ንእንስሳታት ይጽውዑ።ውድቀቶም ንምግላጽ ድማ ከምኡ።ንሓደ ድምጽኻ ሓፍ ኣቢልካ ኣምበሳ፡እንተ ኢልካዮ፡ተግባሩ ድማ ገይረዮ ኢየ ኢሉ ዝምከሓሉ ነገር እንተጸኒሕዎ፡በዚ ደስተኛ ኮይኑ ይቕበሎ።ኣጋጣሚ እቲ ሰብ ብጀካ ምጥሓርን፡ምግቡዕባዕን ካልእ ሰናይ ነገር ዘይጸነሖ እንተኾይኑ ድማ ኣምበሳ ንትብል ቃል ትጸርፎ ከምዘለኻ ገይሩ ኢዩ ዝርድኣ።

ዋይ ሰብ መልክዕካ ተትፈልጥ፡ሰብ ምባልካ ጥራይ ምኣኸለካ ነይሩ።ጎይታናን መድሓኒናን ኢዮሱስ ክርስቶስ ልብና ስለዝፈለጠ፡ነቶም ሰናይ ዝገብሩ ብኣባጊዕ መሲሉ ምሃረ፡ነቶም ክፍኣቶም ዘየሕፍሮም፡ድማ ብኣጣል መሰሎም።ነቶም ክፉኣት ተንኮሎኛታንውን ወኻሩ ኢሉ ጸውዖም(መሃል 2፥15)።ነቶም ደግን ጽቡቕ ፍረ ንምፍራይ ቁሩባት ዝኾኑን ድማ ብኣትክልቲ መሰሎም።ተኽልን ወኻርያን ኣይሰማምዑን ኢዮም።ምኽንያቱ ውኻርያ በላዒት ሳዕሪ ኣይኮነትን።እግዚኣብሄር ግን ኣባና ዘለዎ ፍቕርን፡ንሓጥያት ዘለዎ ጽልእን በዚ ቃንቃዚ ምዝራብ ይርድኣናን ንምግላጹ ይቀለልናን ምኻኑ ይፈልጥ ነበረ።

ናብ ኣርእስተይ ክምለስ፥-
3) ለካ እዞም ሰኣልቲ ናይዚ ኣምበሳ ኣብቲ ሽዑኡ ዝነበረ ናይ ምንቅስኻስ ሙቐት ንምግላጽን፡ነቲ ብሕጂ ዝውለድ ሰብውን ስእሉ ንምንጋርን ኢሎም ከምዘዳለዉዎ ተረዳእኩ።ኣብቲ ግዜቲ ኣለና ኢሎም ዝምክሕሉ ጅግንነት፡ወይ ሓያልነን ከምዝነበረሞ ነዚ ወለዶዚ ዜናኦም ንምሕባር ኢሎም ዘዳለዉዎ ይመስል።

4) እቲ ህዝቢውን ቅድም ይኹን ሕጂ ኣሜን እዚ ሓቂ ኢዩ ኢሉ ናይቲ ሽዑኡ ዝነበረ ታሪኽ በዛ ሓንቲ ምስሊ ኣምበሳ ኣምቢቡ ክርዳእ ምኻኑ ርጉጽ ኢዩ።እቲ ዝገረመኒ ግን ንሱ ኣይኮነን።ኣምበሳ ዘየለ ከመይ ገይርካ ኣምበሳ ትስእል።ኣምበሳ ዘየብላ ዓዲ ከመይ ኢሉ እቲ ህዝብ ንናይ ቀደም ወለዶ ጅግንነቱ ከምኣምበሳ ይመስል ነይሩ ኢሉ ኣመነ፧ኣምበሳ ኣብ ኣፍሪቃ ኢዩ ዝርከብ።እቲ ረኣዪኸ ከመይ ክርድኦ ከኣለ፧
ናይ ሰብ ድኻም ተመልከቱ።
እግዚኣብሄር ኣምበሳ ኮይኑ እንትዝግለጽ ኩሉ ሰብ ፈሪሑ ምተምበርከኸ፡ነብሪ ኮይኑ እንተዝውለድ ኣብ መስቀል ዝሰቕሎ ኣይምተረኽበን።ኣብ ኣምበሳ ኣብ ነብሪ፡ኣብ ጽሓይ ኣብ ኮኾም ዘምልኽ ዝነበረ ወድሰብ፡ከምቲ ዝደልዮ ኮይኑ ተዝግለጸሉ ፈጺሙ ብፍርሒ በድኒ ምኾነ፡ፍቕሪ ኣምላኽ ኣይምተረደኦን።ንኣምላኽ ሓያልን ዘየናሕስን ጥራይ ገይሩምበር፡ምሕረትን ፍቕርን ኣምላኽ ኣይምተረደኦን።

እግዚኣብሄር ግን ናይ ኣምበሳ ፈጣሪ ክንሱ ምስሊ ኣምበሳ ሒዙ ክግለጽ ኣይፈተወን፡ፈጣሪ ነብሪ ክንሱ ነብሪ መሲሉ ክመጽእ ኣይፈተወን።ፈጣሪ ዳይናሶር ክንሱ ዳይናሶራዊ መልክዕ ሒዙ ኣይመጸን።ከምኡ ተትኾውንሞ፡ንሰባት ዘለዎ ፍቕሪ ብከምኡ መለክዒ ኣይግለጽን ኢዩ ።እሞ ኣምላኽ ንሰባት ዘለዎ ፍጹም ፍቕሪ ንምግላጽ፡ምስሊ ሰብ ሒዙ እረ ምስ ሰብ ፍጹም ተዋሃሂዱ፡ናይ ሰብ ስጋ ተዋሃሂዱ ተገልጸ።

ለካ እቲ ካብ ቅድስት ድንግል ዝተወልደ ኣምላኽ፡ንሰባት ፍጹም ፍቕሩ ንኽገልጸሎም ንዖኦም መሲሉ መጸ፡ከምዘኽበሮም እረ ደቂ ሰብ ጥራይ ዘይኮነስ ደቂ ኣምላኽ ከምዝገበሮም ንኽገልጽ ወዲ ሰብ ኮይኑ መጸ።ሕፍርውቶም ንኽቕንጥጥ ከም ባርያ ገዛእ ርእሱ ክሳብ ኣብ መብልዒ ማል እረ ክሳብ ሲኦል ምውራድ ተኣዘዘ፡ብሓጥያት ጨንዮም፡ርኽሰት ኣብኦም ነጊሱ ነበረሞ፡ካብታ ናይ ጥንቲ ፍጥረቶም ናይ ኣዳም መልክዕ ጥዕይቲ ርኽሰት ዘየብላ ቀዳመይቲ መልክዕ ኣዳም ወሲዱ ኣብ ሕቖ ኣቦታት ሓቢእዋ ጸነሐሞ፡ስዓቱ ምስኣኸለ ፍጥረት እንድያ ኢሉ ከይፈንፈነ ብፍጹም ተዋህዶ ገንዘቡ ገበራ።ንሳ እታ ካብ ጥንታዊት ምስሊ ኣዳም ዝተረፈት ሕዋስ ጸሊም ዘይብላ፡እብርሃናዊት ንእሽቶ ናይ ባሕሪ ዑንቂ ድንግል ማርያም ኮይና ጸነሐት።

ኦ ወድ ሰብ ምስኻ ንዘየሎ ኣምበሳስ ሰኣልካዮ፡ምስኻ እረ ስጋኻን ነፍስኻን፡ንዝለበሰ ኣምላኽ ግን ካብ ልብኻ ፍሒቕካ ኣልገስካዮ።ጽባቐኻ ንምግላጽ ኣብ ርሑቕ ንዘለዉ እንስሳታት ጸዋዕካ፡ካብኦም ንላዕሊ ግን ኣማኒኤል ይቐርበካ ነይሩ።ንዑኡ ኣብ ናይ ጎልጎልታ ኣደባባይ ካባኻ ኣርሒቕካ ደርበኻዮ፡ካብ ጎልጎልታ ንንዮው ርሒቖም ዝነበሩ እንስሳታት ግን ናባኻ ጸዋዕካዮም።

ኦ ኣምላኽ ዘፍቅረኩም ናይ ለባማት ሕልና ተመልከቱ።እቶም ለባማት ነቲ ኣዝዩ ዝቐረቦም፡ንሳቶም ድማ ኣዚዮም ቀረብዎ።እረ ክሳብ ንስግኦም ምእንትኡ ክሳብ ንሞት ምሃብ ፍቓደኛታት ኮኑ።"ወከዐዉ ደሞሙ በእንተ እግዚኣብሄር፡ወተዐገሱ ሞተ መሪረ በእንተ መንግስተሰማያት"ተባሂሉ ተዘንተወሎም።ኣየ ሕልና ናይ ሰብ፡ኣዚኻ ንተድንቖን ግርማኖቱ ተዘንትወሉን ሰብ ፡ሓደ መዓልቲ ኣምበሳ ተቐይሩ ተዝመጻካ ኣድናቖትካ ራሕሪሓ ህድማ ጥራይ ኢያ ነይራ ስራሕካ።ኣነ በዛ ነብሰይ ብዘይቀልዓለም ከምኣ ምገበርኩ።
ኣድኒቕካዮ ዘይጽገብ፡ንመንግስቱ ማንም ዘይስዕራ ዘልኣለማዊ ኣምላኽ ግን፡ክንሃድምን ክንብህርርን ምኻንና ስለዝተገንዘበ፡ልዕሊ ኣምበሳ ሓይሊ እካ እንተሃለዉ፡ንዓና መታን ከበርትዕ ንድኹም ስጋና መረጸ፡ንባሕርታት ዝፈጠረ ክንሱ፡ባሕሪ ኮይኒ ተዝግለጽ ኩሉ ሰብ ክርዕድን ክሃድምን ምኻኑ ስለዝፈለጠ፡ፍቕሩ ንኽገልጽ፡ነታ ኣብ ባሕሪ ክትጥሕል እምበር፡ክትከይድ ዘይትኽእል ስጋና ለበሰሞ ኣብ ባሕሪ ብእግሩ ብኻድ ፈጣሪ ናይ ባሕሪ ምኻኑ ምሃረ።

