በስመ ሥላሴ

ሸቃጢ-ወረ፡ ሸያጢ ሓሳብ...!!

 መዘና ነይሩና ካብ ኲሉና ዝወዓየ

ኣኸዓየ ከይተባህለ ኣብ ካልኡ ዝዓበየ

ሰማይ ከይነጐደ ከተማ ዝረኣየ

ሰልዲ ዝለመደ ጥሪት ከይጓሰየ

ነይሩ ዓርክና ንፉዕ በዓል ሸቐጥ

መሃብን ምቕባልን ኣጸቢቑ ዝፈልጥ

ልሳናት ዘብዝሐ ዝረስዐ ናይ ኣዲኡ

ብህሮሩማ ጽሓይ ዝኾልል ፈቐድኡ

ፈቐዶ 'ናኣውተቡስ ፈቐዶ ከተምኡ

ሸቂጡ-ሸቓቒጡ ዘደንፈዐ ጅቡኡ

ዓድና ተመሊሱ ምስ መለአ እንጀርኡ

ዱንኳን ተኺሉ ብወዝቢ

ሕዝቢ ናብ ዱንኳኑ ዓሲሉ

ደሓራዩ ግን ኣይግድን እንድዕሉ

ናይ መዘና ገይርናዮ ኣዚና ሻቒልናሉ

ክልተ ኴንና ኬድናዮ 'ንከሎ ኣብ ዱንኳኑ

ስለዝሰጋእና ሸቐጡ ከይዓኑ

ምኽሪ ይኹን ሰልዲ ከይሰኣኖዶ ዋጋ

ድግፍ ከነብሎ ከይከሰረ ብኣጋ

ኢልና ዝመጻናዮስ ኣስሚዑና ጉዱ

ክንውከሶ ጀሚርና ከመይ'ሉ

ከምዝተመልሰ ዓዱ

ከመይ'ሉ ክዓብን ክወድቕን ከምዝጀመረ

ተወኪስናዮ ደጋጊምና በብእብረ

ንሱ ግን ስሒቕና ልቡ'ናትረረ

ብሜላ ኣረዲኡና ካልኡ ከምዝቐየረ

ሓሳባት ዓዲጉ ሓሳባት ከምዝሸይጥ

ልምድና በቲኑ ልምዲ ጓኖት ኣብ ማእከልና ከቐምጥ

ከምዝኾነ ስርሑ ነገረና ኣርሚሙና

ያኢ ንሱ ህርድግ ይብል ምሳና ክመያየጥ

ጉዳም'ዩ ነገሩ

ዘይትረአ ሸቐጥ ስውርቲ ዱንኳን ቀይሩ

ዝተመምየ ዘይተመምየ ወረታት ኣኻኺቡ

ናብ ሕዝቢ ይሸይጥ ብዕጽፊ መኸሰቡ

ወረ ገፊጡ ወረ ይዝርግሕ

ሓሻካ ንሕና ከም ሩዋንዳ 

ነንባዕልና ክንጉያሕ

ኣካ ንሱ ከም ዓውዲ መኼዳ

ብእኽሊ ብሰልዲ ጅቡኡ ክሰብሕ

ምስ ነቓሕና ግን ለካ ተረዲኡና ቊንቊንኡ

ማዕከን ዜና ክተልክ'ዩ'ቲ ነይሩ ዕላምኡ

ህዝቢ ከናቚት ደቀ-'ቡኡ ደቀ-'ዲኡ

"ኣየ ዓርክና!" በለ'ቲ ካልኣየይ

ኣርሚምዎ ስራሕ ናይ ኣኻዓየ!

ተቛይቑ ገሲጽዎ

ምዒዱ ንዓጋቢ ሂብዎ

"ስማዕስከ መዘና!" በለ፡

"ምልዖ-ዓየ ከይጸገብና ጀሚርካልና ኮረሜለ

ኣሽንጦ 'ናኰዓትና ጀሚርካ ብርለ

ዓንቋ ከይጸገብና ኣሪኢኻና ኣራንሺ-ሜለ

ብዕሪር 'ና ሓየኽና ኣቕኒእካና ብማስቲካ

ኣብ መጽዓኛ 'ናሃለና መኪና ሰሪርካ

ካብ ካኪ ከይወጻና'ውን ጅንስ ተኸዲንካ

ጥሪት'ናወፈርና ዱንኳንካ ተኺልካ

ግርም!

ንሱስ ደለ ምኾነ ሕጂ'ዩ ዝገደደ 

ሕዝቢ ዓድና ንዕዳጋ ብእግሩ እናኸደ

ሰቲርካዮ ኔርካ ዕዳጋ ኣምጺኻሉ

ዕዳግኡ ሸቐጡ ቀረባ ገይርካሉ

በዚ ተሓጒስና በቲ ግን ጒሂና

ስግኣት ኴንካዮ መጻኢ ትውልድና

ጉድ ለሚዶም ናይ ዓድና ቆልዑ

ዱኳንካ ዘልመዶም ባህሎም ተረሲዑ

ዘይስተ ክሰትዩ ዘይብላዕ ክበልዑ

ቀጠፍ-ጠፍ ለሚዶም ልምዶም ተመንዚዑ

ኢልና ስግኣትና ከይወዳእና

ሕጂ ከኣ ሓድሽ ኣምጺኻልና!"

ኢሉ ደርዲርሉ ኲምራ ሓሳብ ኲምራ ምኽሪ

ኣነ'ውን ምኽረይ ደጊመሉ

ዱንኳኑ ከይተምጻልና ነፍሪ

ሸቐጡ ከየፍርየልና ነውሪ

ቃንዛይ ምረተይ ደርጒሐሉ

ትውልዲ ከይሓድግ ናይ ዓዲ

ከይሓቅቕ ኣሰሩ ምርቓ ወለዲ

ኣብ ዱንኳኑ ከይዕደግ ከይሽየጥ ናይ ባዕዲ

ኢለ ሕሩመይ ተቛይቘዮ

ገለ ተሰምዓኒ ልክዑ ኣስሚዐዮ

ሓቢርና እምብልና ኢልናዮ

ምስጢሩ ንህዝብና ኣረዲእና

ሓሳብ ኣይንሸይጥ ሓሳብ ኣይንዕድግ

ባህልና ኣንልውጥ ሃይማኖትና ኣይንሓድግ

ኲልኹም ለባማት'ውን ዓገብ ኣባሃሉና

ጽቡቕና ከይበንን ከይርሳዕ መልክዕና

ትውልዲ ከይዓኑ ዱንኳኑ ይዕጸወልና

ሸቃጢ ወረ ሓሳቡ ይኣክበልና!

