ቤተክርስቲያን ትህብዶ ትልምን፧ 2ይ-ክፋል

በስመ ሥላሴ

√  ኣብ ዙርያና ሰናይ ስነ-ምግባር ዝምህሩ፡ ብስነ-ልቦና
ዝበሰሉ ጥበብ ዝምህሩና ወገናት ክንርኢ እንከለና፡ ኣቐዲምካ ምንጩን ዋንነቱን ናይቲ ጒዳይ ካብ ቤተክርስቲያን ዝፈለቐ ጸጋ ምዃኑ ምርዳእ የድሊ። ክንዮ'ዚውን ክሳብ ሰማያት ዝነጥቕ ፍልጠትን ምርምርን ክንሰምዕ እንከለና፡ እግዚአብሔር ንቤተክርስቲያን ኣጓንዩ፡ ንኣህዛብ ጥራይ ፈልዩ ዝሃቦም ገይርካ ክውሰድ የብሉን። እምበርከ ነዚ ፍልጠት'ዚውን ጓና ኣይኮነትን ቤተክርስቲያን። ስለ ሰማያት ተነጢቕካ ምኻድን፡ ሰብ ክንስኻ ናይ ህዋ ምርምር ምክያድ ከምዝከኣልን፡ ቅድሚ ዂሉ ዝበጸሐቶ ቅድስት ቤተክርስቲያን ምዃና ኣብ መጻሕፍታ ተጠቒሱ ይርከብ። ወዮ "እከለ ናይ መጀመርያ ናይ ህዋ ተመራማሪ፡ እከለ ወርሒ በጺሑ፡ እከሊት ሮኴት ምሂዛ" ዝብል ዜና ቀልጢፉ ይእመን፡ ነቲ ብልሳን ቤተክርስቲያን ዝፍኖ ሓቂ ግን ተጐስዩ ዝሕለፍ ኴኑ እምበር፡ንጸጋታት ቤተክርስቲያን ክዳርግ ዝኽእ ሓይሊስ ክሳብ ሕጂ ይኹን ብሕጂ ፈጺምካኮ የለን።

√ ብዛዕባ ናይ ሰማይ ተማራመርቲ ካብ ተላዕለ ግን ዝቕጀሉኻ ሓቅታት ኣለዉ። ድማ ብዓለማውያን ከም ኣብነታውያን ብቤተክርስቲያን ከኣ ከም ቅዱሳን ዝጥቀሱ ሰባት ንምዝርዛር ይከኣል'ዩ፡፡ ሒደት ኣብነት  ካብ ሕገ-ልቦና፡ ቅዱስ ሄኖክ፡ ካብ ሕገ-ኦሪት ቅዱስ ኤልያስ፡ ካብ ሕገ-ወንጌል ድማ ቅዱስ ጳውሎስ፡ ቅዱስ ዮሐንስ ወንጌላዊ፡ ሓዋርያ ቅዱስ ቶማስ ምጥቃስ ይከኣል'ዩ። ነዚ ገለጻ'ዚ ፍልይ ዘብሎ ነገር እንተሃልዩ፡ ዓለማውያን ብኢድ ሰብ ዝተሰርሐት መንኰርኰር ተጠቒሞም ንሰማይ ክበሩ ይኽእሉ እምበር፡ ብኡኡ ገይሮም ኣብ ሰማይ ክሰፍሩ ዘይከኣሎም ምዃኑ'ዩ። ቅድስት ቤተክርስቲያን ግን፡ ብቅዱስ ሄኖክን ኤልያስን ኣቢላ፡ ኣብቲ ዘይብጻሕ ክብጻሕ ከምዝከኣል ተስተምህር። ንባዕሉ ቅዱስ ቶማስ ዝጥቀመላ ዝነበረ ሰብ ዝሰርሓ መንኰርኰር ዘይኰነትሲ፡ ኢድ እግዚአብሔር ዘዳለወታ ደመና ኢያ ነይራ። ዋላ እዞም ተመራመርቲ ናይዛ ዓለም ዝሰማምዕሉ ፍሉይ ሓቂ ድማ፡ ኣብ ዘመነ-ስብከት ሓዋርያ ቶማስ፡ ካብ ምድረ እስራኤል ናብ ምድረ ህንዲ ንምኻድ፡ ኣይሮፕላን ኣይተማህዘትን ስለዝነበረት ዝያዳ ትዂረት ንኽትገብር ይቕስበካ። ህንዳውያን ከኣ ክርስትና ዝተቐበሉሉ ዘመን፡ ምስ ምምጻእ መግዛእቲ እንግሊዝ ናብ ህንዲ ዘይኮነስ፡ ገና ቅድሚ ዘመነ ናፖልዮን፡ እረ ካብ ጥንቱ ኣብ 60-90 ዓመተ ምህረት ምዃኑ ኲሉ ዝፈልጦ ሓቂ'ዩ።  "ከመይ'ሉ ኣይሮፕላን ኣብ ዘይነበረሉ ዘመን፡ ክርስትና ካብ እስራኤል ናብ ህንዲ ብኸምዚ ዓይነት ፍጥነት ክዝርጋሕ ተኻኢሉ፧" ዝብል ስነ-መጐት ብፍልስፍናዊ ኲርናዕ መሚኻ ክትምልሶ እንተተደልዩ፡ ነቲ ብልሳን ቅድስት ቤተክርስቲያን ዝወሃብ ሓቂ፡ "ሰብ ዘይሰርሖ መርኰርኰር፡ ደመና ሓዋርያ ቶማስ!" ዝብል ኣርትዖ ክትቅበሎ ይግድደካ።

