በስመ ሥላሴ!
ኣንቱም ሰባት ኣሻቡ ነጸላይ ጠፊኡ
ተሰሪቑ ድዩ ወይስ ባዕሉ ተሓቢኡ
ተጸይቑ ደኣ ከይከውን ቀይሩ ጻዕድኡ
እንድዒ ኣይፈለጥኩን
ግን ከኣ ፈሊጠ ኣለኹ ከምዝጠፈአ
ይርድኣኒ ኣሎ ውነይ ከምዝተቐልዐ
እንታይከ ጻዕዳ ባድላ ክኽደነሉ ልበይ'ናተበልዐ
ብዘይ ነጸላኸ መዓስ'የ ጸቢቐ
እምበኣር 'ዝረኣየ-ዓይኑ ይብራህ
ነጸላይ ዝረኸበ ምክሊቱ ይብዛሕ'
እናኽብል እኔኹ ኣብ ቀራና-መገዲ
ነጸላይ ከይረኸብኩስ ከመይ'ለ ይእቶ ዓዲ
ዓድስ ምኣተኹ ዓዲ'ቶም እምባጋሮ
መንፈሶም ብሕፍኒ ውድቀቶም ብምዕሮ
ደጊኦም ሱፍ ብውሽጦም ግድጊዳ
ወለዶም ሰብ ሶዶም ብህሎኦም ምድረ-በዳ
ናብኡ ደኣ መኣተኹ'ባ ነጸላይ ብግፍፉ
ዓርኪ ዴማስ ኬነ ተሰሎንቌ ምኣተኹ
ደቂ ተሰሎንቌ ምተቐበሉኒ ብዕልልታ
ደገይ ምተወነ ነብሰይ ብስቅቕታ
ዓጀብ ምገረሞ ሰማዒ
ምስኣቶም ንምዃን ደኣ 'ታይከ ኣሎ ቅጥዒ
በላዒ ሰብ ንምዃንሲ ኣየድልን'ዩ ወግዒ
እምበርከ
ምስኣቶም ኴነስ እንታይ'ለ ምሓሰብኩ
ሓሳበይ ብዕጽፉ እንታይ'ለ ምመደርኩ
'ዘራፍ!' ምባልዶ ምውሓደኒ
ተልእኾይ ብውንዝፉ 'ክሉ ኣይትሓዙኒ'
እናኽብል ዳስ መፍረስኩ ዳሰይ ብፍርሱ
ያኢ
ዳስ ኤልያስ ወጴጥሮስ ከፍርስ ኢደይ ምተመንዐ
ደም ደቂ ጊወርግስ እምብዛ ምነተዐ
ዳሓራየይ ምኸፈአ ልበይ መትረርኩ
ልብሰይ ደርብየ ባርኖስ ዲዮቅሊጣኖስ ምለበስኩ
ዘይቄሳራዊ ቅምጥ'ለ ዌሳር ምመሰልኩ
ኣማሲኡስባ ምሓፈርኩ
እወ ንይሁዳ መሲለ መስቆርቆርኩ
ኣየ ዓዲ ቄሳር ዓዲ ሶዶም
ዘይዝናን ምድራውነትንሲ ካልእ'ታይ ግዶም!