"በዚ ዓመት'ዚ ሓደ ወረ ክውረ፡ በቲ ዳሕራይ ዓመት ድማ ካልእ ወረ ክውረ፣ ኣብ ሃገር ከኣ ዓመጻ ክስልጥን፣ ገዛኢ'ውን ኣብ ልዕሊ ገዛኢ ክለዓል'ዩሞ፡ ኣይትሰንብዱ! በቲ ኣብታ ሃገር ዚስማዕ ወረ ከኣ ኣይትፍርሁ። (ኤር 51፥46)

"ምጅማር ቈየቛ፡ መንደቑ ከምዝጠሓሰ ቐላይ'ዩ፡ስለዚ ናብ ምሕርቃም ስኒ ከይበጸሐ፡ካብ ቈየቛ ርሓቕ!!"(ምሳ17፥14)

ሎቱ ስብሐት!

ግናሕ ገናሒ!

በስመ ሥላሴ

ግራት ነይርና እኽሊ ዝፈሶ

ርብዒት ክዒኻ ቆፎታት ዝሕፈሶ

'ደኲዑኒ' ዝብል ብዛላ ብገንሒ

እርጋን ዘይንታዩ ዝልለ ብስብሒ

ተረፈ ህጥራኑ የብልዕ የጒስዕ

ለምሊሙ ዘለምልም

ከረምቲ ኮነ ቀውዒ

ጸረ-ሓጋይ ጸረ ጥሜት

ዓርኪ ጽጋብ ዓርኪ ብልዒ

እወ ግራት ነይርና በዓል ኣልቦ ብቂ

ትውልዲ ዘሳግር እሙን ብዓል ሓቂ

ምስ ፈጣሪ ዝዓርኽ ጸረ ናይ ድርቂ

ግሩም ወረጃ ደረጃ ኪደቱ

ንዂሉ ዝሕሉ ግዝያት ሰዓቱ

ካብ ገንሒ ናብ ጒንሒ

ካብ መኼዳ ዓውዲ

ይኣቱ ዓዲ

ናብ ቆፎ-መኣዲ

ንስድራ ይሓቕፎ

የሳግር ትውልዲ!

ግራት ነይሩና ምስ ፈጣሪ ዝላዘብ

ምስ ሰማይ ተሻሪኹ እዝመራ ዝስሕብ

ምስ ወቕቲ ዓሪኹ ጠሊ ዝዝዕግ

ክንዮ ምጥዋር ከርሲ ክንዮ ኲሉ መዝገብ

ልቢ ሓረስታይ መንዚዑ ብርትዒ ዝዕድግ

ዓዲጉስ ምስ ኣምላኹ ኣብ ቀውዒ ዘላዝብ

እወ ግራት ነይርና ገንሒ ዝልማዱ

ወፈራ ዝዕድም ዓዲ-ብዓዱ

ዝጽጋእ ዝሕረስ ዝዝራእ ዝበቊል

ዝጸሀ ዝጒሰ ዝጒናእ ምህርቲ ዝፍልፍል

ግራት ነይርና ብርሃጽና ዝጭቁ

ክንዮ ምህርቲ ፍቕሪ ዝምንጩ

ንድኻ ዝጥውር ንሃብታም ዝመክር

ንጥሪ መኪቱ ቃል-ኪዳን ዝተክል

ግራት ነይሩና ግራት ዓደቦ

እኽልኻ ዝድፈኖ እምነት ዝሕለቦ

ብጽምዲ ብመሰለስ ብርባዕ ዓጸፋ ንምገቦ

መሓዛ መስተርሆት ጸረ ዓጸቦ

ገናሒ ግና ይፈቱ ነይሩ

ገናሒ ሓራሲ ዝኽእሎ ጫዂሩ

እወ ይጠልብ

ሓረስታይ  ብዓል ሞያ

ናውቲ ይዳለዉ ይጽረቡ ብሞያ

ትርኑዓት ዝራብዓት ይጸርዩ ብሞያ

ምስ ቶስታይ ይጽመዱ ብሞያ

ሓረስታይ ይትልም ይገንሕ ብሞያ

ኲሉ ይዕመም ብሞያ

ዐዕዮኦም ይዓዩ የምጽኡ ማሃያ

ኣየወ ግራትና

ግራት ፍረ ሓቂ ግራት ሞያ

ግራተ-እምነት ግራተ-ማሃያ!

ልብና'ውን ነይራ ግራት ናይ ፈጣሪ

ገኒሑ ዝዕረቓ ዝውስኸላ ዕምሪ

እንሓንሳእ የስብሓ ብቃሉ ይድኲዓ

ዛላ ይገብረላ ብመንገዱ የቕንዓ

ንሳ'ውን መስቲያት ኰይና

ንምስሉ ምንጸባርቕ  ትኽእሎ ኰሊዓ

ንሳ ዋኒኑ ንሱ ዋናኣ

መሸጎራ ከይዕጾ ብድምጹ ይኲሕኲሓ

ደርቂ ከየንቅጻ የንብዓ ብንስሓ

ዝናብ ኰይኑ ምሕረቱ ይሓጽጽባ

ንሳ'ውን እናሻዕ ትግንሓሉ ፍቓዱ ይመርሓ

ስለ ግራቱ ክብል ኲሉ ቀሪብላ

‘ታይ ከ ኣሎ ዘይቀረበላ!

