ምልኣትን ተመላላእነትን

በስመ ሥላሴ

√ ተፈጥሮ ሓደ ነቲ-ሓደ ተመላሊኡን ተቐሚሙን ዝተመስርሐ'ዩ። ኲሉ ፍጥረት ክንዲ ፈጣሪ ዝኣክል ፍጽምና ዝለበሰ'ኳ ተዘይኮነ፡ ሰራሒኦም ሳላ ጥበበኛ ኴኑ ብጥበብ ኣቃሚሙ ዝመስረሖም ግን፡ ኲሉ ኣድናቒ መዋእሉ ኣድኒቑ ክጸግቦም ኣይከኣለን። ፈጣሪ ወትሩ ምሉእን ፍጹምን'ዩ፡ ፍጥረት ከኣ ክፍጠሩ ኣትሒዞም ብምልእቲ ኢድ ዝተሰርሑ ክንሶም፡  ነሓድሕዶም እናተመላልኡ ይነብሩ።

√ ንኣብነት:-  እዚ ብእግሪ ዝርገጽ ሓመድ፡ ንናይ ሰብ ምልኣታዊ ተፈጥሮነት ምኽንያት ኴኑ'ዩ ዝጸንሕ። እወ! እዚ ንስእሊ ፈጣሪ ዘዘኻኽር ሰብ፡ ኣብ ውሽጡ ሓመዳዊ ባሕርይ ተደቢቑ ኣሎ። በዚ ምኽንያት'ዩ መስለኒ ሰብ "ንፈጣሪ ተመዓራርየዮ" ኢሉ ዝንየተሉ ጒልበትን፡"ሓመድ'የ" ኢሉ ዝሕለለሉ ዓቕምን ዘይህልዎ። ኮታ ምስሊ ፍጣሪ ዝውንን ፍጥረት ክንሱ ሰብ፡ በዝን በትን ምስ ፍጥረት ተመላሊኡ ክነብር ግዴታ ይኾኖ።

√ ጎቦታት ብማዕዶ እንክረኣዩ፡ ከም'ታ ብጽቡቕ ዝተሸለመት መርዓት፡ ዝተፈላለዩ ሕብርታት ዘለዎም ኣትክልቲ የብቊሉ ብምዃኖም፡  እቲ ዝውንንዎ ዝተፈላለየ ብራኸታት፡ ንጎደሎኦም መመላእታ ዝረኸብሉ መሲሎም ይረኣዩ። በዚ መሰረት፡ ኣብ'ቲ ዝረአ ጽባቔኦም፡ ንምልኣታዊ ውቃቤኦም ዘካትቱ ኣዝዮም ብዙሓት ዘይረኣዩ ባእታታ ከምዘለዉ ዘይሰሓት ሓቂ ኴኑ ይጸንሕ።

√ ውሕጅ ተዘይኽሰት ቂዕ ኢሉ ዝወጽእ ሽያኽ ኣይምሃለወን። ኣብ ውሕጅ ዝረኣዩ ሓቅታት ክፍተሹ እንተዄኖም፡ ብመንጽር'ቲ ተሰኪሞሞ ዝመጹ መዓድናት፡ ኲሉ ግዜ ንሓደጋ ዘቃልዑ ጥራይ ኴኖም ኣይጸንሑን'ዮም፡፡ እቲ ሓደገኛን ኣዕናውን ዝመስል በዓል ትርኑዕ ሓይሊ፡ በቲ ካልእ ገጻቱ ገማጢልካ ምርኣይ ናይ ለባማት ሰባት ባሕርይ'ዩ።  ኣብ'ዛ ዓለም ሰንኪ ውሕጅ ብዙሕ ዘማርር ሰብ'ኳ እንተሃለወ፡ ብዙሕ ዝሕጐስ ከምዘሎ'ውን ዘይዝንጋዕ ክውንነት'ዩ። ንተፈጥሮ ናህሪ ጽባቐ ክውስኽ ዝኽእል ዘዴ ብዙሕ ክርቋሕ ይከኣል'ዩ ኣብ ውሕጅ። ገለ ምዕቡላትን ጠቢባን ሰባት ንውሕጅ ከም መመንጨዊ ጽዓት ክጥቀምሉ ካብ ዝጅምሩ ነዊሕ እዋን ኣቚጺሩ'ሎ። እምበኣር ኣብ ማይን ምንጪ ማይን፡ ብዙሓት ዝተመላልኡ ነገራት ተኻቲቶም ምህላዎም ክስትብሃል ዘለዎ'ዩ።

√ ስለዚ ምምልላእ፡ ንነገራት ከጸብቖምን ንምልኣቶም ምልኣት ክውስኸሎምን ዝኽእል ቀንዲ ረቛሒ'ዩ። ሰብ ንገዛእ ርእሱ ኣካል ተፈጥሮ ምዃኑ እንተተረዲኡ ከኣ ቀሊል ወግዒ ኣይኮነን። እዚ ካብ ኮነ ድማ፡ ሰብ ኣብ ምልኣታዊ ከይዲ-ሕይወት ኢድ ክህልዎ እንተዄኑ'ዩ። ቅድሚ ኲነት እምበኣር ገዛእ-ርእሱ ጎደሎ ምዃኑ ምግንዛብ ኣለዎ ንሰብ።

ሎቱ ስብሐት!