√ ተወሰኽቲ ጭብጥታት ከም ዝሕብርዎ፡ ታሪኽ ናይ ዓለምና፡ ኣየር ክትመሃዝን ኣብ ግብሪ ክትውዕልን ዝጀመረት፡ ምስ ኊውኰት ካልኣይ ኲናት ዓለም ወይ ድማ ርሒቕና እንተ'ልና ኢንዱስትርያዊ ሰውራ ምስ ጀመረ'ዩ፡ (1800 ዓመተ ምህረት ንነጆ ዘሎ ማለት'ዩ)። ቤተክርስቲያን ግን ኣብቲ ኣይሮፕላን ዘይነበረሉ ግዜ፡ ፈጣሪኣን መርዓዊኣን ዝሃባ መንፈሳዊ ኣይሮፕላን (ደመና) ብምጥቃም ሰማይ ሰማይ ክኽየድ ከምዝከኣል ብግብሪ ኣብ ዓለምና ኣርኣያ ክትከውን ክኢላ ኢያ። ሕጂ ዓለምና "ሰማይ-ሰማይ ክኽየድ ይከኣል'ዩ!" ኢላ ነዚ ምርምር'ዚ ከተርእየና እንከላ፡ ንሕና ደቂ ቤተክርስቲያን ከም ንሓደሽቲ ንግረመሉ ምኽንያ ክህሉ ኣይምተገበአን። እምበርከ ዓለምና ናብዚ ዝላ'ዚ ንምንጣር ከም መተርኣስ ኴኑ ዘገልገላ ዓቢ ሚና፡ ቅድስት ቤተክርስቲያን ምዃና ንዝዀነ ሰብ ክስወሮ ዘይግበኦ ጭብጢ'ዩ።

√ ካልእ ምስ ቊጠባ ዝተኣሳሰር ስለቀረብን ሃብትን፡ ኣከናውና ስነ-ምሕደራን (ዲሞክራስን) መሰል ተፈጥሮ፡ (ናጻ-ፍቓድ) ዝብሉ ኲምራ ኣምራት፡ ኣብ ዓለምና ብዝተፈላለዩ ኣፋት ኣብ ዝተፈላለዩ ዘመናት ክጋዋሕ ክንርእን ክንሰምዕን እንከለና፡ ሕጂ ሃንደበት ዝተማህዙን ንቤተክርስቲያን ሓዱሽትን ዘይምዃኖም ምርዳእ የድሊ፡፡ ማለት እዚ ጉዳይ'ዚ ቤተክርስቲያን ዘይበጸሐቶ ጸጋ ኣይኮነን። ቅድስት ቤተክርስቲያን ብዛዕባ "ሰብን ኣመጻጽእኡን መጻኢኡን" ዝብሉ ድምራዊ ኣፍልጦኣ፡ ልዕሊ ማንም ክድነቐ ብዝኽእል መልክዑ ትፈልጦን ንነዊሕ ዘመናት ተመኲራትሉን ኢያ። እዚ ጥበብ'ዚ ድማ ዋንኡ እግዚአብሔር ኴኑ፡ ዋንነት ብውክልና ንመርዓቱ ዓዲልዋ'ዩ። ብኻልእ መዳይ እግዚአብሔር ኣብ ዓለም ንዑኡ እተስምር ንሱ ዝወከላ ቤት ጌሩ'ሎ ማለት'ዩ። እዛ ቤት እዚኣ ከኣ ቅድስት ቤተክርስቲያን'ያ።ንሳ  ሰብ ከም ድላዩ ክነብር ከምዝደሊ፡ ስለትፈልጥ ሕጊ ትሰርዕ፡፡ኣብ ባህርይ ሰብ ናጻ ፍቓድ ብምህላዉ፡ ሕጊ ብናጻ ፍቓድካ ክከናወን ከምዘለዎ ኣቐዲማ ስለዝተገንዘበት፡ ሰብ ቀይደ-በተኽ ከይከውን ወትሩ ትምዕድ፡፡ ሓደ ኣብ ልዕሊ ካልእ ዓመጽ መታን ከየካይድ፡ "ንጸላኢኻ ኣፍቅር!" ብዝል መርሐ-ግብር ትምራሕን ትጉስጒስን። ነዚ ኲሉ ትእዛዝን ፍቓድን ቤተክርስቲያን ጥሒሱ "ከም ድላየይ ክነብር ይሕሸኒ" ኢሉ ዝኸይድ ሰብ ድማ፡ ካብ ጐጆኣ ፈልያ ሓላፍነታ ተውርድ።