ኣየ ናይ ሰብ ኣይተረደኦን፡እንክጽግሞ ጎይታይ ኢሉ ይጭደ፡እንክጥዕሞ ድማ ናብ ፍጥረት የሻሩ። ኣንታ ሰብ፡ምስ ኣምበሳ ተጸጊዕካ ድኣሞ ኣበይ ክጥዕም፡ምስ፡jule tre ተጸጊዕካ ቅድስና ትመጽእ ተኾይናስ jule tre ትመስክር፣እዛ ገረብዚኣ እቲ ብስጋ ዝተገልጸ ፈጣሪኣ ምኻኑ ፍሉጥ ኢዩ፡ሰባት ንምስሊ ፈጣሪ ኣብ ልቦም ጺሒፎም ካብ ውሉድ ንወለዶ ብተውፊት ይኾን ብኻልእ ከሰጋግሩ ዝግበኦም ግን ነቲ ምስሎም ዝመረጸ ኣምላኽ ምስሉ ካብ ልቦም ሓኸኽዎ።ቅዱሳን ግን ነዚ ኣምላኽዚ ኣብ ልቦም ሰኣልዎ።ናይቲ ቅድሚ 2000 ዓመታት ዝነበረ መንፈሳኺ ትረኻ ተዓቂቡን ክሰጋገርን ጸነሐ።ሕጂውን ናብ ኣምበሳ ዝጸጋግዑ ወኻሩ እካ እንተፈረዩ፡ኣባጊዕ ኮይኖም ስለ ኣምላኾም ክሳዶም ዝህቡ ግን ኣይክሰኣኑን ኢዮም።ትማሊ ትማሊካ፡ብዓንና ረኣና፡ብእዝንና ሰማዕና፡ምእንቲ ክርስቶስ ኣብ ናይ ሊብያ በረኻ ኣባጊዕ ንጹሃነ ኣባጊዕ ኮይኖም ዝተረኸቡ፡ንምሉእ ዓለም ኣዋጅ ኮይኑ ተዘርበ።ብሕጅውን እዛ ሃይማኖት እዚኣ ብዘይሕዋስ፡ብዘይ ብዘይምውሳኽ፡ብዘይሙግዳል፡ናብቲ ዝቕጽል ወለዶ ክትቅጽል እግዚኣብሄር ምሳኣ ኢዩ።

ኣሜን፡ኣሜን፡ኣሜን።
ይትባረክ እግዚኣብሄር ኣምላክነ ኪያነ ዘፈጠረ ከመናምልኮ።
ስብሀት ለማርያም እመ ኩልነ፡ወስብሀት ለቅዱስ መስቅል ዕጸ ህይወትነ።

ነበቡኒ በምግባርየ ኣኮ እምልሳንየ ልዕሊ ልሳነይ ንተግባረይ ኣምበብዎ

ነበቡኒ በምግባርየ ኣኮ እምልሳንየ
ልዕሊ ልሳነይ ንተግባረይ ኣምበብዎ

ብስም፡ኣብ ወወልድ ወመንፈስ ቅዱስ ኣሀዱ ኣምላክ ኣሜን

ነቲ ኣነ ሕማቕ ኢዩ ኢለ ብሕልናይ ዘይተቐበልክዎ፡ሰባት ክፍጽምዎ ክርኢ እንከለኹ ስለዘይቅበሎም፡ግደፉ ንምንታይ ከምዚ ትገብሩ ይብሎም።ነገር ግን ምኽሪ እካ እንተሃብክዎም፡ ኣብ ፍረ ከይበጽሐ ግን ቆምሲሉ ይተርፍ፡ተግሳጸይ ሰማዒ እዝኒ ስኢኑ ከም ንፋስ ቀውዒ በኒኑ ይኸይድ።ስለምንታይ ይኸውን?
ለካ ነቲ ንሰባት 'ግደፉ' ኢለ ክግስጽ እንከለኹ፡ ገዛእ ርእሰይ ኣነ ብዘይፈልጦም ሕማቕ ልምድታት ተኣሲረ ምህላዋ ስለዝፈለጡ፡ነዞም ሰባት ምምካረይ እካ ሓቂ እንተኾነ፡ብሰንኪቲ ኣነ ብሕማቕ ወልፊ ተኣሲረ ምህላወይ ግን ሰባት ንምኽረይ ክሰምዕዎ ኣይከኣሉን።ስለዚ እዞም ሰባት ካብቲ ተኣሲሮምሉ ዘለዉ ሕማቕ ነገር ንኸይወጹ ቀንዲ ተሓታቲ ኣነ ምኻነይ ተረዳእኩ።

¶¶¶ ሓንቲ ውሽማ ዝለመደት ሰበይቲ ብናይ ሎምዘመን ቃንቃ (ዓርኪ ዘለዋ ሓያም) ነታ ንእሽቶ ጛላ" ከይትምንዝሪ፡ምዝማው ነውሪ ኢዩ፡" ኢላ እንተመዓደታ እታ ጛላ ብምኽሪ ኣዴኣ ደስተኛ እካ እንኾነት፡ኣብ ተግባር ንኸይተውዕሎ ግን ኣዴኣ ኣመንዝራ ብምኻና፥'ንባዕላ ዘይተኣርነበትሲ ከመይ ኢላ ተኣርነቢ ትብለኒ፣' ትብል።

¶¶¶ ሓደ ብሽጋራ ውሉፍ ዝኾነ ሰባኣይ ነቲ ህጻን ወዱ ሽጋራ ከይትለድ ኢሉ ይመኽሮ፡ወዱ ግን ኣይሰምዖን ኢዩ፡ስለምንታይ፧

¶¶¶ ሓንቲ ኣብ ቤተ ክርስትያን እተገልግል ጋለንስተይቲ፡"ምስ ኣወዳት ብፍቕሪ ተባሂሉ ዝጽዋዕ ናይ ዘመንና ምንዝርና ካብ ምዛር ተኣርነቢ፡እዚ ቅድሚ መርዓ ስለዝኾነ ዋላ ኣፍቅርዮ እምበር ስጋዎ ርክብ ይኹን ምትንኻፍ ኣይትፈጽሚ፡ ክሳብ ጉቡእ መርዓ ትፍጽሚ ዓቕሊ ግበሪ፣"ኢላ ክትምዕዳ እንከላ ነገር ግና ንባዕላ ካብ መሓዝኣ ተሓቢኣ ትፍጽሞም ካልእ ዓይነታት ብዕልግናታት እንተኣልዮማ፡ ንኣብነት ሕፍረትካ ዝተቐልዐ ኣከዳድና፡ጛለንስተይቲ ክትዛረቦ ዘይግባእ ግን ቀሊል ዝመስል፡ምስ ኣንጻር ጾታኣ ንዘለዋ ዘይክርስትያናዊ ስነግባር ክትርእየላ እንከላ፡-ነዚ እንዳረኣየት እታ ተመካሪት ንኸይትምከር መዓንቅጾ ካና።

ሰባት ካብቲ ካብ ኣፍና ዝወጽእ ብዝያዳ ብተግባርና ዝመሓላለፍ ትምህርቲ ኢዮም ዝወስዱ።ስለዚ ኣነ ንሓደ ሽጋራ ዝተወለፈ ሰብ ሽጋራ ኣቃርጻ እንተበልክዎ፡ነገር ግን ኣነ ብወልፊ enternet (facebook) ፍሉፍ እንተኾይነ፡ምዕዶይ ናብዚ ፍቑር እግዚኣብሄር ዝኾነ ብወልፊ ሽጋራ ግን ዝተታሕዚ ሰብ ንኸይማሓላለፎ መሓንኮላ ዝኾኖ ኣነ ብenternet ውሉፍ ብምኻነይ ኢዩ።ምኽንያቱ ቅድሚ 'ንዓ ኣነን ንስኻን ብፍቕሪ እግዚኣብሄር ንወለፍ' ኢለ ምምሃረይ ኣነ ካብ ግኡዛን ወልፍታት ናጻ ክኾውን ነይርኒ።ለካ እዚ ሰብ ንሽጋራ ከቃአጻ ዘይኮነስ ብሰንኪ ኣነ ብሓደ ነገር ውሉፍ ምኻነይ፡ኣብ ሽጋራ ዘለዎ ወልፍነት እናሻዕ ከምዘጋድዶ ይኾውን።

¶¶¶ ንሓንቲ እንዳዘመረት፡ብምስጋና ንኣምላኽ እንዳሸብሸበት እንከላ ማስቲካ ቆምጣዕ ቆምጣዕ እተብል እግዚኣብሄር ዘፍቅራ ጎርዞ፡"እንዳዘመርካን እንዳጸለኻን ብሓፈሻ ኣብ ቀጽሪ ቤተ ክርስትያን ማስቲካ ኣይሕየኽን ኢዩ፡" እንክብላ ንሳ ግን ንዘረባይ ከም ሓደ ቁምነገር ዘየብሉ ሸለል ኢላቶ ዝኸደት ቀንዲ ምኽንያት ኣነ ካብቲ ንሳ ብምሕያኽ ማስቲካ ተወሊፋቶ ዘላ ንላዕሊ፡ኣነ ዘይፈለጥክዎ ንሳ ግን ትፈልጠለይ ጉድ ስለዘሎ ኢዩ፡፡ብሰንኪ እቲ ምሳይ ዘሎ ባዶነት ንሳ ንኸይትእረም ምኽንያት ኮና።ንኣብነት chat ክገብር ምሉእ ለይቲ ዝሓድር ተኾይነ፡ ቀጥታ ነዛ ሓፍተይ ዝረኣያ ትምህርተይ ዘይኮነስ ጉድለተይ ኢዩ።ነዛ ጛል ስለምንታይ ምኽሩ ዘይሰማዕኪ ኢልኩም እንተሓቲትኩማ፡ንርእሱ ከምዚ ከምዚ እንዳገበረሲ ንዓይ ለባም ክኾነለይ ዝብል ትዕቢታዊ ቃል ትፍኑ።

¶¶¶ ንሓደ ኩዕሶ ከይረኣየ ድቃስ ዘይመጾ ሰብ ንዓናይባ ሎሚ ፕሮግራም ቤተክርስትያንኮ ኣሎና እንክብሎ፡ንሱ ግን ስራሕ ኣሎኒ ኢሉ ነቲ ክቡር ጉባኤ ሰራዊተ እግዚኣብሄር ምስቲ ኣህዛብ ዝእከብዎ ጉባኤ ኣወዳዲሩ ንዑኡ ነቲ ኩዕሾ ቀዳምነት ክሰርዕ ዝገበሮ፡ለካ ኣነ ዘይፈለጥክዎ ጉድ ስለዝነበረ፡ብሰንኪ ጉደይ ንሱ ተዓንቀፈ።

