ስብእና!!

በስመ ሥላሴ!!!

ኣእምሮ ስምዒታቱ ክለዋውጥ፡ መን'ዩ ተሓታቲ፧

√ ናብ ሕልና ኣቢሎም ዝውርወሩ ረቀቕቲ ኣእሻኽ፡ መእተዊኦም ብመሳኹቲ ኣዕይቲ'ዩ።
√ ልዕሊ ዕንጒለ ዝዕርዕሩ ፍጻሜታት ብድምጺ ወይ ስእላዊ መልክዕ ተቓሚሞም ናብ ሕልና ዝኣትዉ፡ ተነባቢ ከብሒ ስለዘሎ'ዩ።
√ ኣብዚ ዘመንና ስለ ዕለታዊ ፍጻሜታትን ንኣእምሮ ዝውጥሩ ነገራትን ኣመልኪቶም፡ መጽናዕቲ ዝገብሩ ንፉዓት ሃየስቲ ተዝርከቡ፡ ንኲዕታ ዝሕረ እኹል ጫካ internet ኮይኑ ምጸነሖም ይመስለኒ።

ንኣብነት፥-

√ ኣብ internet፡ ኣዝዩ ዝተጨነቐ ተስፋ-ቆረጽ ዝኾነ ሰብ ትርኢሞ፡ ኣእምሮና በቲ ፍጻመ ተሰናቢዱ "እምበርዶ ኣለኻ ኢካ!" ኢሉ ምስ ኣምላኹ ክደራደር ትንዕ-ትንዕ ይብል።
√ በቲ ካልእ መስኮት ናይ facebook ድማ ኣእምሮ ንሓደ፡ ብሓጎስ ተጨዲዱ ኣብ መንግስተ ሰማይ ዘሎ ክሳብ ዝመስሎ ኮይኑ ልዕሊ መጠን ዝተሓጎሰ ሰብ ይርኢ'ሞ፡ እቲ ብቈሪጸ ተስፋ ተሓሊሉ ዝጸነሐ ኣእምሮ ኣብዘን ቁንጣሮ ካልኢታት ኣወንታውያን ስምዒታቱ ክለዋውጥ ይግደድ።

√ በቲ ካልእ ፍኒስትራ ናይ instegram ድማ ክልተ ወይ ልዕሊኡ ዝከራኸሩ ኣካላት፡ እረ እነሓንሳእ ክርክሮም ከምኡ ኢሎም ካብ ማሕጸን ኣዴኦም ኣትሒዞም ተመክሮ ዝወሰድሉ ክርክር ብዝመስል ኣብ ሕልና ከቢድ ነውጺ ክፈጥር ዝኽእል፡ ኣጀንድኡ ረሲዑ'ውን ምውንጃል ምጽርራፍ ቀመም ዝገበረ ክትዕ ክዕዘብ ይጅምር ኣእምሮ። በዚ ድማ "ኣንታ እምበርዶ'ዛ ዓለምና ዝሰማምዑ ሰባት ኣለዉዋ ኢዮም፧" ኢሉ ብምሕሳብ ፡ "ደጊም ካብ ምስ ዘይረዳዳኣካ ሰብ ምዝራብ በይናዊ ሕይወት ክመርሕ ይሕሸኒ!" ናብ ዝብል ውሳነ ብምሕሳብ ንሰባት ክጽይን ይደናደን።

√ በቲ ካልእ ወገን ድማ፡ ምንዝርናዊ ወይ ንምዝርና ዘለዓዕል ትርኢት ይምልከት'ሞ ኣዝዩ ይስምብድ። "ትማሊ-ትማሊ እሙናት ምርዑዋት ሰብ ቃል ኪዳን ክፋትሑ ርእየስ፡ በዚ ኸኣ ካልኦት እንዳዘመዉ ይርኢ ኣለኹ!" ብምባል ንኣብ ዓለም ዝነብር ሰብ ኩሉ በዓለገን ብናይ ምንዝርና ሰንሰለት ዝተቐፈደን ገይሩ ክሳብ ዝሓስብ ይኸውን።

ኣንባቢ ይመልኣዮ!!.... ካልእ ብዙሕ-ብዙሕ...

√ እቶም ንኣእምሮ ዝውጥሩ ፍጻሜታት ቀጻልነት ክሳብ ዝሃለዎም፡ ሕልና ቅሳነት ክሕረሞ ግድን'ዩ።
√ ሕልና ተዘይቀሲኑ ድማ፡ ጽባሕ-ጽባሕ ዝላብዑ ሕማማት ኣእምሮ ክፈርዩ ባሕርያዊ'ዩ።
√ እቲ መፍትሒ፡ ንinternet ምዕጻው ኣይኮነን፡ ንሱስ ዋላ እንተተሓሰ'ውን ዝከኣል ኣይመስለንን። ምኽንያቱ ክስረት እንከሎ'ዉን ብናትና ህየሳ ኣይኮነን ተቀሪጹ። ማለት እቶም ንintermet ዝሰረትዎ ኣካላት፡ ዕጋበታት ኣእምሮና ጥራይ ኣተኲሮ ገይሮም ዝመሃዝዎ ኣይኮነን። እንታይ ደኣ፡ ብመንገዲ'ቲ ድሌታትና ገይሮም ዝረኽብዎ ናይ ገዛእ ርእሶም ረብሓታት ኣተኲሮ ዝገበረ'ዩ።

√ "ኣእምሮናኸ ካብዚ ንሳቶም ዝሃየስዎ internet ክረብሕዶ ወይስ ክጒዳእ'ዩ ዝኽእል፧" ዝብል ኣዛራራቢ ሕቶ ክለዓል ግን ጽቡቕ ይመስለኒ።
√ ኣነ "እወ! Internet ንኣእምሮ ክጽይቕ ዝኽልእ ሕምቕ ቀለም'ዩ፡ እንተተኻኢልዎ'ውን ንኣእምሮ ምስ ሕልና ሓዋዊሱ ጨሪሱ ከዐኑ ዝኽእል ረቂቕ ኣቶሚካዊ ቦምብ'ዩ!" ዝብል ርእይቶ ኣለኒ። ግን ብግልባጡ ድማ internet፡ ልዕሊ መጠን ንኣእምሮ ክሃንጽ ዝኽእል ናይ ግሊ መምህርን ቤት ትምህርትን ምኻኑ'ውን ዘንጊዐዮ ኣይኮንኩን።

√ ስለዚ ኣእምሮ ዝምገበሉ፡ ሕልና ኸኣ ኣስተርሕዩ ዝቐስነሉ መገድታት ምፍታሽ ግን ጽቡቕ ኣመራጺታት'ዩ።

ተተኰስቲ ሓሳባት!

√ ተተኳሲ ኣይዛረብ ኣይሰምዕ ኣቕሓ ነገር ክንሱ፡ ልቢ ብዙሓት ዘባህረረ፡ ጅግንነት ኣሻሓት ድማ ትሕቲ ባይታ ዝቐበረ ትርኑዕ ሓይሊ'ዩ። ክስትውዓል ዝግብኦ ግን፡ ነዚ ክውን ንክኸውን ቀንዲ ተጠቃስን ምኽንያታዊ ነጥብን፡ ኣእምሮ ብዘፈልፈሎም ሓሳባት'ዩ። ንሕና "ብዙሓት ብሰንኪ'ዚ ተተኳሲ'ዚ ተምበርኪኾም'ዮም" ዝበልናዮ ኣካላት ድማ፡ ቅድም'ዩ ኣእምሮኦም ተምበርካኽነቱ ኣርእዩ።

√ እቲ ዘገርም በዚ ኣብ ኣእምሮ ዝተቐናበሩ ተተኮስቲ ሓሳባት ፡ ንናይ ብዙሓት ኣእምሮ ከምበርክኽ ብምኽኣሉ'ዩ። እዚ ምኽኣል እንተስኢኑ ድማ ኣእምሮ፡ ተተኳስቲ ሓሳባት ኣቀናቢሩ፡ ተተኳሲ ነገር ከምዝስራሕ ይገብር።
√ ስለዚ ተተኳሲ መበቆሉ ካብ ተተኰስቲ ሓሳባት'ዩ።
√ ሓሳብ ኣብ ኣእምሮ ተቐሚሙ ዝፍልፍል ዛራ እኳ እንተኾነ፡ ብሰንክ'ዚ ኣብ ኣእምሮ ዝቕመም ሓሳባት ግን፡ ብዙሓት ክቕዘፉ ወይ'ውን ክሓውዩ ይኽእሉ።
√ ማለት ሓሳባትና ዝቐዝፉ ጥራይ ኣይኮኑን፡ እንተላይ ዘሕውዩ'ዮም።

√ ብኻልእ መዳይ፡ ኣእምብሮ ብገዛእ ኢዱ ብዝመሃዞም ተተኰስቲ ሓሳባት፡ ንገዛእ ርእሱ ክጎድእ'ውን ይኽእል'ዩ። "ገረብ ብሓኽላ፡ ብዕራይ-ብጭግሯፉ" ከምዝበሃል።
√ ኣብነት፡- ቀንዲ ጠንቂ ናይ ብዙሓት ናይ ስነ-ኣእምሮ ጸገማት ዘለዎም ደቂ ሰባት፡ ጅማሬኡን ድሕረ-ባይታኦምን እንክረአ፡ ኣብ ኣእምሮኦም ልዕሊ መጠን ተወንጨፍቲ ሓሳባት የእንግዱ ከምዝነበሩ'ዩ ዝረጋገጽ።
√ እምበኣር ገሊኦም ተተኰስቲ ሓሳባት፡ ኣብ ኣእምሮ ጀሚሮም ኣብ ኣእምሮ ይትኰሱ፡ ገለ-ገሊኦም ከአ፡ ካብ ኣእምሮ ወጺኦም ኣብ ልዕሊ ኣእምሮ ብዙሓት ይፍንጀሩ።
√ ጽቡቕ ነገሩ ግን፡ ኣእምሮና ክፍንጅሩ ዝኽእሉ ሓሳባት ዘጥሪ ጥራይ ዘይኮነስ፡ ብዝበዝሐ መጠኑ እንኳን ንብዙሕ ነገራት ክጽግኑ ዝኽእሉ ኣወንታውያን ሓሳባት ከውሕዝ ዝኽእል ሓያል ጽዓት ብምኻኑ'ዩ።

√ ስለዚ ሰብ ካብ ኣእምሩኡ ዝምጭዉ ንዘለዉ ሓሳባት ተተኰስቲ ምኻኖም እንተድኣ ተረዲኡ፡-
- ቀዳማይ ገዛእ ኣእምርኡ ንከይሃሲ ክብል፡ ነፍሰ ምክልኻል ክገብር ክግደድ'ዩ።
- ካልኣይ ድማ፡ ነቶም ተፈንጀርቲ ሓሳባቱ ኣለልዩ፡ ኣብ ክንዲ "ዓይኒ-ብለይ ስኒ-ብለይ" ኢሉ ኣብ ልዕሊ ብዙሓት ደርብዩ ንብዙሓት መሃሰይቲ ዘውርድ ፡ "ቅድሚ ዝኣገረ ንሰባት ዝጠቕምሉ መገዲ ከናዲ'የ" ኢሉ ክሓስብ ክጅምር'ዩ።

 ስምምዕ፡ ብኸመይ፧

1. ሓሳባትካ ብኣእምሮ ብዙሓት ተቐባልነት ከረብ ምድላይ ጥራይ ዘይኮነስ፡ ንስኻ'ውን ሓሳባት ብዙሓት ክሰምዕ ክፈቶ። እዚ ምግባርካ ብውሕዱ፡ ኣእምሮኻ ንነገራት ቀልጢፉ ክርደኦምን፡ ነቶም ዝተጠናነጉ ሓሳባት ብኣግኡ ክማምዮምን ክሕግዘካ'ዩ።
2. እትዛረቦም ቃላት ኣእምሮኻ ማምዩ ዝፈልጦምን ሕልናኻ ድምዳሜ ዝህበሉን ክኸውን ኣለዎ። ምኽንያቱ ብዘይካ ኣእምሮኻን ሕልናኻን ካልእ ኣካል ንኣበሃህላኻ ሓላፍነት ክወስደሉ ዝኽእል የለን፡፡ እዚ ድማ ኣበሃህላኻ ንስምምዕ ወይ ንምብትታን ናይ ሓሳባት ምኽንያት ክኸውን ስለዝኽእል'ዩ።
3. ከምቲ ኣእምሮኻ ናጻ ፍጥረት ምኻኑ እትኣምነሉ፡ ነቲ መከራኽርትኻ'ውን ናጽነቱ ኣይትቃጸጾ። ማለት ብናይ ማንም ሓሳባት ኣእምሮኻ ክጉዳእ ከምዘይትደሊ ርዱእ ስለዝኾነ፡ ኣእምሮኻ ዘፈልፈሎም ሓሳባት ንኻልኦት፡ ክጠቕሞም ወይ'ውን ክጎድኦም ከምዝኽእል ፈሊጥካ፡ ቅድሚ ሓሳባት ምምንጫውካ ምሒር ጥንቃቐታት ግበር። ጽቡቕ ኣጋጣሚ ኮይኑ፡ ሓሳባትካ ንሰባት ተጠቐመ ንስኻ ትምስገን፡ እንተጎደኦም ወይ እንተኣቐየሞም ግን ንስኻ ኢኻ ትንቀፍን ትጉዳእን።
4. ኣእምሮ ወዲ ሰብ ወትሩ ክዕወት'ምበር ክጸዓድ ኣይደልን'ዩ፡፡ ንስኻ'ውን ዋላካ ናይ ወትሩ ምንዮትካ ዓወት እንተኾነ፡ ብሰንኪ'ቶም ዘጋጠሙኻ ብድሆታት ውጥቀት እንተድኣ ኣጎልቢብካ፡ ንምውዳቕካ ክትቅበሎ ኮሎ-ገና ምድላዋት ግበር። እዚ ደጊምካ ትርኑዓት ሓሳባት ሒዝካ ንኽትትንስእ ክሕግዘካ'ዩ። ወዲቕካ እንከለኻ "ኣይወደቕኩን" ዘይኮነስ፡ "ብኸመይ ወዲቐ ብኸመይ ይትንስእ!" ንዝብሉ ገስገስቲ ሓሳባት ኣፈልፍል።

√ ስምምዕን ዘይምስምማዕን፡ ሓደ ካብ ኣጀንዳታት ኣእምሮ ደቂ ሰባት'ዩ፡፡ እዚ ሓይሊ'ዚ ካብ ኩሉ ሰብነትና ንኣእምሮና ጥራይ'ዩ ክብድሆ ዝኽእል፡፡ ክብዳህ እንተኾይኑ'ውን ኣእምሮን ሕልናን ብዘሳላሰልዎም ልኡማት ሓሳባት'ዩ።

√ ብኻልእ ዓይኒ፡- ብምኽንያት ስምምዕ እፎይታ ክስምዖ ዝኽእል ሕልና ጥራይ'ዩ፡ ዘይምስምማዕ ብዝፈጠሮ ነውጺ ክህሰ ዝኽእል ድማ ሕልና'ዩ። ኣእምሮ ግን ኣማራጺታት ክደሊ ስለዝነብር፡ ሎሚ ስምምዕ ተኸሲቱ ክትብል ጸኒሕካ፡ ርሑቕ ከይሰጎምካ ዝፈናጨሉ ሓሳባት ብኣእምሮ ክጠርዩ ባህርያዊ ኮይኑ ይጸንሓና። ዘሐጉስ ነገር ግን ኣእምሮና፡ ተጋጫዊ ጥራይ ዘይኮነ እንተላይ ፈታሒ ሓሳብ ከመንጩ ዝኽእል ብምኻኑ ነገራትና በኣጋ ይስተኻኸሉ።
√ኣብ መወዳእታ ናይ ስምምዕ ቁልፊ፡ ፍቕሪ ኮይና ትጸንሓና። በቃ ከባድ! እረ ክሳብ ሞት እተብጽሕ ሓይላ ኣዝዩ ብርቱዕ እካ እንተኾነ፡ ንኹሉ ሰብ ብዘይ ነግ-ፈረግ ብምሉእ ሓይልኻ ምፍቃር ግን ጽቡቕ ኣማራጺ'ዩ!!

√ 6 መፍትሒ-ረጽምታት፥-

1. ረጽሚ (ሽግር) ብምፍጣሩ ምሒር ኣይትሸገር፡ ምሒር ድማ ኣይተቃልሎ።
2. ዝርርብ እትገብረሉ ቦታ መሪጽካ፡ ብዘይ ናይ ካልእ ጸቕጢ ናጻ ኬንካ ብህድኣት ተላዘብ። ተቓየቕ ተጻረፍ ማለት ግን ኣይኮነን።
3. ነቲ ዝበሃለካ ዘሎ ተገዲስካ ጽን ኢልካ ስምዓዮ፡ ክትዛረብ ጥራይ ኣይትድለ።
4. ንናይ ክልቲኣትካ ወገናት ንኽትጋጮ ወይ ንኸይትሰማማዕ ምኽንያት ዝኾኑ ነገራት ኣለሊኻ፡ "መፍቲሒ ይኾኑ ኢዮም!" ዝበልካዮም ነጥብታት መሚኻ ኣምጽእ። ኣብቲ ዝቐረበ መፍቲሕታት ተቓውሞ ተለካ ድማ ተቓውሞኻ ምስ መረዳእትኡ ብትሕትና ኣረድእ። ጸርፍን ምንሻውን ግን፡ ንረጽምታትካ እንደገና ናህሪ ስለዝገብረሉ፡ ኣብ ቃላትካን ኣተኩሮኻን ጥንቃቐታት ግበር።
5.ንናይ ቀጻሊ ርክባትካ፡ "መምርሒታት ይኾኑ ኢዮም" ዝበልካዮም ሓባራውያን ነጥብታት ኣልዒልካ ተዛተ።
6. ይቕሬታ ክትብልን ካብ ሰባት ይቕሬታ ክትቅበልን ኩሉ ግዜ ቁሩብነት ይሃልኻ።

√ እዚ እንተኾይኑ፡ "ሕቶኡ ብዝግባእ ዝተረደአ ተማሃራይሲ፡ ዳርጋ 50% መልሳ ዝተረደኦ'ዩ!" ከምዝበሃል፡ ሽግራትን መፍቲሕታቶምን ቀልጢፍካ ናይ ምርዳእ ዓቕሚ ክትድልብ ኢኻ።

ወስብሐት ለእግዚኣብሔር።

ሕቱም-መጽሓፍ

ሰልፊ ክርስቲያን ከመይ'ዩ፧

በስመ ስላሴ!

√ ክርስቲያን ኬንካ፡ ምድራውያን ክርህሩህልካ ምድላይ ዘይኮነስ፡ ጥንካሬ መንፈሳውነትካ ምስ ሰማያውያን ዘለካ ሕብረት እተረጋግጾ ተጋድሎ'ዩ። ምድራውያን ኣብ ጸርግያኦም ወጺኻ ክትምድር ይደልዩኻ፡ ሰማያውያን ድማ ኣብ ቤተክርስቲያን ኣቲኻ ክትጽሊ ይምነዩኻ። ምኽንያቱ መንፈሳውያን ዝሓለፍዎ ሕላፍ፡ ኣብ ትሕቲ ጽላል ቤተክርስቲያን ተወሲንካ'ዩ፡ ምድራውያን ግን ጽርግያ-ጽርግያ ኣናኸድካ'ዩ።

√ ምድራውያን ጽርግያ-ጽርግያ እናኸድካ ተዘይመዲርካ ሰናይ ዝገበርካ ኣይመስሎምን፡ ሰማያውያን ግን ጽድቅኻ ከም ፈሪሳውያን ኣብ ኣደባባይ ወጺኻ "ረኣዩለይ ረኣዩለይ!" እንክክትብል ኣይብረሆምን።
√ ምድራውያን ኣብ ጎደና ክትስለፍ ይደልዩኻ፡ ሰማያውያን ግን ከከምደረጃኻ ኣብ ቤተ ጸሎት፡ ኣብ ገዳም፡ ኣብ በዓቲ፡ ኣብ ስፍራ ብሕትውና ኬንካ ብቅድስና ክትስለፍ ይደልዩኻ።
√ ሰልፊ መንፈሳውያን ሕልናኦም ናብ ሰማይ እናጠመተ'ዩ ዝከማወን፡ ምድራዊት ሰልፊ ግን ክርስቲያንነትካ እናካን ክሳብ ትርስዕ ትገብረካ።

√ ምድራውያን ነገስታት፡ ምድራዊ ታቤላ ሒዝካ በቲ ገበላኦም እንዳመደርካን እንዳኣዕገርገርካን ክትሓልፍ እንክርእዩኻ፡ "ኣገናዕ!" ክብሉኻ ቁሩብ ትተርፎም። መንፈሳውያን ግን እዚ ምግባርካ የግህዮም። እምበርከ እቲ ጽርግያ-ጽርግያ እናኸድካ እትምድሮን እትጭርሖን ምደራ፡ ብዓይኒ እግዚኣብሔር ክምዘን እንከሎ ንመንፈሳውየንካ ኣዝዩ ስለዘፍኩሶ'ዩ።

√ ምድራውያን ኩሉ ጽድቅኻ ክረኣዮም ይደልዩ፡ ስለዚ ዘዝገበርዎ ክትገብር ይደልዩኻ። ማለት ጽርግያ ተወጽዮም፡ ጽርግያ ክትወጽእ፡ ታቤላ ተጽሒፎም ታቤላ ክትጽሕፍ፡ ኣብ internet እንተወጽዮም ንስኻውን ኣብኡ ክትቅኒ ይደልዩኻ። መንፈሳውያን ግን እናተረኣኻ ተሰዊርካ ክትነብር'ዮም ዝደልዩ።

√ ምኽንያቱ ክርስትና ኣብ ዓለም እናሃለኻ ተሰዊርካ ዝንበሮ ረቂቕ ናብራ'ዩ። እነ ገለ ገርህታት፥ " ብርሃንካ ኣብ ቅድሚ ሰብ ይብራህ!" ንዝብል ሕያው ቃል ወሲዶም፡ ገዛእ ርእሶም ዝጥብሩ ኣሎዉ። እዚ ማለት ግን ታቤላን ታቦትን ሒዝካ ጽርግያ-ጽርግያ ኩለል፡ ልብሰ ተክህኖ ለቢስካ ምድራዊ ጭርሖ ጨርሕ ማለት ከምዘይኮነ ዝተረድኦም ኣይመስልን።

√ ምድራውያን ነገስታት ብቃንቆኦም ገይርካ ተዘይለሚንካዮም ኣይሰምዑኻን'ዮም፡ ሰማያዊ ንጉስ ግን በታ ትኽእላ ቃንቃ ገይርካ ክትጽውዖ ጥራይ'ውን ዘይኮነስ፡ ገና ልሳንካ ክጽውዕ እንከይጀመረ እንክውሎ እንካን፡ ናይ ልብኻ ሕሹኽታ ክሰምዕ ዝኽእል ፈጣሪ'ዩ ።
√ ምድራውያን ነገስታት ጭርሖኻ መታን ክርድእዎ ብልሳኖም ዝተሓንጠጠ ታቤላ ሒዝካ በቲ ከባቢኦም ዘወንወን ክትብል ይደልዩ። ሰማያዊ ንጉስ ግን፡ ታቤላታት ምብዛሕን ጽርግያ ጽርግያ እናኸድካ ንከባቢ ምድዋሽን ኣይደልን። ንሱ ዝደልያ ብዙሕ ኣይኮነን፡ ሓንቲ'ያ።

√ እወ ናይ ክርስቲያን ጭርሖ፡ ሓንቲ'ያ፡ "እግዚኦ መሐረነ ክርስቶስ!" ትርጉማ፡- "ኦ ክርስቶስ መሓረና!" ማለት'ያ። እዚ ድማ መጀመርያ ንባዕልኻ ኣባሲ፡ በዳሊ ምኻንካ እትእመነሉን፡ ምሉእ መሓርነትን ከሃልነትን ፍርድን ከኣ ንዑኡ ንክርስቶስ እትህበሉን ዓቢ መንፈሳዊ ሓይሊ ዘሎዎ ሓይለ ቃል'ዩ።
√ ካብኣ ስዒበን ንዓኣ ዝመሳሰላኣ ብተመሳሳሊ ዜማ ዝቃነያ ድማ ኣለዋ። "በእንተ ማርያም መሓረነ ክርስቶስ፡ በእንተ ሚካኤል..በእንተ ገብርኤል...!" እንዳበልካ ክሳብ ስም ናይ ኩሎም ቅዱሳን እናጠቐስካ፡ ልቢ ክርስቶስ ከምእትርህርሃልካ ምግባር'ዩ።

√ ክርስትና ንዑ ረኣዩለይ ኣይኮነን።
√ ክርስትና ንዑ ፍረዱለይ ኣይኮነን።
√ ክርስትና ንዑ ፍትሑለይ ኣይኮነን።
ምኽንያቱ፡ ረኣዪ ከይትደሊ ኣብ ክንዲ ኣዕይንቲ እግዚኣብሔር ተኪኤን ዝጥምታ ካልኦት የዕይንቲ የለዋን።
ፈራዲ ከይትደሊ፡ ልዕሊ ክርስቶስ ዳኛ የለን፡ ፍትሒ ከይትብል ድማ ካብ እግዚኣብሔር ንላዕሊ ዝኣስርን ዝፈትሕን የለን።

√ እቲ ጠንቂ ፍትሒ ስለዝተሳእነ ዘይኮነስ፡ ልቢ ወዲ ሰብ ናብ'ቲ ክፈትሕን ክኣስርን ዝከኣሎ ኣምላኽ፡ እምነትን ተኣማንነት እንዳቐነሰት ትኸይድ ስለዘላ'ዩ። መጽሓፍ ቅዱስ "በቲ እዋን'ቲሲ እምበርዶ እምነት ዘለዎ ሰብ ክርከብ'ዩ!" ብምባል ኣግርሞትን ስግኣትን ዘለዎ ጽሑፍ ተጻሒፉ ንረክብ።
√ ፍትሒ እንተድአ ተደልዩ፡ ኢድ እግዚኣብሔር ኣባና ንክትዓዪ፡ እታ ኣብ ትሕቲ እግዚኣብሔር እትውንዘፍ እምነት፡ ደረጃኣ ኣዝዩ ዓቢ ተራ ኣለዋ።

√ ስለዚ ማንም ክርስቲያን ልዕሊ እግዚኣብሔር፡ ካልእ ፈታሒ ከይጽበ!
√ ማንም ኣማኒ ልዕሊ ንእግዚኣብሔር ንኻልእ ልቡ ክትምብርከኽ ቦታ ከይህባ።
√ ማንም ክርስቲያን ልዕሊ ንቤተክርስቲያን፡ ናይ ኻልእ ድምጺ ከይሰምዕ!
√ ማንም ወዲ ቤተክርስቲያን፡ ቤቱ ገዲፉ ካልእ ቤት ከይናፍቕ!
√ ማንም ክርስቲያን ዝናኡን ሽመቱን ተጠቒሙ፡ ነታ ብስልጣነ መንፈስ ቅዱስ ተሃኒጻ ዝጸነሐቶ ቤት ኣምላኽ ገዲፉ፡ ካልእ ቤት ኣምላኽ ክሃንጽ ከይህቅን!! ነዚ ረጊጹ ካልእ ጉጅለ ክፈጥር እንተሓሊኑ ግን፡ እታ ብዘይኣፍልጦን ብዘይፍቓደኝነትት ቤት ኣምላኽ ዝሃነጻ ቤት፡ ንዑኡ ቤተጣዖት ክትኮኖ'ያ!!