√ እምበአር ናይ ዓለም ፈላጣት ኢና በሃልቲ፡ ኣብ ዓለምና ዝገበርዎን ዝገብርዎ ዘለዉን ጥበብ ዝተሓወሶ ምንቅስቓሳት፡ ቤተክርስቲያን ዘይትፈልጦን ኣቐዲማ ዘይበጸሐቶን ኣይኮነን። 'ዚ ኲሉ ሃብቲ'ዚ ናይ ቅድስት ቤተክርስቲያን ኴኑ እግዚእብሔር ኣምላኽ ብቐጥታ ይዂን ተዘዋዋሪ ንደቃን ንኣህዛብን ተስፋ መንግስተ ሰማያት ንዘየብሎምን ብሓፈሻ ከኣ ንዂሉ ወዲ ኣዳም ዝዕደሎ ጸጋ'ዩ። እምበኣር ኣብዛ ዓለምና ዘለዉ ጸጋታት፡ ብሓደ ጓናን ወዲ ቤተክርስቲያንን ዝውነኑ ሃብተ-ጸጋታት፡ ጥንተ-ዋንነቱ ናይ ቅድስት ቤተ ቤተክርስቲያን ምዃኖም ክፍለጥ ዘለዎ ርትዒ'ዩ።

√ ጽሓፍን ሰባኽን ዝኾነ ቅዱስ ጳውሎስ፥
"ብመንፈሳውነትን ብኽብርን፡ ህዱእን ሰላማውን ዝኾነ ሕይወትን ምእንቲ ኽንነብር ከኣ፡ ምእንቲ ኲሎም ነገስታትን ሰበ ሥልጣንን ጸሎት ይገበር!" (1ጢሞ2፥2) ኢሉ ይእዝዝ፡፡ እዚ ትእዛዝን መተሓሳሰብን'ዚ፡ ነገሥታት ናይዛ ምድሪ እምነቶም ይኹን ዕላምኦም ብዘየገድስ፡ ጸሎት ክግበረሎም እሞ፡ እግዚአብሔር ድማ ከምቲ ኣብ (ምሳ 8፣15) "ነገሥታት ባኣይ ይነግሡ፡ መሳፍንቲ በኣይ ገይሮም ቅኑዕ ሕጊ ይሕግጉ!" ዝበሎ፡ እግዚአብሔር ጸሎት ቤተክርስቲያን ሰሚዑ ጥበብን ምስትውዓልን፡ ርትዕን ሓቅን ንኸፍሥስ ቤተክርስቲያን ብጸሎት ክትዓዪ ከምዘለዋ ቅዱስ ጳውሎስ ይእዝዝ። እዚ ድማ ቄሳራውያን ነገሥታት ዋላ ደኣ ኢኣማንያን ይንበሩ'ምበር፡ ቤተክርስቲያን ብእትገብሮ ጸሎት ግን እግዚእብሔር ኣምላኽ ብተዘዋዋሪ መገዲ ጸሎታ ይሰምዓሞ፡ ነቶም ሰበ-ስልጣናት ጥበብን ልቦናን ክህቦም ከምዝኽእል ዝተኣመነ'ዩ፡፡ ስለዚ ንኲሉ ጸጋታታ ደኣ ኣይኹን እምበር፡ እቶም ኢኣማንያንሲ ገለ ካብ ጸጋታት ቤተክርስቲያን ከምዝካፈሉ ይገብሮም'ዩ እግዚአብሔር።