ኣነ ግን ኣብኡ ኣይኮነን ዓደይ
ብኡኡ ኣይኮነን'ቲ ዝሓልፎ መገደይ
ንሳቶም ኣይኮኑን ናይ ጥንቲ መኻይደይ
ባቢሎን ኣይኮነን ርስተይ
ሕይወቶም ኣይኮነን ሕይወተይ
ዕረፍቶም ኣይኮነን ዕረፍተይ
ከም ሰረገላ ፈርዖን ባሕሪ ኣይኮነን መወዳእታይ
ኣለኒ ካልእ ናተይ መወዳእታ
ብጻዕዳ ነጸላ ልበይ ብውንዝፍታ
ከምኣ'ለ እናዓበኹስ ከምኣ'ያ መወዳእታ
ደኺመ ዘዕርፈሉ ወዲቐ ዝትንስኣሉ
ሓዚነ ዝነብዓሉ ተሓጒሰ ዝዝምረሉ
ኣብ ዕለተ-ኣርብዓ ዳግም ዝተወለድክሉ
ኣብ እርጋነ-ዘርባዕባዕ ጽባሕ ዝግነዘሉ
ነጸላይ ይሕሸኒ ሰብ ዘምስለኒ
ኣብ'ቲ ግሩም መርዓ ዘገርመኒ
ካብ'ቶም ዕዱማት ፈልዩ ዘይሕፍረኒ
መርዓዊ ምስ መጸ ፈጺሙ ዘየንቅፈኒ
ንሱ'ቲ ጻዕዳ'ዩ ዘመልክዓኒ
ኣክንዲ ቆጽሊ ኣዳም ነጻላይ ይሕሸኒ
ከም ዲኖ ናይ ቆርበት ሕፍረተይ ዝኸድነኒ
ንዝዋውዕ ልበይ ሻሽ ዘምስለኒ
ነጸላይ ይሕሸኒ ናብ ብርሃን ዝመርሓኒ
እሞ ጻዕዳ ዝለበስኩም ዳልዩኒ ግዳ
ሸቃጦ ከየውረድዎ'ከለዉ ንዕዳጋ
ክምለስ ናብ ዋንኡ
ኢደይ-ኢድካ ንብል በኣጋ
ተጻይ-ተጻራሪ ከይሸጦ ብዘይዋጋ
ኣዳልዩኒ ግዳ
እወ ኣነሞ
' ነጸላ ዝጸልእ 'ተዘይኮይኑ
መን ከይሰርቆ
ብጻዕዳ ዝቐንእ 'ተዘይኮይኑ
ንሕብሩ መን ከይፍሕቖ'
ኢለ'የ እናሻዕ ዝጥርጥር
ብውሽጠይ ይሓርር
እምበርከ፡-
ንነጸላይ ደኣ ፈታዊዶ ከይቀዶ
ብዘይካ ጸላእስ መን ከይወስዶ
ኣቦ ጸልማት ተዘይኮኑኸ መን ከይህንቊጦ
እቲ ነጸላ ዝበልክኹም
ልበይ'ዩ ካልእ ኣይምሰልኩም
ውሽጠይ ምስ ጸበቐ'ዩ ደሚቐ ዝረኣየኩም
እቲ ቀደም-ቀደምሲ ነጸላይ ነጸብረቓዊ
ውሽጠይን ደገይን ሙሴ ከም ናዝራዊ
ነይረ'ንዶሞ ኮይኑምበር
ክወግሕ ክመሲ
መሕደሪኡ'ዩ ነይሩ ልበይ ንመርዓዊ
እምበኣር ኣንቱም ንልቢ እትሰልቡ
እንሄትልኩም ልበይ ስለብዋ
ጥቓኹም'ያ ዘላ ጻዕዳ ኣምስልዋ
ደሊኹም ርኸብዋ ኣካሉ ግበርዋ
ጠቐራ ኣልግስኩም ነጸላ ወንዝፉዋ
ልበይ'ዛ ጻዕዳ መንፈሳ በዂቢኹ
ቀይሕ-ጽልማ ብጠቃር ጽልሚ ተተኪኡ
'ናረኣኹሞ 'ዚ ሽጠይ ተቐሊዑ
ምግባሩ ነጺፉ ብጻብእቲ ተበሊዑ
ስቕ ኣይትምረጹ ኲልንትናይ ከይቅርዑ
ነጸላይ ኣዳልዩኒ ንልበይ ክጽግኖ
ቀልቢ ንዘየብሉ ልቢ'ውን ኣነ ነጸላ ክኾኖ
ብጻይኩም ግበሩኒ ንቐልበይ ፈጣሪ ክውንኖ!
ሎቱ ስብሐት!
 |
| ጻዕዳ ነጸላ ጠፊእኒ! |