√ ኣብ ሰብ፡ ኣብ ምድራዊ ንጉስ፡ ምድራዊ ብዓል ዝና፡ ሽሞኛ. ..ዝውከል ሰብ ፍርዱ መርገም'ዩ። መጽሓፍ-ቅዱስ "እቲ ኣብ ሰብ ዝውከል ርጉም ይኹን!" ኢሉ የጠንቅቕ።
√ እንተኸኣልናስ ንቅዱሳን "ብጸሎትኩም ሓግዙና፡ ከምቲ ዝሓለፍክሞ ኪደተ ክርስትና ክንጋደል ናብ ፈጣሪኹም ጸልዩልና፡፡ ኣብ'ዛ ምድሪ ዘላ ዕድሜና ብሰላምን ብቅድስናን ክንሓልፋ፡ በቲ ምስ ፈጣሪና ዝኣተኹሞ ቃል ኪዳን ንምሕጸን ኣለና!" ኢልና ክርስቲያናዊ ድጋፍ ክንልምን'ዩ ዘምሕረልና።

√ ተዘይኮነ ግን ናብ ቤተ መንግስቲ ቻይና ኬድካ ስለዘዕገርገርካ ኣምላኽ ብተኣምር ናብ ቻይናዊ ተቐይሩ ክረድኣካ ማለት ኣይኮነን።
√ ኣብ ቤተ መንግስቲ ኣሜሪካ መጺኻ ስለዘእወኻ'ውን ኣሜሪካዊ ኣምላኽ ኣውያትካ ክሰምዓካ ማለት ኣይኮነን።
√ ናብ ቤተ መንግስቲ ጁብቲ እንተኸድካኸ፡ ጁብታዊ ኣምላኽ ክሰምዓካ ማለት ድዩ!
√ ክርስቲያን ኣብ ክርስቶስ ዘላቶ እምነት እናወሓደት ኣብ እትኸደትሉ ግዜ፡ ኣእጋሩ ናብ ምድራውያን ነገስታት ክጽጋዓ ይጅምራ።

√ ሓደ ዘፍርህን ግድን ክፍጸም ዘለዎን ትንቢት ኣሎ፡፡ ንሱ ድማ ዘመነ ሓሳዊ መሲሕ'ዩ። ሓሳዊ መሲሕ ክነግስ እንከሎ፡ ክርስቲያንን ቤተክርስቲያንን ስለዘይፈቱ ወይ "እሺ!" ኢልካ ትእዛዙ ምኽባር፡ ወይ ድማ ከም ቅሱስ ጊዮርጊስ ንሰማእትነት ቅሩብነትካ ምርኣይ'ዩ ክኸውን። ወይ ከኣ ካብ ሰብ ተፈሊኻ ኣብ ብብሕትውና ምንባር'ዩ እቲ ሳልሳይ ምርጫ። ከም ክርስቲያን ኬንካ፡ ልብሰ ተክህኖ ተኸዲንካ፡ ታቦት ተሰኪምካ ኣብ ከባቢ ቤተመንግስቱ መጺኻ ሰልፊ እንተገይርካ ግን፡ እንታይ ክስዕብ'ዩ ጥበበኛ ሰብ ይመርምሮ። እቲ ሓሳዊ መሲሕ ኣምላኽ ኣይክኣምንን'ዩ። ስለዚ "ፍትሒ ደልየ!" ኢሉ ንዝመጾ ክርስቲያንሲ እንታይ ኮን ይገብሮ ይከውን፧

√ ንንግስነትን ስልጣንን እግዚኣብሔር ዝዳረግ ንጉስ ይኹን ፕረስደንት ኣብዛ ኣድማስ ፈጺምካ የለን፡ ብሕጂውን ኣይክህሉን'ዩ።
√ ስለዚ ንዑኡ ንእግዚኣብሔር ምእማን፡ ኣብ ትሕቲ ጽላሉ ምምዕቃብ ልዕሊ መጠን እኹል'ዩ።

√ እምበኣር ስጋውነትን እምነት ዝጎደሎ ስነ-ምግባርን ገዲፍና ልብና ናብ ሰማይ ክትጥምት ንግደፋ። ልሳንና ነቲ ሰማያዊ ንጉስ ክትጽውዖ ንፍቀደላ። ሕልናና ኣብ ቅድሚ'ቲ ወሃብን ከላእን ዝኾነ ፈጣሪ፡ ኣብ ቤቱ መጺኣ ክትምብርከኽ ንደፋፍኣያ። እግዚኣብሔር ድማ ብዘይጥርጥር፡ ተኣማንነቱ ከርእየና'ዩ። ጠላም ኣይኮነን!! ሓይሊ ጸረ ቤተክርስቲያኑ ኣድኪሙ፡ ከም ሙሴ ኣብ ልዕሎ ፈርዖን፡ ኣብ ልዕሊ ጸላእቲ መስቀሉን ኣብ ቅድሚ ጸረ ቤተክርስቲያኑን ከምእንስልጥን ክገብረና'ዩ።

እግዚኣብሔር ኣምላኽ ኃይሊ ጸረቤተልርስቲያን የድክመልና፡ ንዓና ድማ ኃይሉ ይልኣኸልና!!
ወስሐት ለእግዚኣብሔር።

ቅንዕናዶ፡ ወይሲ ልቦና?

በስመ ስላሴ!!

ቅንዕናዶ፡ ወይሲ ልቦና?

√ እዘን ክልተ ቃላት እዚኣተን ኣብ ተፈጥሮ ደቂ ሰባት ተሰሲገን ዝርከባ ናይ ሕልና መምርሒታት ኢየን። ሕልና ትእዛዛቱን መምርሒኡን ከከናውን እንተኾይኑ፡ በዘን ክልተ ቃላት'ዚኣተን ገይሩ'ዩ ጉዳዩ ዘሰላስል። ኣብ ውሽጢ ኣእምሮ ወድ ሰብ ሕልና ዝበሃል ላዕለዋይ ኮምፓስ ናይ ተፎጥሮና ኣሎ።ፈጣሪ ርክቡን ዳንነቱን ቀንዲ ጉዳዩን ምስ ሕልና'ዩ። ስለዚ ድማ ሕልና ንኣእምሮ ክእዝዞ እንከሎ፡ ኣእምሮ፡ "ቅንዕና፡ ልቦና፡ ኣስተውዓልነት፡ ርህራሄ፡ ፍትሓውነት፡ ሕውነት ፍቕሪ" ዝብሉ ኣወንታውያን ነገራት የሰላስል። ወይ ድማ በንጻሩ፡" ቅጥፈት፡ ደንዳናነት፡ ዕሽነት፡ ዓመጽ፡ ሥሰዐ፡ ጛናነት (ጛና ምካን)፡ ጽልኢ" ዝኣመሰሉ ኣሉታውያን ባእታታት ከንጸባርቕ ይደሊ። ብሓጺሩ ኣእምሮ ወዲ ሰብ ንኽልተ ነገራት ዝተቓለዐ'ዩ፡ ወይ ንሕማቕ ወይ ድማ ንሰናይ። ቀዳሞት ፍላስፋታት ናይ ዓለምና፡ ብፍላይ ከኣ ሰብ ግሪኽ ዘተኣታተዉዎ "ጥዑይን ሕማቕን ኣምላኽ!" ዝብል ኣምልኾ ጣዖት፡ "እንታይ'ዩ ኣብዚ ድምዳሜዚ ኣብጺሕዎም፧" ናብ ዝብል ዋና መበገሲኡ እንተድኣ ሓቲትና፡ " ኣብ ተፈጥሮ ሕማቕን ጥዑይ ነገራት ኣሎ!" ዝብል ናይቲ ዘመን'ቲ ጅማርያዊ ፍልስፍና'ዩ ኣብዚ ኣብጺሕዎም። ስለዚ ድማ ዘመኑ ለምለም፡ ጠሊ፡ ጽጋብ ብርሃን እንተኾይኑ፡ "ጥዑይ ኣምላኽ ይስዕር ኣሎ!" ይብሉ። በንጻሩ፡ ደርቂ፡  ህቦቡላ፡መሾምቦባ፡ ጥሜት ጸልማት እንተበዚሑ ድማ፡ "እቲ ክፉእ ኣምላኽ ይሕይል ኣሎ!"  ዝብል ድምዳሜ ይህቡሉ ነይሮም።

ምሳሌያዊ ታሪኽ!

√ ኣብ መጽሓፍ ቅዱስ ግብሪ ሓዋርያት 17፡ ሰፊሩ ከምዘሎ፡ ቅዱስ ጳውሎስ ኣብ ኣቴንስ ክሰብኽ ኢሉ ምስ ከደ፡ ኣብቲ መሰውዒ ኣብያተ ጣዖታት እንዳዘረ ይምልከት ነበረሞ፡ "ንዘይተፈልጠ ኣምላኽ!" (ግብ17፥23) ዝብል ጽሑፍ ዝተጻሕፎ መስውኢ ረኣየ። ካብ ምንታይ ተበጊሶም ኢዮም ነዚ ጽሑፍ'ዚ ጽሒፎሞ ኢልና መጽሓፍቲ እንተፈትሽና ከኣ፡ ለካ እዚ ጽሕፍ'ዚ መበገሲ ታሪኹ፡ ምስ ስቕለት ጎይታናን መድሓኒናን ኢዮሱስ ክርስቶስ ምትሕሓዝ ዘለዎ'ዩ። እዚ ድማ ኣብቲ ሽዑኡ ዝነበረ ናይ ፍልስፍናኦም መለክዒ፡ "ሓያልን ድኹምን ኣማልኽቲ ኣለዉ!" ናብ ዝብል መደምደምታ በጺሖም ስለዝነበሩ፡ ናይዚ ጉዳይዚ ድምዳሜ ዝሃበ ኣብ ዘመነ ስቕለት ናይ ጎይና ኢየሱስ ክርስቶስ ዝነበረ ፍላስፋ ድሒሩ ግን ብስብከት ቅዱስ ጳውሎስ ክርስቲያን ዝኾነ፡ ዲዮናስዮስ ኢዩ። እዚ ድማ፡ ጎይታና ምስተሰቕለ ኣብ ሃገሮም ሃገረ ግሪኽ፡ ጸሓይ ጸልሚታ፡ ወርሒ ደም ኮይና፡ ከዋኽብቲ ክረግፉ እንከለዉ ርእዮም'ቶም ሕዝቢ፡ ደቂ ኣቴንስ ማለት'ዩ፡ ናብዚ ፍላስፋ'ዚ መጺኦም " እንታይ'ዩ እዚ ምኽንያት ናይ ጽሓይን ወርሕን ከዋኽብትን ጉዳይ!" ኢሎም ሓተትዎሞ፡ ንሱ ድማ " ኣብ ሰማይ እቲ ሕሱምን እቲ ጥዑይን ዝበሃሉ ኣማልኽቲ ተባኢሶምሲ፡ ብናቶም ውግእ ድማ እዚ ምልክትዚ  ኣብ ሰማይ ይረአ ኣሎ። ሕጂ ግን እቲ ክፉእ ኣምላኽ ስለዝሰዓረዩ፡ ብርሃን ብጸልማት ተጎልቢቡ ከዋኽብቲ ዝረግፉ ዘለዉ።" ኢሉ ድምዳሜ ሃቦም። ንሳቶም ድማ "እዚ ኣምላኽዚ መን'ዩ፡ ክንፈልጦ ኣለና፡ ክሳብ ብፍቓዱ ዝግለጸልና ግን ንዘይተፈልጠ ኣምላኽ መስዋዕቲ ከነቕርብ ግቡእና'ዩ። እዚ ድማ ካብ ቅሬታኡ ንኽነምልጥ ክሕግዘና'ዩ!" ብምባል ገና ንዘይፈለጥዎ ኣምላኽ መሰውዒ ሰርሕሉ።  ፍላስፋ ዲዮናስዮስ ከኣ ኩነታት ናይቲ ፍጻሜ፡ ዕለቱን ሰዓቱ ምልክቱን ኣብ መዝገቡ ጽሒፍዎ ስለዝጸንሐ ፡ ድሕሪ ነዊሕ ዓመታት ስብከት ቅዱስ ጳውሎስ ምስ ሰመዐ፡ ዕለቱን ሰዓቱን ምልክቱን ናይ ዕለተ ዓርቢ ስቅለት ካብ ቅዱስ ጳውሎስ ሓቲቱ ብምርካብ፡  ምስቲ ናቱ መጽናዕታዊ ጽሕፉ ኣረኣኣዮ። ለካ እምበኣር እቲ ዘይተፈልጠ ኣምላኽ ክርስቶስ ኮይኑ ጸንሖ'ሞ፡ ብክርስቶስ ኣሚኑ ናብ ሓቂ ከምዝመጸ ተውፊት ቤተክርስቲያን ይነግረና። እዚ ፍላስፋ ዝነበረ ሰብ፡ ናብ ክርስትና ምስ መጸ'ውን እንተኾነ፡ ካብቶም ብብዙሕ መንፈሳዊ ተጋድሎ ሓሊፎም ኣዝዩ ዝምስገን መንፈሳዊ ተጋድሎ ዘሕለፉ መራሒ ኮይኑ ከምዝሓለፈ ገድሉ ይነግረና።
(ገድሊ ሃዋርያት ዝብል መጽሓፍ፡ ናይ ዲዮናስዮስ ገድሊ ተመልከት)

√ ቅድሚ ብዛዕባ ልቦናን ቅንዕናን ኣብ ዝብሉ ቃላት ትንተና ምሃበይ ናብዚ ታሪኽዚ ዝወሰደኒ ቀንዲ ምኽንያት፡ ወድ ሰብ ኣብ ውሽጢ ሕልንኡ ተደቢቖም ዘለዉ ነገራት ንምዝርዛር'ዩ። ማለት ሰብ ቅኑዕ ሕልና ጥራይ ኣይኮነን ዘለዎ፡ ወይውን ሰብ ለባም ጥራይ ኣይኮነን፡ ኣእምሮ ወድሰብ ወትሩ እንዳተሰርሐ ዝነብር ረቂቕ ህንጻ ስለዝኾነ፡ ንናይ ኣእምሮ ምልኣታዊ ክውንነት ዝኾኑ ነገራት፡ መህነጺኡን ኮረቱን ቸሜንትኡን ናይ እዞም ዝተጠቕሱ ሓይለ ቃላት'ዮም፡ ልቦናን ቅንዕናን።፡ ወይ ድማ መፍረሲኡን መዕነዊኡን ዝኾኑውን እዞም ዝተጠቕሱ ኣንጻርያውያን ባእታታት ኣብ ኣእምሮ ክቕልቀሉ እንከለዉ ኢዩ። ተጻራሪ ናይ ቅንዕና፡ ምዝንባል'ዩ፡ ኣንጻር ናይ ልቦና ድማ፡ ዕሽነት ወይ ጥበብ ኣልቦ'ዩ። ኣእምሮ ንክህነጽ ልቦናን ቅንዕናን፡ ንኽፈርስ ድማ ዕሽነትን ዝንቡዕነትን የድሊ።ንምኻኑስከ በዛ ልቦና እትብል ቃል ንጀምር።

ልቦና እንታይ ማለት'ዩ፧

√ ልቦና ማለት፡ርእሱ ዝኸኣሉ መምሃራንን ሰብ ሞያን ዘለዎ እካ እንተኾነ፡  ሕጽር ዝበለ ብናይ እምነት መጽሓፍቲ ክትንተን እንከሎ ግን፡ "ስነ" ማለት ሰነየ፡ ሰናይ ዝብሉ ናይ ግእዝ መበቆል ኣለዎ። ልቦና ማለት ድማ ጥበብ፡ ብልሒ. .. ኢልካ ይዝርዘ። ስነ-ልቦና ማለት ሰናይ ጥበብ፡ ሰናይ ብልሒ ማለት'ዩ። ልቦና ኣብ ውሽጢ ባህርይ ደቂ ሰባት እትርከብ፡ እግዚኣብሔር ዝቕመጣ ረቃቕ ኮረቻኡ ኢያ። መቸስ ኣብ ኮረቻ ዝተቐመጠ ሰልፈኛ፡ ናብዝን ናብትን ንክመርሕ ኮረቻ፡ ንዑኡ ምቹእ ስፍራ ከምዝኾኖ ርዱእ'ዩ፡፡ ኣብ ልቦና ዝተቐመጠ ፈጣሪ ድማ፡ ንምሉእ ሰብነትና ናብቲ ንሱ ዝደልዮ ኣንፈት ከማእዝኖ ኣይእግሞን ኢዩ። ዝተዛብዐ ስነ ልቦና ዝህልወና፡ እግዚኣብሔር ምኸኣል ስለዝሰኣነ ኣይኮነን፡ እንታይ ደኣ ኣብ ልቦናና ተወጢሑ ንክመርሓና ፍቓደኛታት ሰለዘይንኸውን'ዩ። መጽሓፍ ቅዱስ " ኣነ ጥበብ፡ ልቦና ኣለኒ፡ ፍልጠት ምስትውዓል ኣለኒ!!" (መክ8፥12) ይብል። መሰረታዊ ጽንሰ ሓሳቡ ብባሕሪኡ ለባም፡ ኣስተውዓሊ፡ ዘይጋገ ጥበበኛ እግዚኣብሔር ጥራይ ምኻኑ ንምንጻር'ዩ። ካብዛ ባህርይ እዚኣ ድማ እግዚኣብሔር፡ ናቱ መሕደሪ ንኽትኮኖ ንልቦና ኣብ ደቂ ሰባት ኣቐመጣ። ወድ ሰብ ብኢድ ፈጣሪ ክስራሕ እንከሎ'ምበኣር፡ ሓንቲ ካብተን ሰለስተ ባሕርያተ ነፍሱ፡" ለባውነት!" ከምዝህልዎ ኮይኑ'ዩ ተፈጢሩ። ለባውነት ድማ ምፍላጥ፡ ምጥባብ፡ ምምርማር፡ ምስትውዓል ዝብሉ ዓንቀጻት ኣለዉዎ። ብኻልእ ኣዘራርባ፡ ልቦና ብብርዕን ብቐለምን ዘይኮነስ፡ ብመንገዲ'ተን ረቀቕቲ ኣእዳው እግዚኣብሔር ኣቢላ ኣብ ልቢ ደቂ ሰባት ዝተጻሕፈት እምንቲ ሕገ ፈጣሪ'ያ። ስለዚ ድማ'ዩ ፈጣሪ፡ ካብ ዘመነ ኣዳም ክሳብ ዘመነ ሙሴ ዝነበሩ ህዝቡ፡ ብጽሑፍ ዘይኮነስ ብሕገ-ልቦና ዝመርሖም ዝነበረ።

√ ኣብዚ እዋን'ዚ ናይ ስነ ልቦና ሰብ ሞያ ዓለምና  ንልቦና፡ "ኣብ ደቂ ሰብ እትርከብ ነፍሲ ኮይና፡ እንሲሳታት ግን ገና ክውንንዋ ዘይከኣሉ ዓባይ ሃብቲ ደቂ ሰባት ኢያ!" ኢሎም ይትንትንዋ። እዚ ማለቶም እንሲሳታት እስትንፋስ ሃሊዎም ይንቀሳቐሱ እካ እንተኾኑ፡ ካባና ዘፍልዮም ግን ከማና ዝሓስብን ዘመዛዝንን ዝረትዕን ስነ-ልቦና ስለዘየብሎም'ዩ። ሰብ ግን ካብ ፈጣሪ ብዝተዋህቦ ዓቕሚ፡ ዝንቀሳቐስ ጥራይ ዘይኮነስ፡ እንተላይ ከንቀሳቕስ ዝኽእል ሓይሊ'ዩ። ንኣብነት ሓንቲ 24 ዓመት ብዛዕባ ቃንቃ ሰባት ዝተማህረት ህበይ ኣላ ንበል። ንሳ ምላልባሽ ነቲ ዝተማህረቶ ድገምለይ ንምባል "ከምዚ በሊ!" እንዳልካ ደድሕሬኻ ዘዝበልካዮ ክትደግመልካ ትኽእል ትኸውን። ንዝተማህረቶ ነገር ንኻልእ ክትምህር ግን ኣይከኣላን'ዩ። ብዕራይ ሆ ምስበልካዮ ብናውቲ ማሕረስ ተጸሚዱ ክንቀሳቐስ ይእክል'ዩ፡ ተጣቢቡ ግን ባዕሉ ክሓርስ፡ ባዕሉ ናውቲ ማሕረስ ከዳሉ ኣይከኣሎን'ዩ። ሓንቲ ድሙ ካብቲ ነንጭዋ ንምሓዝ እትጥቀመሉ ሃልካዊ ጥበባታ ወጻኢ፡ ካልእ ተበላሒታ መጻወድያ ክትምህዝ፡ ኣይከኣላን'ዩ። ስነ ልቦና ናይ ሰብ ግን እንተደልዩ እካ ንኽልቲአን'ዘን እንሲሳታት፡ ንንጭዋን ድሙን ተሰማሚዐን ዝዓብያሉ መንገዲ ከጣጥሕ ይኽእል'ዩ። ሰብ ብተፈጥሮ ካብ ፈጣሪ ዝተዋህቦ ልቦና ኣለዎ። በዚ ተመሪሑ ንዝኸይድ ሰብ ድማ ለባም ኢልና ንጽውዖ፡ ንፈጣሪኡ ዝመስል ንምባል'ዩ።  ማለት  ሰብ "ርህሩህ፡ ፈቃር፡" ምኻኑ ዝዝክር፡ ኣብዛ ዓለም ሓዱሽን ጛሻን ተቐማጢ ምኻኑ ዝኣምን፡ ናይ ምርዳእን ምርድዳእን ልምዲ ዘለዎ፡ ሓሳብ ሰባት ዘኽብር፡ ንሓሳባቱ ካብ ስምዒት ወጽዩ ክገልጽ ዝፍትን፡ ዓቕሙ ዝፈቐዶ ጽቡቕ ክገብር ዝደሊ...!" እዚ ኩሉ ኣብ ስነ-ልቦና ዘለዎ ሰብ ክህልዉ እትጽበዮም ጠባያት ኢዮም። በንጻሩ ግን ነዚታት ዝጻብኡ ጠባያት ኣብ ባሕሪ ወዲ ሰብ የለዉን ማለት ኣይኮነን፡ ክጅመር እንከሎ ግን ሰብ ጅማሬኡ ለባም ንጹሕ ኮይኑ ኢዩ ናብዛ ዓለም ዝቕልቀል። ኣብዚ ኣርትዖት ንምርካብ ንጽሕናዊ ልቢ ናይ ሕጻናት ክንምልከት ንኽእል ኢና። ሕጻን ክበላሓት ክመሃር፡ ክኽእል ክዓቢ ስለዝደሊ ብዝከኣሎ ዓቕሚ እንዳተማህረ ክነብር ይደሊ እምበር፡ ቁንጣሮ ስለዝኸኣለ ጥራይ፡ "መምህር ኢየ" ኢሉ ንህላዌኡ ካብ ተማሃራየነት ናጻ ከውጽኣ ኣይደልን። ብመሰረተ መለክዒታት ትምህርቱ ከኣ፡ ቀስ ብቐስ ኣብዛ ዓለም ብዝረኽቦም ተመክሮን ትምህርትን፡ ደረጃ ስነ ልቦናኡ ክዓቢ ወይ ንድሕሪት ክጉሰስስ ይኽእል።

ቅንዕና!

√ ቅንዕና፡ መበገሲ ጽንሰ ሓሳቡ ምስ ትኽ ዝበለ ሕንጻጽ ክነጻጸር ይኽእል'ዩ። ማሕረሻታት እታ ሓንቲ ትኽ ዝበለት ቅንዕቲ፡ እታ ሓንቲ ግን ዕጽፍ ዝበለት ዘባዕ፡ ቅኑዕቲ ብርዒ፡ ለዋይ ብርዒ፡ ትኽ ዝበለት በትርን ዓጻፍን... ኢልና ኣብነታት ክጥቀስ ይከኣል'ዩ። ሜትሮ ትኽ ዝበለት እንተኾይና ልክዓዊ ርሕቀት ትነግር፡ ዓጻፍ እንተኾይና ግን ሓቀኛ ፍንታተ ናይ ነገራት ክርከብ ኣይከኣልን'ዩ። ሃይማኖታውያን ቃላት ብዛዕባ ቅኑዕነት ንምንጋር በየን ይጅምሩ እንተኢልና፧ ብኣግዚኣብሔር'ዩ እቲ መልሲ፡፡ "እግዚኣብሔር ነቶም ብሚዛን ዝሰርቁ ይጸልኦም፡ ነቶም ብቕንዕና ዝመዝኑ ግና ይሕጎሶሎም።" (ምሳ11፥1) ዝብል ጽሑፍ ኣሎ። ሚዛን ከምእንፈልጣ ዝድነቕ ባህሪ ኣለዋ፡፡ ሓንቲ ኪሎ ጨው ምስ ሓንቲ ኪሎ ጫው ማዕረ፡ ትኽ ዝበለ ሕንጻጽ ገይራ ኢያ እተርእየና። ዓሰርተ ኪሎ ሓጺን ምስ ዓሰርተ ኪሉ ጡጥ'ውን ስፍሓት መትሓዚኦም ደኣ ይፈላለ እምበር፡ ኣብ ማዕረ ትኽ ዝብለ ሕንጻጽ ገይራ ኢያ ትሰርዖም ሚዛን። ቅንዕና እግዚኣብሔር ምስ ሚዛን እንተድኣ ኣተኣሳሲርናዮ ከኣ፡ ፈጣሪና ኩሉ ግዜ ዘይጋገን ዘይዘናበልን ርቱዕን ሓቀኛን ምኻኑ'ኢና ንፈልጥ። እዚ ማለት መሰረታዊ ትርጉም ናይ ቅንዕና ንምትንታን፡ ቅንዕና፡ እግዚኣብሔር ዝመዝነላ ዝምትረላን ረቃቕ መለክዒኡ ኢያ ማለት'ዩ።

√ ባሕርይ እግዚኣብሔር ንባዕሉ ክንመሃሮ እንከለና፡ "ፈጣሪ ማለት ዘይጋገ፡ ቅኑዕ፡ ሓቀኛ፡ ዘይሕሱ፡ፍርዱ ዘየዝብል፡ ንሓጥኣን ከም ሓጢኣቶም፡ ንጻድቃን ከም ጽድቆም ዝፈርደሉ ሚዛን ኣዳልዩ ንፍርዲ ዝጽበ ዘሎ ኣምላኽ'ዩ!" ኢልና ኢና እንመሃር። እዚ ቅንዕናኡ'ዚ ደቂ ሰባት ከይተረፈ ክለብስዎን ከንጸባርቕዎን ስለዝደሊ፡ ንሰብ ለባም ኮይኑ ጥራይ ዘይኮነስ፡ እንተላይ ቅኑዕ ኮይኑ ክነብረሉ ይደልዮ። ምኽንያቱ ለባምን ገርህን፡ ለባምን ተሃማልን፡ ዓሻን ቅኑዕን ሰብ፡ ኣብ ናይ መምዘኒ ዓይኒ-እግዚኣብሔር ቦታ የብሉን። ናይ ፈጣሪና ባህሪኡ፡ ለባምን ገርህን ዘይኮነስ፡ ለባምን ኣስተውዓልን'ዩ። ሓቀኛን መዓልታዊ ዝጋገን ዘይኮነ ከኣ፡ ፈጺሙ ዓሽዩ ወይ ተጋግዩ ዘይፈልጥ ፈጣሪ'ዩ። ንሱ ኣስተውዓሊ'ዩ፡ ከስተውዕል እንተከሎ ግን ከይጋገ ስለዝሰግእ'ውን ኣይኮነን፡፡ እንታይ ደኣ፡ ብባህሪኡ ጥበበኛን ፍጹም ኣስተውዓልነት ዘለዎን ብምኻኑ'ምበር። ኣስተውዓልነት ንዓና ንደቂ ሰባት እንታይ'ዩ ፧ እንተ ኢልና፡ ኣስተውዓልነት ንቅንዕናኻ ዘጠንክር መለክዒ'ዩ። እግዚኣብሔር ለባምን ተሃማልን ዘይኮነ፡ ለባምን ዘይጋገን ዘይዕሾን'ዩ። እዚ ባሕርይ'ዚ ኣባና ክረአ እንከሎ በንጻሩ ስለዝኾነ፡ ንሰብ ምግጋይ ንኸየጋጥሞ፡ ካብ ምዝባዕ ወይ ካብ ምዝንባል ናይ ሕልና ክሕሉ ዝኽእል ረቂቕ ድርዒ ናይ ሕልና፡ ቅንዕና የድልዮ። ቅንዕና ዋላ ነቲ ዘለና ናይ ምግጋይ ባህርይ ክእርም ዝኽል ሓይሊ'ዩ። ንኣብነት ማዕጺት ለዋይ'ያ፡ ክትዕዘባ እንከለኻውን ትኽ ትብል ኣይትመስልን። ሓጛዳይ ግን ድሕሪ ብዙሕ ጻዕሪ ንማዕጺድ ትኽ ዝበለት ገይሩ ከዕርያ ከምዝኽእል ይኣምን'ዩ። ሰብ ድማ ካብዛ ዓለም ብዝረኽቦም ነገራት ዝተዛብዐ ልቦና ክውንን ይኽእል'ዩ፡ ቅንዕና እንተልይዎ ግን ከም ማዕጺድ ክምለስ ኣየጸግምን'ዩ። ካብቶም ልቢ ንኸይቀንዕ ዝጻብኡ ነገራት ሓደ፡ ትረት ልቢ'ዩ። ከምቲ ዝተባህለ፡ ንማዕጺት ብደረቓ እንከላ ትኽ ክተብላ ስለዘይከኣል እትልምልመሉ መገዲ ኢኻ እተጣጥሕ። ልቦና ክቐንዕ እንተኾይኑ ድማ፡ እቲ ሰብ ልምላሜን ልውህናን ናይ ልቦናን ክህልዎ ኣገዳሲ'ዩ። ለባም ሰብ ሰንኪ ሰብ ምኻኑ ጥራይ፡ ዋላ ሎሚ ኣይጋገ፡ ጽባሕ ግን ክጋገ ከምዝኽእል ስዝፈልጥ፡ ክስተታት ናይ ስንፍናታቱ ክቕበል ቅሩብነት ዘለዋ ልቢ ሒዙ'ዩ ዝጎዓዝ።

ፍቕሪ መደምደምታ ኩሉ!

