በስመ-ሥላሴ
"ናብራ-ጻዕጺዑ
ተስፋይ ተጸንቂቑ
ፍልጠትኪ ኣካፍሊ
ጽባሕሲ
'ታይ'የ ዝኾኖ ገለባ በሊ"
'ና ክብሉ ብዙሓት ይገሽዋ
ስማ እንክዝንጠል ይፈርሕዋ
ጉዳም የምልኽዋ
"ጣዖትዶ ኣይኮነትን
ክንድዚ ትሽንንዋ
ሰብ ክንሳ ሰማይ ትሰቕልዋ"
ኢሉ ይፋጠጥ ነይሩ ሓደ
ኣድቂቑ ዝፈልጥ ብዛዕባኣ በብሓደ
ገብረ'ዩ ስሙ
ኣይጸርፍ ኣይሓሚ ትም ብሕትሙ
ይሓርስ ይጓሲ ይመሃር ብዓቕሙ
ጥርቁው ንፉዕ
ኣብ ኲሉ የድምዕ
ብሓቂ ኄር እዩ
ጠልቀፍቀፍ ዘይንታዩ
ጠንቋሊት ዓድና ግና ተቕሕሮ
'ዚ ዂሉ ተጋብሮ
ከመይ'ሉ ክጸሮ
ገሊኦም ብሰንካ ሓዳሮም ማሲኑ
ያኢ ፍታሕ ደልዮምሲ ብፍትሕ ይብተኑ
ንሳ ትብሎም
ፈውሲ'ሎ ኣብቲ ደንበ
'ገንዘብሞ ክፈሉ
ኪዱ ፍሓሩ'
ኢላ መኺራ
ተኻሊኡ ነጊራ
ጽልኢ ተሳውረሎም
ምስቲ ኣውራ ሰቦም
ግዳይ ትገብሮም
ወዮ ሰብ ጉዳይ
ሓዳሮም ይድርበ
ስራይ ክብንቊሩ
ኣብ ሳጹና ገንዘቦም ይድርድሩ
ሓዳሮም በቲኖም ሰቦም ይኸስሩ
ነዚ 'ናረኣየ ኣይደቀሰላን ገብረ
ተዛሪቡ ዘይክእል
እዚ ይኹን እቲ ፍጹም ዘይብል
ግና
ብዛዕባኣስ ክንደይ'ኳ ምመደረ
ንሳ ክትጥንቊል
ሰብ ከተቃትል
ካህን ኣይትብል
ሊቕ ንዂሉ ትዝንጥል
ንሱ ክትልም ከጒርሕ ንዓዱ
ጉዳ ከቃልሕ ናይ መገዳ ጉዱ
ሰለም የለን!
ሓደ መዓልቲ'ዩ
ከይድዋ ኣጸምዩ
ታይ ግዱ
ከሕፍራ'ንድዩ ዓጢቑ
ሕዝቡ ከንቅሕ ከፍልጢም ሓቁ
'ከላእ!
ምዃን ንዝግሔር'ኳ ዘይፈርሐቶ
'ታይዶ ተሪፍዋ'ዩ ዙፋኑ ዘይነጠቐቶ
ዓዲ-በዓዱ ሸቖጥቈጥ ኣቢላቶ
ኣይተልዕሉ ስመይ ብኸንቱ
ንዝብል ትእዛዙ'ኳ 'ንሄት ንሳ ወሪሳቶ'
ኢሉ 'ናሓሰበ ናብ ቤታ መጽዩ
ኢደ-እግሩ ብጅንኑ ወፍዩላ ዕንቊ
ለኽፊ'ዶ ፈልቊ
ታይ'ዩ ነገሩ
በጃኺ ነርኒ ካብ ሱር መበቈሉ
ኢሉ 'ናሕነቕነቐ መሲሉ ዝተጨነቐ
ከም ሽጉር ኴኑ ሓቲትዋ ምስጢሩ
ብዙሕ ምስ በለት ኣርእይዋ ገንጺሉ
ያኢ ሕማም ዘየለስ ፈውሲ ክትእዝዘሉ
ሃንደበት!
'ጥዑይ'የ' ኢሉ መደረ ብዓውታ
ብወጮ ንሳ ተዓቢጣ
ንሱ ይምድር ክጎብጣ
ሓዝ-ፈኑ ኮይኑ
'ታይ ተሪፍዎ ቤታ ክዓኑ
ለካ ነይሮም'ዮም'ባ ዝጸናጸኑ
ንሱ ዝወደቦም ብሑጓ
ምስክር ክዀኑ በኣጋ
ንጠንቋሊት ዓድናስ ብማሕፉዳ
ሰሚዖሞ ኲሉ ጉዳ
'ታይሞ ይገበር
ንሳዶ ከይትሓድግ ልምዳ
ዘይሕጅስ ብዙሕ ዝኸዳ
እዛ ጠንቋሊት ደኣ
ሎምስ ኣሪጋዶ ትህሉ
ወይሲ ዓዲ ዂልና ኴዳ
ምዃን መልክዓ'ያ ቀይራ
እምበር እነሀት'ንዶ ሕጅስ ምሳና ተሰሲዳ
ሎቱ-ስብሐት!