ኣብ ትልሙ ዝሓርሱ ዝገንሑ ሰብ ሞያ

ዝዘርኡ ዝዂስኲሱ ዝጽህዩ ቡቋልያ

ዘኺዱ ሰብ ዓውዲ ሰብ መስቀል ሰብ ጉያ

ናይ ሰማይ ዝነግሩ

ናብ ሰማይ ዘሳግሩ

ልብን ፈጣርን ዝዓርቁ ዘላዝቡ

ስልጣኑ ከይበቐቐ ዝሃቦም መዝገቡ

" መግቢ ናይ ሰማይ ኣብ ምድሪ ተረኺቡ"

ኢሎም ዝእውጁ ብትውልዲ ዘይግደቡ

እኔሄዉ ኣብ ቤቱ!

ልቢ ክሳብ ዘላ ኣለዉ ዝዛልይዋ

ንቡራ ክምለስ እናሻዕ ይጽውዕዋ

እንታይ ደኣ ኰይና ሕጂ'ዛ ልቢ

ሓረስቶት እናሃለዉ ትሃቢ

ግራቱኮ ነይራ'ያ ግራት ናይ ፈጣሪ

ተፍሪ ነይራ ፍረ ናይ ግብሪ

ሕጂ ግና ሓንጊዳ ተሪራ ብትሪ

እንተ ንሱ ይኹን ወይ'ውን ሓረስቶቱ

ትእበ'ምበር ነይግድዳ ጐቲቱ

ልቢ ግና እንድዕላ

ባዓላ ዓጽያቶ'ላ ዕድላ

ግራቱ ማዃንዶ ኣይምሓሻን

ቃድራ ደኣ'ታይ ኣለዎ ርሻን!

እግዚአብሔር ገኒሑ ይተዓረቐና

ሎቱ ስብሐት!

ሰብ መን'ዩ! ንመንከ ይመስል፧

                                                             በስመ ሥላሴ

ሰብ መን'ዩ! ንመንከ ይመስል፧

እንቋዕ መስቀልና በረቐ!

እንቋዕ መስቀልና በረቐ!

መን'ዩ ብመን ክምስል፧ ንመንከ መን ይመስሎ፧ ብላዕሊ እንተጀመርካ ወይውን ብታሕቲ፡ ሓታትን ተሓታትን ዘየድልዮ ግሉህ መልሲ'ዩ። እዘን ዝተጠቕሳን ዝስዕባን ሕቶታት ሸፈፍ ኢልካ እንተሓሊፍካየንን እንተዘይሓሊፍካየን፡ ልዕልናን ዕብየትን፡ ዕምቆትን ጥልቀትን፡ ስፍሓትን ርቀትን ናይ ፈጣሪ ንምርድኡ ሸውሃትካ ኣይክኽፈትን'ዩ። ብኡኡ መንጽር ባሕርይ ሰብን ካልኦት ፍጥረታትን ንምርዳእ ሓኾትኮት ኣይክትብልን ኢኻ። ምሕታትን ምሕሳብን ኣወንታዊ'ዩ፡ ግን ከኣ መዓስን ንመንን ብኸመይን፡ በብተርታ ክሕለፍ ዝግብኦ ወሳኒ ሰንሰለታዊ ኣስካላ'ዩ።

ተመልከት! 'ፈጣሪ ንመን ይመስል!' ሰብ ንመን ይመስል! ፍጥረታት ንመን ይመስሉ! 100 ካብ 100 ንፈጣሪ ዘመስል የለን! 100 ካብ 100 ንወዲ ሰብ ዝመስል የለን። 100 ጥራይ ኢያ ን100 እትመስል። ን100 ቈጺርካ ዘይውድኡ ዝተሓዛዘሉ ቊጽርታት ከምዘቖምዋ ግን ኣይዝንጋዕን። ንኣብነት ኣብ መንጎ ዜሮን ሓደን ዘለዉ ቊጽርታት ከንደይ ኢልካ ክትጽብጽቦም። ነፍሲ ወከፍ ቊጽሪ ርእሱ ዝኸኣለ ስምን ዓቐንን ኣለዎ። ከምኡ’ውን ሰብ! ሓሙሽቴኤን ዓጻብዕቲኳ ብቚመት ይኹን ብርጒዲ ኣይመሳሰላን። ነፍሲ ወከፍ ፍጥረት፣ብዘይ እንከ ንዋላ ሓደ ኣይመስልን! 

‘ወዲ ሰብ ንወዲ ሰብ ይመስል' ከይንብል፡ እቲ ብምስሉ ዝፈጠረና ፈጣሪ፡ ከምዘይንመሳሰል ገይሩ'ዩ ፈጢሩና። ኣሽንኳይዶ ሰብ ንሰብሲ፡ ኣብ ውሽጢ ሓደ ኣካል ናይ ወዲ ሰብ ዘለዉ ነገራትኳ፡ ጸብጻቢ ተዝጽብጽብ ክንደይ ኢሉ ምቘጸረ! ናይ ዘመንና ስነ-ፍልጠት ክዕቅኖ ብዝኽእል መዐቀኒ'ኳ፡ ካብ  (Atom) ጀሚርካ-ክሳብ ምሉእ ሰብነት ንዘሎ ዝተሓላለኹን ዝተመሳቐሉን ተናበብቲ ክፍሊ ኣካላትና፡ ንኽትመሃሮም ክንደይ ዓመታት ክትቖጽር ትግደድ ኢኻ። ዘገርም'ዩ! ሰብ ክንስኻስ፡ ብዛዕባ ሰብን ኣብ ሰብ ዘለዉ ነገራትን ንምፍላጥ 15-20 ዓመታት ኣብ ዝተፈላለየ ደረጃ-ኣካዳምያዊ ትምህርትታት፡ ተማሂርካ ተተፈቲንካ ክትሓልፍ ኣለካ። ተዘይሓሊፍካ ከኣ፡ እቲ ክትፈልጦ ዝደለኻ ብዛዕባ ሰብ፡ ትኽልከል ማለት'ዩ። 

በንጻሩ ካልእ ዘገረም ታሪኽ እንተሎ ድማ፡ ማንዋል ናይ ኣመጻጽእ ሰብ ዘመልክት እሙን ናይ ሓቂ መዝገብ፡ ኣብ ኢድ እግዚአብሔር ምህላዉ'ዩ። ንሱ ጥራይ ዘይኮነ'ውን፡ 'ንሰብ መን ኣምጺእዎ፧ ንምንታይ ዕላማ፧ ብምንታይ ገይሩ ሰሪሕዎ፧ መወዳእትኡኸ ሰብ ናበይ'ዩ ዝኸይድ፧' ዝብሉ ዓንዲ-ሕቖ ታሪኽ ኣመጻጽኣን ኣፈጻጽማን ናይ ሰብ፡ ኣብዛ ማንዋል'ዚኣ ተዘይኮይኑ ኣብ ካልእ ክርከብ ዘይምኽኣሉ'ዩ። 

ነዚ ኲሉ ዘይምምስሳል፡ ዘመሳስልን ዘዛንቕን ግን ካልእ እንርእዮ ሓቂ ኣሎ። ንኣብነት….!