√ እምበኣር ሰብ ዘይጋገ ኣይኮነን ይጋገ'ዩ፡ ዘይዕሾ ድማ ኣይኮነን ብዝተፋላለየ ነገራት ቅንዕንኡን ልቦናኡን ዝመዛበለሉ እዋናን ኣሎ። ጠንቂ ናይዚ ከኣ ፈጣሪ ኣይኮነን። ማለት ፈጣሪ ንሰብ ዘይጋገ ገይሩ ብዘይምፍጣሩ ንፈጣሪ እንወቕሰሉ መገዲ ፈጺምካ የለን፡፡ ምክንያቱ ሰብ ፍጡርን ስሩሕን ስለዝኾነ ጥራይ ዘይኮነስ፡ ንኽፍጠር እዉን  ዝገበሮ ኣስተዋጽኦ ዋላ ሓንቲ ቅንጣብ ስለዘየለ'ዩ። ኣብ ቦታ ሰራሒኡ፡  ኣብ ዙፋን ፈጣሪ ክቕመጥ ዝምጥን ዓቕሚ'ውን ፈጺምካ ኣይርከቦን'ዩ ንሰብ። ስለዚ ፈጣሪ ንሰብ ክሰርሖ እንከሎ፡ ከምዝጋገን ካብ ቅንዕንኡ ከምዝዘናበልን ይፈልጦ'ዩ። ነዚ ምዝንባል'ዚ ዘዕርየሉ መገዲ ግን ኣይከፈተሉን ማለት ኣይኮነን። ሓደ ካብቲ ኣዝዩ ዝድነቕ ባሕሪ ፈጣሪ፡ ጌግኡን ድኻማቱን ኣሚኑ ንዝመጾ ሰብ ከይነዓቐ ክቕበል ዝኽእል ምኻኑ'ዩ። መፍትሒ ምዝንባል ናይ ቅንዕናን ልቦናን እምበኣር ፈጣሪ ብሕድገታዊ ልቢ ይቕበለና ምኻኑ'ዩ።

√ ቅንዕና፡ ርቱዕነት፡ ሓቅነት፡ ፍትሓውነት... ዝብሉ ዝርዝራውያን ነገራት ኣብ ፍቕሪ ይጥርነፉ። ልቦና ድማ ከምቲ ኣቐዲሙ ዝተገልጸ፡ ርህሩሀ፡ ሰብ ምኻንካ ምዝካር፡ ኣብዛ ዓለም ሓዱሽን ጛሻን ተቐማጢ ምኻንካ ምእማን፡ ናይ ምርዳእን ምርድዳእን ልምዲ ምጥራይ፡ ሓሳብ ሰባት ምኽባር፡ ንሓሳባትካ ካብ ስምዒት ወጺኻ ክትገልጽ ምፍታን፡ ዓቕምኻ ዝፈቐዶ ምግባር... ኢልና ክንዝርዝር ንጸንሕሞ እዚ ኩሉ ኣብ ፍቕሪ ተጠርኒፉ ይጸንሓና። በንጻሩ እንተኾይኑ ድማ፡ ኩሎም ኣሉታውያን ነገራት ናይ ስነ ልቦና ምስ ምዝንባል ኣተሓሳስባታት እንተድኣ ተደሚሮም፡ ኣብ ዓንቀጸ ጽልኢ ይራኸቡ። ቅንዕናን ፍቕርን እምበኣር ዝራኸብሉ ዓንቀጽን ጥቕስን፡ ኣብ ፍቕሪ'ዩ። ብተወሳኺ ፍቕሪ ድልድል ናይ ስነ ልቦናን ስነ ቅንዕናን'ዩ።ጽልኢ ድማ ኣንድምታዊ ነጥቢ ናይ ዕሽነትን መንቀኝነትን'ዩ። ንኹላቶም'ዞም ዝበልናዮም  ዘማእዝኖም ግን ኣእምሮ'ዩ። ኣእምሮ ከኣ ኣብ ሕምብርቲ ሕልና ዝርከብ ረቂቕ ሰልፈኛ ኮይኑ፡ ሕልና ዘዝበሎ ክእዘዝ ዝነብር ናይ ሰብነትና ኮፓስ'ዩ። ስለዚ ብምንጪ ጌጋታትናን ትረት ልብናን ዝውቀስ ኣእምሮ እካ እንተኾነ፡ ሕልና ንኣእምሮ ከማእዝኖ ብዘይምኽኣሉ ግን፡ እግዚኣብሔር ቀዳመይቲ ዳናይት ፍርዱ ናብ ሕልና ኢዩ ዝውርውራ!!

ዘመኑ ብልቦናን ብቅንዕናን ክስገር ዝግበኦ'ዩሞ፡ እግዚኣብሔር ሓይለ ጥበቡ ይልኣኸልና!!
ስብሐት ለእግዚኣብሔር!!
ሕቱም-መጽሓፍ፡

በእንተ ዉሉዳት!... "ብሩኽ ውላድ ካብ ኣምላኽ ድዩ ወይሲ ካብ ሰብ?"

ዉሉድን ወላድን!

በስመ ስላሴ!

√ ትርጉሙ ዉሉድ፡ "ተወልደ፡ ይትወለድ፡ ተወላዲ" ካብ ዝብሉ ግእዛውያን ግሲ መበቆል ዝገበረ ኮይኑ፡ ብዛዕባ ውሉድ ዝምልከቱ መግለጺታት ጠርኒፉ ዝርከብ ዓቢ ሓይለ ቃል'ዩ። ወላዲ ማለት ድማ፡ "ወለደ፡ ይወልድ" ዝብል ሱር ግሲ ዘለዎ ኮይኑ፡ ንኹሉ ዓይነት ወላዲ ዘርዚሩን ጾሚቑን ዝገልጽ ዓቢ ቃል'ዩ።

ዓይነታት ዉሉዳት፦

√ ኣምላኻዊ ናይ ባሕርይ ውሉድ፡
እዚ ንፈጣሪ ጥራይ ዝውክል ዓይነት ናይ ወላድነትን ተወላድነትን ኮይኑ፡ ክልተ ገጻት ዘለዎ'ዩ።
 ንሳቶም ድማ ቅድመ ፍጥረት ዓለም ብዘይ ኣደ፡ ድሕሪ ፍጥረት ዓለም ብዘይእቦ ኢዮም!

+ ቅድመ ፍጥረት ዓለም ብዘይ ኣደ ማለት፡ እግዚኣብሔር ወልድ ካብቲ ብባኅሪ ዝተኻኸሎ፡ ብስልጣን ይኹን ብፈጣርነት ዘይንእሶ ናይ ባሕርይ ኣቡኡ፡ ቅድሚ ምፍጣር ዓለም ክሳብ ዘልኣለም ዝውለደሉ ኣምላኻዊ መስርሕ'ዩ። ማለት ኣቦ ክሳብ ዝሃለወ፡ ወልድ ክህሉ ግድን ስለዝኾነን ኣቦ ብዘይ ወልድ "ኣቦ" ከስምዮ ስለዘይክእልን'ዩ። እዚ ክኸውን እንከሎ ግን ከም ናይ ስርዓተ-ተፈጥሮ፡ ብጾታዊ ምውልላድ ዘይኮነስ፡ ጾታ ኣልቦ ዝኾነ ረቂቕ ናይ ኣምላኽ ዕዮ ኢዩ።

+ ድሕሪ ምፍጣር ዓለም ብዘይ ኣደ ማለት ድማ፡ እግዚኣብሔር ወልድ ካብ ቅድስት ድንግል ማርያም፡ ካብ ስጋኣ ስጋ፡ ካብ ነፍሳ ነፍሲ ወሲዱ ብፍቓዱን ፍቓድ ኣቡኡን ስምረት መንፈስ ቅዱስን ብመልክዕ ልደት፡ ብሕቱም ድንግልና ተጸኒሱ ብሕቱም ድንግልና ዝተወልደሉ፡ ንኣምላኽነቱን ሰብኣውነቱን ብተዋህዶ ተሪኹ ከረድእ ዝኽእል ኣዝዩ ዓብን ረቂቕን መንፈሳዊ መስርሕ'ዩ። እዚ ማለት ካብ ቅድስት ድንግል ማርያም ብዘይ ዘርኢ ተባዕታይ ስለዝተወልደ፡ ኣብዛ ምድሪ ብስጋ ዝወለዶ ኣቦ የብሉን፡ ብስጋ ዝወለደቶ ኣዴኡ ግን ሰብ ጓል ሰብ ኮይና፡ ጓል ሃና ጓል ኢያቄም'ያ ቅድስት ድንግል ማርያም። እዚ ኮይኑ እንከሎ፡ እዛ ቅድስት ኣደ እዚኣ " በል ወደይ፡ ኣነን ኣቡኻን ተሸጊርና ክንደልየካ ቀኒና...፧ ሉቃ2፣48"  እንክትብል ኣብ መጽሓፍ ቅዱስ ነንብብ ኢና። ኮይኑ ግን "ኣቦኻ" ኢላ ጠቒሳቶ ዘላ ጻድቕ ዮሴፍ ኣረጋዊ፡ ንወዳ ብስጋ ኣቡኡ ኮይኑ ዘይኮነስ፡ ከም ሓደ ተኸናኺኑ ዘዐቢ ሰብ፡ ብስጋ ሓብሒቡ ስለዘዕበዮን ዕድመ ዝደፈአ ሽማግለ ምንባሩ ንከተነጽር ኢላ ኢያ። ኣብ ልማድ መጽሓፍ ቅዱስ፡ ብስጋ ዘዐበየካ ሰብ፡ ዋላ ኣይውለድካ "ኣቦይ" ከም እትብሎ፡ ንሓደ ሽማግለ ሰብኣይውን ከማኡ መን ምኻኑ ብዘየገድስ ዕብየቱ ሽምግልንኡን ንኸተነጽር "ኣቦይ" ኢልካ ከምትጽውዖ ንጹር'ዩ።

√ ናይ ጸጋ ዉልድነት፡
እዚ ድማ ንሕና ኣመንቲ እግዚኣብሔር ብመንገዲ'ቲ ፈጣሪ ዘቐመጠልና መንፈሳዊ መለክዒታት፡ ምስ ሓለፍና ዝወሃበና ናይ ጸጋ ውልድነት'ዩ። ባሕርይና ኣምላኽ ዘይክንሱ፥ ብመንገዲ ጥምቀት ኣቢልና ምስ ሰገርና፡ ካብ ኣምላኽ ከምዝተወለድና ደቁ ገይሩ ይሓስበና። ኣብ'ዚ ክንጸር ዘለዎ ነገር እንተሃልዩ ግን፡ ክርስቶስ ኣምላኽና፡
"ኣብ ሰምይ ሓደ ኣቦ ስለዘለኩም፡ ኣብ ምድሪ ንሓደ እካ ኣቦ ኢልኩም ኣይትጸውዑ...!!ማቴ23፣9" ኢሉ ንሓዋርያቱ ከስተምህሮም ነንብብ ኢና። እዚ ዝበለሉ ምኽንያት ግን፡ ነቶም ብስጋ ዝወለዱና ወለዲ ወይ ድማ ኣቡ ነፍስና ወይዉን ሽማግለታት ዓዲ፡ ኣቦ ንከይበሃሉ ክቃወም ኢሉ ኣይኮነን።፡ ስለ ትዕቢትን ምንጩን ከረድኦም ኢሉ ኢዩ። ማለት ኣብቲ እዋን እቲ ፈሪሳውያን፡ ብትዕቢት ተወጢሮም "ብዘይካና ኣቦ ይኹን መምህር የለን!" ብምባል ልዕሊኦም ኣምላኽ ከምዘሎ ክሳብ ዝርስዑ ዝኾንሉ እዋን ስለዝነበረ፡ ክርስቶስ ኣምላኽና፡ "እቲ ንርእሱ ልዕል ልዕል ዘብል ክሓስር ኢዩ፡ ርእሱ ዘትሕት ግና ልዕል ክብል'ዩ።" ብምባል ኣብተን ቀጺለን ዘለዋ ጥቕስታት ናይዛ ምዕራፍ ገሊጹዎ ኣሎ። እዚ ማለት ዋላ እካ ክንዲ ዝኣከለ ዝኣክል ልዕልናን ፍልጠትን ይሃልወና፡ ልዕሌና ፈጣርን ብባህሪኡ ኣምላኽን ከምዘሎ ፈሊጥካ ፥ ትሕት ምባል ከምዘድሊ ከረድእ ኢሉ'ዩ። ኣብ ካልእ ጽሑፋት'ውን፡ "ንስኻትኩምሲ ካብቲ ኣቦኹም ዲያብሎስ ኢኹም፡ ትምኒት እቲ ኣቦኹም ክትገብሩ ኢኹም'ውን ትደልዩ ዘለኹም...!! ዮሓ8፣44" እናበለ ክምህር እንከሎ ነንብብ ኢና። እዚ ድማ ንሰይጣን ምስቲ ኣቐዲሙ፡ "ኣብ ሰማይ ሓደ ኣቦ ኢዩ ዘለኩም " ዝበሎ እግዚኣብሔርነቱ ከመዓራርዮ ደልዩ ዘይኮነስ፡ ንኹሉ ንድርቅናን ክፍኣትን ሓጣውእ ምንጮም ዲያብሎስ፡ ንዑኡ ዝስዕብ ዘበለ ድማ ኩሉ ብግብሪ ካብኡ ዝተወልደ ምኻኑ ንኸረዳ ኢሉ'ዩ። ብኻልእ ኣዘራርባ፡ ብሰናይ ይኹን ብክፉእ ብዘየገድስ፡ ብግብሪ ዝወልዱና ኣካላት ከምዘለዉ የረድእ ኣሎ ማለት'ዩ።

√ ናይ መንፈስ ውልድነት (ካብ ሰባት)፡
እዚ ድማ ሓደ ክርስቲያን ዉሉድ ይሃልዎ ኣይሃልዎ ብዘየገድስ፡ ንሱ ኣብነታዊ ኮይኑ ዘዕበዮ ሰብ ተልይዎ፡ እቲ ተማሃራይ፡ ነቲ መምህር ናይ እምነት  ወዱ ኢዩ። ንኣብነት፡ ቅዱስ ጳውሎስ ዘይተመርዓወን ድንግልን ክንሱ፡ "ጢሞጥዎስ ወደይ፡ ቲቶ ወደይ፡ ወደይ ኣናሲሞስ፡ ኣቱም ደቀይ... 1ጢሞ1፥2 ቲቶ1፣4  ፊል1፥10!"  ዝብሉ ተደጋገምቲ ጽሑፋቱ ነንብብ ኢና። እዚኣቶም ድማ ምሂሩ ኣብነቱ ጔሩ፡ ብመንፈስ ዘዕበዮም ደቁ ስለዝኾኑ'እምበር፡ ከምቲ ዝተባህለ ገዛእ ርእሱ ምስ ፈጣሪ ኣመዓራርዩ 'ምስቲ ኣብ ሰማይ ዘሎ ኣቦኹም ይተኻኸል'የ' ኢሉ  ክነግር ስለዝደለየ ኣይኮነን።

√ ናይ ንስሓ ዉሉድ (ኣብ ትሕቲ ኣቡ ነፍሲ ዝምዕቆብ ክርስቲያን)፡
እዚ ውልድነት'ዚ፡ ሓደ ክርስቲያን ኣቡ-ነፍሲ፥ ማለት ናይ ንስሓ ኣቦ ምስ ሓዘ፡ እቲ ካህን ነዛ ንንስሓን መንፈሳዊ ነገራትን ጓሳ ዘድልያ ነፍሲ፡ ከም ኣቦ፡ እታ ክርስቲያናዊት ነፍሲ ድማ ከም ዉሉድ ኮይኖም ዝነብርዎ መንፈሳዊ  ኪደት'ዩ። ቅዱስ ጳውሎስ፡ ኣብ መልእኽቱ ኤፌ4፣11 "ናይ ነፍሳት ጓሶት" ብምባል ነቶም ካህናት ኣቦታትን ነቶም ናይ ንስሓ ደቆምን ብሓንቲ ቃል ጠርኒፉ "ናይ ነፍሳት ጓሶት" ኢሉ ጽሒፍልና ኣሎ። መዝ 23፥1 ድማ "እግዚአብሔር ጓሳየይ'ዩ" ይብል። ናይ ነብሳት ጓሶት ዝተባህሉ ግን ኣብ ትሕቲ እግዚአብሔር ብጸጋ ንክርስቲኣናት ክጓስዩ ዝተረቚሑ'ምበር፡  ብባሕርይ ምስ ፈጣሪ ዝተኻኸሉ ኴኖም ኣይኮኑን።

√  ኣባ-ልገ፡
እዚ ዉሉድነት'ዚ፡ ሓደ ክርስቲያን ብመንገዲ ጥምቀት ኣቢሉ ካብ ፈጣሪኡ ብጸጋ ምስተወልደ፡ ብኡ-ንቡኡ ካብቶም መእመናን ሓደ ብፍሉይ ተመሪጹ፡ እቲ ሕጻን ክሳብ ክንዲ ሰብ ዝኣክል፡ ብሓደራ ከም ስምኦን ኣረጋዊ ኣባ ልገ ኮይኑ ንክከናኸኖን፡ ትምህርተ ሃይማኖት ክምህሮን ኣብነት ክኾኖን ብሓደራ ዝቕበሎ ሰብ'ዩ። ስለዚ እቲ ተሓዚ ኣባ ልገ ከም ኣቦ፡ እቲ ህጻን ድማ ከም ውሉዱ ኮይኖም ይነብሩ ማለት'ዩ።

√ ናይ ስጋ ወላድነት፣
እዚ ወላድነት ወይ ዉልድነት'ዚ፡ ሓደ ሰብ ብባህሪኡ ምስ ዝመሳሰሎ ኣንጻር ጾታ ዝኾነ ሰብ፡ ብሕገ-ሩኳቤ ብመንገዲ ተፈጥሮኣዊ ወሲብ ኣቢሉ ዉላድ እንተድኣ ወሊዱ፡ "ወደይ" ይብሎ፡ እቲ ሕጻን ድማ ከም ወላዲኡ ይሓስቦ። ኣብ'ዚ ፍልይ ዘብሎ ነገር እንተሃልዩ፡ ክልቲኣቶም ብተፈጥሮ ማዕረ ዝኾነ ባሕርይ ዘለዎም ኮይኑ፡ እቲ ወሲባዊ ናይ ኣቦን ዉሉድን መስርሕ እናተሰጋገረ ዝኸይድ ሰንሰለታዊ መስርሕ'ዩ። ስለዚ እቲ ሕጻን'ውን ጽባሕ ንግሆ፡ከምኡ ዝኾኑ ዉሉድ ካብ ዘርኡ ከፍሪ ምዃኑ ርዱእ'ዩ። ንኣብነት፡ ኣቦና ኣዳም ካብ ኣዴና ሔዋን ብቅዱስ መውስቦ ንኣቤልን ቃየልን ክወልዱ እንከለዉ፡ ኣቦና ኣብርሃም'ውን ንዕስማዔል ብዘይ ሕጋዊ ካብ ኣጋር፡ ንይስሓቕ ድማ ብሕጋዊ መውስቦ ካብ ቅድስት ሳራ ከምዝወለደ ንፈልጥ ኢና።

√ ኣቦነት ናይ ዕድመ ምድፋእን ሽምግልናን፡
እዚ ኣቦነት ወይ ዉልድነት'ዚ፡ ሓደ ሰብ እምነቱን ስነ-ምግባሩን ከመይ'ዩ ብዘየገድስ፡ ኣብዛ ዓለም ናይ ስጋ ዕድመ ጸጊቡ ኣብ ናይ ሽምግልና ግዜ ምስ በጽሐ፡ ንዝኾነ ዓይነት ህጻን ወይ መንእሰይ ከም ኣቡኡ፡ እቲ ንእሽቶ ድማ ከም ወዱ ኮይኖም ዝነብርዎ ማሕበራዊ ናብራ'ዩ። ስለዚ እቲ መንእሰይ፡ ንዝኾነ ሽማግለ ሰብ፡ ብስሙ ዘንጢሉ ኣይጽውዖን፡ እንታይ ደኣ "ኣቦ፡ ኣቦይ ዓቢ፡ ኣቦይ እከለ!" እናለ ይጽውዖ፡ እቲ ሽማግለ ድማ "ዝወደይ!" ዝብል ቅጽል ስም ይጥቀም። ስለዚ እምነቶምን ዓይነት ሰብኣውነቶምን ብዘየገድስ፡ ክልቲኣቶም ከም ኣቦን ወድን ኮይኖም ማሕበራዊ ክብርታቶም ክወሃሃቡ ይረኣዩ። ኣብነት ዝኾነና፡ ቅዱስ ጳውሎስ፡ ነቶም ክኸስዎን ንሞት ኣሕሊፎም ክህቦን ተሃንዲዶም ዝነበሩ ዕድመ ዝደፍኡ ሽማግለታት ናይ ኢዮርሳሌም፡ ኣብቲ መደያዪቦ ኮይኑ ክዛረብ እንከሎ፡ "ኣቱም ኣቦታተይን ኣሕዋተይን!" (ግብ22፥1) ኢሉ ዘረባ ከም ዝጀመረ ነንብብ ኢና። እዚ ድማ ኩሎም ብስጋ ስለዝወለድዎ ወይ ናይ እምነት ወለዱ ኮይኖም ወይ ድማ ኣባልገታቱ ኮይኖም  ዘይኮነስ፡ ሽማግለታትን ብዕድመ ዓበይትን ብምንባሮም ጥራይ'ዩ። ስለዚ ንሳቶም ከም ወለዱ፡ ንሱ ድማ ብስጋዊ ዕድመ ከም ዉሉዶም ይኸውን ኣሎ ማለት'ዩ።

ምንጪ ምስሊ ናይ ሓደ ጥዑይን ብሩኽን ሕጻን ካበይ'ዩ?