¶¶¶ ንሓደ ወናም ሳዕሳዒ፡'ጛይላኮ ሓጥያት ኢዩ፡' ኢለ እንክምህሮ፡ንትምህርተይ እዝኒ ዘይህበሉ፡በንጻሩ ከም ሓደ ጽውጽዋይ ገይሩ ዝሓስቦ፡ለካ ንሱ ዝፈልጠለይ ካልእ ወኒ ስለዘለኒ ኢዩ።ኣነ ንባዕለይ ብኻልእ ወኒ ተኣሲረ እንዳሃለኹ፡ነቲ ወናም ደራፊ ካብ ደርፉ ክኽልክሎ እንከለኹ፡ምላልባሽ ርእሱ እንዳነቕነቐ ይቕበለኒ ይለዉን፡ልቡ ግን ነቲ ኣነ፡ ተኣሲረሉ ዘለኹ ካልእ ሕቡእ ወልፊ ብምርኣይ ትሕንሕነለይ ምህላዋ ኢዩ።

ደቂ እግዚኣብሄር ንሓድሕዶም ተማዓዒዶም ኣብቲ ዝዓበየ ደረጃ ቅድስና ንኸይበጽሑ፡ሰይጣን ብጥበቡ ከምዚ ገይሩ ንደቂ ኣምላኽ ከምዘይራዳድኡ ገበረ።

ስለዚ ኣነ ዝመዓድክዎም ሰባት ናብ ቅድስና ንኸይመጹ ቀንዲ ዓጸውቲ ማዕጾ፡ጉድለተይን ኣነ ባዕለይን ኮይነ ጸናሕኩ።ኣነ መዓልታዎ ነብሰይ ብንስሓ ከይሓጸብኩ ንሰባት መዓልታዊ ተናስሑ ብምባለይ ሰባት ንቃል እግዚኣብሄር ንኸይሰምዑ ምኽምያት ኮንኩ።ቅዱስ ጳውሎስ ኣንታ ግብዝ፡ንኻልኦት ካብ ትምህርሲ ንርእስኻ ደኣ ዘይትምህር በለ።

እንታይሞ ንግበር፦

1.ኩሉ ዝወሃበና መንፈሳዊ ተግሳጽ ከም ሓደ ኮረት ኣብ ሂዎትና ነቐምጦ ኮረት ነኣሽቱ የእማን ኢዩ፡ሽዑኡ ብዝግባእ ክንንደቕ ኢና።ምኽንያቱ ክርስትያን ከም ሓንቲ እምኒ ናይ መንደቕ ኢዩ፡እታ እምኒ ብብዙሓት ደቀቕቲ ኣኣማን ዝቖመት ኢያ።ክንምዓድ እንከለና ንሕና ንስራሕ ምህላውና ኢዩ።ናይ ኩላትና ምሉኡነት ድማ እታ ህንጻ ተሃኒጻ ትፍጸም።ርእሰ ማእዝና ድማ ኣምላኽና ክርስቶስ ኢዩ።

2.ሰባት ክምዕዱና እንከለዉ ዋላ ንባዕሎም ኣሸሓት ጉድለት ይሃልዎም፡ንጉድለቶም ኣይንጠምት፡ብመንጽር እቲ ተግሳጾም ንሂዎትና ምስ ቃል እግዚኣብሄር ኣተኣሳሲርና ንስኣላ።
3.ንማንም ሰብ ኣይንጽላእ፡ሰብ ሓጥእ ክኾውን ይኽእል ኢዩ።ግን ነዚ ሰብዚ ዝፈጠረ ፈጣሪኻ ምካኑ ኣይትረስዕ፡ነዚ ሰብዚ ንስሓ ዕድመ ዝውስኽ ዘሎ፡ኣፍቃሪኻ እግዚኣብሄር ምኻኑ ኣይትዘንግዕ።ንሱ ኣምላኽካ እንዳፍቀሮ ንስኻ ግን ብጸሎትካ ሞቱ ኣይትመነ።እግዚኣብሄር መርቑ እምበር ርገሙ ኣይበለን።ንሱ ዝምርቖም ዘበለ ክትምርቖም ግድነት ኢዩ።ንሱ ዘረገሞም ድማ ክትረግሞም ግድነት ኢዩ።
ስብሀት ለስሉስ ቅዱስ፡
ስብሀት ለቅድስት ድንግል በክልኤ ማርያም እመ ኩልነ፡
ስብሀት ለመስቀለ ክርስቶስ ኣምላክነ።

ኣብ እዝግዮታ የእዳውካ ዘርጊሕካ ክትጽሊ እንከለኻ እንታይ ትዝክር!

ኣብ እዝግዮታ የእዳውካ ዘርጊሕካ ክትጽሊ እንከለኻ እንታይ ትዝክር!

" ኦ እግዚኣብሄር ነዘን ኣብዘይግበአን ክትንክፋ ዝወዓላ የእዳወይ፡ብሓጥያት ጨቅየን ኢየንሞ፡ክምዚ ኢለን ምሕረት ንምርካብ ክዝርግሓ ኣይግበአንን ነይሩ።ነዘን የእዳወይሲ እቲ ቅኑዕ ፍርድኻ ተገሊጹ ተቖሪጸን ክስንደዋ እምበር፡ናብዚ ቅዱስ ጸሎትዚ ሒዘየን መጺኤ ንስለምሕረትካ ክዝርግሓ ኣይግብአንን ነይሩ።ምሕረትካ ግን ዓዚዙ።ጎይታየ ስላ ምሕረትካ፡ቑጣዓኻ ዘሓለ፡ቅጽዓት ዝግበአን የእዳወይ፡ብምሕረትካ ክሳብ ሕጂ ምሳይ እነዋ።ቀደሙስ ዋንአን ንስኻ እንዲኻ።ዓሻ ስለዝኾንኩ ኢየ የእዳወይ ኣነ ዝውንነይ መሲልኒ ኣብ ቡዙሕ ሓጣውእ ክኣልከን ውዒለ እምበር፡ለካ ብብዝሒ ትዕግስትኻ ስቕ ኢልካ ብምሕረት ትጽበየኒ ከምዝነበርካስ ሕጂ ኢዩ ተረዲእኒ።

ኣንታ ቅዱስ ኣምላኽ፡'ኣብ ኣፍ ደገ ኮይነ ማዕጾ ካሕ ካሕ የብል ኣሎኹሞ፡ንድምጸይ ሰሚዑ ሓደ ዝኸፍተኒ እንተሎ' ዲኻ ዝበልካ! ኣነስ እንታይ ግደይ፡ምሉእ መዓልቲ ብዕሽነት ረኺሰስ ርኽሰት ከኣ ወሊደ።ኣነ ንየእዳወይ ዘርከስክዎ ከይኣክልሲ፡ንብዙሓት ንስኻ ንእተፍቅሮም ንደቅኻውን ፡ ብብዕልግናዊ ምትንኻፍ እንዳመሃርኩን እንዳተንከፍኩን ንብዙሓት ኣርኪሰ መጺኤካ ኣሎኹ።ምስዚ ኩሉ ክብደት ሓጥያተይ የእዳወይ ከመይ ኢለን ምሕረት ይልምና ኣሎዋ ገሪምኒ ኣሎ።ኣቤት ምሕረት! ኣቤት ትዕግስቲ! ኣቤት አህራሄ!

ኦ ስሉስ ቅዱስ፡ነታ ድምጽኻ ምስቃር ኣብዩዋ ሸፊታ ዘላ ልበይ በዘን የእዳወይ ገይረ ይኩሕኩሓ ኣሎኹ።እዚ ድማ ኣፍልበይ እንዳሃረምኩ ንምሕረትካ ይጽበይን፡ንትረት ልበይ ይነቅፍን ኣሎኹ።ኣምላከ ኩሉ ፍጥረት ዝኾንካ ወልደኣብ ወልደማርያም፡ኢዮሱስ ክርስቶስ ሆይ፡ኣብታ ኣፍደገ ልበይ ኮይንካ ትኩሕክሕ ኣሎኻ፡ድምጽኻ ይሰምዖ ኣሎኹ።'ኣብ ዓራት ደቂሰ፡ጫማይ ኣውጺኤስ ከመይ ኢለ የእጋረይ ከርስሖ፡ቀምሸይ ኣውጺኤስ ከመይ ኢለ ክኽደኖ' ብዝብሉ ኮንቱ ምኽንያታት ንልበይ ዘሸፈትክዎ ዘመን ሒጂ ይኣኽለኒ ኢለ ይመጻካ ኣሎኹሞ፡-ኦ ጎይታይ ይደልየካ ኣሎኹ።ኣብ ጎደና ዘለዉ ዘብዐኛታት ረኺቦም ከይቅጥቁጥኒ ቀልጢፍካ ተቐበለኒ።ሓይሊ ከምዘየብለይ፡ብሓይሊ ቀላጽመይ ክስዕሮም፡ከምዘይክእል ትፈልጥ ኢኻሞ ኦ ጎይታይ ካብ ምንጋጋ ጸላኢ፡ካብ ጎልያዳዊ ቀላጽም ኣድሕነኒ።እዘን የእዳወይ ኣብ ዘፈር ክዳንካ ይተንክያ ሕደገን እሞ፡ኩሉ ምኽሪ ጸላኢ ክበንን ኢዩ።ስለኩሉ ምሕረትካ ተመስገን።

ኣብን ወልድን መንፈስቅዱስን ሓደ ኣምላኽ ተመስገን ኣሜን።ከምኡውን

ድንግል ማርያም ኣዴናን፡ቅዱስ መስቀልካ ዕጸ ሂዎናን ምስጋና ይብጽሓዮ ኣሜን።
ኦ ድግል ስለ'ተን ንኣምላኽ ዝሓቖፋ የእዳውኪ ኢልኪ፡ንየእዳወይ ምሕረት ለምንለን፡ኦ ድንግል ስለ'ተን ንኣምላኽ ሰማይ ወምድር ዝኣክል ጡብ ዘጥብውኦ ዝነበራ ቁዱሳን ኣጻብዕትኺ ኢልኪ፡ንኹለን ኣጻብዐይ ምሕረት ለምንለን፡ኦ ድግንል ስለ'ተን ኣብ ቤት መቕደስ ቅዱስ ኣገልግሎት ዘገልግላ ዝነበራ የእዳውኪ ክትብሊ ነዘን ሓጥኣን የእዳወይ፡ምሕረት ካብ ወድኺ ለምንለን።ዶችማስ ብልማኖኺ ኣይሓፈረንሞ፡ነዘን የእዳወይ በማላድነኪ ናይ ምሕረት ወይኒ ምልእየን ኣሜን ኣሜን ኣሜን።