ማዕጾ መን ከፈተ

" ' መን ይኹን መን ብዘየገድስ ክሳዕ ዝተወሰነ እዋናት፡ ገዛና መጽዩ ማዕጾ ዝኳሕኰሐ ሰብ ከይንኸፍቶ፧' ኢሎም ጽኑዕ ክታም ዘንበሩ ሓደስቲ ምርዑዋት ነበሩ" ይበሃል። ማዕጾ እንተተኳሕኲሑ ድማ፡ ዝኸፍት ስለዘየለ ነፍሲ-ወከፍ ኳሕኳሒ መን ምዃኑ ከይተፈልጠ ረብሪቡ ይምለስ ነበረ። 

ወዮ ሰብ ሓዳር፡ በይናዊ ፍቕሪ መቂርዎም ቤቶም ሰብ ከይኣተዎ ነዊሕ እዋን ሓለፈሞ፡ ኣብ ሓደ እዋን ክልተ ኣዋልድ ሓደ'ውን ወዲ፡ ማለት ሰለስተ ማንታ ወለዱ፡፡ ከምቲ ልሙድ ግን ሓደ ግዜ ማዕጾ ተኳሕኰሐ፡፡ ኣጋጣሚ እቲ መርዓዊ፡ ዘይሽዑ መዓልቲ ዘይኣመሉ ክገብር፡ መንነት ኳሕኳሒ ክፈልጥ ክብል ናብ ካሜራ ገጹ ቀረበ፡ 'ተረኣየ ግን'ቲ ዘፍቅሮ ኣቡኡ ኴኑ ጸነሖ። ኣብ ገጽ ክልቲኣቶም ኣቦን ወድን ክቱር ናፍቖት ይንበብ፡፡ እንተዀነ መርዓዊ፡ ምስ ሰበይቱ ዝኣተዎ ስምምዕ ከየፍርስ ክብል፡ ክቱር ፍቕራውን ናፍቖታውን ስምዒታቱ ቀቢሩ ማዕጾ ከይከፍት ወሰነ። ኣቡኡ ከኣ ረብሪቡ ተመልሰ።

ካልእ ግዜ ድማ ብተመሳሳሊ ማዕጾ ተኳሕኰሐ። ሽዑ'ውን እታ መርዓት'ያ ዘይመላ ክትገብር፡ መን ምዃኑ ክትፈልጥ ናብ'ቲ ካሜራ ናይቲ ማዕጾ ገጻ ዝቐረበት። ተረኣየት ከኣ እቲ ኣዝያ ተፍቅሮን ተኽብሮን ኣቡኣ ኴኑ ጸነሐ። ናፍቖታ ተርዊ ዘላ መሲልዋ ናብቲ ካሜራ ኣዝያ ቅርብ እንተበለት ድማ፡ ብተዓጻጻፊ መልክዑ ኣብ ገጽ ኣቡኣ ልዕሊ ዓቐን ናይ ናፍቖት ስምዒታት ተንብብ። እዛ ግዜ'ዚኣ ኣዝያ ጽንክርቲ'ያ ንዓኣ። በቲ ምስ ሰብኣያ ዝኣተወቶ ስምምዕ ከይተፍርስሞ ዘይእምንቲ ተብሂላ ከይትንቀፍ፡ በዚ ከኣ ፍቕሪ ኣቡኣ ምግባር ኣብይዋ ኣዝያ ተቐርቂራ፡ መዓጒርታ ብንብዓት ይሕጸብ። ኣብ ውሳኔኣ ግን ናፍቖቱ ምኽኣሉ ስለዝሰኣነት ነቦኣ ከፈተቶ፡፡ እንዳተሕነቕነቑ ድማ ናፍቖቶም ኣውጽኡ።

ድሕሪ ሓደ ዓመት፡ ዓመተ ልደት ናይ ደቆም ዘኽብርሉ ሰዓት ኣኸለ፡፡ ሰብኣይን ሰበይትን እምበኣር በብወገኖም፡ ' ንደቅና ይምጥን'ዩ' ዝበልዎ ህያባት ካብ ከተማ ገዛዚኦም መጹ። እታ ኣደ ንሰለስቲኦም ደቃ ህያባት ከተምጽእ እንከላ፡ በዓል ቤታ ግን ነተን ክልተ ኣዋልድ ጥራይ ህያብ ኣምጺኣለን። ወይዘሮ ተግባራት በዓል-ቤታ ስለዘገረማ፡ "ስለምንታይ ነዘን ኣዋልድ ጥራይ ፈሊኻ ህያብ ኣምጺኻለን፡ እዚ ወድናኸ እንታይ ጔሩካ፧" ኢላ ብቚጠዐ ተወከሰቶ። 

ሰብኣይ ከኣ ህድእ ኢሉ፡ "ምልባሽ ምስ ተመርዓዋ ኣቦ ኴነ ናፍቖተይ ክገልጽ ተመጻኹወንሲ፡ ማዕጾ ደኾን ይኸፍታኒ ኢለ'የ።" ኢሉ ንሰበይቱ መለሰላ ይበሃል። 

ቃልን ርህራሄን ብሞደሻ ዘይጽዓቱ ትርኑዓት ሓይሊ'ዮም!