√ እጃም እግዚኣብሔር፡-
ነዚ ህጻን'ዚ ኣብ ማሕጸን ተመስሪሑ፡ ብሰላም ናብዛ ዓለም ክውለድ ዝገበረ እግዚኣብሔር'ዩ። ስለዚ ቀንዲ ዋንኡ ናይዚ ህጻን እግዚኣብሔር'ዩ፡ ነገር ግን ኣብዛ ዓለም ከም ፍቓዱ ሰራሕተኛታት ኮይኖም ነዚ ሕጻን ከዕብይሉ ዝኽእሉ ሰባት ድማ ይደሊ እግዚኣብሔር። ስለዚ ድማ ነዚ ሕጻን ባዕሉ ሰሪሕዎ ከብቅዕ፡ ንሰባት ኣቡኡን ኣዴኡን ኮይኖም ከዕብይሉ ብሓደራ ይህቦም።
 "ኣዕይንትኻ ድቂ ኸለኹ ረኣያኒ...መዝ139፣16)" ዝብል ጽሑፍ እኹል ኣብነት'ዩ።

√ እጃም ወለዲ፡
እዚ ሕጻን'ዚ ናብዛ ዓለም ምስ መጸ፡ ብቐረባ ዝፈልጦምን ጥዑይ መንገዲ ክመርሕዎ ዝኽእሉን እቶም ናይ ስጋ ወለዱ ኢዮም። ብፍላይ ድማ ኣዴኡ ኣብ ነጥበ መቐይሮ  ሕይወት ናይዚ ሕጻን ልዑል ሱታፌ ኣለዋ። ስለዚ እዚ ሕጻን ጥዑይን ናይ ኣምላኽ ሰብን ኮይኑ ክዓቢ እንተኾይኑ፡ ብመጀመርያ ወለዱ ጥዑያትን ናይ ኣምላኽ ሰባትን ንምኻን ቀዳምነት ይሓትት። እምበርከስ ድምር ሕይወት ናይ'ቲ ሕጻን ትርጉም ዝህልዎ፡ ኣብ'ቶም ብቐረባ ዝረኽቦም  ወለዱ ስለዝምብርኮስ'ዩ። ብፍላይ ሕጻን ናብዛ ዓለም ናጻን ፍልጠት ኣልቦን ኮይኑ ስለዝመጽእ፡ እቶም ኣብ ምሉእ ሕይወቱ ብግብሪ ዝንጸባረቑ ገጻቱ፡ ኩላቶም ኣብቶ'ም በብዕለቱ ዘንብቦም ነገራት ዝተመርኮሱ ስለዝኾኑ፡ ወለዲ ንመንፈሳውን ስጋውን ሕይወቶም ብብዙሕ ጥንቃቐታት ዝተቓመመ ክኸውን የድሊ። እዚ ማለት ቤቶም መሰረታዊት ቤት ትምህርቲ ናይ'ቲ ሕጻን'ያ። ስለዚ ዕለታዊ ጸሎት፡ ስግዳን፡ መዝሙር፡ ንስሓ፡ ምርድዳእ፡ ምብልላሕ፡ ስነልቦናዊ ልዝብ፡ ኣብ እዋናውያን ነገራት ምርኩስ ዝገበሩ ስነ-ሞጎታት (Daily Logics)፡ ኣካላውን ሞራላውን ስነ-ኣእምሮኣውን ልምምዳት... ወዘተ ዝኣመሰሉ ነገራት ከም ዕለታዊ ጽሑፋት ኮይኖም ኣብ ሕይወት ወለዲ ክንበቡ ይድሊ ሕጻን።

√ እጃም ኣባ-ልገ
ኣባ ልገ ካብ'ታ ዕለተ ጥምቀት ናይ'ቲ ሕጻን ኣትሒዙ ክሳብ'ቲ ሕጻን እኹል ሰብ ዝኸውን፡ ብሓደራነት ስለዝቕበሎ፡ ብእምነትን መንፈሳዊ ስነ-ምግባርን ተኾስኪሱ ንክዓቢ ብዝከኣሎ ዓቕሚ ክዓዪ ይግበኦ። እዚ ክኸውን እንተኾይኑ ግን እቶም ወለዲ ናይቲ ሕጻን፡ ብቀረባ ክረኽብዎ ዝኽእሉ ኣባልገ ክመርጹ የድሊ፡፡ እቲ ኣባልገ ድማ ብቐረባ ክረኽቦን ዓቕሙ ዝፈቐዱ ክሕግዞን ዘይእል እንተኾይኑ፡ ካብ ንወለዲ ከሖጉስ ክብል፡ መጻኢ ሕይወት ናይ'ቲ ሕጻን ኣብ ሓደጋ ዘአቱ "ኣባልገ ክኸውን ኣይክእልን'የ!" ኢሉ በዓንተቡኡ ክኣቢ ይምረጽ።

√ እጃም ቤተክርስቲያን፡
ንሓደ ካብ ሓንቲ ክርስቲያናዊት ስድራ ዝተወልደ ሕጻን፡ ቤተክርስቲያን'ውን ኣብ'ዚ ናብ'ዛ ዓለም ዝመጸ ሓዱሽ ሕጻን ዘለዋ ሱታፌ፡ ብሚእታዊት ክረአ እንከሎ ኣብ ሰሙን ኣዝየን ሒደት መዓልታት እሞ ድማ ውሑዳት ሰዓታት ኮይነን፡  ማለት ሱታፌኣ 25% ጥራይ ዝሽፍን ብምኻኑ ኣዝዩ ውሑድ እ፡ኳ እንተኾነ፡ ካብ'ቲ ናይ ጥምቀት እትህቦም ኣገልግሎታ ጀሚርካ ክሳብ ፍጻሜ ሕይወቱ ናይቲ ሕጻን ዘይርስዑ ውዕለታ ትገብር'ያ ቤተክርስቲያን። ንዝያዳ ዕቤትን ቅድስናን ናይ'ዚ ሕጻን ዝምልከት ግን፡ ብተወሳኺ ቤተክርስቲያን ዘለዋ መርሓ ግብራት ይውሓዱ ይብዝሑ ብዘየገድስ፡ ንሕጻናት'ውን ከም ኩሉ ክርስቲያን ፍሉይ መደባት ክትሰርዓሎም፡ ንኣታዕባብዮኦም፡ ኣተሓሕዘኦም፡ ምስ ኣምላኾም ዘለዎም ናይ ፈጣርን ፍጡርን ቅርበት ዝያዳ ኣደንፊዓ ክትሰርሓሉ የድሊ። ሕጻናት'ውን ንኹሉ ነገራት ኣገናዚብካ ናይ ምኻድ ዓቕሞም ኣዝዩ ንእሽቶ ስለዝኾነ፡ ኣስተማሲሎም ካብ ኣምላኾም ከይጠፍኡን ተስፋ ከይቆርጹን፡ ከም'ቶም ዓበይቲ ደቂ ቤተክርስቲያን መዝሙርን ዝተፈላለየ መንፈሳዊ ነገራትን ከቕርቡ ከተተባብዕም፡ ፍሉይ ግዜ ክትሰርዓሎም ኣለዋ ቤተክርስቲያን።

√ ናይ ሕብረተሰብ እጃም፡
ሓደ ሕብረተ ሰብ፡ ጽቡቑነትን ዕብየትን ናይ ሓደ ሕጻን ዓቢ ተራ ይጻወት'ዩ። እቲ ሕብረተ-ሰብ፡ ኣዝዩ ነውረኛን ንርኽሰት ዝተቓለዐን እንተኾይኑ፡ ኣብ ውሽጢ'ዚ ሕብረተ-ሰብ'ዚ፡ ዝበቁል ሕጻን ብኡኡ ክጽሎ ዘለዎ ተኽእሎ ኣዝዩ ዓቢ'ዩ።በንጻሩ እቲ ሕብረተ-ሰብ ንኹሉ ሰናይ ነገራት ገስጋሲ ተኣኮይኑ ድማ፡ እቲ ሕጻን ነዚኣቶም እናንበበን እናተመገቦምን ስለዝዓቢ፡ በዞም ጽቡቕ ነገራት'ዚኣቶም ክጽሎ ግድነት'ዩ። ኣብነት ክኾነና፡ ሕብረተ-ሰብ ኤርትራ ብፍላይ ድማ ቅድሚ 90ታት ዝነበረ ሕዝብና እንተርኢናዮ፡ ንሓድሕዱ ዓገብ ዝበሃሃልን ደቂ ጎረባብቱ ከም ደቁ ገይሩ ገኒሑ ዘዕብን ስለዝነበረ፡ ሓደ ሕጻን ኣብ ቅድሚ ዝኾነ ይኹን ሰብ ሕማቕን ኣጸያፍን ነገር ክገብር ኣይክእልን'ዩ። እንተገይሩ ድማ፡ ካብ ከባቢኡ ዓገብታን መግናሕትን ክመጾ ምኻኑ ይፈልጥ ስለዝኾነ ንኹሉ ዝመጾ ቆይቂ ከም ቅቡል ገይሩ ይወስዶ ነይሩ። ስለዚ ይሕመቕ ይጸብቕ ብዘየገድስ፡ ሓደ ሕብረተ-ሰብ ርእሱ ዝኸኣለ፡ ዓቢ መጽሓፍ ናይ ሓደ ሕጻን'ዩ። እዚ ማለት ከኣ ሕብረ-ተሰብ ሓደ ካብቶም ንውድቀቱን ትንሳኤኡን ናይዚ ሕጻን ዋና ጸለውቲ ዝኾኑ ነገራት ብምኻኑ፡ እወታዊ ኣበርክቶ ኣብ ሕጻናት ክገብር ኣድላዪ'ዩ።


ንኣብነት፡- ብዙሓት ኤርትራውያን ኣብ ስደት ንነብር ኣለና፡፡ ንሓድነትናን ጥምረትናን ዝምልከት እካ ኣዝዩ ኣሰካፊ እናኾነ'ዩ ዝኸይድ ዘሎ። እንተኾነ ንሕና "ካብቲ ጽቡቕ'ዩ!" ኢልና ብልብና እንሓስቦ ነገራት ተፈሊና ንነብር ስለዘለና፡ ኣብ ክንዲ ንሓድሕድና ንናኸስን ብዓይኒ ጽልኢ ንጠማመትን፡ ንኹሉ ነገራትና ኣወንዚፍና፡ ከም ቀዳምነት ሕጻናትና ከምቶም ንሕና እንደልዮም ዓይነት ሰባት  ኮይኖም መታን ክዓብዩልና፡ ብሕብረት ስለ እዞም እንወልዶምን እነዕብዮምን ዘለና ሕጻናት ኣመልኪትና ሓባራዊ እጃምና ከነበርክት ኣድላዪ ኢዩ። ከም ሓባራዊ ዘተ፡ ንሕጻናት ዝውክሉ ፍሉያት ኣርእስታት፡ ሽግራት ሕጻናትን ብድሆታቶምን፡ ብዛዕባ ባህሎምን ኣምልኾኦምን. .. ወዘተ ኣመልኪትካ ፍሉይ ግዚያት እንዳመደብካ ሓቢርካ ክስረሓሉ ዝግበኦ ኣዝዩ ኣገዳሲ ነገር'ዩ።

√ መንግስትን ኣካዳምያዊ ትምህርትን፡-
ብዙሕ ግዜ ወለዲ፡ "ደቅና ትሕቲ ሰቦም ከይተርፉ" ብዝብል ሰነፍ ኣተሓሳስባ ንደቆም ካብ መንፈሳዊ ነገራት ከም ዝፍለዩ ብምግባር፡ ብዝያዳ ኣብ ኣካዳምያዊ ነገራት ጥራይ ኣተኩሮ ንክገብሩ ኢዮም ዝረኣዩ ወለዲ። መንግስቲ ንኣካዳምያዊ ትምህርቲ ከም ሓደ ዓቢ ነጥበ-መቐይሮ ናይ ምዕባለ ገይሩ ስለዝሓስቦ፡ ናይ'ቲ ሕጻን ድሕረ-ባይታን መንነትን ከየገደሶ ብምሉእ ዓቕሙ ኢዩ ዝዓየሉ። ማለት እቲ ሕጻን ካብ ወዲ 2-3 ዓመት ናይ መዋእለ ሕጻናት ጀሚሩ ክሳብ ዩኒቨርስቲ ወዲኡ ብሓደ ዓውደ ትምህርቲ ዝምረቕ፡ ብዝከኣሎ ከቢድ ዋጋ እንዳኸፈለ ይዓዪ ማለት'ዩ መንግስቲ። ብፍላይ ኣብ'ዚ ምዕራባዊ ዓለም ንሓደ ሕጻን ተባሂሉ ዝስላዕ ባጄትን ክሳብ ትምህርቱ ዝውድእ ዝግበረሉ ኣካዳምያዊ ቀረባትን ኣዝዩ ልዑል'ዩ። ኣብዚ እምበኣር ንሓደ ክርስቲያናዊ ሕጻን፡ ቤት ትምህርቲ ካብ መንፈሳውያን ነገራቱ ንክሃድም ዓበይቲ ተጽዕኖታት ክትኮኖ ባህርያዊ'ዩ። ምኽንያቱ ገለ ገለ እኳ ንዑኡ ዝመስሉ ኣብቲ ቤት ትምህርቲ ክረክቡ ዝኽእሉ እንተኾነ፡ ዳርጋ 90% መምሃራኑን መማህርቱን ግን ኩሎም መንፈሳውያን ኣይኮኑን፡፡ ስለዚ እዚኣቶም መዓልታዊ ኣብ መንፈሳዊ ሕይወቱ ሕቶታት ክፈጥርሉ ይኽእሉ ኢዮም። በዚ መሰረት ንሕና ክርስቲያን "እዛ ኣካዳምያዊት ቤት ትምህርቲ  መፈሳዊት ነገራት ጥራይ ክግበረላ ኣለዎ፡ ወይ ድማ መንግስቲ መንፈሳዊ ነገራት ከተኣታቱ ነይርዎ!" ኢልና ክንወቅስ ኣየመልክዓልናን'ዩ። ምኽንያቱ እቲ መንግስትን እታ ቤት ትምህርትን ዝሕሾም መሪጾም ኢዮም ዘአንጉዱና ዘለዉ፡ ንሕና ግን ነዚ ዕድላት'ዚ ተጠቒምና ከም ኣደ ሙሴ ኣብ ጽቡቕና ከነውዕሎ ኢዩ ዘድሊ እምበር ብገዛእ ስንፍናና ክንከስሮ ኣይግበኣናን'ዩ። ማለት ኣብ ክንዲ ነቲ ንሕጻናትና ዕለታዊ ዘጋጥሞም ጸገማት ብዓይነ ጥበብ ምምርማር፡ ዕለታዊ መፍቲሕታት ከነናዲ ምጽዓር፡ "ትምህርቲ ከይሓምቁለይ!" ብዝብል ምስምስ፡ እቲ ዘጋጥሞ ተጽዕኖታት ከይኣክል፡ ንባዕልና ኣብ ስጋዊ ነገራት ጥራይ ድፍኢት ንኽገብሩ ንጽዕረሉ ኣጋጣሚታት ኣብ ገለ ወለዲ ትርኢ ኢኻ። ኣደ ሙሴ ከም ኣብነት ተወሲድና፡ ወዳ ኣብ ቤተ ነገስታት፡ ኣብ ቤተ-ፈርዖን ኢዩ ዝዓቢ ነይሩ፡፡ ነገር ግን "ወደይ ትምህርቱ ከይሓምቕ!" ኢላ ከየማሳመሰት፡ ዕለታዊ ብዛዕባ ኣምላኻን ንሳ እትኣምኖ ፈጣርን ትምግቦ ነይራ። ምስ ጎበዘላ ድማ ብስጋውን መንፈሳውን ነገራቱ ኣዝዩ እኹል ሰብ ከም ዝኾነላ ንርኢ።

√ መደምደምታ፥-
+ ኣብዚ ኩሉ ዝበልናዮ ምንጪ ናይ ቅድስና እግዚኣብሔር፡ ምንጪ ናይ ርኽሰት ድማ ዲያብሎስ'ዩ። እግዚኣብሔር ንኹሎም ደቁ፡ መንገዱ ካብ ምርኣይን በብዘለና ዓቕሚ ቅድስንኡ ካብ ምሕባርን ኣቃሪጹ ኣይፈልጥን'ዩ፡ ብሕጂ'ውን ፈጣሪ ክሳብ ዝኾነ ንዓና ካብ ምሕጋዝ ኣይከቃርጽን'ዩ። እረ ኣብ ገለ ገሌኡ እዋናትሲ፡ ባዕሉ ኣገልገልቱን፡ ተለኣኣኽቱ ንክኾንዎ ገና ከይተወልዱ እንከለዉ ዝመርጾም፡ ብትንቢት መልክዕ ድማ ንወለዶም፣ " ቆልዓ ክትወልዱ ኢኹም'ሞ፡ ንዓይ ክኸውን'ዩ!" ኢሉ ዝገልጸሎም ወለዲ ኣለዉ፡፡ ከም እንበዓል ቴክታን በጥሪቃን፡ ሃናን ኢያቄምን ማለት'ዩ። ንገለ ገለ ሕጻናት ድማ ብፍሉይ ምልክት ተወሊዶም ናቱ ኮይኖም ከምዝዓብዩ ዝገብሮም ኣለዉ፡ ከም እንበዓል ቅዱስ ኖህ፡ ቅዱስ ገበብረ መንፈስ ቅዱስ፡ ኣቡነ ተክለሓይማኖት። እዞም ዝተጠቕሱ ቅዱሳን ኣብቲ ዝተወልድሉ ግዜ ሰብነቶም ብብርሃን ኣንጸባሪቑ፡ ንስሉስ ቅዱስ ኣምልኾን ስግደትን ዝሃቡ ምንባሮም ገድሎም ይነግረና ኢዩ።

+ በንጻሩ ድማ ሰይጣን፡ ናቱ ባሮት ንክገብረና ብዘይ ምስልካይ፡ ነቶም ዓይኒ ናይ ሓደ ሕብረተ-ክርስቲያን ዝኾኑ ሕጻናት ክወስዶም ብዝከኣሎ ይጽዕር። ምኽንያቱ ንሕጻናት ኣብ ትሕቲ ናቱ ምርኮ እንተእቲዎም፡ ካብቲ ሕጻን ዝውለዱ ወለዶ ብዝበዝሐ ሚእታዊቶም ብመቑሑ ከምዝቑረኑ ስለዝፈልጥ'ዩ። ካብዚ ንከንምልጥ ግን ንሕና እቶም ኣብ ሕጻናት ሓላፍነትን እጃምን ዘለና ኣካላት ብልዑል መንፈሳዊ ሓይሊ ክንሰርሓሉ የድሊ።

እግዚኣብሔር ሕጻናትና ናይ በረኸት ሕጻናት ገይርና ንከነዕብዮም፡ መንፈሳዊ ጥበብን ምስትውዓልን ይሃበና!!
ምስጋና ንሥሉስ ቅዱስ!!

ሕቱም-መጽሓፍ

ዘመን ፍጡር ኮይኑ ንፍጡራን ጠቐመ!

ዘመን ፍጡር ኮይኑ ንፍጡራን ጠቐመ

√ በስመ ሥላሴ!

√ ዘመን ፍጡር'ዩ፡ ክፍለ-ዘመን'ውን ኢድ እግዚኣብሔር'ያ ሰሪሓቶ፡፡ ዓመታት ኩላቶም ኣብ ዓይኒ እግዚኣብሔር ቁጹራት'ዮም፡ እዚ ድማ ባዕሉ ፈጣሪ ስለዝሰረሖም'ዩ፡፡ ኣዋርሕ፡ ሰሙናት፡ መዓልታት፡ ለይትታት፡ ሰዓታት፡ ደቓይቕ፡ ካልኢታት ኬክሮሳት ኩላቶም፡ ከም ኩላቶም ፍጥረታት ካብ ጥንቲ ኣብ ሕልንኡ ተዓቒሩም ዝነበሩ፡ ድሓር ድማ ኢድ እግዚኣብሔር ዝሰረሐቶም ፍጡራት'ዮም። ፍጡራት ብምኻኖም ከኣ፡ ንዓና ንፍጡራን ከም ንጥቀመሎም ገይሩ ሃበና እግዚኣብሔር።
ኣብ'ዚ ዓንኬለ-ተጠቃምነት'ዚ ክንዮ ሰብ ሓሊፍና፡ እንሲሳታት ከይተረፈ ብግዝያት ተጠቀምቲ ኮይኖም ምህላዎም ከነስተብህል ክኢልና ኣለና። ንኣብነት  እነገሊኣቶም እንሲሳታት ለይቲ ቀትሮም፡ እነገሊኦም ድማ ቀትሪ ለይቶም፡ ገሊኣቶም ብርሃን ጸልማቶም፡ እነገሊኦም ድማ ብዘይብርሃን ተወር ክብሉ ዘይክእሉ ኮይኖም ተፈጥሩ። እዚ ድማ ዘዕርፍሉን ዝምእርሩሉን ግዜ ፈሊጡም ይጥቀሙ ምህላዎም'ዩ ዘረድእ።

√ ደቂ ሰባት ንዘመናት ክድነቑዎምን ከኽብርዎምን እንከለዉ፡ ፍጡራት ምኻኖም ዘንጊዖም ኣይኮኑን። ብፍላይ ገለ-ገሊኣቶም ዕለታትን ዓመታትን፡ ኣብ ልቢ ደቂ ሰባት ፍሉይ ክብርን ጦብላሕታን ሃይልይዎም፡  ኣብ ኣእምሮ ደቂ ሰባት ከኣ ዓቢ ቦታ ረኺቦም ክንርኢ እንከለና፡ ወዲ ሰብ ንዘመናት ልዕሊ ፈጣሪ ገይሩ ስለዝሰረዖም ወይውን ኣብ እግዚኣብሔር ዘለዎ ኣምልኾ ስለዝተዛበዐ ኮይኑ ኣይኮነን። እንታይ ደኣ ንዘመናት ክሓስቦም እንከሎ፡ ንዖኦም ዝሰረሐን ዝሰረዐን ፈጣሪ ኣብ ኣእምርኡ ስለዝቕጀሎ'ዩ። ፍሉያትን ክቡራትን ዕለታት ንሓድሕዶም ዝበላለጽሉ ምኽንያት፡ እግዚኣብሔር ኣበላሊጹ ስለዝፈጠሮም ዘይኮነስ፡ ኣብ በበይኖም ግዜያት በበይኑ ዝኾነ ዓበይቲ መንፈሳዊ ክብርታት ከምዝኽሰቱ ስለዝገበረ'ዩ። ኩላቶም ዕለታት ከም ኩሉ ፍትረት፡ ክብርን ዕብየትን እግዚኣብሔር ዝትርኹ ዓበይቲ ተነበብቲ መጽሓፍቲ እካ እንተኾኑ፡ብፍላይ ገለ ገለ ዕለታት ግን፡ ኣብ ርእሲ'ቲ ከም ኩሎም ዕለታት ዘለዎም ክብሪ፡ ፍሉይን ጉሉሕን ፍጻሜታት እግዚኣብሔር እናዘከሩ ባርኾቱን ጸጋታቱን እንቕበለሎም ኮይኖም ኢና እንረኽቦም። ከም ኣብነት፡- ዘመነ ዮሓንስን፡ ዓውደ-ዓመት ቅዱስ ዮሓንስን፡ ወርሐ መስከረም ዕለት ሓደ ዕለተ ሰንበትን፡ ሓደ ካብቲ  ዓበይቲ ጥቕምታት ናይ ዘመናት፡ ንደቂ ሰባት ዝህብዎ ዓቢ እጃሞም ተዘኪሩ፡ ብኡኡ መጠን ድማ  እዞም ከም ኣብነት ዝተጠቕሱ ዕለታት'ዚኣቶም ዝፍንውዎ ዓቢ መንፈሳዊ ቃጭል  ከምዘሎ ኢና ነስተብህል።

√ ግዜ ነዊሕን ተመጣጥን እካ እንተኾነ፡ ዝውደኣሉን ዝሓለፈሉ እዋን ግን ኣሎ። ከምኡ ተዘይኮውን ነይሩ፡ መዓልቲ ኣይመስን'የ፡ ኢላ ወትሩ መዓልቲ ምኾነት፡ ለይቲ'ውን ኣይወግሕን'የ፡ ኢላ ወትሩ ንጸልማትነት ምመረጸት። ወቕትታት ናይ ዓመት፡ ከረምቲ፡ ቖውዒ፡ ሓጋይ ፅድያ፡ ከከም ግዚኦም ክሓልፉን ክቀዳደሙን ኣይምተበረሆምን ነይሩ። ኩላቶም ግን ሓለፍቲ ምኻኖም ንክትርኹ ዝተቐረቡ እንክመስሉ ዝተመደበሎም ሰዓት መምስ ኣኸለ ይውለዱን ይሓልፉን ኣለዉ። ኣብ ታሪኽ ተፈጥሮ፡ ግዜ ብክልተ መልክዕ ክምዘኑ ይከኣሉ ኢዮም። ቅድሚኡ ግን ቅድሚ ምፍጣር ዓለም ዘሎ ንውሓተ ዘመን ጽማቕ ርድኢት ክህልወና ባህርያዊ'ዩ፡፡ እዚ ማለት፡ ቅድሚ ምፍጣር ዓለም ዝነበረ እዋን፡ "በዚ ዕለት'ዚ በዚ ግዜ'ዚ!" ተባሂሉ ክንገር ኣይከኣልን'ዩ። ማለት ዕለትን ግዜን የብሉን። ምኽንያቱ ግዜ ኣይተፈጥረን ነይሩ። ግዜ ስለዘይነበረ ግን ፈጣሪ ኣይነበረን ማለት ኣይኮነን። ቅዱስ ዮሓንስ ወንጌላዊ፡ ንጅማሬ ፈጣርን ፍጥረትን ከሰማምዕም እንከሎ፡ "ብመጀመርያ ቃል ነበረ" ኢሉ ወንጌሉ ፈለመ። "ቃል መዓስን ኣበየናይ እዋንን'ዩ ነይሩ?" ኢልና ሕቶ እንተልዒልና ግን መልሲ የብሉን። ምኽንያቱ ቃል ፈጣሪ'ዩ፡ ፈጣሪ ድማ ጥንታውነቱ ኣይፍለጥን'ዩ። ስለዚ እታ "መጀመርያ" እንትብል ሓይለ ቃል፡ መጀመርያ ዘየብላ መጀመርያ ማለት ምኻና ግሁድ'ዩ።  በዚ መሰረት ቅድሚ ምፍጣር ዓለም ንዘሎ ዘይቁጸርን ንህልውና ፈጣሪ ጥራይ ዝውክልን መጀመርያ ዘየብሉ ግዜ'ዩ።

√ ቀጺሉ ቅዱስ ዮሓንስ ፡"ብኡኡ ኩሉ ኮነ!" ኢሉ፡ ኩላቶም ፍጥረታት ንግዜ ምስኣቶም ሓዊስካ፡ ዝፈለምሉ ጅማሬ ከምዘለዎምን፡ ፈጣሪኦም ድማ ቃል ምኻኑን ነገረ። ካብ'ዚ እዋን'ዚ ጀሚርና ድማ ደቂ ሰባት፡ ታሪኽን ኣመጻጽኣን ፍጥረታት ክንትንትንን ክንመሃርን ክኢልና። እዚ ዘመን'ዚ ፍጡር ብምኻኑ ዝተገደበ ዕድመ ሒዙ ይርከብ፡ ማለት ቀዳማይ ግድቡነቱ ክሳብ ምጽኣተ እግዚኣብሔር'ዩ። ካልኣይ ግዱብነቱ ድማ ድሕሪ ምጽኣት ዘሎ ግዜ 'ዩ። ክሳብ ምጽኣተ ክርስቶስ ዘሎ ዝመን፡ ነነፍሲ ወከፍ ዕለታት፡ ብዘይካ ኣስማቶም ጥራይ ተመሳሳሊ ክኾኑ ተዘይኮይኑ፡ ነናይ ገዛእ ርእሶም መልክዕን ውቃበን ሒዞም ከምዝህሉ ኢዩ ገይሩ እግዚኣብሔር።

√ እቲ ሓደ ድማ፡ ድሕሪ ምጽኣት እግዚኣብሔር ዘሎ ዝመንዩ። እዚ ድማ ምስ'ቲ ቅድሚ ምፍጣር ዓለም  ዝነበረ ዘመናት ክመሳስል ይኽእል'ዩ። ማለት ምንም እካ ጅማሬ እንተለዎ መወዳእታ ግን ዘየብሉ ብምኻኑ ጫፍ ንውሓተ ዕድሜኡ ከመሳስሎ ይኽእል'ዩ። መወዳእታ ስለዘየብሉ ግን ድሕሪ ምጽኣት ክርስቶስ ዘሎ ዘመን እግዚኣብሔር "ክልክዖ ኣይክእልን'ዩ!"  ክንብል ኣይከኣልን። ምኽንያቱ ርሑቕ ከይከድና ንሕና ደቂ ሰባት እካ፡ "ድሕሪ ምጽኣት ዘሎ ዘመን፡ በዚ ግዜ'ዚ'ዩ ጀሚሩ!" ኢልና ክንትርኽ ኢና። ድሕሪ ምጽኣት ቆጺርካ ዘይውዳእ፡ ሓንቲ መዓልቲ ኮይኑ ዝቕጽል'ዩ። እዛ ዕለት እዚኣ ሊቃውንት ቤተክርስትያን "ሰንበት ኢያ" ይብሉ። ማለት ኩሉ ግዜ ቅዳሴ፡ ወትሩ ምስጋና ወትሩ ስባሔ ወትሩ ኣምልኾ ኢዩ ክህሉ። ኣብ'ቲ ሓደ ዓለም ማለት ናይ ሓጥኣን ስፍራ፡ ኣብ ገሃንመ እሳት ድማ ወትሩ ስቅያት ብዘይዕረፍቲ ኣውያት ኢዩ ክኸውን። ኣብ ክልቲኣቶም ዓለማት፡ ኣብ መንግስተ ሰማያትን ኣብ ገሃንመ እሳትን ግን፡ ገደብ ዘየብሉ ዘመን ኢዩ ክኸውን። እግዚኣብሔር ኣምላኽ፡ ብንስሓ ተሓጺብና ኣብ ቅድሚኡ ዘይትሓፍር ነፍሲ ክዕድለና፡ ቅዱስ ፍቓዱ ይኹን።
ወስብሐት ለእግዚኣብሔር!
ሕቱም-መጽሓፍ!

ደረቐኛ ትውልዲ ብኸመይ ይፈሪ፧

በስመ ስላሴ ይቀጥቀጥ ከይሴ!