"ወሰበ ትጸልዩ ከመዝ በሉ፡ኣቡነ ዘበሰማያት፡ይትቀደስ ስምከ፡ትምጻእ መንግስትከ፡-

በስመ ስሉስ ቅዱስ።
"ወሰበ ትጸልዩ ከመዝ በሉ፡ኣቡነ ዘበሰማያት፡ይትቀደስ ስምከ፡ትምጻእ መንግስትከ፡-
-ክትጽልዩ እንከለኹምሲ ከምዚ ደኣ በሉ፡ኣብ ሰማያት እትነብር ኣቦና፡ስምካ ይቀደስ መንግስትኻ ትምጻእ፡---"
ሰለስተ ቃላት ኣስተውዒልናለንዶ ንፈልጥ፧
¶ ኣብ ሰማያት እትነብር ኣቦና፡
¶ ስምካ ይቀደስ፡
¶ መንግስትኻ ትምጻእ፡

ቴለፎን ምስ ርሑቕ ዝቕመጥ ሰብ ክራኸብ እንከለኹ፡እቲ ሰብ መታን፡ ከይቅየመኒ ኢለ ኣብ ሞንጎ ዕላል ትኽስታ ወይ ሕልናይ ናብ ካልእ እንተተሰሪቑ፡እቲ ሰብ ክልተ ሰለስተ ግዜ" እ፡ እ፡እ" ኢለ ዘረባ ክደጋግም እንተሰሚዑኒ፡ኣሻቡ ይኽዕበኒ።ቅሬትኡ ድማ ለባም እንተኾይኑ፡"እዋእ ምሳይ እንዳዕለልካስ ናብ ካልእ ኬድካ፣" ኢሉ ይድሕድሕ።ተዘይኮኑ ድማ ብድሕረይ ክሓምየኒ ይነብር።"ክላእ እገለ ድማ ብሰብ ዘይግደስ" እንዳበለ ይኸሰኒ።

ትማሊ ካብ ዘጋጠመኒ ከዕልለኩም facebook messenger ንዝተወሰነ ግዜ offline ገይረዮ ነይረ።ኣብ እንዳ lap እምበር ዳርጋ ኣብ ሞባይል chat ምግባርሲ ንውሕ ዝበለ ግዜ ኣቃሪጸ ነይረ።ኣብ ትማሊ ግን ናብ ሞባይል download ምስ ገበርክዎ፡ምስ ብዙሓት ፈተውቲ የዕሊለ።ፍልይ ዝበለ ምስ ሓደ ኣዝየ ዘፍቅሮ ዓርከይ video ደዊሉ ጉጅም የብለኒ ነይሩ።

ሃንደበት ካልእ ሰብ chat ስለዝኣተወኒ ምስኡ እንዳዕለልኩ፡ብጽሕፈት ምስቲ ካልእ ጀመርኩሞ፡እቲ ናይ video ብዓል chat ቀልጢፎ ፈለጠኒ።" ምስ መን ደኣልካ ገጢምካ!" ድማ በለኒ።ሓቁ ኢዩ፡ሓንቲ ሓንጎል ዝሓዘ ሰብ ከመይ ኢልካ ምስ ክልተ ይከኣል።

ሓደ ግዜ እንዳጸለኹ እንከለኹ ሃንደበት ሕልናይ ናብ ካልእ ተወስደሞ፡ኣብ መንጎ ነዛ ዘረባ ዘከርክዋ።ወድ ሰብ ሓንቲ ሕልና ሃልያቶ ክንሳ ኣብ ግዜ ጸሎት ምስቲ ሰማያት ዘይልክዕዎ ኤልሻዳ ብጸሎት chat ክትገብር ዝግብኣ፡ናብ ካልእ ትዝምብል።

¶ እግዚኣብሄር ኣብ ሰማያት ትነብር ኣቦና በሉ ኢሉና፡ኣብ ምድሪ ዝነብሩ፡ብምድራዊ ሓሳብ ብምድራዊ መራኸቢ ተራኺብካ ትጽገብን ይምኖን ኢዩ።ኣብ ሰማያት እትነብር ኣቦና፡ልዕሊ ኣእምሮ ኢዩ።ምላልባሽ ኣብ ወርሒ ወይ ኣብ ጁቢተር ንዘሎ ሰብ ብሳትላይት ሓበሬታ ከመሓላልፍ ይኽእል ይኸውን።ኣብ ዓለመ መላእክት፡ኣብ መምበረ መንግስት ኣብ መምበረ ጻባኦት ንዘሎ ትርኢት ግን ብፍጡራዊ መሳርሒ ክፍለጥ ኣይከኣልን።እግዚኣብሄር ግን ብእምነት ከምንፈልጥ ገይሩና።

"ኣብ ሰማያት ትነብር ኣቦና፡ዋላካ ሕልናኹም ክሳብ ክንድኡ ክበጽሕ ዝኽእል ዓቕሚ ኣይሃልኹም እምበር፡ኣነ ልዕሊ ሕልናኹም ብምኻነይ፡ብህልዉናይ ደስ ይበልኩ።ድሓር ከኣ ሰማያት ዘይልኩዑኒ እጹብ ድንቂ ኣምላኽ ይኹን እምበር፡ኣምላኽኩም፡ኣቦኹም ክኾውን ፍቓደኛ ኢየ።ስለዚ 'ፍጡራት እንዲና፡ድኻምና ከመይ ኢሉ ንልዕልንኡ ይበጽሖ፣' ኢልኩም ከይተሰከፍኩም 'ኣንታ ኣብ ሰማያት እትነብር ኣቦና!' በሉኒ፡ሰማያት ኢደይ ዝሰረሐኦ እምበር ገዛይ ኣይኮነን፡ንሰማያት ኣንቆልቂለ ይጥምቶ እምበር ከማኹም ኣንቃዕሪረ ኣይርእዮን።(መዝ113፣5)ንስኻትኩም ግን ካብ ጎደሎ ፍጹምነት ዝተላዕለ ንሰማያት ክትልክዕዎ ኣይትኽእሉን ኢኹሞ፡ኣቦኹ ፈጣሪ ሰማያት ብምኻኑ ደስ ይበልኩም" ይብል።

¶ "ስምካ ይቀደስ ድማ በሉ፡መቸም ቅድስና ንስኹም ትውስኹለይ፡ወይ ትቕኑስለይ ኣይኮነን፡እዛ ንዓይ ከተመስግን ነቒሓ ዘላ ልሳንኩምን ነፍስኹምን፡ኣነ ኢየ ፈጣሪኣ፡ከምቲ ኣብ ጥዑም መኣዛ ዘለዋ ሸቶ ዝዓተራ ኣጻብዕቲ፡ካብቲ ሸቶ መኣዛነት ናብቲ ኣእዳው ዝመሓላለፍሞ፡እታ ኣጻብዕቲ ጥዑም ሽታ ሒዛ እትኸዶ፡ከምቲ ካህን ማዕጠንት ክዓጥን፡ስጋይን ደመይን ክርፍትት ምስ ኣርፈደ፡ካብቲ ጥዑም ዝመኣዝኡ ማዕጠንት ጨና ዕጣን፡ጡዑም ጨና፡ካብቲ መሎኮታዊ ስጋን ድመን ድማ ዓቢ ክብሪ ስለዝዓስሎ፡ተጋይኹም ነተ ኣጻብዕቲ ምስተሳለምኩመን፡ካብቲ ኣጻብዕቲ ድማ ንስኽትኩም ዓቢ በረኸት እትሳተፉ፡ከምኡ ድማ ኣነ ምስጉን ክንሰይ ዘመስገነት ነፍሲ፡ቅዱስ ክንሰይ ዝቐደሰት ልሳን፡ብሩኽ ክንሰይ ዝባረኸት ኢድ፡ካብ ቅድስናይ ቅድስና፡ካብ ምስጋንነተይ ምስጋና፡ካብ በረኸተይ ድማ በረኸት ክህባ ኢየ።እሞ ስምካ ይቀደስ ንምባል ኣይተድሓርሕሩ።ናይ መን ስም ክቅደስ ስለትደልይዎ ኢኹም ስመይ ገዲፍኩም ኣብ መንጎ ጸሎት ትርስዑኒ።ንሓደ ፈታዊኹም ዓርክኹም እካ ከተዕልልዎ እንከለኹም ተጊህኩም ትቐርብዎ፡እሞ እነኸድኣ ካብቲ ዓርክኹምዶ ኣይበልጽን ኢየ፧

¶ መንግስትኻ ትምጻእ፡- ብዙሓት ትፈርሕዎምን፡ትንዕቅዎምን መንግስታት ይህልዉ ኢዮም።ኣነ ግን ዝፍራህ ንጉስ ጥራይ ዘይኮንኩስ፡እንተጸዊዖምኒ እሺ ኢለ ዝመጽእ ንጉስ ኢየ።እቶም ንስኻትኩም እትፈርህዎም ነገስታት፡ ንሳቶም ድኣ ይጽውዕኹም ንስኻትኩም ድማ ትኸድዎም እምበር፡ንሳቶም ኣይመጽኹምን፡ኣነ ግን ኣብ ዝጸዋዕኩምኒ ሰዓት 'ንጉስ እንድየ ባዕሎም ይምጹኒ' ኢለ ድሕር ምሕር ኣይብልን።ቃለይ ኢዩ፡ኣብ ኣፍ ደገ ኮይነ ማዕጾ ካሕ ካሕ የብል ኣሎኹ።' ክሳብ ትጽውዑኒውን ኣይጽበይን ኢየ።ኣባኹም ዘለኒ ፍቕሪ ኩሉ እንተዝነግረኩም ክትጸርዎ ኣይትልእሉን ኢኹም።ንስኻትኩም ግን ምጻእ ኢልኩም ጥራይ ጸውዑኒ፡ብዘይ ነግ ፈረግ ንዓኹም ንኽባርኽ ክመጽእ ኢየ።ወዮ ስለዝረሓቕኩምኒ እምበር ኣብ ልብኹምንውንኮ ኣሎኹ።ፍቓደኛታት ከይኮንኩም ግን ብሓይሊ ማዕጾ ልብኹም ሰይረ ኣይኣቱን።