ኣብ እግዚአብሔር ሓድነትን ሠለስትነትን ኣሎ። እቲ ሓድነቱ ንሠለስትነቱ ኣይጭፍልቖን፡ እቲ ሠለስትነቱ ንሓድነቱ ኣይብትኖን።እግዚእአብሔር ብሓድነትን ብሠለስትነትን ካብ ዘለዓለም ክሳብ ዘለዓለምን፡ ከይደቀሰ ከይተታኸሰ፡ ከይደኸመ ከይሰልከየ፡ ከይደኸየ ከይነደየ፡ ከይኣረገ ከይሓቐቐ፡ ኣብ ነፍሲ ወከፍ ፍጥረት፡ ምሉእ ግዝኣትን ቊጺጽርን፡ መግቦትን ለውሃትን ከይተነፍጎ፡ ንዘልዓለም ጸኒዑ ይነብር። 

ፍጥረታት ንሰብ ወሲኽካ፡ ብመጠት'ቲ ፈቒዱን ተገዲሱን ዝፈጠሮም፣ ዘዘድልዮም እናሃበ ይነብር። እረ ብፍላይ ንሰብ ፍልይ ዝበለ ልግሲ ዝሃቦ እንተሃልዩ፡ ብኣምላኻዊ መዐቀኒ ዝዕየር ናይ መስቀል ተበጃውነት’ዩ። ሰብ ከም ባሕሪኡ ብዘይ ፈጣሪ ናብ’ዛ ዓለም ክመጽእን ክህሉን፡ ብዘይሰብ'ውን  ክነብርን ናይ ሰብ ነገር ክረክብን ኣይከኣሎን’ዩ። 

እምበኣር ፈጣሪ፡ ‘ነቲ ሰባት ብዘይፈጣሪ ምምባር ኣቋሪጾም፡ ፈጣሪ ንምዃን ብዝፈተንሉ ኪደት፡ ኣብ ዓይኒ ፈጣሪ ከም ዓቢ ዕልዋ መንግስቲ ኣምላኽ ስለዝተቘጽረ፡ ሰባት ብፈጣሪኦም እናተወቕሱ ዘመናት ኣቚጺሮም ነይሮም። ሰባት ብስልጣን ፈጣሪኦም ምስተፈርዱን ምስ ወረዱን፡  መሓርነቱን ይቕሬታነቱን ዝግለጸሉ እዋን ከምዘሎ ከም ትንቢት ኣምሲሉ ኣበሲርዎም ነይሩ`ዩ። እዚ ተወቃስነትን ፍዳን’ዚ ዘብቅዓሉ ግዱብ ግዜ ስለ ዝነበሮ ከኣ፡ ፈጣሪ ከም ቃሉ፡ ሰብ ኮይኑ መጺኡ፡ ንሰብ ዳግማይ ሓድሽ ሰብ ንክኸውን ዓቢ በሪ ከፈተሉ። ኣምላኽ ሰብ ኮይኑ ተገሊጸ! እወ እግዚአብሔር ካብ’ቶም ሠለስተ ኣካላቱ፡ እቲ ወልድ ዝበሃል ሓደ ኣካል፡ ክእመን’ምበር፡ ብልሳንን ሕልናን ፍጥረት ክትረኽ ብዘይክእል ኣምላኻዊ ጥበብ ተገሊጹ።  ብዘይካ ሓጢኣት ሰብ፡ ካልእ ኲሉ ባሕርይ ሰብ ለቢሱ፡ ኣብ ሰብ ተጸኒሱ፡ ካብ ሰብ ተወሊዱ፡ ብኢድ ሰብ ተመጊቡ፡ ምስ ሰብ ተመላሊሱ፡ መወዳእትኡ ከኣ፡ ኣብ ቀራንዮ መስቀል ኣምላኻዊ መስዋእቲ ብምኽፋል ንሰብ ዳግማይ ሓዲስዎ። 

እዚ ኲሉ 'ከመይ እንታይ፡ ብኸመይ ስለምንታይ፧ ከይበልካ ከም ቀዳምንተትን ቊጽሪ ሓደን ክእመን ዝግብኦ ሓቂ'ዩ። ከምቲ ሕጻን ናብ ናብ ምሉእ ስብእና እናዓበየ ኣብ ዝመጻሉ፡ ነቶም ብእምነት ጥራይ ዝቕበሎም ዝነበረ ነገራት፣ ክምርምሮምን ክሓተሎምን ጥልቀታዎ ፍልጠት ክብርብረሎምን ዝጅምር፡ እኹል ኣማኒ እግዚአብሔር ዝኾነ ሰብ’ውን፣ ምስ ኣመነ ሕቶ ከለዓል ባሕርያዊ'ዩ፡፡ እወ፣ ብዛዕባ ፈጣሪ ንምፍላጥ፡ ምሳሌ ንምርካብ ናብ ፍጥረታት  ተንቃዕዱ። ሽዑ፡ 'ንምሳሌ፡ ንኣብነት፡ ንበልሞ....!' እናበልካን እናተበሃልካን፡ ነቶም ዝረኣዩ ፍጥረታት እናጠቐስካ፡ ነቲ ንዘመናትን ንትውድታትን ተሰጋጊሩ ዝመጸ ቅዱስ መጽሓፍ መወከሲ ብምግባር፡ ብዛዕባ ባሕርይ ፈጣሪ ክትነግርን ክትሰምዕን ትጅምር። እንተኾነ ፍጥረታት ንፈጣሪ ንምምሳል ብቕዓት ስለዘየብሎም፡ እቲ ዝተደልየ ቊንጣሮ ምርዳእ ምስተረኽበ፡ ዝተረፈ ብእምነትን ሃይማኖትን ይድምደም።