ናይ'ዞም ደረቐኛታት ትውልዲ ቀንዲ ምኽንያታዊ ምጭጫሖም፡ ሓደ ኣምስሉ ሰብ ዓብን ቀንድን መምህሮም'ዩ።

ንዝርዝርን ሜላን ትምህርቱ ዝምልከት፥-

√ "ተባዓት ኩኑ!" ኢሉ ዝምህር ንሱ ግን ብፍርሕን ስጋዊ ጥቕማ-ጥቕምን ቤቱ ገዲፉ ኣብ ስደት ተሸጊጡ ይነበር፡፡

√ "ከቢድ ጽዕነት ተሰከሙ!" ኢሉ ዝእውጅ፡ ንሱ ግን ብጫፍ ኣጻብዑ ክትንክፍ ዘይፈቱ፡

√ "ሞትን ማእሰርትን ፈሪሑ ዝሃደመ፡ ንኻልኦት ግን ሰማእትነት "ተዘይከፈልኩም!" ኢሉ ጥሩምባ ዝነፍሕ፡

√ ብጣዕምታት ዓለምን ፍትወታን ዝዘቕበበ ክንሱ፡ ነቶም መናንያንን ዓለም ዝነዓቑን ንጹሓን ደናግል ግን፡  ኣብርእሲ'ቲ ንዓለም ብምምናን ዝኸፈልዎ ዓቢ መንፈሳዊ ዋጋ፡ ከም ኢምንት ብምቕጻር "እዚ ምናኔ'ዚ ኣኻሊ ኣይኮነን፡ ውሒዱ ኣሎ፡ ክትስየፉ፡ ክትእሰሩ ኣለኩም" ብምባል ነታ ንሱ ፈሪሑ ዝሃደመላ ጾር ከሰክሞም ይህቅን፡

√ ኣይኮነን ምሉእ ለይትስ፡ ነዛ ሓንቲ ሰዓት እካ ነቒሑ ክጽሊ ዓቕሚ ዘየብሉ ክንሱ፡ ምስቶም ምሉእ ለይትን ምሉእ ረፍድን ብጸሎተ-ማህሌትን ቅዳሴን  ነብሶም ምስ ፈጣሪኦም ከራኽቡ ዝሓደሩ ኣካላት፡ "እዚ ምግባርኩም ኣኻሊ ኣይኮነን፡ ውሒዱ'ሎ፡ ወስኹ፡ ወስኹ ወስኹ!" እንዳለ ነቲ ዝጸለይዎ ከይተረፈ ዘቃሽሽ።

 √ እረ እናሓንሳእሲ፡ ማህሌት ኣብ ዝግበረሉ ግዜ፡ ምስቶም ማህሌት ዝቖሙ ሰብ ጸሎት ከይቆውም፡ ናይ ባዕሉ ካልእ ማህሌት ይፈጥር። ማለት ከም'ቶም ድኻምን ድቃስን ዝጸቐጦም ሰባት "ደኺመ" ኢሉ ከም ሰቡ ናብ መደቀሲኡ ከይዕዘርሲ፡ በቲ ሓደ ኣንጎሎ ጉጅለ ፈጢሩ ምሉእ ለይቲ ጉጅም ክብልን ክሓምን ይሓድር።

√ ቦትኡን ደረጅኡን ረሲዑ፡ ደረጃን ልዕልናን ካልኦት ንምውራስ፡ ፈላጥን ሊቕን መሲሉ ንኽረአ ልዕሊ ዓቐን ይህቅን።

√ ዕለታዊ ኣብ መስኮት ሜድያታት፡ ተተቐልቂሉ ዓብላልን ተሰማዕን ኮይኑ ክረአ ይደሊ።

√ ነታ ብኣዝዮም ውሑዳት፡ እረ በኣጻብዕ ዝቑጸሩ ትሑታት ሰባት ዝሰረትዋ ቅድስት ቤት ኣምላኽ፡ ከቢድ ጻዕርን መንፈሳዊ ተወፋይነትን ዝኸፈሉላ ቤተክርስትያን፡ ኣብ ክንዲ ሕጂ መጺኡ፡ በቲ ዝረኸቦ ክፉት ናይ ኣምልኾ ዕድላት ኣመስጊኑ፡ ንዓኣ ንምዕባይ ዓቕሙ ዝፈቐዶ እጃሙ ዘበርክት፡ ክብሪ ገዛእ ርእሱ ከርኢ ብምባልን ስሙ ንኸጸውዕን ከም ሕሱም ጎረቤት፡ ኣብ ጥቓ'ዛ ዝጸነሐቶ ቤት ኣምላኽ፡ ካልእ ናይ ገዛእ ርእሱ ክብሪ እተንጸባርቕ ማሕበር ክስርት ሓርኮትኮት ይብል።

√ እረ እነ ገሊኡስ፡ "ንስኹም ምስወዳእኩም ብድሕሬኹም ኣብዛ ቤተክርስትያን፡ ናትና ናይ በይንና ፕሮግራም ክንሰርዕ ፍቐዱልና!" ክሳብ ምባል ይደናደን፡ ብድፍረት ይወሓጥ!!

ወዘተ. ወዘተ. ወዘተ! መልእዎ፡ ካልእ  ብዙሕ ብዙሕ ክጥቀስ ይከኣል'ዩ!

እቶም ኣብ ትሕቲ ወንበረ-ደረቀኛታት ኮፍ ኢሎም ዝመሃሩ መንፈሳውያን ሰባት ድማ፡ 10 ዕጫታት የጋጥሞም። ልዕሊኡ'ውን ክኸውን ይኽእል'ዩ።

1. ልብኻ ካብ ንስሓን መንፈሳውነትን ርሒቕካ፡ ኣገልጋሊ ቤተክርስትያን ምንባርካ ተረሲዑ፡ ናይ facebook ኣገልጋሊ ኬንካ ምትራፍ።

2. ዕለታዊ ሓጢኣትካ ብምዝካር፡ ብፍርሕን ምንቅጥቃጥን ንኽትረግጻ ትብዓት ትስእን ዝነበርካ ቤተ እግዚኣብሔር፡ ትምህርቲ ደረቐኛታት ምስ ሰነቕካ ግን፡ ኣብ'ቲ ቅዱስ ስጋኡን ክቡር ደሙን ዝፍተተሉ ቅዱስ ስፍራ፡ ካብ  ኣራግጻኻ ክሳብ ኮፍ ኣበሃህላኻ ጠገለ ዘየብሉ ይኸውን፡፡ ቅድሚት ኮፍ ምባል ኣዝዩ ዝኸብደካን ዘፍርሃካን ዝነበረ፡ ሕጂ ግን ብድፍረት፡ ክሳብ ናብ ቅድስተ ቅዱሳን ኣቲኻ ነቲ ቀዳሲ ካህን'ውን ከይተረፈ ኣዒይትኻ ከተፍጥጠሉን ኢድካ ከተዋጣውጠሉን ከም እትደሊ ትኸውን።

3. እቲ "ቦ ዘኣስታሕቀረ ዝንቱ ቃለ ቀሲስ፡ ኣው ዘሰሓቀ...!" ዝብል ከቢድ መንፈሳዊ መጠንቀቕታት ናይ ድያቆን ንዓኻ ግን ከምዘይምልከተካ ገይርካ ከምእትሓስቦ ትኸውን።

4. ናይ ቅድሚ ሕጂ ዝነበረ ድምጺ ኣልቦ መንፈሳዊ ኣራግጻኻ ተረሲዑ፡ ሕጅስ ከምኡ ገይርካ እካ ኣብ ጽርግያ ኣይትዘልልን፡፡ ካብዝን ናብትን ዲግ ዲግ ክትብል ክሳብ ክንድዚ ንቤት ኣምላኽ ከምእትንዕቖን ተቃልሎን ትኸውን!

5. ኣዛራርባኻ፡ ዘለፋን ምውጥዋጥ ኣእዳን ዝዓብለሎ ይኸውን። ኣብ ልዕሊ ንጹሓን ኣገልገልቲ እግዚኣብሔር፡ ዝነበረካ ሕፍረትን ትሕትናን ፈጺሙ ይርሳዕ።

6. ኣብ ክንዲ ከም'ቲ ቅድም ኣብ ምጅማር መንፈሳውነትካ፡ ዝነበርካዮን ንኣገልገልቲ እግዚኣብሔር እትህቦም ዝነበርካ ክብርን መመሊስካ ተማዕብሎስ፡ ንሱ ኣሻቡ ተረሲዑ፡ ሰብ ምኻኖም እንካን ፈጺምካ ትዝንግዖ፡፡ መራሕትኻ ብምኻኖም'ውን ጭምር ልዑል ትሕትናኻን ኣኽብሮትካን ተርእዮም ዝነበርካ ተዘንጊዑ፡ ከም ሓደ ምንኣስካ ንእሽቶ ሕንጣይ ቆልዓ ብምሕሳብ ክትዳፈሮምን ክትዝልፎምን ከምዝቐለልካ ትኸውን።

7.እረ እናሓንሳእ ሓንሳእሲ፡ እቲ ከም ሰብ ጥራይ እካ ክቡራት ምኻኖም ተዘንጊዑ፣ ክብርታት ሰብኣውነቶም ጨሪሱ ካብ ልብኻ ተሓኺኹ፡ ትሕቲ ሰብ ሰሪዕካ፡ ኣብ ፌስቡክን ዩትዩብን ብዘይፍቓዶም ስእልታቶምን ድምጾምን ብምልጣፍ፡ ጽርስፍ ውዒልካዮም ከይኣክል፡ ንጸራፊ ኣሕሊፍካ ክትህቦም ከምትውዕል ትኸውን።

8. ኣብ ሕጊ ዓለም፡ ስእልን ምስልን ናይ ሓደ ሰብ፣ ብዘይፍቓዱ ክትዝርግሖ ምስትርከብ ኣዝዩ ከቢድ ዝኾነ ቅጽዓት ኢዩ ዘምጽእ። መንፈሳውያን ሰባት ግን መንፈሳዊ ትዕግስቲ ገይሮም ስቕ እንተበሉልካ፡ ዝፈርሑኻ፡ ነቲ ትብትኖ ዘለኻ ድፍረት'ውን ዘድነቑልካ ክሳብ ዝመስለካ ቸይ-ቸይ ከምእትብል ትኸውን።

9. ንስኻ ንባዕልኻ ጥራይ ካብ ቅድስና ምህዳምካ ከይኣክልሲ፡ ካልኦት ከማኻ ንካህናት ዝጽየፉ፡ ንስሓ ዝሕሰሙ፡ ቅዱስ ቁርባን ጨሪሶም ዘቃርጹ፡ ምስ ፈጣሪኦም ዘለዎም ርክብ ጸሎት ይኹን ካልኦት መንፈሳውያን ግብራት ፈጺሞም ዝርስዑ ኣካላት ከምተፍሪ ትኸውን።

10. ልብኻ መሕደሪ እግዚኣብሔርን ቅድስና ዝዋህለሎን መንፈሳዊ ጎጆ ዝነበረት ተረሲዑ፡ ንሓጢኣትን ድርቅናን ምችእቲ ክትገብራ ትደራደር።

ከም'ዚ ዓይነት ብዝሒ ትውልዲ ኣብ ዘመንና ብብርቱዕ ናህሪ ይውስኽ ኣሎ።

ኣብ ቅዱሳን ናይ ትንቢት መጽሓፍቲ፡-

"በቲ ግዜ'ቲ ወረ ንምስማዕ፡ ነገር ንምርኣይ ናብ`ዝን ናብትን ቀልባዕባዕ ክብሉ ኢዮም።
( ፍካሬ-ኢየሱስ ገጽ 29)

"ዓመት ዝገበሩ ቆልዑ ክዛረቡ ክጅምሩ ኢዮም...። (2ይ እዝራ 6፥21)

"በቲ ግዜ'ቲ ኣብ ማኅፀን ኣዴኦም ከለዉ ዝንቅዉ ኣኽላባት ክውለዱ ኢዮም፡፡ ኣኽላባት ዝተባህሉ፡ ኣኽላባት ኣይኮኑን፡፡ ኣብ'ቲ ግዜ'ቲ ዝውለዱ ሕፃናት ደኣ ኢዮም፡ ኣብ'ቲ ዘመን'ቲ ዝውለዱ ሕፃናት፡ ቃሎም ልዕል ልዕል የብሉ፡ ኣብ ልዕሊ ወለዶም ይትንሥኡ፡ ንወለዶም ኣይእዘዙን፡ ነቦኦምን ነዴኦምን ኣየኽብሩን።"
(ፍካሬ ኢየሱስ ገጽ 31)

"ሓንቲ ሃገር ነታ ጎረቤታ ዝኾነት ሃገር ' ጽድቂ ንባዕላ ወይ ጽድቂ ዝገብር ሰብዶ ርኢኺ ትፈልጢ፧' ኢላ ክትሓታ ኢያ። መልሲ ግና ኩሉ ግዜ 'ኣይረኣኹን!' ዝብል ክኸውን'ዩ።
 (2ይ እዝራ 5፥11)

ዝብሉ ትንቢታት ግዜኦም ዝኣኸለ መሲሉ ይረአ ኣሎ!!
ኦ እግዚኣብሔር ነዞም ናይ ሎሚ ትውልዲ ደቅኻ ኢና`ሞ፣ ብምሕረት ዓይንኻ ጠምተና። 
ለቱ ስብሐት!!!

ዕብየታን ክብራን ናይ ኣዴና ቅድስት ድንግል ማርያም! 1ይ ክፋል

በስመ ስላሴ!

በእንተ ዕበያ ወክብራ ለእግዝእትነ ቅድስት ድንግል በክልኤ ማርያም።

ናሁ ኣነ እነግር  ክብራ ወዕበያ ለእግዝእተ ኩልነ ቅድስት ድንግል በክልኤ ማርያም ወላዲተ ኣምላክ፡ በትሕትና ወበፍርሀት፡ ዘተቀድሐ እምሀበ ትምህርተ ኣበዊነ ቅዱሳን፡  ከመ ይኩን ለዚኣነ በረከተ ሰናየ፡፡ ወለዝንቱ መናፍቃንሰ ዘኣልቦሙ ርትይዕተ ሃይማኖት ይኩኖሙ ተግሳጸ።

-- ንዓና በረኸት፡ ንደፋራት መናፍቃን ድማ ተግሳጽ ይግበረልና።

ሀ)  ስለዕብየትን ልዕልናን ቅድስናን ናይ ኣዴና ቅድስት ድንግል ማርያም፡ ኣብ ቤተክርስትያን ክንገረና እንከሎ፡ ካብቲ ኩሉ ዝኽእል ፈጣሪና፡ ኣምላኻዊ ቃሉ ተቐዲሑ ዘይውዳእ ፈልፋሊ ትምህርተ ቤተክርስትያን ደኣምበር፡ ምድራዊ ፍልስፍና ዘንቀሎ ኣይኮነን።

1. ድንግል ማርያም ቅድሚ ምፍጣር ዓለም ኣብ ሕልና እግዚኣብሔር ተሓሲባ ነይራ።
√ ብኡኡን፡ (( በታ ቀደም ዝተዋህበትና ጸጋን))  ኣድሓነና።
2ጢሞ1፥9-10
-- ኣስተውዕል፡
"ብኡኡ ተዋህበትና " ዝተባህለ እግዚኣብሔርነቱ'ዩ፡ "በታ ቀደም ዝተዋህበትና ጸጋ" እትበሃል ዘላ ግን፡ ናይ ኣዳምን ዘርኡን ግምጃ ኮይና ዝጸነሐት ቅድስት ድንግል'ያ። እግዚኣብሔር ዘድሓነና ብመለኮቱ ጥራይ ኣይኮነን፡ ፐርከስ መለኮት ኣይሓምምን ኣይመውትን'ዩ። እንታይ ደኣ ብተዋህዶ ስጋን መለኮትን'ምበር። ስለዚ እታ ርስሓት ንከይኣትዋ ብመንፈሳዊ ሓይሉ ዓቂብዋ ዝጸነሐ ድንግል፡ ዕለቱ ምስ ኣኸለ፡ እቲ ንጹሕ ኣምላኽ ኣብ ማሕጸና ብመንፈሳዊ ሚስጥር ተቐመመ። ንሕና ድማ ኣምላኻዊ ፍርዱ እካ ብሰንኪ ግብርና ናብ ሲኦል የውርደና እንተነበረ፡ ኣምላኻዊ ምሕረቱ ግን በዛ ተረፍ ቅድስና ኣዳም ዝኾነት ድንግል ካብ ሲኦል ከምእነምልጥ ገበረና። "ነዚ ጥበብ'ዚ ኣንክሮ ይግባእ!" በለ ኣባ ጊዮርጊስ ዘጋስጫ።
ገላ4፣4
√ እግዝእትነ ማርያም ነበረት እምቅድመ ዓለም በሕልና ኣምላክ።
ቅዱስ ኣባ ደቅስዮስ (ግብጻዊ)፡ መቅድመ ተኣምረ ማርያም

2. እግዚኣብሔር ቅኑዕ ፈራዲ ብምኻኑ ንኣዳም ብግብሩ እካ እንተፈረዶ፡  ቅኑዕ ምሕረቱ ንከርኢ ግን፡ ብርሃናዊት ተስፋ ድሕነት ኣብ ሕቖ ኣዳም ኣቐመጠ። ስለዚ ንእግዚኣብሔር "ዘይፈረዶ" ኢልና እንወቕሰሉ ሓይሊ የብልናን፡ ምኽንያቱ ንኣዳም ፈሪድዎ ዩ። "ምሕረቱ ተሰዊራ!" ኢልናውን እንወቕሰሉ ምኽንያት ኣይነበረናን፡ ምኽንያቱ ኣብ ባህሪ ኣዳም ሓንቲ መርገም ዘይሓለፈ ንጽሕት ተረፍ ቅድስና ኣትሪፍልና'ዩ እግዚኣብሔር። ምሕረቱ ኣብዚ እነሃ ተገሊጻ። ቅዱሳን ድማ ብዛዕባዛ ተረፍ ቅድስና ኣዳም ዝኾነት ድንግል፡ ብዝተፈላለየ ምሳሌ ትረኣዮም ስለዝነበረት፡ ኣኣብ ዝነበርሉ ዘመን በብጸገኦም ተነበዩላ። "ኢሳይያስ ተረፍ ተዘይሓድገልና..." በለ፡ ጳውሎስ ድማ "ንዑኡ ኣመስገንቲ ንክንከውን ቅድሚ ምፍጣር ዓለም ሓረየና!" ኢሉ ተርጎሞ። ሕርየት፡ ካብዝን ካብትን ኢልካ'ዩ። እግዚኣብሔር ንሰብ ድሕሪ ምፍጣር ዓለም ፈጢርዎ ከብቅዕ፡ ቅድሚ ምፍጣር ዓለም ግን ሓረዮ፡ ማለት ካብ ኩሎም ፍጥረታት ኣብሊጹ ሓለኖ። ስለዚ ኣዳም  ብውድቀቱ እካ ክብሩ ትሕቲ ኩሎም ፍጥረት ብምኻኑ ብኹሎም እንተተናዕቀ፡ በታ እግዚኣብሔር ኣብ ባህሪ ኣዳም ዓቒርሉ ዝጸነሐ ተረፍ ቅድስና ግን ሕርየቱ ብምኽንያት ድንግል ማርያም ልዕሊ ኩሎም ኮይኑ ክቕጽል ጸነሐ።
√ ኢሳ 1፥9፡ ኤፌ1፥4, 2ጢሞ1፡9-10
√ ከም ዕንቂ ባሕሪ ኣብ ከርሰ ኣዳም ኮይና ተበህ ነበረት።
ቅዱስ ያሬድ ማህሌታይ

3. ቅድስት ድንግል ማርያም ጥንተ ቅድስና እምበር ጥንተ ኣብሶ የብላን።
-- "ጥንተ" ዝበሃል ዘሎ፡ ኣዳም ቅድሚ ምውዳቑን ድሕሪ ምውዳቑን ዘመልክት ትረኻ'ዩ። ኣቦና ኣዳም ቅድሚ ምውዳቑ ቅዱስ ንጹሕ ገይሩ እግዚኣብሔር ብጥበቡ ፈጠሮ፡፡ በዚ ድማ መላእክት ብክብሪ ዓጆቦም ኣኽበርዎ፡ ኣብ ገነት ድማ ን7 ዓመታት ብቅድስና ከቢሩ ጸነሐ።
ቀሌመንጦስ 1፥38፡ ኩፋሌ 4 ተመልከት፡
--ምስ ወደቐ ግን ክብሩ ብፍርዲ እግዚኣብሔር ተነጥቀ። ስለዚ ድንግል ካብቲ ጥንታዊ ቅድስና ኣዳም ድኣ እምበር፡ ካብቲ ድሒሩ ዝመጸ ኣበሳ ኣዳም ሒዛ ኣይተወልደትን። ምኽንያቱ እግዚኣብሔር ካብቲ ኣምላኻዊ ፍርዱ፡ ብኣምላኻዊ ጥበቡ ከምእተምልጥ ገይርዋ ኢዩሞ።

√ እግዚእትነ ማርያም ትነጽሕ እመላእክት፡ እግዝእትነ ማርያም ትዓቢ እምኩሉ ፍጥረት።
እመ ቤትና ማርያም ካብ መላእክት ትነጽሕ፡ ካብ ኩሉ ፍጥረት ድማ ትዓቢ።
-- ዕብየታን ንጽሕናኣን ልዕሊ ኩሉ ፍጥረት፡ ግን ከኣ ትሕቲ ፈጣሪ ኢልካ ንምንጋር ደኣምበር፡ መላእክት ኣበሳ ስለዘለዎም ኣይኮነን ካብ መላእክት ትነጽሕ ዝበሃል ዘሎ።
መቅድም ተኣምረ ማርያም ተመልከት፡ ቅዱስ ደቅሲዮስ (ግብጻዊ ኣቦ)

4. ቅድስት ድንግል ማርያም ጥንታዊት ቅድስና ሒዛ እምበር፡ ጥንታዊት በደል ሒዛ ኣይተወልደትን።
√ ንስኺ ግን ንኹለን ትበልጽየን ኢኺ፡ ምሳ31፥29
√ ሐረያ እግዚእ ለጽዮን ከመ ትኩኖ ማህደሩ፡ መዝ132፥13
-- "ሐረያ!" ዝብሃል ዘሎ፡ መዓስ ሓርይዋ ብዝብል ገጽታ፡ ናብቲ ጥንተ ፍጥረት ኣዳም ይወስደና። ገለ ገሌኦም፡ " ከመይ ኢልካ፡ "ከይተወልደት እንከላ ሓርይዋ" ብምባል ንእግዚኣብሔር መዳለዊ ትገብሮ ኣለኻ!" ዝብሉ ኣለዉ። እሞ እንታይ  ንበል፡ እግዚኣብሔር ንኹሉ ምሉ ምልኣታዊ ባህሪ ኣዳም ፈሪድዎ'ዩ፡ እንተበልና ደኣ፡ ምሕረቱኸ ኣይዘንጋዕናዮንዶ፧ ቅዱስን ልዕሊ ኩሉን ገይሩ ንኣዳም ብመልክዑ እንክፈጥሮ መዳለዊ ዘይተባህለስ፡ ሕጂ ተረፍ ቅድስና ኣዳም፡ ኣብ ሕቖኡ ስለዘቐመጠ ክንቅልቀፍ? በጭራሽ!! በዚስ ንጥበበ እግዚኣብሔር ንንእዶ እምበር፡ መዳሊዊ ኢልና ኣይንነቕፎን።

√ ጸጋ ረኺብኪ ኢኺ'ሞ ኣይትፍርሂ።
-- ((ኣስተውዕል " ጸጋ ክትረኽቢ ኢኺ" ኣይኮነን ዝብል'ዘሎ ቅዱስ ገብርኤል። ገና ጥንሲ እንከይተጀመረ ንሳ ግን ኣብ ዘመነ ብሉይ ኪዳን ጸጋ ረኺባ ስለዝጸነሐት'ዩ ዘመስግናን ዘበስራን ዘሎ ።))
ቅዱስ ገብርኤል መልኣኽ።
(ሉቃ1፥30)

5. ትምህርተ ኣበው ቅዱሳን፡-

√ ኢያእመረ እስመ ዘተፈጥረት እምነ ጽቡር ወጽሩይ ትከውን መቅደሶ ለእግዚኣብሔር።
-- ካብ ንጹሕ ጽሩይ ዘርኢ ዝተፈጥረት ኮይና፡ ንእግዚኣብሔር መሕደሪኡ ከምእትኸውን ኣይፈለጣን።
ዘኢራቅሊስ ናይ ቆስጠንጥንያ ኤጲስቆጶስ ዝነበረ ኣቦ
ሃይማኖት ኣበው48፥31
- ብዛዕባ ፈሊጥ ናይ ጻድቅ ዮሴፍ'ዩ ዝትርኽ ዘሎ። ታሪኹ ኣብ ወንጌል ኣለና፡ ጸኒሳ ስለዝጸነሕት፡ እንታይነታዊ ክብራን ቅድስናዊ መንነታን ክርደኦ ኣይከኣለን። ንሳ ካብ ዘርኢ ሰብኣይ ከምዘይምኻኑ እቲ ጽንሲ ነጊራቶ'ያ፡ መልኣኽ ድማ ብሕልመ ለይቲ ክሓድጋ ከምዘይብሉ ምስ መጠንቀቕትኡ ኣረዲእዎ'ዩ። እምበኣር ዮሴፍ ኣረጋዊ፡ ክሳብ ኣብ ቤተልሔም ንጎይታ እትወልዶ ክብራን ዕብየታን ክርደኦ ብዘይምኽኣሉ፡ "ኣይፈለጣን!" ተባሂሉ ደጋጊሙ ተነግረ። ቅዱስ ዘኢራቅሊስ ድማ ስለቲ ቅድመ ምጽናሳ ዝነበረ ክብረ ቅድስናኣ ብሓጺር ገለጻ፡ ነዊሕን ሰንሰለታውን ጽሩይነታ ተረኸልና።

√ ወሐደረ በከርሰ ማርያም ድንግል ንጽሕት ወትረ ወጽሩት እምቅደመ ድንግልናሃ።
-- ኣቐዲማ ቅድሚ ምጽናሳን ድሕሪ ምጽናሳን ድንግል ንጽሕቲ ጽርይቲ ኣብ ዝኾነት ኣብ ማርርያም ድንግል ሓደረ።
ቅዱስ ዘሚናስ ዘእስክንድርያ ሊቀ ጳጳስ (ግብጻዊ)

-- ቅድሚ ጽንሰት ብሉይ ኪዳን'ዩ፡ ካብታ "ከምቲ ዝበልካዮ ይዂነለይ፡" ዝበለትላ እዋን ኣትሒዙ ግን ሓዲስ ኪዳን ጀመረ፡ ስጉው ቃል ኣብ ማህጸና ንድሕነት ደቂ ኣዳም ክስጎው ጀመረ። ስለዚ ቅዱስ ሚናስ፡ "ነየናይ ቅድስናኣ'ዩ ዘድንቕ ዘሎ?"  ኢልና እንተሓቲትና ነቲ ቅድሚ ምጽናሳ ዝነበረ ቅድስና ምኻኑ የረድኣና'ሎ።

√ ዕበያ ለድንግል ኢትከሀል ለተነግሮ እስመ እግዚእ ሐረያ ወመጽአ ወሐደረ ላዕሌሀ።
-- ዕብየታ ናይ ድንግል ክንገር ኣይከኣልን'ዩሞ፡ ጎይታ ሓርይዋ መጺኡ ድማ ኣብ ልዕሌኣ ሓደረ።
ቅዱስ ኤፍሬም ሶርያዊ
ውዳሴ ማርያም ዘሰሉስ
-- ቅዱስ ኤፍሬም ሶርያዊ ንናይ ገብርኤል መልኣኽን ቅድስት ኤልሳቤጥን ምስጋና ምርኩስ ብምግባር ተመሲጡ፡ ንዕቤተ ድንግል ብኣደነቕቲ ቃላት ይነግር ኣሎ።

√ ተፈስሒ ኦ ሙዳይ እንተ ኣልባቲ ነወር ፍጽምት ዘኣልባ ርስሐት።
-- ኣንቲ ኣበርን ርስሓትን ዘየብልኪ ፍጽምቲ ሙዳይ ተሓጎሰ ደስ ይበልኪ።
ቅዱስ ኤፍሬም ሶርያዊ፡ ውዳሴ ማርያም ዘረቡዕ
-- ቅዱስ ኤፍሬም '?"ነዚ ንድግል ዝወሃብ ምስጋናን ኣድናቖትን ካበይ ወሲድዎ፥ መን'ዩ ምሂርዎ?" ኢልና እንተሓቲትና፡ ካብ ቅዱስ ገብርኤል መልኣኽ'ዩ ተማሂርዎ። ነታ
"ኦ ምልእተ ጸጋ"  እትብል፡ ዘርዚሩ ዝተርጎማ'ዩ።