√ ኣብ ዝቕጽል ክፋላት ናይዚ ጽሑፍ፥ "ክንድዚ ዝኣክል ሃብተ-ጸጋታት ዘለዋ ቅድስት ቤተክርስቲያን ካብ ደቃ እንታይ'ዩ ዘድልያ፧ ብዕጥቀ-እግዚአብሔር ብዂልትናኣ ዝመለአትከ፡ ብሓቂዶ ኢድ'ቶም ንሳ ዝወለደቶም ደቃ ንህልውናኣ እንኮ ኣማራጺ'ዩ፧ ስለምንታይ'ያ ቅድስት ቤተክርስቲያን ካብ ኲሉ'ቲ ኣለና ኢልና እንምከሓሎም ነገራት ብዓንተውኡ እቲ ናትና ናታ ክንሱ፡ ተመሊሳ ንሕና ብመልክዕ ዕሽር፡ ምጽወታ፡ ሞቧእ ኣቢልና ኢድና ክንዝርግሓላ ትደሊ፧ "ኣብ ዝብሉ ገጻት ከምፍቓዱ ክንፍትሽ ኢና።

√ እግዚአብሔር አምላኽና ሓይሊ-ጸረ ቤተክርስቲያንና ኣድኪሙ፡ ኃይሉን ረዲኤቱን ንዓና ንደቁ ክዕድለና ሰናይ ፍቓዱ ይኹን። ኣብ ውሽጣን ደጌኣን ኴኖም መናድቕ ህልውናኣ ንምፍራስ፡ ብሕቡእን ብግህዶን ኲናት ዝውርውሩላ፡ ደቃ ንምብታን ንውሓተ-ቀትሪ ሓጺርዎም ብሕልመ-ለይቲ ከይተረፈ ዝዓዩ፡ ሕጋ ገዲፎም ኣብ ውሽጣ ሕጎም ከንግሱ ዝህቅኑ፡ ልዕሊኦምን ኣዴኦምን ምዃና እናፈለጡ፡ በዓንተዉኡ ባዕሎም ዝበቘሉ መሲሎም ክረኣዩ ዝደልዩ፡ ብዛዕባ'ቲ ንሳ እዛ ቅድስት ቤተክርስቲያን እትእውጆምን ተከናውኖምን ፍጻሜታት፡ ከም ሕሱም ጎረቤት ተላሒጎም ክስልይዋን ክነቕፍዋን ዝውዕሉ ኣካላት፡ መርዓዊኣ እግዚአብሔር ወትሩ ይርኢ እዩ'ሞ፡ ብንስሓ ኣብ ትሕቴኣ ዝምብርከኽሉ ዘመን የምጻልና።

ወስብሐት ለእግዚአብሔር!!
3ይ-ክፋል ይቕጽል...

ቤተክርስቲያን ትህብዶ ትልምን፧ 1ይ ክፋል

በስመ ሥላሴ

√ ቤተክርስቲያን ምልእቲ ስለዝኾነት፡ ንደቃ ይኹን ንጓና ካብ ጸጋታታ ጸጋ እናዓደለት ትነብር። ንዓይነት ሀብተ-ጸጋታታ ንምጥቃስ ዝኣክል፡ ሓቀኛ ሃይማኖት፡ ሓቀኛ ፍልጠት፡ መገዲ ምድሓን፡ ዕረፍቲ፡ ሰላም፡ ህድኣት፡ ርትዒ... ዘርዚርካ ኣይውድኡን። እዚ ምኽንያታዊ ዝዀነሉ ከኣ ነቲ ሃብታም ዝኾነ እግዚአብሔር ስለዝሓዘት'ዩ ዝጎድላ ዘየብላ።

√ እዞም ጸጋታት'ዚኣቶም ንክልተ ዓይነት ሰባት ብክልተ ዓይነት መገድታት ዝዕደሉ እዮም። ንዝርዝሮም ኣመልኪትና፡ በቶም ዝዕደለሎም መገድታት እንተጀሚርና፥-