እወ፣ ብዛዕባ ፈጣሪ፡ ካብ'ቲ ዝተነግረ፡ እቲ ዘይተነግረ፡ ካብቲ ዝተበጽሐ እቲ ዘይተበጽሐ ኣዝዩ ይበዝሕ። ከምኡ'ውን ብዛዕባ ሰብ! ፈጣሪ ንሰባት ከምዘይፋለጡ ገይሩ'ዩ ፈጢርዎም። ሓደ ነቲ ሓደ፡ እንታይ ሓሲቡ፡ እንታይ ገይሩ ኣይፈልጦን።  ብዛዕባ ሰብ፡ ካብ'ቲ ንፈልጦ ዘይንፈልጦ ይበዝሕ። ኣብ ሰብ ዘለዉ ነገራት ጸብጺብና ኣይንውድኦምን። ካብ ንውለድ ክሳብ ንዓርፍ፡ ንውሓትን ቊጽርን ጸግሪ ርእስና ኣይንፈልጦን። ንዂሎም ክፋላት ኣካላትና ግን ከከም ኣቀማምጠኦም፡ ክሳብ'ቲ ዘለዎም ዕድመ ንሓደ ዕላማ፡ ማለት ንምምባር እናተጠቐምናሎም ንነብር። ክፋላት ኣካላትናስ ለካ ዝተፈላለዩን ዝተፈላልየ ኣቃውማን ዘለዎም ክንሶም፡ ብሓድነት የገልግሉናን ንግልገለሎምን።

ብኸመይ ደኣልና ሓደ፧ እንታይ’ዩ ዘመሳስለና፧ ከመይ ኢልና ኢና ሰባት ነናትና ኮድ (DNA) ዘለና ክንስና፡ ንሰባት ንመስል፧ ከመይ ኢሎም’ዮም ካልኦት ክፍጥረታት ዝመሳሰሉን እንመስሎም፧

ተመልከት!

ልብና መሊእና እንዕንገሎ ሓባራዊ መኣዲ እንተልዩ፡ ከም ክርስቲያን ፡ ንሓደ ኣምላኽ ብሓንቲ ሃይማኖትን ሓንቲ ጥምቀትን፡ ሓንቲ ቤተክርስቲያንን ሓንቲ ድንግልን ብሓደ መስቀል ሓደ ንኸውን፡፡ ንሓንቲ መንግስቲልተ ሰማያት ንምውራስ ከኣ፡ መከራን ገድልን ናይ መስቀል ተሰኪምና ላዕልን ታብትን ክንብል ንግደድ። ተዘይኮነ እቲ እንጽበዮ ንክርስቲያን ዝተዳለወ መንግስተ ኣምላኽ ኣይንወርስን። ከም ሰባት፡ ፍቕሪ ልውህና፡ ልግሲ ትሕትና፡ ምክብባር ምክእኣል እናተለጋገስና ብሓድነት ንነብር። “ በተንትን ጸየቕትን፡ ተበለጽትን ኣናቖትትን” ሰባት ከምዘለዉ ኣብ ግምት የእቲኻ ማለት'ዩ። ከም ፍጥረታት ድማ፡ ካብ ሓደ ናይ ኣምላኽ ዒላ ዝግለል፡ ዘይውዳእ ዝተፈላለየ ውህበታት፡ ዘዘድልየና ከም ለውሃቱን ፍቕሩን እናተማቐልና፡ ኣብዛ ሓንቲ ኣድማስ ብሓደ ንነብር። 

እግዚአብሔር ንዓመት ብሳህሉን ምሕረቱ ክኽልላ፡

ንዓና ንክርስቲያናት ደቁን ንዂሉ ሰብን ፍጥረትን፣

ምሕረቱን በረኸቱን የብዝሓልና።

ብመስቀሉ ብርሃኑ ይለግሰልና!

እንቋዕ ናብ ብርሃነ መስቀሉ ኣብጽሓና!

ንዓመታ ብዕድመ ብጥዕና፡

ብንስሓ ብቕድስና የጽንሓና!

ኣሜን ወኣሜን!

ወስብሐት ለእግዚአብሔር ለዘአብጽሐነ እስከዛቲ ዕለት!

...ንክናኣናዊት'ኳ ዝመሓርካ ..!!!

በስመ ሥላሴ

ንክናኣናዊት'ኳ ዝመሓርካ!

ማቴ15፥22

ኣብራም'ዩ ግብረይ ኣብ ካራን ምንባረይ

ሃብታም'ዩ ሰፈረይ ብዘመናዊ ስራይ

ኣብኡ'የ ዝወድቕ ይሃጥር ብስጋይ

ሓሽከት ሓጣውእ ይበራረዩለይ

ገንዘብ ሶዶም ክኸስብ ገንዘብካ ይስእኖ

እናሻዕ ይንኖ ካብ ቤትካ ይወጽእ

እናሓንሳእ ትዝ ትብለኒሞ ይፍትን ክትንስእ

ምሕረትካ ዘዘኪረ ከይተሰከፍኩ ስምካ ይጽውዕ

መገደይ ንኽዕረ እናሻዕ ይግዕር ይጠርዕ

"ነታ ክናኣናዊት'ኳ ዝመሓርካ

ከም ዉሉድካ ቈጺርካ ዝሓቖፍካ

ኣነስ ኣበይ ደኣ ከይርሕቐካ

ፍጡርካ እንድየ ክሉል ብዕምኮኻ"

ኢለ ይምሕጸን

የስምዖም ነቶም ዘስምዑኻ

ስለዘይበቅዕስ ይጽጋዕ በቶም ዝበቚዕኻ

ንስኻ ድማ ግብጽ ትብለኒ

ነዛ ክናኣናዊት ነፍሰይ

"እንጀራ ውሉድ ኣይወሃብን ነኻልብ!"