ኣዝያ እተፍርሕ መዓልቲ ኣላ፡እዛ መዓልቲ እዚኣ መዓስ ምኻና ኣይትፈልጥዋን ኢኹም።ኣነ ግን ይፈልጣ ኢየ።እዛ መዓልቲዚኣውን ንኽትመጽእ ለምኑ፡ምላልባሽ ከይተዳለኹም ከለኹም ከይመጽእ ድማ ወትሩ ትግሁ፡ትምጻእ እትብል ኣጸዋውዓ እቶም ተዳልዮም ዘለዉ ኢዮም ዝጽውዕዋሞ፡ኩሉ ግዜ ተዳሊኹም ጽንሑ።ሓደ ንዘፍቅሮ ጋሻ ክዕድም ዝደለየ ሰብዶኸ ከይተዳለወ፡ምድሪ ቤቱ ከይኮስተረ፡ንጋሻ ዝኾውን፡ነገር ከይቀረበ ይጽውዕ ኢዩ፧ እሞ ኣነ ክቡር ጋሻኹም ኢየ፡እታ መዓልቲ ድማ ሃንደበታዊት ጋሻ ኢያሞ ተዳሊኹም ጸውዑ።ምድሪ ቤት ልብኹም ብሓጥያት ረሲሑ፡ንዓይ ዝኾውን መዕረፍየይ ንጹህ ልቢ ከይተዳለወ እንተመጼአ ክኽዕበኩም ኢየ።ብዙሕ ቅጽዓትውን ክህልወኩም ኢዩ።ጋሻ እንተዘየኽቢርካዮ፡እቲ ዝግብኦ እንተዘይገይርካሉ፡" እዚ ኹሉ ዓዲምንስ፡ዋላ ሓደ ከይገበረለይ!" ጥራይ ኢሉዩ ዝኽዕብ።ኣነ ግን ዝኽዕብ ጥራይ ኣይኮንኩ፡እንተላይ ከከም ግብሩ ዝፈርድ ሓቀኛ ፈራዲ ኢየ።እቲ ጋሻ ክገብራ ዝኽእል ዓቕሚ ሰለዘየብሉ ክትንክፈኩም ኣይክእልን ኢዩ፡እታ ዓቕሙ ምሕማይ ጥራይ ኢያ፡ኣነ ግን ክሓምየኩም ዘይኮንኩስ፡ኩሉ ሓጥያትኩም ብግልጺ ከሪኤኩምን ክፈርደኩምን ኢየ።ዓስቢ ንዝግብኦ ድማ ኣገናዕ ክብሎ ኢየ።

ብዙሓት እትንዕቅዎም ነገስታት ድማ ኣሎዉ፡ኣነ ግን ጸዊዕኩምኒ ቀልጢፈ ዝመጽእ እካ እንተኾንኩ፡ዝነዓቕ ንጉስ ግን ኣይኮንኩን ዝኽበር ትሑት መምህር ትሕትና እምበር።ኣዳም መታን ከድሕኖ 100 ዓመት ብንስሓ ጸውዓኒ፡'ንዓ ኣድሕነኒ፡ተባሪረ ኣሎኹሞ ድለየኒ፡ናብ ምድሪ ተደርብየ ኣሎኹሞ፡ገንሸል በጊዕካ ንኽኮውን ኦ ጋሳየይ ኣምላኽ መጺኻ ሓንግረኒ' በለኒ፡፡ኣነ ድማ ንዙፋነይ ከም ምምንዛዕ ከይቆጸርኩ፡ነቲ ፍጹም ኣምላኻዊ ሓይለይ ከይለወጥኩ ፍጹም ዳግማዊ ኣዳም ኮንኩ።እዚ ክኾውን ምካነይ ድማ ትስፋ ሂበዮ ነይረ ኢየ።ነዛ ተስፋዚኣ ኣብ ሲኦል ኮይኑ ይጽበያ ነበረ።

ስለዚ ደቀየ መንግስትኻ ትምጻእ እትብል ጸሎት ናፍቕዋ።ልብኹም ክባረኽ ተደሊኹም ምጻእ በሉኒ፡እዘን ኣብ ግዜ ሓጥያት ረኺሰን ዝወዓላ የእዳውኩም ንኽባረኻ ምጻእ በሉኒ።2 ዓሳን 5 እንጀራን ዝባረኽኩ ነዛ ትጽውዓኒ ዘላ ነፍሲ ንኸይባርኻ ዝጽግመኒ ኣይኮነን።ደሓር ምጻእ እትበል ጸሎት ተዳሊኹምን ኣይተዳለኹምን እተዘኻኽር ዓባይ miss call ኢያ።" ኢሉ በታ ቅድስቲ ልሳኑ ይምህረና።
ስብሀት ወወዳሴ ለቅዱስ ስሙ፡ወለወላዲቱ ድንግል ወለመስቀሉ ክቡር ኣሜን።

ንክብሪ ዝዝንጥላ ከናፍር ሎሚ፡

በስመ ስላሴ ይቀደስ ልሳንነ።
ንክብሪ ዝዝንጥላ ከናፍር ሎሚ፡
እለን ከናፍር እስመ ኢይመጥዋ ክብረ ለክቡራነ መዐርገ በዛቲ ዘመን።

ቀደም ዘመን ሓንቲ ወይዘሮ ንበዓልቤታ ጎይታይ ትብሎ ነይራ፡ሎሚ ግን ኣንታ፡
ቀደም ሓደ ብዓል ሓዳር ንበዓል ቤቱ እመ ቤት ኢሉ ይጽውዓ ነይሩ ሎሚ ግን ኣቲ።ቀደም ሓደ ንጉስ ነታ በዓልቲ ቤቱ ንግስቲ ይብላ ነይሩ፡ሎሚ ግን mss፡ቀደም እታ ሰይት ንጉስ ንበዓል ቤታ ንጉሰ ነገስት ትብሎ ነይራ፡ሎሚ ግን minster፡ዘገርም እዚ ኩሉ ክብሪ ሎሚ ከም ጨው ተዘቒቑ ጥራሑ ተሪፉ።

ቀደም ታቦት ካብ ቤት መቕደስ ክወጽእ እንከሎ ብዘሎ መእመን፡ፍግም ኢሉ ኣምልኽኡ፡ንእግዚኣብሄር ዘለዎ ፍጹም ፍቕሪ ንኽገልጽ ይሰግድ ነይሩ።ኣዕዋፍ ከይተረፋ ክብሪ ኣምላኽ ዝተረደአን ክመስል ምንቅስቓስ የቃርጻ ነይረን፡ሎሚ ግን ወዮ ኣምልኽኡ ንኽገልጽ እካ ናብ ቤት ኣምላኽ ምምጻእ እንዳተቓረጸ ይመጽእ ኣሎ።ታቦት ክወጽእ እንዳተራእየ፡ካህናት ብልብሰ ክህነቶም ማዕሪጎም፡ድያቆናት ብወርቃውን ምዕሩግን ልብስታት ለቢሶም መስቀል ኣብ ኢዶም ዓቲሮም፡እነገሊኦም ድያቆናት ድማ ከም ቅዱስ ዳዊት ብከበሮ እንዳዘመሩ ፡ከም ቅዱስ ያሬድ ማህሌታይ መቖምያ ሕዞም ወረብ ክውርቡ እንክረአ፡ምስኦም ዝዝምር፡ምስኦም ኣምልኽኡ ዝገልጽ መንእሰይ ግን እንዳወሓደ ይመእ ኣሎ።ታቦት ዝኣክል እንዳወጸስ ከመይ ንታቦት ዘለና ክብሪ ክንገልጽ ተጸገመና።ከመይ ምስጋድ ኣበና።መናፍቓን ሰኣን ምስትውዓሎም ሰኣን እምነቶምን ኣይሰገዱን።ንሕና ግን ህዝበ ክርስትያን ምስ ምሉእ ፍልጠትናን እምነትናን እንከለና፡ስንፍና ወረረና።

ቀደም፡ሓደ ጳጳስ ክመጽእ እንተተራእዩ፡ንኽትንብርኸኽ ኣኽብሮትካ ንክትገክጽ ቅድድም፡፡ኣይኮነን ክቡር ጳጳስ ፡መስቀል ዝጨበጠ ካህን እንካን ክመጽእ እንተተራእዩ፡እግሩ ወዲቕካ ክትሳለሞ ትቀዳደም።ነዚ ኣነ ባዕለይ ጽቡቕ ገይረ ኣርኪበሉ ኢየ።ሎሚ ግን ንካህን ኣብ እግሩ ወዲቕካ ክትሳለሞ ኣይኮነንሲ፡መስቀሉ ንምስላም እካ እንዳሕፈረና ይመጽእ ኣሎ።ኣብ ማእከል ከተማ፡ኣብ ናይ ስራሕ ቦታ፡ኣብ ህዝቢ ብብዝሒ ዝእከበሉ ስፍራ ንሓደ ካህን ክሓልፍ እንተሪኢኻዮ፡ኣብ ክንዲ ተጋዪኻ የእዳዉ ምስላም፡ተሓቢእካ ምሕላፍ እንዳኾነ ይመጽእ ኣሎ ታሪኽና።ወይ ግብዝና ሎምዘመን፡ግርምባ ኣብ ቤተ ክርስትያን ንክትሳለም ትጋየ፡ኣብ ደገ ግን ተሓቢእካ ምኻድ ካብቶም ቀዳሞት ፈጸምቲዚ ነገር ኣነ ኮይነ ።ደጋጊመ ንነብሰይ ሓቲተያ፡ነፍሰይ ግን እንትርፎ ስንፍንኣ ካልእ እትብሎ የለን።ጳጳስ ዝኣክል እንክመጽእ፡ቀደም " ኦ ጳውሎስ፡ጨርቅኻ ሃበና፡በረኸት ካብ መስቀልካ ጥራይ ኣይኮነን።ናይ ክዳንካ ቁራጽውን ዓቢ በረኸት ኢዩሞ፡ጨጨሪምና ክንወስድ፡" ተባሂሉ ኣብ ዘመነ ሃዋርያት ዝንገር ዝነበረ፡ሎሚሲ እንካዕ ቅዱስ ጳውሎስ ብስጋ ምሳና ኮይኑ ኣይሰምዕ።ብርግጽ ይሰምዕ ኣሎ።" ጴጥሮስ፡ጽላሎትካ መታን ክፍውሰና፡ክባርኸና፡ንዓ በዚ ከባቢና ሕለፍ ፡"ተባሂሉ ኣዝዩ ዓቢ ክብሪ ዝወሃቦ ዝነበረ ቅዱስ ጴጥሮስ እንካዕ ኣብ ዘመንና ኣይሃለወ።መን መኽበሮ።ተተሓቢእና መሕለፍናዮ።

ለካ እንዶ ነገሩ፡ሓጥያት ንምስራሕ ቅጭጭ ዘይብለና፡ነዛ ምንዝርና እንካን ኣጸባቢቕና ከም ጽድቂ ከነምስላ ቁርብተይ ተሪፋትና ዘላስ፡ካብዞም ዝባርኹ ካህናት ኣቦታትና ስለዝረሓቕና ኢዩ።ናይ ዘመነ ሃዋርያት ዝነበሩ ለባማት መእምናን ጽላሎትን ጭራም ጨርቅን ተመነዩ፡ናይ ለብዘመን ሰነፋት ቅድስና ዘየፍትወሎም እንበዓል ኣነ ግን ጨርቂ ኣይኮነንስ፡መስቀል ዓቲሩ፡ጽላሎቱ ዘይኮነስ ኣካሉ ክሓልፈኒ እንዳረኣኽዎ፡ተሓቢእካ ምኻድ ኮይና!!!