√ ጸጋታት ቤተክርስቲያን ዝዕደልሉ መገድታት፡ ብቐጥታን ተዘዋዋርን መዳይ'ዩ። ብቀጥታ ክበሃል እንከሎ፡ እንካን ሃባን ካብ ቅድስት ቤተክርስቲያን'ዩ። ተዘዋዋሪ መገዲ ድማ፡ ዋንነቱ ናይ ቤተክርስቲያን ክንሱ እቶም ተቐበልቲ ግን ኣብ ደገ፡ ኣብ ዘይምእማን እንከለዉ ዝወሃብ ጸጋ'ዩ፡፡ እቶም ካብ ጸጋታታ ዝዕደሉ ኣካላት እምበኣር፡ ኣብ ውሽጣን ወጻእን ቤተክርስቲያን ዝርከቡ'ዮም። እዚ ድማ እቶም ኣብ ውሽጣ ዘለዉ፡ ደቃን ኣመንታን ብዛዕባ መንነት እግዚአብሔር ብመገዳ ዝተረድኡን ኴኖም፡ ኣብ ጎጆኣን ውሻጤኣን ገይራ ብቐጥታ ጸጋኣ ትዕድሎም። ንውሓቱ ካብ መሰል ዉልድነት እግዚአብሔር ጀሚርካ፡ ንስሓ፡ ጽድቂ፡ ተስፋ ርስተ መንግስተ ሰማያት ዘለኣለማውነት... ክጥቀሱ ይከኣሉ። ደቂ ቤተክርስቲያን ኴንና ንጸጋታታ እንሰንቀሉ መዳይ፡ ብቀጥታ ኣብ ውሽጣ ምስ ንህሉ ጥራይ ምዃኑ ይፍለጥ።

√ ካብዚ ወጺኻ ብተዘዋዋሪ መገድታት ዝወሃቡ ውህብቶታት ድማ አዉ። ከም ኣርኣያነት፡ ጥበብ፡ ፍልጠት፡ ሃብተ-ስጋ፡ ትሕትና፡ ምሕዝነት... ዝኣመሰሉ ንስጋዊ ነገራት ጥራይ ዘከናውኑ ጒዳያት እንተዀይኖም' ማለት'ዩ። ድማ ነዚኣቶም ዋንኦም እግዚአብሔር ኴኑ ብተዘዋዋሪ መገዲ ካብ ኣፍ ቤተክርስቲያን ዝዕደሉ ምዃኖም ክርስሳዕ ዘየብሉ ሓቂ'ዩ፡፡ እዚአቶም ኣብቶም ኣመንቲ እግዚአብሔርን ከሓድያን፡ ቆረብትን ተሓሰምትን፡ ቀተልትን መሓርትን፡ ኣሰርትን ፍትሓውያንን... ወዘተ ኣብ ንጽል ይዂኑ ጅምላ ክውነኑ ዝኽእሉ ስጋውያን ጸጋታት ኴኖም፡ ዋንነቶምን ምንጮምን ግን ካብ ቅድስት ቤተክርስቲያን ኢዮም። እዞም ሃብትታት 'ዚኣቶም ንሓደ ንሓደ ተባሂሉ ዝንፈጉን ዝወሃቡን ዘይኮኑስ፡ እንተላይ ንስጋውያን ሰባት ተዓዲሎም፡ ኣብዛ ዓለም ዘለዉ ሰባት ዝረብሕሉ ባይታ ንምጻፍ'ዩ።

√ ንኣብነት ጥበብን ፍልስፍናን ፡ሳይንስን ምርምርን፡ ዲሞክራስን ዲፕሎማስን በይኖም፡ ካብ ዜሮ ኣእምሮ ፈሊቖም ኣብ ደቂ ሰባት ዝሰረጹ ከምዘይኮኑ፡ ባዕሎም እዞም ተኸተልቲ ናይዞም ዓውድታት'ዚ ዘብርህዎ ሓቂ ኣሎ። እዚ ከኣ ኣብ ናይ ነፍሲ-ወከፎም ገለጻ፡ ከም ምንጭን መወከስን ኢሎም ዝጥቀምሉ፡ መጽሓፍ-ፍቅዱስ ወይ ከኣ ተፈጥሮ ከም ዋና ኣብነት ምጥቃስ ይከኣል። ብቅድስት ቤተክርስቲያን ከም ቅዱሳን ዝጥቀሱ፡ ብተመራመርቲ ግን ከም ኣብነታውያን ሰባት ዝርቊሑ ሰባት ኣብ መጻሕፍቶም ከም መወከስን ጭብጥን ተጠቒሱ ንረኽቦ። ስለዚ ቅድስት ቤተክርስቲያን ነዚ ሃብቲ'ዚ ኣብ ቤይና ከይኮነ፡ ነቶም ኣብ ውሽጣ ዘየለዉ'ውን ከይተረፈ፡ ካብ'ቲ መርዓዊአ ዝሃባ ውህብቶታት ከምዝካፈሉ ትገብር ምህላዋ የመስግና እምበር ኣየውቅሳን። ብኻልእ ኣዘራርባ፡ ኲላቶም ኣንበብቲ ናይ መጽሓፍ ቅዱስ ኣመንቱ ጥራይ ዘይምኻኖም ዝተፈልጠ ሓቂ ስለዝዀነ፡ ንጥበብን ጠቓምነትን መጽሓፍ ቅዱስ ኲሉ ሰብ ዝሃርፎ ምዃኑ ክንርዳእ ንኽእል።

