ዓርኩ!
ቅድሙስ
ደንቤና ብሓደ
ዒላና ኣብ ሓደ
መሐምበሲና ሓደ
ተሓሊፉ ኲሉ ብፍቕሪ
ተተቓለስና ኣብ ቃላይ-ባሕሪ
ሓዴና ይስዕር ሓዴና ይዂሪ
ኣሻብና ንዂሉ ረሲዕና
ንጽባሒቱ ተተሓሒዝና ንወፍሪ
ኣብ'ቲ ንወፍረሉ
ጥሪትና ንጓስየሉ
ጣዕሞትና ንማቐለሉ
ዓረምና ንሓልበሉ
ጻባ ግርዲትና ንፋየተሉ
ንቊንጣሮ ተኻፊና ንዕንገለሉ
ዕርክነትና ሰብ ዘበለ ክቐንኣሉ
ሕጂ ደኣ ዓርኩ!
ስለምንታይ ተተፋኒና
ብመንከ ተናቘትና
ኣብ ክንዲ ዓራቒ መናቘሪ
ኣብ ክንዲ ሰታሪ መናገሪ
ዶ ኴኑና'ዚ ኢንተርኔት
ካን ጀሚርና ክንቈጽር ዓሌት
ኣክንዲ ዝገደፍናዮ ጒስነት
ክብርኽ ዝግብኦ ፍቕርና ብፍጥነት
መበኣሲዶ ኴይኖምና ዝቐሰምናዮም ቀለማት
ብበትሪ ብደንጐላ ዘይተበትከ ምሕዝነት
ሃደሽ-ደሽ ጀሚሩ ኣሻቡ ብፊደላት
ከተማ እንክንቅመጥ ብስካፑሊ
ፋታ ብቊራሶ ባኒ
'ና ተማቐልና ከም ዓሚ
ምስ'ቲ ኲሉ ጸገማት ቊስሊ
ግን ኔርናዮ ብሉጻት ኣብ ክፍሊ
ኣብ ምሉእ ቤት ትምህርቲ
ዶ ኣይነበርናን ኣብነታውያን ስእሊ፧
ኣብ ጌጠር ዝሸየኸ ፍቕሪ
ክሳብ ከተማ ምሳና እንክዛሪ
ሕጂስ ኣይግድን ዓርኩ
ካን ቀመም ፍቕርና ተተኪኡ ብጓህሪ
መቸም ባዕሉ ዕርክነትና ይምለሰልና ፈጣሪ
እምበር ዓርኩ!
ዝቐሰምናዮም ቃላትሲ ሞት እምበሪ
'ታይ ከይህልወና ኢልካዮ ዕምሪ