ቀደም ድያቆናት ኣዝዮም ክቡራት ነበሩ።ሓደ መእምን ንሓደ ድያቆን ክጽውዖ እንከሎ ዘንጢልካ ምጽዋዕ ኣዝዩ ነውሪ ኮይኑ ስዝስምዖ፡ኣንቱም እንዳወሰኸ ኢዩ ዝጽውዕ።ሎሚ ግን እታ ቅድስት መዓርግ እካ ሓኺኽና ካብ ልብና ብምውጻእ በብስሞም እንዳዘንጠልካ ምጽዋዕ ኮይና።ሓንቲ ወይዘሮ ንሓደ ድያቆን ክትጽውዖ እንከላ ፡ገምቱ እስከ ብመንጽር ናይ ቀደም ኣጸዋውዓ።ኣዝዩ ክብር ዝኾነ መዓርግ ንዝሓዘ ድያቆን ከመይ ኢልና ክንዝንጥሎ ደፈርና።ቅዱስ ድያቆን እስጢፋኖስ ከመይ ብስሙ ተዘንጠለ! ቅዱስ ድያቆን ነበር ሐዲስ ሃዋርያ ኣትናቲዎስ ከመይ ብስሙ ቦግ ኣቢልካ ብምጽዋዕ ተዘንጠለ።

ወገናተይ ብጣዕሚ ምርር ኢሉኒ ኢየ ዝጽሕፍ ዘለኹ።እዞም ሕጂ ንስም ድያቆናት ንዝንጥል ዘለናስ እንካዕ ኣብ ዘመነ ድያቆን እስቲፋኖስ ኣይሃለና።እንካዕ ኣብ ዘመነ ኣትናቲዎስ ኣብ ዘመነ እቶም 72 ኣርድእት ኣይሃለና።እግዚኣብሄር ንዝሃቦም መዓርግ ገዲፍና በብስሞም ምዘንጠልናዮም።

ነዘን ክብሪ ንዘለዎ መዓርግ ዝዝንጥላ ዘለዋ ልሳናት ብሕልናይ ሓቲተየን ነይረስ ንሳተን ድማ ብሕልና መሊሰናለይ።
እቶ ሕቶ፡ስለምንታይ ካህን እንክትሪኣ ተሓቢእክን ትሓልፋ፡ነቲ ክቡር መዓርግ ድማ ክትዝንጥላ ደፈርክን ኢለየን፧፧፧
ንሳተን መለሳለይ።

¶ ሰብ ከይርእየና፡-

ኣብ እኩብ ህዝቢ፡ኣብ ዕዳጋ፡ኣብ ጎደና፡ኣብ ባስ ስቶም፡ኣብ ዱንካን፡ኣብ መንገዲ፡ካህን ጎፍ ንጎፍ እንተረኺበዮ፡ልበይ ይምሸት።ምኽንያቱ በቲ ሓደ ወገን ዘይተሳለምኪ ኢሉ ሕልናይ ይወቕሰኒ፡በቲ ሓደ ድማ ሰባት ሪኢዮም፡ከይንዕቁኒ።" ዝብላ መልሲ። ዘይኮነ መልሲ ትምልሰለይ።እሞ ዓለም ንክርስቶስ ኣይፈለጠቶን ዘላ፡ክርስቶስ ኣብ ዓለም ንዘፍሰሶ ጸጋ ብመንገዲዞም ክቡራን ኣቦታት ኣቢሉ ከምዝግለጽ ኣይፈለጠትን ዓለም።ከናስሕ፡ከጠምቕ፡ከቑሩብ፡ቃል ኮዳን ከእስር፡ቅባኣ ሜሮን ክቐብእ፡ፈውሲ ስጋ ወነፍሲ ዝህብ ቀንዴል ዝገብር እንኮ ንካህን ኢዩ ተዋሂቡ።ንስኻ ድማ እዚ ምኻኑ ትፈልጥ ኢኻ።ዓለም ግን ኣይፈለጠትን።መን ድኣሞ ይንገራ።ኣብ ክንዲ ነቲ ዘሕፍር መንገዳ ኣሪምካ ክትነግራ ዝግባእሲ፡በቲ ዝምቡዕ መንገዳ ክትከይድ ክትብል እምነትካ ክትሓፍር!!!

¶ ሕራይ እቲ ምዝንጣል መዓርግከ እንታይ ኣምጽኦ፧ ኢለ ድማ ደጊመ ነዛ ነፍሲ ሓቲተያ።

ዓለም ንሓደ ብዶክተሬት ዝተመረቐ ብስሙ ዘንጢላ ኣይትጽውዖን ኢያ።ንሓደ ብማናጅመንት ዝተመረቐውን ማዕርጎ ኣይትርስዖን፡ንሓደ ፕሮፌሰር ማዕርጉ ገዲፍካ ምዝንጣል ኣዝዩ ነውሪ ኮይኑ ኢዩ ዝቑጸር።እሞ ኣንቲ ነፍሲ፡ነቲ ክቡር ብዓል ቤትኪ/ ብዓልቲ ቤትካ፡ዘንጢልካ ምጽዋዕሲ ንምንታይ ቀሊል ገይርኪ ወሰድክዮ።ነቲ ካብ ኩሉ ዝኸበረ መዓርግ ዝሓዘ ድያቆን ዝብል መዓርከ ስለምንታ ብስሙ "ኣታ" እንዳበልኪ ክትጽውዒ ደፈርኪ!! 

ኢለ ሓተትክዋ.

ሰነፋት ነፍሳትና ከምዚ ኢለን መለሳ። '

እቲ ንበዓል ቤትካ ምዝንጣል፡ፋሽን ( ምዕባለ) ኢዩ።ንድያቆን ድማ ኖርማል ኢዩ።'
ዎይ ጉድ፡ፋሽን፧ እንታይ ፋሽኑ ወደይ።ክርስትያንኮ ዘመናዊ ዘይኮነስ ዘላኣለማዊ ኢዩ።መንገዲ ክርስትና ምስ ዘመን ኣምጽኦ ዝቀያየር ዘይኮነስ፡ንናይ ዘመን ፋሽን ቀይሩ ዘልኣለማዊ መንገዲ እግዚኣብሄር ዝእውጅ መንፈሳዊ ድምጺ ኢዩ። 300 ዓመታት ዝነበረ ፍጹም ናይ ቅትለት ዘመን፡ቅዱሳን ሰማእታት ግን ነቲ ዘመን ብትዕግስቶም ቀየርዎ።ብስሞም ከምዝጽዋዕ፡ ዘመነ ሰማዕታት ከምዝበሃል ገይረሞ።እቲ ዘመን ዘመናዊ ቅትለተ፡ናይ ፋሽን ቅትለት ዝነበረ፡ንሳቶም ግን ቀየርዎ። ከመይ ኢሉ ደኣ ሎሚ ፋሽን ዝብል ምስምስ ከም ውሕጅ ጸርጊፍና ከደ።

ንድያቆን ምዝንጣልከ ኖርማል፥ከመይ ገይሩ ኖርማል።መቸም ንሓደ ክቡር መዓርግ ንዝውንን ሰብ ብስሙ ዘንጢልካ ምጽዋዕ፡ድሕሪኡ እንታይ ከምዝመጽእ ተመልከቱ።

ኣደ ሓውና ኢዩ።ምስ ሓደ ድያቆን፡ ኣዝዩ ቅርርብ ስለዝነበሮም፡ካብ ምሒር ምቅርራብ ዝተላዕለ።ነታ " ድያቆን" እትብል መዓርግ ናብ ቅብጥሮት ቀይርዋ።ስለዚ "ዲቁ" እንዳ በለ ክጽውዕ ጀሚሩ።ወዩ ዲቁ እትብል ኣጸዋውዓ ከም ዋዛ ዝጀመራ ስለዝለመዳ፡ኣብ ካልእ ዓዲ ብመገሻ ምስ ከደ፡ኣብኡ ሓደ ድያቆን ረኸቡሞ፡ኣብኡ ውን "ዲቁ!" ኢሉ ደገመ።ኩሎም ኣባኡ ዝነበሩ ገረሞም።
እቲ መንፈሳዊ መዓርግሲ ባዕልና ናብ ስጋዊ ቅብጥሮት ለወጥናዮ።