ኢልካ ትወቕሳ እናሻዕ ትዂስኲሳ

ምህላውካ እንከሎ ኣብ ኲሉ

"ኣዳም ኣበይ ኣሎኻ!" ኢልካ ትሓተኒ

ምሕረት ከምዘድልየኒ እናፈለጥካ

"ክትመሓር'ዶ ትደሊ ኢኻ!" ትብለኒ

ኣቤት ሰሚዕካ ክትእሎ

ኣቤት ምሒርካ ክትክእሎ

ኣቤት ሓቲትካ ክትክእሎ

ኣቤት መሊስካ ክትክእሎ

ኣቤት ምሂርካ ክትክእሎ

ኣቤት ሓቚፍካ ክትክእሎ

ነዚ ብዝዋብዕ ደም ተተቲዑ

ብዂሎም ውድቀታት ጸሎሎ መሲሉ

ዘሎ ክናኣናዊ መንነተይ

ኣብ ቤትካ ተተኺሉ

ክነብር ከምዘይጀመረ

'ምስቶም ቀዳሞት ኔረ

ምስ ዳሕረዎት ተቘጺረ!'

ኢለ ይሓስብ ቃልካ ዘዘኪረ

ነዚስ ኖንዶ ንስኻ ኣነ ደኣ ከመይ  ክርስዖ

ኖንዶ ንስኻ ንመሓርነትካ ከመይ'ለ ይዝንግዖ

ንስኻ ኣንታ ለዋህ ኲሉ ትፈልጥ

ከምዘፍቅረካስ ንስኻ ትፈልጥ

ምስቶም ዝጀመሩ ከምዝጀመርኩ

ምስቶም ዝተመሓሩ ከምዝተመሓርኩ

ምስቶም ኣብ መዝገብካ ዝሰፈሩ

'ዉልድ' ተባሂለስ ከምዝሰፈርኩ

እወ ንስኻ ትፈልጥ

ድግምጋም ምሕረትካ

ንድግምጋም ውድቀተይ

ከመይ'ሉ ከምዘሐለሎ

እወ ትፈልጥ ኢኻ ብሓጢኣት ክልሎ

ትፈልጥ ኢኻ ክመሓር ብተሎ

እቲ ቅድም

ውሽጠይ ብሓዘን ከምዘይነበዐ

ትፈልጥ ኢኻ

ብድግምጋም ትፋእ ከምዝጸነዐ

"ነታ ክናኣናዊት'ኳ ዝሰመዐ

ነቲ ጒሁይ ልባ ብምሕረቱ ዘጸናንዐ!"

ኢለ ከምዘይ ተማህጸንኩ

ነዚ ከራን ስነ-ምግባረይ ከምዘይተጸየንኩ

ከናኣናዊት ነፍሰይ 'ታይ ተሪፍዋ

እነሀት ሓሻካ

ኣሻባ ተመሊሳ ናብ ጫካ

መልክዓ ተበሊሉ ሕልናኣ ዓሪብዋ

ኣበይ ከይትህሉ 'ታይከ ከይህልዋ

ኲልንትናኣ ተሓሊሉ 

ሶዶም ዓብሊልዋ

ጎሞራ ዉሒጥዋ

ሓዳገ-ኣበሳ ተዘይትኸውንሲ

በየን ምተረኽበ ፈውሲ

ምድሪ-ቤተይ ኣሺኹ

ሰብነተይ በዂቢኹ 

ንእደይ ፈሪሱ ዘይምቹእ ማእሲ

ኣይምኸኣልክዎን

ኣይምለመድክዎን

ግና ሳላ'ቲ

ዝዛሪ ምሕረትካ

ሳላ'ቲ ዝራሩ ለውሃትካ

እናሻዕ ትድሀ ትጽውዓኒ

ካብ'ቲ ሸብዳዕዳዕ ስሒብካ ተውጻኒ

'ሞ ኣነ ኸኣ ይገርመኒ

እቶም ፍቑራትካ ይግረሙ

ንብዓተይ የሕዝኖም'ሞ ይልምኑ

ምሕረትካ ይግለጽ'ሞ ድግሶም ይዓጥኑ

"ኣንታ መሓሪ መሓሮ ግዳ

ኣንታ ጸዋሪ ኣቕልለሉ'ንዶ ዕዳ"

ይብሉ እናሻዕ ይምሕጸኑ

ክሳዕ ሽርሒ ሰዶም ካብ ውሽጠይ ዝዓኑ

ወትረ ይማልዱ ይልምኑ

"ነታ ክናኣናዊት'ኳ ዝሰመዐ

ነቲ ጒሁይ ልባ ብምሕረቱ ዘጸናንዐ

ንዓይ'ውን ምስ ኣብርሃም ይሕሸኒ

ዉሉድካ'የ ክናኣን ዝሰፈረይ

ኣይትመንነኒ ምሕረትካ ኣብዝሓለይ"

ኢለ እንክጽውዕ ከም ድፍረት ኣይትቚጸረለይ

ምሕረቱን ለውሃቱን ናይ እግዚአብሔር፡

ጸሎትን ማልዶትን ናይ ቅዱሳን

ወትረ ኣይፈለየና።

ሎቱ ስብሓት!!

…በዓል ኣብዚ ኣሎኹ…!

"ኣበይ ኣለኻ ንዘይበሉኻ፡ 'ኣብዚ ኣለኹ' ኣይትበሎም!"

በስመ ሥላሴ

√ ኣንታ ብሩኽ ሰብ፡ ብዙሓት ብዛዕባ ህላውነትካን ኲነታትካን ዝግደሱ ይመስለካ ይኸውን'ዩ። ካብ'ዚ ግምት'ዚ ተበጊስካ ኢኻ ድማ መስለኒ፡ ብዛዕባ እንታይነትካን ኲነታትካን ከተረድእ ዝተሃንደካ እንክትመስል፡ መለኸት ናይ ማስሜድያ ክትነፍሕ ንዕዘበካ ዘሎና። ኣበይ ኣለኻ ከይበልናካ፡ 'ኣብዚ ኣለኹ፡ እንታይ ትዓዪ እንከይበልናካ፡ ከምዝን ከምትን ይሰርሕ' ክትብለና ትውዕልን ትሓድርን ዘሎኻ። 

ኢዶእ!