√ ብኪ ግርማ ራእይ ዘየዓቢ እምግርማ ኪሩቤል እለ ብዙሐን ኣዒንይንቲሆሙ፡ ወሱራፌል እለ ስድስቱ ከነዲሆሙ።
ቅዱስ ያሬድ ማህሌታይ፡ ኣንቀጸ ብርሀን
-- ግርማኺ ካብ ግርማ ኩሩቤል ብዙሓት ዘዒንቶም፡ ሱራፌል ሽዱሽተ ዘኽናፎም ይዓቢ።
-- እግዚኣብሔር ብባህሪኡ ካብ ማንም ዘየምጽኡ፡ ማንምውን ክወስደሉ ዘይክእሉ ገንዘቡ ዝኾነ ኣምላኻዊ ግርማ ኣለዎ። እዚ ኣብን ወልድን መንፈስ ቅዱስን ሓደ ኣምላኽ ማለተይ'የ። ኩላቶም ፍጥረቱ ድማ በበቲ ዝሃቦም ናይ ጸጋ ክብሪ፡ ንሓድሕዱ ዝበላለጽ ግርማ ኣለዎም። ድንግል ማርያም ግን እግዚኣብሔር ጥራይ ደኣሉ ብኣምላኻዊ ግርማኡ ዝበልጻ እምበር፡ ግርማኣስ ልዕሊዞም ተሰምዮም ዘለዎ ኪሩቤልን ሱራፌልን እረ ልዕሊ ኩሉ ፍጥረት፡ ናይ ኣደ ኣምላኽ ምኻን ግርማ ዝተዓደለት ምኻና የዘንቱ ኣሎ ቅዱስ ያሬድ ማህሌታይ።


√ ኣኮ ዘተኣምሪ ርስሐተ ከመ ኣንስት እለ እምድሕሬኪ ወእምቅድሜኪ።
-- ከምተን ድሕሬኽን ቅድሜኽን ዝነበራ ኣንስቲ ርስሓት ኣይትፈልጥን ኢኺ።
ቅዱስ ኣባ ህርያቆስ፡፡ ቅዳሴ ማርያም፡
-- ድሕሬኣ ዝተወልዳ ናይ ሓዱሽ ኪዳን ደቀንስትዮ ኢየን፡ ቅድሜኣ ዝነበራ ድማ ናይ ብሉይ ኪዳን'የን። ከምኣተን ርስሓት እትፈልጢ ኣይኮንክን ኢሉ የድንቓ ኣሎ ቅዱስ ህርያቆስ።

ጣዕመ ፍቅራ ወበረከታ ይክፈለነ።
እግዚኣብሔር ብፍቕሩ ምስ ቅዱሳኑ ይደምረና።
ወስብሐት ለእግዚኣብሔር።
2ይ ክፋል ይቕጽል።
√ ሕቱም-መጽሓፍ

ዘመነ ሓዊ-ሓሰር

በስመ ሥላሴ!
ሞልቂ-2005

2005 ኣቢሉ ይኸውን ምስ ሓደ ኣዝየ ዘፍቅሮ ዓርከይን መታዓቢተይን፣ ``ግጥሚ ንጽሓፍ`ሞ  መንና ቀልጢፉ ዝጸበቐት የዳሉ`` ተባሃሂልና፣ ውዕውዕ ክልቲኣዊ ውድድር እንከነካይድ ሕጂ ይዝከረኒ። ኣብቲ እዋን`ቲ፡ ቤት ትምህርቲ ካልኣይ ደረጃ ሞልቂ ጅሃን፡ ውዕዉዓት ተመሃሮ ዝጠርነፈት፣ ብስፖርታውን ስነ-ጥበባውን መዳይ ድማ ነቲ ዝነበረ ሓፈሻዊ ሕጽረታትን ኩነታትን ኣብ ግምት የእቲኻ፡ ''ከባቢ ንኡስ ዞባ ሞልቂ ኣዝዩ ጸላውን ትስፉውን ትውልዲ ኣፍርያ``፣ ኢልካ እትሕበነሉ መድረኽ ዝቐረበ መሲሉ ይረአ ነይሩ ።ክቡራት ኣንበብቲ ናብ'ቲ ናይ ሽዑ ወቕቲ ክመልሰኩም።  ቅንያቱ በቶም ናይ ሞልቅን ከባቢኣን ተምሃሮ፣ ዝተፈላለየ ኣካላውን ስነ-ኣእምሮኣውን ንጥፈታት ዘካተተ ውድድራት ዝካየደሉ እዋን ብምንባሩ፣ ኣነ ከም ሰበይ  በተን ሽዑ ዝሕንጥጣ ዝነበራ ኣእዳወይ ገይረ፣ ምስቶም ሞዛነይ ንውድድር ኣብ ጽዑቕ ልምምድ ግጥምን ስነ ጽሑፍን ኣትየ ምንባረይ ትዝ ይብለኒ። ብምፍላይ ምስ'ቲ መጋጥምተይ ገጣማይ ኴነ፣ ኣብታ ንሱ ተኻርይዋ ዝነበረ ናይ ስካፕሊ ንእሽቶ ቤት ኮይንና፡ ሓጻርን ጽዕጽዕትን ናይ ልምምድ ግዜ ዘሕለፍናያ ህሞት ሕጂ እንክዝክራ ገለ ጦብላሕታ ፈጢራትለይ ኣላ። 

ስሙ ንግዚኡ ዓቂበ ናብቲ ናይ ሽዑ ቊምነገር ክወስደኩም። እቲ መስርሕ ሓባራዊ ዝኾነ ዛዕባ ኣልዒልካ ንዑኡ ዝምልከት ምጽሓፍ ኢዩ ነይሩ። መቸም 'ነቲ ሽዑ ዝጸሓፍክሞባ ንኹሉ በበሓደ ንገረና' ተትብሉኒ፡ ምስ ምንዋሕ ግዜ፡ ንዂሉ'ውን ኣብ ግምት የእቲኻ፡ ሸምዲደ ንምዝካር ዓቕሚ ይሓጽረኒ ምኻኑ ርዱእ`ዩ፣፣ ብሓጸርቲ ደቓይቕ ኣብ ሓደ ዓንኴል ዛዕባ ዝገበረን፡ክልቲኣትና ንናይ ክልቲኣትና ልምምድ ዘቕረብናዮን ስለዝዀነ ግን፡ ዋላ ደኣ ትሕዝቶ'ተን ግጥምታት ኣይዘክሮ'ምበር፡ ፍረ-ነገረን ንዓቕሚ ኣእምሮና ዕጋበት ከምዝፈጠረሉ፡ ብኡኡ መጠን'ውን በበቲ ዝጸሓፍናዮ ገጽታ፣ ሕድሕዳዊ ስሓቕን ወኻዕታን ከምዝሰነቕና ኣይርስዖን'የ።

ናብ`ዚ ናይ ሕጂ ጉዳየይ ክኣቱ፣፣ እታ ሽዑኡ ንግጥሚ ኢልና ዝመርጽናያ ኣርእስቲ፣ '' ሓውን ሓሰርን!`` ኢያ ትብል ነይራ። ድማ `ኣብዚ ሕጂ እዋን በበዚ ዘለኹሞ ህሉው መድረኽኩም ኣብ ግምት የእቲኹም ዘለኩም ርድኢት፣ "ሓውን ሓሰርን ዝብል  ከም ቀንዲ ኣርእስቲ ጔርኩም ጸሓፉ" ተንበሃል መቸም፣ ንባዕሉ እዚ ዘለናዮ ወቕቲ ነዚ ኣርእስቲ ዝመጣጠን ስለዝኾነ፣ ቃላት ክንመርጽ ምጸገመና ኣይብልን`የ።  ምኽንያቱ ሓንቲ ፊደል ክንጽሕፍ ከይጀመርና እኳ፣ ባዕሉ ኣፍ ኣውጺኡ እዚ ግዜ ዝንበብ ጽሑፍ ምኾነልና ይብል ኣነ።

ተመልከቱ!

ኣብ መንፈሳውን ስጋውን ዓለም ዘሎ ናይ ሎም ትውልድና፡ ሓውን ሓሰርን መሲሉ ንሓድሕዱ ክረአአ ካብ ዝጅምር ነዊሕ እዋን ኣቕጺሩ`ሎ። ሓዴኦም ዓብላሊ፣ ሓዴኦም ጠፋኢ ንምኻን ኣብ ቅልስ ዘለዉ እንክመስሉ፣ ምስ ሓውን ሓሰርን ይመሳሰሉ'ለዉ። ኣብ ዓድና `` ጽርዲ!`` ዝበሃል ናይ ቁልዕነትና ኣበሃህላ ኣሎ፣ ጽርዲ ማለት ኣብ ግዜ ህጻንነት ተጠቃምነት ዝረክብ ኣበሃህላ ኴኑ፣ ኣይተሕምቖ፣ ኣየሕምቐካ፣ ወትሩ ጽልእ ኮይንካ ምንባር ማለት`ዩ። ንስኻ ትመልኽ ተኾይንካ፣ እቲ ሓደ ተንከስ ኢሉ ኣንጻርካ ክለዓል ኣይክእልን`ዩ። ብመጠኑ ሓዴኻ ዘሕምቕ ኮይኑ`ተጸኒሑ ግን፣ ካብ ጽርዲ ምዃን ዝፍለየሉ ባእታ'ሎ። እዚ ከኣ ኣብ መንጎኻ ግዝያዊ ሰላም ሰፊኑ ስለዝረአ`ዩ፣፣ ማለት ንሓድሕድካ ኣይትባላዕን ኢኻ፡ ኣይትተሃራረምን'ውን። ንስኻ ስለትመልኮ 'ክሃርመኒ ኢዩ' ዝብል ስክፍታ ከይሃለወክ ቀሲንካ ትሓድረሉ መድረኽ'ዩ። ንሱ`ውን ስለተሕምቖ 'ተዘይተኸራኸርክዎን 'ተዘይፈጋእክዎን' ኢሉ ከዕገርግር ዕድሚኡ ኣይከስርን'ዩ። ጽርዲ ምዃን ግና ሰላም ዝበሃል የብሉን። ነፍሲ ወከፍ ኣብ እትራኸበላ ግዜ በብዝጥዕመካ ምቱዃስ`ዩ። በቃ በብዝተራኸብካሉ ትበኣስ ካብ ኰንካስ ዘይምርኻብ ትምነየሉ ኣጋጣሚ'ሎ። ምስ ጎበዝካን ኣብ ስብእናዊ ዕድመ ምስ በጻሕካን ግን፡ ዂሉ ጽልእታት ናይ ቁልዕነት ኣሻቡ  ስለዝርሳዕ፣ ወኻዕካዕ እናልካ መዕለልን መስሓቕን መታን ክኾነካ እናዘከርካዮ ኢኻ ትነብር። 

ኣብ'ዚ ምዕቡል ዘመነ-ዓውላማ፡ ጉዳይ ጽርዲ ምዕራፍ ክልተ፡ ሕጂ እንደገና ጀሚሩ ዝያዳ ጎሊሑ ዝረአ ዘሎ ይመስል። ዘመነ ጽርዲ በቲ ዘገርም መልክዑ፣ ከም ሓውን ሓሰርን ብናህሪ ክጎብጠና ደልዩ እነሆ።  ሕብረተ-ሰብና ንሓድሕዱ፡  ብቂም በቐል፣ ክባላላዕ ተሃንዲዱ፣ ክርቢት ከነቐብሎ ኣእዳዊ ዊጥ ዘበለ መሲሉ ክረአ ካብ ዝጅምር፡ ቀሊል ግዜ ኣየቕጸረን። ክልተ ኣሕዋት፣ ክልተ ሰብ ሓዳር፣ ክልተ ስድራ፣፣ ክልተ ኣዝዮም ሕፉራትን ክቡራት ቤተሰብ፡ ክወናጀሉ፡ ክወቓቐሱ፣ ክናኸሱ፣ ክጸራረፉ፣ እናሻዕ ብዘርእይዎ ሕድሕዳዊ ቂም በቐል፣'ንሓውን ሓሰርን' ዝሓለፍዎም ዝመስልሉ ግዜ እናበዘሐ ይመጽእ ኣሎ። ደረስቲ ክልተ ገጸ-ባህርያት ናይ፡ "Tom and Jerry", William Hanna and Josuph Barber, 1940-1958, ነዚ ኣብ`ዚ እዋን ዘሎ ናይ ትውልድና ገጽታ ኣንቢቦም ዝተረድኡ ይመስሉ። እዞም ክልተ ደረስቲ፡ ናይ ኣንጭዋን ድሙን ባሕርያት'ዮም ኣብ ትራጀዲ የእትዮም ዝምህሩና። ንዓይ ግን ንሕና ደሪስና ባዕሉ ህሉው ሕይወትና ዝዋስኦ ዘሎ'ዩ ዝመስለኒ። ወለዶና ሓደ ነቲ ሓደ ከጥፍእ ይህንደድ ኣሎ። ክልተ ፍጹም ጽልኢ ክጸላልኡ ትርኢ`ሞ፣ በቲ ድማ ተኣኪቦም `` ንሕና ናይ ሰላም ኢና፣ ዕርቂ ኣባና`ዩ ሰፈሩ፣`` ዝብል ዜና ካብ ኣፍ ክልቲኣቶም  ክፍኖ እንክትሰምዕ። ኣርምም የብለካ፡ ንኣርመምቲ ክትህቦ'ኳ ኣይትጸልእን።

ዳርጋ ኲሉ ግዜ ክትብል ትደፍር፣ ሓውን ሓሰርን እንተተራኺቦም፣ ሰዓርን ዓብላን ኮይኑ ዝወጽእ ሓዊ`ዩ። ``ንጣር ቁልዒ ንምሉእ እምባ ዘባርዕ ሓይሊ ኣለዋ፣`` ዝብል ኣበሃህላ ኣሎ። እቲ ዘገርም ግን ክበኣሱ እንከለዉ፣ ናይ ክልቲኣቶም ህልውና የብቅዕ ምዃኑ`ዩ። ሓሰር ናብ ሓሙዂቲ፣ ሓዊ ድማ ናብ ቃህሚ ተለዊጡ ቅሂሙ ይጠፍእ። ባርዕ ንዂሉ እምባታትን ጎላጉን ኣቃጽሉ ምስወደአ፣ ንባዕሉ ሓሙኽሽቲ ኰይኑ ይተርፍ ምዃኑ ይገርመካ። ክልቲኣቶም ክህልዉ እንተኾይኖም፣ ከይተታኾቡ፣ እቲ እሳትንቱን ንገዛእ ርእሱን ዓቒቡ፣ እዚ ድማ ሳዕርነቱ ከይበተነ ብሓደ ተጠርኒፉ ምስ ዝነብር'ዩ፡፡ በዚ መስርሕ'ዚ፡ ህልውና ክልቲኣኣቶም ኣብ ምልክት ሕቶ ክኣቱ ኣይምኸኣለን። እታ ምስዚ መታዓቢተይ ብዘመን ቊልዕነትና፡ ኣብ 2005 ዘልዓልናያ ኣርእስትስ ለካ፣ ብዛዕባኣ ንምሕንጣጥ ' ካብ ሽዑ ዝያዳ ሕጂ ምመቸአት'  ክብል ምደፈርኩ። 

ዓለምና፣ ንሓጢኣንን ጻድቃንን፣ ሃብታማትን ድኻታትን፣ ሕሱማትን ሕያዎትን፣ ኣመንትን ከሓድትን፣እሱራትን ውጹኣት ሓራን፣ ተንኰለኛታትን ገርህታትን፣ ቀተልትን መሓርትን፣ ጮቆንትን ፍትሓውያንን፣ ዘሞውትን ደናግልን፣ ምሁራትን ጭዋታትን፣ እንስሳታትን ሰባትን ክሓቁፍ ዝኽእል እኹል ጎጆ ኣለዋ። ክንዮ`ዚ`ውን ብስጋ ምስ ዓረፍና ከይተረፈ፣ ኣብ ከርሳ ክትዓቚረና ዘኽእል ኣዝዩ ሃብታም ዝኾነ ውሻጠ ኣለዋ። እቲ ዘገርም ግን፡ ኩሉ ወድ ሰብ ነባሪ ዘይምኻኑ እናፈለጠ፣ ሕልፊ ሰቡ ኣብዛ ዓለም ዝነብር መሲልዎ፡ ናይ ካልኦት ክብርታት ክነጥቕ ይነብር ምህላዉ ኢዩ። እዚአብሔር ድማ ነዛ ኢዱ ዝፈጠረታ ዓለም፣ ሓደ ኣብ ልዕሊ ሓደ በብዕለቱ ክሓንን እኳ ይርኢ እንተሃለወ፡ ምስ ምሉእ ትዕግስቱ፡ መን ይኹን መን ብዘየገድስ፡ እዛ ዓለም ክሳብ`ቲ ዝተመደበላ ዕለት ብዘይ ነግ ፈረግ ንዂሉ ወዲ ኣዳም ክትጸውር ከምዘለዋ በዓንተዉኡ ኣዘዘ። ግዜኣ ኣኺሉ ምስ ኣረገት ግን፡ ከም ሓሙኽሽቲ ክትበንን'ያ። ንዓና ንኹላትና ናብ ዋናኣ ተፊኣ ንፍርዲ ኣሕሊፋ ክትህበና ምኻና ፈሊጣ ድማ፡ እነሃ ብስቕታ ንምጽኣተ እግዚኣብሔር በዓቕሊ ትጽበ`ላ።

እግዚኣብሔር ሕድሕዳዊ ፍቕርን ስኒትን ክህልወና ሓይሉ ይልኣኸልና!!

ሕቱም-መጽሓፍ፣

ኣፍቀርትና እናወሓዱ፡ ጸላእትና እንዳበዝሑ ይኸዱ ኣሎዉ!

በስመ ስላሴ!

ኣፍቀርትና እናወሓዱ፡ ጸላእትና እንዳበዝሑ ይኸዱ ኣሎዉ!

√ ጠንቁ ዘፍቅረና ሰብ ስለዝተሳእነ ኣይኮነን፡ ብሓቅን ብምሉእ ልብናን እነፍቅሮ ስለዘየብልና'ዩ።
√ ጸላእቲ ስለዝበዝሑና ኣይኮነን፡ ልብና እትጸልኦም ስለዝበዝሑ'ዩ።
√ ቁጽሪ ተጻረርትና ስለዝበዝሐ ኣይኮነን፡ ንህልኽ እንምነዮም ኣካላት ባዕልና እንዳብዛሕናዮም ንመጽእ ስለዘለና'ዩ።
√ ቃል ጸላእትና ንከይምቅር ዝገበሮ ወጥሪ፡ ልሳንና ጥዑም ቃል ንኸይተውጽእ ስለዝተሓረማ'ዩ።
√ ኩሉ ኢዱ ዘወጣውጠልና ዘሎ፡ ኣእዳውና ናብ ብዙሓት ስለዝወጣወጣ ኢየን።

√ መን ኣብ ልዕሊ መን ክፈርድ፧

√ ኩሉ ፈራዲ ተዝኸውን ዝፍረድ ምተሳእነ ነይሩ።
√ ኩሉ ተፈራዲ ተዝኸውን ድማ ዝፈርድ እምበይምሃለወን።
√ ፈጣሪ ግን ንኹሉ በብመስርዑ ገይሩ ብጥበቡ መደቦም።
√ ኣብ መንጎና ብዙሓት ዳነይቲ ኣሎዉና፡ ብዙሓት ድማ ተጸበይቲ ፍርዲ ኣሎዉ። ዓይነቶም ጥራይ ኢዩ ዝፍለ።
√ ኩሉና ፈራዶ ኣይኮንና፡ ፈራዶ ዘይክንስና ድማ፡ ብኢደ-ዋኒንና ዝፈረድናዮም ኣካላት መሊኦም'ዮም፡፡ ንሱ እዚ ዝፈረድናዮ ሰብ'ውን ክፈርደና ወይ ኣሕሊፉ ንፈራዲ ክህበና ባይህርያዊ ኢዩ።

√ እምበኣር ፍርዲ ንፈራዲ ንሃቦ። ኣብ መንፈሳዊ ዓለም ንፈራድነት ዝተረቕሑ ኣካላት ኣለዉ፡ ኣብ ማሕበራዊ ዓለም ድማ ንዳንነት ዝተመደቡ ሰባት ኣለዉ። ነዚ ደረጃ'ዚ ክቕመጥዎ ዝኸኣሉ ብዘይፍላጥ እግዚኣብሔር ኣይኮነን። ንሕና ምስ'ዞም ፈራዶ'ዚኣቶም ዘይተመደቡ ኣካላት ክሳብዝኾንና ድማ፡ ኢድና ኣይነወጣውጥ፡ ኣፍና'ውን ኣይንረምጥጥ! ተኸኣልና ግን ንኹሉ ብዓይኒ ፍቕሪ እንዳጠመትና ንተሓጋገዝ፡፡ ተዘይከኣልና ድማ ልብና ጽልኢ ንኽትጭንጉዕ ኣይንደፋፍኣያ ።

√ ጠንቂ ቁጽሪ ጸላእትና እንዳበዘሐ ምምጽኡ፡ እቶም ተጻረርትና፡ ንኽጸልኡና ካልእ ብዙሕ ምክንያታት እካ እንተሃለዎም፡ ናይ ልብና ዘይምህራህ'ውን ንቅርሕንቶም ከምዝንህር ይገብሮ'ሎ።
√ ልብና ብዝጨከነትሉ ቁጽሪ ከኣ፡ ብዝሒ ጸላእትና እናዛየደ ከም ዝኸይድ ይገብሮ ።

√ ክርስትና ናይ ርህራሄ ጎደና እምበር፡ ንዕቀትን ኣሽሙርን እተርእየሉ ናይ መድረኽ ድራማ ኣይኮነን።
√ ክርስትና ንኹሉ ከም ፈጣሪ ብዓይኒ ፍቕሪ እትመዝነሉ መንፈሳዊ መነጸር'ምበር፡ ብሌላን ጉሌናን እትሕመሰሉ ናይ ዓሌታውያን ከይዲ ኣይኮነን።
√ መጽሓፍ ቅዱስ "ነቶም ዝጸልኡና ክነፍቅሮም!" ኣዚዙና፡ ንሕና ደቂ ሰባት ግን እቶም ዝጸላእናዮም ኣካላት፡ "ስለምንታይ ዘየፍቀሩና፧" ኢልና ነጉረምርም።

√ ክርስቶስ ኣምላኽና፡ ንዓና ንእንጸልኦ ሰባት ክሳብ ኣብ መስቀል ምስቃል፡ እረ ክሳብ ናብ ሲኦል ብምኻድ ፍቕሩ ገሊጹ፡ ብቃልን ብግብርን ኣርኣየና። ንሕና ደቂ ሰባት ግን እቶም ዘዋረድናዮም ሰባት ከፍቁሩና ንደሊ።

√ ኣይፋሉን! ንሕና መን ሰዓረ፡ መን በለጸ ኢልና እንተሃላለኸሉ ምኽንያት የብልናን። ልዕሊ ኩሉ እግዚኣብሔር ይበልጽ፡ ኣብ ትሕቲኡ ድማ መርዓቱ ቅድስት ቤተክርስትያን ኣላትና። ኣብኣ ኣእላፍ ቅዱሳን ምስ ቅድስት ኣዴኡ ብሕብረት ኣለዉልና።

ንሕና ኩልና፡ ንሳ እዛ ቤተክርስትያን ምስ ፈጣሪ ስለዘላለየትና፡ "ልዕሊኣ'የ!" ኢልና እንንየተሉ ዓቕሚ የብልናን። እረ ብሓጢኣት ዝዘቕበብና፡ ፍርድን ቁጥዓን እግዚኣብሔር ዝግበኣና እምበር፡ ናብ ቤቱ ክንሳጉምን ንስሙ ክንጽውዕን ዘይንበቅዕ ምኻንና ክርደኣና ኣለዎ። እዚ ተገይርና ድማ ሓጢኣትን ቁስልን ካልኦት ኣይክነድህበሉን ኢና። ሓጢኣትና ረሲዕና፡ ሓጢኣት ካልኦት ንምዕዛብ ናብ ቤቱ ንግስግስ ተሊና ግን፡ ሕማም ክንውስኽ ተዘይኮይንና፡ እንፍወሰሉ መገዲ እንዳጸበበ ክኸይድ'ዩ።

√ ናብ ሕክምና ዝኸዱ ስለስተ ዓይነት ሰባት ኣለዉ።

1) ሕሙም-ክሕከም ዝደሊ!
2) ሓጋዚ ሕሙም- ንመቕረቡ ናብ ሕክምና ወሲዱ ከርእዮ ዝደሊ።
3) በጻሒ- ኣብ ሕክምና ንዘሎ ብጻዩ ክርኢ ዝኸይድ።

ካብዞም ሰለስተ ዓይነት ሰባት፡ እቶም ክልተ (1ይን 2ይን) ይመሳሰሉ።(1ይ) ዝሓመመ ሰብ፡ ሕማሙ ጥራይ ስለዝረኣዮ፡ ኣብ ሕክምና ከይዱ ናይ ካልኦት ቁስሊ ረርእዩ ንክጽየን ልቡ ኣይእዝዞን'ዩ። ብኸመይ ይሓዊ ዝብል ስምዒት'ምበር፡ ናይ ካልኦት ሕማም ዘስተብህል ኣእምሮ ኣይህልዎን'ዩ።
(2ይ) እቲ ንመቕረብ ንሕክምና ከርእዮ ሒዝዎ ዝኸይድ ሰብ'ውን ሕማም ብጻዩ ከም ሕማም ገዛእ ርእሱ ቆጺሩ፡ ብጻዩ እንክቕንዞ ንሱ'ውን ስለዝቕንዞ፡ "ሓወይ ብኸመይ ይሓዊ!" ዝብል ዕላማ ተዘይኮይኑ፡ ኣብ'ቲ ሕክምና ንዘለዉ ካልኦት ሕሙማት ረርእዩ ክፍንፍንን ክጽየንን ሕልንኡ ኣይእዝዞን'ዩ።

√ (3ይ) እቲ ክበጽሕ ኢሉ ንሕክምና ዝኸይድ ሰብ ግን፡ ንዝሓመመ ብጻዩ ክርኢ ምካድ ጽቡቕ እካ እንተኾነ፡ ከባቢኡ ረርእዪ ኣፍንጭኡ ክዓብስ፡ ክጽይን ግን ይረአ። ስለዚ ኣብ ዕላማ መምጺኢኡ ጥራይ ኣተኩሮ ገይሩ ንቤቱ ክምለስ ዘለዎ ተኽእሎ ኣዝዩ ጸቢብ'ዩ። ፐርከስ ጥዑይ ኮይኑ ይኸይድ ስለዘሎ፡ "በቶም ሕሙማት ከይልከም" ዝብል ስግኣት ክሓድሮ ዝተለምደ'ዩ። በዚ ምኽንያት ድማ፡ ዋላ እካ ኣብ'ታ ብጻዩ ዘለዋ ክፍሊ ኮይኖም ብቑስሊ ኣዝዮም ፈጀቕ-ጀቕ ዝበሉ ሰባት ረርእዩ፡ ከይጽየን ትዕግስቲ እንተገበረ፡ ካብ'ቲ ሕክምና ክወጽእ እንከሎ ግን፡ ካልእ ሕሙም እንክርኢ ከይጨንዎ ኢሉ ኣፍንጭኡ ክዓብስ ባህርያዊ'ዩ።

√ እምበኣረከስ ቤተክርስትያን'ውን ሕክምና'ያ። ናብኣ ዝመጹ ኣካላት ድማ ሓጥኣን ምኻኖም ፈሊጦም ክሕከሙ ዝመጹ እምበር፡ ንሕሙማትን ብሓጢኣት ንዝቖሰሉን ሰባት፡ ክዕዘቡ ዝመጹ ኣየድልይዋንን ኢዮም። ንዓኣ ዘድልይዋ፡ ብሓጢኣት ንዝመሽመሹ ደቃ፡ ናብ ቤተክርስትያን ሕዞምላ ዝመጹ ርህሩሃት ሓለይቲ የሕዋቶም፡ ወይ ድማ ዝሓመመ ሰብ ሕማሙ ዘኪሩ ባዕሉ ክሕከም ወትሩ ዝግስግስ ውሉድ ኢያ ትደሊ ቤተክርስትያን።

√ እምበኣር ብመንገድና ኣብ ቤተክርስትያን መጺኦም ዝተሓከሙ ኣካላት ክሳብ ዘየጥረና፡ ብውሕዱ ሓጢኣት ሓድሕድና ዘይኮነስ፡ ሓጢኣት ገዛእ ርእስና እንዳዘከርና ናብ'ዛ መንፈሳዊ ሕምና ንክንሕከም ንገስግስ። ሓጢኣት ካልኦት ርኢኻ ንምጽያን ተኾይኑ ምምጻእና ግን፡ ከይተፈወስናን ሕማም ወሲኽናን ኢና ንቤትና ክንምለስ።

√ ቤተክርስትያን ድማ ነቲ ክሕከም ኢሉ ዝመጸ ኣካል፡ በቲ ዘለዋ መንፈሳዊ ጸጋ ክትፍውሶ ኢያ፡፡ ነቲ ሕሙም ተመሲሉ፡ ልዕልና ቤተክርስትያን ዕሽሽ ብምባል፡ ነቶም ንፍወሳ ዝቐረቡ ደቃ፡ መመሊሱ ክብክሎም ኢሉ ዝመጸ ድማ በቶም ሰማያውያን የዒንታ መምያ፡ በቲ ዝተዋህበቶ መለኮታዊ ስልጣና ገይራ ቆሪጻ ክትድርብዮ ኢያ።

" " ዛቲ ይእቲ ምዕራፍየ፡ ለ ዓለም ፡እስመ ሐረይክዋ ዘየ አኅድር ለዓለም!"
ወስብሐት ለእግዚኣብሔር!
ሕቱም-መጽሓፍ

ኩሉ ፍቑድ፡ ምርጫ ግን ናትና!