ወገናተይ ተኸባቢርካ ምጽውዋዕ ክብረት እምበር ሓጥያት ኣይኮነን፡ምክብባር ካብ ብዙሕ ሓጥያት ይከላኸል ኢዩ። ንመንፈሳዊ መዓርግከ ከመይ ብቅብጥሮት ተቐየረ።ሓንቲ ወይዘሮ ምስ ክቡር ድያቆን ንኸይትዝሙ ዝኽልክላ ዓቢ መጋረጃ እታ "ድያቆን" እትብል መዓርግ ኢያ።ብስሙ ክትጽውዕ እንተጀሚራ፡ኣታ ክትብል እንተጀሚራ ግና ክትተናኽፎ፡ናብ ዘይተደለየ ርኽሰት ንኽትዕድም ዝኽልክክላ ሓይሊ የለን።ሓንቲ ሰይቲ ድያቆን ዝኾነት፡ ኣታ ክትብሎ ተጀሚራ፡ነተን ካልኦት ማሓዙታ ድማ ኣታ ኢለን ንኽጽውዖኦ ዕድል እንዳኸፈተት ኢያ።እዚ ድማ ምስኡ ብዙሕ ናይ ምንዮታዊ ሓጥያት ንኽፍጽማ ዕድል እንዳኸፈተት ኢያ።ሰይጣን ነቶም ኣብ ቤት ኣምላኽ ዘገልግሎ ኣዝዮም ምልኩዓት ገይሩ ስለዘርእየና፡ንሕልናና ምስቲ ኣታ ኢልና ምጽዋዕ ዝለመድናዮ ድያቆን ርኽሰት ንኽንገብር ይደፋፍኣና።ብኣካል ዋላ ኣይንፈጽም ብልብና ብምንዮት ንፍጽሞ።በንጻሩውን ነቶም ድያቆናት ናብ ዘይተደለየ ፈተነ ነእትዎም። ንሳቶም ኣገልገልቲ ኣምላኽ ክንሶም ባዕልና፡ንፍትኖም።

ስለዚ እዛ "ኣታ" እትብል ኣጽውዋውዓ ብዙሕ ዋጢጥ ኣሎዋ።ብማዕርግ ምጽዋዕ ግን መሊሳ ተማዕርግን ካብ ሓጥያት ትከላኸልን ኢያ።

ሓንቲ ብዓልቲ ሓዳር፡ንሰብኣያ ኣንቱም ኢላ ክትጽውዖ ዝጸነሐት፡ኣታ ክትብሎ እንተጀሚራ፡ንሱ ብውሽጡ ናይ ምስናፍ ስምዒት ይወርዶ።ንሳውን ኣብቲ ሰብኣያ ዝነበራ ኣኽብሮት እንዳቐነሰ፡ይመጽእ እሞ፡ገለ ጉድለት እንተፈጺሙ ነዲራ ንኽትዳፈሮ ድሕር ኣይትብልን። ንሱ ውን ከምኡ።መብዛሕትኡ ኣብ ሓዳር ግጭት ዝፍጸም ምዝንጣል ምስተጀመረ ኢዩ።ፍቕርተይ፡ፍቑረይ፡ሓፍተይ ሓወይ፡ጎይታይ፡እመ ቤተይ፡እንዳበልካ ክትጸዋዋዕ ጸኒሕካ ሓደ ክልተ ውላድ ምስ በጻሕካ ግን ምዝንጣል እንተተጀሚራ፡ግዲ የለን ምትፍናን ክመጽእ ኢዩ።እቲ ምትፍናን ብደገ እካ ኣይረአ እምበር፡ብውሽጢ ገሃጽ ሃጽ ከምዝብል ርዱእ ኢዩ።
እረ ሎሚ ምዝንጣል ድንግልና ምስ ፈረሰት ኢያ ትጅምር ዘላ።ሎሚሞኸኣ፡መርዓ ድሕሪ ድንግልና ስለዝኾነ፡እቲ ኣንቱም፡ኣንትን ተባሃሂልካ ምጽዋዕ ዳርጋ ኣዝዩ ኣሕፋሪ እንዳኾነ ይመጽእ ኣሎ።
እግዚኣብሄር እዱባትን፡ኣኽበርትን ልሳን ናይ ኣቦታትናንን ናይ ባህልናን ይዓድለና።ክብሪ ምስጋና ውዳሴ ንእግዚኣብሄር ይኹን።
እመ ኣምላክ ሆይ በረኸትኪ ነማዕዱ ኣሎናሞ፡ኣዘክሪ፡ስደትኪ፡መከራኺ፡ሓዘንኪ ኩሉ ንምህጸነኪ ኣሎናሞ ኣዘክሪ።ኣሜን፨፨፨

መጽሓፍቲ ተዝግንጸል መን ምነበቦ

ብስብ ኣብ ወወልድ ወመንፈስ ቅዱስ ኣሀዱ ኣምላክ ኣሜን።
¶¶¶በመጽሐፈ ሂዎት ነበብናሀ ገነተ፡ወበመጽሐፈ ስጋ ተራእየ ሞተ።
ብመጽሓፈ ሂዎት ተረኣየት ገነት፡ብመጽሓፈ ስጋ ተራእየ ሞት።¶¶¶

መጽሓፍቲ ተዝግንጸል መን መምበቦ፧ታሪኽ ተዝዝንቶ መን ምተረኾ፧ሕቶታት ተዝሕታት መን ምመለሶ፧ንምካኑ ነቶም ዝተጻሕፉ መጽሓፍቲ መን ጽሓፎም፧ ነቲ ዝትረኽ ገድልታት መን ፈጸሞ፧ነቶም ዝምለሱ ሕቶታትከ መን ሓተቶ፧

ኣብ ዓለም ብዙሕ ዓይነት መጽሓፍቲ ተጻሒፉ፡'ዩ፡እዞም መጽሓፍቲ ንብዙሓት ምክንያት ውድቀት ኮይኖም ኢዮም።ብዙሓት ተረኽቲውን ተቐልቂሎም፡ብምኽንያት ትረኸኦም ድማ ንብዙሓት ሓንኪሎም ኢዮም።ብዙሕ ሕቶታት ተሓቲቱስ ኣብዛ ዓለም ብዝተረኽበ መልሲ ንብዙሓት መሕነቓ ኮይኑ ሓኒቑ ቀተለ።

ንምኻኑ መጽሓፍ ተባሂሉ ዝስመ ዘውድቅ ድዩስ ዘተንስእ፧ልብኻ ምስ መንፈስካ ዘሰማምዕ ድዩስ፡ስጋውነትካ ጥራይ ሓሲብካ ብዛዕባ መንፈሳውነትካ ከምትዝግዕ ዝገብር ኢዩ፧ኣብዚ ዓለም ክልተ ዓይነት ሰብ ኣሎ፡

1)ክሳብ መቓብር ጥራይ ኣምበር ድሕሪኡ ዘሎ ዘይግድሶ።
2) ክሳብ መቓብርን ድሕሪ መቓብርን ንዘሎ ክሓስብ ዝነብር።

እቶም ክሳብ መቓብር ጥራይ ክሓስቡ ዝነብሩ፡መወከሲ መጻሕፍቲ ኣሎዉዎም።ኩሎም እቶም ዝጥቀምሎም መጻሕፍቲ ኣብ ልዕሊ መቓብር ጀምሪካ ዘሎ ስጋውነት ኣመቓቒሮም ይገልጹ፡ስጋዊ ሂዎት ኣዝዩ ሙቁር፡ብስጋ ከምትሰብሕ፡ብስጋዊ ፍትወት ስጋኻ ከምትረዊ፡ብስጋዊ ሃብቲ ከምትህብትም እሞ ናብ ድላይካ ክትከይድ ከምትኽእል፡ብስጋዊ ዓይኒ ድላይካ ርኢኻ ዕግበት ከምትረክብ፡ድላይካ ተመኒኻ ሽዑን ሽዑን መልሲ ከምትረክብ ወዘተ ይትንትኑ።
እዚ ጥራይ ኣይኮነን፡ከመይ ገይርካ ብስጋ ዝያዳ ሃብታም ትኾውን፡ከመይ ገይርካ ብዓል ዝና ፍሉጥ ሰብ ኮይንካ ከም ትምለኽ፡ከመይ ኢልካ ትዝሙ፡ንዝሙት ዘበራትዑን ንፉዕ ዘማዊ ንኽትከውን ዘተባብዑን፡ምስ ዘሞኻኸ እቲ ዘለኻሉ ከይዲ እንታይ ሰም ተጠምቖ፡ከመይ ገይርካ ሰብ ትቐትል፡ከመይ ገይርካ ናይ ላም ኣፍ ኣውጺኻ እምባሕሕሕ ትብል፡ወዘተ ብዛዕባዚ ተጻሒፉን ተደሪሱን ኢዩ።ስለዚ እቶም ክሳብ መቓብር ንዘሎ ሂዎት ክሓልሙ ዝነብሩ ሰባት መወከሲ ሂዎቶም እዞም መጽሓፍቲ እዚኦም ኢዮም።

መጽሓፍ ብብርዐ ቀለም ንዝሕንጠጥ ጥራይ ኣይኮነን ዝውክል፡መጽሓፍ ኣብ ልቢ ተጠጅኡ ዝነበረ ሓሳብ፡ናብ ደገ ክወጽእ ምስ ከኣለ፡እቲ ተዓዛቢ ካልኣይ ኣካል በቲ ዘውጻኻዩ ተጠቃሚ እንተኾይኑ፡ንስኻ ደራሲ፡ንሱ ድማ ኣምባቢ ኮይንኩም።ኣብ ውሽጢ ልቢ ንዝነበረ ሓሳብ፡ብመልክዕ video፡ብመልክዕ ተለፎን፡ብመልክዕ ጽሑፍ ብመልክዕ ዝተፈላለየ ማስመድያ ክፍኖ ይኽእል ኢዩ።ብርግጽ ድማ ተዘርጊሑን ይዝርጋሕ ኣሎን።እቶም ተጠቀንቲ ናይዚ ዕላመኦም ክሳብ መቓብር ስለዝኾነ፡ክሳብ ዝሞቱ ንዘሎ ሂዎቶም ሓንቲ ጭርሖ ሒዞም ይጎዓዙ።ክሳብ ዘለኻ ከም ድላይካ ንበር፡ብድሕሪኡ ከኣ ዝረኣዮ ስለዘየለ፡......ኢሎም ኣብ ምልክት ሕቶ የእትውኻ።