√ ብዛዕባ ምስልኻን ውሽጣዊ ባህግታትካን ኣረድኣና ኣይበልናካን። ንመን'ኻ ትጸልእ፡ ንመንከ ትፈቱ ኢልና'ውን ብሕቶ ኣየዋጠርናካን። 'ታይ ደኣሞ ብዛዕባ ምስልኻን ውሽጣዊ ኲነታትካን ተዘይነገርኩኹም፡ እናኽትብል ክሳብ ክንድዚ ትውጠር። 

ኣጆኻ ኣይትሸገር ክሳብ ክንድኡ

ሓደ’ሎ ዝሓሊ ብኣና ይኹን በኣኻ/ብኡኡ

ኣብይከ ከይትኽወሎ ኣብቲ ሃሉ ኣብኡ 

ኣጥዕዩ'ዩ ዝፈልጥ ዘለሊ ብባህሪኡ

ብዂሉ ዙርያ እናረኣያ ኣዕይንቱ

'ኣበይ ኣለኻ፧' እናኽብል ይነብር ብኣንደበቱ

ንስኻ ግን ተኸኣልካ ንዑኡ ደኣ 'ኣብ'ዚ ኣለኹ' በሎ

'ምበር ንዓናስ ኢልካና ኣይኢልካና

ንዓብሰልካ ነይብልና!

√ ንሕና እቶም ናይ ወትሩ ተዓዘብትኻን ተኸተልትኻን ክንከውን እትደልየና'ውንኮ፡ ከማኻ እንወድቕን እንትንስእን ማንም ሰባት ኢና። ስለምንታይ ደኣ ኢኻ ብሓደ ከማኻ ሰብ ተጸሊኻ ክሳብ ኣብዚ ዘለኻዮ ጥርዚ ዝበጻሕካ ሰብ ክንስኻ፡-

ብኣይ ብጽሉው ተዘይጸልውኹም

ይኣይ ህሉው ምስለይ ተዘይነገርክኹም

በብዕለቱ ተዘይሰዓብኩምኒ

ከከም ኲነታቱ ተዘይኣድነቕኩምኒ...

 እናኽትብል ክሳብ ክንድዚ ክትህንደድ ትውውዕልን ትሓድርን ዘሎኻ። ካን ኣምላኽና ከተረስዓናሞ፡ ንዕኡ ገዲፍና ኣሰርካ ክንረግጽ ድዩ ድሌትካ፧ በል ንሕናስ ኣይንውዕሎን!

ወረ ደሓን 'ኣበይ ኣለኻ እንከይበልናካስ፡ ኣብዚ ኣለኹ' ክትብለና ትውዕል ትሓድር ኣሎኻ፦

ነቲ ከም ንኣዳም ነቲ ግጉይ

ንቡሩ ሓዲጉ ኣብ ግዳም ንዘእውይ

ንድምጺ ሰራሒኡን ጸዋዒኡን

ምስ ሰመዐ

ህላውነቱ ተሓቲቱ ምስ ተጸወዐ

ንሱ’ቲ ግጉይ ኣዳም ምስ ደቁ

ብልቡ ንዘመናት ነበዐ ፈሊጡ ሓቁ

ንሱ ግን‘ቲ ዘየዕብር ቃሉ

ዝፈጠሮ ንኣዳም ብምስሉ 

ዳሕራዩ መሲሉ ዉሉዱ ወዲ ጓሉ

እወ ናይ ኣዳም ጉዳም

ኣማሲኡ ጸቢቕሉ

ፈጣሪ ባሕርይ ስጋ ምስ ለበሰ

ኣዳም ካብ ግዳም'ዩ ነቒሉ

ናብ'ቲ ለሰ ናብ ክብሩ ዝተመልሰ

ከም ንሳውል እቲ ድንጉይ

ምስ ደርበይቲ እምኒ እናኽውዕል

ምህንዳዱ ምህንዳድ'ቶም ዓቀይቲ

ኣሻቡ ንዒቕዎ ሕልሚ'ቶም ሓለምቲ

ካብ ኣጽነትቲ መስቀላውያን

ተፈልዩ ዝተጸምበረ ምስቶም ኣቅሌስያውያን

ከም እንስምኦን እቲ ኣረጋዊ

ዘይፍሓቚ ዓሚቚ ጽሑፍ 

ብሰንኪ ፍርሑ መታን ከይፍሑቕ

ብለይቱ ዝተነግሮ ፍጻመ'ቲ ርሑቕ

ከም 'ንፍያታይ'ቲ በዓል ቀራንዮ

ስቑል ብየማናይ ጽሉው ብቕጸብት'ቲ ዝረኣዮ

ናይ ዘመናት ሽፍታ

ግን ከኣ ዝበቐዐ ፈላማይ ናይቲ ንምነዮ

√ ነዚኣቶም ዝጸወዐን ዝጸለወን ሓደ ኣካል ከምዘሎ መቸም ትኣምን ኢኻ፡፡ እወ ልብኻን ውሽጥኻን ይነገረካን ይኣምነሉን'ዩ፡፡ እሞ ደኣ፡ ልብኻ  ነቲ ጸዋዕን ናይ በሓቂ ጸላውን ፈጣሪ ክፈልጦ እናደለየ ንምንታይ ትሕንግዶ ኣሎኻ፧ ሕደጎ'ንዶ ንልብኻ ኣይተሳጒጎ።እምበርከ ብዛዕባ ልብኻ ናበይ ገጹ የሳሲ ከምዘሎስ ባዕልኻ ተርእየና ኣሎና።  'ደለ ይኹን' ኢልና'ውን ስቕ ምበልና። ንሕናን ልብናን ግን ከም ኣዳም ኣሻብና ግብርና ከጣዕሰናን ከሕፍረናን እናደለየ፡ እሞ ድማ ድሌትናን ባህግናን፡ በቲ ሓቀኛን ደላዪ ጽቡቕናን፣ ኣብ ውሽጢ’ቲ ሳውል ልብና ‘ኣበይ ኣለኹም' ተባሂልና ክንጽዋዕ እናደለናስ፡ ንስኻ ኣበይ ኣለኻ እንከይበልናካ፡ 'ኣብዚ ኣለኹ' እናበልካ ንምንታይ ልብና እናሻዕ ትውጥጦ፧ ስለምንታይከ ምስልኻን ድሌትካን ከተርእየና ክትብል፡  ምስልናን ድሌትናን ሕልምናን እተረስዓና፧ ሕደግ'ዶ ንየዕይትና ኣይትወጥጦ!