በስመ ስላሴ!
ኩሉ ፍቑድ፡ ምርጫ ግን ናትና!

√ ድላይካ ምረጽ ተባሂልና እምበር፡ "ዘዝመረጽክሞ ከጽድቐኩም'ዩ" ኣይተባሃልናን።
√ "ኢድካ ኣብ ዝመእምኣካ የእትዎ" ኢሉና'ምበር፡ "ክልቲኡ ሓጢኣይኮነን" ኣይበለናን።
√ ሰብ ከም ቃሕ ዝበሎ፡ ብፍቓዱ ክነብር ዘየመልክዓሉ ክንሱ ፈጣሪ ግን ናጻ ፍቓድ ሂብዎ ይርከብ።
√ ሰብ ስለዲሞክራሲ ስለመሰል ሰብ ብዙሕ ግዜ ክዛረብ ይስማዕ'ዩ፡ ግን ኮራብሽን ዘይገብር ሰብ ከኣ ፈጺምካ የለን። ብፍጽምቲ ሓቀኛ ዲሞክራስያዊ ኣገዛዝእ ዝገዝእ ግን እግዚኣብሔር ጥራይ'ዩ።

ሓጺር መረዳእታ ብዛዕባ ናጻ ፍቓድ ሰብ፡

√ ሰብ ክውለድ እንከሎ፡ ንዑኡ ንሰብ ንምስራሕ ተባሂሉ ዝተኸናወነ ነገራት ኩሉ ብምርጭኡ፡ "ከምዚ ይሕሸኒ፡" ኢሉ መሪጹ ዘምጽኦም ኣይኮኑን። ከይፈለጠን ብዘይፍታዉን ደኣ ናብዛ ዓለም መጸ፡፡ እቲ ዝሰርሖ ፈጣሪ ድማ በንጻሩ፡ባዕሉ ንሰብ ሰሪሕዎ ከብቅዕ፡ ከም ባዕሉ ዝተሰርሐ ንብረት፡ ከም ደስ ዝበሎ ክነብር ፍቓድ ሂብዎ። ከም ሓደ ዝተሰርሐ ኣቕሓስ፡ ምሉእ ፍቓድ ናይ ህላዌኡ ካብ ዋንኡ ክቕበል እንከሎ ማለት'ዩ። መቸም ሓንቲ ዝሰራሕካያ ንብረት ኣብ ድላያ ክትቕመጥ ስልጣን ኣይትህባን ኢኻ። ኣይኮነን ንንብረትሲ፡ ንእንሲሳ እካ "ድላያ ትግበር" ኣይትብላን። እግዚኣብሔር ግን ባዕሉ ዝሰርሖም ንብረቱ ክንስና ከም ማዕሪኡ ኣብ ሕይወትናን ሞትናን ናጻ ፍቓድን ሓላፍነትን ሂቢና ይርከብ።

√ ኣዳም ዝተፈጥረ፡ ንምፍጣሩ ባዕሉ ብዘቕረቦ ጥርዓን ኣይኮነን፡ ወይ ኣማኻሪ ኮይኑ ንፈጣሪኡ ብዛዕባ ተፈጥርኡን ኣፈጣጥርኡን ዝገበሮ ኣበርክቶ ዋላ ቅንጣብ ትኹን ሓገዝ የለን። ፈጣሪ ግን ነቲ ባዕሉ ብፍቓዱ ዝፈጠሮ ኣዳም፡ ምሉእ ፍቓድ ሂቡ፡ "ካብዚኣ ከይትበልዕ፡ ተበልዒኻ ግን ክትመዉት ኢኻ" ብምባል ናይ ምብላዕን ዘይምብላዕን ክልቲኣዊ ደሞዘን ብምኽሪ መልክዕ ገይሩ ሓበሮ።

√ ስለዚ ንሕና ፍቓዱ ንምምላእ እንተነበርና ይሕጎሰልና፡ ዓስቢ ድማ ንቕበል፡፡ ፍቓዱ ብፍቓድና ንምጥምዛዝን፡ ንዑኡ ንዘይምእዛዝንን እንተተቓለስና ግን ናጽነት እካ እንተሃለወና፡ እግዚኣብሔር ክሳብ ዘይተሓጎሰሉ ደሞዝ ናይ ዘይምእዛዝና ከምንቕበል ርጉጽ'ዩ።

√ ሓሰማ ተሓሲምናያ ዘይኮንናስ ፈጣሪ'ዩ ንኸይንበልዓ ኣዚዙና። ስለምንታይ ከምኡ ኢሉ ኣዘዘ፡ ንዑኡ ይምልከት! ልዕሊ እቲ ንሕና ኣብ ሰብነትና እንገብሮ ሓልዮት፡ ልዕሊ ዕጽፍታትና ንሱ ከምዝሓልየልና ግን ንኣምን።
√ ስጋ በቕሊ ፈንፊናዮ ዘይኮንናስ ንፈጣሪ ከነሐጉሶ ስለዝደለና ኢና።
√ ስጋ ኣንጭዋ ስግድ-ግድ ስለዝብለና ዘይኮነስ ፈጣሪና' ዩ "ኣይትደልይዎን ኣይጠቕመኩምን ኢዩ፡" ኢሉና።
√ "እነገሊኦም በሊዖሞ፡" ኢልና ኣይንበልዕን፡ እነገሊኦም ጸሊኦሞ ኢልና'ውን ኣይንጸልእን። ንፈጣሪ ከነሐጉስ ግን ኩሉ ዘዝበለና ንምግባሩ ንጽዕት ኣለና። ሰብ ገይርዎ ኢልና ዘይኮንናስ፡ እግዚኣብሔር ገይርዎ ኢልና ኣሰሩ ክንክተል ንጽዕር።

√ "ገሊኦም ስጋ ገበል በሊዖም" ኢልና ኣይንረግሞምን፡ ንሕና ስለዝተሓረምናዮ ድማ መንግስተ ሰማያት ዝወረስና መሲልና ብትዕቢት ኣይንውጥረናን። ዓስቢ ከምዘሎ ግን ኣይንስሕቶን።

√ ቤተክርስትያን ዝበለትና ኩሉ ከነተግብር ንጽዕት፡ ንሳ እትጸልኦ ዘበለ ድማ ንጸልእ። ንሳ እንተኸልኪላ፡ ንሕና ንኽልከል፡ ንሳ እንተፈቒዳ ድማ ፍቓዳ ንመልእ።
√ እግዚኣብሔር ንቤተክርስትያን ኩሉ ዘድሊ ምግባረ ጽድቂ ምሂሩዋ'ዩ፡ ንሳ'ውን ከከም ዓቕምና በብዝከኣላ መዳይ፡ ካብ ፍልጠታ ትዕድለና ኣላ። እሞ ዘይለበመ እንተሎ ናብ ቤተክርስትያን ይምጻእ እምበር፡ ዝለበመ መሲልዎ ንቤተክርስትያን ከለብማ ኢሉ ኣይምጻእ።

√ ማለት ማንም ሰብ ሓሳቡ ክሳኻዓሉ ኢሉ ንሓሳብ ቤተክርስትያን ክለዋውትጥ ከይሕልን። ስጋ ሓሰማ "ይጠቕመኒ'ዩ" ኢሉ ክበልዕ ዝደለየ ሰብ ይብላዕ፡ ንቤተክርስትያን ግን "ብልዑ ኢልኪ ፍቐድልና" ብምባል ክሓባብላ ኣይፈትን።
√ ንዓና ዘድልየና ኩሉ ልዕሌና ንሱ ፈጣሪና ይፈልጠልና'ዩ፡ ቤተክርስትያን ድማ እዚ ሓበሬታ'ዚ ብምሉኡ ካብ ኦሪት ክሳብ ሓዲሳት፡ እንኮላይ ብተውፊታት ኣብ ሕጋ ስፉር ኢዩ።

√ ንቤተክርስትያን "ስጋ ሓሰማ፡ ስጋ ኣንጭዋ ክንበልዕ ፍቐድልና!" ዝብል ምሕጽንታስ፡ ከመይ ዝበለ ድፍረት'ዩ። ስጋወደሙ ናይ ክርስቶስ ዝቐመሰ ከርሲኸ ወደይ፡ ስጋ ሓሰማ ስጋ ገበል ከተእትወሉ፡ ከመይ እቲ ከርሲ ክሰማምዖ ይኽእል፧

√ ልክዕ'ዩ፡ እግዚኣብሔር "ንኹሉ ቀዲስዎ ኢዩ" ተባሂሉ ተጻሒፍልና ኣሎ። ነገር ግን ክርስቶስ ንሓሰማ ከንጽሕ ኢሉ ከምዘይመጸ ንፈልጥ ኢና። ንገበል፡ ንተመን ንኣራዊት ከንጽሖምን ክሓጽቦምን ኢሉ ኣይኮነን ደሙ ኣፍሲሱ። ንሳቶም ሲኦል ኣይሰማምዕም፡ መንግስተሰማይ ኣይምልከቶም። እግዚኣብሔር ክፈጥሮም እንከሎ ከምዘይተጋገየን፡ ክፈጥር እንከሎ፡ ኣብ ነፍሲ-ወከፍ ስርሑ ሕጉስ ከምዝነበረን ግን ንኣምን። ቀንዲ ዕላማ ናብዛ ዓለም መምጺእኡ፡ ንሰብ ንምድሓን እምበር ንእንሲሳ ተስፋ መንግስተ ሰማያት ንምእታው ኣይኮነን።ብሕጂ እንጽበዮ ተስፋ ምጽኣቱ'ዉን፡ ንሰብ ንምፍራድ እምበር፡ ዓስቢ ዝወስዱን ዓስቢ ዝንፈጉን እንሲሳታት ክፈላሊ ኢሉ ኣይኮነን ክመጽእ።

√ ኣንታ ክቡር ሓወይ! ሐራይ፡ ሓሰማስ " ሕጂ ነጺሓ'ያሞ ንብልዓያ" በልካ፡ ላምከ ጻድቕ ነይራ ማለት ድዩ፧ዶስ ርኽስቲ እንከላ ኢያ ትብላዕ ነይራ፧
√ ኩሉስ ነጺሑ በልኩምና፡ ጤለ-በጊዕ ግን ሓጢኣት ኣይሓለፎምን ጸኒሑ ማለት ድዩ፧
√ ዶስ ዝሓጥኡን ዘይሓጥኡ ስለዝነበሩ ኢዮም፧
√ ኦይ ኣንቱም ሰባት፡ እግዚኣብሔር ንሰብ ንምድሓን ሰብ ኮነ እምበር፡ ንእንሲሳ ንምንጻሕ ደሙ ኣየፍሰሰን። ምላልባሽ ቅዱስ ስጋኡን፡ ክቡር ደሙን፡ ንኩሉ ክባርኽ እጃም ዘይነበሮ ኣይኮነን። ከምቲ ክፈጥር እንከሎ ቅልጽሙ ኣብ ኩሉ ፍጥረቱ ዋንነት ዘለዋ፡ ደሙ ክፈሲስ እንከሎ'ውን፡ እቲ ናትና ካባና ዝተወስደ ስጋ፡ ኣብ ኩሉ ፍጥረት፡ ፈጣርያዊ ዋንነት ብተዋህዶ ስልጣን ረኸበ። ስለዚ እቲ ዝፈስስ ዝነበረ ደም ናይ ፈጣሪ ደም'ዩ፡ እቲ ዝተቖርሰ ስጋ ድማ ኣብ ልዕሊ ኩሉ ፍጥረት ስልጣን ዘለዎ ኢዩ። ዋና ነገሩ ግን ንሰብ መንግስተ ሰማያት ንከአቱ እምበር፡ ነቶም ተስፋ መንግስቱ ዘይምልከቶም ፍጥረቱ ኢሉ ኣይኮነን ፈጣሪ ዝደመየ።
√ እንሲሳኸ መንግስሰማይ'ዶ ይወርስ'ዩ፧
√ ኣይፋልን፡ ንሳቶምሲ ይሓልፉ እምበር ኣይወርሱን'ባ።

√ እሞ "ኩሉ ብክርስቶስ ነጺሑ'ዩ" ዝብል ምኽኒት ከም ኣምጻኹምልና ደኣ፡ ልዕሊ ማንም ሰብ ብደም ክርስቶስ ነጺሑ ኢዩ'ሞ፡ ስጋ ሰብ ውን ብልዑ በሉና፡ ሓደ ኣፉ ሓቢርና ስጋ ሓድሕድና ክንበልዕ ማለት'ዩ።
√ እረ "ልዕሊ ኹሉ ዝነጸሐ" ተባሂሉ ዝንገር ክነግረኩም፡ ሓደ ብንስሓ ተሓጺቡ፡ብቅዱስ ቁርባን ዝተሓትመ ሰብ'ዩ። እሞ ነዚኸ ብስጋ ዓሪፉ ምስ ጸንሓና፡ "ክርስቶስ ኣንጺሕዎ ኢዩ" ኢልናዶ ንብልዓዮ፧
√ እዝጊ ኦ፡ ለቱ ስብሐት! ንስኻትኩም ደለኹም ግበሩ እምበር ንሕናስ ኣይንውዕሎን። ተተኸኣለና ድማ ክኒኡ ሓሊፍና ካብ ምሕማይን ንሰብ ካብ ምቁንጻብን ክንቆጠብ ንቃለስ እምበር፡ "ነጺሑ'ዩ" ኢልናስ ስጋ ሰብ ኣይንበልዕን።
√ ስጋ ሓሰማ ዝለመደ ከስዐ ግን ስጋ ሰብ ንኸይበልዕ ምኽንያት ኣይረክብን።

√ እምበኣረከስ ኣይፋሉን! ኩሉ እካ ብደም ክርስቶስ እንተተሓጽበ፡ ንሰብ ዝጠቕሞን ዘይጠቕሞን ነገራት ግን ኣሎ።
√ ንሕና "ቤተክርስትያን ነዞም ዝብልዑን ዘይብልዑን፡" ኢላ ዝፈለየቶም ብልዕታት፡ "ስለምንታይ'ዩ፡ እንታይ'ዩ መልእኽቶም!" ንምፍላጥ ተኾይኑ፡ ብትሕትና ደኣ ክንሓታ የምሕረልና እምበር፡  ካብ ቤተክርስትያን ዝተወለድካ ሰብ ክንስኻ፡ ልዕሊ ቤተክርስትያን ዝኾንካ መሲልካ ንሕጋ ክትቅይር ምህቃን ድፍረት'ዩ። 

√ ምላልባሽ ቤተክርስትያን ግን ነዞም ናይ ስጋ ብልዕታት ርኽሰት ሒዞም ስለዝተፈጥሩ ወይ ድማ፡ እግዚኣብሔር ክፈጥሮም እንከሎ ተጋግዩ ስለዝፈጠሮም ኣይኮነትን ዝኸልከለትና። ንዓና ስለዘየድልዩና ኢዮም። እግዚኣብሔር "እዚኣቶም ንዓኻትኩም ርኹሳት ይኹኑኹም፡ ኣየድሊኹምን ኢዮም።" ኢሉና ኣሎ። ንዑኡ ንሰራሒኦም ግን ተጋግዩ ዝፈጠሮም ክሳብ ዘይኮኑ፡ ዘጣዕስዎ ኣይኮኑን "ኣይፋሉን የድልዩና ኢዮም" ኢልካ ብህልኽ ምትንሳእ ግን፡ ንእግዚኣብሔር ክትእርሞን ከተማኽሮን ኢድካ ምውጥዋጥ ኢዩ።

√ ኦ ህዝበ ክርስትያን ተኾነ፡ ስጋዊ ብልዒ ኣብ መንግስተ ሰማይ ስለዘየብጽሕ፡ ህይወትና ብትሕርምቲ ተሕለፍናዮ ይምረጽ። ፐርከስ እዚ እንሃርፎን ልዕሊ መጠን እንብህጎን ብልዒ፡ ገና መንግስተ ሰማይ ከየብጸሐ፡ እረ ድሕሪ ዝተወሰነ ሰዓታት ቀልቀል ኮይኑ ብምኻድ፡ ኮንትነት ስጋዊ መግቢ ባዕሉ ኣፍ ኣውጺኡ ገና ካብ ቁልዕነትና ኣትሒዙ እንዳመስከረልና ኢዩ። እዚ ድማ ስለቲ ሰማያዊ ብልዒ፡ ማለት ቃሉ፡ ምስጋናኡ፡ ጾም-ጾሎት፡ ምምጽዋት፡ ዕሽር ምሃብ፡ ዓቕምና ዝኾነ ትሕርምቲ ምዝውታር፡ ንስሓ ቁርባን ዓቕምና ሱባኤ፡ እዚእታት እንዳገበርና ንክርስቶስ ኣብ ልብና ከነንግሶ፡ ስለመንግስተሰማይ ቀዳምነት ሰሪዕና ክንሓስብ ኢዩ ዝግበኣና። ተዘይኮነ ግን፡ ምስ ዝተጋገዩ ኣይንጋገ፡ ስጋ ሓሰማ ክበልዑ ስለዝረኣና ንቤተክርስትያን ከምዝተጋገየት ገይርና ብምሕሳብ ኣይንዳፈራ።

√ ነፍሲ-ወከፍ ሰብ ናይ እግዚኣብሔር መሕደሪ ንክኸውን ደኣ ይጽዓር'ምበር፡ ፍቓድ ቤተክርስትያን ንምቅላል መሕደር ኣጋንንቲ ኣይኹን።
√ እዚ ድማ ክርስቶስ ዘይሓደራ ሰብነት፡ ሰይጣን ክካረያ ግድነት ስለዝኾነ'ዩ።

ወስብሐት ለእግዚኣብሔር!

ንሕና ኣብ ቤተ ክርስትያን መን ኢና?

በስመ ሥላሴ! 
ንሕና ኣብ ቤተ ክርስትያን መን ኢና?

√ ንሕና ኣብ ቤተ ክርስትያን ተምሃሮ እምበር መምሃራን ኣይኮንናን።
√ ንሕና ኣብ ቤተክርስትያን ሓጥኣን'ምበር ጻድቃን ኣይኮንናን።
√ ንሕና ንቤተክርስትያን ብጽሞና እንሰምዓን እንኣምናን እምበር፡ ከነእምናን ክንምልሰላን ኢልና ኣይንህንደድን።
√ ንጎይታና ብመንገዳ ንምህጾኖ እምበር፡ ንሳ ብመንገድና ዘይተማህጸነቶ ኢልና ኣይነዕገርግርን።
√ ኩሉ ዘለና ሃብተ መንፈሳዊ ካብኣ ተቐበልና እምበር ፡ ንዓኣ እንውስኸላ ሃብቲ ዘሎ መሲልና ምስ ልዕሊ ዓቕምና ኣይንወዳደርን። ቅንጣብ ትኹን'ውን እንውስኸላ የለን።

√ ብርግጽ በቲ ናታ ሓይሊ ብዙሓት ቲፌዞ ኣጥሪና ኢና፡ እዚ ገበን'ዩ፡ ብሕገ-ፈጣሪ ይኹን በሕገ-ተፈጥሮ'ውን የሕትት'ዩ። ስለዚ ነዞም ናትና ዝገበርናዮም ከይወዓልና ከይሓደርና ንቤተክርስትያን ነረክቦም። እምበርከስ ናታ እምበር ናትና ኣይኮኑን። ንሕና ኣብ ቅድሜኣ ባዶ ምኻንና ተረዲእና ብጸጋኣ ክንመልእ ንጽዕት'ምበር፡ ዝመለአ ሰብነት ዘለና መሲልና ካብ ሑቕፋ ስድሪ ኣይንፍተትን።
√ ንሕና ንቤተክርስትያን ንሓታን ብመልስታታ'ውን ብምሉእ ልብና ንዓግብን'እምበር፡ በቶም ንሳ ዘላለየትና መጽሓፍትን፡ ባዕላ ዝመሃረትና ሕጋጋትን ገይርና፡" ከነረድአ ፡ ክንምህራ ክንውጥራ" ክንብል ኣይንደፍርን።

√ ብሕጋ ንቕየድ እምበር፡ ብሕግና ክትቕየደልና ኢልና ኢድና ኣይነወጣውላን። "ደጊም ቅድስነኣ ፈሪሱ'ዩ" ብምባል ሰይጣን ይጻረራ ብምህላዉ ዘገርም ይመስል። ንሳ ግን ካብ ጥንቲ፡ ብሕገ ልቦና ጀሚራ ካብ ፈጣሪኣ ፈጺማ ኣይተፈልየትን። ይጻረራ ምንባሩን ክሳብ ሕጂ እረ ክሳብ ምጽኣት ካብ መንቀኝነቱ ከምዘይዓርፍን'ውን ትፈልጥ' ያ።

√ ብፍላይ ናይ ኤርትራ ኦርቶዶክስ ተዋህዶ ቤተክርስትያን፡ ምስቲ ዝነበረ ደጋዊ ምትእትታው ዝነበራ ተጽዕኖታትን ተጻብኦታትን ከይተሓለለት፡ ኣብ ሕገ ልቦና፡ ንለባውያን ብቕድስናኣ ኣለቢማቶም። ኣብ ፍላመ ናይ ሓዱሽ ኪዳን፡ ንድግል ማርያም ምስ ወዳ በቲ ዘየጥፈአቶ ክብራ ገይራ ኣእንጊዳቶም። ኣብ ዘመነ ምህዞን ሰንዓን ፊደላት፡ ቅድሚ'ተን ጥንታውያን ሰብ ፊደል ተሰሪዓ ብምጽናሕ፡ ነቶም መሃዝቲ ፊደል ድሕረ ምንጻፍ ሒዛ ጸንሓቶም እሞ፡ ካብቲ ናታ ድሕረ-ባይታ ተበጊሶም "ካዕብ፡ ሳልስ፡ ራብዕ፡ ኀምስ፡ ሳድስ ሳብዕ" ኢሎም ክፈላሰፉ ኣተባበዐቶም። ብግዜ ሰማእታት፡ ንጽሕቲ መዕቆቢት ደብረ-ቅዱስ ኮይና ንብዙሓት ቅዱሳን ሓቖፎቶም። ኣብ ዘመነ ቱርኪ ን 300 ዓመታት ብንጽሕናኣ ተቓሊሳ መኪታን ሰዓረቶም። ዓቕሞም ተሓለለ'ምበር ኣየፍረስዋን!ከመይ ኢሎምከ ንቅድስናኣ ክደፍርዎ፧ ኣብ ዘመነ ጥልያን ብፍጽምናኣ ክሳብ 50-60 ዓመታት ሞጊታቶም።

√ እሂ! የለዉን ድዮም እንሕበነሎም ኣብነታውያን ቅዱሳን ኣኣብ'ዚ ዝተጠቕሰ ዘመን፧ ማለት ካብዛ ናይ ኤርትራ ኦርቶዶክስ ተዋህዶ ቤተክርስትያን'ዚኣ ማለተይ'የ፧ መሊኦም'ባ! ኣብ ዘመነ እንግሊዝ፡ ብዶግማውን ተውፊታውን ፍጹምን ቅዱስን ዝኾነ ባህሪኣ ገይራ ንምንፍቕናዊ ሽበራኦም ረቲዓቶ'ያ። ቅድስናኣ ግን ክሳብ ሕጂ'ውን እንተኾነ ኣይተበረዘን። ን300 ዓመታት ዝኣክል " ኣብ ትሕቲ ግብጺ ስለዘይተቖረንኪ ቅድስና የብልክን" ኢሉ ፈጣሪ ኣይነቐፋን። ኣብ ዘመነ ቱርኪ ማለት'ዩ።  ን50-60 ዓመታት ኣብ ትሕቲ ኢትዮጵያ ስለዘይነበርኪ" ኢሉ ኣመኻንዩ ፈጣሪኣን መርዓዊኣን ቅድስንኡ ኣይነፈገላን። በንጻሩ እኳ ደኣ ኣብዚ ዝተጠቕሰ ዘመናት፡ ካብተን ከምኣ ዝኾና ኣሐታ ዘይሰንፍ በረኸት ከምዘውሓዘት ንፈልጥ ኢና። ብዙሓት ካብቲ ዘይነጽፍ መንፈሳዊ በረኸታ ከምዝተባረኹ ዕድሜና ዝምስክሮ ሓቂ'ዩ። በረኸቶም ድማ ክሳብ ሕጂ ኣሰር ኮይኑ ብዓይንና ይረኣየና እንዳሃለወ ክንክሕዶ ኣይከኣለናን።

√ ከምኦም፡ ከምዞም ኣብ'ዚ ዘመናት'ዚ ዝተጠቕሱ ቅዱሳን፡ ብስማ ከምእንቕደስ ተስፋ ንገብር እምበር፡ ንሕና ምስዝሓከሉ ኣይንሕክልን፡፡ ብድፍረት ድማ ብልሳነ ኣጋንንቲ ገይርና ኣይንዝልፋን።
√ ንሳ ንዓና ዝቕድስ እምበር ዘጸይን ባህርይ ስለዘየብላ ኣይንጽየፋን።
√ ርግጽ'ዩ፡ ሰይጣን ንቤተክርስትያን ከምዝጽየና ንፈልጥ ኢና። ብመንገዲ ካህናት ዝወሃብ ባርኾት ከምዘይፍተዎ'ውን ይርደኣና ኢዩ። እቲ ካብ እግሪ ጳጳሳት፡ ኤጲስቆጶሳት ቆሞሳት ቀሳውስት ዝፈስስ ወሓዚ መንፈሳዊ ባርኾት ጸርጊፍዎ መታን ከይከይድ ስለዝፈርሕ'ዩ ከኣ፡ ሰይጣን ናብ ቤተክርስትያን ቀሪቡ ክብሪ ክህባ ዘይደሊ። ብማዕዶ ኮይኑ ግን በንጻሩ ንልኡኻታ ክነቕፎምን ከናሽዎምን ይብረሆ።

√ ጠንቁ እቶም ኣቦታት ስለዝበርትዕዎ ጥራይ ኣይኮነን፡፡ እዞም ልኡኻታ ኣብታ ቤተክርስትያን ምህላዎም ንዑኡ ነዚ ርኹስ መንፈስ እኹል ዘባህርር ሓይሊ ኢዩ።
ንሕና ግን ከም ቅዱሳን መልኣኽቲ ናብ ውሽጣ ክንእከብ ንፈቱ እምበር፡ ከም ኣጋንቲ ማዕዶ ማዕዶ ኣይንብልን።