እቶም ክንዮ መቓብር ክሓስቡ ዝነብሩ ዝበልናዮም፡ሰባት ድማ ሰብ ምስ ሞተ እንታይ ይኾውን ዝብል ጭንቀት የብሎምን።ብዓንተዉኡ ሰብ ካበይ ከምዝመጸን፡ናበይ ከምዝኸይድን፡ርግጸኛታት ኮይኖም ብእምነት ዝተቐበልዎ ጉዕዞ ስለዝኾነ፡ብዛዕዛዚ ኣይግደሱን።ንሳቶም ዘገድሶምሲ፡ኣነ ከመይ ክኾውን ኣሎኒ፧ሂዎተይ ቅድሚ መቓብርን ድሕሪ መቓብርን ከመይ ክትከውን ኣሎዋ፧ብስጋ መታን ከይህሰ፡ብመንፈሳዊ ውን መታን ከይጉጠ፡እንታይ ገዲፈ እንታይ ክምልእ ኣሎኒ፧ ኢሎም ዝዉከስዎ መጽሓፍ ኣሎዎም።እዚ መጽሓፍዚ ድማ ቅድሚ መቓብርን፡ድሕሪ መቓብርን ዘሎ ሂዎት ብስእሊ ገይሩ ዝገልጽ ድረስት ኢዩ።ነዚ ዝደረሱ ኣብቲ ክንዮ መቓብር ዘሎ ሂዎት ብሰላም ኣሎዉ፡እቲ ነዚኦም ዘድረሰ ምንጮም እግዚኣብሔር ድማ ኣብ ሕቕፉኡ ተቐቢሉ ሓቖፎም።

እዚ ኩሉ ዝትጻሕፈ መጻሕፍቲ፡ነቲ ክሳብ መቓብር ንዘሎ ሂዎት ጥራይ ዝትርኹ፡ተረኽቱ እቶም ስጋውያን ኢዮም።ድሮእካ ክሳብ ሕጂ ካብ ቃኤል ጀሚሮም እንዳተተረኸ ኢዩ።እቶም ክንዮ መቓብር ንዘሎ ሂዎት ከይተረፈ ዝትርኹ መጽሓፍቲ ግን ዝትርኾም ዘይኮነስ ዘምብቦም እካ እንዳወሓደ ይመጽእ ኣሎ።ካብ ክልተ ብንስሐ 100 ዓመት ዝተሓጸቡ ኣዳምን ሄዋንን ሓደ ኣቤል ምስተረኽበ፡ካብ ኣቦታቱ ዝተረከቦ ስእሊ ናይቲ ክንዮ መቓብር ዘሎ ናይ ገነት ሂዎት ከይትርኽ ብንግሁኡ፡እቲ ብምድራውነት ኣዝዩ ምኩሕ ዝኾነ ሓዉ ቀተሎ።ምድሪ ንኣዳም እካ በኽሪ ወዳ እንተገበረቶ፡ንወዲ ኣዳም ግን በኽሪ ንብረታ ገበረቶ።ኣቤል ኣብ ምድሪ ብሓመድ እካ እንተተበለዐ፡ሰማያት ከይዱ ግን ነታ ዝፈልጣ ናይ ዕረፍቲ ስፍራ ምስረኸበ፡ነቲ ዋና ዕረፍቱ ስምዕትኡ ኣቕረበ።ቃኤላዊ ስነሓሳብ ከይውሕዝ ብኣግኡ ንኽዕገት ድማ ጥርዓኑ ኣቕረበ።ኣምላኽ ድማ ደም ሓውካ ናባይ ይጠርዕ ኣሎ በለ።ደም ኣቤል ኣብ ምድሪ ኣብ መቓብር እካ እንተተረፈ፡እቲ ድሕሪ መቓብር ከይዱ ዝፈስስ ደም ግን ከይዱ ምስ ፈጣሪኡ ተዛራረበ።(ምንት ገበርከ፡ደሙ ለእሁከ በጽሐ ሀብየ ዘፍ4፣10) ይብል።ደም ሓውኻሲ ናባይ በጺሑ፡ንስኻ ኣብ ምድሪ ዝፈሥስ ጥራይ መሰለካ፡ግን ናባይ ኢዩ ፈሲሱ በለ።

ዓለም ምሉእ ብስጋውነት ተዋሒጣ፡ነቲ ክንዮ መቓብር ንዘሎ ስእሊ ዝነግር ጽሑፍ ዘምብቦ ሰብ ፈጺሙ እንዳወሓደ ይመጽእ ኣሎ።ዋላ እቶም ጸሓፍቲውን ስጋዊ ረብሓ ተዘይረኺቦም ምጽሓፍ እንዳቃረጽዎ ይመጹ ኣሎዉ።ሎሚ ኩሉ ዘማሪ ክኾውን፡ካሴት ኣሓቲሙ ዘማሪ እገለ ክበሃል፡ይደሊ ምንጪ ድልየቱ ግን ክንዮ መቓብር ዘማዕደወ ኣይመስልን።መዝሙሩ ጥዑም፡ሓሳብ ግን ክሳብ መቓብር ኮይና፡ስጋዊ ረብሓኣ ጥራይ ዘቐድም ሰብ ከመይ ኢሉ ጣቃ ክህልዎ።ብኡኡ መንጽር እቶም ኣምበብትን ሰማዕትን ውን እናሰልቸዎም ይመጽእ ኣሎ።ዓለም ምልእቲ ብስጋውነትን ዝና ዝተመልኦ ሓጥያትን ተመሊኣ ኣብ ዝነበረትሉ ግዜ፡ክንዮ ማይ ኣይሂ ዝነበረ ዛንታ ክንሰምዕ ዝገበሩና እቶም ውሑዳት 8 ሰባት ኢዮም።ኖህን ደቁን፡ካብ ኣዳም ክሳብ ዘመኖም ንዝነበረ መንፈሳዊ ትረኻ ብዝግባእ ስለዝሰምዕዎ፡ንርእሶም ካብ ማይ ኣይሂ ድሒኖም፡ናባና ንኽበጽሕ ድማ ምኽንያት ኮይኖም።ሕጂውን ነዚ ሎም ዝፍጸም ዘሎ ይኹን ቅድም ዝተፈጸመ ተረኽቲ ክኾኑ ዝመደቡ ሰባት፡ገሊኦም ከምቶም ዝጠሓሉ ኣብ መቓብር ጥሒሎም ክተርፉ ኢዮም፡ኖሃዊ ጠባይ ዘሎዎ ሰብ ግን ክንዮ መቓብር እንዳሓሰበ፡ነዞም መጽሓፍቲ ናይ ክንዮ መቓብር ንዘሎ ስእሊ ዝገልጹ እንዳምበበ ክነብር ኢዩ።ግን ክውሕዱ ኢዮ።ሎሚ ንምንታይ ኢዩ ካብ ዓለም ምሉእ ኦርቶዶክስ ተዋህዶ ዝወሓዱ ኮይኖም እንተኢልና፡ቅዱስ ኖህ ባዕሉ ይምልሰልና።"ኣብ ልቢ ኣቦታተይ ዝነበረ ጽሑፍ ማይ ኣይሂ ክውሕጦ ዘይከኣለ፡ብዙሓት ኣምበብትን ሰማዕትን ስለዝነበርና ኣይኮነን።ተረኽቲ ናይ ዘብዛሕካ ዘይኮነስ፡ነቲ ዝተተረኸ ከመይ ትዕቅቦ ኢዩ ወሳኒ።ኣነን ደቀይን ዓቂብናዮ ስለዝጸናሕና፡ንዋሕድና ማይ ኣይሂ ኣይደምሰሶን።በንጻሩ እቶም ብዛዕባ ስጋውነት ብዙሕ ዝጸሓፉን ዝተረኹን ግን ብዝሖም ንማይ ኣይሂ ኣይገደቦን።ማይ ኣይሂ ንዕዖም ደምሰሶም፡ንዓና ግን ውሕዳት እካ እንተኾንና በቲ ክንዮ መቓብር ንዘርኢ እምነትና ብዝግባእ ስለዝዓቀብናዮ፡ጸምበሃለል ኣበለና።" ኢሉ ይምልሰልና።ኣቦና ቅዱስ ኢዮብ ውን፡"ኣብ ዘመነይ ንኣምላኽ ዝፈርህ፡ክንዮ መቓብር ንዘሎ ደስታን፡ስቅያትን ኣስተኻኺሉ ዝፈልጥ ሰብ በይነይ ኣነ ጥራይ ኢየ ነይረ።ስለዚ ኣንቱም ኦርቶዶክስ ተዋህዶ ደቀይ እንተዋሓድኩምሲ ኣይትሰምብዱ፡ስኽፍ ኣይበልኩም፡ኣብ ቤተ ክርስትያን ክንደይ ሰብ መጺኦም ኢልኩም ክትቃሞቱ ኣይትውዓሉ።ንስኻትኩም መጀመርያ ሂዎትኩም ኣብ መቓብር ጥራይ ከምዘይተብቅዕ እመኑ፡ድሕሪኡ ከመይ ኢልካ ከምዝንበር ድማ ነቶም መወከሲ ጽሑፋት ኣምብቡ።ምንባብ ክበሃል እንኮሎ፡ብ ወረቐት ጥራይ ኣይኮነን።ኣነ ንደቀይ ብጹሑፍ ኣይኮንኩን ዝምህር ነይረ።ማለት ነቲ ብ ኣቦታተይ ዘምበብክዎ ዛንታ፡ብጹሕፍ ኣይተረከብክዎን፡ንደቀይ ውን ብጽሑፍ ኣየሕለፍክዎን።ብሕገ ልቦና ደኣምበር።ስለዚ ንስኻትኩም ድማ ደቀይ ብጹሑፍ ምርካብኩም ጽቡቕ ኢዩ።ኣብ ርእሲኡ ድማ ካብ ኣፍ ኣቦታትኩኩም፡ልብኹም ንትምህርቶም ተምብቦ።" ኢሉ ቅዱስ ኢዮብ ይምልሰልና።

እግዚኣብሄር ሆይ፡ኣብዛ ስጋውነት ዝዓብለላ ዓለም መንፈሳውያን ኮይንና ክንረክብ ንደሊ ኢና፡ሓይልና ግን ላሕልሐ፡ኣብዛ ክሳብ መቓብር ጥራይ ዝሕሰበላ ዓለም ክንዮ መቓብር ክንሓስብ ንደሊ ኢና፡ስጋውነት ግን ባይታ ኣውዲቕና ኢዩሞ ኣዚና ውሒድና ኣሎና።ጎይታየ ስጋውነትና ገደብ ክንገብረሉ፡ነብስና ኣብ ስጋ ክትነግስ፡ንስኻ ድማ ኣብ ነብስና ክትገዝእ ፍቓደኛታት ክንከውን ሰናይ ፍቃድካ ይኹን።ንሕና ደቅኻ ደኣምበር ደቂ ዓለም ኣይኮነናንሞ፡ሰማያዊ ልደትና ከም ንዝክር ግበረና።
ንኣብ ንወልድ ንመንፈስ ቅዱስ ሓደ ኣምላኽ ምስጋና ይኹን ሎምን ኩሉ ሳዕን ኣሜን።