√ ንሕና ከምዚ ትርእየና፡ ድሮ ካብ ጎደና'ቶም ደርበይቲ  እምኒ ሳውላውያን ወጺና ኢና፡፡ ፍኖተ-ጳዉሎሳውያን ክንክተል ከኣ ህርድግ እንብል ዘለና ናይ ስደት ኣንጾክያውያን ኢና። ድሮ’ኳ ኣብ ባዕዲ ሃገር፣ ቅዱስ ተግባር ክፍጸም፣ መንበረ ታቦት ክስረት ንክብረ ታቦትን ክዝየም፣ ኣብቲ ዘይቅዱስ ሃገረ ቅዱስ ተግባር ክፍጸም ብርእዮ ንርእን ንሰምዕን ኣሎና።

እንተ ንስኻ ግን ኣንታ በዓል እምኒ

 'እነሀልኹልኩም ደንጎላ ይድርቢ

ክጸልወኩም'ዩ ድሌተይ ንንእሽቶ ይኹን ዓቢ

ከማይ እንዶ ኲኑ

ንዑ'ባ ኣብ መጋርያይ ስሓኑ!'

ትብል ዘለኻ ግን፡ ልብናን ቀልብናን ንምቊጽጻር ድዩ እዚ ዂሉ ህንደዳ። ዕደ ነሳእካ! ንሕናስ ተኸኣልና ኣቅሌሳውያን ንምዃን ደድሕሪ ጳውሎስ ክንስዕብ ኢና፡፡ ተዘይከኣልና ግን  እምንን ደንጎላን ካብ ምድርባይ ኢድናን እግርናን ደኣ ንእክብ'ምበር፡  ከማኻ ኣሽንኳይዶ መደረጋሕ፡ ንማንም ምስኪን ሓንቲ ጸጸር'ኳ ኣይንክንድርብየሉን ኢና።

√ እወ ንስኻ'ውን ኣንታ በቲ ሓደ ጫፍ ዘሎኻ፡፡ ቀዳማዊ ስምኦን ኣረጋዊ ኴንካ ትኽእሎ ኢኻ።እረ ቅምጥ ኢልካ ካብ ምብራቕ ዝመጻኻ ናይ ስደት ሉተር ከምእትመስል ንፈልጥ ኢና። ከምኡ ስለዝኾንካ ኢኻ ድማ፡ ቀዳማውያን ጽሑፋት ክትፍሑቕን፡ ጥንታውያን ኣሰር ክትድምስስን ትውዕል ትሓድር ዘሎኻ። ንሕና ግን ነቲ ገና ብለይቱን ከይወገሐን እንከሎ፡ ናይ ጽባሕ ምስልን ፍጻመን ዝተነግሮ፡ ናይ ሓዱሽ ኪዳን ስምኦን ኣረጋዊ ክንመስሎ'ዩ ድሌትና። እወ፡ ጥንታውያን ጽሑፋትና ኣይንፍሑቕን፡ ዘለኣለማዊ መንገድናን ህሉዊ ወንበርናን'ውን ኣይንለቅቕን። ተኸኣልና ነቲ ብቤተ-ኤል ዝተገብረልና  ውዕለት፡ ንዂሉ ዘይሰመዐ ወገሐ-ጸበሐ ክንነግር ኢና። ነታ እግርና መታን ደልዲሉ ክትከል፡ ኰልታፍ ልሳንና'ውን ፈጺሙ ክጸሪ፡ ከይነዓቐት ሓመድና ነጊፋ ካባኣ ዘልበሰትና ቅድስቲ ቤተ-ክርስቲያን ወትረ ከነመስግና ኢና። ተዘይከኣልና ግን ውዕለት ናይ'ታ ብልሳና ዘለሰነትና ጥንታዊ ኣቅሌስያ ብፍጹም ኣይንርስዕን።

√ እምበኣረከስ እንተንስኻ ኣንታ ኣበየ ኣለኻ ከይበልናካ ‘ኣብዚ ኣለኹ’ እትብለና ዘሎኻ፦ ተኾነ ድምጺ መለኸት ባዕዳውያንን ግብረ ሰብ እምንን ዶንጎላን ሓዲግካ፡ ድምጺ ዳዊትን ማኅሌትን ክትሰምዕን ንዓ ነጆ። ኣጆኻ ብሕሉፍካ ኣይትሕፈር ኣይትሸማቐቕ ኣይትሸቚረር።  እዛ ቅድስት ቤት ብርግጽ ትወሓሰካ'ምበር ኣይክተሕፍረካን'ያ። ተዘይኮነ ግን  ከም ምርጫኻ ንበር፡፡ ከምቲ ትደልዮን ትሓልሞን ክትከውን ትኽእል ኢኻ። ንዓና ግን ምርጫ ከምዘለናን ኣብ ምርጫና ክንነብርን'ባ ሕደገና! ንድሌታትናን ሕልምታትናን ቀቲልና፡ ኣብ ሕልምኻን ባህግኻን ክንነብር ኣይትፍረደና።

'ኣበይ ኣለኻ ከይተባህለ፡ ኣብዚ ኣለኹ ዝበለን፡ ንመኣዲ ከይተኣንገደ ጽብሑለይ ዝበለን፡ እቲ ምስዝነብሩ ኣይነብር እዚ ምስ ዝኸብሩ ኣይከብር!' ክልቲኦም ሓደ'ዩ ነገሩ!!

እግዚአብሔር ብኽብሩን ንኽብሩን ክንነብር፡ ብጸግኡ ይጸግወና ብምሕረቱ ኣይፈለየና! ዓመትናን ዘመንና መጻኢናን የጸብቐልና ኣሜን ወኣሜን!

ሎቱ ስብሐት!

ምንጪ፦ [ ዘፍ 3፥9፡ ኢሳ 7፥14፡ ሉቃ 2፥25-26፡ ሉቃ23፥41-43፡ ግብ  9፥1-30፡  ዮሐ 1፥14፡ 1ዮሐ1፣2-4 ]