√  ነገረ ተፈጥሮ'ውን ከምኡ። ኣብ ናይ ኦኮሎጅን ስነ-ተፈጥሮን ዘጽንዕ ዓውዲ ስነ-ፍልጠት፡ ንመጽሓፍ ቅዱስ ደጋዊ ኣፋቶም ይኽሕዶ'ዩ፡፡ ኣብነታዊ ኣሰራርዓ ፍጥረት ንምርዳእን ጥሙር መጽናዕቲ ንምክያድን ግን ካብ ኣስማት ተፈጥሮ  ጀሚርካ ክሳብ ጅን (DNA) ካብ ልቦም ጐልሑ ዝረአ ምንጭታት ኣሎ። እዚ ከኣ ሓደ ሰራሒ፡ ወይ ጥበበኛ ኣካል ከምዘሎ መጽሓፍቶም ክመርሓካን ከረድኣካን ይኽእል'ዩ። ኦኮሎጂ "ናይ መጀመርያ ፍጥረት ባክተርያ'ዩ!" ኢሉ ድምዳሜ ክህብ እንከሎ፡ ፈጣሪ ባክተርያ መን ምዃኑ ግን እናፈለጦ ከረድእ ኣይደልን። እቲ ዘገርም እምበኣር እዚ ፍልጠት'ዚ ኣብ ቅድስት ቤተክርስቲያን ኣቐዲሙ ዝጸነሐን ሕጂ ምህላን ዝተፈልጠ ምዃኑ'ዩ። "ሰማይን ምድርን ዝረአን ዘይረአን ዝፈጠረ!" ተባሂሉ ዝንገር ዜና መቸም ካብ ጥንቱ ኣብ ቤተክርስቲያን'ዩ። ስለዚ ሓደ ናይ ኦኮሎጂ ወይ ባይሎጂ ተማራማሪ ብዛዕባ ዘይረአ ፍጥረት ክዛርብ እንክስማዕ፡ "ዘይረአ ፍጥረት!" ዝብል ኣምር ሓድሽ ትምህርቲ ዘይምዃኑ ኣቐዲምካ  ምፍላጥ የድሊ። እምብስኣር ዋንነቱ ናይ ቤተክርስቲያን ዝኾነ ጥበብን ፍልጠትን፡ ብተዘዋዋሪ መገዲ ዋላ ነቶም ዘይኣመንታ ክወሃቦም እንከሎ ንርዳእ።

"ቤተክርስቲያን ትህብዶ ትልምን፧" ዝብል ዛዕባ እምበኣር ብገለ ጫፋቱ፡ ኣብ ላዕሊ ከምዝተመለሰ ዝተፈልጠ እኳ እንተዀነ፡ ኣብ ዝቕጽል ክፋላት ብሰፊሑ ክንድህሥሶ ኢና። እዚ ድማ ነቶም ኣፎም ከፊቶም "ቤተክርስቲያን ትልምን ኣላ" ኢሎም ብሑጓ ወይ ብዓውታ ዘባጭዉ ዘለዉ፡ ደቃ ተመሲሎም ኣጥባታ ዝነኽሱ፡ ካብኣ ተማሂሮም ክንሶም "ተዘይመሃርናኪ!" እናሉ ኢዶም ዘወጣውጡ፡ ኃይለ ክሂሎታ ዘይተረድኡን ኣካላት ብዝግባእ ባዕሎም ከም ዝግንሑ  ዝገብር ጽሑፍ'ዩ።  እግዚአብሔር አምላኽና ኃይሊ ጸረ-ቤተክርስቲያን ኣድኪሙ፡ ኃይሊ ረዲኤቱ ይልኣኸልና!
2ይ ክፋል ይቕጽል

ወስብሐት ለእግዚአብሔር!