√ እሞ ንሕና ሓይሊ ቤተክርስትያን ከምዘይደኸመ ንኣምንን ንምሕጸንን እምበር፡ ከም ሰይጣን ኮይንና ንክብራ ንምንሻው ልሳንናን ልቦናናን ኣሕሊፍና ንጸረ ሰናያት ኣይንህብን።
√ ተኸኣልናስ ነቲ ካብ ታተ ኣሳጉማና ኣጀሚራ ክሳብ ብደውና እንረግጽ ዘሳለየትልና በዓልቲ ውዕለትና ቤተክርስትያን ነመስግናን ንምስክረላን እምበር፡ "ረኺሳ ኢያ" ኢልና ልሳንና ኣብ መስቀል ናይ ዝተኣስሩ ኣጋንንቲ መሳርሒኦም ክትከውን ኣሕሊፍና ኣይህብን።

√ ተረኺሳኮ ናትና ቅድስና'ውን ኣይሕሰብን ዩ። ብጥምቀት ዝተቐበልናዮ ጸጋ ኣይሕሰብን። ዝተሸምናዮ ሽመት ኣይሕሰብን። ዝተማሃርማዮ ትምህርቲ ኣይሕሰቡን።እሞ ከምኡ ተኾይኑ፡ ንዮ ኣብቲ ማዕዶ ኬድና ምጥማቕ ከድልየና ዩ። ሽመትና ተዘይተሓሲቡ'ውን ከምበሓድሽ ምሻም ከድልየና'ዩ። ከመይ ኢልናኸ ረኺሳ ኢያ ኢልና ደፈርና፧ ቤተክርስትያን ግን 10 ዓመት ይኹንሲ ንሓንቲ ሰከንድ እዉን ትኹን ክብራን ቅድስናኣን ከምዘይቀነሰት ንኣምን ንእመንን እምበር፡ ብምኽሪ ድያብሎስ፡ ንድያብሎስ ከነሐጉስ ክንብል ዝሃበትና ሕሉፍ ክብርታት ኣሕሊፍና ንርኽሰት ኣይንህብን።ተኸኣልናስ ብተጋድሎኣ ንጸናናዕ፡ ብተስፋኣ ድማ ንጸንዕ'ምበር ጥሪት ከንቱ ንምርካብ ምስቶም ከንታውያን ጸላእታ ኣይንሓብርን።

√ ንሕና ኣብ ቤተክርስትያን ኣብ መስቀል እምበር፡ ኣብ ሶፋ ከምዘይምህላውና ንፈልጥ፡፡ ስለዚ መከራ ቤተክርስትያን የሕመና፡ ኣብ ውሽጣ ኮይና ድማ ንቕንዞዎ።ብትዕግስታዊ ቃንዛኣ ገይራ፡ ማዕረ'ቲ ዝተዓገስናዮ ከምትናዝዘና ድማ ንኣምን። ምቾት ቤተክርስትያን'ውን ይምችኣና'ዩ፡ ኣብ በዓላታ ከኣ ብፍሰሃ ብሐሴት ሓቢርና ምስኣ ንዝምር እምበር፡ መከራኣ "ኣሕሚሚኒ" ኢልና ኣይንጠልማን፡ ምቾታ "ጥዒሚኒ" ኢልና'ውን፡ መጋበሪ ስጋዊ ጥቕምና ኣይንገብራን።

√ ንሕና ቤተክርስትያን ኩሉ ከምዝገበረትልና ንኣምንን ነመስግንን እምበር፡ ብምሒር ስጋዊ ሲሰዐ፡ "ጥቕማ-ጥቕሚ ከም ዝተነፍገና" ኮይንና ካብ ቤተክርስትያን ኣይንሕክልን። ንዝተመነናዮ ዝሰኣንናዮ መሲልና ኣይንዝልፋን።
√ ንዝረኸብናዮ ብቕልጽምና ዘምጸናዮ መሲልናውን ንንየተሉ ዓቕሚ የብልናን።
√ ብምኽኒት ንውድሳ እምበር፡ ብምኽኒት ኣሕሊፍና ንጓና ኣይንህባን።

√ ንሕና እቲ ትማል ኣብ ቅድሚ ኣውደምህረታ" ህዝበይ መሃሩ" ኢላ ቃላ ምስ ሃበትና ዝነበረና ኮልቶፍ-ቶፍን ወታእታእን፡ ንሳ እተርእየና ዝነበረት ትዕግስትን ዓቕልን ዘዘኪርና ነመስግን'ምበር፡ ጨሪስና ሕጂ-ሕጂ ካብ ሰማይ ከም ዝወረዱ መላእክት መሲልና ልዕሊኣ ሊቅ ክንኮነላ ኣይንህቅንን።
√ከመይ ኢልናኸ ክንደፍር!

√ ስለዚ ማንም ወዲ ቤተልርስትያን፡ ንቤተክርስትያን ልዕሊኡ ምኻና ይእመን። ድያብሎስ ንዕቤታን ኣገልገልታን ክወቅስን ከናሹን ካብ ዝጅምር ነዊሕ ኣቕጺሩ'ዩ። ክንዮ'ዚ'ውን ንሱ እቲ ጸረ-ሰናያት፡ ንደቂ ቤተክርስትያንን መራሕታን ክውድሶምን፡ ዝናኦም ከም ናይ ዓለማውያን ልዕል-ልዕል ከምሎን ንጽበ ተሊና ጨሪስና ተጋጊና ኣለና። ሰይጣንሲ ተተኻእሎ'ኳ ንቤተክርስትያን ተወር ኢሉ ዝኸይድ ሰብ ከይህሉ ኢዩ ሕልሙ። እሞ ማንም ወዲ ቤተክርስትያን ውዕለቱ ክመልስ ኢሉ ናብዛ ቤት ይገስግስ እምበር፡ ደቃ ከባርር ኢሉ ከይመጽእ።
√ ደቃ ከነባርር ተኾይኑ ዕላማና ግን ኣይንምጻእ ንግደፎ፡ እምበርከስ ናይ ነፍሲ ወከፍ ዝጠፈአት በጊዕ ክርስቶስ ተሓተትቲ ምዃንና ኣይንዘንግዓዮ።

√ ይዝከረኒ ወዲ 7-9 ዓመት እንከለኹ። 1992-1993 ኣቢሉ ይኸውን ካህን ክመጽእ እንክንሪኢ እንዳጎየና እግሩ ንምስላም ንቀዳደም ምንባርና ኣጸቢቑ ይዝክትሮ'የ። ንሕና እቶም ህጻናት ዝነበርና ጥራይ ዘይኮንና'ውን፡ እንኮላይ እቶም ዓበይቲ ዝነበሩ ከይተረፈ፡ ነቶም ካህናቶም ፍጹም ክብሪ ከርእዩ እግሮም እንክሳለሙ ብዓይነይ ዝረኣኽዎ ኣጸቢቐ ዝዝክሮ'ዩ።
√ ሎሚ ንሕና ተተኸኣለና ነዚ ክብሪ'ዚ ክንዕቅቦ ንጽዕር'ምበር፡ ንዘይተበረዙ ክብርታታ ክትብርዝ ምህቃን "ናይ ለባማት ባህርይ'ዩ" ኣይንብል፡፡ በንጻሩስ ክብሪ ቤተክርስቲያንን ክብሪ መራሕታን ምብራዝ ናይ ኢኣማንያን ጠባይ ምዃኑ ንፈልጥ።

√ስለዚ ኣመንቲ ንኹን!

√ እምበኣር ንሕና፡ ቤተክርስትያን ንዝወለደቶም ክቡራት ኣካላት፡ ካብ ህጻናቶም ጀሚርካ ክሳብ ዓበይቶም ውሉዳ፡ ኣኽበርትን ኣብ ቅድሜኦም ትሕት እንብልን ክንከውን'ምበር፡ "ቅድም ንሳቶም ተዘየኽበሩና" ኢልና ብትዕቢት ክንውጠር ግቡእ ኣይኮነን። ተገበርናዮ'ውን ንርገም እምበር ኣይንምረቕን። ክርስቶስ ኣሽንካይ'ዶ ንደቁ፡ ንኹሉ ብምስሉ ዝተፈጥረ ሰብ ከነኽብሮ፡ ከነፍቅሮ ጸውዒና' ዩ፡፡ ጻውዒት ጥራይ ዘይኮነ ድማ ኣዚዝና'ዩ።
√ ንሕና ድማ ዘይከበረ እንተሎ ክብሪ ቤተክርስትያን ከነርእዮ ኢልና ሃሰው ንበል እምበር፡ ነታ ብክርስቶስ ዝኸበረት ቅድስት ቤተክርስትያን ከነዋርድ፡ "ትሕተይ ዘይተምበርከኸት ኢልና "ኢድና ከነወጣውጥ ፍጹም ድፍረት 'ዩ።

እግዚአብሔር ኣጽራረ ቤተክርስትያንን ሓይሎምን የድክመልና።
ወስብሐት ለእግዚኣብሔር

ተልእኾና እንታይ'ዩ፧

በስመ ስላሴ።

ተልእኾና እንታይ'ዩ፧

√ተልእኾና ምስ ቤተክርስትያን ኮይንና ንመናፍቓን ንምስዓር እምበር፡ ምስ መናፍቓን ሓቢርና ንቤተክርስትያን ከነፍርስ ኣይኮነን።
√ ተልእኾና ኣብ ጎድኒ ቤተክርስትያን ኮይንና፡ ንቤተክርስትያን ልሳን ክንኮና እምበር፡ ኣብ ጎድኒ መናፍቓን ኾይንና ኣንጻራ ክንስለፍ ኣይኮነን።

√ ተልእኾና ብልዳታ ኣቲና ድምጻን ምኽራን ክንሰምዕ እምበር፡ ብሑጛኣ ተቐልቂልና ድምጽና ከነስምዓላ ኣይኮነን።

√ተልእኾና ምስ'ቶም ቤተክርስትያን እትሕጎሰሎም ኣካላት ኮይንና፡ ንጸላእታ ንምሽናፍ ክንዘርየላ እምበር፡ ምስ'ቶም ጸላእታ ዓጢቕና ናይ ተጻረርታ ዘረይቲ ክንኮውን ኣይኮነን።

√ ተልእኾና ንቤተክርስትያን ንምሕጛስ እምበር ንመናፍቓን ንምሕጛስ ኣይኮነን።
√ተልእኾና ተንኮል ኣጋንንቲ ተረዲእና ልሳን ናይ ቤተከስትያን ንምኻን እምበር፡ ልሳን ኣጋንንቲ ኮይንና ንዓኣ ንምፍራስ ኣይኮነን።
√ "ቤተ ክርስትያን ዝሕደስ ነገር ኣለዋ" ዝብሉ ኣካላት ኣለዉ፡ ቤተልርስትያን ድማ፡ "ዝሕደስ ነገር የብለይን!" ትብሎም። ስለዚ ንሕና ምስኣ ኮይንና ድምጻ ከነስምዖም እምበር፡ ምስኣቶም ኮይንና ድምጾም ክነስምዓ ቅኑዕ ኣይኮነን። ዝኾነ ይኹን ብዘየገድስ፡ ካብ ጸላእቲ ቤተክርስትያን ዝመንጨወ ነገር፡ ንቤተክርስትያን ዘቃልልን ዘፍርስን እምበር፡ ንቤተክርስትያን ዝጠቅም ገይርና ከይንሓስቦ።

√ተልእኾና ነቲ ንቤተክርስትያን ከፍርስ ዝህንደድ ዘሎ ሓይሊ ጸላኢ ንምድካም'ምበር፡ ምስኡ ተዓጢቕና ንቤተክርስትያን ንምፍንጣሕ ሆ ክትብል ቅኑዕ ኣይኮነን።

√ ተልእኾና ምስ ቤተክርስትያን ኮይንና ነቶም ዝጠፍኡ ደቃ ክንእክቦም እምበር፡ ምስቶም ጸላእታ ኮይንና ነቶም ዘለዉ ደቃ ክንብትኖም ቅኑዕ ኣይኮነን።

√ተልእኾና ነታ ካብ ጎድፍ ናይ ሓጢኣት ኣልዒላ ኣብዚ ደረጃ'ዚ ዘብጸሐትና ቤተክርስትያን፡ ውዕለታ ንምኽፋል ብዝከኣለና ክንጽዕር እምበር፡ ንዓኣ ምንም ከምዘይገበረትልና ኣደ ቆጺርና ነቲ ዘጥበወና ኣጥባታ ክንነኾስ ትኽክል ኣይኮነን።

√ ስለዚ ማንም ወዲ ቤተክርስትያን፡ ኣዴኡ ቤተክርስትያን ዝገበረትሉ ውዕለት ንምኽፋል፡ ንጸላእታ ንምሽናፍ ምስኣ ሓቢሩ ብመንፈሳዊ ሓይሊ ክቃለሶም ኣለዎ እምበር፡ ምስ ምስኣ ዘይመስሉ ኣካላት ዓጢቑ ንሳቶም ዘዝበልዎ እንዳምጸ ቁስሊ ክኾና ኣይግባእን ኢዩ። "ከቑስላ ዝኽእል ሕሱም ኣካል መን'ዩ፧" ኢልና እንተሓቲትና፡ እቲ ሕሱም ውሉዳ'ምበር፡ ሕሱም ጸላኢኣ በይኑ ነዚ ክገብር ኣይከኣሎን ኢዩ። ምላልባሽ ግን ነቲ ሕሱምን ምስኣቶም ዝሓብርን ውሉዳ፡ ሕማቕ ምኽሪ እንዳመኸረ፡ " ኣብዚ ንኸሳ፡ ኣብዚ ከሕምማ ኢዩ፡ ኣብዚ ፋሕንጭራ፡ ኣብዚ እንተተንኪፍካያ ኢያ እትህሰ!" እንዳበለ ክፉእ ምኽሪ ክመኽሮ ይኽእል። እዚ ክፉእ ምኽሪ'ዚ ድማ ሓደገኝነቱ ብቐልል ዝረአ ኣይኮነን።

ንሕና ግን ደቃ እንተደኣ ኮይንና ንዓኣ ንስመዓያ፡ ናይ ጛና ምኽሪ ይኹን ጭብጥታት ኣየድልየናን ኢዩ። ካብ ናታ ዝዓቢ ጭብጢ የለን፡ ካብ ንዓኣ ሓሊፍና'ውን እነኣምኖ ኣካል የብልናን። ንሳ ካብ ፈጣሪ ወሊዳትና፡ ንሳ'ውን ምስኡ ኣላልያትና። ሕጂ'ውን ብዘይብኣኣ ካልእ ምስ ፈጣሪ ከራኽበና ዝኽእል ኣካል የለን። ኣብኣ ዝተጠመቑ ኩሎም ውሉድ ኣምላኽ ኢዮም፡ ኣብኣ ቃል ኪዳን ዝኣሰሩ ድማ ዓራት ኣሚኖም ቅዱስ'ዩ፡፡ ካብኣ ዝወሓዘ ጸጋ ፍጹም ካብ እግዚኣብሔር ዝመጸ ጸጋ ኢዩ። እሞ ናብ እንዳጛና እነማዕድዎ ነገር የብልናን። ካብ እንዳጛና ዝወጸ ማዕዳ ኣየድልየናን'ዩ። ልዕሊ ኩሉ ንሳ ትቐርበናና፡ ንሳ'ውን ናብ ኣምላኽ ተቕርበና።
ወስብሐት ለእግዚኣብሔር።

ንመንኩም ደኣልና ክንኣምን፣ ንዓኻዶ፣ ንፈጣሪ፧

ንመንኩም ደኣልና ክንኣምን፣ ንዓኻዶ፣ ንፈጣሪ፧

ንስኻ ሓቀኛ ምኻንካ ትንግረና ኣለኻ፣ እግኣብሔር ድማ ሓጥእ ምኻንካ የረድኣና ኣሎ።ንስኻ 'ኣነ ሓቀኛ'የ'' ትብል ኣለኻ፣ እግዚኣብሔር ድማ፣ ''ንሱ ሓሳዊ ኣምስሉ'ዩ'' ይብለና ኣሎ። ንስኻ ስለጽድቅኻ ከተረድኣና ትህንደድ ኣለኻ፣ እግዚኣብሔር ድማ ሎሚ ውን እንተኾነ ክሳብ ክንድዚ ከምዝተዓገሰካ እምበር፣ ክንዲ ናይ እግዚኣብሔር ዝኣክል ጽድቂ ከምዘየብልካ፣ እረ ገና ኣብ ሱግመ ሓጢኣት ከምዘለኻ ይነግረና ኣሎ። እሞ ንመንኩም ደኣልና ክንኣምን፧ንዓኻዶ ወይሲ ንእግዚኣብሔር፧
''ሓጢኣት የብልናን'' እንተበልና፣ ንገዛእ ርእስና ንጥብር ኣሎና፣ እታ ሓቂውን ኣባና የላን። ሓጢኣትና እንተተናዘዝና ፣ ኣምላኽ እሙንን ጻድቕን ስለዝኾነ፣ ንሓጢኣትና ይቕረ ክብለልና፣ካብ ኩሉ በደልናውን ኬንጽሓና ኢዩ። ''ሓጢኣት ኣይገበርናን'' እንተበልና፣ ሓሳዊ ንገብሮ፣ ቃሉውን ኣባና የሎን። (1ዮሐ1፣8-10)''

ንሃዋርያ ዮሐንስ፣ ቤተክርስትያን ''ሓዋርያ፣ እቲ ጎይታ ኣዝዩ ዘፍቅሮ፣ ወደሞዝሙር ናይ ክርስቶስ፣ ሞት ከይጠዓመ ዝዓረገ ጻድቕ`` ዝብል ሽመት ከምዘለዎ ትኣምንን ትምስክርን።ውሉዳ ውሉደ ቤተክርስትያን ግን ብስድነት ድፍረትን፣ ``ኣነ ጻድቕየ፣ ኣነ ቅኑዕ`የ፣ ንዓይ ስምዑኒ፣ ኣነ`የ ሓቀኛ፣'' ኢሎም ዝዳፈሩን ንንስሓ መህደሚ ንምርካብ ሃሰው ዝብሉን  ውሉድ መታን ከይርከቡ'ሞ፣ ካብ መንግስቲ እግዚኣብሔር ተፈልዮም ከይነብሩ፣ ወትሩ ነፍሶም እንዳወቐሱን፣ '' ኣነ ድኹም ሓጥእ'የ፣'' እናሉ ገዛእ ርእሶም ዝወቕሱን ኣመንቲ ክህልዉዋ ትደሊ። እዚ ማለት፣ ሓጥእ ምኻንካ ተኣሚንካ ከተብቅዕ፣ ልዕሊ ሰበይ ሓቀኛ'የ በሃሊ እንተኾይንካ፣ ገና ንትዕቢትካ ብመለሳ ደኣ እምበር፣ ብንስሓ ኣይሸፈንካዮን። እግዚኣብሔር ግን ካባኻ ሓንቲ ነገር ይደሊ፣ ሓጥእ`የ እናልካ ክትነብር፣ ፐርከስ ክንድ ዝኣኸለ ጽድቂ ይሃልኻ፣ ምስ ናይ ፈጣሪኻ ዝመጣጠን ጽድቂ ግን የብልካን። ክንድ'ቲ እምባ ዝኣክል ሓቂ ይሃልኻ ኣይሃልኻ ብዘየገድስ፣ ምስ ናይ እግዚብሔር ናይ ባህርይ ሓቂ ግን ብጭራሽ ኣይዛመድን'ዩ ሓቅኻ፣ ነቲ ንስኻ ትብሎ ዘለኻ ሓቂ፣ እግዚኣብሔር ቅድሜኻ በጺሕዎ ከምዘሎ ምፍላጥ ከድልየካ ዩ። ስለዚ ምውጥዋጠ ኢድ ተዘድሊስ፣ ቅድሜኻ እግዚኣብሔር ብናይ ብይን ኢዱ ገይሩ ከዋጣውጥን ክፈርድን ምኸኣለ።እግዚኣብሔር ግን ዝደለዮ ነገር ብምህላዉ፣ ስቕ ኢሉ ተረኣኻዮስ፣ ልዕሊኡ ናይ ሓቂ ተሓላቒ ኮይንካ ክትረኣየና ትህርደግ ኣለኻ። ኣንታ ወገነይ፣ እግዚኣብሔርኮ ንጽድቅኻ ይርእዮ፣ እንታይ ክንዓብሰልካ ኢና ንዓና ስለዕብየትካ ትነግረና ዘለኻ፧

ስለዚ ጽድቅኻ ኣይትንገረና፣ ኣየድልየናንዩ'ውን፣ ምኽንያቱ፣ ''ኣነስ ሰናፍ ድየ''  ኢልና ብትዕቢት ከምእንለዓዓል ኢኻ ትገብረና ዘለኻ። ተኸኣልካስባ ኣበራትካን ድኻማታትካን ብትሕትና ንገረናሞ፣ ክንመሃረሉ። ፐርከስ ህላወ ጽድቅኻ ተጠቃምነቱ ንዓኻዩ፣ ስለጉድለታትካ ብድፍረት ምውራይ ግን ንተመኩሮ ክኾነና ተትነግረና ኣዝዩ ይጠቕመና ዩ። ካብ ጽድቅኻ ንምንጋር ብድፍረት ትለዓልሲ፣ ሓጢኣትካ ንምንጋር ተትደፍር ምበለጸ። ንእግዚኣብሔር ድማ ዳግማዊ ነብይ ዮናስ ምኾንካዮሞ፣ ኣብ ከብዲ ዓሳ፣ ቤተ ጸሎት መዳለወልካ ነይሩ። ስለኣበሳኻ ተዘይተዛረብካ'ውን፣ ''ኣበስኡ ዘይነገረና'' ኢልና ኣይነዕገርግርን። ምኽንያቱ ኩሉ ብይን ዝወሃበሉ ኣብ ቅድሚ ኩሉና ግልጺ ኮይኑ ብግህዶ ዝፍረደሉን እዋን ስለዘሎ፣ ንዑኡ ነቲ ፈራዲ ይኽበዶን ይቕለሎን።
"ኣነ ሓቀኛ'የ"፣ ኢልካ ምምዳር፣ ናይ ሓጢኣን ባህርይ'ዩ። ኣብ ግዜ ፍርዲ፣ እቶም ኣብ ጸጋሙ ዝቖሙ ሓጢኣን፣ 'ኪዱ ካባይ ረሓቑ፣ ምኽንያቱ ጠምየ ኣየብላዕኩምንን፣ ጸሚአ ኣየስተኹምንን፣ ዓሪቐ ኣይከደንኩምንን፣ ሓሚመ እግዚሔር ይምሓርካ ኣይበልኩምንን፣'` ዝብል ወቐሳ ምስ መጾም፣ ብጭራስ ከምዘይበደሉን፣ እካ ደኣ ነቲ ዝተበየነሎም ፍርዲ ይግባይ ክብሉን፣ ''ኣበይ ሓሚምካ ርኢናካ፣ ኣበይ ጠሚኻ፣ መዓስ ዓሪቕካ ርኢናካ፧'' እናሉ ስለጽድቆም ክራኸሩ ነንብብ። ንሱ እቲ ፈራዲ ክርስቶስ ግን፣ ብዘይሕብእብእ ንኹሉ ኣበሰኦም ብግህዶ የርእዮም፣ ንሓደ ካብዞም ዝሓመሙ ዘይበጻሕኩም፣ ንዝጠመየ ዘየዕንገልኩም፣ ንዝጸመአ'ውን ዘየርወኹም፣ ንዓይ ከምዝኸላእኩምኒ'የ ዝቖጽሮ፣ እናለ ይፋረዶም።

በንጻሩ ጻድቕ ሰብ ድማ፣ ክሳብ ግዜ ብርዱ፣ ምንም ግብሪ ጽድቂ ከምዘይገበረ ገና ብሕጂ ዝጎድሎ ከምዘሎ እንዳእመነ'ዩ ዝነብር። ኣብዚ ተማሳሳሊ ዘመነ ፍርዲ'ዚ፣ እቶም ጻድቃን፣'' ኣንቱም ብሩኻን፣ ንዑ ናብዚ ክቡር ዝኾነ ርስቲ ውረሱ፣'' ዝብል ምስጋና ምስተዋህቦም፣ እንታይ ኢና ገይርና ክንድዚ ምስጋና፣ መዓስ ኢና መጊብናካ፣ መዓስከ ሓሚምካስ በጺሕናካ፧'' እናሉ ነቲ ዝገብርዎ ዝነበሩ ግብረ ጽድቂ፣ ፈጺሞም ይዝክርዎ ከምዘይዘበሩ የረድኣና። ንሱ ግን ንኽልቲኣቶም ወገናት ነቶም ሓጢኣንን ነቶም ጻድቃንን ብግልጺ፣ ስለጽድቆም፣ ስለሓጢኣቶም ኣብ ኣደባባይ ይድርጉሓሎም።

እሞ ክቡር ሓወይ፣ ንዓና ስለጽድቅኻ ክትነግረና ኣየመልክዕን ኢዩ፣ ንዓኻውን ትዕቢት ከይኮነካ ጽቡቕ ኣይኮነን። ተሓሰብካዮኸ፣ ልዕለይ ኣምላኽ ኣሎ፣ ልዕለይ ጻድቕ ኣሎ፣ ልዕለይ ሓቀኛ ኣሎ፣ ንኹልንትናይ ዝምርምር ናይ ውሽጠይ ፈራዲ ኣሎ፣ ኢልካዶ ኣኮንካን እትኣምን፧ እንታይ ደኣሞ፣ ንርእስኻ ልዕሊ ካልኦት ጻድቕ ገይርካ ብምግላጽ፣ ኣብ ልዕሊ ካልኦት ጎብለል ኬንካ  ክትረኣየና ትደሊ'ለኻ። ብኡኡ ክትምዘን ንዑኡ ናይ መዛንነት መዝነት ዘይትህቦ። ኣብዚ'ውን እንተኾነ ልዕሌኻ ክህልዉ ከምዝኽእሉስ እንታይ መርትዖ  ኣሎካ፧ ነብይ ኤልያስ፣ '' ኣነ በይነይ ኢየ ተሪፈ፣ ብዘይካይ ቅኑዕ የለን፣ ንዓይውን ክቐትሉኒ ይደልዩ ኣለዉ`ሞ፣ ብዓልኻ ውሰደኒ'' ኢሉ ንበይኑ ዓብይ ገይሩ ክሓስብን፣ ሞት ክልምንን ነንብብ። ሮሜ11፣3-4- ኣምላኽ ግን፣'' ገና ንስኻ ዘይትፈልጦም፣ ንጹሓን ንጣዖት ዘይሰገዱ ሓቀኛታት ተኸተልተይ፣ሾብዓተ ሽሕ ሰብኣይ ኣትሪፈ ኣለኹ።'' ኢሉ በይኑ ልዕሊ ሰቡ ጥራይ ንኣምላኽ ዘፍቅር ከምዘይኮነ፣ በንጻሩ እካ ድኣ ብዙሓት ኣብ ዓይኒ ኣምላኽ ዘለዉ፣ ካብ ነብይ ኤልያስ ግን ስዉራት ዝኾኑ ብዙሓት ጻድቃን ከምዘለዉ ኣረዲእዎ።

ስለዚ ዝኸበርካ ወገነይ፣ ነቶም ንስኻ ትኽእሎም ነገራት እንዳምጻኻ ስለዕብየትካ ኣይትንገረና፡ ብዙሕ ዘይትኽእሎም ነገራት ከምዘሎዉኸ ከመይ ትዝንግዕ'ለኻ፣ ዘይትፈልጦ ብዙሕ ኣሎ፣ ዘይበጻሕካዮ ነዊሕ ጉዕዞ ኣሎሞ፣ ትሕትናኻ ንገረና ክንመሃረሉ፣ ሓቢርና ትሕት መታን ክንብል።ጽድኻ ከተውርየልና ግን ንፈራዲኡ ክሰምዖ ይበልጽ።
ሕቱም-መጽሓፍ